Tall-y tẽeb ne Wẽnnaam no-rɛɛsdbã goama!

“Tõnd tara no-rɛɛsdbã goam b sẽn maan tɩ be bas-m-yam n yɩɩda.”—2 PƖƐƐR 1:19, NW.

1, 2. Pipi bãngr-gomd ning b sẽn gʋlsã yaa bʋgo, la sʋgsg nins a sẽn wa ne wã a yembr la bʋgo?

PIPI bãngr-gomd ning b sẽn gʋlsã Yẽgr ya a Zeova. A Ãdem ne a Hawa yel-wẽndã poore, Wẽnnaam togsa waafã: “Mam na n ninga beem foo ne paga sʋka, la fo yagenga ne yẽ yageng sʋka. Yẽ yageng na n pogla fo zugu, la fo na n pogla yẽ nao-kãsengkãare.” (Sɩngre 3:1-7, 14, 15) Yʋʋm kob-gĩn n da na n loog tɩ b yaool n wʋm bãngr-gom-kãensã võor sõma.

² Pipi bãngr-gom-kãngã kõo ãdem-biisã sẽn yaa yel-wẽn-maandbã saagr hakɩka. Kaoosg zugẽ, Gʋlsg Sõamyã wilgame tɩ ya a Sʋɩtãan Munaafɩɩk la ‘pipi waafã.’ (Wilgri 12:9) La ãnd n da na n yɩ Wẽnnaam Yagengã b sẽn kãabã?

Yagengã bao n bãnge

3. Wãn-wãn la a Abɛll tall tẽeb ne pipi bãngr-gomdã?

³ Sẽn yaa lebend ne a ba wã, wẽn-tũud a Abɛll talla tẽeb ne pipi bãngr-gomdã. Vẽenega, a Abɛll bãngame tɩ ra na n yɩɩ tɩlae tɩ b raag zɩɩm tɩ yel-wẽnã paam ludbu. Woto yĩnga, tẽeb tus-a lame t’a kõ rũng maoong tɩ Wẽnnaam sake. (Sɩngre 4:2-4) La Yagengã b sẽn kãabã sẽn yaa ned ninga kell n yɩɩ bũmb sẽn solge.

4. Wẽnnaam maana a Abrahaam kãab-bʋgo, la bõe la kãab-kãng wilg yagengã b sẽn kãabã wɛɛngẽ?

⁴ Yʋʋm 2000 a Abɛll wakatã poore, a Zeova kõo a Abrahaam sẽn yaa bu-yaleng ba wã kãabg kãngã sẽn yaa bãngr-goamã: “Mam na n ninga f zug bark wʋsgo. La mam na n paasa f yagensã tɩ b yɩ wʋsg wa ãds sẽn be saasẽ . . . La yaa fo yagensa [yagengã, NW ] yĩng la dũniyã buud fãa na n paam barka.” (Sɩngre 22:17, 18) Gom-kãensã rɩka a Abrahaam n tɩ loe ne pipi bãngr-gomdã pidsgu. Rẽ wilgdame tɩ Yageng ning b sẽn na n tũnug ne n sãam a Sʋɩtãan tʋʋma ra na n puka a Abrahaam yagensã sʋka. (1 Zã 3:8) A Abrahaam “yam ka tol n yuus t’a kong tẽeb ne Wẽnnaam kãabga ye.” Yɩɩ woto me ne a Zeova kaset rãmb a taab sẽn deng kiris-nebã wakat sẽn “ka paam kãabg pidsg[ã].” (Rom dãmba 4:20, 21; Hebre dãmba 11:39) Wall tɩ b kong tẽebã, b kell n talla b tẽebã ne Wẽnnaam no-rɛɛsdbã goamã.

5. Wẽnnaam kãabg ning sẽn tɩ loe ne Yagengã pidsa ãnd zugu, la bõe yĩng tɩ y leokd woto?

⁵ Tʋm-tʋmd a Poll wilga Wẽnnaam Yageng ning b sẽn kãabã sẽn ya a soab a sẽn wa n gʋls tɩ: “Kãabg rag n yaa a Abrahaam ne a yagenga yĩnga, Wẽnnaam ka yeel tɩ yagens wa b sẽn gomd neb wʋsg yell ye, la b goma wa nin-yend n yeele: ‘Fo yagenga’ sẽn dat n togse tɩ Kirist.” (Galat dãmba 3:16) Yageng ning b sẽn na n tũnug ne tɩ tẽn-tẽnsã bark b mensã ra pa a Abrahaam yagensa fãa ye. B ra pa tũnug ne a biribl a Ismaɛll yagensã la komdibli nins a sẽn  paam ne a Ketura wã n ning ãdem-biisã bark ye. Barkã Yageng tũu ne a biribl a Izaak la a yageng a Zakoob n wa. (Sɩngre 21:12; 25:23, 31-34; 27:18-29, 37; 28:14) A Zakoob wilgame tɩ “neba” ra na n saka a Silo sẽn yit Zida buudẽ wã, la kaoosg poore b wilgame tɩ Yagengã ra yita a Davɩɩd roogẽ wã bala. (Sɩngre 49:10, NW; 2 Sãmwɛll 7:12-16) Yʋʋm kob-yendẽ Zʋɩf rãmbã ra gũudame tɩ ned a ye wa n yɩ Mesi bɩ Kirista. (Zã 7:41, 42) La Wẽnnaam sẽn togs bãngr-goam Yagengã wɛɛngẽ wã pidsa a Biribl a Zezi Kirist zugu.

Mesi wã pukame!

6. a) Wãn-wãn la d segd n wʋm semen 70 wã bãngr-gomd võore? b) Wakat bʋg la wãn-wãn la a Zezi kɩt tɩ ‘yel-wẽnã sa’?

⁶ No-rɛɛs a Daniɛll gʋlsa bãngr-goam sẽn tar yõod wʋsg sẽn tɩ loe ne Mesi wã. Meed rao a Darius naamã pipi yʋʋmde, a Daniɛll bãngame tɩ Zerizalɛm sẽn sãam n segd n kell n pa raboog yʋʋm 70 yĩngã ra kolga a saabo. (Zeremi 29:10; Daniɛll 9:1-4) A Daniɛll sẽn da pʋʋsd sasa, malɛk a Gabriɛll taame n wilg tɩ ‘b yãka semen pis-yopoe wã sẽn na yɩl n kɩt tɩ yel-wẽnã sa.’ B ra na n kʋʋ Mesi wã semen 70 soabã pʋɩ-sʋkẽ. “Semen pis-yopoe sẽn yaa yʋʋma” sɩnga yʋʋmd 455 S.D.T.W., Pɛrs Rĩm a Artazɛgzɛs pipi soab sẽn wa n ‘kõ noor tɩ b lebs n me Zerizalɛma.’ (Daniɛll 9:20-27; Moffatt; Nehemi 2:1-8) Mesi wã ra na n waa semen a 7 n paas semen 62 poore. Yʋʋm 483 kãensã sɩnga yʋʋmd 455 S.D.T.W. n tɩ ta yʋʋmd 29 T.W., a Zezi sẽn da wa n deeg lisg tɩ Wẽnnaam zae-a t’a yɩ Mesi bɩ Kirista. (Luk 3:21, 22) A Zezi ‘kɩtame tɩ yel-wẽnã sa,’ a sẽn kõ a vɩɩmã tɩ yɩ yao-n-dɛɛk yʋʋmd 33 T.W. yĩngã. (Mark 10:45) Ad woto sɩd yaa bʋʋm sẽn sɩd segd n kɩt tɩ d tall tẽeb ne Wẽnnaam no-rɛɛsdbã goama! *

7. Tũnug-y ne Gʋlsg Sõamyã n wilg a Zezi sẽn pids bãngr-goam nins sẽn tɩ loe ne Mesi wã to-to.

⁷ Tẽeb ne Wẽnnaam no-rɛɛsdbã goam kɩtame tɩ b tõe n bãng Mesi wã n welge. Bãngr-goam wʋsg nins sẽn tɩ loe ne Mesi wã sẽn be Hebre Gʋlsgã pʋgẽ wã sʋka, kiris-neb Gerɛk Gʋlsgã gʋlsdb rɩka bãmb wʋsg n tɩ loe ne a Zezi. D rɩk makre: Pʋg-sad sẽn pa mi rao n dog a Zezi Betleɛɛm. (Ezai 7:14; Miise 5:1; Matɩe 1:18-23; Luk 2:4-11) B bool-a lame t’a yi Ezipt n wa, la kom-peels la b kʋ a rogmã poore. (Zeremi 31:15; Oze 11:1, NW; Matɩe 2:13-18) A Zezi zɩɩ tõnd bãase. (Ezai 53:4; Matɩe 8:16, 17) Wala b sẽn deng n togsã, a kẽe Zerizalɛm n zomb bõn-bila. (Zakari 9:9; Zã 12:12-15) Yɩɩl-gʋlsdã goam pidsa a Zezi kaab ra-lukã zug poore, sodaasã sẽn wa n pʋɩ a futã ne taab la b maan bãnd n dɩk a tẽngr fuugã. (Yɩɩl Sõamyã 22:19; Zã 19:23, 24) A Zezi kõbã sẽn pa kao, la b sẽn kõs-a wã me pidsa bãngr-goama. (Yɩɩl Sõamyã 34:21; Zakari 12:10; Zã 19:33-37) Woto yaa makr a wãn bal ne bãngr-goam nins sẽn tɩ loe ne Mesi wã sẽn pids a Zezi zugu, Biiblã gʋlsdb Wẽnnaam sẽn vẽnegã sẽn gʋlse. *

Kils-y Rĩmã sẽn yaa Mesi wã!

8. Wakatã fãa Kãsem yaa ãnda, la wãn-wãn la bãngr-goam nins sẽn be Daniɛll 7:9-14 pʋgẽ wã pids-yã?

⁸ Babilon Rĩm a Bɛlsazaar naama pipi yʋʋmdẽ, a Zeova kɩtame t’a no-rɛɛs a Daniɛll zãms zãmsd la a kõ-a yãab sẽn yaa kãsemse. Pipi, no-rɛɛsã yãa rũm-bɛd a naase. Wẽnnaam malɛkã wilgame tɩ yaa ‘rĩm dãmb a naase,’ tɩ woto wilgdẽ tɩ b makda dũni gill pãn-soaadbã  sẽn pʋg taabã. (Daniɛll 7:1-8, 17) Rẽ poore, a Daniɛll yãa a Zeova, sẽn yaa “Wakatã fãa Kãsmã,” t’a zĩ naam geer zug ne ziiri. A kaoo rũmsã bʋʋd n ning-b taale, n deeg naamã b nugẽ, n sãam we-rũng a naas-n-soabã. A rɩka naamã b sẽn da rɩt “nin-buiidu, tẽn-tẽns la buud-goam toɛ-toɛya” zutã n kõ “ned sẽn wõnd ninsaal biribla.” (Daniɛll 7:9-14, NW ) Ad bãngr-gom-kãngã sẽn tɩ loe ne “ninsaal Biribl” a Zezi Kirist zĩnigr naam geer zugã yʋʋmd 1914 bee yamleoogo!—Matɩe 16:13, NW.

9, 10. a) Zãmsdã pʋgẽ bõn-naandg babs toɛ-toɛyã gomda bõe yelle? b) Wãn to la y ra na n wilg Daniɛll 2:44 pidsg võore?

⁹ A Daniɛll da miime tɩ Wẽnnaam “lubda rĩm dãmba, la yaa bãmb n kõt naam.” (Daniɛll 2:21) Ne tẽeb ne a Zeova, sẽn yaa “yel-solgds Pukdã,” (NW ) no-rɛɛsã wilga Babilon Rĩm a Nebukadnezaar zãmsdã bõn-naandg kãsengã võore. A babsã toɛ-toɛyã makda dũni gill pãn-soaadb wala Babilon, Meed ne Pɛrs rãmbã, Gerɛs la Rom yikr la b lʋɩɩse. Wẽnnaam leb n tũnuga ne a Daniɛll n wilg dũniyã yel-kãsems sẽn tall n tãag tõnd wakatã la a poore.—Daniɛll 2:24-30.

¹⁰ Bãngr-gomdã yetame: “Rĩm dãmb kãens sẽn dɩt naam wakate, Wẽnnaam sẽn be yĩngra na n kɩtame tɩ soolem sẽn ka tõe n sãam la buud a taab sẽn ka tõe n deeg zĩndi. A na n wãa soolem kãens fãa tɩ b menem n bas-a t’a yaas wakat fãa.” (Daniɛll 2:44) “Tẽn-tẽnsã wakat dãmb b sẽn yãka” sẽn sa yʋʋmd 1914, Wẽnnaam lugla yĩngr Rĩungã n ning Kirist nugẽ. (Luk 21:24, NW; Wilgri 12:1-5) Ne Wẽnnaam pãnga, Mesi Rĩungã “kugr” yii Wẽnnaam ãndũni naam sẽn-ka-to wã “tãng[ẽ].” Armagedõ, kug-kãng na n wẽe bõn-naandgã n bedse. Wala tãng sẽn yaa goosneema sẽn pit “dũniyã zĩiga fãa,” Mesi Rĩungã na n yalsa wakat sẽn-kõn-sa.—Daniɛll 2:35, 45; Wilgri 16:14, 16. *

11. A Zezi tedgrã ra yaa reng-n-lɛmbg ne bõe, la pãn-tusd-bʋg la yãab kãng tall a Pɩɛɛr zugu?

¹¹ Ne Rĩungã naam a yamẽ, a Zezi yeela a karen-biisã: “Yãmb neb kẽer sẽn be ka na n yãa Ninsaal Biiga sẽn wat ne bãmb naam tɩ b nan ka ki ye.” (Matɩe 16:28) Rasem a yoob poore, a Zezi talla a Pɩɛɛre, a Zak la a Zã n kẽng tãn-lug-lug zugu, n tedg bãmb taoore. Sawad-pɩndg n lud tʋm-tʋmdbã tɩ Wẽnnaam togse: “Yõ wã yaa mam Bi-nongre, mam sẽn nong ne m sũur fãa zãnga. Bɩ y kelg-a.” (Matɩe 17:1-9; Mark 9:1-9) Ad sɩd yaa Kirist Rĩungã ziir yãab reng-n-lɛmbga! Pa lingri, a Pɩɛɛr sẽn gom yãab kãngã sẽn pɩnd wʋsgã yell n yeel woto wã ye: “Woto yĩnga, tõnd tara no-rɛɛsdbã goam b sẽn maan tɩ be bas-m-yam n yɩɩda.”—2 Pɩɛɛr 1:16-19, NW. *

12. Bõe yĩng tɩ sẽn yɩɩd fãa, wakat kãngã yaa wakat d sẽn segd n wilg d tẽeb ne Wẽnnaam no-rɛɛsdbã goama?

¹² Yaa wa “no-rɛɛsdbã” goamã pa Hebre Gʋlsgã bãngr-goam sẽn tɩ loe ne Mesi wã bal ye, la tɩ loee ne a Zezi gomd ning sẽn wilgd t’a ra na n “waa ne pãnga la naam kãsengã” me. (Matɩe 24:30) Tedgrã wilgame tɩ no-rɛɛsdbã goam sẽn tɩ loe ne Kirist waoong ne ziir Rĩungã naam pʋgẽ wã yaa sɩda. Ka la bilfu, a pukrã ne ziirã na n waa ne sãang n kõ sẽn pa tar-b tẽebã, la bark n kõ neb nins sẽn tar tẽebã. (2 Tesalonik rãmba 1:6-10) Biiblã bãngr-goam pidsg wilgdame tɩ yaa “yaoolem dayã” la woto. (2 Tɩmote 3:1, NW, 2-5, 16, 17; Matɩe 24:3-14) A sẽn ya a Zeova bʋ-kao wã Pidsd Kãsengã, a Mikaɛll sẽn ya a Zezi Kiristã seglame n na n sãam dũni wẽng kãngã “toog kãseng[ã]” sasa. (Matɩe 24:21; Daniɛll 12:1) Sɩd-sɩda, wakat kãngã yaa wakat d sẽn segd n wilg tɩ d tara tẽeb ne Wẽnnaam no-rɛɛsdbã goama.

Kell-y n tall tẽeb ne Wẽnnaam no-rɛɛsdbã goama

13. Bõe n tõe n sõng tõnd tɩ d kell n tall d nonglmã ne Wẽnnaam la d ket n tar tẽeb sẽn tar pãng ne a gomdã?

¹³ Sɩd-sɩda, d sũur yɩɩ noog d sẽn bãng Wẽnnaam no-rɛɛsdbã goam pidsg pipi wã. La rẽ tɛka, tõnd tẽebã boogame tɩ d nonglmã maag  bɩ? Bɩ d ra tol n yɩ wala kiris-neb nins sẽn da be Efɛɛz sẽn ‘bas bãmb pipi nonglmã’ ye. (Wilgri 2:1-4) Baa tõnd sẽn sõgen a Zeova tɩ kaoos to-to fãa, d tõe n basa pipi nonglem kãngã, sã n pa d ‘rengame n bao Wẽnnaam soolmã ne a tɩrlmã,’ n bĩng laog saasẽ. (Matɩe 6:19-21, 31-33) Biiblã zãmsg neere, kiris-neb tigissẽ wã kẽes-m-meng wakat fãa, la Rĩungã mooneg tʋʋmd ne yẽesem na n sõnga tõnd tɩ d kell n tall d nonglmã ne a Zeova, a Biriblã la ne Gʋlsg Sõamyã. (Yɩɩl Sõamyã 119:105; Mark 13:10; Hebre dãmba 10:24, 25) Rẽ na n kɩtame tɩ d kell n tall tẽeb sẽn tar pãng ne Wẽnnaam goamã.—Yɩɩl Sõamyã 106:12.

14. Wãn-wãn la kiris-neb nins sẽn zaeyã paamd keoob ne tẽeb ning b sẽn tar ne a Zeova no-rɛɛsdbã goama?

¹⁴ Wala Wẽnnaam no-rɛɛsdbã goam sẽn pids pĩnd wẽndẽ wã, woto, d tõe n talla tẽeb ne b sẽn dengd n togsd bũmb ning beoog-daar yĩngã. Wala makre, Kirist belmã Rĩungã ziir pʋgẽ yaa yel-sɩda, la kiris-neb nins sẽn zaeyã sẽn tall kɩs-sɩd hal tɩ ta b kũumã paama kãab-kãngã sẽn yaa bãngr-gomdã pidsgu: “Ned ninga sẽn na n tõoge, mam na kõ yẽ vɩɩm tɩɩga sẽn be Wẽnnaam Paradis [arzãn, NW ] tẽn-sʋka biis t’a rɩ.” (Wilgri 2:7, 10; 1 Tesalonik rãmba 4:14-17) A Zezi kõta nin-kãensã sẽn yaa tõogdbã zu-noog tɩ b ‘rɩ vɩɩm tɩɩgã’ “Wẽnnaam arzãnã” sẽn be saasẽ wã pʋgẽ. Vʋʋgr kãng pʋgẽ la ne a Zezi Kirist maasem, b paamda yĩng sẽn pa kiid la sẽn pa põogde, a Zeova sẽn yaa “wakat fãa Rĩma sẽn pa tõe n sãamã, nif sẽn pa ne, sẽn yaa Wẽnnaam yɛngã” sẽn kõte. (1 Tɩmote 1:17, NW; 1 Korẽnt dãmba 15:50-54; 2 Tɩmote 1:10) Ad sɩd yaa keoor sẽn yaa kãseng n kõ nin-kãensã sẽn nong Wẽnnaam wakat fãa la sẽn tar tẽeb sẽn pa vigsd ne a no-rɛɛsdbã goamã!

15. Ãnd dãmb zug la b yẽbg “tẽn-paalgã,” la ãnd dãmb n yaa b lagem-n-taase?

¹⁵ Sẽn zae-bã sẽn ki kɩs-sɩd pʋgẽ sẽn paam vʋʋgr n kẽng “Wẽnnaam arzãnã” (NW ) sẽn be saasẽ wã poor bilfu, tẽeb Israɛllã kell sẽn be tẽng zugã paama fãagr n yi “Babilon kãsenga,” sẽn yaa dũni gill ziri tũudum soolmã pʋgẽ. (Wilgri 14:8; Galat dãmba 6:16) Yaa bãmb zut la b yẽbg “tẽn-paalgã.” (Wilgri 21:1, NW ) Yaa woto la “tẽng” rog-yã, la b maan-a lame t’a yaa tẽeb arzãn sẽn bui tẽngã gill rũndã-rũndã. (Ezai 66:8) Yaa be la tẽeb Israɛllã tũud-n-taas sẽn wõnd piisã kʋʋng kaoogd n kẽngd masã menga, “rayã baasg sasa.”—Ezai 2:2-4, NW; Zakari 8:23; Zã 10:16; Wilgri 7:9.

 B reng n togsa ãdem-biisã beoog-daar Wẽnnaam no-rɛɛsdbã goamẽ

16. Sẽn zae-bã tɛɛndb sẽn tar kɩs-sɩdã saagr yaa bõe ne bõe?

¹⁶ Sẽn zae-bã tɛɛndb sẽn tar kɩs-sɩdã saagr yaa bõe? Bãmb me tara tẽeb ne Wẽnnaam no-rɛɛsdbã goama, la b saagrã yaa b kẽ tẽng zug Arzãnã pʋgẽ. (Luk 23:39-43, NW ) Beenẽ b na n yũu koom “vɩɩm koom kʋɩlga” sẽn zãad vɩɩmã pʋgẽ, la b paam maagr ne tɩɩs b sẽn sel kʋɩlgã foollã ‘vãado.’ (Wilgri 22:1, 2) Yãmb sã n tar saagr kãseng a woto, bɩ y ket n wilgd nonglem kãseng ne a Zeova la tẽeb ne a no-rɛɛsdbã goama. Bɩ y zĩnd neb nins sẽn paamd vɩɩm sẽn-kõn-sa sũ-noog wʋsg tẽng zug Arzãnã pʋgẽ wã sʋka.

17. Bark bʋs n na n zĩnd tẽng zug Arzãnã pʋgẽ?

¹⁷ Ninsaalb sẽn pa zems zãng pa tõe n bilg vɩɩmã sẽn na n yɩ to-to tẽng zug Arzãnã sẽn watã pʋgẽ zãng ye, la Wẽnnaam no-rɛɛsdbã goam kõta tõnd yam-vẽenem sẽn tɩ loe ne bark nins b sẽn bĩng ãdem-bi-sakdbã yĩnga. Wẽnnaam Rĩungã sã n wa pa segd kɩɩsg t’a raabã maand tẽng zug wa a sẽn maand saasẽ wã, nin-wẽnse, bɩ rũms menga, pa na n maan “wẽng ne sãoong” ye. (Ezai 11:9; Matɩe 6:9, 10) Sũ-bʋgsem dãmbã na n zĩnda tẽngã zugu, la b ‘na n maana sũ-noog laafɩ wʋsg yĩnga.’ (Yɩɩl Sõamyã 37:11) Neb wʋsg kom sẽn kʋʋd pa na n zĩnd ye, bala “ki wʋsg na n zĩnda soolem pʋgẽ. A na n miima tãens zutu, a biisa na n yɩɩ wa Libã dẽnda.” (Yɩɩl Sõamyã 72:16) Sũ-sãang nintãm pa na n ye zĩnd ye. Bãas na n saame, baa kũum mengã pa na n ye zĩnd ye. (Ezai 33:24; Wilgri 21:4) Mams-y n ges logtoɛɛmba, tɩto, logtor yiy bɩ sigls sẽn get kalkõt laafɩ yelle, bɩ kʋʋr sẽn pa na n beẽ ye. Ad yaa saagr sẽn be rasãnd menga!

18. a) B kõo a Daniɛll bas-m-yam ne bõe? b) A Daniɛll “pʋɩɩr” na n yɩɩ bõe?

¹⁸ Ãdem-biisa fãa yaooga na n lebga vɩʋʋgo, kũum sẽn na n vʋʋg n yi n bas-a wã. Nin-tɩrg a Zoob ra tara saagr kãngã. (Zoob 14:14, 15) Yɩɩ woto me ne no-rɛɛs a Daniɛll, bala a Zeova malɛkã kõ-a-la bas-m-yam woto sẽn kõt belsgã: “La bɩ f kẽng n ta f tɛk raar n vʋʋse. La fo na n vʋʋgame n deeg f zĩig [pʋɩɩr, NW ] wakata sɛɛb raare.” (Daniɛll 12:13) A Daniɛll sõgena Wẽnnaam ne kɩs-sɩd hal tɩ ta a yõor tɛka. Masã a kiime n gãe n vʋʋsdẽ, la a na n ‘yika’ “nin-tɩrsa vʋʋgr wakate,” Kirist Yʋʋm tusr Naamã rɩɩb sasa. (Luk 14:14) A Daniɛll “pʋɩɩr” na n yɩɩ bõe? Be neere, a Ezekɩɛll bãngr-goamã pidsg Arzãnã pʋgẽ wilgdame t’a Zeova nin-buiidã fãa na n paama zĩiga, zĩig meng b sẽn yãk n kõ-b tɩ zems tɩ zũnd-zãnd kaẽ ye. (Ezekɩɛll 47:13-48:35) Woto, a Daniɛll na n paama zĩig Arzãnã pʋgẽ, la a pʋɩɩrã na n yɩɩga zĩiga. A zĩigã a Zeova raabã pʋgẽ na n zĩnda sʋka.

19. Bõe la b baood tɩ d maan n vɩɩmd tẽng zug Arzãnẽ wã?

¹⁹ Yaa wãn to yẽ ne yãmb la y pʋɩɩrã? Yãmb sã n tar tẽeb ne Wẽnnaam Gomdã sẽn yaa Biiblã, sɩd-sɩda, y tʋlla vɩɩmã tẽng zug Arzãnã pʋgẽ. Y tõeeme meng n mams y meng beenẽ, n tar bark wʋsgo, n get tẽngã yelle, la y reegd sẽn vʋʋg-bã ne sũ-noogo. Arzãnã pʋd n yaa zĩig ning sẽn tog ne ãdem-biisã. Wẽnnaam naana pipi rao wã ne a pagã tɩ b vɩɩmd zĩig a woto pʋgẽ. (Sɩngre 2:7-9) La a ratame tɩ ninsaan-sakdbã vɩɩmd wakat sẽn-kõn-sa Arzãn pʋgẽ. Yãmb na n tʋmame tɩ zems ne Gʋlsg Sõamyã sẽn na yɩl tɩ y zĩnd neb milyõ rãmbã sẽn na n wa vɩɩmd tẽng zug Arzãnã pʋgẽ wã sʋk bɩ? Y tõe n zĩnda be, y sã n sɩd nong d yĩngr Ba a Zeova la y tar tẽeb sẽn kaoosd ne Wẽnnaam no-rɛɛsdbã goama.

[Tẽngr not rãmbã]

Wãn to la y na n leokẽ?

• Pipi bãngr-gomdã yɩɩ bʋgo, la ãnd n da yaa Yagengã b sẽn kãabã?

• Bãngr-goam a wãn bʋs sẽn tɩ loe ne Mesi wã n pids a Zezi zugu?

• Wãn-wãn la Daniɛll 2:44, 45 na n pidsi?

• Wẽnnaam no-rɛɛsdbã goam wilgdame tɩ ãdem-bi-sakdbã na n paama beoog-daar bʋgo?

[Zãmsgã sogsgã]

[Foto, seb-neng 16]

Yãmb saagd n na n vɩɩmda tẽng zug Arzãnã pʋgẽ bɩ?