Tall-y y ‘fãagr tẽebã’ t’a ket n tar pãnga!

“Bɩ . . . d fõgen fãagr tẽeb tɩ yɩ kut pugla.”—1 TESALONIK RÃMBA 5:8.

1. Wãn-wãn la “fãagr tẽeb” sõngd ne tõog-toogã?

NED sã n tẽed fãagre, tõe n sõng-a lame t’a yals kãn-kãe yel-tood sẽn yaa dem-dem n yɩɩdã pʋsẽ menga. Ned sã n põs koom koglg sẽn bõr n be bũmb sẽn dugd koom zug pʋgẽ, a tõe n tõoga toog tɩ kaoos n yɩɩda, a sã n miẽ tɩ sõngrã kolgame. Woto me, yʋʋm tusa pʋgẽ, “a Zeova fãagrã” saagr teela roap la pagb sẽn tall tẽeb gudgr wakate, la saag-kãng zɩ n baas ne sũ-sãams ye. (Yikri 14:13, NW; Yɩɩl Sõamyã 3:9; Rom dãmba 5:5; 9:33) Tʋm-tʋmd a Poll rɩka “fãagr tẽeb[ã]” n mak ne kiris-nebã tẽeb zab-teed “kut pugla.” (1 Tesalonik rãmba 5:8; Efɛɛz rãmba 6:17) N-yẽe, tõnd sẽn tar bas-yard tɩ Wẽnnaam na n fãaga tõndã sõngda tõnd tɩ d tõe n ket n tagsd sõma. Rẽ sõngda tõnd tɩ d ket n tar d yamã tɩ zems baa ne namsgã, kɩɩsgã, la kʋɩɩbgã.

2. Wãn-wãn la “fãagr tẽeb” yaa bõn-kãseng baleng hakɩkã pʋgẽ?

² “Saagr sẽn tɩ loe ne beoog-daarã ra pa bũmb sẽn be payẽ rãmbã nengẽ” sẽn yaa dũni ning pʋgẽ yʋʋm kob-yendẽ kiris-nebã sẽn da be wã ye, woto la sebr a ye (The International Standard Bible Encyclopedia) yeta. (Efɛɛz rãmba 2:12; 1 Tesalonik rãmba 4:13) La “fãagr tẽeb”  yaa bõn-kãseng sɩd balengã pʋgẽ. Wãn-wãna? Pipi, a Zeova sõgen dãmbã fãagr tɩ loee ne a mengã yʋʋre. Yɩɩl gʋlsd a Azaf pʋʋsa woto: “Wẽnnaam sẽn yaa tõnd fãagda, bɩ y sõng-do y yʋʋra waoogr yĩnga. Bɩ y fãag tõnd[o].” (Yɩɩl Sõamyã 79:9; Ezekɩɛll 20:9) Sẽn paase, bas-yard tallg ne a Zeova sẽn kãab bark ninsã tara yõod wʋsg sẽn na yɩl n tall zems-n-taar sẽn yaa sõma ne-a. A Poll wilga rẽ woto: “Tẽeb sã n kaẽ, ned ka tõe n ta Wẽnnaam yam ye; tɩ bõe, ned ninga sẽn wat Wẽnnaam nengẽ, a tog n tẽeme tɩ bãmb beeme la tɩ bãmb yaa neb nins sẽn baood bãmba roanda.” (Hebre dãmba 11:6) Sẽn paase, a Poll wilgame t’a Zezi waoongã tẽng zugã bʋʋm-kãseng a ye yaa sẽn na n tek-b yam n kos sugrã fãagr yĩnga. A togsame: “Goam ninga sẽn yaa sɩda la sẽn zems tɩ neba fãa reege, a yaa tɩ Kirist Zezi waa dũniyã pʋgẽ n na n fãag yel-wẽna rãmba.” (1 Tɩmote 1:15) La tʋm-tʋmd a Pɩɛɛr yeelame tɩ fãagrã yaa ‘tõnd tẽeba keoor [bɩ a biisi].’ (1 Pɩɛɛr 1:9) Vẽenega, zemsame tɩ d tall saagr ne fãagrã. La fãagr pʋd n yaa bõe menga? La bõe la b baood tɩ tõnd maan n paam-a?

Fãagr yaa bõe?

3. Fãag-bʋg buud la a Zeova pĩnd wẽndẽ sõgen dãmbã paam-yã?

³ Hebre Gʋlsgã pʋgẽ,  “fãagr” nong n dat n yeelame tɩ yiis ned wẽgb bɩ kũ-toaag pʋgẽ. Wala makre, a Davɩɩd sẽn bool a Zeova tɩ “mam pãng zĩiga la m fãagda,” a yeelame: “Bãmb yaa mam Wẽnnaam la m kugri. . . . Bãmb yaa zĩig mam sẽn tõe n dʋ n soonde. Ned sã n dat n maan maam pãnga, yãmb fãagda maam. Zusoaba toga ne pẽgre. Mam sã n bool bãmba, b fãagda maam m bɛɛba nusẽ.” (2 Sãmwɛll 22:2-4) A Davɩɩd ra miime t’a Zeova kelgdame, A sõgen dãmb sẽn tar kɩs-sɩdã sã n kaasd n baood a sõngre.—Yɩɩl Sõamyã 31:23, 24; 145:19.

4. Beoog-daar vɩɩm saag-bʋg la a Zeova sõgen dãmb sẽn deng kiris-nebã wakatã tall-yã?

⁴ A Zeova sõgen dãmb nins sẽn deng kiris-nebã wakatã me talla saagr ne beoog-daar vɩɩm. (Zoob 14:13-15; Ezai 25:8; Daniɛll 12:13) Sɩda, fãagr kãabs wʋsg sẽn be Hebre Gʋlsgã pʋgẽ wã ra yaa bãngr-goam sẽn wilgd fãagr sẽn yaa kãseng n yɩɩda, sẽn tar n debd vɩɩm sẽn-kõn-sa zĩigẽ. (Ezai 49:6, 8; Tʋʋma 13:47; 2 Korẽnt dãmba 6:2) A Zezi wakatã, Zʋɩf rãmb wʋsg talla vɩɩm sẽn-kõn-sa wã saagre, la b zãgsame tɩ b kõn sak a Zezi wala ned ning sẽn na n yɩ sabab tɩ b saagrã paam pidsgã ye. A Zezi yeela a wakatẽ tũudmã taoor dãmb tɩ: “Yãmb baoodame n dat n bãng Gʋlsg Sõamyã, yãmb sẽn tẽed tɩ yãmb paamda vɩɩm sẽn ka sɛt Gʋlsg Sõamyã pʋgẽ wã yĩnga. La yaa Gʋlsg Sõamyã n kɩt mam kaseto.”—Zã 5:39.

5. Fãagr meng-mengã võor yaa bõe?

⁵ Ne a Zezi tũnugri, Wẽnnaam wilga fãagrã võor zãnga. Paam-m-meng ne yel-wẽnã, ne ziri tũudmã yembdo, ne dũni ning sẽn be a Sʋɩtãan nugẽ wã, ne ninsaal zoeese, la kũumã zoees meng bee rẽ sʋka. (Zã 17:16; Rom dãmba 8:2; Kolos rãmba 1:13; Wilgri 18:2, 4) Sẽn na n baase, ne Wẽnnaam sõgen dãmbã, fãagrã Wẽnnaam maasem yĩngã pa na n yɩ fãagr ne wẽgbã la yel-beedã bal ye, la yaa b sẽn na n tõog n paam vɩɩm sẽn-kõn-sa wã me. (Zã 6:40; 17:3) A Zezi zãmsa nebã tɩ “bãg-bilã” fãagr na n yɩɩ b sẽn na n paam vʋʋgr n vɩɩmd saasẽ n naag Kirist n dɩ naam Rĩungã pʋgẽ wã. (Luk 12:32, NW ) Ne ãdem-biisã sẽn ketã, fãagrã na n yɩɩ b sẽn na n lebs n paam vɩɩm sẽn zems zãngã, la zems-n-taar ne Wẽnnaam, a Ãdem ne a Hawa sẽn da tar a soab buud Edɛn zẽedẽ wã tɩ b nan pa maan yel-wẽndã. (Tʋʋma 3:21; Efɛɛz rãmba 1:10, NW ) Wẽnnaam pipi raabã ãdem-biisã yĩng ra yaa b vɩɩmd wakat sẽn kõn sa arzãn a woto pʋgẽ. (Sɩngre 1:28; Mark 10:30) La yaa wãn-wãn la lebs-n-lugl a woto tõe n yɩ?

Fãagrã yẽbgr yaa yao-n-dɛɛkã

6, 7. A Zezi tʋʋmdã yaa bõe tõnd fãagrã wɛɛngẽ?

⁶ Fãagr sẽn ka sɛtã tõe n yɩɩ ne Kirist yao-n-dɛɛk maoongã maasem bala. Bõe yĩnga? Biiblã wilgdame t’a Ãdem sẽn maan yel-wẽndã poore, a “koos[a]” a mengã la a beoog-daar kambã fãa, tɩ tõnd be sʋka, yel-wẽndã pʋgẽ, tɩ rẽ kɩt tɩ yao-n-dɛɛk yaa tɩlae sẽn na yɩl tɩ ãdem-biisã paam saagr sɩd-sɩda. (Rom dãmba 5:14, 15; 7:14) Rũmsã maand b sẽn da maand a Moiiz Tõogã tũub wakatã ra yaa makr sẽn wilgd tɩ Wẽnnaam da na n kõo yao-n-dɛɛk ãdem-biisã fãa yĩnga. (Hebre dãmba 10:1-10; 1 Zã 2:2) A Zezi ra yaa ned ning maoong sẽn pids yel-makdem kãensã sẽn yaa bãngr-goamã. A Zeova malɛkã togsa woto sẽn deng a Zezi rogmã: “Yẽ n na n fãag a neba ne b yel-wẽna.”—Matɩe 1:21; Hebre dãmba 2:10.

⁷ Bipugl sẽn pa mi rao a Maari n dog a Zezi ne yel-solemde, la a Zezi sẽn da yaa Wẽnnaam Biriblã yĩnga, a ra pa rog ne a Ãdem yel-wẽndã ye. Rẽ sẽn naag ne a sẽn vɩɩmd ne kɩs-sɩd sẽn zems zãngã kɩtame t’a vɩɩmã tall yõod ning sẽn zems sẽn na yɩl n yao n fãag ãdem-biisã ne yel-wẽnã la kũumã. (Zã 8:36; 1 Korẽnt dãmba 15:22) Sẽn yaa lebend ne ninsaalb a taabã, a Zezi ra pa paam taal n segd n ki yel-wẽnã yĩng ye. A waa tẽng zug n na n pids bõn-datla sẽn yaa ‘kõ a vɩɩm tɩ yao neb wʋsg yĩnga.’ (Matɩe 20:28) A sẽn maan woto wã, a Zezi sẽn vʋʋg n zao naam geer zug masã wã tõe n kõo neb nins fãa sẽn tũud yɛl nins Wẽnnaam sẽn baoodã fãagre.—Wilgri 12:10.

 Bõe la b baood tɩ d maan sẽn na yɩl n paam fãagre?

8, 9. a) Wãn-wãn la a Zezi leok na-poll sẽn yaa arzɛk soab fãagrã wɛɛngẽ? b) Wãn-wãn la a Zezi tũnug ne rẽ n zãms a karen-biisã?

⁸ Vugri, Israɛll na-poll a yembr sẽn tar arzɛk sʋka a Zezi woto: “Mam na n maana bõe n paam vɩɩm sẽn ka sɛta?” (Mark 10:17) Tõe t’a sʋkrã wilgda tagsg sẽn da wɛ Zʋɩf rãmbã sʋk rẽ wẽnde, tɩ Wẽnnaam baooda tʋʋm sõma kẽere, la tɩ f sã n maan tʋʋm-kãens tɩ seke, f tõe n paama fãagr sẽn yit Wẽnnaam nengẽ. La zugẽ-zugẽ baleng a woto buudã tõe n yɩɩ rat-m-yembr yĩnga. Tʋʋm a woto pa tõog n kõ saagr sɩd-sɩd ye, bala ninsaal sẽn pa zems zãng ba a yembr sɩd ra pa tõe n tũ Wẽnnaam noyã n pa tudg ye.

⁹ A Zezi leoka rao wã sʋkr bal n tẽeg-a t’a segd n saka Wẽnnaam noyã. Na-pollã yɩɩ tao-tao n yeel a Zezi t’a ra tũuda no-kãens hal a yãadem wakate. A leokrã kɩtame t’a Zezi tall nonglem ne-a, n yeel-a woto: “Bũmb a ye n paoog foom. Kẽng n koos bũmb nins fo sẽn tarã n kõ naong rãmba, la fo na paam paoong arzãn pʋga. La wa n tũ maam.” La bi-bɩɩgã looga ne sũ-sãanga, “tɩ bõe, a ra tara paoong wʋsgo.” Rẽ poore, a Zezi wilga a karen-biisã vẽeneg tɩ f sã n loe f meng wʋsg ne dũni kãngã paoongã, a gɩdgda f fãagr paoongo. A paasame tɩ ned ba a ye pa tõe n paam fãagr ne a meng modgr ye. La a Zezi kenga b pɛlg woto: “Neb ka tõe bõn-kãng ye, la ka woto ne Wẽnnaam ye; tɩ bõe, Wẽnnaam tõee bũmb fãa.” (Mark 10:18-27; Luk 18:18-23) Wãn-wãn la ned tõe n paam fãagre?

10. Yel-bʋs la d segd n maan sẽn na yɩl n paam fãagre?

¹⁰ Fãagrã yaa Wẽnnaam kũuni, la a pa paamd nana-nana woto ye. (Rom dãmba 6:23) Yel-kãsems kẽer n be tɩ ned kam fãa segd n maan sẽn na yɩl n zems ne kũun kãng paoongo. A Zezi yeelame: “Wẽnnaam nonga dũniyã hal tɩ b kõ b Biiga sẽn-ka-to, tɩ ned ninga fãa sẽn tẽed bãmb kõn sãam ye, la a na paam vɩɩm sẽn-ka-sɛta.” La tʋm-tʋmd a Zã paasame: “Ned ninga sẽn tẽed Biiga tara vɩɩm sẽn ka sɛta. La ned ninga sẽn ka tẽed Biiga kõn paam vɩɩm ye.” (Zã 3:16, 36) Vẽenega, Wẽnnaam baoodame tɩ ned ning fãa sẽn tʋll n paam fãagr sẽn-kõn-sa wã tall tẽeb la a wilg sakre. Ned kam fãa segd n dɩka sard n sak yao-n-dɛɛkã la a tũ a Zezi nao wã.

11. Wãn-wãn la ned sẽn pa zems zãng tõe n ta a Zeova yam?

¹¹ Tõnd sẽn pa zems zãngã yĩnga, tõnd pa rog ne sakr tʋlsem, d leb n pa tõe me n sak tɩ zems zãng ye. Yaa rẽ yĩng la a Zeova sẽn kõ yao-n-dɛɛk sẽn na yɩl n lud tõnd yel-wẽnã. Baasg zãnga, wakat fãa d segd n modgame n vɩɩmd tɩ zems ne Wẽnnaam soyã. Wa a Zezi sẽn togs na-pollã sẽn yaa arzɛk soabã, d segd n tũu Wẽnnaam noyã. D sã n maan woto d tata Wẽnnaam yam yembo, la d paamda sũ-no-kãseng me, bala “bãmb tõog ka toog ye.” B yaa ‘maagre.’ (1 Zã 5:3; Yelbũna 3:1, 8, NW ) La ne rẽ fãa, pa nana tɩ d tall fãagrã saagr kãn-kãe ye.

‘Mao-y ne y pãng tɛk tẽeba yĩnga’

12. Wãn-wãn la fãagrã saagr kõt kiris-ned pãng t’a yals kãn-kãe yoob kʋɩɩbg taoore?

¹² Karen-biig a Ziid ra rat n gʋlsa pipi kiris-nebã n gom “fãagr ninga [bãmb] fãa sẽn tara yelle.” La vɩɩm manesem wẽng ning sẽn da wɛ wakat kãnga wã tus-a lame t’a sagl a saam-biisã tɩ b ‘mao ne b pãng tɛk tẽeba yĩnga.’ N-yẽe, sẽn na yɩl n paam fãagre, tall tẽebo, gãd kiris-neb tẽeb hakɩkã, la f sake, yɛla fãa sã n wa yaa nana-nana sasa bal pa sek ye. Tõnd sakrã ne a Zeova wã segd n talla pãng n sek a na sõng tõnd tɩ d yals kãn-kãe makr la yoob kʋɩɩbg taoore. La yoob ne raglem tʋʋma, zu-sobendã kɩɩsgo, welsgã ne sãmb-sãmbã ra sãamda yʋʋm kob-yendẽ tigingã tẽebo. Sẽn na yɩl n sõng-b tɩ b mao ne manesem kãensã, a Ziid sagla a kiris-nin-taasã tɩ b tall b bõn-datl kãngã b yamẽ vẽenega: “Mam zo-nongdse, bɩ y nang pãng ne tẽeb sõama ninga yãmb sẽn tarã n pʋʋs ne Sɩɩg Sõng pãnga. Bɩ y tall yãmb mens Wẽnnaam nonglem pʋgẽ, yãmb sẽn gũud tõnd Zusoab a Zezi Kirist ninbãan-zoeerã sẽn na n yɩ vɩɩm sẽn ka sɛtã.”  (Ziid 3, 4, 8, 19-21) Fãagrã paoong saagr da tõe n kõ-b-la pãng tɩ b mao n pa yɩlem vɩɩm manesmã wɛɛngẽ.

13. Wãn-wãn la d tõe n wilg tɩ d pa kong Wẽnnaam sõmblmã d sẽn pa segd ne wã bõn-datla?

¹³ Wẽnnaam a Zeova gũudame tɩ neb nins a sẽn na n kõ fãagrã tall vɩɩm manesem sẽn yaa sõma. (1 Korẽnt dãmba 6:9, 10) Vɩɩm manesmã noy Wẽnnaam sẽn gãnegã sakr pa rat n yeel tɩ d bʋ neb a taabã bʋʋd ye. Pa tõnd n dɩkd sard n wilg d ninsaan-taasã sã n na n paama vɩɩm sẽn-kõn-sa ye. Sẽn yaa lebende, yaa Wẽnnaam n na n maan woto, wala a Poll sẽn yeel Gerɛk rãmbã Atɛnã: “Wẽnnaam yãka raare tɩ rao ninga bãmb sẽn yãka na n kao dũniyã bʋʋd tɩrga.” Rao kãng yaa a Zezi Kirista. (Tʋʋma 17:31; Zã 5:22) Tõnd sã n vɩɩ ne tẽeb ne a Zezi yao-n-dɛɛkã d pa yɛɛsd bʋʋd daar sẽn wat ye. (Hebre dãmba 10:38, 39) Sẽn be yõod n yɩɩdã yaa tɩ d pa segd abada n “sak Wẽnnaamã sõmblem d sẽn ka segd ne wã [tõnd zems-n-taarã ne yẽ yao-n-dɛɛkã maasem yĩng] n wa kong a bõn-datlã,” n bas d mens n wa tall tags-wẽng bɩ manesem wẽng ye. (2 Korẽnt dãmba 6:1, NW ) Sẽn paase, d sã n sõngd neb a taabã tɩ b paam fãagre, d wilgdame tɩ d pa kong Wẽnnaam ninbãan-zoeerã bõn-datl ye. Wãn-wãn la d tõe n sõng-ba?

D wilg d taabã fãagrã saagre

14, 15. Ãnd dãmb la a Zezi bobl fãagrã koe-noog moonego?

¹⁴ A Poll lebs n dɩka no-rɛɛs a Zoɛll goamã n gʋls woto: “Ned ninga fãa sẽn kot ne Zusoaba [a Zeova, NW ] yʋʋre, a na n paama fãagre.” Rẽ poore, a paasame: “Dẽ, b na n yɩɩ wãn n pʋʋs ne b sẽn nan ka tẽ a soaba yʋʋre? La b na n yɩɩ wãn n tẽ b sẽn nan ka wʋm a soab kɩbare? La b na n yɩɩ wãn n wʋm tɩ ned ka togs koɛɛga?” Verse a wãn poore, a Poll wilgame tɩ tẽeb pa wat tao-tao woto bal ye. Sẽn yaa lebende, “kelgr wata ne tẽebo,” tɩ kelgr kãng tɩ loe ne “Kirist koɛɛga.”—Rom dãmba 10:13, 14, 17; Zoɛll 2:32, NW.

¹⁵ Ãnd n na n taas “Kirist koɛɛga” tẽn-tẽnsã? A Zezi kõo a karen-biisã, sẽn yaa neb nins b sẽn zoe n zãms ‘koe-kãngã’ tʋʋm-kãngã. (Matɩe 24:14; 28:19, 20; Zã 17:20) D sã n kẽes d mens Rĩungã mooneg la karen-biis maaneg tʋʋmdã pʋgẽ, d maanda wa tʋm-tʋmd a Poll sẽn gʋls wakat kãngã wɛɛngẽ n lebs n dɩk a Ezai goamã woto wã: “Neb nins sẽn moond laafɩ koɛɛga ne neb nins sẽn moond koe-nooga nao tara dasãnde.” Baa neb wʋsg sã n pa sak koe-noogã d sẽn taasdã, d nao wã ket n tara ‘dasãnd’ a Zeova taoore.—Rom dãmba 10:15; Ezai 52:7.

16, 17. Bõn-datɩ a yiib bʋs la tõnd moonegã pidsda?

¹⁶ Tʋʋm kãngã maaneg pidsda bõn-datɩ a yiib sẽn tar yõodo. Pipi, b segd n moona koe-noogã, sẽn na yɩl tɩ Wẽnnaam yʋʋrã paam pẽgre, tɩ neb nins sẽn dat fãagrã bãng b sẽn na n teesẽ. A Poll bãnga a tʋʋmdã nen-kãngã võore. A yeelame: “Tɩ bõe, Zusoaba [a Zeova, NW ] yeela tõnd yaa: Mam yãka foom tɩ f yɩ bu-zẽms vẽenem n wa ne fãagre dũniyã tɛk fãa.” Woto yĩnga, d sẽn yaa Kirista karen-biisã, tõnd ned kam fãa segd n kẽesa a meng n tall fãagr koɛɛgã n tɩ togs nebã.—Tʋʋma 13:47; Ezai 49:6.

¹⁷ Yiib-n-soaba, koe-noogã mooneg tilgda yẽbgr Wẽnnaam bʋ-kaoorã sẽn yaa tɩrgã yĩnga. A Zezi yeela woto bʋ-kãng wɛɛngẽ: “Ninsaal Biigã sã n wa ne naam la ne b malɛk rãmba fãa, b na n zaoonda b naam geer zugu. Buuda fãa na n tigma b taoore. Bãmb na n welga bãmb ne  taaba wa pe-kɩɩm sẽn welgd a piis ne a bʋʋse.” Baa bʋʋdã la welgrã sẽn na n maan “ninsaal Biiga sã n wa ne naam[ã],” moonegã tʋʋmd kõta nebã sor rũndã-rũndã tɩ b bãng Kirist tẽeb saam-biisã, tɩ ne woto bɩ b tʋm n teel-ba, b mens fãagr sẽn-kõn-sa yĩnga.—Matɩe 25:31-46.

Tall-y “bas-m-yam zãng-zãng ne saagrã”

18. Wãn-wãn la d tõe n tall d “fãagr tẽeb[ã]” t’a ket n tar pãnga?

¹⁸ Tõnd sẽn kẽesd d mens sõma-sõma moonegã tʋʋmd pʋgẽ wã me yaa bũmb sẽn sõngd tõnd tɩ d tall d saagrã t’a ket n tar pãnga. A Poll gʋlsame: “Tõnd tʋllame tɩ yãmb ned kam fãa wilg yẽesem a woto, sẽn na yɩl tɩ y tall bas-m-yam zãng-zãng ne saagrã hal tɩ saabã ta.” (Hebre dãmba 6:11, NW ) Rẽ, bɩ tõnd ned kam fãa fõgen “fãagr tẽeb tɩ yɩ kut pugla,” tɩ ne woto bɩ d tẽeg tɩ “Wẽnnaam ka bool tõnd tɩ d paam sũ-dokr ye, la yaa tɩ d paam fãagre tõnd Zusoab a Zezi Kirist maasem yĩnga.” (1 Tesalonik rãmba 5:8, 9) Bɩ d tũ a Pɩɛɛr sagl-kãngã ne d sũy fãa: “Yõk-y y yam tʋʋmdã yĩnga, tall-y y yamã zãng-zãnga; rɩk-y y saagrã n dogl sõmblem d sẽn pa segd ne wã zug b sẽn na n tall n wa kõ-y a Zezi Kirist pukrã wakatã.” (1 Pɩɛɛr 1:13, NW ) Neb nins fãa sẽn maand woto wã na n yãame tɩ b “fãagr tẽeb[ã]” pidsa zãnga!

19. Bõe la d na n ges sõsg ning sẽn pʋgdã pʋgẽ?

¹⁹ Nananda, tõnd tagsg ne wakat ning sẽn ket dũni kãngã yĩngã segd n yɩɩ bõe? Wãn-wãn la d tõe n dɩk wakat kãngã n paam n fãag d mens la neb a taabã? D na n vaeesa sʋgs-kãensã sõsg ning sẽn pʋgdã pʋgẽ.

Y tõe n wilga a võor bɩ?

• Bõe yĩng tɩ d segd n tall d “fãagr tẽeb[ã]” t’a ket n tar pãnga?

• Bõe n be fãagrã pʋgẽ?

• Bõe la d segd n maan n paam fãagrã?

• Bõe la tõnd moonegã tʋʋmd pidsd sẽn tɩ loe ne Wẽnnaam daabã?

[Zãmsgã sogsgã]

[Foto rãmba, seb-neng 20]

Fãagrã pa sãoong põsb bal ye