Vʋʋgrã saagr tara pãnga

“Sɩda, mam geelgda bũmb fãa wa bõn-zaalse . . . tɩ mam tõe n bãng bãmba [a Zezi Kirist] la bãmb kũun vʋʋgr pãnga.”—FILIP RÃMBA 3:8-10.

1, 2. a) Yʋʋm sẽn looge, wãn-wãn la tũudum taoor soab bilg vʋʋgrã? b) Wãn-wãn la vʋʋgrã na n maane?

YƲƲM pi-gĩnd ning sẽn sɩng yʋʋmd 1890 wã sɩngrẽ kɩba-kɩtbã wilga tũudum sõsg sẽn pa wõnd a taab tũudum taoor soab sẽn kõ Burklin, sẽn be Niu Yorke, Etazĩni tẽngẽ wã. A yeelame tɩ vʋʋgrã yaa ninsaal yĩngã kõb la a nems b sẽn na n lebs n tigim n kõ vɩɩm, baa sã n mikame tɩ bugum n da rɩ-a bɩ a kii sãmpogr yĩnga, bɩ rũng n dɩ-a bɩ a lebga birga. Pastɛɛrã ra yetame tɩ daar sẽn tar lɛɛr 24 pʋgẽ, pemsmã na n sobga ne ninsaalb milyaar dãmbã sẽn ki wã nusi, kamse, nao, nus-biy, kõba, gĩina, la b yĩn-gãndo. Babs kãensã na n baooda b yĩnsã babs a taabã. Rẽ masã la sɩɩsã na n yi saasẽ bɩ bugum yir n wa kẽ yĩn-kãens sẽn vʋʋgã.

² Vʋʋgr sẽn tũud ne yĩngã pĩnd babs lebs n sigl yaa kɛgre, sẽn paase, ninsaalb pa tar sɩɩs sẽn pa kiid ye. (Koɛɛg Soaba 9:5, 10; Ezekɩɛll 18:4, NW ) Pa tɩlae ne a Zeova sẽn yaa vʋʋgr Wẽnnaamã, t’a lebs n tigim ninsaal yĩngã pipi babsã ye. A tõe n maana yĩn-paals n kõ sẽn vʋʋg-bã. A Zeova kõo a Biribl a Zezi Kirist tõog t’a vʋʋg kũum, tɩ b tõe n vɩɩmd wakat sẽn pa sate. (Zã 5:26) Woto, a Zezi yeelame: “Mam yaa vʋʋgre la vɩɩm. Ned ninga sẽn tẽed maam, baa yẽ sã n ki, a na paam vɩɩm.” (Zã 11:25, 26) Ad sɩd yaa kãabg sẽn noogd sũuri! A kõta tõnd pãng tɩ d tõog toog makrã pʋsẽ, la d yals kãn-kãe kũum taoor menga, n ya a Zeova Kaset rãmb sẽn tar kɩs-sɩda.

3. Bõe yĩng t’a Poll ra segd n gom n teel vʋʋgrã?

³ Vʋʋgrã pa zems ne zãmsg ning sẽn wilgd tɩ ninsaalbã tara sɩɩg sẽn pa kiidã ye. Zãms-kãngã yaa tagsg sẽn yit Gɛrɛs filozof a Platõ nengẽ. Woto, bõe n zĩndi, tʋm-tʋmd a Poll sẽn wa n kõ kasetã Gerɛs nin-bɛdã Areopaazẽ wã Atɛnã, n  gom a Zezi yellã, la a yeel tɩ Wẽnnaam vʋʋg-a lame wã? Kɩbarã yetame: “Bãmb sẽn wʋm kũum vʋʋgr koɛɛgã, kẽer yaala bãmba.” (Tʋʋma 17:29-34) Neb wʋsg sẽn da yã a Zezi Kirist sẽn vʋʋgã ra ket n vɩɩme, la baa ne yaalgã, b kõo kaset t’a ra vʋʋga kũ-rãmbã sʋka. La ziri karen-saam dãmb sẽn lagem ne Korẽnt tigingã kɩɩsame tɩ vʋʋgr kae ye. Woto yĩnga, a Poll goma ne raood sõma n teel vʋʋgrã sẽn yaa kiris-neb zãmsgã 1 Korẽnt dãmb sak 15 pʋgẽ. D sã n vaees a tagsa wã neere, d na n yãame tɩ sãmbg ka be tɩ vʋʋgrã saagr yaa waazib la a tara pãnga.

Kaset sẽn tar pãng sẽn wilgd t’a Zezi vʋʋgame

4. A Poll wilgame tɩ ãnd dãmb n maan kaset ne a Zezi vʋʋgrã?

⁴ Ges-y a Poll sẽn sɩng n kõt kaset sẽn teend a goamã to-to. (1 Korẽnt dãmba 15:1-7, 8, NW, 9-11) Sã n pa Korẽnt dãmbã lebga tẽedb zaalem yĩnga, b na n gãda fãagrã koe-noog sõma. Kirist kii tõnd yel-wẽnã yĩnga, tɩ b mum-a, tɩ b vʋʋg-a rẽ poore. Sɩda, a Zezi sẽn vʋʋgã, a puka a Sefas (a Pɩɛɛre), rẽ poore, a puka “piig la a yiibã.” (Zã 20:19-23) Tõe tɩ yaa neb sẽn zems karen-biis 500 n yã-a, a sẽn wa n kõ noor woto wã: ‘Bɩ y kẽng n maan karem-biisi.’ (Matɩe 28:19, 20) A Zak yã-a lame, n paas tʋmd-tʋmdb nins fãa sẽn tar kɩs-sɩdã. (Tʋʋma 1:6-11) Damas noore, a Zezi puka a Polle, “wa biig sẽn dog t’a wakat pa ta ye,” tɩ yaa wala a ra zoe n vʋʋgame n lebg nin-vɩɩg nif sẽn pa ne. (Tʋʋma 9:1-9) Korẽnt nebã lebga tẽedba, a Poll sẽn moon-b koe-noogã tɩ b sakã yĩnga.

5. A Poll tagsgã gãnegr da yaa bʋgo, wa b sẽn gʋls-a 1 Korẽnt dãmba 15:12-19 pʋgẽ wã?

⁵ Ges-y a Poll sẽn gãneg a tagsgã to-to ningã. (1 Korẽnt dãmba 15:12-19) Sẽn mik tɩ yaa neb sẽn maan kaset n moond tɩ Kirist ra vʋʋgame wã, wãn to la ned tõe n yeel tɩ vʋʋgr kae? A Zezi sã n da pa vʋʋg kũ-rãmbã sʋka, rẽnd tõnd moonegã la d tẽebã yaa zaalem, la d yaa zɩlem-be-rãmb sẽn kõt kaset n kɩɩsd Wẽnnaam n yetẽ t’a vʋʋga Kirist. Kũum sã n pa vʋʋge, ‘tõnd ket n bee d yel-wẽna pʋgẽ,’ la neb nins sẽn ki zems-n-taar pʋgẽ ne Kirista sãamame. Sẽn paase, “a sã n yaa tɩ tõnd tẽeda Kirist vɩɩm kãngã yĩng bala, tõnd tara toog n yɩɩd neba fãa.”

6. a) Bõe la a Poll yeel n wilg t’a Zezi vʋʋgame? b) “Yaoolem bɛyã” yaa bõe, la wãn-wãn la b na n sãam-a?

⁶ A Poll yetame t’a Zezi vʋʋgame. (1 Korẽnt dãmba 15:20-28) Sẽn mik tɩ Kirist yaa neb nins sẽn gãe kũum pʋgẽ “dẽenem biisã” yĩnga, neb a taab me segd n vʋʋgame. Wa rao a Ãdem kɩɩsgã sẽn wa ne kũumã, yaa ne rao a Zezi maasem la vʋʋgrã yɩta. Neb nins yẽ sẽn so wã ra segd n paama vʋʋgr a belmã sasa. Kirist “tõog[a] pãn-soaadba fãa la noyã fãa la pãens fãa” sẽn kɩɩsd Wẽnnaam naam sẽn-ka-to wã, la a rɩt naam n yaa Rĩm hal t’a Zeova ning bɛɛba fãa a nao tẽngre. Baa “yaoolem bɛyã” sẽn yaa kũumã d sẽn dog ne tɩ yit a Ãdem nengẽ wã na n sãamame, a Zezi maoongã maasem yĩnga. Rẽ poore, Kirist na n dɩka Rĩungã n lebs a Wẽnnaam la a Ba, n sak “sẽn kɩta tɩ bũmb fãa sak bãmbã, tɩ Wẽnnaam yɩ fãa ne fãa.”

B reega lisg kũum yĩng bɩ?

7. Ãnd dãmb n “deeg lisg kũum yĩnga,” la rẽ võor yaa bõe ne-ba?

⁷ Sẽn kɩɩsd-b vʋʋgrã sʋkdame: “Neb nins sẽn deegd lisg kũum yĩnga na n yɩɩ wãna?” (1 Korẽnt dãmba 15:29) A Poll ra pa rat n yeel tɩ sẽn vɩ-bã segd n deega lisg sẽn ki-bã yĩng ye, bala a Zezi karen-biisã yembr-yembr segd n zãmsame, n tẽ n yaool n deeg lisgu. (Matɩe 28:19, 20; Tʋʋma 2:41) Kiris-neb sẽn zaeyã “deegd[a] lisg kũum yĩnga,” b sẽn kẽesd b mens vɩɩm manesem pʋgẽ sẽn baasd ne kũum la vʋʋgrã. Lis-kãngã buudã sɩngdame, Wẽnnaam vʋʋsem sõngã sã n wa ning yĩngr vɩɩmã saagr b sũyẽ wã, la a satame, b sã n wa vʋʋg kũumã sʋk n lebg bõn-naands nif sẽn pa ne la sẽn pa kiid saasẽ.—Rom dãmba 6:3-5; 8:16, 17, NW; 1 Korẽnt dãmba 6:14.

8. Ne bõe la kiris-nebã tõe n kɩs sɩda, ba a Sʋɩtãan ne a tʋm-tʋmdbã sã n kʋ-ba?

⁸ Wa a Poll goamã sẽn wilgdã, vʋʋgrã saagr kɩtame tɩ kiris-nebã tõe n wa gẽneg b yõe sasa  fãa la b seg kũum daar fãa, b sẽn moond Rĩungã yĩnga. (1 Korẽnt dãmba 15:30, 31) B miime t’a Zeova tõe n vʋʋg-b lame, a sã n bas t’a Sʋɩtãan ne a tʋm-tʋmdbã kʋ-ba. Yaa Wẽnnaam bal n tõe n sãam b sɩɩsã bɩ b vɩɩmã Zeɛn pʋgẽ, sẽn makd sãoong sẽn pa satã.—Luk 12:5, NW.

D segdame n gũusi

9. Tõnd sã n dat tɩ vʋʋgrã saagr tall pãng sẽn sõngd tõnd d vɩɩmã pʋgẽ, bõe la d segd n lak d mens ne?

⁹ Vʋʋgrã saagr sõnga a Polle. A sẽn da wa n be Efɛɛzã, tõe t’a bɛɛbã lob-a-la we-rũmsã zakẽ t’a mao ne-ba. (1 Korẽnt dãmba 15:32) Sã n yɩɩ woto, a paama fãagr wa a Daniɛll sẽn da paam fãagr gɩgma wã sʋka. (Daniɛll 6:17-23; Hebre dãmba 11:32, 33) A sẽn tall saagr ne vʋʋgrã yĩnga, a Poll manesem pa yɩ wa Zida sɩdã kɩɩsdb a Ezai wakatẽ wã rẽnd ye. B yeelame: “D dɩ la d yũ, tɩ beoogo, tõnd na n kiimi.” (Ezai 22:13) Tõnd sã n dat tɩ vʋʋgrã tall pãng sẽn sõngd d vɩɩmã pʋgẽ wa sẽn yɩ to-to ne a Pollã, d segd n laka d mens ne neb nins sẽn tar yam-wẽng a woto wã. A Poll keooga woto: “Da belg-y y mens ye, tũud-n-ta-wẽns sãamda nin-sõamyã.” (1 Korẽnt dãmba 15:33) Sɩda, no-kãngã tɩ loee ne vɩɩmã nens toɛ-toɛya.

10. Wãn-wãn la d saagrã ne vʋʋgrã tõe n kell n tall pãnga?

¹⁰ A Poll yeela neb nins sẽn maand sãmb-sãmb ne vʋʋgrã woto: “Bɩ y nek wa sẽn zems tɩ yãmb maane, la y ra maan yel-wẽn ye. Tɩ bõe, kẽer ka mi Wẽnnaam ye, mam yeta woto n na n ning yãmb yãnde.” (1 Korẽnt dãmba 15:34) ‘Sɛɛba wakat’ kãngã, d segd n tʋmame tɩ zems ne Wẽnnaam la Kirista bãngr sẽn yaa takɩ. (Daniɛll 12:4; Zã 17:3) Rẽ na n kɩtame tɩ tõnd saagrã ne vʋʋgrã kell n tall pãnga.

B vʋʋgda ne yĩn-bʋgo?

11. Wãn-wãn la a Poll bilg kiris-neb nins sẽn zaeyã vʋʋgre?

¹¹ Rẽ poore, a Poll vaeesda sʋgsg kẽere. (1 Korẽnt dãmba 15:35-41) Tõe tɩ ned sʋk woto sẽn na yɩl n wa ne sãmb-sãmb vʋʋgrã zugu: “Kũum na n yɩɩ wã n vʋʋge? La ne yĩn-bʋg la a na n vʋʋge?” Wa a Poll sẽn wilgã, bõn-buud b sẽn bʋt tẽngã kiidame, n toeem n lebg bũmb sẽn yi. Woto me, ninsaal sẽn paam vʋʋsem sõng rogem segd n kiime. Wala bõn-bɩtg sẽn yit bõn-buudẽ n lebg yĩn-paalgã, woto me, kiris-neb nins sẽn zaeyã yĩns sẽn vʋʋgã yaa toor ne ninsaal yĩn-nemsã. Baa ne a vɩɩmã halhaal sẽn yaa yembr wa a sẽn da pa ki sasa wã, a vʋʋgdame n yaa bõn-naandg paalg ne yĩng nif sẽn pa ne sẽn tõe n vɩɩmd saasẽ. Wa sẽn zemse, neb nins sẽn vʋʋgd tẽng zugã na n vʋʋga ne ninsaalb yĩnsi.

12. Goam nins sẽn yaa “yĩngr yĩns” la “tẽng zug yĩnsã” võor yaa bõe?

¹² Wa a Poll sẽn yeelã, ninsaal yĩn-nemsã yaa toor ne rũmsa rẽnda. Rũmsã mens yĩn-nems yaa toɛ-toɛ ne taaba. (Sɩngre 1:20-25) Bõn-naands nif sẽn pa ne wã “yĩngr yĩns” ziir yaa toor ne “tẽng zug yĩnsã” sẽn yaa yĩn-nems rẽndã. Wĩntoogã, kiuugã la ãdsa me ziir yaa toor-toore. La sẽn zae-bã sẽn vʋʋgã ziir yaa kãseng n yɩɩd zĩig sẽn zãre.

13. Sã n yaa ne 1 Korẽnt dãmba 15:42-44 (NW ) bõe la b bʋta, la bõe la b vʋʋgda?

¹³ A Poll sẽn wilg tɩ b yaa toor ne taabã, a paasame: “Yaa woto ne kũum vʋʋgr me.” (1 Korẽnt dãmba 15:42, 43, 44, NW ) A yeelame: “B sã n mum-a, a yaa yĩng sẽn na n põoge, la a vʋʋgda ne yĩng sẽn ka põogda.” Ka wã, tõe t’a Poll gomda sẽn zae-bã yell wala sulli. B bʋd-a-la ne yĩng sẽn põogd kũum pʋgẽ, la a vʋʋgda ne yĩng sẽn pa põogde, sẽn ka yel-wẽna. Baa ne a sẽn paamd dũniyã paoogrã, a vʋʋgdame n paam yĩngr vɩɩm n puk ne Kirista, ziir pʋgẽ. (Tʋʋma 5:41; Kolos rãmba 3:4, NW ) Kũumẽ wã, b bʋt-a lame t’a yaa “yĩn-nemse,” t’a vʋʋg n yaa “yĩng nif sẽn pa ne.” Sẽn mik tɩ woto yaa bũmb sẽn tõe ne kiris-neb nins sẽn paam vʋʋsem sõng rogmã, d tõe n kɩsa sɩd tɩ ninsaalb a taabã tõe n vʋʋga tẽng zugu.

14. Wãn-wãn la a Poll mak Kirist ne a Ãdem n wilg tɩ b yaa lebend ne taaba?

¹⁴ Rẽ poore, a Poll maka Kirist ne a Ãdem n wilg tɩ b yaa lebend ne taaba. (1 Korẽnt dãmba 15:45-49, NW ) A Ãdem sẽn yaa pipi  ninsaalã, “lebga sɩ-vɩɩga.” (Sɩngre 2:7, NW ) “Yaoolem Ãdma” a Zezi, “lebga bõn-naandg nif sẽn pa ne sẽn kõt vɩɩm.” A kõ a vɩɩmã tɩ yɩ yao-n-dɛɛk maoongo, pipi ya a karen-biis nins sẽn zaeyã yĩnga. (Mark 10:45) B sẽn yaa ninsaalbã, b ‘tara ned ning b sẽn maan tɩ yɩ tẽng tomã wõnego,’ la b sã n vʋʋge, b lebgda wa yaoolem Ãdmã. Sɩda, a Zezi maoongã na n nafa ãdem-bi-sakdbã fãa, tɩ sẽn na n vʋʋg-b tẽng zugã be sʋka.—1 Zã 2:1, 2.

15. Bõe yĩng tɩ b pa vʋʋgd kiris-neb nins sẽn zaeyã nems pʋgẽ, la wãn-wãn la b vʋʋgd Kirist belmã wakate?

¹⁵ Kiris-neb nins sẽn zaeyã sã n ki, b pa vʋʋgd yĩn-nems pʋgẽ ye. (1 Korẽnt dãmba 15:50-53) Yĩn-nems ne zɩɩm sẽn põogd pa tõe n paam yĩng sẽn pa põogd la saasẽ Rĩungã ye. Neb kẽer sẽn zae pa na n ki n kaoos ye. B sã n baas b tẽng zug zoeesã kɩs-sɩd pʋgẽ a Zezi belmã wakate, b paamda “tedgre tao-tao bala nif kamsg pʋgẽ.” B paamda vʋʋgr zĩig pʋgẽ n yɩ bõn-naands nif sẽn pa ne la sẽn pa tõe n põoge, la sẽn tar ziiri. Sẽn na n baase, Kirist yĩngr “pʋg-paala” neb sõor na n yɩɩ bãmb 144 000.—Wilgri 14:1; 19:7-9; 21:9; 1 Tesalonik rãmba 4:15-17.

Tõogr kũumã zugu!

16. Sã n yaa ne a Poll la pipi no-rɛɛsdbã, bõe n na n paam kũumã tõnd sẽn dog ne tɩ yit yel-wẽn-maand a Ãdem nengẽ wã?

¹⁶ Ne sũ-noogo, a Poll togsame tɩ b na n tõog n vela kũum wakat sẽn pa sate. (1 Korẽnt dãmba 15:54-57) Sẽn põogd la sẽn kiidã sã n wa ye pa põogdẽ la a pa kiidẽ, gom-kãensã na n pidsame: “Bãmb na n sãama kũum wakat sẽn-ka-sɛta.” “Kũum, fo toog bee yɛ? Haya, kũum, fo tõogr bee yɛ?” (Ezai 25:8; Oze 13:14) Toog ning sẽn wat ne kũumã yaa yel-wẽndã, la yel-wẽndã pãng ra yaa Tõogã, sẽn ning yel-wẽn-maandbã taal tɩ b kiidẽ wã. La a Zezi maoongã la a vʋʋgrã yĩnga, kũum ning d sẽn dog ne tɩ yit yel-wẽn-maand a Ãdem nengẽ wã pa na n ye yɩ tõogd ye.—Rom dãmba 5:12; 6:23.

17. Wãn-wãn la 1 Korẽnt dãmba 15:58 goamã pidsd rũndã-rũndã?

¹⁷ A Poll yeelame: “Woto yĩnga, m ba-bi-nongdse, bɩ yãmb tall tẽeb kãn-kãe n da vigs ye, la wakat fãa bɩ y maan Zusoaba tʋʋmd wʋsgo, tɩ yãmb miimi tɩ yãmb sẽn tʋmd Zusoaba tʋʋmda ka na n yɩ zaalem ye.” (1 Korẽnt dãmba 15:58) Gom-kãensã pidsda kellã sẽn zae sẽn be rũndã-rũndã wã la a Zezi “piis a taab[a]” zutu, baa b sã n ki yaoolem day kãensã sasa. (Zã 10:16) B sẽn tʋmd n yaa Rĩungã moondbã pa zaalem yĩng ye, bala vʋʋgr n gũud-ba. Rẽnd d sẽn ya a Zeova sõgen dãmbã, bɩ d ket n tar tʋʋm wʋsg Soaalã tʋʋmdẽ, n gũud daar ning d sẽn na n tõog n kaas woto ne sũ-noogã: “Kũum, fo tõogr bee yɛ?”

Vʋʋgrã saagr pids-yã!

18. A Poll saagrã ne vʋʋgrã pãng ra taa hal zĩ-bʋgo?

¹⁸ A Poll goam nins sẽn be 1 Korẽnt dãmb sak 15 pʋgẽ wã wilgda vẽeneg tɩ vʋʋgrã saagr da tara pãng a vɩɩmã pʋgẽ. A ra kɩsa sɩd zãng t’a Zezi vʋʋga kũ-rãmbã sʋk la tɩ neb a taab me n da na n paam fãagr ne ãdem-biisã fãa yaoogo. Yãmb tẽeba tara pãng woto bɩ? A Poll ra geta yɛl nins sẽn nafd yẽ mengã balã “wala sagdo,” la ‘a basa bũmb fãa’ sẽn na yɩl n tõog n ‘bãng Kirist la a vʋʋgrã pãnga.’ Tʋm-tʋmdbã ra sak n na n kii wa Kirista, n da saagd n na n paam ‘vʋʋgr sẽn dengdã.’ B boond-a lame me tɩ “dẽenem kũum vʋʋgra,” la ya a Zezi karen-biis 144000 sẽn zaeyã n paamd-a. N-yẽe, b paamda vʋʋgr n yɩ bõn-naands nif sẽn pa ne saasẽ, tɩ “kũum  sẽn kella” na n vʋʋga tẽngã zugu.—Filip rãmba 3:8-11, NW; Wilgri 7:4; 20:5, 6.

19, 20. a) Nin-bʋs Biiblã sẽn gomd b yell la b na n wa ne vɩɩm pʋgẽ tẽng zugu? b) Ãnd dãmb vʋʋgr la y gũuda?

¹⁹ Vʋʋgrã saagr lebga yel-sɩd sẽn tar ziir n kõ sẽn zae-bã sẽn tall kɩs-sɩd n tãag b kũumã. (Rom dãmba 8:18; 1 Tesalonik rãmba 4:15-18; Wilgri 2:10) “To-kãsenga” põsdb na n yãa vʋʋgrã saagr pidsg tẽng zugu, ‘ko-kãseng sã n wa bas kũum fãa sẽn be a pʋgẽ tɩ b yi, tɩ kũum ne kɩɩm-kulg bas kũum sẽn be b pʋsẽ tɩ b yi.’ (Wilgri 7:9, 13, 14; 20:13) A Zoob sẽn nams a kamb a yopoe la a kompugli a tãabã kaalem yĩngã na n zĩnda neb nins b sẽn na n wa ne vɩɩm pʋgẽ tẽng zugã sʋka. Mams-y n ges sũ-noog ning a sẽn na n paame, a sã n wa reeg-ba! La ad bãmb me sũy na yɩ noog wʋsgo, tɩ b paam saam-biis a yopoe la saam-bi-pogs a tãab sẽn yaa neeb n paase!—Zoob 1:1, 2, 18, 19; 42:12-15.

²⁰ Ad sɩd na yɩ bark menga, a Abrahaam la a Saara, a Izaak la a Rebeka, n-ye, n paas neb wʋsg a taaba, tɩ “no-rɛɛsdba fãa” be sʋkã sã n wa vɩɩm pʋgẽ tẽng zugu! (Luk 13:28) No-rɛɛsdb kãensã a yembr ya a Daniɛlle, b sẽn kãab t’a na n paama vʋʋgr Mesi wã naam wakatã. Sẽn na maan yʋʋm 2 500 masã, a Daniɛll bee yaoogẽ n vʋʋsdẽ, la ne vʋʋgrã pãnga, ka la bilfu, a na n ‘yikame n deeg a pʋɩɩr’ n yɩ ned sẽn be ‘na-biis tẽngã gill zugã’ sʋka. (Daniɛll 12:13, NW; Yɩɩl Sõamyã 45:16, NW ) Ad sɩd na n yɩɩ bũmb sẽn na n sidg yĩng tɩ y reeg pĩnd kɩs-sɩd dãmbã yembo, la y meng ba, y ma, y biribla, y bipugl bɩ y nin-nongds a taab bɛ wã sẽn yaa kũumã sẽn da reegã!

21. Bõe yĩng tɩ d segd n maan neb a taabã neer n da bas tɩ kaoose?

²¹ Tõe tɩ yãmb zo-rãmb bɩ y nin-nongds kẽer sõgena Wẽnnaam yʋʋm pi-gĩn pʋsẽ n kʋʋle. Kʋʋlmã tõe n kɩtame tɩ yaa toog ne-b tɩ b mao ne vɩɩmã zu-loeese. Ad sɩd yaa nonglem tʋʋmd tɩ d kõ-b sõngr ning fãa d sẽn tõe n kõ-b masã tɛka! Rẽ, d pa na n maan m bãngẽ, d sã n pa tõog n pids zɩɩb kẽer bãmb wɛɛngẽ yɛl kẽer pʋsẽ, kũum sã n wa loog ne-b ye. (Koɛɛg Soaba 9:11; 12:1-7; 1 Tɩmote 5:3, 8) D tõe n kɩsa sɩd t’a Zeova pa na n yĩm bõn-sõma nins tõnd sẽn maand neb a taabã yĩngã ye, baa b yʋʋmã bɩ b sẽn be yɛl nins pʋsẽ wã sẽn yaa to-to ning fãa. A Poll gʋlsame: “Woto yĩnga, tõnd sã n paam weere, bɩ d maan neba fãa yel-sõmde, la neb nins sẽn yaa tõnd ba-biis a Zezi tẽeba yĩngã n yɩɩda.”—Galat dãmba 6:10; Hebre dãmba 6:10.

22. Hal tɩ vʋʋgrã saagr wa pidsi, bõe la d segd n dɩk sard sẽn pa vigsd n maane?

²² A Zeova yaa “Ba sẽn yaa ninbãan-zoeer Ba la belsg fãa Wẽnnaam.” (2 Korẽnt dãmba 1:3, 4) A Gomdã belsda tõnd la a sõngd tõnd tɩ d bels neb a taabã ne vʋʋgrã saagr sẽn tar pãngã. Hal tɩ d wa maan kaset ne saagrã pidsg ne kũum vʋʋgrã tẽng zugu, bɩ d yɩ wa a Poll sẽn da tar tẽeb ne vʋʋgrã. Sẽn yɩɩd fãa bɩ d rɩk a Zezi togs-n-taare. Saagr ning a sẽn da tar ne pãng ning Wẽnnaam sẽn tar n tõe n vʋʋg-a wã pidsdame. Neb nins sẽn be tẽegr yaadẽ wã na n wʋma Kirist koɛɛg ka la bilf n yi. Bɩ rẽ kõ-d belsg la sũ-noogo. La sẽn yɩɩd fãa, bɩ d tall mi-beoog ne a Zeova, sẽn maan tɩ b tõog kũumã, la ne tõnd Soaal a Zezi Kirist!

Yãmb leokdame tɩ bõe?

• A Poll wilgame tɩ ãnd dãmb n maan kaset ne a Zezi vʋʋgrã?

• “Yaoolem bɛyã” yaa bõe, la wãn-wãn la b na n sãam-a?

• Sã n yaa ne kiris-neb nins sẽn zaeyã, bõe la b bʋta, la bõe n yikdi?

• Nin-bʋs Biiblã sẽn gomd b yell la y nong n sege, b sã n wa wa vɩɩm pʋgẽ tẽng zugu?

[Zãmsgã sogsgã]

[Foto, seb-neng 16]

Tʋm-tʋmd a Poll goma ne raood sõma wʋsg n teel vʋʋgrã

[Foto, seb-neng 20]

A Zoobe, a zaka rãmb la neb wʋsg a taab vʋʋgr na n waa ne sũ-noog sẽn ka koaka!