Bõe yĩng tɩ nebã pa waoogd zu-sobendã?

“Zu-sobendã b sẽn luglã kɩɩsgo, a yaa tũudum bɩ dũniyã pʋgẽ dẽnda, t’a yaa nebã ne taab la politikã wɛɛngẽ dẽnd me, yaa yell sẽn be dũniyã gill zugu, tɩ b tõe n wa sak n deeg tɩ yaa yel-kãseng sẽn yɩɩdã yaoolem yʋʋm pi-gĩndã pʋgẽ.”

YƲƲM wʋsg n loog hal yʋʋm pi-gĩnd ning sẽn sɩng yʋʋmd 1960 tɛkã. Yaa yʋʋm pi-gĩnd kãng yell la kʋdemd yel-gɛt la filozof a Hannah Arendt sẽn goma. Rũndã-rũndã b tara zu-sobendã paoogr n paasdẽ.

Wala makre, kɩbar b sẽn taas sẽn pa kaoos tɩ be Lõndr zʋrnall (The Times) pʋgẽ wã yetame: “Roagdb kẽer pa rat n sak tɩ karen-saam dãmbã tall zu-sobend b kambã zut ye, la b sã n mak n na n kibl b kambã b yẽgemdame.” Naoor wʋsgo, b sã n kibl b kambã lekollẽ wã, roagdbã kẽngda lekollẽ wã, pa sẽn na yɩl n sõog karen-saam dãmbã nug bal ye, la yaa sẽn na yɩl n maan zabr ne-ba.

Karen-saam dãmb Zu-raoog rãmb Asosiasiõ Nasional sẽn be Gãrãndbertayn (National Association of Head Teachers in Britain) no-rɛɛs goam la b wilg t’a yet woto: “Zãma wã yetame tɩ, ‘M tara dʋrwa rãmba,’ n yaool n pa yetẽ tɩ ‘M paama zɩɩb ye.’ ” B sẽn pa tõogd n zãms b kambã tɩ b tall waoogr sõma ne zu-sobendã toor sẽn ka be, roagdb kẽer pa remsd b kambã ye. La b pa rat n bas neb a taabã tɩ b rems-b me ye. Kamb nins sẽn kot tɩ b kõ-b b “dʋrwa rãmbã,” b kõt-b-la sor tɩ b paoog b roagdbã la karen-saam dãmbã zu-sobendo, la b tõe n bãnga manesem kãng baasgo: “Yaa zãmaan paalg sẽn pa tar waoogr ne zu-sobendã, la sẽn pa mi sẽn yaa tɩrg bɩ wẽng tɩ zãag ye,” woto la zʋrnall gʋlsd a Margarette Driscoll gʋls n togse.

Time zʋrnallã sõsg ning sẽn yaa “Zãmaan sẽn menema” pʋgẽ a wilga Risi kom-bɩɩs yam sẽn wa, n wilgd mizik rap reem-dɛɛmd yʋʋr sẽn yi sẽn yeel woto wã goama: “Ned na n yɩɩ wãn n dog dũni kãngã pʋgẽ, bũmb ba a yembr sẽn pa kaoosd la sẽn pa zemsã, n tõog n tall bas-m-yam ne nebã?” Sosiolog a Mikhail Topalov saka tags-kãngã woto: “Kom-bɩ-kãensã pa yalemb ye. B yãa soolmã sẽn belg b roagdbã, b yãa b sẽn kong b ligd b sẽn kẽgs la b kong b tʋʋmã. Tõnd tõe n gũume tɩ b tall waoogr ne zu-sobendã bɩ?”

La ra na n yɩɩ tudgr tɩ d kʋmb n yeel tɩ bas-yard kaalmã ne zu-sobendã yaa kom-bɩɩsã nengẽ bal la a be. Rũndã-rũndã, neb yʋʋm sẽn yaa toor-toor fãa geta zu-sobend buudã fãa ne bas-yard kaalem, la ne paoogr menga. Woto rat n yeelame tɩ d pa tõe n tall bas-yard ne zu-sobend ba a yembr bɩ? B sã n tʋm ne-a tɩ zemse, zu-sobendã sẽn dat n yeel tɩ “tõog bɩ sor f sẽn tar n na n ges bũmb yelle, n kao bʋʋd bɩ n gɩdg neb a taaba tʋʋma,” tõe n yɩɩ pãn-tusdg sẽn maand neere. A tõe n talla nafr n kõ neba la zãma wã. Sõsg ning sẽn pʋgdã na n wilga rẽ sẽn yaa to-to.