Rĩungã koe-moondb togsdame

Zak pʋgẽ vɩɩm sẽn tar sũ-noog kɩtdame tɩ neb a taabã pẽneg Wẽnnaam

A ZEOVA ninga a Zozɛf bark n kõ-a yam wʋsg la yam-welgre. (Tʋʋma 7:10) Rẽ kɩtame t’a Zozɛf yam-welgrã “taa Faraõ ne a tʋm-tʋmdba fãa yam.”—Sɩngre 41:37.

Woto me, rũndã-rũndã, ne b Biibl zãmsgã maasem, a Zeova kõta a nin-buiidã yam-welgre. (2 Tɩmote 3:16, 17) Yam la yam-welgr kãng womda bi-sõma, b sã n tũ saglsã sẽn tik Biiblã zugã. Naoor wʋsgo, b manesem sõngã ‘taa neb nins sẽn get-bã yam,’ wala kɩbay nins sẽn yit Zĩmbabwe sẽn wilgdã.

• Pag a yembr n da tar yags sẽn ya a Zeova Kaset rãmba. Baa ne a sẽn da pa nong Kaset rãmbã, a ra nonga b manesmã, sẽn yɩɩd fãa, b zak pʋgẽ vɩɩmã. A mikame tɩ pagã ne a sɩdã moor da nooma wʋsg ne taaba, tɩ b kambã ra yaa sakdba. Sẽn yɩɩd fãa, a yãame tɩ rao wã ra nonga a pagã wʋsgo.

Afiriki nebã nong n tagsdame tɩ rao sã n nong a paga, yaa pagã n ning rao wã “tɩɩm.” Yaa rẽ n so tɩ pagã wa Kaset soabã pag nengẽ n sʋk-a woto: “Fo tõe n kõo maam tɩɩm ning fo sẽn ning f sɩdã, sẽn na yɩlga, tɩ mam sɩdã nong maam wa fo sɩdã sẽn nong foo wã bɩ?” Kaset soabã leok-a-la woto: “N-yẽe, beoog wĩnd-kaoore, m na n talla tɩɩmã n wa kõ-fo.”

Vẽk-n-beoogã, saam-bi-poakã tɩ gesa a yakã ne a “tɩɩmã.” Tɩɩmã ra yaa bõe? Ra yaa Biiblã, ne sebr ning sẽn yaa Bãngr Sẽn Tar n Debd Vɩɩm Sẽn-Kõn-Saẽ Wã. A sẽn wilg sagls nins sẽn yit Bãngr sebrẽ wã gom-zug sẽn yaa “D Me Zak Sẽn Waoogd Wẽnnaam” pʋgẽ wã poore, a yeela pagã: “Yaa kada la ‘tɩɩm’ ning maam ne m sɩdã sẽn kõt taabã, la yaa rẽ yĩng la d sẽn nong taab wʋsgã.” Biibl zãmsg n sɩnge, la tao-tao, pagã bɩɩme hali n wa rɩk a meng n kõ a Zeova n wilg rẽ ne koom lisgu.

• Zall so-pakdb a yiib b sẽn tʋm tɩ b tɩ lagem tiging kɩdg sẽn be Zĩmbabwe la Mozãmbik rɩtg la yaang babg toadgẽ wã noor maana semen a yiib n pa yi zak-zak koe-moonegã pʋgẽ ye. Bõe yĩnga? Ra yaa nebã sẽn da wat b nengẽ n na n kelg b goamã yĩnga. So-pakd a yembr togsa rẽ sẽn yɩ to-to woto: “Tõnd ra kẽngda kɩlometr piig la a nu zĩigẽ n na n tɩ maan semen fãa Biibl zãmsg ne ned sẽn nong sɩdã. Zĩ-kãngã taab ra pa nana ne tõnd ye. D ra segd n kẽna bɛgd pʋgẽ, la d pasg kʋɩls koom sẽn zoete, n limd n tat tõnd kokoɛya. Ra yaa tɩlae tɩ d rɩk d futã la d naooda wã n tʋke, n dugd kʋɩlgã pʋgẽ, n yi n ye tɩ ning d futã kʋɩlgã rʋʋnde.

“Tõnd yẽesmã linga ned ning sẽn nong sɩdã yags wʋsgo. Bãmb ned a yembr yaa be tũudum taoor soaba. A yeela a nebã: ‘Yãmb pa rat n tall yẽesem wala kom-bɩ-kãensã b yiibã sẽn ya a Zeova Kaset rãmbã sɩda?.’ Vẽk-n-beoogã, a karen-biisã wʋsg waa tõnd yirã n dat n bãng bũmb ning sẽn kɩt tɩ tõnd nangd pãng woto wã. Sẽn paase, semen a yiibã sẽn pʋglã, d reega neb wʋsg hal tɩ kɩt tɩ d ra pa tõe n paam sẽk n segl rɩɩb n dɩ ye!”

Tũudum taoor soabã zĩnda neb nins sẽn ges so-pakdbã b yirã semen a yiib kãensã sasa wã sʋka. Mams-y so-pakdbã sũ-noogã, a sẽn sak Biibl zãmsgã!