“Sik-m-mens rãmba tara yam”

“Bõe la a Zeova baood fo nengẽ, sã n pa tɩ fo . . . tall sik-m-meng n kẽn ne f Wẽnnaamã?”—MIISE 6:8, NW.

1, 2. Sik-m-meng yaa bõe, la wãn-wãn la a yaa toor ne tɩtaam?

TƲM-TƲMD yʋʋr sẽn yi n zãgs n pa rat n tak nebã yam n sik a meng zug ye. Israɛll bʋ-kaood sẽn tar raood n yeel t’a ba wã roogẽ, yẽ la kɩdg n yɩɩda. Zãmaan fãa ninsaan-kãseng sẽn yɩɩdã sak n deegame t’a pa tar zu-sobend sẽn ka koak ye. Ra-kãensã fãa talla sik-m-menga.

² Sik-m-meng yaa lebend ne tɩtaam. Ned sẽn yaa sik-m-meng soab geta a mengã tõod la a yõod ne zemsgo, la a pa zẽkd a meng bɩ a wuk a meng ye. Sik-m-meng soab pa wukd a mengã, n pẽg a meng bɩ a bao taoor ye. Wakat fãa, a miime tɩ yɛl n be a sẽn pa tõe n maan ye. Woto yĩnga, a waoogda neb a taabã n pa yĩmd b yĩn-sids la b sẽn tagsd to-to wã ye.

3. Wãn-wãn la ‘sik-m-mens rãmbã tar yam’?

³ Biiblã yeta woto ne bʋʋm: “Sik-m-mens rãmba tara yam.” (Yelbũna 11:2) Sik-m-meng soab tara yam, bala a tara manesem Wẽnnaam sẽn nande, la a lakda a meng ne tɩtaam sẽn baasd ne paoogrã. (Yelbũna 8:13; 1 Pɩɛɛr 5:5) Wẽnnaam sõgen dãmb wʋsg manesem wilgame tɩ sik-m-meng sɩd yaa yam tʋʋmde. Bɩ d ges makr a tãabã d sẽn sõdg pipi goam sullẽ wã.

A Poll yaa ‘tʋm-tʋmd’ la ‘yel-gɛta’

4. Zu-nood sẽn pa wõnd b taab bʋs la a Poll paam-yã?

⁴ Ne bʋʋm, a Poll yʋʋr da yii wʋsg pipi kiris-nebã sʋka. A ministɛɛrã wakate, a toga sor n maan kɩlometr tusa mogr zug la tẽn-koɛɛng zugu, la a lugla tigims wʋsgo. Sẽn paase, a Zeova ninga a Poll bark ne yãab la buud-gom-zẽn goam kũuni. (1 Korẽnt dãmba 14:18; 2 Korẽnt dãmba 12:1-5) A leb n vẽnega a Poll t’a gʋls sɛb 14 sẽn be kiris-neb Gerɛk Gʋlsgã pʋgẽ. Vẽenega, b tõe n yeelame t’a Poll modgrã yɩɩga tʋm-tʋmdb a taabã fãa.—1 Korẽnt dãmba 15:10.

5. Wãn-wãn la a Poll wilg t’a ra geta a mengã ne sik-m-menga?

⁵ Sẽn mik t’a Poll da bee kiris-neb tʋʋmdã taoorã yĩnga, kẽer tõe n tẽedame tɩ b na n yãa a sẽn wilgd a menga, hal n pukd a zu-sobendã ne wilg-m-menga. La a Poll pa maan woto ye, bala a ra yaa sik-m-meng soaba. A boola a meng tɩ “tʋm-tʋmdba yao-zʋʋga,” la a paas woto: “Mam ka zems tɩ b bool tɩ tʋm-tʋmd ye, mam sẽn nams Wẽnnaam tẽedba yĩnga.” (1 Korẽnt dãmba 15:9) A Poll sẽn da nams kiris-nebã yĩnga, a ra zɩ n yĩm tɩ ra yaa ninbãan-zoeer a sẽn pa segd ne yĩng bal la a ra tõe n paam zems-n-taar ne Wẽnnaam ye, tɩ pa sʋkd tʋʋmd zu-nood zall paoong ye. (Zã 6:44;  Efɛɛz rãmba 2:8, NW ) Woto yĩnga, a Poll pa tags tɩ yel-kãsems nins a sẽn maan ministɛɛrã pʋgẽ wã kɩtame t’a yɩɩd neb a taabã ye.—1 Korẽnt dãmba 9:16.

6. Wãn-wãn la a Poll tall sik-m-meng a manesmã pʋgẽ ne Korẽnt nebã?

⁶ Sẽn yɩɩd fãa, a Poll sik-m-mengã ra yaa vẽeneg a manesmã ne Korẽnt dãmbã pʋsẽ. Wõnda bãmb neb kẽer da getame tɩ yel-gɛtbã, wala makre a Apolos, a Sefas la a Poll mengã yaa nin-kãsems hali n kilsd-ba. (1 Korẽnt dãmba 1:11-15) La a Poll pa bao Korẽnt dãmbã pẽgre, bɩ n tũnug ne b kilsgã n bao nafr ye. A sẽn da wa n tɩ ges-bã, a pa wilg a mengã “ne goama wala yam sẽn yɩɩd neb a taab rẽnda” ye. Sẽn yaa lebende, a Poll yeela yẽ mengã la a tʋmd-n-taasã wɛɛngẽ: “Woto yĩnga, bɩ b ges tõnd wa Kirist tʋm-tʋmdba la yel-gɛtb sẽn get Wẽnnaam sãmbg yɛla.” *—1 Korẽnt dãmba 2:1-5; 4:1.

7. Wãn-wãn la a Poll tall sik-m-menga, ba a sã n da kõt saglse?

⁷ A Poll ra tara sik-m-menga, ba a sã n da segd n kõ sagls sẽn tar pãng la sor-wilgri. A kosa a kiris-nin-taasã “ne Wẽnnaam ninbãan-zoeere,” la “ne nonglem” lakae pa ne zu-sobend ning a sẽn da tar n yaa tʋm-tʋmdã ye. (Rom dãmba 12:1, 2; Filemo 8, 9) Bõe yĩng t’a Poll maan woto? Bala a sɩd gesa a meng wala a saam-biisã ‘tʋmd-n-taaga,’ la pa wala ‘bãmb tẽebã soaad ye.’ (2 Korẽnt dãmba 1:24, NW ) Sãmbg sẽn ka be, ya a Poll sik-m-mengã n sõng n kɩt tɩ pipi kiris-neb tigimsã ra nong-a wʋsgo.—Tʋʋma 20:36-38.

D ges d zu-noodã ne sik-m-menga

8, 9. a) Bõe yĩng tɩ d segd n ges d mensã ne sik-m-menga? b) Wãn-wãn la neb nins sẽn tar taoor-sobendã wilgd tɩ b yaa sik-m-mens rãmba?

⁸ A Poll kõo kiris-nebã mak-sõng rũndã-rũndã. Baa taoor-sobend nins b sẽn bobl tõndã sẽn yaa to-to fãa, tõnd ned ba a yembr pa segd n tags t’a yɩɩda a taabã ye. A Poll gʋlsame: “Ned sã n tẽed t’a yaa bũmbu n yaool n yaa zaalem bala, a belgda a menga.”  (Galat dãmba 6:3) Bõe yĩnga? Bala “fãa maana yel-wẽna n kong Wẽnnaam waoogre.” (Yaa tõnd n ning italikã.) (Rom dãmba 3:23; 5:12) Sɩda, d pa segd n yĩm tɩ d fãa roga ne yel-wẽnã la kũumã d sẽn paam a Ãdem nengẽ wã ye. Zu-nood zall pa zẽkd tõnd tɩ d ye pa yel-wẽn-maandb ye. (Koɛɛg Soaba 9:2) Wala sẽn yɩ to-to ne a Pollã, yaa ne ninbãan-zoeerã d sẽn pa segd ne wã bal la ninsaalbã tõe n tall zems-n-taar ne Wẽnnaam, tɩ pa sʋkd b wa paam zu-noog n sõgen-a ye.—Rom dãmba 3:12, 24.

⁹ A sẽn mi rẽ wã yĩnga, ned sẽn yaa sik-m-meng soab pa zẽkd a meng ne a zu-noodã bɩ a wuk a meng ne a sẽn tõog n maan bũmb ninsã ye. (1 Korẽnt dãmba 4:7) A sã n wa kõt sagls bɩ sor-wilgri, a maanda woto wa tʋmd-n-taaga, la pa wala zu-soab ye. Sɩd-sɩda, yɩtẽ-la wẽng ne ned sẽn maand sõma wʋsg tʋʋm kẽer pʋsẽ t’a kos tɩ neb a taabã pẽg-a bɩ a tũnug ne tẽed-n-taasã pẽgr n naf a menga. (Yelbũna 25:27; Matɩe 6:2-4) Pẽgr sẽn zems fãa yita neb a taabã nengẽ, la b pa segd n kos pẽg-kãng ye. B sã n wa pẽg-d me, d pa segd n bas tɩ rẽ kɩt tɩ d tags tɩ tõnd yaa sõma n yɩɩd sẽn zemsã ye.—Yelbũna 27:2; Rom dãmba 12:3.

10. Wilg-y wãn-wãn la kẽer sẽn tõe n wõnd b yaa nin-talsã tõe n tar “tẽeb arzɛgse.”

¹⁰ B sã n bobl tõnd zu-sobendo, sik-m-mengã na n sõnga tõnd tɩ d ra wilg d mengã tɩ pa zemse, n kɩtdẽ tɩ b tags tɩ tigingã sẽn tar barkã yaa tõnd modgrã la d tõodã yĩng bal ye. Wala makre, d tõe n tara tõog zall zãmsgã kũun wɛɛngẽ. (Efɛɛz rãmba 4:11, 12) La ne sik-m-menga, d segd n sak n deegame tɩ zãms-kãsems nins d sẽn paamd tigingã tigissẽ wã kẽer pa sõssã sasa la d paamd-b ye. Wala makre, yãmb raood pa kengde, y sã n ne roagd sẽn ya a yembr sẽn wat Rĩungã Roogẽ wakat fãa ne a kamb a sẽn zãad sõma sɩda? Bɩ ned ning sẽn be yam-ka-m-meng pʋgẽ sẽn wat tigissẽ wã wakat fãa, baa ne a sẽn tagsd wakat fãa t’a ka yõodã? Bɩ bi-bɩɩg ning sẽn bɩt tẽebã pʋgẽ n gãt kãn-kãe, baa ne pãn-tusd-wẽnsã sẽn be lekollẽ wã la zĩis a taabã sɩda? (Yɩɩl Sõamyã 84:11) Tõe tɩ neba pa get nin-kãensã wʋsg ye. Neb a taabã pa ne burkĩndlem makr ning b sẽn segdã wʋsg ye. La b tõe n tara ‘tẽeb arzɛgs’ sẽn zem neb nins yʋy sẽn yi n yɩɩdã. (Zak 2:5) Sẽn yɩɩd fãa, sẽn na n baase, yaa d kɩs-sɩdã n kɩtd tɩ d ta a Zeova yam.—Matɩe 10:22; 1 Korẽnt dãmba 4:2.

A Zedeõ yaa “bilf n yɩɩd” neb nins fãa sẽn be a ba zakẽ wã

11. Wãn-wãn la a Zedeõ wilg sik-m-meng a sẽn da wa n gomd ne Wẽnnaam malɛkã?

¹¹ A Zedeõ sẽn yaa bi-bɩɩg sẽn tar yẽesem wʋsg sẽn yit a Manase buudẽ wã vɩɩmda gudgr wakat Israɛll kʋdemdã pʋgẽ. Wẽnnaam nin-buiidã namsa Madiã nebã weoogr pʋgẽ sẽn na maan yʋʋm a yopoe. La wakat da taame t’a Zeova na n fãag a nin-buiidã. Woto yĩnga, malɛkã puka a Zedeõ taoor n yeel-a: “Fo yaa gãndaoogo, la Zusoaba bee ne foom.” A Zedeõ ra yaa sik-m-meng soaba, rẽ n so t’a pa wuk a meng ne pẽgrã a sẽn da pa gũudã ziir yĩng ye. Sẽn yaa lebende, a yeela malɛkã ne waoogre: “Kabre, m kẽema, [a Zeova, NW ] sã n be ne tõndo, yaa bõe, tɩ to-kãensa fãa paamd tõndo?” Malɛkã vẽneg n togsa yɛlã n yeel a Zedeõ: “Kẽng n tɩ fãag Israɛll neba Madiã neba nugẽ.” Wãn-wãn la a Zedeõ leok-yã? A pa tʋlg ne yãgb n tũnug ne tʋʋmdã b sẽn kõ-a wã n maan a meng tẽngã gãndaoog  ye. A leokame: “M kẽema, y kabre, mam na n maana bõe n fãag Israɛll nebã? Gese, mam buuda yaa naong rãmb n yɩɩd Manase buuda fãa. La mam yaa bilf n yɩɩd neb nins fãa sẽn be m zakẽ wã.” Ad sɩd yaa sik-m-meng tɛkẽ!—Bʋkaoodba 6:11-15.

12. Wãn-wãn la a Zedeõ gũus-yã, a sẽn da wa n tʋmd tʋʋmd ning b sẽn bobl-a wã?

¹² Sẽn deng t’a Zeova tʋm a Zedeõ zabrẽ wã a mak-a lame. Wãn-wãna? A yeela a Zedeõ t’a wã a ba wã tẽn-kugr sẽn yaa Baal dẽndã, la a kɛ baleng ra-lugdg ning sẽn be a sɛɛgẽ wã n lubi. Tʋʋm-kãngã maaneg ra baooda raoodo, la a Zedeõ le wilga sik-m-meng la gũusgu, a sẽn tʋm-a to-to wã pʋgẽ. Wala a Zedeõ na wilg a meng zãma sʋkã, a tũnuga ne yʋngã a sẽn da tõe n kẽng tɩ neb pa yã-a wã. Sẽn paase, a Zedeõ tʋma a tʋʋmdã ne gũusg sẽn zemse. A rɩka tʋm-tʋmdb piig tɩ b yãag-a, tõe tɩ yaa sẽn na yɩl tɩ kẽer gũusd n getẽ tɩ sẽn kell-bã sõngd-a tɩ b sãamd tẽn-kugrã la a baleng ra-lugdgã b sẽn tũnugd ne n balemdẽ wã. * Sẽn ya a soab fãa, ne a Zeova barkã, a Zedeõ tʋma a tʋʋmdã, la wakat n wa n zĩnd tɩ Wẽnnaam tũnug ne-a n fãag Israɛll ne Madiã nebã.—Bʋkaoodba 6:25-27.

D tall sik-m-meng la gũusgu

13, 14. a) Wãn-wãn la d tõe n wilg tɩ d tara sik-m-menga, b sã n kõ-d tʋʋmd zu-noogo? b) Wãn-wãn la saam-biig a Alexander Macmillan kõ mak-sõng sik-m-mengã wɛɛngẽ?

¹³ A Zedeõ sik-m-mengã tõe n zãmsa tõnd yɛl wʋsgo. Wala makre, wãn-wãn la d maanda, b sã n kõ tõnd tʋʋmd zu-noogo? Tõnd reng n tagsda ziir bɩ naam ning a sẽn na n kõ wã bɩ? Bɩ tõnd geta ne sik-m-meng la pʋʋsg pʋgẽ d sã n tõe n tʋma tʋʋmdã? Saam-biig a Alexander  Macmillan sẽn baas a tẽng zug zoeesã yʋʋmd 1966 kõo mak-sõng rẽ wɛɛngẽ. Vugri, a Charles Russell sẽn yɩ Watch Tower Society pipi perzidã wã sʋka saam-biig a Macmillan n na n bãng sã n yaa ne yẽ, ãnd n tõe n ges tʋʋmdã yelle, yẽ a Russell sã n wa ka be. Sõsgã sẽn pʋglã pʋgẽ, saam-biig a Macmillan pa reng n yãk a meng ye, baa ne sẽn da yaa bũmb sẽn zems t’a maan woto wã. Baasgo, saam-biig a Russell kosa saam-biig a Macmillan t’a sak tʋʋmdã. Ad saam-biig a Macmillan sẽn gʋls yʋʋm sẽn loog poore: “Mam yaasa kɛpɩ. M tagsa a yell hal sõma, n pʋʋs a zug n wa baas n yeel-a tɩ m sũur yaa noog tɩ m maan bũmb ning fãa m sẽn tõe n sõng-a.”

¹⁴ Pa kaoos la saam-biig a Russell maan kaalem, n bas Watch Tower Society perzidãamd vɩʋʋg ye. Saam-biig a Macmillan sẽn da yaa yel-gɛt saam-biig a Russell yaoolem moonegã gilgr sasa wã yĩnga, saam-biig a yembr n yeel-a: “Mac, f tara zu-no-kãseng n na n yɩ perzidã. Fo ra yaa saam-biig a Russell ledgd kãsenga, la a yeela tõnd fãa tɩ fo sẽn yeel bũmb ning bɩ d maane. Be neere, a loogame n pa tol n lebg n wa ye. Wõnda yaa foo n tõe yɩ zu-raoogã.” Saam-biig a Macmillan leokame: “Saam-biiga, pa woto la d segd n ges yel-kãngã ye. Kada yaa Soaalã tʋʋmde, la zĩig ning fãa f sẽn tar Soaalã siglgã pʋgẽ n yaa zĩig ning Soaalã sẽn ne tɩ zemsame t’a kõ-fo, la m kɩsa sɩd tɩ zĩ-kãngã pa mam zĩig ye.” Rẽ, saam-biig a Macmillan yeelame tɩ ned a to yɩ perzidã. Wala a Zedeõ, a ra tagsda a mengã zug ne sik-m-menga. Tõnd me na maan neer n tags wa yẽ.

15. Manesem bʋs sẽn zems la d tõe n tũnug ne n wilg yam-welgre, d sã n wa moond neb a taabã?

¹⁵ Tõnd me segd n yɩɩ sik-m-mens rãmba, tʋʋmd ning b sẽn bobl-dã tʋmb pʋgẽ. A Zedeõ ra yaa gũusda, la a ra modgame n pa na n yik a bɛɛbã sũy zaalem ye. Woto me, tõnd moonegã tʋʋmd pʋgẽ, d segd n yɩɩ sik-m-mens rãmb la gũusdb ne d sẽn gomd ne neb a taabã to-to wã. Yaa sɩda, tõnd kẽe tẽeb zabrẽ sẽn na yɩl n sik “pãens rãmba” la “tagsgo.” (2 Korẽnt dãmba 10:4, 5) La d pa segd n paoog neb a taabã, bɩ d kõ-b bʋʋm tɩ b zab ne tõnd koɛɛgã ye. Sẽn yaa lebend ne rẽ, d segd n talla naneb ne b tagsa wã, n gom n tadg zĩis nins tõnd fãa sẽn sakẽ wã, tɩ rẽ poor bɩ d gom n tadg d koɛɛgã nens sẽn yaa sõma wã zutu.—Tʋʋma 22:1-3; 1 Korẽnt dãmba 9:22; Wilgri 21:4.

A Zezi yaa mak-kãseng sik-m-mengã wɛɛngẽ

16. Wãn-wãn la a Zezi wilg t’a ra geta a mengã ne sik-m-menga?

¹⁶ Sik-m-meng makr ning sẽn be rasãnd n yɩɩdã ya a Zezi Kirist rẽndã. Baa ne a sẽn tar zems-n-taar sẽn yaa kãseng ne a Ba wã, a Zezi pa maan sãmb-sãmb la a sak n deeg tɩ yɛl n be n zʋʋg a sẽn tõe n maan ye. (Zã 1:14) Wala makre, a Zak ne a Zã ma wã sẽn kos t’a komdibli a yiibã zĩnd a Zezi sɛɛgẽ a Rĩungã pʋgẽ wã, a Zezi yeelame: “Tɩ zĩnd mam dɩtgo wala mam goabga yõ wã ka be ne maam tɩ kõ ye.” (Matɩe 20:20-23) Vugr yɛsa, a Zezi sak n deegame: “Mam ka tõe n maan bũmb ne m meng pãng ye . . . mam ka baood m meng ratem ye, yaa sẽn tʋma maama ratem.”—Zã 5:30; 14:28; Filip rãmba 2:5, 6.

17. Wãn-wãn la a Zezi tall sik-m-meng a manesmã ne neb a taabã pʋgẽ?

¹⁷ A Zezi ra yɩɩda ninsaalbã sẽn pa zems zãngã bũmb fãa wɛɛngẽ, la a ra tara zu-sobend sẽn yɩɩd ninsaalba fãa tɩ yit a Ba a Zeova nengẽ. Baasg zãnga, a Zezi ra yaa sik-m-meng soab a manesmã pʋgẽ ne a karen-biisã. A pa zɩlg-b ne bãngr wʋsg wilgr ye. A wilga ninbãan-zoeer n pa yĩm tɩ b yaa ninsaalb sẽn tar datem ye. (Matɩe 15:32; 26:40, 41; Mark 6:31) Woto, baa ne a Zezi sẽn da zems zãngã, a ra pa ned sẽn baood tɩ neb a taabã zems zãng ye. A zɩ n kos tɩ yɩɩg a karen-biisã sẽn tõe n kõ ye, la a zɩ n dogl bũmb b zug tɩ yɩɩg b sẽn tõe n tʋk ye. (Zã 16:12) Pa lingr la neb wʋsg sẽn ges t’a yaa ned sẽn kengd pɛlgã ye!—Matɩe 11:29.

 Rɩk-y togs-n-taar ne a Zezi sik-m-meng mak-sõngã

18, 19. Wãn-wãn la d tõe n dɩk togs-n-taar ne a Zezi sik-m-mengã ne a) tõnd sẽn get d mensã to-to wã la b) d manesmã ne neb a taabã pʋgẽ?

¹⁸ Zãmaan fãa ninsaan-kãseng sẽn yɩɩdã sã n talla sik-m-menga, tõnd sẽn segd n maan woto n yɩɩde. Nong n yaa toog ne ninsaalb sẽn pa zems zãngã tɩ b sak n deeg tɩ b pʋd n pa tar zu-sobend zãng ye. La kiris-nebã rɩkda a Zezi togs-n-taar n modgd n na n yɩ sik-m-mens rãmba. B pa wukd b mens n pa kõt neb nins sẽn tar zʋgd nins sẽn segdã zɩɩb ye. B leb n pa tɩtaam dãmba, la neb sẽn pa rat n sak sor-wilgr ning sẽn yit neb nins sẽn tar zu-sobend n na n kõ sor-wilgr kãngã wã ye. B wilgdame tɩ b yaa lagem-n-tʋm dãmba, n kɩtdẽ tɩ yɛla fãa maand tigingã pʋgẽ ‘tɩ zũnd-zãnd kaẽ ye.’—1 Korẽnt dãmba 14:40, NW.

¹⁹ Sik-m-mengã na n tusa tõnd me tɩ d yɩ maan-tɩ-zems rãmba, yɛl nins d sẽn gũud tɩ neb a taabã maana pʋgẽ, la d yɩ neb sẽn pa yĩmd tɩ b tara bõn-datem ye. (Filip rãmba 4:5, NW ) Tõe tɩ d tara tõod la pãng zĩis kẽer tɩ neb a taabã pa tarẽ ye. La d sã n yaa sik-m-mens rãmba, d pa na n gũ wakat fãa tɩ neb a taabã maan yɛlã wa tõnd sẽn datã ye. D sẽn mi tɩ ned kam fãa tara yɛl a sẽn tõe la a sẽn pa tõeyã, ne sik-m-meng wʋsgo, d fãa na n maana yaafa ne neb a taabã pãn-komslem. A Pɩɛɛr gʋlsame: “La sẽn yɩɩda, bɩ y paam nonglem wʋsg yãmb sʋka, tɩ bõe, nonglem luta yel-wẽn wʋsgo.”—1 Pɩɛɛr 4:8.

20. Bõe la d tõe n maan n tõog wuk-m-meng buud fãa?

²⁰ Wala d sẽn yã wã, yamã bee ne sik-m-mens rãmba. Yaa wãn to yẽ, y sã n mik tɩ y tara wuk-m-meng bɩ tɩtaam manesem? Ra koms-y raood ye. Sẽn yaa lebend bɩ y tũ a Davɩɩd makrã. A pʋʋsa woto: “Bɩ y gũ y tʋm-tʋmda t’a ra maan tɩtaam ye, la ra sak-y tɩ tɩtaam soog maam ye.” (Yɩɩl Sõamyã 19:14) D sã n dɩkd tẽeb neb makr wala a Polle, a Zedeõ, la sẽn yɩɩd fãa a Zezi Kirist rẽndã, d mengã na n wa bãngame tɩ gom-kãensã yaa sɩda: “Sik-m-mens rãmba tara yam.”—Yelbũna 11:2.

[Tẽngr not rãmbã]

Y tẽrame bɩ?

• Sik-m-meng yaa bõe?

• Wãn-wãn la d tõe n dɩk togs-n-taar ne a Poll sik-m-mengã?

• Bõe la a Zedeõ makrã tõe n zãms tõnd sik-m-mengã wɛɛngẽ?

• Wãn-wãn la a Zezi kõ sik-m-meng mak-sõng sẽn yɩɩd fãa wã?

[Zãmsgã sogsgã]

[Foto, seb-neng 27]

A Poll sik-m-mengã kɩtame t’a kiris-nin-taasã ra nong-a wʋsgo

[Foto, seb-neng 29]

A Zedeõ talla gũusg a sẽn da wa n maand Wẽnnaam daabã

[Foto, seb-neng 31]

Wẽnnaam Biribl a Zezi talla sik-m-meng a sẽn da maandã fãa pʋgẽ