Yãmb na n zĩnda dũni paalgã pʋgẽ bɩ?

“Bũmb ka be sẽn noom ninsaalba n yɩɩd yẽ sẽn na n paam sũ-noogo la naar a vɩɩma wakat ye. Ninsaalba fãa sã n na n dɩ la b yũ la b yã b tʋʋmda noom, yaa Wẽnnaam kũuni.”—KOƐƐG SOABA 3:12, 13.

1. Bõe yĩng tɩ d tõe n tall saagr ne beoog-daare?

NEB wʋsg tagsdame tɩ Wẽnnaam Sẽn-tõeyã fãa wã yaa ned sẽn yaa dem-dem la pa-vigsd soaba. La verse ning sẽn be yĩngrã yaa sɩd y sẽn tõe n yã a Gomdã vʋʋsem sõngã sẽn vẽneg tɩ b gʋlsã pʋgẽ. Rẽ zemsa ne a sẽn yaa “sũ-noog Wẽnnaamã,” la a sẽn ning tõnd pipi roagdbã tẽng zug arzãn pʋgẽ wã. (1 Tɩmote 1:11, NW; Sɩngre 2:7-9) D sã n wa baood n dat n bãng beoog-daarã Wẽnnaam sẽn kãab a nin-buiidã yĩnga, pa segd n ling tõndo, d sã n wa bãng tɩ yɛl n na n kõ tõnd sũ-noog sẽn kaoosd ye.

2. Yɛl kẽer bʋs la yãmb gẽegda?

² Sõsg ning sẽn loogã pʋgẽ, tõnd vaeesa yɛl a tãabo, bãmb b naas sʋka, tɩ Biiblã rengd n togsd ‘sa-paals la tẽn-paalg’ waoong yell b pʋsẽ. (Ezai 65:17, NW ) Reng-n-togsg nins b sẽn tõe n tall bas-m-yam ne wã a yembr bee Wilgri 21:1 (Sebr Sõngo) pʋgẽ. Verse nins sẽn pʋgdã wilgda wakat ning Wẽnnaam Sẽn-tõeyã fãa wã sẽn na n wa ne toeeng kãseng tẽng zug tɩ yaa sõma n yɩɩd pĩndã. A na n yẽesa sũ-sãoong nintãmã. Ned ye pa na n ki, kʋʋlem, bãas bɩ sãmpogr yĩng ye. Yãbre, kɛleng la toog sa-yã. Ad sɩd yaa saagr sẽn be yamleoog tɛkẽ! La d tõe n kɩsa  sɩd tɩ rẽ na n waame, la bõe pãn-tusdg la saag-kãnga tõe n tall tõnd zug masã tɛka?

Bʋʋm d sẽn tar n na n tall bas-m-yam

3. Bõe yĩng tɩ d tõe n tall bas-yard ne Biiblã kãabs nins sẽn tɩ loe ne beoog-daarã?

³ Ges-y Wilgri 21:5 sẽn kẽngd taoor to-to ningã. A wilgda Wẽnnaam sẽn zao a saasẽ geerã zug sẽn yete: “Gese, mam maanda bũmb fãa paalse.” Wẽnnaam kãabg kãngã yaa sõma n yɩɩd tẽng soog-m-meng toagsg buud fãa, rũndã-rũndã neb dʋrwa sebre, bɩ ninsaalb bõn-datl beoog-daar yĩng sẽn ya a soab fãa. Togs kãngã sẽn yit a Soab ning Biiblã sẽn yet t’a “ka tõe n yag zirĩ” nengẽ wã bee bas-yard zãng-zãnga. (Tɩt 1:2) Y sã n tagsdẽ tɩ d ra segdame n tek ka bal n maan sũ-noog ne saagr kãngã sẽn be rasãnd wʋsgã la d teeg Wẽnnaam, y bee bʋʋm. La yaool n pa tɩlae tɩ d tek woto ye. Yɛl a taab la d segd n zãms tõnd beoog-daarã wɛɛngẽ.

4, 5. Biiblã bãngr-gom-bʋs d sẽn zoe n yã n tõe n paas tõnd bas-yardã pãng ne yɛl nins sẽn be d taoorã?

⁴ Tags-y n ges sõsg ning sẽn loogã sẽn wilg Biiblã kãabs sẽn tɩ loe ne sa-paals la tẽn-paalgã wɛɛngẽ wã. A Ezai reng n togsa yɛl siglg paalg a woto buudu, la a bãngr-gomdã ra paama pidsg wakat ning Zʋɩf rãmbã sẽn lebg n kul b ba-yirã n lebs n lugl sɩd balengã. (Ɛsdras 1:1-3; 2:1, 2; 3:12, 13) La, a Ezai bãngr-gom-kãngã ra tɩ loee ne rẽ bal bɩ? Sãmbg ka be tɩ yaa ayo! Yɛl nins a sẽn deng n togsã ra segd n paama pidsg sẽn yaa kãseng n yɩɩd me beoog daar sẽn da zãr pʋgẽ. Bõe yĩng tɩ d baas n yet woto? Yaa d sẽn karemd bũmb ning 2 Pɩɛɛr 3:13 la Wilgri 21:1-5 wã pʋgẽ yĩnga. Verse kãensã goma sa-paals la tẽn-paalg sẽn na n wa ne nafa n kõ kiris-nebã dũniyã gill zug yelle.

⁵ Wala d sẽn wilg zugẽ wã, Biiblã tũnuga ne gomd ning sẽn yaa ‘sa-paals ne tẽn-paalgã’ naoor a naase. Tõnd yãa zĩ-kãensã a tãabo, la rẽ kɩtame tɩ d wa baas n bãng yɛl sẽn kengd pɛlga. Biiblã reng n togsa vẽeneg tɩ Wẽnnaam na n yiisa wẽnemã la yɛl a taab nins sẽn wat ne namsgã, la tɩ rẽ poor bɩ a bark ãdem-biisã a dũni paalgã a sẽn kãabã pʋgẽ.

6. Bõe la bãngr-gomd a naas-n-soab sẽn gomd ‘sa-paals la tẽn-paalg’ yellã reng n togsdẽ?

⁶ Masã, bɩ d vaees gomdã kell sẽn yaa “sa-paalsã la tẽn-paalgã” sẽn be Ezai 66:22-24 pʋgẽ wã: “Zusoaba yeelame: ‘A wa yĩngr paalga la dũni paalga [sa-paalsã ne tẽn-paalgã, NW ] mam sẽn maand-a t’a yals mam taoorã, woto me, yãmb yagensa ne y yʋʋra na n kaoosame. Ki-paalga la vʋʋsg daar fãa buuda fãa na n wa n wõgemda mam taoore. Yaa Zusoabã [a Zeova, NW ] n yeele. La neba sã n yi, b na n yãa neb nins sẽn da kɩɩsd maama kũum. Tɩ bõe, bãmb zũnzũyã ka na n sɛ ye. La bãmb bugma ka na n ki ye. Bãmb na n lebga bõn-põaas ninsaalba fãa nifĩ.’ ”

7. Bõe yĩng tɩ d tõe n yeel vẽeneg tɩ Ezai 66:22-24 na n paama pidsg ka la bilfu?

⁷ Bãngr-gom-kãngã talla pidsg Zʋɩf rãmbã sẽn lebs n lugl b tẽngẽ wã zutu, la pidsg a to n da segd n zĩndi. Pids-kãng tog n zĩnda a Pɩɛɛr lɛtr a yiib soabã la Wilgr sebrã gʋlsg poore, bala b goma ‘sa-paals la tẽn-paalg’ sẽn wat beoog-daar yelle. D tõe n gũume tɩ rẽ paam pidsg sẽn yaa kãseng la zãng-zãng yɛl siglg paalgã pʋgẽ. Ges-y yɛl nins d sẽn tõe n gẽeg n paama kẽere.

8, 9. a) Wãn to la Wẽnnaam nin-buiidã ‘ket n yasẽ’? b) Bãngr-gomd ning sẽn yet t’a Zeova sõgen dãmbã na n balma ‘ki-paalg la vʋʋsg daar fãa’ wã võor yaa bõe?

⁸ Wilgri 21:4 wilgame tɩ kũum pa na n le zĩnd ye. Verse nins sẽn be Ezai 66 pʋgẽ wã tɩ zemsa ne rẽ. D tõe n yãa verse 22 wã pʋgẽ t’a Zeova miime tɩ sa-paalsã la tẽn-paalgã pa na n yɩ wakat bilf bũmbu, bɩ bũmb sẽn na n zĩnd wakat sẽn tar koak pʋgẽ ye. Sẽn paase, a nebã na n kaoosame, b na n “ket n yasa” (NW ) a taoore. Wẽnnaam sẽn zoe n maan bũmb nins n kõ a nin-buiidã kõta tõnd bʋʋm tɩ d na n tall bas-m-yam. Kiris-neb hakɩkã paama nams-toaag wʋsg b tẽebã yĩnga, tɩ neb pʋd n maan modgr wʋsg meng sẽn  na yɩl n menes-ba. (Zã 16:2; Tʋʋma 8:1) La baa Wẽnnaam bɛɛb sẽn tall pãng wʋsg wala Rom soolmã Naab a Nerõ la a Adolf Hitler pa tõog n menes a Zeova kɩs-sɩd dãmbã sẽn zãad a yʋʋrã ye. A Zeova kogla a nin-buiidã tigingã, la d tara hakɩk t’a tõe n kɩtame t’a kell n kaoose.

⁹ Woto me, b rãmb nins sẽn yaa kɩs-sɩd dãmb ne Wẽnnaam n be tẽn-paalgã pʋgẽ wã, sẽn yaa dũni paalgã pʋgẽ balemdb hakɩkã yembr-yembr na n kell n yalsame, bala b na n balemda bũmb fãa Naandã ne baleng sẽn yaa yɩlemdã. Baleng kãng pa bũmb b sẽn na n maand wakat-wakat bɩ yaar ye. Wẽnnaam Tõogã a sẽn tũnug ne a Moiizã n kõ Isarɛllã ra baoodame tɩ b maan baleng tʋʋm kẽer kiuug fãa ki-paalgã wakate, la semen fãa vʋʋsg daarã. (Maankʋʋre 24:5-9; Sõdbo 10:10; 28:9, 10; 2 Kɩbaya 2:3) Woto, Ezai 66:23 wã gomda Wẽnnaamã baleng b sẽn na n maand wakat fãa n pa vaandẽ, semen ne a to la kiuug ne a to fãa wã yelle. Wẽnd-kae wã ne pʋ-likã tũudmã pʋgẽ pa na n zĩnd wakat kãng ye. “Buuda fãa na n wa n wõgemda [a Zeova] taoore.”

10. Bõe yĩng tɩ d tõe n kɩs sɩd tɩ nin-wẽnsã pa na n wa ne sãoong sẽn kaoosd wakat fãa dũni paalgã zugu?

¹⁰ Ezai 66:24 kõta tõnd bas-m-yam tɩ bũmb pa na n sãam tẽn-paalgã laafɩ la a tɩrlem ye. Nin-wẽnsã pa na n sãam-a ye. Tẽeg-y tɩ 2 Pɩɛɛr 3:7 yetame tɩ “bʋʋd kaoobo la wẽn-kɩɩsdba sãoong daar” bee tõnd taoore. B rãmb nins sẽn na n menemã yaa wẽn-kɩɩsdbã. Bũmb pa na n maan ka yell dãmbã, wala sẽn nong n yaa to-to ninsaalbã zab pʋsẽ wã ye. Zab-kãens pʋsẽ, neb nins sẽn pa sodaasã sẽn kiid sõor tõe n yɩɩga sodaas sẽn kiidi. Bʋkaood Kãsengã kõta tõnd bas-yard kaset t’a raarã na n yɩɩ wẽn-kɩɩsdbã sãoong daare.

11. A Ezai yeelame tɩ ned ning fãa sẽn na n zabd ne a Zeova la a balengã beoog-daar na n yɩɩ bõe?

¹¹ Nin-tɩrsã sẽn na n põsã na n yãame tɩ Wẽnnaam bãngr-goamã yaa sɩda. Verse 24 rengd n togsdame tɩ ‘neb nins sẽn da kɩɩsd a Zeova wã kũumã’ na n yɩɩ kaset sẽn wilgd a bʋ-kaoorã pidsgu. A Ezai sẽn tũnug ne gom-makdem ninsã tõe n sãama sũuri, la ra zemsa ne kʋdemd yell bala. Tãmpʋy n da be pĩnd Zerizalɛm lalsã poore, tɩ wakat-wakat bɩ b ra lobd nin-wẽns nins b sẽn get tɩ b pa segd ne mumbã b sẽn kʋ wã be. * Ra pa kaoosd la zũnzũyã la bugmã b sẽn ning n na n yõ wã rɩ sagdã la kũ-kãensã ye. Vẽenega, a Ezai gom-makdmã bilgda a Zeova  bʋ-kaoorã baasg kɩɩsdbã zut sẽn na n yɩ to-to.

A sẽn kãab bũmb ningã

12. A Ezai kõo vẽneg-bʋs n paas vɩɩmã dũni paalgã pʋgẽ wɛɛngẽ?

¹² Wilgri 21:4 wilgda tõnd yɛl kẽer sẽn pa na n zĩnd dũni paalgã pʋgẽ. La bõe n na n zĩnd rẽ sasa? Vɩɩmã na n yɩɩ wãn-wãna? D tõe n bãnga yɛl sẽn na n vẽneg-d ne rẽ bɩ? N-yẽe. Ezai sak 65 bãngr-goamã bilgda yɛl d sẽn na n dɩ b nafa d sã n ta a Zeova yam n na n vɩɩmd wakat ning a sẽn na n wa naan yaoolem sa-paalsã la tẽn-paalg kãensa wã. Neb nins b sẽn bark ne zĩig sẽn kaoosd tẽn-paalgã pʋgẽ wã pa na n kʋʋl n wa baas n ki ye. Ezai 65:20 (NW ) kõta tõnd bas-m-yam woto: “Bi-yẽsemdg sẽn na n vɩɩmd rasem a wãn bal ka na n le zĩnd be ye, nin-kẽem sẽn ka pidsd a ray me ka na n le zĩnd be ye; bala ned na n kii wala biig bala, ba a sã n tar yʋʋm koabga; la sã n yaa ne yel-wẽn-maanda, ba a sã n tar yʋʋm koabga b na n kãab-a-la wẽnga.”

13. Wãn-wãn la a Ezai 65:20 kõt tõnd bas-m-yam tɩ Wẽnnaam nin-buiidã na n paama bãane?

¹³ Yão wã sẽn da paam pidsg pipi a Ezai buudã zugã ra rat n wilgame tɩ bũmb ra pa maand kom-peelsã sẽn da be tẽngẽ wã ye. Bɛɛba ra pa kẽed n dɩgsd kom-yẽsemdsã bɩ n kʋʋd rasãmbã wala Babilon nebã sẽn da maan vugrã ye. (2 Kɩbaya 36:17, 20) Dũni paalgã sẽn wata pʋgẽ, bũmb pa na n maan neba ye, b na n talla bãan la b vɩɩmd sũ-noog pʋgẽ. Ned sã n yãk n na n kɩɩs Wẽnnaam, b pa na n bas-a t’a ket n vɩ ye. Wẽnnaam na n menes-a lame. La yaa wãn to yẽ, sã n mik tɩ yel-wẽn-maand ning sẽn yaa tõatã tara yʋʋm koabga? A na n “kii wala biig bala,” b sã n mak rẽ ne vɩɩm sẽn pa satã.—1 Tɩmote 1:19, 20; 2 Tɩmote 2:16-19.

14, 15. D sã n tik Ezai 65:21, 22 zugu, tʋʋm-bʋs sẽn be nafr la y tõe n gẽege?

¹⁴ Walla t’a gom n tadg b sẽn na n yiis yel-wẽn-maand ne yamleoog to-to wã zugã, a Ezai bilgda vɩɩmã sẽn na n yɩ to-to dũni paalgã pʋgẽ wã. Mams-y y mengã dũni paalgã pʋgẽ. Bũmb nins sẽn na n deng n wa y yamẽ wã yaa yɛl nins sẽn tɩ loe ne yãmb zakã. Yaa rẽ zug la a Ezai gomd verse 21 la 22 pʋsẽ wã woto: “B na n mee zags n zĩnd b pʋsẽ. Bãmb na n sela tɩɩse n dɩ b biisã. Bãmb ka na n me yir tɩ ned a to reeg n kẽ ye. Bãmb ka na n sel tɩɩs tɩ ned a to reeg n wob ye. Tɩ bõe, mam neba na n kaoosa wa tɩɩse. La neb nins mam sẽn yãka na n paama b tʋʋma nafre.”

¹⁵ Yãmb sã n pa mi rot meebo, bɩ y sã n nan zɩ n maan zagdinaase, bãngr-gom-kãngã rat n wilgame tɩ zãmsg n gũud-yã. La y kõn sakẽ tɩ karen-saam dãmb sẽn tar tõog la minim sõng-y tɩ y zãmse, tõe tɩ yags sẽn yaa nin-sõma sõng-y sɩda? A Ezai pa yet yãmb roogã sã n na n talla fenet bɛd ne pems-lɛɛg lutga, sẽn na yɩl tɩ y tõog n paam n kok pems-noogo, bɩ fẽneta sẽn maan ne vɛɛr n pag tɩ y tõe n tũnug be n ges zĩigã toeeng ye. Y na n mee roogã t’a sugrã sulg tɩ sa-koomã  la sa-lamdã salgd n dʋʋgd tẽng bɩ? Bɩ waoodã la tʋʋlgã sẽn yaa to-to yãmb babgẽ wã na n baoodame tɩ y maan sug-lamde, wala b rãmb nins sẽn be Moyẽnoriã wã buudu, tɩ yãmb ne y zakã rãmb tõe n dʋ be n tigim taab n dɩt rɩ-nood la y sõsd bɩ?—Tõodo 22:8; Nehemi 8:16.

16. Bõe yĩng tɩ y tõe n gũ tɩ dũni paalgã kõ sũ-noog wakat fãa?

¹⁶ Sẽn tar yõod n yɩɩd yel-bõones kãensã bãngr yaa y sẽn na n paam y meng zakã. A na n yɩɩ yãmb meng rẽnda, pa na n yɩ wala rũndã-rũndã, yãmb sẽn na n nams n me tɩ ned a to wa soogã ye. Ezai 65:21 yetame me tɩ y na n sela tɩɩs n dɩ b biisã. Vẽenega, yão wã kʋmsda yɛlã sẽn na n yɩ to-to. Y na n paama sũ-noog wʋsg modgr nins y sẽn maanda pʋgẽ, biis nins yãmb mengã tʋʋm sẽn wa ne wã pʋgẽ. La y na n tõog n maana woto y vɩɩmã pʋgẽ, sẽn na n kaoos ‘wa tɩɩsã.’ Ad woto sɩd zemsa ne ‘bũmb fãa paalsã’ bilgri!—Yɩɩl Sõamyã 92:13-15.

17. Sẽn yɩɩd fãa, roagdbã na n yãame tɩ kãab-bʋg n kengd raoodo?

¹⁷ Yãmb sã n yaa roagda, gom-kãensã na n kẽe yãmb sũurã: “Bãmb ka na n tʋm zaalem ye. La b ka na n dog kamb tɩ b sãam b nifẽ [sũ-sãams yĩng, NW ] ye. Tɩ bõe, bãmb ne b yagensa me na n yɩɩ buud sẽn tar Zusoaba barka. Mam sakame tɩ b nan ka bool maam ye. Mam leokame tɩ b nan ka gom n sɛ ye.” (Ezai 65:23, 24) Yãmb mengã zoe n yãa toog ning ‘dog kamb sũ-sãams yĩng’ sẽn wat ne wã bɩ? Pa tɩlae tɩ d sõdg kambã zu-loees nins fãa sẽn tõe n wa ne sũ-sãams n kõ roagdbã la neb a taabã ye. Rẽ wɛɛngẽ, d fãa yãa roagdb nug-tʋʋma, yɛl a taab bɩ b yõ-noogrã sẽn pak-b wʋsg hal tɩ b pa tar sẽk wʋsg b kambã yĩng ye. Sẽn yaa lebende, a Zeova kõta tõnd bas-m-yam t’a na n wʋmame la a pids tõnd raabã, hal n deng n beool rẽ menga.

18. Bõe yĩng tɩ y tõe n gũ n deem ne rũmsã dũni paalgã pʋgẽ?

¹⁸ Y sã n wa tagsd y sẽn tõe n paam bũmb ning dũni paalgã pʋgẽ wã, bɩ y mams yɛl nins Wẽnnaam bãngr-goamã sẽn wilgd woto wã: “ ‘Digd-n-yĩids ne pe-bi na n lagma taab n wãbe. Gɩgma na n wãba yamd wa niigi. La waaf na n moga tom. Wẽng ne sãoong ka na n tol n le zĩnd mam tãn-sõnga zug ye.’ Yaa Zusoabã [a Zeova, NW ] n yeele.” (Ezai 65:25) Gʋndb sẽn yaa ninsaalb makame n na n gʋl n bilg yel-kãensã, la woto pa mamsg bal b sẽn maan ne bilgr sẽn loog noor ye. Yel-kãensã na n sɩd zĩndame. Bãan na n zĩnda ninsaalbã sʋka, la na n yɩɩ woto ne rũmsã me. Bõn-vɩɩs halhaal vaeesdb la neb sẽn nong rũms rɩka b vɩɩmã yʋʋm wʋsg sẽn yɩɩd n zãms rũms buud a wãna, tõe tɩ yaa rũms buud sull a yembr bala. La tags-y n  ges yãmb sẽn na n tõog n zãms bũmb ninga, rũmsã sã n wa pa zoet ninsaala. Dẽ y na n tõogame n kolg liuuli la bõn-naands bõones sẽn nong n vɩ kãgẽ wã, n kolg-ba, n ges-ba, la y reem ne-ba. (Zoob 12:7-9) La y na n tõog n maana woto bãan pʋgẽ, n miẽ tɩ ninsaal bɩ rũng pa na n maan-y wẽng ye. A Zeova yetame: “Wẽng ne sãoong ka na n tol n le zĩnd mam tãn-sõnga zug ye.” Ad wã na yɩ toeeng meng-menga, d sã n mak rẽ ne bũmb ning tõnd sẽn ne la d vɩ rũndã-rũndã wã!

19, 20. Bõe yĩng tɩ Wẽnnaam nebã yaa toor ne nebã wʋsg sẽn yɩɩd rũndã-rũndã?

¹⁹ Wa d sẽn togs tɩ loogã, ninsaalbã pa tõe n deng n togs beoog-daarã takɩ ye, baa yʋʋm tusr paalgã yell sẽn pak neba zĩig fãa wã. Rẽ basa neb wʋsg ne sũ-sãamse, yam-yuusgu, bɩ ne saagr kaalem. A Peter Emberley sẽn yaa Kanada Inivɛrsite dirɛktɛɛrã gʋlsa woto: “[Kãsemb] wʋsg baas n maooda ne sʋgs-kãsems belmã wɛɛngẽ. Mam yaa ãnda? M modgd n baooda bõe menga? Yaa bõe la mam tar n na n taas zãmaan ning sẽn watã? B sã n wa be b vɩɩma pʋɩ-sʋka neba maoodame n dat n sigl-a la b kɩt t’a tall võore.”

²⁰ Y tõe n bãnga bũmb ning sẽn kɩt tɩ yaa woto ne neb wʋsgã. B tõe n baoodame n na n dɩ vɩɩmã nafr ne reem bɩ pemsem kokr buud sẽn sidgd yĩnga. La b pa mi bũmb ning sẽn wat beoog-daar ye, rẽ n so tɩ vɩɩmã tõe n pa tar võore, n pa sigl sõma, bɩ a pa tar bõn-datl meng-meng ye. Masã, ne bũmb ning d sẽn vaees n yã wã y yamẽ, bɩ y mak y vɩɩmã ne bãmb dẽndã n ges tɩ y na mik tɩ pa yembr ye. Y miime t’a Zeova sa-paalsã la tẽn-paalgã a sẽn kãabã pʋgẽ, d na n tõogame n ges sẽn gũbg tõndã n yeel ne d sũur fãa woto: ‘Sɩd-sɩda Wẽnnaam maana bũmb fãa paalse!’ Ad d sũy sɩd na yɩ noog ne rẽ!

21. Yel-yɛng bʋg la d yãt Ezai 65:25 la Ezai 11:9 pʋsẽ?

²¹ Tags tɩ d mengã vɩɩ Wẽnnaam dũni paalgã pʋgẽ pa wuk-m-meng ye. Wẽnnaam boonda tõndo, n sagend tõnd sõma-sõma meng tɩ d wa balm-a ne sɩd masã n pids yɛl nins b sẽn baood sẽn na yɩl n paam vɩɩmã, wakat ning ‘wẽng ne sãoong sẽn ka na n tol n le zĩnd yẽ tãn-sõnga zugã.’ (Ezai 65:25) La y ra miime t’a Ezai ra reng n togsa gomd sẽn wõnd woto, la t’a paasa bũmb sẽn tar yõod wʋsg sẽn na n kɩt tɩ d sɩd rɩ vɩɩmã nafa dũni paalgã pʋgẽ bɩ? Ezai 11:9 yetame: “Wẽng ne sãoong ka na n tol n le zĩnd mam tãn-sõnga zug ye. Tɩ bõe, dũniyã na n pida ne Zusoaba [a Zeova, NW ] bãngr wa koom sẽn pid mogre.”

22. Tõnd sẽn vaees Biiblã bãngr-goam a naasã segd n paasa sard ning tõnd sẽn dɩk n na n maan bõe wã pãnga?

²² ‘A Zeova bãngrã.’ Wẽnnaam sã n wa maan bũmb fãa paalse, tẽngã neb na n paama bãngr sẽn yaa takɩ sẽn tɩ loe ne Wẽnnaam la a raabã. Rẽ baoodame tɩ d paam bãngr sẽn yɩɩd bãngr sẽn tɩ loe ne rũmsã. Rẽ tɩ loee ne Gomdã vʋʋsem sõng sẽn vẽneg tɩ b gʋlsã. Wala makre, tags-y n ges tõnd sẽn yã yɛl wʋsg ninsã, d sẽn vaees bãngr-goam a naasã sẽn gomd ‘sa-paalsã la tẽn-paalgã’ yellã. (Ezai 65:17, NW; 66:22, NW; 2 Pɩɛɛr 3:13; Wilgri 21:1, NW ) Y bee bʋʋm n na n karem Biiblã daar fãa. Yãmb minim n maanda woto bɩ? Sã n pa rẽ, bõe remsg la y tõe n maan n karem bũmb sãnda nins Wẽnnaam sẽn tar n na n togs-yã daar fãa? Y na n yãame tɩ dũni paalgã gẽegr toor sẽn ka be, y na n paama sũ-noog n paas masã tɛk wa sẽn yɩ to-to ne yɩɩl-gʋlsdã.—Yɩɩl Sõamyã 1:1, 2.

[Tẽngr note]

Wãn to la y na n leokẽ?

• Bõe yĩng tɩ d na n baas n tags tɩ Ezai 66:22-24 reng n togsda bũmb sẽn ket n wate?

• Sẽn yɩɩd fãa, bõe la y gẽegda, yɛl nins b sẽn togs bãngr-goam nins sẽn be Ezai 66:22-24 la Ezai 65:20-25 pʋgẽ wã sʋka?

• Bʋʋm bʋs la y tar n na n tall bas-m-yam ne y beoog-daarã?

[Zãmsgã sogsgã]

[Foto, rãmba, seb-neng 15]

A Ezai, a Pɩɛɛr la a Zã reng n togsa “sa-paalsã la tẽn-paalgã” nens kẽere