Sẽn zabd-b ne Wẽnnaamã pa na n tõog ye
Sẽn zabd-b ne Wẽnnaamã pa na n tõog ye
“Sɩd-sɩda b na n zaba ne foo, la b pa na n tõog foo ye.” —ZEREMI 1:19, NW.
1. Tʋʋm-bʋg la a Zeremi paam-yã, la a tʋʋmdã kaoosa wakat a wãna?
A ZEOVA tʋma bi-bɩɩg a Zeremi t’a yɩ no-rɛɛs tẽn-tẽnsã taoore. (Zeremi 1:5) Rẽ yɩɩ Rĩm sõng a Zozias sẽn da rɩt naam Zida wã wakate. A Zeremi bãngr-goam togsg tʋʋmdã kẽnga taoor gudgrã wakat n tɩ ta Babilon sẽn wa n zab n deeg Zerizalɛmã n tall nin-buiidã n kẽng yembdã.—Zeremi 1:1-3.
2. Wãn-wãn la a Zeova raool a Zeremi, la ned sã n da zab ne no-rɛɛs kãnga, rat n yeelame tɩ bõe?
2 Ra yaa vẽeneg tɩ bʋ-kaoor koeesã a Zeremi sẽn da segd n togsã ra na n waa ne kɩɩsgo. Woto yĩnga, Wẽnnaam daool-a lame, bũmb ning sẽn da be taoor n gũud-a wã yĩnga. (Zeremi 1:8-10) Wala makre, gom-kãensã kenga no-rɛɛsa pɛlga: “Sɩd-sɩda b na n zaba ne foo, la b pa na n tõog foo ye, bala ‘mam bee ne foo,’ a Zeova togsg la woto, ‘sẽn na yɩl n fãag-fo.’ ” (Zeremi 1:19, NW ) Ned sã n da zab ne a Zeremi, dẽ ra rat n yeelame t’a soabã ra zabda ne Wẽnnaam. Rũndã-rũndã a Zeova tara sõgen dãmb sull sẽn wõnd no-rɛɛsa, tɩ b tʋʋmdã wõnd a Zeremi tʋʋmdã. B togsda Wẽnnaam bãngr-goamã ne raood wala yẽ. Yaa koɛɛg sẽn womd biis neba fãa la tẽn-tẽnsã fãa zutu. Sẽn zems ne nin-kãens manesem sẽn yaa to-to koe-kãngã taoorã, a biisã tõe n yɩɩ wẽng bɩ sõmbo. La wala a Zeremi wakatã, neb n be n zabd ne Wẽnnaam, b sẽn zabd ne a sõgen dãmbã la tʋʋm nins a sẽn bobl-b tɩ b maanã yĩnga.
B zabda ne a Zeova sõgen dãmbã
3. Bõe yĩng tɩ b zabd ne a Zeova sõgen dãmbã?
3 Yʋʋm kob-gĩnd 20 soabã sɩngr tɛka, b talla zabr ne a Zeova nin-buiidã. Tẽns wʋsg pʋsẽ neb sẽn tar yam-wẽns n bao n na n gɩdg Wẽnnaam Rĩungã koe-noog moonego, bɩ b yals-a menga. Yaa tõnd bɛ meng-mengã sẽn yaa Munaafɩɩkã, sẽn ‘gõod wa gɩgemd sẽn kelemd n baood a sẽn tõe n paam a soab n sãamã’ n tusd-ba. (1 Pɩɛɛr 5:8) “Tẽn-tẽnsã wakat b sẽn yãkã” saab poor yʋʋmd 1914, a Zeova zĩniga a Biriblã t’a yaa tẽngã rĩm paalga, n kõ-a noor t’a ‘rɩ naam a bɛɛba sʋka.’ (Luk 21:24, NW; Yɩɩl Sõamyã 110:2) Kirist wilga a pãnga n dig a Sʋɩtãan n yiis saasẽ, la a kɩt t’a pa tẽngã sẽnese. Munaafɩɩkã sẽn mi t’a wakatã yaa koɛɛgã yĩng kɩtame t’a tar sũ-yikr ne kiris-neb nins sẽn zaeyã la b tũud-n-taasã. (Wilgri 12:9, 17) Kɩɩsdb kãensã sẽn zab ne Wẽnnaamã n yɩlmã baasa ne bõe?
4. Mak-bʋs la a Zeova nin-buiidã yã Dũni gill Pipi Zabrã, la bõe n zĩnd yʋʋmd 1919 la yʋʋmd 1922?
4 Dũni gill Pipi Zabrã wakate, a Zeova sõgen dãmb nins sẽn zaeyã paama makr wʋsg tẽebã wɛɛngẽ. B ra yaand-b lame la b kãnegd-ba, neb kʋʋng da rigd-b lame, la b ra pãbd-ba. Wala a Zezi sẽn da reng n togsã, b lebga neba, ‘buud fãa sẽn kisgi.’ (Matɩe 24:9) Zabrã sẽn da wa n wulumdã sasa, Wẽnnaam Rĩungã bɛɛb tũnuga ne sɩlem b sẽn da tũnug ne n zab ne a Zezi Kirista. B rõda a Zeova nin-buiidã n yeel tɩ b yaa tẽn-dãmbdba, la b wẽ Wẽnnaam tẽng zug siglgã nif menga. Yʋʋmd 1918, sig-noy kiuugã b yiisa sɛb sẽn kõt sor tɩ b wa yõk Sosiete wã perzidã sẽn da yaa a Joseph Rutherford ne a tʋmd-n-taas a yopoe nins sẽn pẽ ne-a n yɩɩdã. B kaoo raop kãensã a nii wã bʋʋd n kõ-b sɩbgr tɩ zems ne yʋʋm wʋsg bãens-roogo. La b tall-b lame n kẽng bãens-roog sẽn be Atlãnta, Zorzi sẽn be Etazĩni wã. Kiis a wɛ poore, b yiis-b lame. Yʋʋmd 1919, sig-noy kiuugã, bʋ-kaoodbã rɩka sard n wilg tɩ b bʋʋdã yɩɩ kɛgre, n lebs n kõ-b bʋʋm. B lebsa bʋʋdã sẽn na yɩl tɩ b le maan a to, la kaoosg poore, goosneema wã basame t’a kõn le bool-b bʋʋd ye. Woto roka taal ning sẽn da zao saam-biig a Rutherford ne a tʋmd-n-taasã zug fas-fasɩ. B ye sɩnga b tʋʋmã, la tigis-kãsems nins b sẽn maan Sedaar Põent, Ohio, yʋʋmd 1919 la yʋʋmd 1922 pʋgẽ wã ye paasa Rĩungã mooneg tʋʋmd pãnga.
5. Wãn-wãn la a Zeova Kaset rãmbã maan Alemayn Nazi wã pʋgẽ?
5 Yʋʋmd 1930 tɛk pi-gĩndã, na-toom n puki, tɩ Alemayn, Itali, ne Zapõ rag n lagem taab n maan kaool b sẽn boond tɩ Puissances de l’Axe. Yʋʋm pi-gĩnd kãng sɩngrẽ, b sɩnga Wẽnnaam nin-buiidã namsg tɩ loog noore, sẽn yɩɩd fãa Alemayn sẽn da yaa Nazi wã pʋgẽ. B yiisa noor n gɩdg tʋʋmdã. B kẽe zags n yõg neba, n kẽes bãmb tusa nams-bɛɛg zĩisẽ b sẽn zãgs tɩ b kõn bas b tẽebã yĩnga. B ra zabda ne Wẽnnaam la a nin-buiidã n dat n menems a Zeova Kaset rãmbã tẽns nins sẽn da tar na-toomã pʋsẽ. A Zeova Kaset rãmbã sẽn kẽng bʋʋd Alemayn pʋgẽ n na n tɩ mao b dʋrwa rãmbã yĩngã, Tẽngã Ministr ning sẽn get bʋ-kaoorã yellã maana sõs-wok sẽn na yɩl n maan a sẽn na maanega t’a Zeova Kaset rãmbã ra tõog ye. A yeela woto: “Bʋ-kaoodbã pa tog bal n ges tõogã sẽn yeta bal n wa pa tʋm b tʋʋmda sõma ye. La baa ne laloa wã sẽn tõe n wa ne zu-loees ninsã b segd n baoo soay n tʋm b tʋʋmdã sẽn tar yõod wʋsgã.” Woto da rat n yeelame tɩ ra na n yɩɩ toog tɩ b paam bʋ-kaoor sẽn yaa tɩrga. Nazi rãmbã ra yetame bal t’a Zeova Kaset rãmbã tʋʋm ra wata ne beem bɩ kisgri, la ‘a ra tiisda b tẽngã nazism naam viglgu.’
6. Bõe modgr la b maan sẽn na yɩl n yals tõnd tʋʋmdã Dũni gill Zabr a Yiib soabã wakat la a poore?
6 Dũni gill Zabr a Yiib soabã wakate, b gɩdga Wẽnnaam nin-buiidã tʋʋm Ostrali, Kanada, la tẽns a taab sẽn be Gãrãnd Bertayn Komonwɛlfã pʋgẽ sẽn be Afiriki, la Karayiib ne Pasifik ko-sʋk tẽnsã pʋsẽ. Etazĩni, bɛɛb sẽn tar pãn-tusdg la neb b sẽn taas kɩba-kɛga tũnuga ne ‘tõog n wa ne gudgri.’ (Yɩɩl Sõamyã 94:20, NW ) B maoo bʋ-kaoodb taoor yɛl sẽn tɩ loe ne darpo pʋʋsg la noy galʋ-tẽns sẽn yiis n gɩdgd zak ne zak moonegã wɛɛngẽ. La bʋ-kaoodb sard sẽn kõt tõnd bʋʋm b sẽn dɩk Etazĩni la b gãneg tɩ yaa teelg sõma yam-yãkr balengã wɛɛngẽ yĩnga. Ne a Zeova sõngre, bɛɛbã modgr pa tõog ye. Zabrã sẽn da wa n kolg saab Eropã, b yiisa gɩdgrã. Kaset rãmb tusa b sẽn yõg n kẽng Alemayn nams-bɛɛgã zĩisẽ wã la b kõ paam-m-menga. La maoorã ra pa sa ye. Dũni gill Zabr a Yiib soabã sẽn loog bal la Zab-mugrã sɩng-yã. Erop Yaang tẽnsã waa ne namsg n paas a Zeova nin-buiidã zutu. Pãn-soaadbã rɩka segls sẽn na yɩl n gɩdg tõnd kaset kũunã tʋʋmde, sɛbã sẽn tik Biiblã zugã waoong la zãma tigiss maanego. B kẽesa neb wʋsg bãens-roogo, bɩ b tall-b n kẽng forsem tʋʋm zĩisẽ.
Moonegã tʋʋmd kẽnga taoore!
7. Bõe la a Zeova Kaset rãmba yã Poloyn, Risi la tẽns a taaba pʋsẽ yʋʋm sẽn pa kaoosã pʋsẽ?
7 Yʋʋm pi-gĩnã sẽn loogã, b kõo sor Rĩungã tʋʋmd yĩnga. Baa Poloyn sẽn da ket n be kominism naam pʋgẽ wã, a kõo sor tɩ b maan daar a ye tigis-kãsems yʋʋmd 1982 wã. Rẽ poore tẽn-tẽns tigis-kãsems la b maan yʋʋmd 1985. Tẽn-tẽns tigis-kãsems n pʋgl yʋʋmd 1989, tɩ neb tusa yi Risi la Ukrɛn n wa kelge. Yʋʋm-kãng bala, Õngri ne Poloyn saka a Zeova Kaset rãmba tɩ zems ne laloa wã. Ra yaa yʋʋmd 1989 wã bãmb tɩ-sʋʋrã wakat la b siig Bɛrlẽ Lalgã. Kiis a wãn loogr poore, b saka tõnd tɩ zems ne laloa wã Alemayn de Lɛste. Rẽ poor bilf bala b maana tẽn-tẽns tigis-kãseng Bɛrlẽ. La yʋʋm kob-gĩnd 20 soabã yaoolem yʋʋm pi-gĩnd sɩngrẽ, b ra maanda modgr sẽn na yɩl n sɛg saam-biisã sẽn be Risi wã. Mosku b tɩ yãa tẽngã taoor dãmb kẽere, la yʋʋmd 1991 wã a Zeova Kaset rãmbã paamame tɩ b gʋls-b tɩ zems ne laloa wã. Wakat kãng tɛka, tʋʋmdã kẽnga taoor hal sõma Risi la tẽns sẽn da be pĩnd Iniõ Sovietikã pʋgẽ wã.
8. Bõe n paam a Zeova nin-buiidã yʋʋm 45 nins sẽn pʋgl Dũni gill Zabr a Yiib soabã poore?
8 Baa namsgã b tẽebã yĩngã sẽn maag zĩis kẽerã, a paasa zĩis a taaba. Dũni gill Zabr a Yiib soabã poore, yʋʋm 45 wã sẽn pʋglã pʋgẽ, tẽns wʋsg zãgsame tɩ b kõn sak a Zeova Kaset rãmbã tɩ zems ne laloa wã ye. Sẽn paas rẽ, Afirik tẽns 23, Aazi tẽns a 9, Erop tẽns a 8, Amerik Latin tẽns a 3, la tẽns a 4 sẽn be ko-sʋk tẽns kẽer sʋk pʋsẽ, sã n pa tõnd la b gɩdg-yã, yaa d tʋʋmdã.
9. Bõe la a Zeova sõgen dãmbã da vɩɩmd Malawi?
9 Malawi, a Zeova Kaset rãmbã paama nams-bɛɛg yʋʋmd 1967 tɛka. B sẽn yaa pa-kẽesd-m-toog rãmba, b sẽn yaa kiris-neb hakɩɩkã yĩnga, tõnd saam-biisã sẽn be be wã pa sak n da parti politik rãmb sɛb ye. (Zã 17:16) Yʋʋmd 1972 wã Malawi parti di kõngrɛ sẽn maan tigisg poore, b leb n yika nen-kɛglem wẽnem tʋʋm maanego. B riga saam-biisã n yiis b zagsẽ la b zãgs-b tʋʋm dɩkre. Bãmb tusa zoeeme n yi tẽngã sẽn na yɩl tɩ b ra kʋ-b ye. La neb nins sẽn da zabd ne Wẽnnaam la a nin-buiidã tõogame bɩ? Abada! Yɛlã sẽn toeema poore, Rĩungã koe-moondb sõor sẽn sãd 43 767 n kõ rapoor Malawi yʋʋmd 1999 wã pʋgẽ, tɩ neb sõor sẽn yɩɩd 120 000 wa bab-sak tigis-kãsemsã beenẽ. Filiall paalg la b me na-tẽngẽ wã.
B baooda yell n na n dogl tõndo
10. Wala b sẽn maan ne a Danɩɛllã, bõe la Wẽnnaam rũndã-rũndã kɩɩsdbã maan-yã?
10 Sɩdã kɩɩsdba, egiliiz taoor dãmbã, la neb a taab pa rat n sak tõnd koɛɛgã sẽn yit Wẽnnaam Gomdã pʋgẽ wã ye. Dũni kiris-nedemdã tũudum neb tusa kɩɩsdb tɩ b baood sore, b sẽn yet tɩ zemsa ne laloa wã, sẽn kõt bʋʋm tɩ b zab ne tõndo. Yaa sɩlem bʋs la b tũnugd ne wakat ninga? Bõe la no-rɛɛs a Daniɛll bɛɛbã maan-yã, b sẽn wa n na n zab ne-a wã? Daniɛll 6:5, 6 pʋgẽ d karemdame: “Nanamsa kãsem dãmba ne nanams a taaba baoo yell n dat n dõd a Daniɛll soolma yell poorẽ. La bãmb ka tõog n yã bũmb n dõd-a ye. Bala yẽ ra maanda sɩda, yẽ ka konge, walla maan wẽng ye. Woto, nin-bãmb yeelame. ‘Tõnd ka na n tõog n yã bũmb n dõd a Daniɛll sã n ka ne Wẽnnaam tõoda yell ye.’ ” Woto me, rũndã-rũndã kɩɩsdbã baooda yell n na n dogl tõnd zutu. B yik n tara goam “tũudum wil-wẽns” wɛɛngẽ. La b makdame n yetẽ t’a Zeova Kaset rãmbã yaa nin-kãens buudã. B tũnugda ne kãnegre, gom-n-yɛg ne sɩlem, la zɩlem-beed n gomd n kɩɩsd tõnd sẽn balemd ne manesem ningã la d sẽn tũud Wẽnnaam noyã ne kɩs-sɩdã.
11. Zɩlem-be-gom-bʋs la a Zeova Kaset rãmbã kɩɩsdb kẽer maan-yã?
11 Tẽns kẽer pʋsẽ, tũudum a taabã neb la pãn-soaadb pa rat n sak n deeg tɩ tõnd tũuda “tẽeb sẽn yaa sõama sẽn ka tar yell tõnd Ba a Wẽnnaam nifẽ” ye. (Zak 1:27) Kɩɩsdbã yetame tɩ tõnd ka “tũudum nebã sẽn mi” ye, baa ne d sẽn tʋmd d kiris-nedemdã tʋʋm tẽns 234 pʋsẽ wã. Bilf sẽn deng tẽn-tẽns tigis-kãseng sẽn zĩnd yʋʋmd 1998, Atɛn zʋrnall a yembr n lebs n dɩk Gerɛk Ortodogs tũudum egiliiz taoor dãmb goam sẽn yet t’a “[Zeova Kaset rãmbã] pa ‘tũudum nebã sẽn mi ye,’ ” baa ne Erop ninsaalb dʋrwa rãmb bʋ-kaoodb sullã sẽn dɩk sard n yeel tɩ rẽ pa sɩdã. Rasem a wãn rẽ loogr poore, galʋ-tẽn-kãng zʋrnall a to n togs tɩ egiliizã no-rɛɛs a yembr n yeel woto: “[A Zeova Kaset rãmba] pa tõe n yɩ ‘kiris-neb tiging ye,’ bala b pa tar bũmb sẽn wõnd kiris-nedemdã sẽn tɩ loe ne a Zezi Kirista ye.” Wã sɩd yaa lingr meng-menga, bala tũudum sull a to ba a yembr pa be sẽn wilgd vẽeneg tɩ b rɩka togs-n-taar ne a Zezi n yɩɩd a Zeova Kaset rãmbã ye!
12. D sẽn zabd d tẽebã zabrã sasa, bõe la d segd n maane?
12 D baoodame n na n teel la d vigl koe-noogã kãn-kãe n tũnug ne laloa wã. (Filip rãmba 1:7, NW ) Baasgo, d pa na n kɩɩs d tẽebã bɩ d loms d kɩs-sɩd sẽn pa vigsdã ne Wẽnnaam tɩrlmã noyã tuũb ye. (Tɩt 2:10, 12) Wala a Zeremi, tõnd ‘sẽbga d sɛɛg n togsd bũmb nins fãa Wẽnnaam sẽn togs tõndã,’ n pa basd tɩ Wẽnnaam bɛɛbã kẽes-d rabeem ye. (Zeremi 1:17, 18) A Zeova Sebr Sõngã wilga tõnd vẽeneg sor ning d sẽn segd n tũ wã. D pa tol n dat me n teeg “ninsaalb sõngr” sẽn ka pãngã, bɩ d bao n na n “soond Ezipt maasmẽ” sẽn yaa dũni kãngã wã ye. (2 Kɩbaya 32:8; Ezai 30:3; 31:1-3) D sẽn zabd d tẽebã zabrã, d tog n ket n teegda a Zeova ne d sũur fãa, n basd-a t’a wilg d nao-yakmã sore, la d ra teegd d mens bãngr ye. (Yelbũna 3:5-7) Sã n pa d sẽn tar a Zeova teelg t’a mengã gũud tõndã, tõnd tʋʋmdã fãa na n yɩɩ “zaalem bala.”—Yɩɩl Sõamyã 127:1.
B reega namsg la b pa kɩɩs b tẽebã ye
13. Bõe yĩng tɩ b tõe n yeel t’a Sʋɩtãan sẽn maan zabr ning ne a Zezi wã pa tõoge?
13 Makr ning sẽn yaa kãseng n yɩɩd ne ned sẽn pa kɩɩsd n ket n sakd a Zeova yaa a Zezi, b sẽn da rõd t’a yaa tẽn-dãmbd la ned sẽn kɩɩsd zu-sobendã. A sẽn vaees a Zezi yellã poore, a Pɩlat ra ratame n bas-a lame t’a looge. La kʋʋngã, tũudmã taoor dãmb sẽn da tusdã, kaasame tɩ b ka a Zezi ra-luk zugu, ba a sẽn da be a bʋʋm zugã. La b kosame tɩ b bas a Barabas sẽn yaa rao b sẽn da kẽes bãens-roog tẽn-dãmbg la nin-kʋʋr yĩngã a Zezi zĩigẽ! A Pɩlat le makame n na n kɩt tɩ kɩɩsdb kãensã sẽn yaa maan-tɩ-loog rãmba ra maan woto ye, la a baas n saka zãma wã sẽn kelemd n dat bũmb ningã. (Luk 23:2, 5, 14, 18-25) Baa ne a Zezi sẽn ki ra-luk zugã, zab-kãngã sẽn pukd kisgr sẽn yit a Sʋɩtãan nengẽ wã b sẽn maan Wẽnnaam Biriblã sẽn yaa bʋʋm soab zugã pa tõog baa bilf ye, bala a Zeova vʋʋga a Zezi n zẽk-a n zĩnig A mengã nug-rɩtgo. La yʋʋmd 33 T.W. Pãntekotã raare, ne a Zezi b sẽn kõ ziirã maasem, Wẽnnaam pʋdga vʋʋsem sõngã, n lugl kiris-neb tigingã, sẽn “yaa naaneg paalgã.”—2 Korẽnt dãmba 5:17; Tʋʋma 2:1-4.
14. Bõe n maane, Zʋɩf tũudmã neb sẽn zab ne a Zezi karen-biisã?
14 Rẽ poor bilf bala, tũudmã rãmb sõoga tʋm-tʋmdbã nugu, la kiris-nin-kãensã pa bas yɛl nins b sẽn da yã la b wʋmã togsg ye. A Zezi karen-biisã pʋʋsa woto: “La masã, Zeova, ges bãmb nug-sõogrã la kõ f yembsã tõog tɩ b ket n taasd fo gomdã ne raood wʋsgo.” (Tʋʋma 4:29, NW ) A Zeova reega b kosgã n pids-b ne vʋʋsem sõng la a keng-b tɩ b kẽng taoor ne b moonegã tɩ rabeem kaẽ ye. Pa kaoos la b ye kõ tʋm-tʋmdbã noor tɩ b bas moonegã ye, la a Pɩɛɛr ne tʋm-tʋmdb a taabã leokame: “A zemsame tɩ tõnd sak Wẽnnaam n yɩɩd nebã.” (Tʋʋma 5:29) Nug-sõogrã, yõg n suy bãens-rotã, la pãbrã pa tõog n gɩdg-b tɩ b pa yalg Rĩungã tʋʋmd ye.
15. A Gamaliɛll da yaa ãnda, la bõe saglg la a kõ a Zezi karen-biisã kɩɩsdb sẽn yaa tũudum neba?
15 Tũudmã nanambs manesem yɩɩ wãn-wãna? Rẽ “puuga bãmb sũyã tɩ b rat n kʋ [tʋm-tʋmdbã].” Baasg zãnga, Tõog karen-saamb yʋʋr sẽn boond t’a Gamaliɛll, sẽn yaa Fariziẽ tɩ nin-buiidã fãa ra waoogd-a n da be be. A yiisa tʋm-tʋmdbã Sãnedrẽ wã roog pʋgẽ wakat bilf yĩnga, n yaool n sagl tũudum kɩɩsdb kãens woto: “Bɩ y gũus ne bũmb ninga yãmb sẽn dat n maan ne doap kãensã. . . . la masã mam yeta yãmba, bɩ y bas doap kãense n da maan bãmb bũmb ye. La yɛɛsg kãngã wala tʋʋm kãng sã n yaa neb rẽnda a na n yɩɩ zaalem. La a sã n yaa Wẽnnaam dẽnda, yãmb ka tõe t’a yɩ zaalem ye; bɩ y gũus yãmb mense n da wa zab ne Wẽnnaam ye.”—Tʋʋma 5:33-39.
Zab-teoog pa be b sẽn na n dɩk n zab ne tõnd n tõog ye
16. Ne yãmb meng gom-biisi, wãn-wãn la y na n wilg bas-m-yam ning a Zeova sẽn kõt a nin-buiidã?
16 A Gamaliɛll saglgã yaa sõma, la neb kẽer sã n gomd n sõngd tõndo, d sɩd nanda rẽ. D leb n sak n deegame tɩ bʋ-kaoodb sẽn yaa tags-tɩrs rãmb rɩka sard n teel yam yãkr balengã wɛɛngẽ. Yaa sɩd tɩ tõnd sẽn tũud Wẽnnaam Gomdã ne kɩs-sɩda pa noom Dũni kiris-nedemdã egiliiz taoor dãmb ne Babilon Kãsengã, sẽn yaa dũni gill ziri tũudum soolmã taoor dãmb a taab ye. (Wilgri 18:1-3) Baa ne bãmba, n paas b rãmb nins bãmb sẽn tusdã sã n zabd ne tõnd me, d tara bas-m-yam kãngã: “Zab-teed nins fãa neb sẽn maand n na n zab ne fooma ka na n tõog ye. Fo na n sãama zɛlma nins fãa sẽn dõt fooma. Yaa Zusoaba tʋm-tʋmdba pʋɩɩr la woto. Bãmb tɩrlem yita mam nengẽ. Yaa Zusoabã [a Zeova, NW ] n yeele.”—Ezai 54:17.
17. Baa ne kɩɩsdbã sẽn zabd ne tõndã, bõe yĩng tɩ d tar daoodo?
17 Tõnd bɛɛbã zabda ne tõnd zaalem yĩnga, la d pa komsd raood ye. (Yɩɩl Sõamyã 109:1-3) D pa na n tol n bas b rãmb nins sẽn kis d koɛɛgã sẽn yit Biiblã pʋgẽ wã tɩ b yɛɛs-d n wa kɩt tɩ d kɩɩs d tẽebã ye. Baa ne d sẽn gũud tɩ d tẽebã zabr wɩng n paasã, d mii a sẽn na n wa baas to-to. Wala a Zeremi, d na n yãa bãngr-goamã pidsgu: “[B] na n zaba ne foom . . . [la] b ka tõe n tõog foom ye. Bala, mam bee ne foom n na n sõng foom. Mam yaa Zusoaba [a Zeova, NW ], yaa maam n yeele.” (Zeremi 1:19) N-yẽe, d miime tɩ sẽn zabd-b ne Wẽnnaamã pa na n tõog ye!
Wãn to la y na n leokẽ?
• Bõe yĩng tɩ b zabd ne a Zeova sõgen dãmbã?
• Ne manesem bʋs la kɩɩsdbã zab ne a Zeova nin-buiidã?
• Bõe yĩng tɩ d tõe n kɩs sɩd tɩ sẽn zabd-b ne Wẽnnaamã pa na n tõoge?
[Zãmsgã sogsgã]
[Foto, seb-neng 24]
A Zeremi ra paama bas-m-yam t’a Zeova ra na n zĩnda ne-a
[Foto, seb-neng 25]
Sẽn põs-b nams-bɛɛgã zĩisẽ wã
[Foto, seb-neng 25]
Kʋʋng sẽn wa ne nen-kɛglem a Zeova Kaset rãmbã zutu
[Foto, seb-neng 25]
A Joseph Rutherford ne a tʋmd-n-taasã
[Foto, seb-neng 28]
A Zezi wɛɛngẽ wã, sẽn zab-b ne Wẽnnaamã pa tõog ye