Wʋm-y vʋʋsem sõngã sẽn tar bũmb ning n na n togsã
Wʋm-y vʋʋsem sõngã sẽn tar bũmb ning n na n togsã
“Yãmb sã n dat n kẽng rɩtgo walla goabga, yãmb tʋba na n wʋma gomd sẽn gomd yãmb poorẽ wã n yetẽ: “Ad sore bɩ y kẽne.”—EZAI 30:21.
1, 2. Wãn-wãn la a Zeova gom ne ninsaalbã kʋdemdã fãa pʋgẽ?
YAA ko-sʋk tẽng sẽn boond tɩ Porto Riko wã la dũniyã radio teleskop ne ãntɛn parabolik sẽn tõe n wʋm dãamd n yɩɩdã be. Yʋʋm pi-gĩn pʋgẽ, siãntifik rãmbã tẽeme tɩ b na n paama koees sẽn yit zĩ-zẽng sẽn pa tẽngã neb sẽn vɩyẽ n wa, ne wʋmb te-kãngã sẽn yaa bedrã maasem. La b pa paam koees a woto ye. La bãng-y tɩ koees sẽn yaa vẽenes n be sẽn yit zĩ-zẽng sẽn zʋʋg ninsaalbã sẽn tõe n taẽ wã, tɩ tõnd ned kam fãa tõe n paam-b baa sẽn yaa wakat ninga, tɩ pa tũ ne te-bɛd maasem ye. Koe-kãens yita Zĩig sẽn zẽk n yɩɩd zĩig a to buud fãa d sẽn tõe n mams sẽn zʋʋg tẽngã. Koe-taasg kãensã Yẽgr yaa ãnda, la yaa ãnd dãmb n paamd koe-kãense? Bõe la koe-kãens yeta?
2 Biiblã pʋgẽ kɩbay wʋsg n be sẽn wilgd ninsaalb tʋb sẽn wʋm koees sẽn yit Wẽnnaam nengẽ. Wakat ninga, koe-kãens yaa bõn-naands nif sẽn pa ne sẽn yaa Wẽnnaam koe-taasdba. (Sɩngre 22:11, 15; Zakari 4:4, 5; Luk 1:26-28) Naoor a tãabo, b wʋma a Zeova mengã koɛɛga. (Matɩe 3:17; 17:5; Zã 12:28, 29) Wẽnnaam leb n gomame n tũnug ne no-rɛɛsdb sẽn yaa ninsaalba, tɩ bãmb wʋsg gʋls a sẽn vẽneg-b ne vʋʋsem sõngã n togsã. Rũndã-rũndã, tõnd tara Biiblã, sẽn tar koe-kãensã b sẽn gʋlsã, n paas a Zezi la a karen-biisã zãmsgo. (Hebre dãmba 1:1, 2) A Zeova sɩd taasda kɩbay ninsaalbã a sẽn naana.
3. Wẽnnaam koeesã bõn-datl yaa bõe, la bõe la b gũud tɩ tõnd maane?
3 Koees nins fãa sẽn yit Wẽnnaam nengẽ wã pa togsd yɛl wʋsg ãndũniyã nif sẽn ne wã wɛɛngẽ ye. B gomd n tadgda yɛl sẽn tar yõod n yɩɩd zutu. Yaa yɛl sẽn pak tõnd vɩɩmã masã la beoog-daare. (Yɩɩl Sõamyã 19:8-12; 1 Tɩmote 4:8) A Zeova tũnugda ne koe-kãens n taasd a raabã la a kõt tõnd sor-wilgri. Yaa ne manesem a yembr la no-rɛɛs a Ezai goamã paamd pidsgu: “Yãmb sã n dat n kẽng rɩtgo walla goabga, yãmb tʋba na n wʋma gomd sẽn gomd yãmb poorẽ wã n yetẽ: ‘Ad sore bɩ y kẽne.’ ” (Ezai 30:21) A Zeova pa modgd tõnd tɩ d kelg a “gomd[ã]” ye. Bee ne tõnd tɩ d tũ Wẽnnaam sor-wilgrã la d kẽn a sorẽ wã. Yaa bʋʋm kãng yĩng la Gʋlsg Sõamyã sagend tõnd tɩ d kelg goam nins a Zeova sẽn taasd tõndã. Wilgr sebrã pʋgẽ, b sẽn sagend tɩ d “kelg bũmb ning vʋʋsmã sẽn yet[ã]” pukda naoor a yopoe.—Wilgri 2:7, 11, 17, 29; 3:6, 13, 22, NW.
4. Rũndã-rũndã, yaa bũmb sẽn zems tɩ d gũ tɩ Wẽnnaam zĩnd saasẽ n gom ne tõnd a toor bɩ?
4 Rũndã-rũndã, a Zeova pa zĩnded saasẽ n gomd ne tõnd a toor ye. Baa Biiblã gʋlsg wakatẽ, koe-kãens buud b sẽn taas ne yel-solemdã ra pa wɛ ye. Ra tõe n maana yʋʋm kob-gĩn tɩ b pa yã a buud ye. Kʋdemdã fãa pʋgẽ, sẽn yɩɩd fãa, pa a Zeova mengã n gom ne a nin-buiidã ye. A tũnug ne manesem a taaba. Yaa woto me rũndã-rũndã. Bɩ d ges manesem a tãab a Zeova sẽn tũnugd ne n gomd ne tõnd rũndã-rũndã.
‘Gʋlsg Sõamyã fãa yaa vʋʋsem sõngã n vẽneg tɩ b gʋlse’
5. Sẽn yɩɩd fãa, a Zeova tũnugda ne bõe n gomd rũndã-rũndã, la wãn-wãn la d tõe n dɩ a nafre?
5 Bõn-kãseng ning Wẽnnaam sẽn tũnugd ne n gomd ne ninsaalbã yaa Biiblã. Yaa Wẽnnaam vʋʋsem sõngã n vẽneg tɩ b gʋls-a, la bũmb ning fãa sẽn be a pʋgẽ wã tõe n talla nafr ne tõndo. (2 Tɩmote 3:16, NW ) Biiblã pida ne makr sẽn tɩ loe ne neb sẽn sɩd zĩnd n tʋm ne b yam-daabã n dɩk sard n kelg a Zeova koɛɛgã, bɩ n pa kelg-a ye. Makr kãens tẽegda tõnd bũmb ning sẽn kɩt tɩ tar yõod wʋsg tɩ d kelg bũmb ning Wẽnnaam vʋʋsem sõngã sẽn tar n na n togs tõndã. (1 Korẽnt dãmba 10:11) Biiblã leb n tara sagl-sõms d sẽn sɩd tõe n tũ. A kõta tõnd saglse, d sã n wa segd n dɩk sard d vɩɩmã pʋgẽ. Yaa wala Wẽnnaam sã n da bee tõnd poorẽ n gomd ne tõnd woto tɩ d tʋbã wʋmdẽ: “Ad sore, bɩ y kẽne.”
6. Bõe yĩng tɩ Biiblã yɩɩd sɛb a taaba fãa zĩig sẽn zãre?
6 Sẽn na yɩl n wʋm bũmb ning vʋʋsem sõngã sẽn tũnugd ne Biiblã n yetẽ wã, d segd n karem-a-la wakat fãa. Biiblã pa seb-zaalg bal b sẽn gʋls sõma zãma wã yĩnga, sebr wa sɛb wʋsg sẽn be rũndã-rũndã wã ye. Biiblã yaa sebr vʋʋsem sõngã sẽn vẽneg tɩ b gʋlse, la a tara Wẽnnaam tagsa. Hebre dãmba 4:12 (NW ) yetame: “Wẽnnaam gomda vɩɩme la a tara pãnga, la a rɩtame n yɩɩd sʋʋg buud fãa sẽn tar noy a yiibu, la a kẽeda hali n welgd sɩɩg ne vʋʋsem la kõb-sugds ne [b] sɩɩlem, la a tõe n bãnga sũur tagsg la a tʋlsem n welge.” D sã n karemd Biiblã, goam nins sẽn be a pʋgẽ wã kẽeda tõnd tagsa wã la d yam-tusdi wã pʋsẽ wala sʋʋga, n wilgd hal sẽn ta zĩ-bʋg la tõnd vɩɩmã tɩ zems ne Wẽnnaam daabã.
7. Bõe yĩng tɩ Biiblã kareng tar yõod wʋsgo, la naoor a wãn la b sagend tõnd tɩ d karm-a?
7 Tar-n-tarẽ “sũur tagsg la a tʋlsem” tõe n toeemame, yɛl nins d sẽn vɩɩmdã, sẽn noom bɩ sẽn toe sẽn tuk-dã yĩnga. Tõnd sã n pa zãmsd Wẽnnaam Gomdã wakat fãa, tõnd tagsa wã, d manesmã la d yĩn-sidsã ye pa na n zems ne Wẽnnaam noyã ye. Woto yĩnga, Biiblã sagenda tõnd woto: “Ket-y n makd n getẽ yãmb sã n bee tẽeb pʋgẽ, ket-y n makd n get yãmb mengã sẽn yaa ned ninga.” (2 Korẽnt dãmba 13:5, NW ) Tõnd sã n dat n ket n wʋmd vʋʋsem sõngã sẽn yet bũmb ningã, d segd n kelga saglg ning sẽn yet tɩ d karem Wẽnnaam Gomdã daar fãa wã.—Yɩɩl Sõamyã 1:2.
8. Tʋm-tʋmd a Poll gom-bʋs n sõngd tõnd tɩ d vaees d mens Biiblã kareng wɛɛngẽ?
8 Tẽegr sẽn tar yõod wʋsg Biiblã karemdb sẽn segd n bãng yaa woto: Bao-y sẽk tɩ sek n dok bũmb ning y sẽn karemdã yõodo! D sã n modgd n na n tũ saglg ning sẽn baood tɩ d karem Biiblã daar fãa wã, yaa d gũus n da wa karemd sags wʋsg var-var n pa wʋmd d sẽn karemdã võor ye. Yaa sɩd tɩ karem Biiblã n pa vaal tara yõod wʋsgo, la pa geelg-n-tʋm tũubã bal n yaa tõnd bõn-datl ye. D segdame n tʋll ne d sũur fãa n zãms n bãng a Zeova la a raabã. Rẽ wɛɛngẽ, d sɩd tõeeme n sak goam nins tʋm-tʋmd a Poll sẽn kõ sẽn na yɩl n vaees d mensã. A gʋlsa a kiris-nin-taasã n yeel woto: “Yõ wã yĩnga mam yĩgemdeda tõnd Ba taoore . . . Yaa tɩ bãmb na kõ yãmb . . . tɩ Kirist na zĩnd yãmb sũyã pʋsẽ ne tẽebo; tɩ yãmb kɩ yẽg n yẽbg nonglem pʋgẽ wã, yãmb tõe n lagma ne Wẽnnaam neba fãa n bãng a yalem la a woglem la a zulum la a zãntlem sẽn yaa bũmb ninga, la tɩ yãmb bãng Kirist nonglem sẽn yɩɩd neb sẽn tõe n bãnge, hal tɩ yãmb na pid ne bũmb nins fãa sẽn yit Wẽnnaam nengẽ wã.”—Efɛɛz rãmba 3:14, 16-19.
9. Wãn-wãn la d tõe n bao n bãng a Zeova n paase?
9 La sẽn be yaa tɩ tõnd neb kẽer pʋd n pa nong kareng ye, tɩ neb a taab yaool n nong karengã hal sõma. La baa tõnd sẽn be zĩig ning fãa, d tõe n bɩɩsa tʋlsem ning sẽn yaa bao n bãng a Zeova wã n paase. Tʋm-tʋmd a Pɩɛɛr wilgame tɩ d segd n nonga sõma-sõma n paam Biiblã bãngre, la a sak n deegame tɩ tõe n yaa tɩlae tɩ d bɩɩs tʋlsem kãngã. A gʋlsame: ‘A wa kom-peelse, bɩ y nong Wẽnnaam koɛɛga sẽn wẽnd wa bĩisim sẽn ka pulã, t’a bɩɩs yãmb y fãagra yĩnga.’ (1 Pɩɛɛr 2:2) Kibl-m-meng tara yõod wʋsgo, d sã n dat n “nong” Biiblã zãmsgo. Wala d sẽn tõe n wa nong rɩ-paalga, d sã n lɛmb-a naoor wʋsg poorã, tõnd tagsgã ne karengã la zãmsgã tõe n toeemame n lebg sõma, tõnd sã n kibl d mensã n tũ raasenkam geelg-n-tʋme.
‘Rɩɩb wakat sẽn zems pʋgẽ’
10. Ãnd rãmb n be “kɩs-sɩd la gũusd yambã” sullẽ, la yaa wãn-wãn la a Zeova tʋmd ne-b rũndã-rũndã?
10 A Zezi wilga manesem a to a Zeova sẽn tũnugd ne n gomd ne tõnd rũndã-rũndã Matɩe 24:45-47 (NW ) pʋgẽ. Beenẽ wã a goma kiris-neb b sẽn zae ne vʋʋsem sõngã tiginga, sẽn yaa “kɩs-sɩd la gũusd yambã” yelle, b sẽn yãk tɩ b kõ tẽebã “rɩɩbã wakat sẽn zems pʋgẽ” wã. B yembr-yembrã, sul-kãng nebã ra ya a Zezi zak “neb[a].” Bãmb ne “piis a taab[a]” “kʋʋng kãseng” paamda raood kengr la sor-wilgri. (Wilgri 7:9, NW; Zã 10:16) Rɩ-kãng wʋsg sẽn yɩɩd sẽn wat wakat sẽn zems pʋgẽ wã yaa sɛb wala Gũusg Gasgã, Révéillez-vous! wã, la sɛb a taaba. Tẽeb rɩɩb sẽn paas b sẽn kõtã yaa sõss la mak-n-wilg rãmb tigis-kãsemsẽ wã la tigingã tigissẽ.
11. Wãn-wãn la d wilgd tɩ d kelgda bũmb ning vʋʋsem sõngã sẽn tar n na n yeel ne “kɩs-sɩd la gũusd yambã” maasma?
11 Zãmsg ning “kɩs-sɩd la gũusd yambã” sẽn kõtã yaa sẽn na yɩl n paas tõnd tẽebã pãnga, la a kɩt tɩ tõnd paam tõog n paas yam-welgrã wɛɛngẽ. (Hebre dãmba 5:14, NW ) B tõe n kõo sagl-kãens n pa togs fãa n welge, sẽn na yɩl tɩ ned kam fãa tũ-b a mengã vɩɩm pʋgẽ. Wakat-wakate, d paamda sagls me sẽn tik tõnd manesmã nens sẽn yaa takɩ zutu. Tõnd manesem segd n yɩɩ wãn-wãna, d sã n sɩd kelgda bũmb ning vʋʋsem sõngã sẽn tar n na n togse, n tũnugd ne yambã sullã? Tʋm-tʋmd a Poll leokdame: “Bɩ y sak yãmb taoor dãmba la y reeg bãmb goama.” (Hebre dãmba 13:17) Yaa sɩd tɩ neb nins fãa yell b sẽn gomd ka wã yaa neb sẽn pa zems zãngã. La a Zeova sũur noomame t’a tũnug ne a sõgen dãmb sẽn yaa ninsaalbã, baa ne b sẽn pa zems zãngã, sẽn na yɩl n wilg tõnd sor saabã wakat kãngã pʋgẽ.
Sor-wilgr sẽn yit tõnd sũur-kasetẽ wã
12, 13. a) Bũmb a to bʋg sẽn kõt sor-wilgr la a Zeova kõ tõndo? b) Pãn-tusdg sẽn yaa sõma bʋg la sũur-kasetã tõe n tall neb nins meng sẽn pa tar Wẽnnaam Gomdã bãngr sẽn yaa takɩ wã zutu?
12 A Zeova tũnugda ne bũmb a to me n wilgd tõnd sore: yaa d sũur-kasetã. A naana ninsaal t’a mi sẽn yaa sõma la wẽnga. Rẽ bee tõnd yalẽ wã pʋgẽ. Tʋm-tʋmd a Poll wilga woto a lɛtr ning a sẽn taas Rom dãmbã pʋgẽ: “Bu-zẽms sẽn ka tar tõogã bãmb pʋd n sakda tõoga sẽn yeel bũmb ninsã. Baa bãmb sẽn ka tar tõogã, bãmb lebga b mens tõogo. Yõ wã wilgdame tɩ tõog tʋʋma gʋlsa bãmb sũyã pʋsẽ, la bãmb sũyã me kɩta kaseto. La bãmb tagsg pʋgẽ b ningda walla b yiisda yell b mens zutu.”—Rom dãmba 2:14, 15.
13 Neb wʋsg sẽn pa mi a Zeova tõeeme n tags la b tʋm tɩ zems ne Wẽnnaam noyã sẽn tɩ loe ne sõma la wẽngã. Yaa wala b wʋmda koɛɛg sẽn gomd ne-b b sũurẽ wã sẽn na yɩl n tees-b so-tɩrgã zugu. Sã n tõe n yɩ woto ne neb nins sẽn pa tar Wẽnnaam Gomdã bãngr sẽn yaa takɩ wã, bɩ d bãng tɩ koe-kãng sẽn gomd sũurẽ wã segd n tʋmda sõma n yɩɩd kiris-neb hakɩkã nengẽ! Sɩd-sɩda, kiris-ned sũur-kaset sẽn paam yɩlgr ne Wẽnnaam Gomdã bãngr sẽn yaa sɩd takɩ la sẽn tʋmd tɩ zems ne a Zeova vʋʋsem sõngã tõe n kõo sor-wilgr sẽn be bas-yardo.—Rom dãmba 9:1.
14. Wãn-wãn la sũur-kaset sẽn paam Biiblã zãmsg tõe n sõng tõnd tɩ d tũ a Zeova vʋʋsem sõngã sor-wilgri?
14 Sũur-kaset sẽn yaa sõma sẽn paam Biiblã zãmsg tõe n tẽega tõnd sor ning vʋʋsem sõngã sẽn datẽ tɩ tõnd kẽna. Wakat kẽere Gʋlsg Sõamyã bɩ sɛb nins sẽn tik Biiblã zugã pa gomd yell takɩ pʋgẽ d sẽn tõe n wa zĩnd pʋgẽ yell ye. La tõnd sũur-kasetã tõe n keooga tõndo, n yet tõnd tɩ d ra wa saag n maan bũmb sẽn tõe n wa ne yell ye. Yɛl a woto pʋsẽ, d sã n pa kelg d sũur-kasetã, sɩd tõe n dat n wilgame tɩ d pa tũud a Zeova vʋʋsem sõngã sẽn yet tõnd bũmb ningã ye. La d sã n nong n teegd d kiris-ned sũur-kasetã sẽn paam zãmsgã, d tõe n dɩka sard sẽn yaa sõma, baa noor sẽn yaa takɩ sẽn gʋls sã n ka be. Tara yõod wʋsg tɩ d ning d yamẽ tɩ noore, tõog bɩ laloa Wẽnnaam sẽn kõ sã n ka be, pa zems tɩ d modg d kiris-nin-taasã tɩ b sak tõnd mengã sũur-kaset tagsgo, yɛl sẽn tɩ loe ne ned kam fãa yam-yãkr zut ye.—Rom dãmba 14:1-4; Galat dãmba 6:5.
15, 16. Bõe n tõe n kɩt tɩ tõnd sũur-kasetã sãam n pa tʋmd sõma, la wãn-wãn la d tõe n maan tɩ ra wa yɩ woto ne-do?
15 Sũur-kaset sẽn yaa yɩlemd sẽn paam Biiblã zãmsg yaa kũun sẽn yaa sõma sẽn yit Wẽnnaam nengẽ. (Zak 1:17) La d segd n kogla kũun kãngã tɩ pãn-tusd wẽnsã ra sãam-a, d sã n dat t’a tʋmdẽ tɩ zemsd ne vɩɩm manesem sẽn be nafrã. Tõnd sã n tũ tõnd sẽn be zĩig ningã minung la rog-n-mik nins sẽn kɩɩsd Wẽnnaam noyã, rẽ tõe n sãama tõnd sũur-kasetã t’a ye pa teesd tõnd so-tɩrgã zug ye. D tõeeme n wa ye pa get yɛlã tɩ zems ye. Bɩ d tõeeme meng n belg d mens n tẽ tɩ tʋʋm-wẽng sɩd yaa sõma.—Mak-y ne Zã 16:2.
16 Tõnd sã n kell n pa kelg d sũur-kasetã keoogre, a koɛɛgã pãng na n talla boogr hal tɩ d sũur-kasetã wa riglme. Yɩɩl-gʋlsdã goma nin-bãmbã yell a sẽn wa n yeel tɩ: “Bãmb sũyã yaa tagd wa kaam.” (Yɩɩl Sõamyã 119:70) Kẽer sẽn zãgs b sũur-kasetã sor-wilgr wa n ye pa tagsd tɩrg ye. B ye pa basd tɩ Wẽnnaam noyã wilg-b sore, la b pa tõe n dɩk sard tɩ zemse. Sẽn na yɩl tɩ yel-kãngã ra paam-do, d segd n saka d kiris-ned sũur-kasetã sor-wilgri, baa yell ning pʋgẽ d sẽn be wã sã n wõnd yel-bila.—Luk 16:10.
Sũ-noog rãmb la sẽn kelgd-b la b sakdẽ wã
17. D sã n kelgd ‘gomdã sẽn gomd tõnd poorẽ wã’ la d tũud d sũur-kasetã sẽn paam Biiblã zãmsgã, wãn-wãn la d na n paam barka?
17 D sã n minim n kelgd ‘gomdã sẽn gomd tõnd poorẽ wã,’ a Zeova sẽn tũnugd ne Gʋlsg Sõamyã la kɩs-sɩd la gũusd yambã n kõtẽ wã, la d tũud tõnd sũur-kasetã sẽn paam Biiblã zãmsgã tẽegrã, a Zeova na n barka tõnd ne a vʋʋsem sõngã. La vʋʋsem sõngã na n kõo tõnd tõog tɩ d paam la d wʋm a Zeova sẽn yet tõnd bũmb ningã n paase.
18, 19. Wãn-wãn la a Zeova sor-wilgrã tõe n naf tõnd ministɛɛrã la tõnd mengã vɩɩm pʋgẽ?
18 A Zeova vʋʋsem sõngã na n leb n kõo tõnd raood tɩ d seg zu-loeesã ne yam la sũ-keelem. Wala sẽn yɩ to-to ne tʋm-tʋmdbã, Wẽnnaam vʋʋsem sõngã tõe n paasa tõnd tagsgã pãnga, la a sõng wakat fãa tɩ d tʋm la d gom tɩ zems ne Biiblã noyã. (Matɩe 10:18-20; Zã 14:26; Tʋʋma 4:5-8, 13, 31; 15:28) A Zeova vʋʋsem sõngã, n paas tõnd mengã modgr na n kõo tõnd tõogre, d sã n wa rɩkd sard kãsems vɩɩmã pʋgẽ, n kõt tõnd raood tɩ d tũ sard-kãensã. Wala makre, tõe tɩ y tagsdame n na n dems y vɩɩm manesmã la y rɩk sẽk n paas tẽebã yɛl yĩnga. Bɩ tõe tɩ y segd n maana yãkr sẽn wat ne toeeng kãseng y vɩɩmã pʋgẽ, wala kẽed-n-taag yãkre, mag-n-ges y sã n na n saka nug-tʋʋmd b sẽn kãab-yã, bɩ roog raabo. D pa segd n bas tɩ tõnd ninsaal yĩn-sidsã bal tus-d tɩ d rɩk d sardã ye. D segdame n kelg Wẽnnaam vʋʋsem sõngã sẽn tar n na n yeel-dã, la d tʋm tɩ zems ne a sor-wilgrã.
19 Sɩd-sɩda d nanda tẽegr nins b sẽn kõ ne nonglem, la sagls nins d sẽn paamd d kiris-nin-taasã ne kẽem dãmbã nengẽ wã. La pa tɩlae wakat fãa tɩ d gũ tɩ neb a taabã togs tõnd yɛlã ye. Tõnd sã n mi manesem sẽn zems la remsg nins d sẽn segd n maan d manesmã la d tʋʋma pʋgẽ sẽn na yɩl n ta Wẽnnaam yam, bɩ d maan woto. A Zezi yeelame: “Yãmb sẽn bãng bõn-kãensã, yãmb sã n maan woto, bark bee yãmb zutu.”—Zã 13:17.
20. Bark bʋg la neb nins sẽn kelgd ‘gomdã sẽn gomd bãmb poorẽ wã’ paamda?
20 Vẽenega, sẽn na yɩl n bãng d sẽn na n maan to-to n ta Wẽnnaam yam, kiris-nebã pa segd bal n wʋm koɛɛg sɩd-sɩd sẽn yit saasẽ ye. Pa tɩlae me tɩ b paam malɛk kaagr ye. B tara barka, b sẽn tar Wẽnnaam Gomdã sẽn gʋlsã, la sor-wilgr a yambã sull sẽn zae sẽn be tẽng zugã a sẽn tũnugd ne n kõt ne nonglmã. B sã n kelg ‘gom-kãng sẽn gomd b poorẽ wã’ neer la b tũ b sũur-kasetã sẽn paam Biiblã zãmsgã sor-wilgri, b na n tõog n maana Wẽnnaam daabã. Rẽ, b na n yãa tʋm-tʋmd a Zã kãabg kãngã pidsg tɩ sãmbg ka be ye: “Ned ninga sẽn maand Wẽnnaam daab paada wakat sẽn-ka-sɛta.”—1 Zã 2:17.
Lebg-n-ges koɛɛga
• Bõe yĩng t’a Zeova gomd ne ninsaalbã sẽn ya a bõn-naandsã?
• Wãn-wãn la d tõe n dɩ Biiblã karem n pa vaal nafre?
• D manesem segd n yɩɩ wãn-wãn ne yambã sull sor-wilgri?
• Bõe yĩng tɩ d segd n kelg d sũur-kasetã sẽn paam Biiblã zãmsgã?
[Zãmsgã sogsgã]
[Foto, seb-neng 25]
Pa tɩlae ne ninsaal t’a tũnug ne te-bɛd n paam koees sẽn yit Wẽnnaam nengẽ ye
[Fotã soaadbã]
Courtesy Arecibo Observatory/David Parker/Science Photo Library
[Foto, seb-neng 27]
A Zeova tũnugda ne Biiblã la “kɩs-sɩd la gũusd yambã” n gomd ne tõndo