Vʋʋgrã saagr yaa waaziba!
Vʋʋgrã saagr yaa waaziba!
“Mam tara saagr ne Wẽnnaam . . . tɩ . . . vʋʋgr na n zĩndame.”—TƲƲMA 24:15, NW.
1. Bõe yĩng tɩ d tõe n tall saagr ne vʋʋgrã?
A ZEOVA kõo tõnd bʋʋm sẽn tar pãng tɩ d na n tall saagr ne vʋʋgrã. A kãabame tɩ kũum na n vʋʋgame n yik yɛsa. La a raabã pidsg sẽn ki-b n gõeyã wɛɛngẽ pa tar sãmbg ye. (Ezai 55:11; Luk 18:27) Sɩda, Wẽnnaam zoe n wilga a pãng kũum vʋʋgrã wɛɛngẽ.
2. Wãn-wãn la vʋʋgrã saagr tõe n naf tõndo?
2 D sã n tar tẽeb ne segls nins Wẽnnaam sẽn dɩk n na n tũnug ne a Biribl a Zezi Kirist n vʋʋg kũumã, tõe n sõnga tõnd sũ-sãams wakate. Vʋʋgrã saagr sẽn yaa waazibã tõeeme me n sõng tõnd tɩ d tall burkĩndlem d yĩngr Ba wã taoore, hal n sak kũum dẽ yĩnga. Sɩda, d saagrã ne vʋʋgrã pãng na n paasame, d sã n ges kɩbay sẽn be Biiblã pʋgẽ sẽn wilgd neb b sẽn vʋʋge. Yaa ne pãng ning sẽn yit Naab la Soaal a Zeova nengẽ wã maasem la b pids yel-solem-kãensã fãa.
B leb n paama b neb sẽn vʋʋge
3. Bõe pãng la b kõ a Eli t’a maane, pʋg-kõor biribl sẽn wa n ki Sarepta wã?
3 Tʋm-tʋmd a Poll tẽega tẽeb ning a Zeova kaset rãmb sẽn deng kiris-nebã sẽn wilga ne yamleoogo, n gʋls woto: “Pagb kẽer leb n paama bãmb neba sẽn vʋʋg n bas kũum.” (Hebre dãmba 11:35; 12:1) Fenisi galʋ-tẽng sẽn boond tɩ Sarepta wã pʋg-kõor sẽn da yaa naong soabã ra bee pʋg-kãens sʋkã. A sẽn da maan Wẽnnaam no-rɛɛs a Eli sãandã yĩnga, a zomã la a kaamã kell n paa ne yel-solemd kom wakate, tɩ yẽ ne a biriblã yõor da na n tũẽ ne kom-kãngã. Biigã sẽn ki rẽ poorã, a Eli gãneg-a-la gãag zugu, n pʋʋse, n gãand n tẽeg a meng biriblã zug naoor a tãab n bõos woto: “Zeova, mam Wẽnnaam, m bõosdame tɩ f kɩt tɩ bi-kãngã sɩɩgã lebg n wa a pʋgẽ.” Wẽnnaam sɩd kɩtame tɩ biigã sɩɩg bɩ a vɩɩmã lebg n wa biigã pʋgẽ. (1 Rĩm dãmba 17:8-24, NW ) Mams-y n ges pʋg-kõor kãngã sũ-noogã. B keoa a tẽebã ne yẽ menga biribl-nongrã vʋʋgr sẽn yaa pipi b sẽn gʋlsã!
4. Yel-solem-bʋg la a Eliize maan Sunem?
4 Pag a to sẽn vɩɩmd Sunem galʋ-tẽngẽ wã n leb n paam a ned sẽn vʋʋge. A ra yaa nin-kẽem paga, n tall sõmblem ne no-rɛɛs a Eliize ne a tʋm-tʋmdã. A paama keoob n paam biribla. La yʋʋm a wãn poore, pagã boola no-rɛɛsã, t’a wa ta n mik tɩ biriblã kii n bee yẽ roogẽ wã. A Eliize sẽn pʋʋs la a maan yɛl kẽere, “bilf-bilfu, biigã yĩn-nems wɩngame” (NW ). A “tĩsa naoor a yopoe n puk a nini.” Sãmbg sẽn ka be, vʋʋg-kãngã nooga ma wã ne a biriblã sũy hal wʋsgo. (2 Rĩm dãmba 4:8-37; 8:1-6) La b sũ-noog na yɩɩg woto wʋsgo, b sã n wa vʋʋg tẽng zug n paam “vʋʋgre sẽn yaa neer n yɩɩda,” sẽn yaa vʋʋgr sẽn kõt-b sor tɩ b tõe n vɩɩmd n da tol n ye ki wã! Ad sɩd yaa bʋʋm n kõ-d tɩ d na n tall mi-beoog ne nonglem soab sẽn yaa vʋʋgr Wẽnnaam a Zeova wã!—Hebre dãmba 11:35.
5. Wãn-wãn la yel-solemd sẽn tɩ loe ne a Eliize zĩnd a kũumã poor menga?
5 Ba a Eliize kũumã la a mumbã poore, Wẽnnaam kɩtame t’a kõbã tall pãng ne a vʋʋsem sõngã. D karemda woto: “Ned n ki tɩ [Israɛll neb] kẽng n na n tɩ mum-a, la b yãa [Moaab] tãb-biisa sẽn wata. La b sẽn yã tãb-biisã, b rɩka kũuma n sagl a Eliize yaoogẽ. La rao wa [sẽn ki wã] sẽn sɩɩs a Eliize kõabã, a vʋʋgame n yik n yaas yĩngri.” (2 Rĩm dãmba 13:20, 21) Ad sɩd ra yaa bũmb sẽn ling ra-kãngã wʋsgo, la kõ-a sũ-noog wʋsgo! Mams-y n ges sũ-noog ning d sẽn na n paama, tõnd sẽn nong neb ninsã sẽn na n wa vɩɩm pʋgẽ wala sẽn zems ne Wẽnnaam a Zeova raabã sẽn pa vaandã!
Wẽnnaam Biriblã vʋʋga kũum
6. Yel-solem-bʋg la a Zezi maan Nayin galʋ-tẽngã noore, la wãn-wãn la yel-kãngã tõe n tall pãn-tusdg tõnd zutu?
6 Wẽnnaam Biribl a Zezi Kirist kõo tõnd bʋʋm sẽn tar pãng tɩ d na n tẽ tɩ kũum tõe n vʋʋgame, n paam vɩɩm sẽn pa sat saagre. Yell n zĩnd Nayin galʋ-tẽngã noore, n tõe n sõng tõnd tɩ d bãng tɩ yel-solemd a woto tõe n yɩɩ ne pãng ning Wẽnnaam sẽn kõtã. Vugri, a Zezi yãa neb sẽn yãbde, n tʋk bi-bɩɩg kũum n yit galʋ-tẽngẽ wã n na n tɩ mum. A ra yaa pʋg-kõor bi-yende. T’a Zezi yeel pʋg-kõorã: “Ra yãb ye.” Rẽ poore a tika pãndarã n yeele: “Bi-bɩɩga, mam yeta foom tɩ f yiki.” A sẽn yeel woto wã la biigã sẽn yik n gome. (Luk 7:11-15) Sɩd-sɩda, yel-solem kãngã kɩtdame tɩ tõnd kɩs sɩd n paas tɩ vʋʋgrã saagr yaa waaziba.
7. Bõe n zĩnd a Zairus bipuglã wɛɛngẽ?
7 Ges-y kɩbar a to sẽn tɩ loe ne a Zairus sẽn yaa Kapɛrnaum sinagoogã taoor soaba. A kosa a Zezi t’a wa sõng a yʋʋm 12 bipugl-nongr sẽn dat n ki wã. Pa kaoos la b wa togs tɩ bipuglã kiime ye. A Zezi yeela a Zairus sẽn be sũ-sãoong pʋgẽ wã t’a tall tẽebo, n yãag-a n kẽng a yirã, kʋʋngã sẽn da yãbdẽ wã. A Zezi sẽn yeel tɩ “biiga ka ki ye, a gõeeme” wã b laame. A sɩd ra kiime, la a Zezi ra rat n wilgame tɩ b ra tõe n vʋʋga neb wa b sẽn tõe n nek-b gõe-kãseng pʋgẽ wã. A Zezi gãda bipuglã nug n yeele: “Biiga, yiki.” T’a yik zĩig pʋgẽ, la “biiga ba ne a ma yɛɛsame,” n tall sũ-no-kãsenga. (Mark 5:35-43; Luk 8:49-56) Sãmbg sẽn ka be, zags neb na n “yɛɛsame,” b nin-nongds sẽn ki wã sã n wa vɩɩm pʋgẽ tẽng zug arzãnẽ.
8. Bõe la a Zezi maan a Lazaar yaoogẽ wã?
8 A Lazaar da kiime tɩ rasem a naase, a Zezi sẽn wa n pẽneg a yaoogã n kɩt tɩ b lak yaoogã noor kugrã. A Zezi pʋʋsa zãma wã taoor sẽn na yɩl tɩ b bãng t’a ra teega pãng ning Wẽnnaam sẽn kõtã, n yaool n zẽk a koɛɛg n yeele: “Lazaare, yi!” La a yiime! A nusã la a nao wã ra ket n vila ne mumbã pɛɛla, t’a nengã ra pil ne fuugu. “Bɩ y vilg pɛɛlã n bas-a t’a kẽnge,” woto la a Zezi yeel-yã. Neb wʋsg sẽn da wa be n na n bels a Lazaar tãop a Maari ne a Mart sẽn yã yel-solem-kãngã wã talla tẽeb ne a Zezi. (Zã 11:1-45) Kɩba-kãngã pa pit yãmb ne saagr tɩ neb nins y sẽn nongã tõe n waa vɩɩm pʋgẽ Wẽnnaam dũni paalgã pʋgẽ sɩda?
9. Bõe yĩng tɩ d tõe n kɩs sɩd t’a Zezi tõee masã n vʋʋg kũumã?
9 Lisd a Zã sẽn da wa n be bãens roogẽ wã, a Zezi tʋmame tɩ b tɩ taas-a koe-kãngã sẽn kengd raoodã: “Zoens yãtame, . . . kũum vʋʋgdame.” (Matɩe 11:4-6) A Zezi sẽn da be tẽng zugã sẽn vʋʋg kũumã yĩnga, a tõe n maana woto tɩ sãmbg ka be ye, a sẽn yaa bõn-naandg sẽn tar pãng nif sẽn pa ne sẽn paam Wẽnnaam pãngã. A Zezi yaa “vʋʋgre la vɩɩm,” la ad sɩd kõta belsg tɩ d bãng tɩ ka la bilfu, “b rãmb nins fãa sẽn be tẽegr yaad pʋsẽ wã na n wʋm[a] a koɛɛgã n yi”!—Zã 5:28, 29, NW; 11:25.
Vʋʋgr a taab sẽn paasd tõnd tẽebã pãnga
10. Wãn to la y na n bilgẽ pipi vʋʋgr tʋm-tʋmd sẽn maan tɩ b gʋlsã?
10 A Zezi sẽn tʋm a tʋm-tʋmdbã tɩ b yi n tɩ moon Rĩungã, a yeelame: ‘Vʋʋg-y kũum.’ (Matɩe 10:5-8) Yaa sɩd tɩ sẽn na yɩl n maan woto, b ra segd n teega Wẽnnaam pãngã. Zope, yʋʋmd 36 T.W., pag sẽn yaa wẽn-zoɛt a Dorkas (Tabita) maana kaalem. Fut a sẽn da wʋgd n kõt pʋg-kõp nins sẽn be ratem pʋgẽ wã ra bee a tʋʋm-sõma wã sʋka, tɩ pʋg-kãens yãb wʋsg a kũumã yĩnga. Karen-biisã segl-a-la mumbã yĩnga, n tʋm tɩ b tɩ bool tʋm-tʋmd a Pɩɛɛre, tõe tɩ yaa sẽn na yɩl t’a wa kõ belsgo. (Tʋʋma 9:32-38) A Pɩɛɛr yiisa neb nins fãa sẽn da be yĩngr doogẽ wã n pʋʋs n yeele: “Tabita, yiki!” A Tabita puka a nini, n yik n zĩndi, n gãd a Pɩɛɛr nugã, t’a Pɩɛɛr zẽk-a t’a yik n yalse. Pipi vʋʋgr kãngã tʋm-tʋmd sẽn maan tɩ b gʋlsã kɩtame tɩ neb wʋsg lebg tẽedba. (Tʋʋma 9:39-42) Rẽ kõta tõnd me bʋʋm n paas tɩ d na n tall saagr ne vʋʋgrã.
11. Yaoolem vʋʋgr sẽn be Biiblã pʋgẽ yaa bʋgo?
11 Yaoolem vʋʋgr b sẽn gʋls tɩ be Biiblã pʋgẽ zĩnda Troas. A Poll sẽn da wa n yals be a misioneer so-toak a tãab-n-soabã sasa wã, a kell n talla sõsg hal tɩ ta yʋʋn-sʋka. Tõe tɩ yaamsã la fɩtl dãmbã ne kʋʋngã sẽn lagem n wɩng tigisgã zĩigã yĩnga, bi-bɩɩg ning yʋʋr sẽn boond t’a Etiisã gũsame n yi etaaz a tãab-n-soab zĩigẽ fẽnetr n lʋɩ. B sẽn “dɩk yẽnda a yaa kũum bala,” a ra pa sobg bal ye. A Poll tɩ mobga a Etiis, n yeel nebã: “Bɩ yãmb da yɛɛs ye, a vɩɩme [a sɩɩgã bee a pʋgẽ, NW ].” A Poll ra rat n yeelame tɩ bi-bɩɩgã ra leb n paama vɩɩm. Neb nins sẽn da be be wã paama “belsg kãseng[a].” (Tʋʋma 20:7-12) Rũndã-rũndã, Wẽnnaam sõgen dãmbã paamda belsg kãsenga, b sẽn mi tɩ bãmb pĩnd lagem-n-taasã Wẽnnaam tʋʋmdẽ wã na n yãa vʋʋgrã saagr pidsgã.
Vʋʋgrã yaa saagr b sẽn tall hal sẽn kaoose
12. Tẽeb sẽn tar pãng bʋg la a Poll tall a sẽn da wa n be Rom guvɛrneer a Feligs taoorã?
12 A Poll sẽn da wa n be bʋʋd zĩigẽ Rom guvɛrneer a Feligs taoore, a kõo kaset woto: “[M] tẽed[a] bũmb nins fãa sẽn gʋls tõoga pʋgẽ la Wẽnnaam no-rɛɛsdba sɛba pʋsẽ wã. La mam tara saagr ne Wẽnnaam, . . . tɩ nin-tɩrsã la sẽn pa-b nin-tɩrsã me vʋʋgr na n zĩndame.” (Tʋʋma 24:14, 15, NW ) Wãn-wãn la Wẽnnaam Gomdã babs wala “tõoga” gomd kũumã vʋʋgr yelle?
13. Bõe yĩng tɩ b tõe n yeel tɩ Wẽnnaam da gomda vʋʋgrã yelle, a sẽn wa n togs pipi bãngr-gomdã?
13 Wẽnnaam mengã goma vʋʋgr yell a sẽn da wa n togs pipi bãngr-gomdã Edɛnã. A sẽn da wa n kaood ‘wag-kʋdr’ a Sʋɩtãan Munaafɩɩk bʋʋdã, Wẽnnaam yeelame: “Mam na n ninga beem foo ne paga sʋka, la fo yagenga ne yẽ yageng sʋka. Yẽ yageng na n pogla fo zugu, la fo na n pogla yẽ nao-kãsengkãare.” (Wilgri 12:9; Sɩngre 3:14, 15) Pagã nao-kãsengkãar poglg ya a Zezi Kirist kʋʋbã. Yageng kãng sẽn da segd n pogl waafa zug rẽ poorã yĩnga, ra yaa tɩlae tɩ b vʋʋg Kirist kũ-rãmbã sʋka.
14. Maana wãn t’a Zeova ‘ka kũum Wẽnnaam, la a yaa nin-vɩɩs Wẽnnaam’?
14 A Zezi togsame: “A Moiiz ra wilga tuuga zĩigẽ tɩ kũum vʋʋgdame, n bool Zusoaba t’a Abrahaam ne a Izaak la a Zakoob Wẽnnaam. La Wẽnnaam ka kũum Wẽnnaam ye, bãmb yaa nin-vɩɩs Wẽnnaam, tɩ bõe, fãa vɩɩ bãmb yĩnga.” (Luk 20:27, 37, 38; Yikri 3:6) A Abrahaam, a Izaak la a Zakoob kiime, la Wẽnnaam daabã sẽn yaa wa vʋʋg-bã pidsg ra yaa waazib hal tɩ sã n yaa ne yẽ bɩ b ra yaa wa nin-vɩɩse.
15. Bõe yĩng t’a Abrahaam da be bʋʋm n na n tẽ vʋʋgrã?
15 A Abrahaam da bee bʋʋm n na n tall saagr ne vʋʋgrã, bala yẽ ne a pag a Saara ra kʋʋla wʋsgo, tɩ b ra ki, sã n yaa ne b rogem tõogã wɛɛngẽ, tɩ Wẽnnaam lebs n lugl b rogem tõogã ne yel-solemde. Woto ra wõnda vʋʋgre. (Sɩngre 18:9-11; 21:1-3; Hebre dãmba 11:11, 12) B biribl a Izaak sẽn da tar sẽn zems yʋʋm 25, Wẽnnaam yeela a Abrahaam t’a rɩk-a n maan maoongo. La a Abrahaam sẽn da be a Izaak kʋʋb zug bal la a Zeova malɛk gãd a nugã. A Abrahaam da “tẽeme tɩ Wẽnnaam tara pãng tɩ vʋʋg kũum; woto me yẽ sẽn leb n deeg a biigã, wẽnda wa kũum vʋʋgre.”—Hebre dãmba 11:17-19; Sɩngre 22:1-18.
16. Masã a Abrahaam kiime n gõe, n gũud bõe?
16 A Abrahaam da tara saagr tɩ vʋʋgr na n zĩnda Mesi wã sẽn yaa Yagengã b sẽn kãabã naam sasa. Sẽn deng t’a yɩ ninsaala, Wẽnnaam Biriblã yãame t’a Abrahaam tara tẽebo. Woto yĩnga, a sẽn da yaa ninsaal a Zezi Kirista, a yeela Zʋɩf rãmbã: “A Abrahaam da kɩdmame ne sũ-noogo n dat n yã mam daarã.” (Zã 8:56-58; Yelbũna 8:30, 31) Masã a Abrahaam gõee kũum pʋgẽ, n gũud vʋʋgr n na n paam vɩɩm tẽng zug Wẽnnaam Mesi Rĩungã naam dɩɩb sasa.—Hebre dãmba 11:8-10, 13.
Kaset sẽn yit Tõogã la Yɩɩl Sõamyã pʋsẽ
17. Wãn-wãn la “bũmb nins sẽn gʋls tõoga pʋgẽ” wã gomd a Zezi Kirist vʋʋgrã yelle?
17 A Poll sẽn da tar saagr ne vʋʋgrã ra zemsa ne “bũmb nins sẽn gʋls tõoga pʋgẽ” wã. Wẽnnaam yeela Israɛll nebã: “Bɩ y tall dẽenem ka-kilã n wa maan-kʋʋdba nengẽ, tɩ yẽ yuum ka-kila [Nizã rasem 16] Zusoaba taoore tɩ bãmb deeg yãmba.” (Maankʋʋre 23:9-14) Tõe tɩ yaa tõog kãng n da be a Poll yamẽ a sẽn wa n gʋls tɩ: “Kirist vʋʋgame, bãmb yaa kũum vʋʋgr dẽenem soaba [biisã, NW ].” A sẽn yaa “dẽenem biisã,” a Zezi vʋʋga Nizã rasem 16, yʋʋmd 33 T.W. Kaoosg poore, a belmã sasa, ‘biis sẽn pʋgl dẽ’ vʋʋgr n da na n zĩndi, sẽn ya a karen-biis sẽn zae ne vʋʋsem sõngã.—1 Korẽnt dãmba 15:20-23; 2 Korẽnt dãmba 1:21, NW; 1 Zã 2:20, 27, NW.
18. Wãn-wãn la a Pɩɛɛr wilg tɩ b ra reng n togsa a Zezi vʋʋgrã Yɩɩl Sõamyã pʋgẽ?
18 Yɩɩl Sõamyã me goam teenda vʋʋgrã. Yʋʋmd 33 T.W. Pãntekotã raare, tʋm-tʋmd a Pɩɛɛr lebs n dɩka Yɩɩl Sõamyã 16:8-11 goamã n yeele: “A Davɩɩd da goma [Kirist] yell n yeele: Mam yãta Zusoaba m taoor daar fãa, tɩ bõe, bãmb bee mam dɩtgo tɩ mam da vigs ye. Woto, mam sũur yaa noogo, la mam zelemd kɩdemdame, la woto me, mam yĩnga na n gãanda ne tẽebo. Tɩ bõe, yãmb ka na n bas mam sɩɩga kɩɩm-kulg pʋgẽ ye. La yãmb kõn bas yãmb sõng Soaba tɩ põog ye.” A Pɩɛɛr paasame: “A Davɩɩd sẽn yã tɩ bõn-kãng be taoorã, bãmb togsa Kirist kũum vʋʋgr yelle n yeel tɩ b ka na n pa kɩɩm-kulg ye, la b yĩnga ka na n põog ye. Ya a Zezi kãng la Wẽnnaam vʋʋg-yã.”—Tʋʋma 2:25-32.
19, 20. Wakat bʋg la a Pɩɛɛr lebs n dɩk Yɩɩl Sõamyã 118:22 goamã, la wãn-wãn la rẽ tɩ loe ne a Zezi kũumã la a vʋʋgrã?
19 Rasem a wãn poore, a Pɩɛɛr yalsa Sãnedrẽ wã n lebs n togs Yɩɩl Sõamyã goama. B sẽn sʋk-a a sẽn maan to-to n sãoog bõos sẽn yaa koamsa, tʋm-tʋmdã leokdame: “Woto yĩnga, bɩ yãmb fãa bãnge, la bɩ Israɛll neba fãa bãng tɩ yaa ne Nazarɛt dao a Zezi Kirist yʋʋre, yãmb sẽn ka a soab kũum dapɩka zugã la Wẽnnaam sẽn vʋʋg-bã, yaa bãmb maasem yĩng la rao kãngã paam a menga n yas yãmb taoor ka. A Zezi yaa: Kugr ninga yãmb sẽn yaa tãn-metba sẽn da zãgse, la kug-kãng lebga rooga pãng kugri. Fãagr ka be ne ned a to ye; tɩ bõe, yʋʋr a to ka be dũniyã zugu sẽn kõ neba tɩ tõnd tõe n paam fãagr ne-a ye.”—Tʋʋma 4:10-12.
20 Ka wã, a Pɩɛɛr da lebg n dɩkda Yɩɩl Sõamyã 118:22 goamã, n wilgdẽ t’a tɩ loee ne a Zezi kũumã la a vʋʋgrã. Tũudmã nanambs tusa Zʋɩf rãmbã tɩ b zãgs a Zezi. (Zã 19:14-18; Tʋʋma 3:14, 15) ‘Tãn-metbã sẽn zãgs kugrã’ baasa ne Kirist kũum, la ‘kug-kãng sẽn lebg rooga pãng kugrã’ rat n yeelame tɩ b vʋʋg-a lame t’a yaa bõn-naandg nif sẽn pa ne sẽn paam ziir saasẽ. Wala yɩɩl-gʋlsdã sẽn deng n togsã, “yõ wã yii Zusoaba [a Zeova, NW ] nengẽ.” (Yɩɩl Sõamyã 118:23) B sẽn maan tɩ ‘kugrã’ yɩ roogã Pãng kugra wilgame tɩ b zẽk-a lame t’a yaa Rĩm b sẽn yãke.—Efɛɛz rãmba 1:19, 20.
Vʋʋgrã saagr teel-b lame
21, 22. Saagr bʋg la a Zoob tall-yã, wa sẽn gʋls Zoob 14:13-15 pʋgẽ wã, la wãn-wãn la rẽ tõe n bels sũy sẽn sãam-b b ned kaalem yĩngã rũndã-rũndã?
21 Baa tõnd mengã sẽn zɩ n yã ned sẽn vʋʋg kũ-rãmbã sʋkã, d tara Gʋlsg Sõamyã kɩbay kẽer sẽn be bas-m-yam sẽn sɩd wilgd tõnd tɩ vʋʋgrã yaa sɩda. Woto yĩnga, d tõeeme n tall saagr ning nin-tɩrg a Zoob sẽn tallã. A sẽn da wa n namsdẽ a pʋʋsa woto: “Mam datame tɩ y [a Zeova] solg maam kɩɩm-kulg pʋgẽ [Seol, NW ] hal tɩ y sũura sigi. La y yãk wakat n kõ maam t’a sã n wa ta bɩ y tẽeg m yelle. Ned sã n ki, a tõe n le vʋʋgame bɩ? . . . La yãmb sã n bool maam, mam na n sakame. La y na n nonga maam tɩ m yaa y nug-tʋʋmde.” (Zoob 14:13-15) Wẽnnaam ‘na n nonga a nug-tʋʋmdã,’ n tʋll wʋsg n vʋʋg a Zoobe. Ad woto sɩd kõta tõnd saagr menga!
22 Wẽn-zoɛtb zak ned a yembr tõe n lʋɩɩ bã-kɛgeng wa a Zoobe, n wa kong pãng meng kũum sẽn yaa bɛ wã taoore. Ned ning sũur sẽn sãam kũumã yĩngã tõe n daaga sũ-sãoong nintãm, wala a Zezi sẽn yãb a Lazaar kũumẽ wã. (Zã 11:35) La a sɩd kõta belsg tɩ d bãng tɩ Wẽnnaam na n boolame, tɩ neb nins sẽn be a pʋ-tẽerẽ wã sake! Na n yɩɩ wa b yii so-toak n lebgdẽ, pa ne bãag bɩ ne komslem ye, la yaa ne yĩns keelem.
23. Wãn-wãn la neb kẽer wilg b bas-yard ne vʋʋgrã saagre?
23 Kiris-ned sẽn kʋʋl kũum tusa a tẽed-n-taas tɩ b gʋls a biigã woto: “Ne f zaamẽ toogo, f ma wã kaalem yĩnga. Keta wakat bilf bal tɩ d le reeg-a neerem la yĩns keelem pʋgẽ!” Roagdb biig sẽn maan kaalem yeelame: “Ad d sɩd gẽegda daar ning a Jason sẽn na n nekã! A na n gesa goabg la rɩtg n mik tɩ yaa Arzãn ning a sẽn da gũud sõma-sõma wã. . . . Ad woto sɩd kõta tõnd neb nins sẽn da nong-a wã pãn-tusdg tɩ tõnd me tʋll n zĩnd be.” N-yẽe, la ad d sɩd tõe n talla mi-beoog wʋsgo, vʋʋgrã saagr sẽn yaa waazibã yĩnga!
Bõe la y leokda?
• Wãn-wãn la tẽeb ne segls nins Wẽnnaam sẽn dɩk kũum vʋʋgrã yĩngã nafd tõndo?
• Yel-bʋs sẽn gʋls Gʋlsg Sõamyã pʋgẽ n kõt tõnd bʋʋm tɩ d tall saagr ne vʋʋgrã?
• Bõe yĩng tɩ b tõe n yeel tɩ vʋʋgrã yaa saagr b sẽn da tar hal sẽn kaoose?
• Saagr bʋg sẽn kengd tẽeb la d tar sẽn ki-bã wɛɛngẽ?
[Zãmsgã sogsgã]
[Foto, seb-neng 10]
Ne pãng ning sẽn yit a Zeova nengẽ wã, a Eli lebs n kõo pʋg-kõor biribl vɩɩm
[Foto, seb-neng 12]
A Zezi sẽn wa n vʋʋg a Zairus bipuglã, a roagdbã yɛɛsame n tar sũ-no-kãsenga
[Foto, seb-neng 15]
Yʋʋmd 33 T.W. Pãntekotã daare, tʋm-tʋmd a Pɩɛɛr kõo kaset ne raood t’a Zezi ra vʋʋga kũ-rãmbã sʋka