A kii noor yĩnga

D TẼEGDA a August Dickmann (sẽn dog yʋʋmd 1910), n ya a Zeova Kaset soabã yelle.” Yaa woto la gʋlsem sẽn be palak zugã (b sẽn wilg ka wã) b sẽn puk sẽn pa kaoos Sachsenhausen pĩnd nams-bɛɛgã zakẽ sɩngda. Bõe yĩng t’a Zeova Kaset soab a yembr zems ne palak a woto? Gʋlsmã sẽn ketã wilgda kɩbarã: “SS rãmbã tão[-a-la] bug-raoog zãma sʋk yʋʋmd 1939, bõn-bɩʋʋng kiuug rasem 15, a sẽn zãgs sodaar a sũur-kasetã yĩnga.”

B ra kẽesa a August Dickmann Sachsenhausen nams-bɛɛgã zakẽ yʋʋmd 1937. Dũni gill Zabr a yiib soabã sẽn sɩng yʋʋmd 1939 wã rasem a tãab poore, b kõ-a-la noor t’a tik a nug sebr zug n kẽ sodaare. A sẽn zãgsã, zakã kũmandã togsa a Heinrich Himmler, sẽn yaa SS (Schutzstaffel, a Hitler gardkoor dãmb sẽn mi b mensã) taoor soabã, n kos sor n na n kʋ a Dickmann bãens kamb a taabã fãa nifẽ. Yʋʋmd 1939, bõn-bɩʋʋng kiuug rasem 17, The New York Times yeela kɩba-kãngã sẽn yit Alemayn wã: “A August Dickmann sẽn tar yʋʋm 29 wã, . . . bug-ra-tãoodb sull n tão-a bug-raoog ka.” Zʋrnallã yeelame t’a ra yaa Alemayn pipi ned sẽn zãgs sodaar a sũur-kasetã yĩng zab-kãng pʋgẽ.

Yʋʋm pis-yoob poore, yʋʋmd 1999, bõn-bɩʋʋng kiuug rasem 18, Brandenburg Memorial Foundation (Bõn-tẽegdem Siglgã) tẽega a Dickmann kũumã, la masã, tẽegr palakã tẽegda gɛtbã a raoodã la a tẽebã sẽn tar pãngã. Palak a yiib-n-soab sẽn be pĩnd zakẽ wã yɩng lalgẽ tẽegda gɛtbã t’a Dickmann ra yaa sẽn pẽneg a Zeova Kaset rãmb 900 nins sẽn nams Sachsenhausen b tẽebã yĩngã a yembr bala. Neb wʋsg a taab n nams zĩis a taabẽ. N-yẽe, baa b sẽn zĩnd yel-tood wʋsg pʋsẽ nams-beesã zags pʋsẽ wã, neb wʋsg kell n talla b kɩs-sɩdã ne Wẽnnaam noyã.

Sã n yaa ne a Zeova Kaset rãmbã, kiris-ned segdame n “sak zu-soben dãmb sẽn yɩɩdã.” (Rom dãmba 13:1, NW ) Baasg zãnga, goosneema rãmbã sã n mak n na n modg-b tɩ b kɩɩs Wẽnnaam noyã, b tũuda Kirist tʋm-tʋmdbã sẽn yeel woto wã makre: “A zemsame tɩ tõnd sak Wẽnnaam n yɩɩd nebã.” (Tʋʋma 5:29) Rẽ kɩtame tɩ dũni sẽn tar buud kisgr sẽn wa ne yel-be-kãsemsã pʋgẽ, a Zeova Kaset rãmbã sẽn beẽ fãa, b baooda laafɩ wala a August Dickmann. B tũuda Biiblã sagl-kãngã: “Da sak tɩ wẽng tõog foom ye, maan sõama n tõog wẽnga.”—Rom dãmba 12:21.