Bõe yĩng tɩ zãmbã yaa wʋsg woto?

“Da reeg kũun ye. tɩ bõe, kũun maanda nin soaba t’a lebg zõanga, la a kɩtdame tɩ nin-tɩrg kaset lebg zaalem.”—Yikri 23:8.

YƲƲM tus a tãab la kobs-nu sẽn looge, a Moiiz Tõogã gɩdga noor-madgre. Rẽ tɛka, yʋʋm kob-gĩnã pʋsẽ, b yiisa noy ka tɛk sẽn gɩdgd zãmbã. Baasg zãnga, tõodã luglg pa tõog tɩ zãmbã sa ye. Noor madgr milyaar dãmb toeemda nug daar fãa, la neb milyõ rãmb namsda a poorẽ.

Zãmbã fɩɩga dũni wã fãa zug ne manesem sẽn solg wʋsg hal n kɩt t’a rat n wã ãdem-biisã siglg menga. Tẽns sãnda pʋsẽ, bũmb ba a ye la bal pa tõe n maan tɩ pa tũ ne noor madgr ye. F sã n kõ ned sẽn tõe n sõng-f noor madgre, f tõe n paama f ɛgzame, f mubill wẽneb sebre, f kõntra, bɩ bʋʋm bʋʋdẽ. “Noor madgrã yaa wa rẽgd wʋsg sẽn namsd nebã yam,” woto la a Arnaud Montebourg sẽn yaa bʋ-kaood n be Pari wã yeel ne sũ-sãanga.

Sẽn yɩɩd fãa, noor madgrã yaa wʋsg leebgã pʋgẽ. Sosiete rãmb kẽer dɩkda b yõodã a yembr tãab zug sẽn na yɩl bal n madg fõgsneer dãmbã taoor dãmb noore. Sã n yaa ne Gãrãnd Bertayn zʋrnall The Economist, yaa sẽn ta Amerik dolaar milyaar 25 la b rɩkd n kẽesd tẽn-tẽns zab-teed koosg pʋgẽ. Ligd kãng pʋgẽ, wakɩr koabg fãa zugu, 10 fãa yaa sẽn na yɩl n madg sẽn dat-b n da wã noore. Zãmbã sẽn tar paasg tʋʋll-tʋʋllã woma bi-wẽns wʋsgo. Yʋʋm pi-gĩnd ning sẽn loogã pʋgẽ, “zood” rakãaglem, sẽn yaa zãmb leebg sẽn nafd neb a wãn sẽn mi neb sõma wã, b yeelame t’a wãa tẽns tõr laogã wɛɛngẽ.

Sɩd-sɩda, zãmbã la laogã sãang a sẽn wat ne wã sẽn namsd neb nins n yɩɩdã yaa naong rãmbã, sẽn yaa neb nins sẽn pa tõe la bal n kõ ned noor madgrã. Wala zʋrnallã The Economist sẽn togs koɛɛg-koɛɛgã, “zãmbã yaa wẽgbã neng a yembr bala.” D tõe n tõoga wẽg-kãngã buud bɩ, bɩ zãmbã yaa bũmb sẽn ka tɩɩm? Sẽn na yɩl n leok sʋk-kãngã, d segd n deng n bãnga bõn-kãsems nins sẽn wat ne zãmbã.

Yaa bõe n wat ne zãmbã?

Bõe yĩng tɩ nebã basdẽ tɩ b kẽes-b zãmb pʋgẽ, n pa paad pʋ-peelem dãmba? Ne neb kẽere, bas tɩ b kẽes-b zãmb pʋgẽ tõe n yɩɩ so-nana ning sẽn yɩɩdã, bɩ so-yɛng ning bal sẽn na yɩl n paam b sẽn datã. Wakat-wakate, noor madgr dɩɩb tõe n kõo ned sor t’a põs sɩbgre. Neb wʋsg sẽn ges tɩ wõnda politik neba, polɩɩs rãmb la bʋ-kaoodb pa kɩɩsd zãmbã bɩ bãmb mensã pʋd n maand-a lame mengã, tũuda nin-kãensã makrã bala.

Zãmbã sẽn tar piuugrã, b sakd-a lame n yɩɩda, hal t’a wa baas n yaa vɩɩm manesem. Neb nins paoong sẽn paood wʋsgã wat n tagsdame tɩ b pa tõe n pa kẽ zãmb ye. Yaa tɩlae ne bãmb tɩ b kos noor madgr dɩɩbo, b  sã n dat tɩ b vɩɩmã yɩ-b noogo. La neb nins sẽn modg tɩ b kõ-b noor madgrã rɩɩb bɩ b kõt noor madgr dɩɩb sẽn na yɩl n paam yõod sẽn pa zemsã sẽn pa paamd sɩbgrã yĩnga, neb wʋsg pa rat n kɩɩs noor madgr dɩɩbã ye. “B ka yãgd n kao tʋʋm wẽns bʋʋd tao-tao ye. Yaa rẽ yĩng n kɩt tɩ ninsaalba keng b sũyã n maand wẽnga.”—Koɛɛg Soaba 8:11.

Bõn-yood a yiib sẽn tar pãng n yãngd zãmbã: yaa rat-m-yembrã la rat-tɩ-loogã. Rat-m-yembrã yĩnga, zãmb rãmbã mumda b nin b zãmbã biis sẽn wat ne namsg n kõt neb a taabã zutu, la b kõt b mens bʋʋm ne b noor madgr dɩɩbã, a sẽn nafd bãmba wã yĩnga. Zãmb rãmbã sã n paamd laog n paasdẽ, b rat-tɩ-loogã me paasdame. “Ned sã n nong ligdi, ligd ka sekd-a ye. La ned sã n nong arzɛgse, paoong paasg ka sekd-a ye,” woto la a Salomo yeel-yã. (Koɛɛg Soaba 5:9) Bũmb sẽn be yaa tɩ rat-tɩ-loogã tõe n kɩtame tɩ f paam ligdi, la wakat fãa a tɩ loee ne zãmb la tõog kɩɩsgo.

Bũmb a to d sẽn pa segd n yĩm yaa dũni kãngã naab nif sẽn pa ne wã tʋʋmde, a soab ning Biiblã sẽn wilgd tɩ yaa a Sʋɩtãan Munaafɩɩkã. (1 Zã 5:19; Wilgri 12:9) A Sʋɩtãan kɩtdame tɩ zãmbã paasdẽ. Noor madgr ning sẽn yaa kãseng n yɩɩdã ya a soab ning a Sʋɩtãan sẽn kãab Kirista wã. ‘Mam na n kõo foo dũniyã soolem fãa, fo sã n wõgemd n balem maam.’—Matɩe 4:8, 9, NW.

La ned ra pa tõe n kẽes a Zezi zãmb pʋgẽ ye. A zãmsa a karen-biisã tɩ b maan wa yẽ. Kirista zãmsg yaa bũmb d sẽn tõe n tũnug ne n zab ne zãmbã rũndã-rũndã bɩ? Sõsg ning sẽn pʋgdã na n leoka sʋk-kãngã.