Tɩtaam wata ne paoogre

“Tɩtaam sã n wa, yãnd n pʋgda. La sik-m-mens rãmba tara yam.”—YELBŨNA 11:2.

1, 2. Tɩtaam yaa bõe, la wãn-wãn la a wa ne yel-beedo?

LEVI ned sẽn yaa sũ-ki-ned n lʋɩ kɩɩsdb taoor n zãgs zu-soben dãmb nins a Zeova sẽn yãkã. Na-biig sẽn yaa rat-taoor soab n maan sɩlem sẽn na yɩl n deeg a ba wã naam. Rĩm sẽn yaa yãg-yãg soab n kɩɩs Wẽnnaam no-rɛɛs noy sẽn yaa vẽenese. Israɛll nin-kãensã b tãabã tara zʋg a yembr sẽn wõnd taaba: tɩtaam.

² Tɩtaamã yaa sũur zʋg sẽn yaa yell meng-meng sẽn yɛgd neba fãa. (Yɩɩl Sõamyã 19:14) Tɩta-ned tʋmdame tɩ sãag n zʋʋg sẽn segdã, n yaool n pa tar sor n segd n maan woto ye. Naoor wʋsgo, rẽ baasda ne yel-beedo. Sɩda, tɩtaam wãa rĩm dãmba, la a lub soolem toɛ-toɛya. (Zeremi 50:29, 31, 32; Daniɛll 5:20) A bẽda a Zeova sõgen dãmb kẽer menga, tɩ wa ne b wãabo.

3. Wãn-wãn la d tõe n zãms n bãng yɛl nins tɩtaam sẽn wat ne wã?

³ Biiblã bee bʋʋm a sẽn yet tɩ: “Tɩtaam sã n wa, yãnd n pʋgda. La sik-m-mens rãmba tara yam.” (Yelbũna 11:2) Biiblã kõta tõnd makr sẽn wilgd tɩ yel-bũn-kãngã sɩd togsda sɩda. D sã n vaees mak-kãensa b wãna, na n sõnga tõnd tɩ d bãng tɩ kogs sẽn zemsã zʋʋgr yaa yelle. Woto yĩnga, bɩ d ges wãn-wãn la sũ-kiirã, rat-taoorã la yãgbã kɩt tɩ roap a tãab nins yell d sẽn  gom sɩngrẽ wã tʋm ne tɩtaam, tɩ wa baas ne b paoogre.

A Koore yɩɩ tõat sẽn yaa sũ-ki-neda

4. a) A Koore ra yaa ãnda, la sãmbg sẽn ka be, yel-bʋs sẽn zĩnd pĩnd pʋsẽ la a kẽ-yã? b) A yaoolem yʋʋmã pʋsẽ, tʋʋm-bʋg kɩbar neb wʋsg sẽn wʋm la a Koore maan-yã?

⁴ A Koore yaa Levi ned sẽn yit Kehat buudã pʋgẽ. Yẽ ne a Moiiz la a Aarõ ra yaa yagen-taase. Wõnda a talla kɩs-sɩd ne a Zeova sẽn na maan yʋʋm pi-gĩna. A Koore paama zu-noog n zĩnd neb nins sẽn paam fãagr ne yel-solemd Mog-Miuugẽ wã, la wõnda a kẽesa a toog n pids a Zeova bʋ-kaoorã Israɛll neb nins sẽn balem nag-bilã Sinai Tãngẽ wã zutu. (Yikri 32:26) La a Koore baasame n lebg kɩɩsdb sull taoor soaba, n kɩɩs a Moiiz la a Aarõ. Kɩɩsdb kãens ra ya a Rubɛn buudã neb a Datãn la a Abiram, la a Õn, ne Israɛll nanambs 250. * Ad b sẽn yeel a Moiiz la a Aarõ: “Yãmb zẽkda y mens wʋsgo; tɩ bõe, Israɛll neba fãa gill yaa yɩlma, tɩ Zusoaba [a Zeova, NW ] be bãmb sʋka. Bõe tɩ y zẽkd y mens n yetẽ tɩ y yɩɩda Zusoaba nebã?”—Sõdbo 16:1-3.

5, 6. a) Bõe yĩng t’a Koore yik n kɩɩs a Moiiz ne a Aarõ? b) Bõe yĩng tɩ b tõe n yeel tɩ wõnda a Koore pa tall naneb ne a mengã zĩig Wẽnnaam seglsã pʋsẽ?

⁵ Bõe yĩng t’a Koore yɩ kɩs-sɩd soab yʋʋm wʋsg n yaool n wa tõdge? Yaa vẽeneg t’a Moiiz taoor-sobendã Israɛll zugã ra pa wẽgd nebã ye, bala a ra yaa “sik-m-meng soab wʋsgo n yɩɩd neba fãa sẽn be dũniyã zugã.” (Sõdbo 12:3) La, wõnda a Koore ra maanda sũ-kiir ne a Moiiz la a Aarõ n pa nong naam ning b sẽn tarã ye, la rẽ kɩtame t’a yeel tɩ pa zemse, tɩ b zẽka b mens ne rat-m-yembr tigingã zugu.—Yɩɩl Sõamyã 106:16.

⁶ Wõnda a Koore yellã me ya a sẽn da pa nand a mengã zu-nood Wẽnnaam seglsã pʋsẽ wã. Yaa sɩd tɩ Levi neb nins sẽn yaa Kehat rãmbã ra pa maan-kʋʋdb ye, la b ra yaa Wẽnnaam Tõogã karen-saam dãmba. B ra leb n tʋkda sɛk roogã teedo, tʋkr daab sã n wa beẽ. Woto ra pa tʋʋm yaalg ye, bala ra yaa neb sẽn yaa yɩlem tũudmã la vɩɩm-manesmã wɛɛngẽ wã bal n da tõe n dɩk te-sõmsã. (Ezai 52:11) Woto yĩnga, a Moiiz ne a Koore mo-yõsrã pʋgẽ, sɩda, a Moiiz ra sʋkdame: Yãmb geta tʋʋmd ning b sẽn kõ-yã wa bõn-kɩdg n dat maan-kʋʋrã tʋʋmd me n paas la? (Sõdbo 16:9, 10) A Koore pa ges tɩ sũ-no-kãseng sẽn yɩɩd fãa wã yaa sõgen a Zeova ne kɩs-sɩda, tɩ zems ne segls nins a sẽn dɩkã, lakae pa f sẽn na n paam yasr bɩ naam sẽn yaa zall ye.—Yɩɩl Sõamyã 84:11.

7. a) Manesem bʋg la a Moiiz tall ne a Koore la a poorẽ dãmbã? b) Wãn-wãn la a Koore tõdgrã baas ne yel-be-kãsengã?

⁷ A Moiiz boola a Koore ne a roapã, n yeel-b tɩ b tigim vẽk-n-beoog yibeoog sɛk zĩigã fu-roogẽ ne wisd yõogr laas la wisdu. B ra pa kõ a Koore ne a roapã sor tɩ b yõog wisd ye, b sẽn da pa maan-kʋʋdbã yĩnga. B sã n da wa ne wisd yõogr laas ne wisdu, rẽ ra rat n wilgame tɩ roap kãensã ket n tagsdame tɩ b ra tara sor n na n tʋm wa maan-kʋʋdba, baa ne b sẽn paam yʋng tõr n na n lebs n tags yellã zugã. B sẽn wa n wilg b mens vẽk-n-beoog yibeoogã, sɩd segdame t’a Zeova sũur yik ne-ba. Sã n yaa ne Rubɛn nebã, “tẽnga yaag[a] a noor n vel bãmb[a].” Bugum sẽn yit Wẽnnaam nengẽ n dɩ sẽn kell-bã, n paas a Koore. (Tõodo 11:6; Sõdbo 16:16-35; 26:10) A Koore tɩtaamã baasa ne paoogr kãsenga: Wẽnnaam zãgs-a lame!

Kɩɩs-y “sũ-kiir tʋlsem”

8. Wãn-wãn la “sũ-kiir tʋlsem” puk kiris-nebã sʋka?

⁸ A Koore kɩbarã yaa keoogr n kõ tõndo. Sẽn mik tɩ “sũ-kiir tʋlsem” bee ninsaalbã sẽn pa zems zãngã nengẽ wã, a tõe n puka kiris-neb tigingã pʋgẽ menga. (Zak 4:5, NW ) Wala makre, tõe tɩ d nonga taoor-sobendo. Wala a Koore, d tõe n maana sũ-kiir ne neb nins sẽn tar zu-nood nins tõnd sẽn datã. Bɩ d tõe n lebga wa yʋʋm kob-yendẽ kiris-ned ning yʋʋr sẽn boond t’a Diotrɛfã. A ra sãbgda tʋm-tʋmdbã zu-sobend hal wʋsgo, la vẽenega, ra ya a sẽn da rat taoorã yĩnga. Sɩda, a Zã gʋlsame t’a Diotrɛf “nong n yɩ[ɩ] . . . taoor soaba.”—3 Zã 9.

9. a) Manesem bʋg la d pa segd n tall tigingã pʋgẽ taoor-sobend wɛɛngẽ? b) Sã n yaa ne zĩig ning tõnd sẽn tar Wẽnnaam siglgã pʋgẽ wã wɛɛngẽ, tags-bʋg n zemse?

 ⁹ Yaa sɩd tɩ pa wẽng ne kiris-ned sẽn yaa rao t’a bao n paam taoor-sobend tigingã pʋgẽ ye. A Poll sagla woto menga. (1 Tɩmote 3:1) La d pa segd abada n ges tʋʋm zu-noodã wala tõogr bãnde, tɩ yaa wala b paoong kɩtdame tɩ d paam zẽkr n wa paam b sẽn boond tɩ naam zĩigã ye. Tẽeg-y t’a Zezi yeelame: “Ned ninga fãa sẽn dat n yɩ yãmb nin-kãsenga, bɩ a yɩ yãmb sõangda. La ned ninga fãa sẽn dat n yɩ yãmb kãsma bɩ yẽ yɩ yãmb yamba.” (Matɩe 20:26, 27) Vẽenega, ra na n yɩɩ wẽng tɩ d maan sũ-kiir ne neb nins sẽn tar taoor-sobend sẽn yaa kãsems n yɩɩd tõndã, tɩ yaa wala tõnd yõodã Wẽnnaam taoor bee ne d ‘sẽn be zĩig ning’ a siglgã pʋgẽ wã. A Zezi yeelame: “Yãmb fãa yaa ba-biisi.” (Matɩe 23:8) N-yẽe, d yaa koe-moond tɩ d yaa so-pakda, ned sẽn deeg lisg paalem bɩ ned sẽn tall a burkĩndlem hal sẽn kaoose, neb nins fãa sẽn sõgend a Zeova ne b sũurã fãa wã tara zĩig sẽn tar yõod a seglsã pʋsẽ. (Luk 10:27; 12:6, 7; Galat dãmba 3:28; Hebre dãmba 6:10) Sɩd yaa bark ne-d tɩ d tʋm zems-n-taar pʋgẽ ne neb milyõ rãmbã sẽn maood n na n tũ Biiblã saglsã: “Bɩ yãmb fãa sak taab ne sik-m-menga.”—1 Pɩɛɛr 5:5.

Rat-taoor soab a Absalom tũnuga ne yɛl n pids a meng raabo

10. A Absalom ra yaa ãnda, la wãn-wãn la a mak n na n paam neb nins sẽn da rebd rĩmã nengẽ bʋʋd yĩngã zoodo?

¹⁰ A Absalom sẽn yaa Rĩm a Davɩɩd biribl a tãab-n-soabã manesem kõta zãmsg rat-taoorã wɛɛngẽ. Zãmb soab kãngã baoo sor fãa n modg n na n paam neb nins sẽn wat rĩma nengẽ bʋʋd yĩngã zoodo. Pipi, a kɩtame tɩ b tags t’a Davɩɩd toor da kae ne b zu-loeesã ye. Rẽ poore, a pa le gomd n solgd a sẽn datã ye, a togsda a sẽn datã vẽenega. A Absalom yeela woto: “Yaa ãnd n na n kɩt tɩ m lebg bʋ-kaood tẽnga pʋgẽ tɩ sẽn tara yell fãa bɩ a wa tɩ m kao a bʋʋdo?” A Absalom zãmbã ra pa tar koak ye. Biiblã yetame: “Ned sã n kolg yẽ n na n wõgemde, yẽ gãta a soab n mok-a. A Absalom maana woto ne Israɛll neb nins fãa sẽn tar bʋʋd n dabd rĩma nengẽ wã.” Rẽ baasa ne bõe? “Yaa woto n kɩt tɩ Israɛll neba lebg n kẽ a Absalom.”—2 Sãmwɛll 15:1-6.

11. Wãn-wãn la a Absalom mak n na n deeg a Davɩɩd naamã ne pãngã?

¹¹ A Absalom ra ratame bal n deeg a ba wã naam ne pãnga. Yʋʋm a nu sẽn deng rẽ, a kɩtame tɩ b kʋ a Davɩɩd biribl kãsengã, a Amno, tɩ wõnd yaa sẽn na yɩl n dok a sũur ne a sẽn yõg yẽ a Absalom ma-bi-poak a Tamaarã. (2 Sãmwɛll 13:28, 29) La, baa ne rẽ, tõe t’a Absalom ra nee geerã, n get a Amno kũumã wala manesem sẽn zems sẽn na yɩl n sa ne na-baood-n-taaga. * Sẽn yaa to-to fãa, wakatã sẽn wa n ta wã, a Absalom tik n yikame. A kɩtame tɩ b moon a naamã tẽngã fãa pʋgẽ.—2 Sãmwɛll 15:10.

12. Wilg-y a Absalom tɩtaamã sẽn wa ne paoogr to-to.

¹² A Absalom tõoga wakat bilf pʋgẽ, bala “[zãmbã, NW ] paama pãng hal tɩ neb wʋsg kẽ a Absalom.” Wakat n zĩnd tɩ yɩ tɩlae ne Rĩm a Davɩɩd t’a zoe n bao a menga. (2 Sãmwɛll 15:12-17) La pa kaoos la a Absalom naama ta a tɛk ye. Rẽ yɩɩ sasa ning a Zoaab sẽn wa n kʋ-a n lob bok pʋgẽ, tɩ b lob kug n zam a zugã. Mams-y n gese, ra-kãngã sẽn yaa rat-taoor soabã sẽn da rat n yɩ rĩmã sẽn ki a pa paam mumb sẽn zems meng ye! * Tɩtaamã sɩd waa ne a Absalom paoogre.—2 Sãmwɛll 18:9-17.

Lak-y y mens ne rat-taoor ne rat-m-yembr yam

13. Wãn-wãn la tɩtaam yam tõe n bul kiris-ned sũur pʋgẽ?

¹³ A Absalom sẽn deeg naamã la a lʋɩɩsã sẽn pʋgl rẽ wã yaa zãmsg n kõ tõndo. Rũndã-rũndã dũniyã sẽn yaa kɛgrã pʋgẽ, neba nong n fʋʋsda  b taoor dãmbã, n makd n na n paam b lohorem, sẽn na yɩl tɩ b ges-ba, bɩ tõe tɩ yaa sẽn na yɩl n paam zu-noog buud bɩ naam. Sasa kãng pʋgẽ, nin-kãens tõeeme n gomd n zẽkd b mens b sẽn tar zu-sobend neb nins zutã taoore, n saagdẽ tɩ b na n paama b lohorem la b teelgo. D sã n pa gũusi, rat-taoor yam a woto tõe n bula tõnd sũurã pʋgẽ. Wõnda rẽ zĩnda yʋʋm kob-yendẽ neb kẽer sʋka, tɩ kɩt tɩ yɩ tɩlae ne tʋm-tʋmdbã tɩ b kõ keoogr sẽn tar pãng tɩ b gũus ne nin-kãensã buudu.—Galat dãmba 4:17; 3 Zã 9, 10.

14. Bõe yĩng tɩ d segd n lak d mens ne rat-taoor la rat-m-yembre?

¹⁴ A Zeova pa sakd zãmb rãmb nins sẽn gomd n wukd b mens n na n ‘bao b mens pẽgr wʋsgã’ a siglgã pʋgẽ ye. (Yelbũna 25:27) Sɩda, Biiblã keoogdame: “Bɩ Zusoaba wõrs no-bɩms nins fãa sẽn tar no-noom la zɛlma nins fãa sẽn gomd gom-bɛd[a].” (Yɩɩl Sõamyã 12:4) A Absalom ra yaa nonoom soaba. A goma ne nonoom ne neb nins zood a sẽn da ratã, rẽ fãa yaa sẽn na yɩl n paam zu-sobendã a sẽn baood wʋsgã. Sẽn yaa lebende, ad d sɩd paamda barka, d sã n be saam-biis sẽn tũud a Poll sagl-kãngã sʋka: “Da maan-y bũmb ba a yembr ne zabre walla wilg-m-meng ye, la bɩ ned kam fãa tẽ ne sik-m-meng yam tɩ neba fãa yɩɩda yẽnda.”—Filip rãmba 2:3.

Rĩm a Saull yɩɩ yãg-yãg soaba

15. Wãn-wãn la a Saull wilg wakat a yembr pʋgẽ t’a yaa sik-m-meng soaba?

¹⁵ Wakat n zĩnd t’a Saulli, sẽn wa n lebg rĩm kaoosg poorã, ra yaa sik-m-meng soaba. Wala makre, ges-y bũmb ning sẽn zĩnd a bi-bɩɩlmã wakatã. Wẽnnaam no-rɛɛs a Sãmwɛll sẽn wa n gom n pẽg a Saullã, a leoka ne sik-m-meng woto: “Mam yaa Bẽnzame buuda sẽn yaa bilfu n yɩɩd Israɛll buud a taabã. La d yaa talse. Yaa bõe tɩ y gomd woto ne maam?”—1 Sãmwɛll 9:21.

16. Wãn-wãn la a Saull wilg t’a yaa yãg-yãg soaba?

¹⁶ La kaoosg zugẽ, a Saull sik-m-mengã menemame. A sẽn da wa n be zabr zug ne Filisti nebã, a yii be n kẽng Gilgalle, be b yeel-a lame t’a gũ t’a Sãmwɛll wa kʋ maand n kos Wẽnnaam sõngre. A Sãmwɛll sẽn pa wa wakat ning b sẽn yãkã pʋgẽ wã, ne tɩtaam a Saull maana maoong sẽn yõogd bugmã a toore. A sẽn sa bal la a Sãmwɛll sẽn ta, n sʋk-a tɩ “yaa bõe la a maan-yã.” T’a Saull leoke: “Mam yãame tɩ neba basda maam n sãeegdẽ la yãmb me ka wa wakat ninga y sẽn da yeela ye.  . . . Yaa woto n kɩt tɩ m modg m meng n maan maoongo.”—1 Sãmwɛll 13:8-12.

17. a) D sã n ges pipi, bõe yĩng tɩ wõnd a Saull bee bʋʋm ne a sẽn maana? b) Bõe yĩng t’a Zeova leng a Saull a yãg-yãgã yĩnga?

¹⁷ D sã n na n ges pipi, tõe n wõnda a Saull bee bʋʋm. Lebr menga, Wẽnnaam nin-buiidã ra bee “toog pʋgẽ,” “b bɛɛba rig-b lame,” tɩ b ra rigda, saagr sẽn kayã yĩnga. (1 Sãmwɛll 13:6, 7) Sɩd-sɩda, pa wẽng tɩ d rɩk sardo, yɛlã sã n kõt sor ne rẽ ye. * La tẽeg-y t’a Zeova tõe n karma sũyã n yã bũmb nins sẽn tusd tõnd tɩ d tʋmdẽ wã. (1 Sãmwɛll 16:7) Woto yĩnga, tõe t’a yãa yɛl kẽer a Saull wɛɛngẽ b sẽn pa togs vẽeneg Biiblã pʋgẽ ye. Wala makre, a Zeova ra tõe n yãame t’a Saull yãgbã ra yaa wuk-m-meng yĩnga. Tõe t’a Saull sũurã yika wʋsgo, yẽ sẽn yaa Israɛll fãa rĩmã sẽn da segd n gũ ned a sẽn da get t’a yaa no-rɛɛs sẽn yaa nin-kẽem kʋdr bal sẽn viigd a goamã! Sẽn ya a soab fãa, a Saull tagsame t’a Sãmwɛll sẽn kaoosã kõt-a-la sor t’a maan yɛlã a toore, n pa tũ noy nins b sẽn da kõ-a tɩ yaa vẽenegã ye. A baasgã yɩɩ bõe? A Sãmwɛll pa pẽg a Saull sẽn dɩk a toorẽ sardã ye. Sẽn yaa lebende a lenga a Saull hal sõma n yeele: “Yãmb rĩunga ka na n yaas ye. . . . Tɩ bõe, yãmb ka sak Zusoaba [a Zeova, NW ] ye.” (1 Sãmwɛll 13:13, 14) Ka yɛsa, tɩtaamã waa ne paoogre.

Gũus-y y mens ne yãgbo

18, 19. a) Bilg-y yãg-yãgã sẽn tõe n kɩt t’a Zeova rũndã-rũndã sõgen tʋm ne tɩtaam to-to. b) Bõe la d segd n tẽeg kiris-neb tigingã sẽn marsd to-to wã wɛɛngẽ?

¹⁸ A Saull tɩta-tʋʋmdã gʋlsa Wẽnnaam Gomdã pʋgẽ tõnd nafr yĩnga. (1 Korẽnt dãmba 10:11) Yaa nana wʋsg ne tõnd tɩ d saam-biisã pa-zems zãng kãbg d sũuri. Wala a Saulli, d tõe n wa lebga nin-yãg-yãge, n tagsdẽ tɩ sẽn na yɩl n maan yɛlã tɩ zemse, segd n yaa tõnd mengã. D rɩk makr ne saam-biig sẽn na n tar tõod sõma-sõma yɛl kẽer siglg wɛɛngẽ. A maanda bũmb fãa tɩ zems a wakate, n tũud tigingã yɛl tɩ zems ne yaoolem noyã, n tar gom-minim la a tar zãmsg kũun tõogo. Wakat kãng pʋgẽ, a tagsdame tɩ neb a taabã pa tũud no-sõms nins yẽ sẽn tũudã, la b pa maand tɩ yaa sõma wa yẽ sẽn datã ye. Rẽ kõt-a-la sor t’a yɩ yãg-yãg soab bɩ? A segd n sãbga a saam-biisã, tõe t’a ya a sẽn na n tall manesem sẽn wilgd tɩ sã n da pa yẽ modgrã yĩnga, baa fʋɩ pa na n maane, la tɩ tigingã ra pa na n mars sõma bɩ? Woto yɩtẽ-la tɩtaam!

¹⁹ Sɩd-sɩda, yaa bõe n kɩt tɩ kiris-neb tigingã beẽ? Yaa d sẽn na n tõe taoor-sobend tʋʋm sõma bɩ? Yaa bãngr wʋsg bɩ? Yaa sɩd tɩ bõn-kãensã sõngdame tɩ tiging mars sõma. (1 Korẽnt dãmba 14:40, NW; Filip rãmba 3:16; 2 Pɩɛɛr 3:18) La a Zezi yeelame tɩ pipi bũmb sẽn na n kɩt tɩ b bãng a karen-biisã yaa b nonglmã yĩnga. (Zã 13:35) Yaa rẽ n so tɩ baa kẽem dãmb sẽn tar nonglem sẽn pa zũnd-zãnd rãmbã, b sakd n deegame tɩ tigingã pa ãnterpiriiz yell b sẽn get ne pa-vigsd ye. Sẽn yaa lebende, yaa piis b sẽn segd n ges b yell ne sũ-bʋgsem. (Ezai 32:1, 2; 40:11) Ned sã n maan a toog kae ne noy a woto ne tɩtaam, a nong n wata ne no-koɛɛma. Sẽn yaa lebende, Wẽnnaam sẽn sigl yɛlã to-to wã sakr wata ne laafɩ.—1 Korẽnt dãmba 14:33, NW; Galat dãmba 6:16.

20. Bõe la d na n ges sõsg ning sẽn pʋgdã pʋgẽ?

²⁰ Biiblã kɩbay nins sẽn tɩ loe ne a Koore, a Absalom la a Saullã wilgda vẽeneg tɩ tɩtaam wata ne paoogre, wala b sẽn togs Yelbũna 11:2 pʋgẽ wã. La Biiblã verse kãng paasdame: “La sik-m-mens rãmba tara yam.” Sik-m-meng yaa bõe? Mak-bʋs sẽn be Biiblã pʋgẽ n tõe n sõng tɩ d paam vẽnegr ne zʋg-kãngã, la wãn-wãn la d wilgd rũndã-rũndã tɩ d yaa sik-m-mens rãmba? B na n vaeesa sʋgs-kãensã sõsg ning sẽn pʋgdã pʋgẽ.

[Tẽngr not rãmbã]

Yãmb tẽrame bɩ?

• Tɩtaam yaa bõe?

• Wãn-wãn la sũ-kiir kɩt t’a Koore tʋm ne tɩtaam?

• Bõe la rat-taoor soab a Absalom kɩbarã zãmsd tõndo?

• Wãn-wãn la d tõe n lak d mens ne yãg-yãg yam ning a Saull sẽn tallã?

[Zãmsgã sogsgã]

[Foto, seb-neng 24]

A Saull lebga yãg-yãg soab n tʋm ne tɩtaam