“Yãmb fãa yaa ba-biisi”
“Yãmb fãa yaa ba-biisi”
“Bɩ yãmb da bao tɩ neb bool yãmb tɩ Karensaamb ye, tɩ bõe, yãmb karen-saamb ya a ye bala, la yãmb fãa yaa ba-biisi.”—MATƖE 23:8.
1. Yel-bʋg n zems tɩ d vaees-a?
“ÃND n zems ne waoogr n yɩɩda, misioneer bɩ Betɛllẽ sõgenda?” yaa woto la kiris-nin- poak sẽn yit Yaang tẽng a yembrẽ sʋk misioneer sẽn yit Ostrali ne pʋ-peelem. A ra rat n bãnga b sẽn segd n waoog a soab n yɩɩge, misioneer sẽn yit tẽn-zẽng bɩ tẽngã pʋgẽ sõgen sẽn tʋmd Sosiete Wats Tawa filiallã biru a yembrẽ. Sʋk-kãngã b sẽn sʋk ne pʋ-peelem sẽn pukd tagsg sẽn wilgd tɩ b geta nebã yɩɩdem ne taabã yɩɩ sʋkr sẽn ling misioneerã. Bao n bãng ãnd n yaa kãseng n yɩɩdã yaa tʋlsem sẽn yaa bao n bãng nebã sẽn be zĩig ning naamã la pãn-tõogã wɛɛngẽ.
2. Wãn-wãn la d segd n ges d balem-taasã?
2 Sʋk-kãngã pa bõn-sãang lɛ-lɛ ye. A Zezi karen-biisã meng talla no-koeemd wẽeb n yɩlemdẽ, sã n yaa ne bao n bãng ãnd n yaa kãseng n yɩɩdã wɛɛngẽ. (Matɩe 20:20-24; Mark 9:33-37; Luk 22:24-27) Bãmb me ra yita buud minim sẽn yaa yʋʋm kob- yendẽ Zidaismã, nebã sẽn nong n getẽ tɩ nebã yɩɩda taaba. Ne buud a woto a yamẽ, a Zezi sagla a karen-biisã woto: “Bɩ yãmb da bao tɩ neb bool yãmb tɩ Karensaamb ye, tɩ bõe, yãmb karen-saamb ya a ye bala, la yãmb fãa yaa ba-biisi.” (Matɩe 23:8) Tũudum naam yʋʋr wala “Rabi,” sẽn dat n yeel tɩ “Karensaamba” “tusda neb nins sẽn paam dẽ wã tɩ b tall wuk-m-meng la b tags tɩ b yɩɩda neb a taabã, la a kɩtdẽ tɩ neb a taabã sẽn pa paam dẽ wã maan sũ-kiir la b tags tɩ b pa zem baa fʋɩ ye. La tags-kãng ne manesem kãng gillã yaa lebend ne ‘sik-m-meng ning Kirist sẽn tarã,’ ” woto la Biibl mit a Albert Barnes wilg-yã. Sɩda, kiris-nebã gũusdame n pa gomd ne yel-gɛtbã sẽn be b sʋkã n yetẽ tɩ “Kẽem soab a zagla,” n tũnugd ne gom-biig sẽn yaa “kẽem soabã” wala waoogr yʋʋr sẽn yaa fʋʋsg bal ye. (Zoob 32:21, 22, NW ) Sẽn paas me, kẽem dãmb nins sẽn tũud a Zezi saglgã waoogda tigingã neb a taabã, wala a Zeova sẽn waoogd balemdb nins sẽn tar kɩs-sɩdã t’a Zezi Kirist me waoogd karen-biis nins sẽn tar kɩs-sɩdã.
A Zeova la a Zezi makrã
3. Wãn-wãn la a Zeova waoogd a bõn-naands nif sẽn pa ne wã?
3 Baa ne a Zeova sẽn yaa “Zãntlem sẽn-ka-to soab[ã],” hal sɩngrẽ wã menga a waooga a bõn-naandsã n kẽes-b a tʋʋmã pʋgẽ. (Yɩɩl Sõamyã 83:18, NW ) A sẽn wa n naan pipi ninsaalã, a Zeova rɩka a Biribl yendã a sẽn naana n kẽes tʋʋmdã pʋgẽ t’a yaa “tʋʋm mit[a].” (Yelbũna 8:27-30; Sɩngre 1:26) A Zeova sẽn wa n dɩk sard n na n sãam rĩm wẽng a Akaabã, a kosa a malɛgsã sẽn be yĩngrã meng tɩ b togs b sẽn dat n maan to-to.—1 Rĩm dãmba 22:19-23.
4, 5. Wãn-wãn la a Zeova waoogd a bõn-naands nins sẽn yaa ninsaalbã?
4 A Zeova rɩta naam n yaa ãndũniyã Naab Sẽn-ka-to. (Tõodo 3:24, NW ) A pa baood n na n sʋk ninsaalbã n bãng ye. La d tõe n yeelame t’a sikda a meng n tẽegd b yelle. Yɩɩl-gʋlsd yɩɩla woto: “Ãnda n wẽnd wa Zusoaba [a Zeova, NW ] tõnd Wẽnnaam sẽn zao yĩngri n [sikd a meng n, NW ] get saasẽ la dũniyã? Bãmb zẽkda ned sẽn ka pãng t’a yi wubsg pʋgẽ.”—Yɩɩl Sõamyã 113:5-8.
5 Nand t’a sãam Sodom la Gomoore, a Zeova kelga a Abrahaam sʋgsgã n tɩgs a tɩrlem komã. (Sɩngre 18:23-33) Baa ne a Zeova sẽn da zoe n mi a Abrahaam kosgã baasgã, a maaga a yĩng n kelg a Abrahaam n sak a sẽn yeelã.
6. A Habakuk sẽn wa n maan sʋkr t’a Zeova tall waoogr ne-a wã biis yɩɩ bõe?
6 A Zeova kelga a Habakuk sẽn sʋk woto wã me: “Zusoaba, yaa wakat a wãn la m na n bool yãmb tɩ y wa sõng-m tɩ y ka wʋm?” A Zeova gesame tɩ sʋk-kãngã ra kɩɩsda a zu-sobendã bɩ? Ayo, a gesame t’a Habakuk sʋgsgã zemsame, la woto yĩnga a wilg-a-la a raabã sẽn yaa yik Kalde nebã tɩ b pids bʋ-kaoorã. A kõo no-rɛɛsã bas-m-yam tɩ ‘bʋʋdã b sẽn deng n togsã na n maaname n ka vaal ye.’ (Habakuk 1:1, 2, 5, 6, 13, 14; 2:2, 3) A Zeova sẽn pa reem ne yɛl nins sẽn pak a Habakuk la a leok a sʋgsgã yĩnga, a Zeova waooga no-rɛɛsã. Rẽ kɩtame tɩ no-rɛɛsã yɩɩr sa t’a paam sũ-noogo, ne bas-yard zãng-zãng ne a fãagr Wẽnnaamã. Rẽ pukda a Habakuk sebrã vʋʋsem sõng sẽn vẽneg tɩ b gʋls sẽn paasd tõnd bas-yardã ne a Zeova wã pãng rũndã-rũndã wã.—Habakuk 3:18, 19.
7. Bõe yĩng tɩ tʋʋmd ning a Pɩɛɛr sẽn tall yʋʋmd 33 T.W. Pãntekotã tar võore?
7 A Zezi Kirist yaa mak-sõng a to, sã n yaa ne tall waoogr ne neb a taabã. A Zezi ra yeela a karen-biisã tɩ “ned sã n kɩs mam kaset neba taoore, mam me na n kɩsa yẽ kaset m Ba sẽn be arzãna taoore.” (Matɩe 10:32, 33) La yʋng ning b sẽn zãmb-a wã, a karen-biisa fãa bas-a lame n zoe, tɩ tʋm-tʋmd a Pɩɛɛr zãgs naoor a tãab t’a pa mi-a ye. (Matɩe 26:34, 35, 69-75) A Zezi gesame tɩ zʋʋg nif sẽn ne wã bala, la a pa yĩm a Pɩɛɛr sũurã pʋgẽ-pʋgẽ yĩn-sidgã, a tek-yam-n-kos-sugr sɩd-sɩdã ye. (Luk 22:61, 62) Rasem 51 poor bala, Kirist waooga tʋm-tʋmdã sẽn tek yam n kos sugrã n bas t’a gom a Zezi karen-biis 120 yʋʋr yĩng Pãntekotã daare, la a rɩk “soolem kʋɩlen-biisã” pipi soab n tʋme. (Matɩe 16:19; Tʋʋma 2:14-40) B ra kõo a Pɩɛɛr zu-noog ‘t’a lebg n sõng a ba-biisa tɩ b paam pãnga.’—Luk 22:31-33.
D waoog d zaka neba
8, 9. Wãn-wãn la sɩd sẽn waoogd a pag tõe n dɩk a Zeova la a Zezi togs-n-taare?
8 Sɩdbã ne roagdbã na maan neer n dɩk a Zeova la a Zezi Kirist togs-n-taare, b zu-sobendã Wẽnnaam sẽn kõ-bã wilgr pʋgẽ. A Pɩɛɛr saglame: “Yãmba, sɩdba, ket-y n be ne [y pagbã] tɩ zems ne bãngrã, n kõt-b waoogr wala laag pãng sẽn paoode, pag rẽndã.” (1 Pɩɛɛr 3:7, NW ) Mams-y n ges y sẽn na n dɩk laag sẽn pa zaeed wãabo, tɩ yaa vẽeneg t’a keelmã pa kolg lengr ye. Y kõn ges a yell neer n yɩɩd sɩda? Sɩd tõe n maana woto n dɩk a Zeova togs-n-taare, n kelg a pagã sẽn tagsde, b sã n wa rɩkd sard zakã yɛl zutu. Tẽeg-y t’a Zeova rɩka sẽk n gom ne a Abrahaam n kɩt t’a tagse. A sẽn pa zems zãngã, a sɩd tõeeme n pa yã yellã nens fãa ye. Woto, pa na n yɩ yam bũmb ne-a t’a waoog a pagã n kelg a tagsgã ne pʋ-peelem sɩda?
9 Tẽns nins pʋsẽ rao zu-sobend sẽn tar pãng wʋsgã, sɩd segd n ninga a yamẽ tɩ tõe t’a pagã segd n tõoga tagsa sẽn yaa gɩdgr kãseng wʋsgo, n yaool n wilg a sũurã pʋgẽ-pʋgẽ yĩn-sidga. Rɩk-y togs-n-taar ne a Zezi Kirist sẽn maan to-to ne a karen-biisã, sẽn da ya a beoog-daar pʋg-paalã sull babgã, a sẽn da wa n be tẽng zugã. A ra nong-b-la wʋsgo, n pa yĩmd tɩ yĩngã la tẽebã wɛɛngẽ b pãn-tõogã tara koaka, hal meng tɩ b nan pa yaag b noor n gom n wilg tɩ b rata woto bɩ woto ye. (Mark 6:31; Zã 16:12, 13; Efɛɛz rãmba 5:28-30) Sẽn paase, rɩk-y sẽk n ges y pagã sẽn maand bũmb ning yãmb la y zakã rãmb yĩnga, la y wilg y naneb ne goam la tʋʋma. A Zeova la a Zezi b yiiba fãa talla naneb ne sẽn zems-b ne nanebã, la b ning-b-la barka. (1 Rĩm dãmba 3:10-14; Zoob 42:12-15; Mark 12:41-44; Zã 12:3-8) A sɩdã sẽn lebg a Zeova Kaset soab poore, Yaang kiris-nin-poak yeelame: “Mam sɩdã ra nong n zãaga maam ne na-yakem a tãab bɩ a naase, n bas maam tɩ m tʋk teeda fãa. Masã, a zãada teedã, la a nanda bũmb ning mam sẽn maand zaka pʋgẽ wã!” Naneb goam sẽn tar pʋ-peelem sõngda pag wʋsg t’a bãng t’a tara yõodo.—Yelbũna 31:28.
10, 11. Bõe zãmsg la roagdbã tõe n paam ne a Zeova sẽn kõ mak-sõngo, a sẽn tall manesem ning ne Israɛll buudã sẽn yaa tõatã pʋgẽ?
10 B manesmã ne b kambã pʋgẽ, sẽn yɩɩd fãa, lengr sã n wa yaa tɩlae, roagdbã segd n dɩka Wẽnnaam makre. “A Zeova kell n keooga Israɛll ne Zida” tɩ b bas b so-wẽnsã, la b “kell n kenga b yubli.” (2 Rĩm dãmba 17:13-15, NW ) Israɛll nebã ‘makame meng n na n belg-a ne b noeyã la bãmb zɛlma yaga ziri ne-a.’ Roagdb wʋsg tõe n tagsame tɩ b kambã maanda woto wakat ninga. Israɛll neba “maka Wẽnnaam” n sãam a sũuri, tɩ nams-a. La a Zeova ra “yaa ninbãan-zoɛta, b kõo bãmb b yel-wẽna sugri n ka sãam bãmb ye.”—Yɩɩl Sõamyã 78:36-41.
11 A Zeova bõosa Israɛll nebã woto menga: “Wa-y tɩ d yẽs ne taaba. Baa yãmb yel-wẽna sã n yaa miuug wa saapaga minamina, b na n lebga pɛɛlg wa lampaalga. La baa bãmb sã n yaa miuug wa monem, b na n lebga wa pe-kõbd peelem.” (Ezai 1:18) Baa ne a Zeova sẽn da pa maan kongrã, a boola bu-tõatã t’a wa tɩ b maneg yɛlã. Ad sɩd yaa manesem sõng roagdbã sẽn segd n dɩk togs-n-taar ne, b manesmã ne b kambã wɛɛngẽ! Sã n yaa tɩlae, waoog-y-b n kelg b sẽn tagsd to-to yellã zugu, la y kɩt tɩ b tags n bãng bũmb ning sẽn kɩt tɩ b segd n toeema.
12. a) Bõe yĩng tɩ d pa segd n waoog d kambã n yɩɩg a Zeova? b) Bõe la d segd n maan n waoog d kambã burkĩndlem, d sã n wa lengd-ba?
12 Sɩda, wakat ninga, kambã rata sagls sẽn tar pãnga. Roagdbã pa segd n dat n yɩ wala a Eli sẽn ‘kell n waoog a komdibli wã n yɩɩg a Zeova wã’ ye. (1 Sãmwɛll 2:29, NW ) La kambã ratame n yã tɩ yaa nonglem yĩng la b sẽn kibind-bã. B segd n tõog n bãngame tɩ b roagdbã sɩd nong-b lame. A Poll sagla ba rãmbã woto: “Bɩ y ra maan bũmb sẽn yikd yãmb kamba sũy ye, la bɩ y wub bãmb ne Zusoaba saglgo la zãmsgo.” (Efɛɛz rãmba 6:4) Ba wã sã n wa pidsd a zu-sobendã tʋʋmde, d sẽn dat tɩ b bãng ka wã yaa tɩ ba wã segd n talla naneb ne kambã burkĩndlem n da kɩt tɩ b sũyã yiki, toom sẽn loog noor yĩng ye. N-yẽe, ra yĩm kambã burkĩndlem baoodame tɩ roagdbã rɩk sẽk la b modg rẽ yĩnga, la woto maaneg biisã seka b na maan modgr buud fãa.
13. Biiblã tagsg yaa bõe ne sẽn kʋʋl-bã zak pʋgẽ?
13 Tall waoogr ne zakã neb pa tek d meng pagã la d kambã waoogr ye. “Y sã n wa kʋʋl bɩ y sak kambã,” woto la Zapõ yel-bũnd yeta. Yel-bũn-kãngã rat n wilgame tɩ roagdb nins sẽn kʋʋlã segd n gũusame n da tall zu-sobend tɩ loog noor ne b kambã, la b segd n kelga b kambã sẽn bɩ wã sẽn yet bũmb ningã. Baa ne sẽn zems ne Gʋlsg Sõamyã tɩ roagdbã waoog b kambã n kelg-bã, kambã pa segd n tall paoogr manesem ne zakã neb nins sẽn kẽem-b bãmba ye. “F ma sã n kʋʋl bɩ f ra paoog-a ye,” woto la Yelbũna 23:22 yeta. Rĩm a Salomo vɩɩmda yel-bũn-kãngã n waoog a ma wã, a sẽn da wa n pẽneg-a n na n kos-a bũmbã. A Salomo kɩtame tɩ b ning geer a ma a Batseba sẽn kʋʋlã yĩng n kɛgl yẽ geerã nug-rɩtgo, la a kelga a ma wã sẽn da tar bũmb ning n na n yeel-a wã.—1 Rĩm dãmba 2:19, 20.
14. Wãn-wãn la d tõe n waoog tigingã neb nins sẽn kʋʋlã?
14 Tõnd tẽebã zag-kãsengẽ, d tõeeme n “lʋɩ taoor” n tall waoogr ne tigingã neb nins sẽn kʋʋlã. (Rom dãmba 12:10, NW ) Tõe tɩ b ye pa tõe n maan tɩ ta pĩndã ye, tɩ rẽ sãamd b sũyã. (Koɛɛg Soaba 12:1-7) Kaset soab sẽn zae sẽn kʋʋl sẽn da gãe n bẽed logtor yir wilga sũ-sãang kãng buud woto: “M dat n kii tao tɩ saasẽ bɩ m ye sɩng tʋʋma.” D sã n tall naneb la waoogr sẽn zems ne nin-kãensã sẽn kʋʋlã, tõe n sõng-b lame. B ra kõo Israɛll neba noor woto: “Bɩ f waoog zoob-peend soaba la nin-kẽema.” (Maankʋʋre 19:32) Tall-y naneb n kɩt tɩ sẽn kʋʋl-bã bãng tɩ b tara yõod la b nand-b lame. ‘Waoog’ tõe n dat n yeelame me tɩ d zĩnd n kelg-b tɩ b togs bũmb nins b sẽn maan yʋʋm sẽn looga pʋsẽ wã. Rẽ na n waooga sẽn kʋʋl-bã la a yɩ bark n kõ tõnd mensã tẽeb vɩɩm.
‘Sã n yaa ne waoog taabã wɛɛngẽ bɩ y lʋɩ taoore’
15. Bõe la kẽem dãmbã tõe n maan n waoog tigingã neba?
15 Tigingã neb bɩtame, kẽem dãmbã sã n kõt-b mak-sõngo. (1 Pɩɛɛr 5:2, 3) Baa ne b sẽn tar tʋʋm wʋsgã, kẽem dãmbã sẽn get neb a taabã yellã yãkda b toorẽ yam n tɩ yã kom-bɩɩsã, zak soben dãmbã, ma rãmb sẽn zãad b kamb b yen-yen wã, zags pagbã la sẽn kʋʋl-bã, nin-kãens segda zu-loees tɩ b pa segd zu-loees me. Kẽem dãmbã kelgda bũmb ning tigingã neb sẽn tar n na n togsã, la b pẽgd-b-la b sẽn tõog n maan bũmb ninsã yĩnga. Kẽem soab sẽn yaa gũusd sã n pẽgd saam-biig bɩ saam-bi-poaka, a sẽn maand bũmb ningã yĩnga, a rɩkda a Zeova togs-n-taare, sẽn nand a tẽng zug bõn-naandsã.
16. Bõe yĩng tɩ d segd n ges tɩ kẽem dãmbã ne neb a taabã zemsa ne waoogr tigingã pʋgẽ?
16 B sã n dɩkd a Zeova togs-n-taare, kẽem dãmbã kõta mak-sõng n tũud a Poll sagl-kãngã: “Saam-biir nonglmã pʋgẽ bɩ y tall nonglem sẽn tar pãng ne taaba. Sã n yaa ne waoog taabã wɛɛngẽ bɩ y lʋɩ taoore.” (Rom dãmba 12:10, NW ) Rẽ tõe n yɩɩ toog n yɩɩg ne kẽem dãmb nins sẽn vɩ tẽns nins pʋsẽ b sẽn nong n getẽ tɩ nebã yɩɩda taabã. Wala makre, Yaang tẽng a yembrẽ, gom-biig ning sẽn yaa “saam-biigã” tara gom-biis a yiibu, a yembr yaa waoogr yʋʋr t’a to wã yaa gom-bi-zaalga. Hal sẽn pa kaoos pʋgẽ, tigingã neb ra gomda ne kẽem dãmbã la neb nins sẽn kẽem-bã ne waoogr yʋʋrã, n yaool n tũnugd ne gom-bi-zaalgã ne neb a taabã. La b sagl-b lame tɩ b tũnug ne gom-bi-zaalgã wakat fãa, bala wala a Zezi sẽn yeel a karen-biisã, “yãmb fãa yaa ba-biisi.” (Matɩe 23:8) Baa ne welsgã sã n pa vẽeneg woto tẽns a taab pʋsẽ, d fãa segdame n gũus ne ninsaal sẽn nong n getẽ tɩ nebã yɩɩda taabã.—Zak 2:4.
17. a) Bõe yĩng tɩ kẽem dãmbã segd n yɩ neb b sẽn tõe n kolg n gom ne nana-nana? b) Wãn-wãn la kẽem dãmbã tõe n dɩk togs-n-taar ne a Zeova, b manesmẽ wã ne tigingã neba?
17 Yaa sɩda, a Poll yeela tõnd tɩ d ges tɩ kẽem dãmb kẽer zemsa ne “waoogr naoor a yiib[u],” la b ket n yaa saam-biisi. (1 Tɩmote 5:17) Tõnd sã n tõe n kolg Ãndũniyã Naab sẽn-ka-to “barka geer ne daoodo,” d pa segd n tõog n kolg kẽem dãmbã sẽn segd n dɩk a Zeova togs-n-taarã sɩda? (Hebre dãmba 4:16; Efɛɛz rãmba 5:1) Yel-gɛtbã tõe n bãnga b sã n yaa neb b sẽn tõe n kolg nana-nana, b sã n ges naoor sõor ning neb a taabã sẽn wat b nengẽ n na n bao sagls bɩ n wilg b tagsgã. Rɩk-y yam ne manesem ning a Zeova sẽn kẽesd neb a taabã a tʋʋmẽ wã. A waoogda neb a taabã n bobend-b zɩɩbo. Baa Kaset soab a to sẽn sagl tɩ b maan bũmb ningã sã n wõnd a pa zemse, kẽem dãmbã segd n talla naneb ne yellã sẽn pak-a wã. Tẽeg-y a Zeova sẽn tall manesem ning ne a Abrahaam sẽn da maand sʋgsd wʋsgã la ne a Habakuk sẽn kaas ne sũ-sãamsã.
18. Wãn-wãn la kẽem dãmbã tõe n dɩk a Zeova togs-n-taare, b sã n wa remsd neb nins sẽn dat sõngrã?
18 Kiris-nin-taas kẽer data remsgo. (Galat dãmba 6:1, NW ) La b tara yõod a Zeova nifẽ, n zems tɩ b tall waoogr manesem ne-ba. “Ned sẽn dat n sagl maam sã n waoogd maam, m dat n kolg-a lame,” woto la Kaset soab a yembr yeel-yã. Neb wʋsg sẽn yɩɩd sakda saglga, b sã n waoog-ba. Rẽ tõe n dɩka sẽka, la b sã n kelg neb nins sẽn bʋdgã, kɩtdame tɩ yɩ nana n yɩɩd ne-b tɩ b sak saglg buud fãa sẽn segde. Ra yĩm-y t’a Zeova sagla Israɛll nebã n yɩlem naoor wʋsgo, ninbãan-zoeer ning a sẽn tar ne-bã yĩnga. (2 Kɩbaya 36:15; Tɩt 3:2) Sagls b sẽn kõ ne to yĩn-sidg võor wʋmb la ninbãan-zoeer na n kẽe neb nins sẽn dat sõngrã sũyã.—Yelbũna 17:17; Filip rãmba 2:2, 3; 1 Pɩɛɛr 3:8, NW.
19. Wãn-wãn la d segd n ges neb nins sẽn pa tẽed wa kiris-nebã?
19 Tõnd waoogrã ne neb a taabã yalgd n taa neb nins sẽn tõe n wa yɩ tõnd tẽeb saam-biis beoog-daarã. Nin-kãensã tõeeme n pa sak tõnd koɛɛgã tao-tao masã ye, la d ket n segd n tara maag-m-meng ne-b la d sak n deeg tɩ b sẽn yaa ninsaalbã b zemsa ne waoogre. A Zeova ‘ka rat tɩ ned ba a ye sãam ye, la a datame tɩ nebã fãa yam tek tɩ b kos sugri.’ (2 Pɩɛɛr 3:9) D pa segd n tags wa a Zeova sɩda? D sã n tagsd ãdem-biisã yelle, d tõe n segla sor n kõ kasetã, d sã n tar zood manesem ne-b wakat fãa. Yaa sɩd tɩ d lakda d mens ne tũud-n-taar buud sẽn tõe n wa ne yell tẽebã wɛɛngẽ. (1 Korẽnt dãmba 15:33) La d ‘maanda neere,’ n pa paoogd neb nins sẽn pa tẽed wa tõndã ye.—Tʋʋma 27:3.
20. Bõe la a Zeova la a Zezi Kirist makrã segd n tus tõnd tɩ d maane?
20 N-yẽe, a Zeova la a Zezi Kirist getame tɩ tõnd ned kam fãa zemsa ne waoogre. Wakat fãa, bɩ d tẽeg b sẽn maand yɛlã to-to, la woto me, bɩ d lʋɩ taoor n waoog taaba. La wakat fãa bɩ d ning d Soaal a Zezi Kirist gom-kãensã d yamẽ: “Yãmb fãa yaa ba-biisi.”—Matɩe 23:8.
Y na n leokẽ-la wãn to?
• Wãn-wãn la y segd n ges y balem- taasã?
• Wãn-wãn la a Zeova la a Zezi makrã tusd yãmb tɩ y waoog neb a taabã?
• Wãn-wãn la sɩdbã la roagdbã tõe n waoog neb a taabã?
• Kẽem dãmbã sã n get b kiris-nin-taasã wa b saam-biisi, tusd-b lame tɩ b manesem yɩ wãn-wãna?
[Zãmsgã sogsgã]
[Foto, seb-neng 14]
Waoog-y y pagã n tall naneb goam ne-a
[Foto, seb-neng 14]
Waoog-y y kambã n kelgd-ba
[Foto, seb-neng 14]
Waoog-y tigingã neba