Waoog-y neb nins b sẽn kõ zu-sobend yãmb zugã
Waoog-y neb nins b sẽn kõ zu-sobend yãmb zugã
“Bɩ y waoog neba fãa. Bɩ y nong ba-biisã. Bɩ y zoe Wẽnnaam. Bɩ y waoog rĩma.”—1 PƖƐƐR 2:17.
1, 2. Wãn-wãn la nebã get zu-sobendã rũndã- rũndã, la bõe yĩnga?
“KAMBÃ n tar sor n na n maan fãa. B pa waoogd roagdbã lɛ-lɛ ye,” woto la ma a yembr yẽgem-yã. “Kɩɩs-y zu-sobendã,” woto la koɛɛg b sẽn gʋls n tabl mobil zug yeta. Woto yaa tagsa a yiib sẽn tɩ loe ne yell sẽn be zĩig fãa rũndã-rũndã wa y sẽn segd n miẽ wã. B sẽn pa nong n waoogd roagdbã, karen-saam dãmbã, tʋʋm taoor dãmb la tẽngã zu-soben dãmbã yaa bũmb sẽn wɛ dũniyã gill zugu.
2 Kẽer tõeeme bal n wẽgs b bãgd n yeel tɩ ‘Neb nins sẽn tar zu-sobendã pa zems ne m waoogr ye.’ Wakat-wakate, tõe n yaa toog tɩ d kɩɩs togs-kãngã. D wʋmda kɩbay wʋsg sẽn tɩ loe ne tẽngã zu-soben dãmb sẽn yaa zãmb rãmba, tʋʋm taoor dãmb sẽn yaa rat-tɩ-loog rãmba, karen-saam dãmb sẽn pa tõe b tʋʋmd la roagdb sẽn maand b kamb pãnga. Zu-noogo, kiris-neb sẽn tar tags-kãngã buud zu-sobendã wɛɛngẽ tigingã pʋgẽ pa waoog ye.—Matɩe 24:45-47, NW.
3, 4. Bõe yĩng tɩ kiris-nebã segd n waoog neb nins sẽn tar zu-sobendã?
3 D sẽn yaa kiris-nebã, d tara “bʋʋm sẽn tar pãng” n na n waoog neb nins sẽn tar zu-sobend dũniyã pʋgẽ wã. Tʋm-tʋmd a Poll sagla kiris-nebã tɩ b “sak zu-soben dãmb sẽn yɩɩdã, bala zu-sobend ka be tɩ sã n ka tũ ne Wẽnnaam ye; zu-sobend nins sẽn be wã lugla b zĩis sẽn tar kogsã pʋsẽ ne Wẽnnaam maasem.” (Rom dãmba 13:1, 2, 5, NW; 1 Pɩɛɛr 2:13-15) A Poll me kõo bʋʋm sẽn tar pãng d sẽn tar n na n sak zu-soben dãmbã zaka pʋgẽ: “Pagba, bɩ y sak y sɩdba wa sẽn zems Zusoaba yam. Kamba, bɩ y sak y ba rãmba ne y ma rãmba ne bũmb fãa; tɩ bõe, bõn-kãng tata Zusoaba yam.” (Kolos rãmba 3:18, 20) Tigingã kẽem dãmb zemsa ne tõnd waoogre, bala yaa ‘vʋʋsem sõngã n yãk-b tɩ b yaa yel-gɛtba, sẽn na yɩl n kɩɩm Wẽnnaam tigengã.’ (Tʋʋma 20:28, NW ) Yaa d sẽn waoogd a Zeova wã yĩng n kɩt tɩ d waoogd zu-soben dãmb nins sẽn yaa ninsaalbã. Wa sẽn zemse, a Zeova zu-sobendã waoogr n lʋɩt taoor wakat fãa tõnd vɩɩmã pʋgẽ.—Tʋʋma 5:29.
4 Ne a Zeova zu-sobendã sẽn yɩɩd fãa wã d yamẽ, bɩ d ges makr sẽn tɩ loe ne neb kẽer sẽn pa waoog neb nins sẽn da tar zu-sobendã, la kẽer sẽn tall waoogr ne-ba.
Paoogr wata ne taale
5. Paoogr manesem bʋg la a Mikall tall ne a Davɩɩde, la rẽ baasa ne bõe?
5 D sã n vaees Rĩm a Davɩɩd kɩbarã, d tõe n yãa a Zeova sẽn get neb nins sẽn paoogd zu-sobend ning Wẽnnaam sẽn kõ wã to-to. A Davɩɩd sẽn da wa n kɩt tɩ b tall kaoolã koglg n kẽng Zerizalɛmã, a pag a Mikall “yãame tɩ naab a Davɩɩd yɩgd n tĩmsdẽ n saood warb Zusoaba [a Zeova, NW ] taoore, la yẽ paooga a Davɩɩd a sũur pʋgẽ.” La a Mikall da segd n gesa a Davɩɩd wala zakã soab yembo, la wala tẽngã rĩm me. La a wilga a sẽn tagsd ne paoogr woto: “Israɛll rĩma tara ziir dũnda. Bãmb yeesa b fut b tʋm-tʋmdba yem-pogs taoor wa nin-yoogo.” Rẽ kɩtame t’a Mikall pa tol n paam kamb abada ye.—2 Sãmwɛll 6:14-23.
6. Wãn-wãn la a Zeova ges a Koore paoogrã ne ned ning A sẽn zae-yã?
6 Ned sẽn kõ mak-wẽng wʋsg ne teokaratik zu-sobend Wẽnnaam sẽn yãkã paoogr yɩɩ a Koore. A sẽn da ya a Kehat buudã nedã, ad a sɩd ra tara zu-noog a sẽn da sõgend a Zeova sɛk roogẽ wã! La yẽ gesame tɩ kongr n be a Moiiz la a Aarõ sẽn yaa Israɛll nebã taoor dãmb Wẽnnaam sẽn zaeyã nengẽ. A Koore naaga ne Israɛll nanambs a taab n yeel a Moiiz la a Aarõ ne pa-nandem tɩ: “Israɛll neba fãa gill yaa yɩlma, tɩ Zusoaba [a Zeova, NW ] be bãmb sʋka. Bõe tɩ y zẽkd y mens n yetẽ tɩ y yɩɩda Zusoaba nebã?” Wãn-wãn la a Zeova ges a Koore la a poorẽ dãmbã manesem kãngã? Wẽnnaam gesa b tʋʋmdã wa bũmb sẽn paoogd a Zeova mengã. A sẽn maan kaset ne tẽngã sẽn vel neb nins fãa sẽn da be yẽ poorẽ wã poore, bugum sẽn yit a Zeova nengẽ n dɩ a Koore la nanambs 250 wã.—Sõdbo 16:1-3, 28-35.
7. “Tʋm-tʋmdb kãsemsa” ra tara bʋʋm n na n sãbg a Poll zu-sobendã bɩ?
7 Yʋʋm kob-yendẽ kiris-neb tigingã pʋgẽ, neb n zĩnd n tall paoogr ne teokaratik zu-sobendã. “Tʋm-tʋmdb kãsemsa” sẽn da be Korẽnt tigingẽ wã ra tara paoogr manesem ne a Polle. B sãbga a goamã manesem n yetẽ: “B meng ka pãng ye, la b noor goama yaa zaalem bala.” (2 Korẽnt dãmba 10:10; 11:5) A Poll da yaa gom-minim soab tɩ pa woto me, a sẽn da yaa tʋm-tʋmdã yĩnga, a ra zemsa ne waoogre. La a Poll goamã sɩd ra yaa zaalem bɩ? A zãma sõssã b sẽn gʋls Biiblã pʋgẽ wã wilgda vẽeneg t’a yɩɩ sõsd sẽn kɩtd tɩ b sak n deeg a sẽn yetã hal sõma. Ges-y-yã, a sẽn sõs bilf ne a Herood Agripa 2, ‘sẽn mi Zʋɩf rãmba no-koɛɛma zãnga,’ a Poll sõsgã kɩtame hal tɩ rĩmã yeele: “A ketẽ-la bilf bal tɩ fo tõog tɩ mam yɩ Kirist neda”! (Tʋʋma 13:15-43; 17:22-34; 26:1-28) La tʋm-tʋmd kãsemsa sẽn da be Korẽntã rõd-a lame t’a goamã yaa zaalem! Wãn-wãn la a Zeova ges b manesmã? Koɛɛg a sẽn taas Efɛɛz tigingã yel-gɛtb pʋgẽ, a Zezi Kirist gom n pẽga neb nins sẽn pa sak n bʋdg n tũ ‘neb nins sẽn yet tɩ bãmb yaa tʋm-tʋmdba, la b yaool n ka tʋmd-tʋmdbã.’—Wilgri 2:2.
Waoogre, baa ne pa zems zãngã
8. Wãn-wãn la a Davɩɩd wilg t’a waooga zu-sobend ning a Zeova sẽn da kõ a Saullã?
8 Biiblã pʋgẽ makr wʋsg n be n wilgd neb sẽn tall waoogr ne neb sẽn tall zu-sobendo, baa b sẽn da tʋm ne-a tɩ pa zems bɩ tɩ loog nugã. A Davɩɩd ra yaa mak-sõng a yembr ne rẽ. Rĩm a Saull a sẽn da sõgendã ra wa n tara sũ-kiir ne a Davɩɩd tʋʋm-kãsemsã, t’a ra baood n na n kʋ-a. (1 Sãmwɛll 18: 8-12; 19: 9-11; 23:26) Baa ne a sẽn da paam soay n na n kʋ a Saullã, a Davɩɩd yeelame: “Yaa bũmb sẽn pa saagd ne maam, sã n yaa ne a Zeova tagsgo, tɩ m tẽeg m nug n maan a Zeova sẽn zae a soabã wẽnga!” (1 Sãmwɛll 24:3-6, NW; 26:7-13) A Davɩɩd ra miime t’a Saull da bee tudgr pʋgẽ, la a basa yellã a Zeova nugẽ t’a bʋ a Saull. (1 Sãmwɛll 24:12, 15; 26:22-24) A pa sãbs bɩ gom a Saull wẽng ye.
9. a) A Davɩɩd tagsa wãn-wãna, a Saull sẽn da wa n namsd-a wã? b) Bõe yĩng tɩ d tõe n yeel t’a Davɩɩd da tara waoogr hakɩk ne a Saulli?
9 B sẽn da namsd a Davɩɩdã a sũurã ra sãama wʋsg bɩ? “Nin-toos baoodame n na n sãam mam vɩɩm,” woto la a Davɩɩd yãb n togs a Zeova. (Yɩɩl Sõamyã 54:5) A togsa a Zeova sẽn be a sũurẽ wã woto: “Mam Wẽnnaam, bɩ y fãag maam ne m bɛɛbã . . . Pãens rãmba sɩfda wẽng ne maam, la a ka mam kɩɩsg yĩng bɩ m kongr yĩng ye. Baa mam sã n ka maan yel-wẽnde, bãmb zoetame n kengd b mens mam yĩnga. Bɩ y nek n wa n sõng maam, la y gese.” (Yɩɩl Sõamyã 59:2-5) Yãmb zoe n tagsa woto bɩ, tɩ y pa maan ned sẽn tar zu-sobend wẽnga, t’a yaool n ket n namsd yãmba? A Davɩɩd pa bas a Saull waoogr ye. A Saull sẽn ki wã, a Davɩɩd pa kɩdem ye, a gʋlsa sũ-sãang yɩɩll woto: “Neba ra nonga a Saull ne a Zonatã, la b ra yaa nin-sõama . . . Bãmb zoees tʋʋlem da yɩɩda sɩlse. Bãmb pãng ra yɩɩda gɩgma. Israɛll pagba, bɩ y yãb a Saull.” (2 Sãmwɛll 1:23, 24) Ad sɩd yaa mak-sõng ne waoogr hakɩk ned sẽn tar ne ned ning a Zeova sẽn zaeyã, baa ne a Saull sẽn da maan a Davɩɩd wẽngã!
10. Mak-sõng bʋg la a Poll kõ-yã, sã n yaa ne waoog zu-sobend ning Wẽnnaam sẽn kõ siglgã zug sullã, la rẽ waa n baasa ne bõe?
10 Kiris-nebã wakat pʋgẽ me d yãta mak- kãsems sẽn tɩ loe ne neb sẽn tall waoogr ne zu-sobend ning Wẽnnaam sẽn kõ wã. Rɩk-y makr ne a Polle. A talla waoogr ne sard ning yʋʋm kob-yendẽ kiris-neb tigingã siglgã zug sull sẽn dɩkã. A Poll sẽn tɩ ges Zerizalɛm a yaoolmã, siglgã zug sull sagl-a lame t’a yɩlg a meng tɩ zems ne minungã n wilg neb a taabã t’a pa kis a Moiiz Tõogã ye. A Poll ra tõe n tagsa woto: ‘Saam-bi-kãensã rag n yeela maam tɩ m yi Zerizalɛm, b sẽn da wa n dat n kʋ maama. Masã b ratame tɩ m wilg zãma sʋk tɩ m waoogda a Moiiz Tõogã. Mam zoe n gʋlsa lɛtr n taas Galat rãmbã n sagl-b tɩ b bas Tõogã tũubu. Mam sã n kẽng wẽn-doogẽ wã, neb a taabã tõeeme n pa wʋm mam sẽn maandã võore, n tagsdẽ tɩ m fãoogda neb nins sẽn kẽ bãongã sulli.’ La vẽenega, a Poll pa tags woto ye. Sẽn mik tɩ pa bũmb sẽn kɩɩsd kiris-neb noyã yĩnga, a saka yʋʋm kob-yendẽ siglgã zug sull saglg ne waoogre. Rẽ kɩtame tɩ zĩig pʋgẽ bɩ a Poll paam fãagr ne Zʋɩf rãmb kʋʋngo, la rẽ poore, a kẽe bãens roog n maan yʋʋm a yiibu. Sẽn na n baase, Wẽnnaam daabã n maane. A Poll kõo kaset nin-kãsems taoor Sezare, la rẽ poore, pãn-soaadbã yaoome tɩ b kẽng ne-a Rom t’a tɩ kõ kasetã Sezaar meng taoore.—Tʋʋma 9:26-30; 21:20-26, NW; 23:11; 24:27; Galat dãmba 2:12; 4:9, 10.
Yãmb tara waoogr bɩ?
11. Wãn-wãn la d tõe n tall waoogr ne dũniyã zu-sobendo?
11 Yãmb tara waoogr ning sẽn segda ne neb nins sẽn tar zu-sobendã bɩ? B kõo kiris-nebã noor tɩ b “kõ neba fãa sẽn zems bãmba, . . . neb nins sẽn zems waoogrã, bɩ y waoog-ba.” Sɩda, tõnd sẽn sakd “nanambsã” pa d sẽn na n yaood lampo rãmbã bal ye, la yaa d sẽn na n waoogd zu-soben dãmbã ne d tʋʋmã la d no-goamã me. (Rom dãmba 13:1-7) Tẽngã zu-soben dãmb sẽn tõe n yaa toosã taoore, d manesem yaa wãn-wãna? Siapas Soolmã sẽn be Megsik pʋgẽ wã, zu-soben dãmbã sẽn be babg a yembrẽ wã reesa pʋt a Zeova Kaset rãmb zags 57 sẽn so, kiris-nin-kãens sẽn pa kẽes b toog tũudum kibs rãmb pʋsẽ wã yĩnga. Tigiss nins b sẽn maan n na n welg yellã pʋgẽ, Kaset rãmbã sẽn yaa yɩlem la b ning fut tɩ zemsã goma ne burkĩndlem la waoogr wakat fãa. Yʋʋmd a yembr poore, b rɩka sard n kõ-b bʋʋm. B manesmã kɩtame tɩ neb a taabã sẽn getã waoog-ba, hal n dat n lebg a Zeova Kaset rãmba!
12. Bõe yĩng tɩ tar yõod tɩ f tall ‘waoogr sẽn yaa kãseng’ ne f sɩd sẽn pa tẽeda?
12 Wãn-wãn la y tõe n wilg waoogr ne zu-sobend ning Wẽnnaam sẽn kõ zakã pʋgẽ wã? A sẽn gom mak-sõng ning a Zezi sẽn kõ toogã reegr wɛɛngẽ wã yell poore, tʋm-tʋmd a Pɩɛɛr yeelame: “Woto me, pagba, bɩ y sak yãmb mens sɩdba, tɩ kẽer sẽn ka sakd Wẽnnaam koɛɛga na sak Wẽnnaam bãmb pagba yel-manesem yĩnga, tɩ goam toor kaẽ ye, tɩ bõe, bãmb na n yãame tɩ yãmb maanda neere la y yõkda y mense [la y tara waoogr sẽn yaa kãsenga, NW ].” (1 Pɩɛɛr 3:1, 2; Efɛɛz rãmba 5:22-24) Ka wã a Pɩɛɛr wilga vẽeneg tɩ tara yõod tɩ pag sak a sɩd ne “waoogr sẽn yaa kãsenga,” baa sɩdb kẽer sã n pa maand bũmb wʋsg n zems ne waoogr a woto. Pag waoogr manesmã tõe n bʋka a sɩd sẽn pa tẽedã sũuri.
13. Wãn-wãn la pagbã tõe n waoog b sɩdbã?
13 D sã n ges verse kãensã sẽn tɩ loe ne yɛl ninsã, a Pɩɛɛr wilgda tõnd a Saara makrã. A sɩd a Abrahaam da yaa mak-sõng sẽn yaa kãseng tẽebã wɛɛngẽ. (Rom dãmba 4:16, 17; Galat dãmba 3:6-9; 1 Pɩɛɛr 3:6) Pagb nins sẽn tar sɩdb sẽn yaa tẽedbã segd n waooga b sɩdbã tɩ pa ta pagb nins sẽn tar sɩdb sẽn pa tẽedbã bɩ? Yaa wãn to, yãmb sã n pa sak ne y sɩdã bũmb ning zugu? A Zezi kõo saglg sẽn pak yɛl wʋsg ka: “Ned sã n modg foom tɩ f yãag-a kilometr a ye, bɩ f yãag-a kilometr a yiibu.” (Matɩe 5:41) Yãmb waoogda y sɩdã n maand a sẽn tʋllã bɩ? Rẽ sã n wõnd toog wʋsgo, bɩ y togs-a y sẽn tagsd bũmb ning yellã zugu. Ra reng-y n tags t’a mii yãmb sẽn tagsdã ye. La y sã n na n wilg-a y sẽn tʋllã, bɩ y maan ne waoogre. Biiblã sagenda tõnd woto: “Bɩ y kɩt tɩ yãmb goama zĩnd bark wakat fãa n paam yamsem noom, la y bãng sẽn zemse n leok ned kam fãa.”—Kolos rãmba 4:6.
14. Waoog roagdbã baooda bõe maanego?
14 Yaa wãn to ne yãmba, kamba? Wẽnnaam Gomdã yeta woto: “Kamba, yãmb sẽn tũud Zusoabã bɩ y sak y ba rãmba ne y ma rãmba, tɩ bõe, bõn-kãnga yaa tɩrga. Yõ wã yaa pipi tõogo ne kãabg sẽn yaa: ‘Waoog f ba la f ma.’ ” (Efɛɛz rãmba 6:1-3) Bãng-y tɩ sak y roagdbã yaa yembr ne y sẽn na n ‘waoog y ba la y ma.’ Gerɛk gom-biig ning b sẽn lebg ne ‘waoogã’ võor yaa “ges tɩ tara yõod wʋsgo,” bɩ “wilg yõod sẽn ta zĩig ninga.” Woto, yɩ sakd baoodame tɩ y maan tɩ yɩɩg sak y roagdbã noy sẽn wõnd pa zems ne-yã sakr ne sũ-pa-noaanga. Wẽnnaam kota yãmb tɩ y tall naneb ne y roagdbã hal wʋsgo, la y ges-b sor-wilgrã wa bũmb sẽn tar yõodo.—Yelbũna 15:5.
15. Wãn-wãn la kamb tõe n ket n tar waoogre, baa b sã n tagsdẽ tɩ b roagdbã tudgame?
15 Yãmb roagdbã sã n maan bũmb sẽn tõe n boog yãmb waoogrã ne-ba, bõe la y na n maane? Mak-y n ges yɛlã wa bãmba. Pa bãmb n ‘dog yãmb’ n ges y yell la? (Yelbũna 23:22) Pa nonglem yãmb yĩng n tusd-b la? (Hebre dãmba 12:7-11) Gom-y ne y roagdbã ne waoogre, n wilg y sẽn tagsdã ne sũ-bʋgsem. Baa b sã n leok tɩ pa yɩ y noogo, bɩ y gũus n da gom n paoog-b ye. (Yelbũna 24:29, NW ) Tẽeg-y a Davɩɩd sẽn tall waoogr ne a Saull to-to wã, baa rĩmã sẽn da wa n pa tũ Wẽnnaam saglsã. Kos-y a Zeova t’a sõng-y tɩ y mao ne y yĩn-sidsã. A Davɩɩd yeela woto: “Bɩ y togs-a sẽn be y sũurẽ wã. Wẽnnaam yaa zĩ-lilldg tõnd yĩnga.”—Yɩɩl Sõamyã 62:8, NW; Wiisgu 3:25-27.
Waoog-y neb nins sẽn lʋɩt taoorã
16. Bõe la ziri karen-saam dãmbã la malɛk rãmbã makr tõe n zãms tõndo?
16 Yaa vʋʋsem sõngã n yãk tigingã kẽem dãmba, la b ket n yaa pa zems zãng rãmb la b tudgdame. (Yɩɩl Sõamyã 130:3; Koɛɛg Soaba 7:20; Tʋʋma 20:28, NW; Zak 3:2) Rẽ kɩtame tɩ tigingã pʋgẽ, kẽer sũy pa noom ne kẽem dãmbã ye. D manesem segd n yɩɩ wãn-wãna, d sã n wa tagsdẽ tɩ tigingã pʋgẽ b pa maneg yell wa sẽn da segdã, bɩ sã n wõnd yaa woto? Ges-y yʋʋm kob-yendẽ ziri karen-saam dãmbã ne malɛk rãmbã manesem sẽn yɩ lebend ne taabã: “Bãmb [ziri karen-saam dãmbã] yaa bi-beese la tɩtaam dãmba, bãmb ka zoet rabeem tɩ gom pãens rãmba wẽng ye. La malɛk rãmb nins sẽn tar pãnga ne noor n yɩɩd bãmba ka kãab bãmb wẽng Zusoaba taoor ye [b sẽn tar waoogr ne a Zeova wã yĩnga, NW ].” (2 Pɩɛɛr 2:10-13) Baa ne ziri karen-saam dãmbã sẽn gom “pãens rãmba” sẽn yaa kẽem dãmb nins b sẽn kõ zu-sobend yʋʋm kob-yendẽ kiris-neb tigingã pʋgẽ wã wẽngã, malɛgsã pa gom ziri karen-saam dãmbã sẽn da wat ne welgr saam-biisã sʋkã wẽng ye. Malɛgsã naam sẽn yaa kãseng n yɩɩd la b nong tɩrlem n yɩɩd ninsaalbã ra mii bũmb ning sẽn da maand tigingã pʋgẽ wã. La “b sẽn tar waoogr ne a Zeova wã yĩnga,” b basa bʋʋdã ne Wẽnnaam.—Hebre dãmba 2: 6, 7; Ziid 9.
17. Wãn-wãn la yãmb tẽebã tõe n sõng-yã, y sã n wa maood ne zu-loees y sẽn tagsd tɩ kẽem dãmbã tudgame?
17 Baa b sã n pa maneg yell wa sẽn da segdã, d pa segd n tall tẽeb ne a Zezi Kirist sẽn yaa kiris-neb tigingã Zugã sẽn vɩyã sɩda? A pa mi bũmb ning sẽn maand a meng tigingã sẽn be dũniyã gill zugã pʋgẽ sɩda? D pa segd n tall waoogr ne manesem ning a sẽn welgd yɛlã la d sak n deeg t’a tara tõog n na n maneg yɛlã sɩda? Sɩd-sɩda, ‘tõnd yaa ãnda n kaood d yak bʋʋdo?’ (Zak 4:12; 1 Korẽnt dãmba 11:3; Kolos rãmba 1:18) Bõe yĩng tɩ y pa na n togs y yellã a Zeova pʋʋsg pʋgẽ?
18, 19. Bõe la y tõe n maane, y sã n tagsdẽ tɩ kẽem soab beegame?
18 Ninsaal sẽn pa zems zãngã yĩnga, zu-loees bɩ yɛl tõe n wa pukame. Wakat n tõe n zĩnd meng tɩ kẽem soab beege, n kɩt tɩ neb kẽer sũy sãame. D sã n yɩ yãg-yãg yɛl a woto pʋsẽ, pa na n maneg yellã ye. Rẽ tõe n zẽna yellã bala. Neb nins sẽn tar yam-welgr tẽebã wɛɛngẽ wã na n gũu a Zeova t’a rems yɛlã la a kõ kiblg ning fãa sẽn tõe n yaa tɩlae wakat la manesem nins sẽn zems ne yẽ mengã.—2 Tɩmote 3:16; Hebre dãmba 12:7-11.
19 Yaa wãn to yẽ, y sũur sã n sãam yell ning yĩnga? Wall tɩ y gom ne neb a taabã tigingã pʋgẽ, bõe yĩng tɩ y pa na n pẽneg kẽem dãmbã ne waoogr n bao sõngre? Wilg-y yellã sẽn tuk yãmb to-to wã tɩ pa tũ ne sãbgr ye. Wakat fãa bɩ y wilg ‘to yĩn-sidg võor-wʋmb’ ne-ba, la y ket n waoogd-ba, y sã n togsd-b y sũurã yell sasa. (1 Pɩɛɛr 3:8, NW ) Ra tũnug-y ne sãbgr ye, la tall-y bas-yard ne b kiris-ned bɩʋʋngã. Tall-y naneb ne raoolg fãa sẽn yit Gʋlsg Sõamyã pʋgẽ b sẽn tõe n wa kõ-y ne sõmblem. La sã n wa mik tɩ remsg a taab n yaa tɩlae, bɩ y tall bas-yard t’a Zeova na n wilga kẽem dãmbã sor tɩ b maan sẽn yaa sõma la tɩrga.—Galat dãmba 6:10; 2 Tesalonik rãmba 3:13.
20. Bõe la d na n vaees sõsg ning sẽn pʋgdã pʋgẽ?
20 La bũmb a to la d segd n vaeese, sã n yaa ne waoog neb nins sẽn tar zu-sobendã wɛɛngẽ. Neb nins b sẽn yãk zu-sobend zĩigẽ wã pa segd n waoog neb nins b sẽn yãk tɩ b ges b yellã sɩda? Bɩ d vaees rẽnda sõsg ning sẽn pʋgdã pʋgẽ.
Y na n leokẽ-la bõe?
• Bʋʋm bʋg sẽn tar pãng la d tar n na n waoog neb nins sẽn tar zu-sobendã?
• Wãn-wãn la a Zeova la a Zezi get neb nins sẽn pa waoogd zu-sobend ning Wẽnnaam sẽn kõ wã?
• Mak-sõma bʋs la d tar ne neb sẽn tall waoogr ne neb nins b sẽn kõ zu-sobendã?
• Bõe la d tõe n maane, sã n wõnd ned ning b sẽn kõ zu-sobend tõnd zugẽ wã beegame?
[Zãmsgã sogsgã]
[Foto, seb-neng a 8]
A Saara talla waoogr sẽn yaa kãseng ne a Abrahaam zu-sobendã, la a talla sũ-noogo
[Foto, seb-neng a 9]
A Mikall pa waoog a Davɩɩd wa zak soab la rĩm ye
[Foto, seb-neng 11]
“Yaa bũmb sẽn pa saagd ne maam . . . tɩ m tẽeg m nug n maan a Zeova sẽn zae a soabã wẽnga!”
[Foto, seb-neng 12]
Bõe yĩng tɩ y pa na n dɩk y zu-loeesã n taas a Zeova pʋʋsg pʋgẽ?