Nin-kɩdse, n yaool n tar sũ-keelem

Y SÃ N da segd n sõs ne sãamb Wẽnnaam Rĩungã wɛɛngẽ, yãmb woglem sã n da yaa sãntɩmetr 76 bala, y ra na n gesa yellã wãn-wãna? A Laura na bãng n togs-yã. A yʋʋm 33, a woglem da pa yɩɩd sãntɩmetr 76 ye. Yẽ ne a yao a Maria sẽn da tar yʋʋm 24 t’a woglem da yaa sãntɩmetr 86 wã bee Kito sẽn be Ekoatɛɛr tẽngã. Bas-y tɩ b wilg yel-gɩdgds nins b sẽn segd b kiris-neb ministɛɛrã pʋgẽ wã.

“Sẽn na yɩl n kẽng d moonegã zĩigẽ la d kiris-neb tigissẽ wã, d kẽnda sẽn na maan kɩlometr pʋɩ-sʋk n paam biisã. A sẽn sikdẽ tõnd zĩig ningã, d ye kẽnda sẽn zems kɩlometr pʋɩ-sʋk n paam biis a yiib-n-soabã. Zu-bʋko, so-kãng zugã ba-zabds a nu n be beenẽ. Tõnd zota baasã wʋsgo, bala ne tõndo b yaa bɛd wa wed-moose. Sã n yaa tɩlae tɩ d rig-b n zãage, d zãada raoogo, n bao zĩig n solg-a n yaool n tɩ kẽ biisã, tɩ d sã n wa kuiisẽ bɩ d rɩk-a.

Biisã pʋgẽ kõom sɩd yaa toog wʋsg ne tõndo. Tõnd rʋʋda tãn-dʋr zug biisã yalsg zĩigẽ sẽn na yɩl tɩ kõomã yɩ nana n paase. Sʋfɛɛr dãmb kẽer pẽnegda tãndã dʋrẽ wã n yaase, la a taab pa maand woto ye. Sã n wa yaa woto, woglem sẽn yɩɩda tõnd sʋkã sõngda sẽn yaa koɛɛg n yɩɩdã t’a tõog n kẽ. Biis a yiib-n-soabã paoong baoodame tɩ tõnd pasg sor neb wʋsg sẽn tũudi. Rẽ baooda modgr kãseng ne tõnd karsã sẽn yaa koeesã. Tõnd sẽn yaa koeesã yĩnga, kor-zɩsg paasda toogã. Sẽn na yɩl tɩ korgã yɩ faasga, d tũnugda ne Biibl kɩdgã la sɛb bilfu.

“Hal tõnd yãadmẽ, tõnd yaa nin-sĩnds meng-menga. Tõnd yagsã miime tɩ yaa toog ne tõnd wakat fãa tɩ d sõs ne sãamba. Woto yĩnga, lingd-b-la wʋsg b sã n yã tõnd sẽn wẽed sallem b zagsã noyẽ, la naoor wʋsgo b kelgda tõnd sõma. La zĩig ning nebã sẽn pa mi tõnd sõma wã, b getame bal tɩ tõnd yaa rɩga. Rẽ, pa wakat fãa la b kelgd koɛɛg ning d sẽn taasdã sõma ye. Baasg zãnga, d sẽn ne t’a Zeova nong-d lame wã kõt-d-la raood tɩ d kẽng taoor ne koe-noogã moonego. D sẽn bʋgsd Yelbũna 3:5, 6 zugã me kõt-d-la raoodo.”

Wala a Laura la a María sẽn wilgã, nang pãng baa ne yĩng komslem tõe n ninga Wẽnnaam ziiri. Tʋm-tʋmd a Poll pʋʋsa Wẽnnaam n kos t’a yãk “yĩng gõaag[ã],” tõe tɩ yaa yĩng komslem. La Wẽnnaam yeel-a lame: “Mam barka sekda foom; tɩ bõe, yaa pãng komsem pʋgẽ la ned bãngd mam pãnga.” N-yẽe, pa tɩlae tɩ b yiis komslem yĩngã wɛɛngẽ tɩ d yaool n tõog n sõgen Wẽnnaam ye. Wẽnnaam teegr zãng-zãng tõe n sõnga tõnd tɩ d tũnug ne d sẽn be zĩig ning vɩɩmã pʋgẽ sõma n yɩɩda. A Poll sẽn ges a “yĩng  gõaag[ã]” woto wã yĩnga, a ra tõe n yeelame: “Mam sẽn ka be pãng wakate, yaa wakat kãng la mam paamd pãnga.” (2 Korẽnt dãmba 12:7, 9, 10) Yʋʋm a wãn poore, a Poll gʋlsame: “Mam tara pãng n na n maan bũmb fãa, ned ning sẽn kõt maam pãngã maasem yĩnga.”—Filip rãmba 4:13, NW.

Tõnd wakatã, Wẽnnaam pidsda tʋʋm kãseng n tũnugd ne roapa, pagb la kamb sẽn dɩk b mens zãng n kõ-a. Bãmb wʋsg tara yĩng komslem buud bɩ a to. Baa bãmb fãa sẽn saagd n na n paam Wẽnnaam maagrã Wẽnnaam Rĩungã naam sasa wã, b pa zĩ n gũudẽ tɩ Wẽnnaam yols-b ne b zu-loeesã tɩ b yaool n modg n maan bũmb a sõgenegã pʋgẽ ye.

Yãmb namsda yĩng komslem yĩng bɩ? Bɩ y ra koms raood ye! Ne y tẽebã maasem, y tõe n zĩnda neb wala a Polle, a Laura la a Maria sʋka. B tõe n yeela bãmb wɛɛngẽ wala sẽn yɩ to-to ne roap la pagb sẽn tall tẽeb tẽn-kʋdem-wẽndẽ wã woto: “Bãmb sẽn da ka pãngã b maaname tɩ [bãmb] tall pãnga.”—Hebre dãmba 11:34, NW.

[Foto, seb-neng 30]

A María ne a Laura

[Foto, seb-neng 31]

A María sẽn sõngd a Laura t’a kẽ biisã

[Foto, rãmba, seb-neng 31]

“Tõnd zoeta baas wʋsgo, bala ne tõndo b yaa bɛd wa wed-moose”

Tẽngrã: A Laura ne a María la neb nins sẽn zãms Biiblã ne bãmbã