Moon-y koe-noogã ne yẽesem
Moon-y koe-noogã ne yẽesem
“Kae-y ne vʋʋsmã. Tʋm-y wa yembs a Zeova yĩnga.”—ROM DÃMBA 12:11, NW.
1, 2. Manesem bʋg la kiris-nebã sẽn yaa koe-noogã moondbã maood n na n kell n talle?
BI-BƖƖG sẽn nan sɩngd tʋʋm tara sũ-noog wʋsgo. Pipi tʋʋmdã daare, a gũuda a tʋʋmdã taoor soab noy ne yẽesem. A gũuda pipi tʋʋmd ning a sẽn na n tʋma, n pa reemd ne-a ye. A tʋlla ne a sũur fãa n maan a sẽn tõe tɛka.
2 Woto me, tõnd sẽn yaa kiris-nebã, d tõe n gesa d mens wa tʋm-tʋmdb sẽn sɩngd tʋʋm paalem. Tõnd sẽn saagd n na n vɩɩmd wakat sẽn pa satã yĩnga, b tõe n yeelame tɩ yaa d sẽn nan sɩng bal n tʋmd a Zeova tʋʋmde. Sɩd-sɩda, tõnd Naandã tara tʋʋm wʋsg a yamẽ wã tõnd yĩnga, sẽn na n kɩt tɩ d tall tʋʋm wakat sẽn pa sat yĩnga. La pipi tʋʋmd ning tõnd sẽn paama ra ya a Rĩungã koe-noog moonego. (1 Tesalonik rãmba 2:4) Wãn-wãn la d tagsd ne tʋʋm-kãngã sẽn yit Wẽnnaam nengẽ wã? Wala bi-bɩɩgã, d rat n tʋm-a-la wa d sẽn tõe tɛka, ne yẽesem la ne sũ-noogo, n-yẽe, ne yamleoogo!
3. Tõnd sẽn yaa koe-noogã ministrã, bõe la b baood tɩ d maan sẽn na yɩl n tõoge?
3 Sɩda, manesem sõng a woto tallg tõe n yɩɩ toogo. Tõnd ministɛɛrã toor sẽn ka be, d tara zɩɩb wʋsg a taaba, tɩ kẽer tõe n baoodẽ tɩ d modg wʋsg yĩngã bɩ yĩn-sidgã wɛɛngẽ. Naoor wʋsgo, d tõogdame n ges yel-kãensã yelle, la d get ministɛɛrã yell wa sẽn zems me. La tõe n ket n yaa modgr sẽn kẽngd taoore. (Mark 8:34) A Zezi wilga vẽeneg tɩ tõnd sẽn yaa kiris-nebã, rɩlla d mao sõma-sõma n yaool n tõoge.—Luk 13:24.
4. Wãn-wãn la daar fãa yɩɩrã tõe n tall pãn-tusdg tõnd sẽn get tẽebã yɛl to-to wã zugu?
4 D sẽn tar yɛl wʋsg woto n na n maana, yaa nana tɩ d tags tɩ yɛlã loog-d lame bɩ d sũurã sãam wakat-wakate. “Vɩɩm kãnga yɛla” tõe n sãama tõnd yẽesmã la d nanebã ne teokaratik tʋʋmã. (Luk 21:34, 35; Mark 4:18, 19) Tõnd sẽn yaa ninsaalb sẽn pa zems zãngã yĩnga, d tõe n basa ‘tõnd pipi nonglem.’ (Wilgri 2:1-4) A Zeova tʋʋmdã tõnd sẽn tʋmdã nens kẽer tõe n wa lebga bũmb d sẽn maand ne rok-m-zugẽ. Wãn-wãn la Biiblã kõt raood kengr ning sẽn segdã sẽn na yɩl tɩ d kell n tall yẽesem sẽn tar pãng ministɛɛrã pʋgẽ?
Wa “bugum” d sũyã pʋsẽ
5, 6. Wãn-wãn la tʋm-tʋmd a Poll ra get a moonegã zu-noogo?
5 Ministɛɛr ning a Zeova sẽn bobl tõndã tara yõod wʋsg ne d na ges-a wa bõn-zaalga. Tʋm-tʋmd a Poll ra getame tɩ koe-noogã mooneg yaa zu-noog sẽn yaa kãsenga, la a ra geta a mengã wa ned sẽn pa zems tɩ b bobl-a koe-kãngã ye. A yeelame: “Mam sẽn yaa Wẽnnaam neba fãa yao-zʋʋgã Wẽnnaam kõo maam bark kãng tɩ m moon bu-zẽms sʋka koɛɛg ninga sẽn togsd Kirist arzegs sẽn ka tɛkã, la m vẽneg neba ne sãmbg ninga sẽn da solg Wẽnnaam sẽn yaa bũmb fãa naanda nengẽ wakat sẽn loogã.”—Efɛɛz rãmba 3:8, 9.
6 A Poll sẽn tall manesem sõng a ministɛɛrã wɛɛngẽ wã yaa mak-sõng n kõ tõndo. A lɛtr ning a sẽn taas Rom dãmbã pʋgẽ, a yeelame: “Woto yĩnga, mam data ne m sũur fãa n moon Koe-noog[o].” A ra pa zoet yãnd ne koe-noogã ye. (Rom dãmba 1:15, 16) A ra tara manesem ning sẽn zemsã, la a ra tʋlla sõma-sõma n tʋm a ministɛɛrã tʋʋmde.
7. A lɛtr ning a sẽn taas Rom dãmbã pʋgẽ, a Poll keoogame tɩ b gũus ne bõe?
7 Tʋm-tʋmd a Poll sak n deegame t’a segdame n kell n tall yẽesem, rẽ n so t’a sagl kiris-nebã sẽn be Romã woto: “Da maan-y kʋɩɩng ne y tʋʋmdã ye. Kae-y ne vʋʋsmã. Tʋm-y wa yembs a Zeova yĩnga.” (Rom dãmba 12:11, NW ) Gerɛk gom-biig ning b sẽn lebg tɩ ‘maand kʋɩɩngã’ rat n yeelame tɩ yɩ “laas-laas soaba, kʋɩɩma.” Baa ne d sẽn sɩd tõe n pa maan kʋɩɩng d ministɛɛrã pʋgẽ wã, tõnd fãa segd n gũusame n bãng tẽeb kʋɩɩng bãn sẽn sɩngd pukri, la d maan remsg nins sẽn segd d manesmã pʋgẽ wã, tõnd mensã sã n yã bãn kãens d nengẽ.—Yelbũna 22:3.
8. a) Bõe n lebg wa “bugum” a Zeremi sũurẽ wã, la bõe yĩnga? b) A Zeremi sẽn vɩɩmd bũmb ningã tõe n zãmsa tõnd bõe?
8 Wẽnnaam vʋʋsem sõngã tõe n sõnga tõnd me, d sã n wa koms raoodo. Wala makre, vugri, no-rɛɛs a Zeremi raood ra komsame, t’a ra rat n bas a tʋʋmdã. A tol n yeela a Zeova wɛɛngẽ woto: ‘M ka na n le togs Zusoaba yelle walla m gom bãmb yʋʋr yell ye.’ Woto ra wilgda vẽeneg tɩ tẽeb pãn-komslem kãseng la a Zeremi tar bɩ? Ayo. Sɩda, a Zeremi tẽebã sẽn tar pãngã, a nonglmã ne a Zeova, la a yẽesmã ne sɩdã kõ-a-la pãng t’a kẽng taoor ne bãngr-goamã togsgo. A wilgame: “A [Zeova gomdã] lebgda wa bugum m sũura pʋgẽ, a bee m kõab pʋsẽ. M maoodame n dat n sĩndi, la m ka tõe ye.” (Zeremi 20:9) Pa lingr tɩ wakat-wakat bɩ Wẽnnaam sõgen dãmbã sẽn tar kɩs-sɩdã koms raood ye. La b sã n pʋʋs a Zeova n kos sõngre, a na n karma b sũyã n kõ-b a vʋʋsem sõngã ne yamleoogo, b sã n tar a gomdã b sũyẽ wã wa a Zeremi.—Luk 11:9-13; Tʋʋma 15:8.
“Bɩ y ra kiis vʋʋsem sõngã bugum ye”
9. Bõe n tõe n gɩdg vʋʋsem sõngã t’a pa tʋm tõnd nafr yĩngã?
9 Tʋm-tʋmd a Poll sagla Tesalonik rãmbã tɩ: “Bɩ y ra kiis vʋʋsem sõngã bugum ye.” (1 Tesalonik rãmba 5:19, NW ) N-yẽe, tʋʋm la yel-manesem nins sẽn kɩɩsd Wẽnnaam noyã tõe n gɩdga vʋʋsem sõngã sẽn tʋmd tõnd nafr yĩngã. (Efɛɛz rãmba 4:30) Rũndã-rũndã, kiris-nebã tara tʋʋmd sẽn yaa moon koe-noogã. D geta zu-no-kãngã ne waoogr kãsenga. Pa lingr ne tõndo, neb nins sẽn pa mi Wẽnnaamã sẽn paoogd tõnd moonegã tʋʋmdã ye. La kiris-nebã sã n yãk n na n maan yam-kaalg ne a ministɛɛrã, tõe n wa kɩtame t’a kiis Wẽnnaam vʋʋsem sõngã sẽn kõt pãn-tusdgã bugum.
10. a) Wãn-wãn la tõnd taabã sẽn tagsd to-to wã tõe n tall pãn-tusdg tõnd zugu? b) Tags-bʋg sẽn zems sõma tõnd ministɛɛrã wɛɛngẽ la b wilg 2 Korẽnt dãmba 2:17, (NW ) pʋgẽ?
10 Neb kẽer sẽn pa be kiris-neb tigingã pʋgẽ wã tõe n gesa tõnd ministɛɛrã wa sɛb pʋɩɩb bala. A taab tõe n tudgame n kʋmb n yeel tɩ d rebda zak-zak sẽn na yɩl n deeg kũun bala. Tõnd sã n bas tɩ tagsa a woto tall pãng tõnd manesmã zugu, rẽ tõe n booga tõnd tʋʋmdã sõmblem ministɛɛrã pʋgẽ. D pa na n bas tɩ tags-kãngã buud tuk-d ye, la d na n kell n talla tagsg ning a Zeova la a Zezi sẽn tar tõnd ministɛɛrã wɛɛngẽ wã. Tʋm-tʋmd a Poll wilga tags-kãngã sẽn zems sõma wã, a sẽn togs tɩ: “Tõnd ka Wẽnnaam gomdã toandb wala neb wʋsg sẽn maandã ye, la yaa ne pʋ-peelem, n-ye, wala neb Wẽnnaam sẽn tʋme, Wẽnnaam gesg pʋgẽ, ne Kiristã, la tõnd gomda.”—2 Korẽnt dãmba 2:17, NW.
11. Bõe n kɩt tɩ pipi kiris-nebã kell n tall yẽesem baa b sẽn da namsd b tẽebã yĩngã, la wãn-wãn la b makrã segd n tall pãng tõnd zutu?
11 A Zezi kũumã poor bilfu, a karen-biisã sẽn be Zerizalɛmã kẽe namsg sasa pʋgẽ, b tẽebã yĩnga. B ra baood n na n yɛɛs-b lame, la b kõ-b noor tɩ b bas moonegã. Baasg zãnga, Biiblã yetame tɩ b ra ‘pida ne Sɩɩg Sõngo [vʋʋsem sõngo, NW ] n togsd Wẽnnaam koɛɛga ne raoodo.’ (Tʋʋma 4:17, 21, 31) Goam nins a Poll sẽn taas a Tɩmote yʋʋm a wãn poorã wilgda yam sõng ning kiris-nebã sẽn segd n kell n tallã. A Poll yeelame: “Wẽnnaam ka kõ tõnd dabeem sɩɩg ye, yaa sɩɩg sẽn wat ne pãnga la nonglem la yam. Dẽ yĩnga, ra zoe yãnd tõnd Zusoaba kaset yĩnga la mam sẽn yaa bi-bɛɛg bãmb yĩnga me yĩng ye. La ne Wẽnnaam pãnga bɩ f lagem maam n nams Koe-nooga yĩnga.”—2 Tɩmote 1:7, 8.
Bõe samd la d tar ne d taabã?
12. Bʋʋm kãseng ning sẽn kɩt tɩ tõnd moond koe-noogã yaa bõe?
12 Sẽn na yɩl n tall manesem sẽn zems ne d ministɛɛrã, d segd n talla yam tusdg sẽn zemse. Bõe yĩng tɩ d moondẽ? D nee bʋʋm-kãsengã yɩɩl-gʋlsdã goam pʋgẽ: “Yãmb neba sẽn nong yãmba na n waooga yãmba [a Zeova]. Bãmb na n togsa yãmb naama ziiri la b wilg yãmb pãngã, la b wilg neba yãmb pãnga la y naama ziiri.” (Yɩɩl Sõamyã 145:10-12) N-yẽe, d moondame sẽn na yɩl n pẽg a Zeova zãma sʋk la d sõms a yʋʋrã ãdem-biisã fãa taoore. Baa sã n yaa neb bilf n kelgd tõndo, d sẽn moond fãagrã koɛɛg ne kɩs-sɩdã wata ne pẽgr a Zeova zugu.
13. Bõe n tusd tõnd tɩ d togs neb a taabã fãagrã saagre?
13 D sẽn moonda me yaa d sẽn tar nonglem ne nebã yĩnga, la sẽn na yɩl n da paam zɩɩm samd ye. (Ezekɩɛll 33:8; Mark 6:34) A Poll goma rẽ yelle, a sẽn da wa n gomd neb nins sẽn pa be kiris-neb tigingã pʋgẽ yell woto wã: “Mam tara Gerɛk rãmba ne weoog neb samde, yam dãmba la sẽn ka yam dãmb samde.” (Rom dãmba 1:14) A Poll ra getame t’a ra tara neba samd n segd n togs-b koe-noogã, bala yaa Wẽnnaam daab tɩ “neb buud fãa paam fãagre.” (1 Tɩmote 2:4, NW ) Rũndã-rũndã, tõnd tara nonglem la zɩɩb a woto ne d taabã. A Zeova sẽn nong ãdem-biisã tus-a lame t’a tʋm a Biriblã tẽng zug t’a wa ki b yĩnga. (Zã 3:16) Woto yɩɩ maoong sẽn yaa kãsenga. Tõnd rɩkda togs-n-taar ne a Zeova nonglmã, d sã n dɩkd sẽk la d modgd n togsd neb a taabã fãagrã koe-noog sẽn yẽbg a Zezi maoongã zugã.
14. Wãn-wãn la Biiblã bilgd dũniyã sẽn gũbg kiris-neb tigingã?
14 A Zeova Kaset rãmbã geta b taabã wa neb sẽn tõe n wa zĩnd kiris-neb saam-biirã pʋgẽ. D segd n moona ne raoodo, la tõnd raoodã pa zabr ye. Sɩda, naoor wʋsgo, Biiblã tũnugda ne goam sẽn tar pãnga, a sã n gomd dũniyã yelle. Gom-biig ning sẽn yaa “dũni” wã mengã a Poll tũnuga ne-a n wilg bũmb sẽn pa sõma, a sẽn gomd “dũni kãngã yam” la “dũniyã ratem” yellã. (1 Korẽnt dãmba 3:19; Tɩt 2:12) A Poll leb n tẽega Efɛɛz kiris-nebã tɩ b sẽn da wa n kẽnd “tɩ zems ne dũni kãngã yɛl siglgã,” b ra ‘kii’ tẽebã wɛɛngẽ. (Efɛɛz rãmba 2:1-3, NW ) Gom-kãensã la a taab sẽn wõnd woto zemsa ne tʋm-tʋmd a Zã gom-kãensã: “Dũniyã fãa bee wẽng soaba nugẽ.”—1 Zã 5:19.
15. Neb nins sẽn pa be kiris-neb tigingã pʋgẽ wã wɛɛngẽ, bõe la d pa maande, la bõe yĩnga?
15 La tẽeg-y tɩ gom-kãensã gomda dũniyã sẽn zãr ne Wẽnnaamã yelle, la pa neba yembr-yembr yell ye. Kiris-nebã pa yãgd n ning b yamẽ tɩ ned na n talla manesem kãngã bɩ kada moonegã tʋʋmd taoor ye. B pa tar bʋʋm n na n tik a zug n yeel tɩ neb kẽer yaa bʋʋs ye. Pa tõnd n segd n wilg yɛlã sẽn na n baas n yɩ to-to, Kirist sã n wa wa n na n welg “piisa” ne “bʋʋsa” ye. (Matɩe 25:31-46) Ya a Zezi la bʋ-kaood ning b sẽn yãkã, pa tõnd ye. Sẽn paase, yɛlã wilgame tɩ kẽer sẽn da fõr n kẽ manesem sẽn yaa wẽng n yɩɩdã pʋgẽ saka Biiblã koɛɛg n toeeme, n lebg kiris-neb sẽn yaa yɩlma. Woto, baa ne d sẽn pa baood tũud-n-taar ne neb kẽerã, d pa maand sãmb-sãmb la d gom ne-b Rĩungã saagr zugu, d sã n paam sor ye. Gʋlsg Sõamyã gomda neb kẽer sẽn da ket n pa tẽedã yelle, n yetẽ tɩ b “da be[e] yam-sõng pʋgẽ vɩɩm sẽn-kõn-sa wã yĩngã.” B wa n baas n lebga tẽedba. (Tʋʋma 13:48, NW ) D pa tõe n tol n bãng ãnd n be yam-sõng pʋgẽ woto hal tɩ d wa kõ kasetã, tõe tɩ yaa naoor yak ye. Ne rẽ d yamẽ, d tara “sũ-bʋgsem” la “waoogr wʋsg” manesem ne neb nins sẽn nan pa sak fãagr koɛɛgã, n saagdẽ tɩ neb kẽer bãmb sʋkã na n wa saka vɩɩmã koɛɛga.—2 Tɩmote 2:25; 1 Pɩɛɛr 3:15, NW.
16. Bʋʋm a yembr sẽn kɩt tɩ d rat n paas d “zãmsg kũun tõogã” yaa bõe?
16 D sã n paasd d zãmsg kũun tõodã, d na n paasa d yẽesmã koe-noogã togsg pʋgẽ. Ad makre: Reem bɩ ɛspoor sẽn be yamleoog tõeeme n pa noom ned sẽn pa mi reem kãng maanego. La sã n yaa ne ned ning sẽn deemd-a sõma wã, a bee yamleoogo. Woto me, kiris-neb nins sẽn paasd b “zãmsg kũun tõogã” paasda b sũ-noogã ministɛɛrã pʋgẽ. (2 Tɩmote 4:2, NW; Tɩt 1:9) A Poll sagla a Tɩmote: “Nang pãng n ta Wẽnnaam yam n yɩ tʋm-tʋmd sẽn kõn zoe yãnd ye, la sẽn togsd sɩd koɛɛga tɩrg bala.” (2 Tɩmote 2:15) Wãn-wãn la d tõe n paas d zãmsg kũun tõodã?
17. Wãn-wãn la d tõe n “nong” Biiblã bãngre, la wãn-wãn la bãngr a woto na n naf tõnd ministɛɛrã?
17 Manesem a yembr yaa d sẽn na n paam bãngr sẽn yaa takɩ n paase. Tʋm-tʋmd a Pɩɛɛr sagla tõnd woto: “A wa kom-peelse, bɩ y nong Wẽnnaam koɛɛga sẽn wẽnd wa bĩisim sẽn ka pulã, t’a bɩɩs yãmb y fãagra yĩnga.” (1 Pɩɛɛr 2:2) Bi-pɛɛlg sẽn tar laafɩ nonga bĩisim. La kiris-ned tõe n datame n “nong” Biiblã bãngre. A tõe n maana woto n bɩɩs minung sẽn yaa sõma zãmsgã la karengã wɛɛngẽ. (Yelbũna 2:1-6) Modgr la kibl-m-meng yaa tɩlae, d sã n dat n yɩ Wẽnnaam gomdã karen-saam dãmb sẽn tar tõogo, la modgr a woto bee nafre. Sũ-noog ning d sẽn paamd ne Wẽnnaam Gomdã vaeesgã na n kɩtame tɩ d kae ne Wẽnnaam vʋʋsem sõngã, n dat ne yẽesem n wilg d sẽn zãmsdã neb a taaba.
18. Wãn-wãn la kiris-neb tigissã segend tõnd tɩ d tʋm sõma ne sɩd koɛɛgã?
18 Kiris-neb tigissã me tara yõod wʋsg n tõe n kɩt tɩ d paam tõog n dɩk Wẽnnaam Gomdã n tʋme. B sã n karem Biiblã verse rãmb zãma sõsg la sõss a taab sẽn tik Gʋlsg Sõamyã zut sasa, bɩ d tũ karengã d mens Biibl dãmbẽ wã. Yaa yam bũmb tɩ d kelg tigisgã sõss fãa neere, tɩ b rãmb nins sẽn tɩ loe ne tõnd moonegã tʋʋmdã be sʋka. Bɩ d ra tol n paoog mak-n-wilg rãmbã yõodo, tõe tɩ yaa d sẽn na n bas tɩ d yamã yuus ye. Yõk-m-meng la d yamã tikr tigisgã zug me yaa tɩlae. (1 Tɩmote 4:16) Kiris-neb tigissã kengda tõnd tẽebã, n sõngd tõnd tɩ d nong Wẽnnaam Gomdã, la a zãmsd tõnd tɩ d lebg koe-noogã moondb sẽn tar yẽesem.
D tõe n teega a Zeova sõngrã
19. Bõe yĩng tɩ kẽes-m-meng moonegã tʋʋmdẽ wakat fãa tar yõod wʋsgo?
19 Kiris-neb nins sẽn ‘kaeed ne vʋʋsem sõngã,’ la sẽn dat ne yẽesem n moon koe-noogã modgdame n na n kẽes b mens ministɛɛrã pʋgẽ wakat fãa. (Efɛɛz rãmba 5:15, 16, NW ) Yaa sɩda, ned fãa yɛl pa wa a to ye, la neba fãa pa tõe n dɩk sẽk a yembr n kẽes yõe fãagr tʋʋm-kãngã pʋgẽ ye. (Galat dãmba 6:4, 5) La tõe tɩ bũmb n tar yõod n yɩɩd sẽk ning fãa tõnd sẽn dɩkd n kẽesd moonegã tʋʋmdẽ wã. Yaa tõnd sẽn gomd d saagrã yell ne d taabã naoor sõorã. (2 Tɩmote 4:1, 2) Tõnd sã n moond n paasdẽ, d na n talla naneb n paas ne tʋʋm-kãngã. (Rom dãmba 10:14, 15) D na n bɩɩ ninbãan-zoeer pʋgẽ, la to yĩn-sidg võor-wʋmb pʋgẽ, d sã n sõsd wakat fãa ne pʋ-peelem dãmb sẽn wẽed sir n wõosdẽ la b pa tar saagra.—Ezekɩɛll 9:4; Rom dãmba 8:22.
20, 21. a) Tʋʋm bʋg n ket n be tõnd taoore? b) Wãn-wãn la a Zeova sõngd tõnd d modgrã pʋgẽ?
20 A Zeova bobla tõnd koe-noogã. Woto yaa pipi tʋʋmd d sẽn paam a nengẽ, tõnd sẽn yaa “tʋmd-n-taas” ne-a wã. (1 Korẽnt dãmba 3:6-9) D rata ne yẽesem n tʋk zɩɩb kãngã Wẽnnaam sẽn kõ-dã ne d sɩɩga fãa, ne d pãn-tõogã tɛka. (Mark 12:30, NW; Rom dãmba 12:1, NW ) Neb wʋsg sẽn ket n tar yam-sõng n be dũniyã pʋgẽ n dat sɩdã. Tʋʋm wʋsg n ket n baood maanego, la d tõe n talla bas-yard ne a Zeova teelgã, d sẽn tʋmd d ministɛɛrã tʋʋmd neerã sasa.—2 Tɩmote 4:5.
21 A Zeova kãabda tõnd a vʋʋsem sõngã la a kõt tõnd “vʋʋsem sõngã sʋʋga,” sẽn yaa Wẽnnaam Gomdã. Ne a sõngrã, d tõe n yaaga d noyã “ne daoodo n togs Koe-nooga sãmbgo [yel-solgdga, NW ].” (Efɛɛz rãmba 6:17-20) Bɩ b togs tõnd wɛɛngẽ wa tʋm-tʋmd a Poll sẽn gʋls kiris-nebã Tesalonikã: “Tõnd Koe-noog ka ta yãmb nengẽ ne goam bal ye, la a taa ne pãnga la ne Sɩɩg Sõngo la ne tẽeb [bas-yard, NW ] wʋsgo.” (1 Tesalonik rãmba 1:5) N-yẽe, bɩ d moon koe-noogã ne yẽesem!
Lebg-n-ges koɛɛga
• Vɩɩmã yɩɩr yĩnga, bõe n tõe n paam tõnd yẽesmã ministɛɛrã pʋgẽ?
• Wãn-wãn la tõnd sẽn tʋll n togs koe-noogã yaa wa “bugum” tõnd sũyã pʋsẽ?
• Manesem sẽn pa sõma bʋs ne ministɛɛrã la d segd n lak d mens ne?
• Naoor wʋsgo, wãn-wãn la d segd n ges neb nins sẽn pa tẽed wa tõndã?
• Wãn-wãn la a Zeova sõngd tõnd tɩ d tall d yẽesmã moonegã tʋʋmd pʋgẽ?
[Zãmsgã sogsgã]
[Fot rãmba, seb-neng 21]
Kiris-nebã rɩkda togs-n-taar ne a Poll la a Zeremi yẽesmã
[Foto rãmba, seb-neng 22]
Yaa d sẽn nong Wẽnnaam la d taabã yĩng n kɩt tɩ d tar yẽesem ministɛɛrã pʋgẽ