Karemdbã sʋgsgo

Rom dãmba 12:19 pʋgẽ, tʋm-tʋmd a Poll sẽn yeel tɩ: “Da tug-y beem ye. Bas-y taale,” a ra rat n yeelame tɩ kiris-nebã pa segd n yik b sũy bɩ?

Vẽenega yaa ayo. Ka wã tʋm-tʋmd a Poll ra gomda Wẽnnaam sũ-yikrã yelle. Sɩda, pa rat n yeel tɩ kiris-nebã yik b sũy tɩ b pa yik b sũy me yell kae ye. Biiblã sagenda tõnd vẽeneg n wilgdẽ tɩ d lak d mens ne sũ-yikri. D ges Wẽnnaam sagls a wãna.

“Sik f sũur n bas sũ-yikri. Da kãbg f sũur ye, yõ wã wata ne wẽng maaneg bala.” (Yɩɩl Sõamyã 37:8) “La mam yeta yãmba tɩ ned sũur sã n yik [sã n ket n be sũ-yikr pʋgẽ, NW ] ne a ba-biiga, a zemsame tɩ bʋ-kaoodba kao a buudo.” (Matɩe 5:22) “La yĩnga ratem biis yaa vẽenese. Bãmb yaa yoobo la nin-yoolem la raglem la bõn-naands pʋʋsgo la bagre la beem la mo-beedo la sũ-kiiri, [la sũ-yikri, NW ] la kisgri la no-koɛɛma la welgre la tẽeb toɛ-toɛya.” (Galat dãmba 5:19, 20) “Bɩ y bas sũ-toog ne kisgri la sũ-yikri la no-koɛɛma la kãnegre.” (Efɛɛz rãmba 4:31) “Bɩ ned kam fãa wɩng ne kelgre la a maag ne goama la a maag ne sũ-yikri.” (Zak 1:19) Sẽn paase, Yelbũna sebr sagl n yɩlmame tɩ d gũus ne sũ-yikri, la d ra nong n yik d sũur beeg-kɩds la ninsaal tudgr yĩng ye.—Yelbũna 12:16; 14:17, 29; 15:1; 16:32; 17:14, NW; 19:11, 19, NW; 22:24; 25:28; 29:22.

Rom dãmba 12:19 sẽn be zĩig ningã zemsa ne sagl-kãngã. A Poll saglame tɩ tõnd nonglmã ra tall zãmbo, tɩ d ning sẽn namsd-b tõndã barka, tɩ d tags neb a taabã yell neere, tɩ d ra lebs wẽng ne wẽnga, la tɩ d modg n tall laafɩ ne nebã fãa. Rẽ poore a saglame: “Da tug-y beem ye. Bas-y taale; tɩ bõe, a gʋlsame; ‘Zusoaba [a Zeova, NW ] yetame yaa: Sũ-dokr yaa maam n so, la mam na keo.’ ”—Rom dãmba 12:9, 14, 16-19.

Sɩda, d pa segd n bas tɩ sũ-yikrã tus-d tɩ d maan sũ-dokr tʋʋm ye. Tõnd sẽn mi yɛlã to-to la d sẽn tagsd to-to tɩrlmã zugã pa zems zãng ye. D sã n bas tɩ sũ-yikrã tus-d tɩ d maan sũ-dokr tʋʋmã, naoor wʋsgo, d na n maana wẽnga. Rẽ na n pidsa Wẽnnaam Bɛ a Sʋɩtãan raabo. A Poll gʋlsa woto zĩig a to: “Yãmb sũyã sã n yiki, bɩ y ra maan yel-wẽna ye, la y ra sak tɩ wĩndg lʋɩ tɩ yãmb sũyã ket n ka sig ye. La bɩ y ra kõ Sʋɩtãana weer ye.”—Efɛɛz rãmba 4:26, 27.

Manesem sẽn são sẽn yaa yam tʋʋmd yaa d sẽn na n bas Wẽnnaam t’a yãk a sũ-dokrã sẽn na n yɩ wakat ninga, la a sẽn na n wa a soab zugu. Yẽ sẽn mi yɛlã sõma-sõma wã a tõe n maana woto, la a sã n wa rol ned fãa, na n puka a tɩrlmã sẽn zems zãngã. D neeme tɩ yaa woto la a Poll sẽn da rat n wilg Rom dãmba 12:19 pʋgẽ, a sẽn waa n lebs n dɩk Tõodo 32:35, 41 goamã sẽn yet woto wã me: “Sũ-dokr la beem tugb yaa maam n so.” (Mak-y ne Hebre dãmba 10:30.) Woto, baa gomd ning sẽn yaa “Wẽnnaam” sẽn pa be Gerɛk lebgrã pʋgẽ wã, rũndã-rũndã Biibl lɛbgdb wʋsg ning-a-la Rom dãmba 12:19 pʋgẽ. Rẽ kɩtdame tɩ d karemd goam wala, “bas-y tɩ Wẽnnaam dok sũuri” (The Contemporary English Version); “bas-y sũ-yikrã ne Wẽnnaam” (American Standard Version); “bas-y Wẽnnaam t’a sɩbge, a sã n data” (The New Testament in Modern English); “bas-y tɩ Wẽnnaam na role.”—The New English Bible.

Baa sɩdã bɛɛb sã n maand tõnd pãng bɩ b namsd tõndo, d tõe n wilga d bas-yard ne bilgr ning b sẽn maan Wẽnnaam a Zeova zug t’a Moiiz wʋma: “Mam yʋʋr yaa Zusoaba [a Zeova, NW ], yaa Zusoab sẽn yaa Wẽnnaam sẽn yaa ninbãan-zoeta la bark kõata. Mam sũur ka yikd tao-tao ye, la mam nonglem yaa wʋsgo. La mam yaa sɩd soaba, sẽn maand nonglem hal tɩ ta zãmaan tusri n kõt neb sugr b yel-wẽna ne b kɩɩsga la b kongra fãa yĩnga. La baasgo, mam ka na n bas yãmb taal y yel-wẽna yĩng ye.” (Yaa tõnd n ning italikã.)—Yikri 34:6, 7.