“Kiris-nedemdã” halhaal toeeng yaa bũmb sẽn sakd Wẽnnaam nifẽ bɩ?

WALA yãmb sã n yeel desinatɛɛr t’a ges yãmb n gʋl yimaaz tɩ wõneg-yã. A sẽn wa n maan woto n sa, y sũur yaa noogo. Sɩd wõnda yãmb kɛpɩ. Yãmb zoe n mamsda y kambã, y yagensã la bãmb yagensã sẽn get yimaazã ne zu-zẽkr wʋsgo.

La zãmaan a wãn kaoosg poore, yãmb yageng a yembr n wa n tagsdẽ tɩ zoobd sẽn pa wʋsg yimaazã zugã pa neer ye, t’a kɩt tɩ b paas zoobdo. Ned a to n pa nong yõorã sẽn yaa to-to wã, t’a kɩt tɩ b toeem-a. B waa ne “toeeng” a taab n paas zãmaan dãmb sẽn pʋg taabã pʋsẽ, tɩ yimaazã wa baas n ye pa wõnd yãmb wʋsg ye. Yãmb sã n da bãngẽ tɩ ra na n yɩɩ woto, wãn-wãn la y ra na n tagse? Sãmbg sẽn ka be, y sũur da na n sãamame.

Zu-bʋko, d sã n na n ges sɩd-sɩda, yimaaz kãngã kɩbarã yaa yembr ne kiris-neb ne yʋʋrã egiliiz rẽnda. Kʋdemdã wilgdame tɩ Kirist tʋm-tʋmdbã kũum poor bilfu, “kiris-nedemdã” b sẽn da sɩng n mi-a to-to wã sɩnga toeeng wa Biiblã sẽn da reng n togsã.​—Matɩe 13:24-30, 37-43; Tʋʋma 20:30. *

Yaa sɩd tɩ zemsame tɩ d wilg Biiblã noy sẽn tar yõod ning ne buud fãa vɩɩm manesem la wakat toɛ-toɛya. La woto pa yembr ne f sẽn na n toeem Biiblã zãmsg tɩ zems ne zãma wã tagsg sẽn wɛ wã ye. La yaa woto n zĩnd kɛpɩ. Wala makre, bɩ y ges toeeng nins b sẽn maan bab-kãsems wʋsg pʋsẽ wã.

Egiliizã maanda lagem-n-taar ne tẽngã nanambse

A Zezi zãmsa nebã t’a naamã bɩ a Rĩungã yaa yĩngr dẽnda, tɩ wakat sẽn zems sasa, a na n sãama ninsaalbã naam fãa, la a rɩ naam tẽngã gill zugu. (Daniɛll 2:44; Matɩe 6:​9, 10) A ra pa na n tũnug ne ninsaalbã politik sigls n dɩ naam ye. “Mam soolem ka dũniyã rẽnd ye,” woto la a Zezi yeel-yã. (Zã 17:16; 18:36) Woto, baa ne a Zezi karen-biisã sẽn sakd laloa wã, b pa kẽes b toog politikã yɛlẽ ye.

Baasg zãnga, Rom Ãmperɛɛr a Kõnstãntẽ naamã wakat yʋʋm kob-gĩnd a naas soabẽ wã, kiris-neb ne yʋʋr sõor wʋsg da yãgdame n na n yã Kirist lebg-n-wa wã, n paas Wẽnnaam Rĩungã luglgu. Bilf-bilfã, b manesmã ne politikã yɛl toeemame. Sebr a yembr (Europe​—A History) yetame: “Sẽn deng a Kõnstãntẽ, kiris-nebã ra pa bao n na n tall pãng [politikã wɛɛngẽ] sẽn na yɩl n tũnug ne rẽ n kɩt tɩ b bõn-datɩ wã la b tẽebã kẽng taoor ye. A Kõnstãntẽ poore, kiris-nedemdã ra fõr n kẽe politikã pʋgẽ wʋsgo.” Kiris-nedemdã b sẽn lebs n maana lebga Rom soolmã sẽn be “zĩig fãa,” bɩ sẽn yaa “katoliki,” b sẽn kõ noor tɩ b sake.

 Bãngr sebr (Great Ages of Man) yetame tɩ lagem-n-taar kãngã sẽn be Egiliizã ne Pãn-soaadbã sʋkã yĩnga, “yʋʋmd 385 Soaalã Wakat pʋgẽ sasa, b sẽn nams kiris-nebã wʋsg tɩ yʋʋm 80 poor bala, egiliizã meng sɩngame n kʋʋd neb nins sẽn pa sak bãmb tagsgã, t’a taoor dãmbã ra tar pãng sẽn zem soolmã nanambs rẽnd la bala.” Yaa woto la b kẽ wakatẽ sʋʋg sẽn ledg gom-tɩ-b-sake, sẽn na yɩl n maan tuubgu. Ra leb n yaa wakat tũudum taoor dãmb sẽn tar waoogr yʋy la sẽn dat naam tɩ loogã sẽn ledg yʋʋm kob-yendẽ koe-moondbã sẽn tar sik-m-mengã. (Matɩe 23:​9, 10; 28:19, 20) Kʋdemd yel-gɛt a H. G. Wells gʋlsa “welgr sẽn yaa kãsems nins sẽn be” yʋʋm kob-gĩn a naas soab kiris-nedemdã “la a Zezi sẽn yit Nazarɛtã zãmsgã sʋka. Welgr sẽn yaa kãsems” kãens toeema zãms-kãsems nins sẽn tɩ loe ne Wẽnnaam la Kirista wã menga.

Wẽnnaam halhaalã toeengo

Kirist ne a karen-biisã zãmsa nebã tɩ yaa “Wẽnnaam a yembr bal n be. Bãmb yaa tõnd Ba,” a yʋ-peell sẽn ya a Zeova wã sẽn welg toorã. Yʋ-kãng pukda sẽn zems naoor 7 000 pipi Biibl dãmbã sẽn gʋls ne nusã pʋsẽ. (1 Korẽnt dãmba 8:6; Yɩɩl Sõamyã 83:18, NW ) Yaa Wẽnnaam n naan a Zezi. A yaa “bi-kãseng bõn-naandsa fãa sʋka,” woto la Bible de Jérusalem sẽn yaa katolik rẽndã wilg Kolos rãmba 1:15 pʋgẽ. Woto, a sẽn yaa bõn-naandgã, a Zezi togsa vẽenega: “Mam Ba yɩɩda maam.”​—Zã 14:28.

La yʋʋm kob-gĩnd a tãab soabẽ wã, tũudum taoor dãmb sãnda sẽn tar pãn-tusdg sẽn da nong tãablmã zãmsg sẽn yit Gerɛs filozof a Platõ sẽn yaa payẽ nedã nengẽ wã, sɩngame n toeemd Wẽnnaam halhaalã tɩ tʋg n zems ne Tãablmã goamã. Yʋʋm kob-gĩn nins sẽn pʋglã, zãms kãngã zẽka a Zezi t’a ne a Zeova zem taaba. Zãms-kãng ye maaname tɩ Wẽnnaam vʋʋsem sõngã bɩ a pãn-tʋmdgã yɩ neda, tɩ woto fãa yaa lebend ne Gʋlsg Sõamyã.

Sã n yaa ne egiliizã sẽn sak payẽ zãmsgã sẽn tɩ loe ne Tãablmã wɛɛngẽ, New Catholic Encyclopedia wã yetame: “Gomd ning sẽn yaa ‘Wẽnnaam a yembr Neb a tãab pʋsẽ wã’ ra pa paam viglg kãn-kãe ye, la sɩd-sɩda a ra pa kẽ kiris-nebã vɩɩmẽ la b tẽebã vɩɩm pʋgẽ zãng-zãng sẽn deng yʋʋm kob-gĩnd a 4 soabã saabẽ ye. La yaool n yaa gom-kãngã takɩ n yɩ pipi n wa ne gom-zu-kãngã sẽn yaa Tãablmã tẽebo. Egiliizã Gʋlsdb sʋka, baa fʋɩ pa be meng sẽn pẽneg tags-kãngã buud ye.”

Woto me, The Encyclopedia Americana yetame: “Yʋʋm kob-gĩnd a naas soab Tãablmã zãmsg pa puk pipi kiris-nebã zãmsg tɩ zems takɩ Wẽnnaam halhaalã wɛɛngẽ ye. Sẽn yaa lebende, a ra bʋdg n basa zãms-kãnga.” The Oxford Companion to the Bible yetame tɩ Tãablmã yaa “tẽeb zãmsg sõor wʋsg sẽn wa yaoolmã” a yembre. La pa Tãablmã a yembr bal n yaa payẽ zãmsg b sẽn sak egiliizã pʋgẽ ye.

Sɩɩg halhaalã toeengo

B nong n tẽeda rũndã-rũndã tɩ ninsaal tara sɩɩg sẽn pa kiid sẽn vɩ yĩngã kũum poore. La yãmb miime tɩ egiliizã zãms-kãngã me yaa bũmb sẽn wa n paas kaoosg poor bɩ? A Zezi togsa sɩd sẽn yit Biiblã pʋgẽ sẽn wilgd tɩ “kũum ka mi bũmb ye,” tɩ yaa wa b gõeeme. (Koɛɛg Soaba 9:5; Zã 11:11-13) Ra segd n tũu ne vʋʋgrã maasem tɩ vɩɩm ye wa, ‘yaa yikr yɛs’ kũum gõeemã pʋgẽ. (Zã 5:28, 29) Sɩɩg sẽn pa kiid sã n da beẽ, vʋʋgr da pa na n tall yõod ye, bala pa-kiidã kɩtdame tɩ kũum kaẽ ye.

A Zezi wilgame meng tɩ Biiblã zãmsda vʋʋgrã n vʋʋg neb sẽn ki. D rɩk makr ne a Lazaar sẽn da ki tɩ rasem a naasã. A Zezi sẽn da wa n vʋʋg-a wã, a Lazaar yii yaoogẽ wã vɩɩga, n yaa ninsaal sẽn vʋʋsde. Sɩɩg sẽn pa kiid pa yi sũ-noog zĩigẽ sẽn be saasẽ n wa kẽ a Lazaar yĩngã, a sẽn wa n yik kũ rãmbã sʋkã ye. Sã n da yɩẽ woto, a Zezi sẽn vʋʋg-a wã pa sõng-a ye!​—Zã 11:39, 43, 44.

La sɩɩg pa kiidã zãmsg yẽgr yaa bõe? Sebr a yembr (The Westminster Dictionary of Christian Theology) yetame tɩ zãms-kãngã “yita Gerɛs filozofi wã pʋgẽ lakae, pa Biiblã vẽnegrẽ ye.” The Jewish Encyclopedia wilgdame: “Tẽeb ning sẽn wilgd tɩ sɩɩgã ket n vɩɩ yĩngã kũum  poorã yaa filozofi bɩ tũudum mitb tags-bɛda, lakae pa tẽebã a yen-yen bũmb ye, la Gʋlsg Sõamyã pʋgẽ zĩig ba a yembre b pa wilg-a vẽeneg ye.”

Naoor wʋsgo, zɩlem-beed wata ne zɩlem-beed a to, la yaa woto ne sɩɩg pa kiidã zãmsgo. A paka sor tɩ b tall payẽ rãmb tagsg sẽn tɩ loe ne namsg sẽn-kõn-sa ãnfɛɛr bugmẽ. * La Biiblã wilga vẽeneg tɩ “yel-wẽna yaood yaa kũum,” la pa namsg sẽn ka saab ye. (Rom dãmba 6:23) Woto, a sẽn bilgd vʋʋgrã, Sacy lebgrã yetame: “Mogrã basa kũum nins sẽn da be a pʋgẽ wã; la kũum ne ãnfɛɛr basa kũum nins sẽn da be bãmb pʋsẽ wã.” Woto me, Crampon 1905 Biiblã yetame tɩ “mogrã . . .  la kũumã la ãnfɛɛr basa b kũ rãmba.” N-yẽe, d sã n na n togs nana-nana bala, neb nins sẽn be ãnfɛɛrã kiime, ‘n gõe,’ wa a Zezi sẽn yeelã.​—Wilgri 20:13.

Yãmb sɩd tẽedame tɩ zãmsg ning sẽn zãmsd tɩ b sɩbgda neb ãnfɛɛr bugmẽ wã tusda nebã tɩ b sak Wẽnnaam bɩ? Ayo. Neb nins sẽn yaa tɩrs la b tar nonglmã yamẽ, yaa bũmb sẽn pa sakd reegre! La Biiblã yẽ zãmsda nebã tɩ “Wẽnnaam yaa nonglem” la tɩ nen-kɛglem, baa yaa ne rũmsã, yaa bũmb a sẽn kisa.​—1 Zã 4:8; Yelbũna 12:10; Zeremi 7:31; Zonas 4:11.

“Yimaazã” toeeng rũndã-rũndã

Wẽnnaam la kiris-nedemdã halhaal toeeng ket n maanda tõnd wakatã. Sẽn pa kaoos pʋgẽ, tũudum porfesɛɛr bilga maoor ning sẽn be a Portɛstã egiliizã pʋgẽ wã, n wilg tɩ maoorã maanda “Gʋlsgã ne a tẽeb zãmsg zu-sobend la tags-bɛd sẽn yaa zẽms ninsaalbã nafr yĩnga zu-sobend sʋka. Ye yaa maoor egiliizã kɩs-sɩdã ne Kirist zu-sobendã la b sẽn lebsd n toeemd kiris-nedemdã t’a zems ne bãmb zãmaanã neb tagsgã sʋka. Ad yellã: Ãnd n wilgd egiliizã na-kẽndre . . . yaa Gʋlsg Sõamyã bɩ, bɩ yaa bãmb zãmaanã neb tagsg ning sẽn wɛ wã?”

Zu-bʋko, wõnda ‘zãmaanã neb tagsg ning sẽn wɛ wã’ ket n lʋɩta taoore. Wala makre, egiliiz rãmb wʋsg sẽn toeem b tagsg yɛl toɛ-toɛ zut sẽn na yɩl tɩ b yã tɩ bãmb me kẽngda taoor la b yam pakame wã pa bũmb sẽn solg ye. Sẽn yɩɩd fãa, sẽn tɩ loe ne vɩɩm manesmã yɛla, egiliiz rãmbã tara maan-m-yam wa d sẽn wilg pipi sõsgẽ wã. La Biiblã wilgda vẽeneg tɩ yoobo, kãadem pʋgẽ yoobo la roap ne roap bɩ pagb ne pagb sẽn gãe taab yaa yel-wẽn-kãsems Wẽnnaam nifẽ, la tɩ neb nins sẽn tʋmd tʋʋm-kãensa wã “ka na n paam Wẽnnaam soolem” ye.​—1 Korẽnt dãmba 6:​9, 10; Matɩe 5:27-32; Rom dãmba 1:26, 27.

Tʋm-tʋmd a Poll sẽn wa n gʋls goam nins d sẽn wilg yĩngrã, Gerɛk la Rom dãmbã zãmaan sẽn da gũbg-a wã ra pida ne wẽnem buud toor-toore. A Poll ra tõe n tagsa woto: ‘N-yẽe, Wẽnnaam sãama Sodom ne Gomoor tɩ b lebg tompɛglem yoob yel-wẽn-kãsems yĩnga, la rẽ ra yaa yʋʋm 2 000 sẽn looge! Sɩd-sɩda woto pa pak wakat kãngã sẽn tar vẽnegrã ye.’ La a pa tags woto ye. A pa sak Biiblã sɩd goleng ye.​—Galat dãmba 5:19-23.

Ges-y pipi “yimaazã”

A sẽn gomd yẽ wakatẽ Zʋɩf tũudum nanambsã yelle, a Zezi yeelame tɩ b balengã ra yaa ‘zaalem, bãmb sẽn zãms neba ninsaalb tõod balã yĩnga.’ (Matɩe 15:9) Tũudum taoor dãmb kãensã sẽn maan to-to ne a Zeova Tõogã a sẽn tũnug ne a Moiiz n kõ wã yaa yembr kɛpɩ ne dũni kiris-nedemdã taoor dãmb sẽn maan la b ket n maand ne Kirist zãmsgã. B rɩka rog-n-mikã yɛl n lʋɩɩs taoore, n lebs Wẽnnaam sɩdã poorẽ. La a Zezi yiisa zɩlem-beedã buud fãa kɛɛnga, tɩ naf pʋ-peelem dãmbã. (Mark 7:​7-13) A Zezi togsa sɩda, a noom nebã t’a pa noom-b me. Wakat fãa a ra tikda Wẽnnaam gomdã zugu.​—Zã 17:17.

Ad a Zezi sẽn maana sɩd yaa toor wʋsg ne neb wʋsg sẽn yɩɩd sẽn yaa kiris-neb ne yʋʋrã! Sɩda, Biiblã reng n togsa woto: “Neba . . . na n  baoo karen-saam dãmb wʋsg sẽn na n togs koɛɛg sẽn noom bãmb bala. Bãmb kõn le kelg sẽn yaa sɩd ye, bãmb na n kelga soalem bala.” (2 Tɩmote 4:​3, 4) “Soalem” kãensã tõnd sẽn ges kẽerã sãamda ned tẽebã wɛɛngẽ, tɩ Wẽnnaam Gomdã yaool n kengd tẽeb la a tar n debd vɩɩm sẽn-kõn-sa zĩigẽ. Yaa sɩd kãng la a Zeova Kaset rãmbã sẽn daoond yãmb tɩ y vaeesã.​—Zã 4:24; 8:32; 17:3.

[Tẽngr not rãmbã]

[Zĩ-gũbri, seb-​neng a 7]

Yʋʋr ning sẽn yaa kiris-nedã sɩngre

Taa yʋʋm piig a Zezi kũumã poore, b sẽn da ket n boond a karen-biisã tɩ neb nins sẽn be “Sorã” pʋgẽ. (Tʋʋma 9:2, NW; 19:​9, 23; 22:4, NW ) Bõe yĩnga? Yaa b vɩɩm manesmã sẽn da tik tẽeb ne a Zezi Kirista sẽn yaa “sore la sɩda la vɩɩm[ã]” zugã yĩnga. (Zã 14:6) Rẽ, wakat a wãn yʋʋmd 44 T.W. poore, Ãntios sẽn be Siiri soolmã pʋgẽ, “Wẽnnaam sor-wilgr pʋgẽ b boola [a Zezi karen-biisã] tɩ kiris-neba.” (Tʋʋma 11:26, NW ) Tao-tao tɩ b saka yʋ-kãngã, baa tẽngã nin-kãsems sʋka. (Tʋʋma 26:28) Yʋ-paallã pa toeem kiris-neb vɩɩm manesmã, sẽn kell n tũ Kirist vɩɩm manesmã makrã ye.​—1 Pɩɛɛr 2:21.

[Foto rãmba, seb-​neng a 7]

Ne b zãma sʋk koe-moonegã, a Zeova Kaset rãmbã teesda nebã Wẽnnaam Gomdã sẽn yaa Biiblã pʋgẽ

[Foto rãmbã soaadbã, seb-​neng a 4]

Tãab-n-soab sẽn sɩng ne goabga: Nations Unies/Fot a Saw Lwin sẽn yõke