Tõnd yaa neb nins buud sẽn tar tẽebã

Koe-noogã mooneg Taiwan muitinsẽ wã

TAIWAN nong n paamda saag wʋsgo, sẽn kɩtd t’a tõe n tigis mui wã naoor a yiib yʋʋmd pʋgẽ. La wakat-wakate, saagã pa wat wakat ning a sẽn segd n wa wã ye, tɩ muiyã kiidẽ. Sã n wa yaa woto, koaadã komsda raood n bas bɩ? Ayo. A miime t’a segd n kell n pẽdgame. A baooda mui n ye wa sele. Rẽ poore, yɛlã sã n maneg n paase, koaadã paamda tigisg sẽn yaa sõma. Tẽebã wɛɛngẽ bʋdb la a tigisgã wõnda woto wʋsg wakat ninga.

Nang pãng tẽebã tigisg pʋgẽ

Yʋʋmã sẽn loogã pʋsẽ, a Zeova Kaset rãmbã sẽn be Taiwanã tʋma wʋsg n na n bʋd Gʋlsg Sõamyã sɩd la b tigs-a babs kẽere, tɩ ra wõnd b pa na n wom biis ye. Makr a yembr yaa Miao-li County. B maana modgr wakat-wakat n kõ kasetã bab-kãngã wã, la neb wʋsg pa sak ye. Woto, yʋʋmd 1973, ned ne a pag sẽn yaa zall so-pakdb la b tʋm be tɩ b tɩ moon wala wakat fãa Rĩungã koe-moondba. Sɩngrẽ wã, sãnda talla ratem ne koe-noogã. La pa kaoos la ratem kãng ki ye. Rẽ poore, b tʋma zall so-pakdbã zĩ-zẽnga.

Yʋʋmd 1991, zall so-pakd pogs a yiib a taab la b tʋm be. La yɛlã sẽn da yaa to-to wã ye wilgame tɩ ra pa tẽebã bɩʋʋng wakat ye. Yʋʋm a wãn poore, b ye tʋma zall so-pakdbã zĩig ning b sẽn da saagd tɩ pʋtã ra na n woma biis n yɩɩgã pʋgẽ. Woto, b ye basa zĩigã wala pʋ-wɛɛg wakat a wãn yĩnga.

Modg-n-yɩlem wata ne tõogre

Yʋʋmd 1998, bõn-bɩʋʋng kiuugã, b rɩka sard n na n bao babs nins sẽn womd biis n yɩɩdã, Taiwan sẽn tar mooneg zĩ-yaleng b sẽn pa kõ neb tɩ b tʋma pʋgẽ. Wãn-wãn la rẽ ra na n maane? B tʋma zall so-pakdb 40 wakat bilf pʋgẽ tɩ b moon zĩis nins sẽn tar neb n yɩɩdã.

B yãka galʋ-tẽns a yiib sẽn pẽ taab sẽn be Miao-li County wã mooneg zall kãng yĩngã. Saam-bi-pogs a naas sẽn pa kẽ kãadem la b tʋm beenẽ kiis a tãab yĩnga, sẽn na yɩl tɩ b mak n bãng moonegã sẽn yaa to-to be n gese. B sẽn ta wã poor bilfu, b gʋlsa ne sũ-noog n wilg neb sẽn wilgd ratem be wã sõore. B sẽn wa n baas b kiis a tãabã be wala so-pakdb bab-kãng pʋgẽ wã, tɩ b ra maanda Biibl zãmsg ne neb wʋsg b yiya. Sẽn paase, b lugla sebr zãmsg sull ne kẽem soab sẽn be tiging sẽn be yambẽ sõngre.

Saam-bi-pogs kãensã b tãab wilga vẽeneg tɩ b nongẽ lame n kell n ges “muyã” sẽn yaa lem-lemã sẽn da bɩt sõma wʋsgã ratem yelle. Woto yĩnga, bãmb b yiib la b yãk tɩ b be be wakat fãa n yaa zall so-pakdba, tɩ tãab-n-soabã ket n tʋmd be n yaa wakat fãa so-pakda. Kẽem soab sẽn be tigingẽ sẽn pẽ beenẽ n yik n kẽng babgẽ be sẽn na yɩl n sõng-ba. Sẽn yɩɩd neb 60 n wa pipi zãma sõsgẽ wã b sẽn kõ bab-kãng pʋgẽ wã. Masã tiging ning sẽn pẽ beenẽ wã sõngda sul-paall kãngã tɩ b maand hat fãa tigissã n pa vaandẽ,  sebr zãmsg a wãnã toor sẽn ka be. Tõe tɩ pa kaoos la b lugl tiging paalg babgẽ be ye.

Nang pãng wata ne bark Taiwan babs a taabẽ

Babs a taab n sak woto me. I-lan County sẽn be koom sʋk tẽngã nug-rɩtg la a yaang sʋkã pʋgẽ, Sebr Zãmsg la b lugl babg ning pʋgẽ zall so-pakdbã sẽn tʋmẽ wakat bilf pʋgẽ wã.

Wakat bilf pʋgẽ zall so-pakd sẽn da moond koe-noogã zak-zak zaabr a yembr sasa, a sega bi-bɩɩg n wilg-a tigingã tigiss geelg-n-tʋm seb-vãoogo. Tao-tao a sʋkame: “M tõe n waa tigisgẽ wã beoog yʋng bɩ? Sã n tõeeme yaa fu-bʋg buud la m segd n ningi?” So-pakd poak kãngã wa n maanda Biibl zãms rãmb a nii ne neb sẽn wilg ratem semen fãa. Biibl zãms rãmb a wãn da magdame n na n lebg koe-noogã koe-moondba, ne bõn-datl sẽn yaa reeg lisgu.

Pag a to sẽn be galʋ-tẽn-kãng pʋgẽ ra yɩɩ ned sẽn da rebd egiliizẽ wã yʋʋm wʋsg pʋgẽ, la a ra pa tõog n yã ned sẽn na n zãms-a Biiblã ye. A sẽn wʋm tɩ b zãmsda Biiblã ne nebã, a tũnuga ne so-kãngã. B yeel-a lame t’a reng n segl a zãmsgã. Wakat bilf pʋgẽ zall so-pakdã sẽn wa n na n maan zãmsgã, a mikame tɩ pagã ra maana “zãmsg tʋʋmd ning b sẽn kõ-a wã” n bao sebr n gʋls sʋgsgã b sẽn maan zãmsgã pʋgẽ wã. Rẽ poore, a gʋlsa a leoorã sʋkr fãa sẽn maana. A sebrã zugu a leb n gʋlsa verse rãmb nins fãa b sẽn sõdgã a zãmsgã pʋgẽ. Saam-bi-poakã sẽn da wa n maan pipi zãmsgã tɩ pagã zoe n segla pipi zãmsg a tãabã!

B yãa biis a woto Dongshih sẽn be Taiwan tẽn-sʋkã. Kiis a tãabã b sẽn tʋm be wã pʋgẽ, wakat bilf yĩng zall so-pakdbã basa sẽn yɩɩd seb-bi 2 000. Kiis a tãab-n-soabã zug tɩ b ra zoe n maanda Biibl zãmsg ne neb 16 b yiya. Tẽn-digimdg n maan Taiwan tẽn-sʋkã yʋʋmd 1999, bõn-bɩʋʋng kiuug rasem 21 n sãam galʋ-tẽngã bab-kãsengã. La neb kẽer sẽn wilgd ratem n ket n bɩt tẽebã wɛɛngẽ, baa ne b sẽn segd n maan lɛɛr a yembr n kẽng tigissã Rĩung Roog ning sẽn pẽ n yɩɩdẽ wã. N-yẽe, d segd n nanga pãnga, d sã n dat n kẽeb wʋsgo, yaa yĩngã wɛɛngẽ tɩ yaa tẽebã wɛɛngẽ me.

[Kart, seb-neng a 8]

(For fully formatted text, see publication)

SIN

Taiwan Strait

TAIWAN

[Fotã soaadbã]

Mountain High Maps® Copyright © 1997 Digital Wisdom, Inc.