Tall-y Kirist tagsgã manesem buudu

“Bɩ Wẽnnaam ning sẽn kõt tõog-toog la belsgã kɩt tɩ yãmb sʋkã bɩ y tall tagsg manesem buud ning Kirist Zezi sẽn da tallã.”—ROM DÃMBA 15:5, NW.

1. Wãn-wãn la ned manesem tõe n toeem a vɩɩmã?

MANESMÃ tõe n toeema yɛl wʋsg vɩɩmã pʋgẽ. Toog kae bɩ yẽesem manesem, manesem sõng bɩ wẽnga, zabr manesem bɩ lagem-n-tʋm manesem, yẽgeng bɩ mi-beoog manesem tõe n talla pãn-tusdg kãseng ned zugu, a sẽn maand to-to yɛlã taoor la neb a taabã sẽn na n tall manesem ning ne-a wã taoore. Ne manesem sõngo, ned tõe n talla sũ-noogo, baa yel-tood pʋsẽ. Ned ning sẽn tar manesem wẽng getame tɩ baa fɩ pa zems ye, baa vɩɩmã sã n sɩd yaa sõma.

2. Wãn-wãn la ned zãmsd manesem toɛ-toɛ tallgo?

² Manesem sẽn yaa sõma bɩ wẽng yaa bũmb b sẽn segd n zãmse. Sɩda b zãmsd-b lame. A Collier’s Encyclopedia yeta woto bipɛɛlg wɛɛngẽ: “A sẽn wat n baas n tall manesem ninsã a segd n wa paam-b lame, bɩ a zãms-ba, wala a sẽn segd n paam n bãng bɩ a zãms goama bɩ bũmb a to fãa wã.” Yaa wãn-wãn la d zãmsd manesem? Baa yɛl wʋsg sẽn sõngd n wat ne manesem ning ned sẽn tarã, f sẽn vɩ zĩig ningã la f tũud-n-taarã tara pãng wʋsg rẽ wɛɛngẽ. Ãnsikolopedi ning b sẽn sõdg tɩ loogã yetame: “D zãmsdame bɩ d ningda neb nins d sẽn tũud wʋsgã manesem d yamẽ, wala kʋɩdg sẽn fõogd koom.” Yʋʋm tusa sẽn looge, Biiblã yeela bũmb sẽn wõnd woto: “Ned sã n tũud yam dãmba, a na n lebga yam soaba. La ned sã n tũud yalma, a na n paama toogo.”—Yelbũna 13:20; 1 Korẽnt dãmba 15:33.

Makr ne manesem ning sẽn zemsã

3. Ãnd n kõ mak-sõng a manesmã pʋgẽ, la wãn-wãn la d tõe n dɩk a togs-n-taare?

³ Wala zĩis a taaba fãa, a Zezi Kirist kõo mak-sõng sẽn yɩɩdã manesmã wɛɛngẽ me. A yeelame: “Mam kõo yãmb mamsg tɩ y maan wa mam me sẽn maan yãmbã.” (Zã 13:15) Sẽn na yɩl n yɩ wa a Zezi d segd n deng n zãms n bãng-a lame. * Tõnd zãmsda a Zezi vɩɩmã n dat n maan wa tʋm-tʋmd a Pɩɛɛr sẽn saglã: “Yaa bõn-kãng yĩng la b bool yãmba, tɩ bõe, Kirist me namsa yãmb yĩnga n bas mamsg ne yãmb tɩ y tũ bãmb nao wã [neere, NW ].” (1 Pɩɛɛr 2:21) Tõnd bõn-datl yaa wõneg a Zezi wa d sẽn tõe tɛka. Rẽ baoodame me tɩ d tall a tagsgã manesem.

4, 5. A Zezi tagsg manesmã buud nen-bʋg la b wilg vẽeneg Rom dãmba 15:1-3 pʋgẽ, la wãn-wãn la kiris-nebã tõe n dɩk a togs-n-taare?

⁴ Paam Kirist tagsgã manesem buud baooda bõe maanego? A Poll lɛtr ning a sẽn taas Rom dãmbã sak 15 wã sõngda tõnd tɩ d leok sʋk-kãngã. Sag-kãng pipi verse rãmbã pʋsẽ a Poll gomda a Zezi zʋg-kãseng yelle, a sẽn wa n yeel tɩ: “A zemsame tɩ tõnd sẽn tar pãnga zɩ neb nins sẽn ka-pãnga zɩɩbo, la ka tɩ maan sẽn noom tõnd mens ye. Bɩ tõnd ned kam fãa maan sẽn noom a yaka, sẽn na yɩ sõma ne-a la a bɩɩb yĩnga. Tɩ bõe, Kirist ka maan sẽn noom  bãmb meng ye. La a wa sẽn gʋlsã: ‘Neb nins sẽn tʋʋs yãmb tʋʋsg lʋɩɩ mam zugu.’ ”—Rom dãmba 15:1-3.

⁵ B sagenda kiris-nebã sẽn dɩkd togs-n-taar ne a Zezi manesmã tɩ b sak n pids neb a taabã ratem ne sik-m-menga, la b ra bao n ta b mens yam bal ye. Sɩda, tʋlsem ne sik-m-meng a woto n na n sõgen neb a taabã yaa neb nins “sẽn tar pãngã” yel-zẽngdga. A Zezi sẽn tall pãng tẽebã wɛɛngẽ n yɩɩg ninsaal a to buud fãa wã yeela woto a mengã wɛɛngẽ: “Yaa woto yĩng la Ninsaal Biiga wa-yã. Bãmb ka wa tɩ neb sõng bãmb ye, b waame n na n sõng nebã, la kõ b vɩɩm tɩ yao neb wʋsg yĩnga.” (Matɩe 20:28) D sẽn yaa kiris-nebã, tõnd me rat n bao n sõgena neb a taabã, tɩ neb nins “sẽn pa tar pãngã” be sʋka.

6. Wãn-wãn la d tõe n dɩk a Zezi manesmã togs-n-taar kɩɩsg la sãbgr taoore?

⁶ Zʋg-sõng a to a Zezi sẽn puk yaa tagsg la tʋʋm manesem buud sẽn yaa sõma wakat buud fãa. A zɩ n bas neb a taabã manesem sẽn pa sõma wã tɩ sãam a manesem sõngã sẽn tɩ loe ne Wẽnnaam sõgenegã ye. Tõnd me pa segd n bas tɩ neb sãam d manesmã ye. B sã n da sãbgd-a bɩ n namsd-a a sẽn balemd Wẽnnaam ne kɩs-sɩdã yĩnga, a Zezi ra tõogda toog ne maag-m-meng n pa yẽgemdẽ ye. A ra miime tɩ neb nins sẽn baood n na n noog b taab sũy “ne bũmb sẽn yaa sõma la a met tẽebã” segd n gũu kɩɩsg sẽn yit dũniyã sẽn pa tẽed la sẽn pa wʋmdã nengẽ.

7. Wãn-wãn la a Zezi wilg maag-m-menga, la bõe yĩng tɩ d segd n maan wa yẽ?

⁷ A Zezi talla manesem sẽn zems yɛl a taab pʋsẽ. A zɩ n tall yãgb ne a Zeova ye. Sẽn yaa lebende, a gũu A raabã pidsg ne maag-m-menga. (Yɩɩl Sõamyã 110:1, NW; Matɩe 24:36; Tʋʋma 2:32-36; Hebre dãmba 10:12, 13) Sẽn paase, a Zezi pa lebg yãg-yãg soab ne a karen-biisã ye. A yeel-b lame: “Zãms[-y] bũmb nins mam sẽn na n wilg yãmbã.” A sẽn da yaa “sũ-mar soaba” yĩnga, a zãmsgã ra kengda tẽebo.  La a sẽn da yaa “nin-nana” wã yĩnga, a ra zɩ n wuk a meng bɩ n tall tɩtaam ye. (Matɩe 11:29) A Poll raoonda tõnd tɩ d rɩk togs-n-taar ne a Zezi manesmã nen-kãensã, a sẽn wa n yeel tɩ: “Tall-y tagsg manesem kãng Kirist Zezi me sẽn da tarã, baa t’a sẽn tall Wẽnnaam wẽnegã, a pa tags n na n deeg a zĩig ye, sẽn dat n yeel tɩ zeng Wẽnnaam ye. Ayo, la a faaga a menga, n dɩk yamb wẽnego, la a puka ninsaalb wẽneg pʋgẽ.”—Filip rãmba 2:5-7, NW.

8, 9. a) Bõe yĩng tɩ d segd n modg n bɩɩs manesem sẽn pa rat-m-yembre? b) Bõe yĩng tɩ d pa segd n koms raoodo, d sã n wa pa tõog n tũ makr ning a Zezi sẽn basã wakat ninga, la wãn-wãn la a Poll yɩ mak-sõng ne rẽ?

⁸ Yaa nana tɩ d yeel tɩ d rat n sõgna neb a taabã la tɩ d rat n dɩka b ratmã n lʋɩɩs tõnd rẽndã taoore. La d sã n vaees d tagsgã manesem ne pʋ-peelem, tõe n mikame tɩ tõnd sũyã pa nong n maand woto zãng ye. Bõe yĩnga? Pipi, yaa d sẽn dog ne rat-m-yembrã sẽn yit a Ãdem ne a Hawa nengẽ wã. Yiib-n-soaba, yaa tõnd sẽn vɩ dũni pʋgẽ sẽn sõngd n wat ne rat-m-yembrã yĩnga. (Efɛɛz rãmba 4:17, 18) Bɩɩs manesem sẽn pa rat-m-yembr manesem nong n baoodame tɩ d bɩɩs tagsg buud sẽn yaa lebend ne tõnd sẽn dog ne pa-zems-zãng ningã. La baoodame tɩ d rɩk sard sõma la d modge.

⁹ Tõnd pa-zems-zãngã sẽn yaa vẽenegã, sẽn yaa lebend zãng fasɩ ne mak-sõng ning sẽn zems zãng a Zezi sẽn bas ne-dã, tõe n komsa d raood wakat-wakate. D tõe n sãmbdame d sã n sɩd tõeeme n tall tagsg manesem ning a Zezi sẽn da tallã. La ges-y a Poll goamã sẽn kengd raoodã: “Mam miimi tɩ bõn-neer ka be mam pʋgẽ ye, sẽn dat n togse tɩ mam yĩnga pʋgẽ. Mam dat n maana neere, la mam ka tar pãng tɩ maan ye. Bõn-neer ninga mam sẽn dat n maana, mam ka tõe n maan ye. La wẽng ninga mam sẽn ka rat n maana, mam maanda rẽnda. Tɩ bõe, mam nonga Wẽnnaam tõog hal ne m sũur fãa. La mam yãta tõog a to mam yĩnga wila pʋgẽ sẽn maood ne mam pʋ-tẽer tõogo, la sẽn kẽesd maam yel-wẽna tõog yembd pʋgẽ sẽn be mam yĩnga wila pʋse.” (Rom dãmba 7:18, 19, 22, 23) Yaa sɩda, a Poll sẽn pa zems zãngã gɩdg-a-la naoor yak t’a pa maan Wẽnnaam daabã wa yẽ mengã sẽn da tʋllã ye, la a manesmã, a sẽn da tagsd la a sẽn da tar yĩn-sidg ning ne a Zeova la A tõogã to-to wã ra yaa sõma. Tõnd me nengẽ tõe n yɩɩ woto.

Manesem sẽn pa zemsã remsgo

10. Tagsg manesem bʋg la a Poll raool Filip nebã tɩ b bɩɩse?

¹⁰ Tõeeme tɩ ned segd n dems manesem sẽn pa zems bɩ? N-yẽe. Vẽenega, yɩɩ woto ne yʋʋm kob-yendẽ kiris-neb sãnda. A Poll goma manesem tɩrg tallg yell a lɛtr ning a sẽn taas Filip nebã pʋgẽ. A gʋlsa woto: “A ka tɩ mam paam-a-la [saasẽ vɩɩm rẽenem vʋʋgrã maasem yĩngã] nanda, wala tɩ mam tõog n zemsa nand ye; la mam maoodame tɩ mam tõe n paam-a tɩ yɩ m dẽnda, Kirist Zezi sẽn deeg maam tɩ yɩ bãmb dẽnda yĩnga. M ba-biisi, mam ka tagsd tɩ mam paam-a-la nand ye; la mam maanda bũmb a yembre; mam yĩmda bũmb nins sẽn be poorẽ n maoodẽ n dat n paam bũmb nins sẽn be taoorã. Mam dabda taoore n dat n paam Wẽnnaam arzãn boolg kũuni Kirist Zezi maasem yĩnga. Dẽ yĩnga, tõnd fãa sẽn bɩ wã, bɩ tõnd paam tagsg [manesem buud, NW ] kãng bala.” (Yaa tõnd n ningd italikã.)—Filip rãmba 3:12-15

11, 12. Wãn-wãn la a Zeova wilg tõnd tagsg manesem sẽn zemse?

¹¹ A Poll goamã wilgdame tɩ ned ning fãa sẽn lebg kiris-ned sẽn pa tagsd t’a segd n bɩɩme tara manesem sẽn pa zemse. Nin-kãng soabã pa tar Kirist tagsgã manesem buud ye. (Hebre dãmba 4:11; 2 Pɩɛɛr 1:10; 3:14) Ned a woto sẽn be yell ning pʋgẽ wã yaa yell sẽn ka tɩɩm bɩ? Ayo. Wẽnnaam tõe n sõnga tõnd tɩ d toeem d manesmã, d sã n sɩd rata. A Poll kẽnga taoor n yeele: “Yãmb sã n tar tagsg a to, Wẽnnaam na vẽneg yãmb ne bõn-kãng me.”—Filip rãmba 3:15.

¹² La d sã n dat t’a Zeova wilg-d manesem ning sẽn zemsã, rẽnda tõnd me maan bũmbu. D sã n pʋʋs la d zãms Wẽnnaam Gomdã ne kiris-neb sɛbã “kɩs-sɩd la gũusd yambã” sẽn yiisã sõngre, na n kɩtame tɩ neb nins sẽn “tar tagsg a to” wã tall manesem sẽn zemse. (Matɩe 24:45, NW )  Kiris-neb nins sẽn yaa kẽem dãmbã, vʋʋsem sõngã sẽn yãk tɩ b “kɩɩm Wẽnnaam tigingã” sũy na n yɩɩ noog tɩ b kõ b sõngre. (Tʋʋma 20:28, NW ) Ad d sɩd tara mi-beoogo, a Zeova sẽn pa yĩmd tɩ d pa zems zãngã, la a kõt tõnd a sõngrã! Bɩ d sak sõng-kãngã.

D paam zãmsg ne neb a taabã makre

13. Wãn-wãn la a Zoob kɩbarã sẽn be Biiblẽ wã zãmsd tõnd manesem ning sẽn zemsã wɛɛngẽ?

¹³ Rom dãmb sak 15 pʋgẽ, a Poll wilgdame tɩ d sã n tags pĩnd makrã zutu, tõe n sõng-d lame tɩ d rems d manesmã. A gʋlsame: “La bũmb fãa sẽn gʋls pĩnda gʋlsa tõnd zãmsg yĩnga, tɩ tõnd tõe n gũ tõnd tẽeb pidsg ne sũ-mare la ne Gʋlsg Sõamyã belsgo.” (Rom dãmba 15:4) A Zeova sõgen dãmb kẽer sẽn tall kɩs-sɩd sẽn vɩɩmd pĩnd wẽndẽ wã ra segdame n dems b manesmã nens kẽere. Wala makre, d sã n na n kʋmse, a Zoob talla manesem sõngo. A zɩ n wilg t’a Zeova maana wẽng ye, la a ra zɩ n bas tɩ namsgã kɩt t’a bas a kɩs-sɩdã ne Wẽnnaam ye. (Zoob 1:8, 21, 22) La a ra nong n kõta a meng bʋʋm. A Zeova tʋma a Elihu t’a tɩ sõng a Zoob n dems manesem kãngã. A Zoob pa tags tɩ b tʋʋs-a lame ye, a saka ne sik-m-meng t’a segd n toeema a manesmã, n sak n sɩng toeengo.—Zoob 42:1-6.

14. Wãn-wãn la d tõe n yɩ wa a Zoobe, b sã n sagl tõnd d manesmã wɛɛngẽ?

¹⁴ Tõnd me na n maana wa a Zoobe, d kiris-nin-taag sã n wa yeel tõnd ne sõmblem n wilg tɩ d talla manesem sẽn pa zems bɩ? Wala a Zoobe, bɩ d ra tol n “yeel tɩ Wẽnnaam ka maan-a neer ye.” (Zoob 1:22) D sã n namsd d bʋʋm zugu, bɩ d ra tol n yẽgem bɩ n yeel tɩ ya a Zeova n wa ne d zu-loeesã ye. Bɩ d ra bao n kõ d mens bʋʋm ye. D tẽeg tɩ baa tõnd zu-noodã sẽn sõs n yaa to-to a Zeova tʋʋmdã pʋgẽ, d ket n yaa neb “sẽn ka yõodo.”—Luk 17:10.

15. a) Manesem wẽng bʋg la a Zezi karen-biis kẽer tall-yã? b) Wãn-wãn la a Pɩɛɛr tall manesem sõngo?

¹⁵ Yʋʋm kob-yendẽ wã, kẽer sẽn kelg a Zezi talla manesem sẽn pa zemse. Vugri, a Zezi yeela bũmb võor wʋmb sẽn da yaa toogo. Rẽ kɩtame tɩ “bãmb karem-biis wʋsg sẽn wʋm bãmb goama b yeelame: ‘Gom-kãngã yaa toogo. Ãnd n tõe n deeg yõ wã?’ ” Vẽenega, neb nins sẽn gom woto wã ra pa tar manesem sõng ye. La b manesem sẽn pa zemsã kɩtame tɩ b bas a Zezi kelgre. Kɩbarã yetame: “Sẽn sɩng wakat kãnga, bãmb karem-biisa wʋsg leba poorẽ n ka le tũ bãmb ye.” B fãa talla manesem wẽng bɩ? Ayo. Kɩbarã kẽngda taoor n yetẽ: “Woto yĩnga, a Zezi soka piig la a yiiba yaa: ‘La yãmba yãmb me ka rat n bas maam la?’ A Simo Pɩɛɛr leoka bãmb  yaa: ‘Zusoaba, tõnd na n basa yãmb n kẽng ãnda nengẽ?’ ” Sɩda, a Pɩɛɛr leoka a mengã sʋkre: “Yãmb tara vɩɩm sẽn ka sɛt goama.” (Zã 6:60, 66-68) Ad sɩd yaa manesem sẽn yaa sõma! B sã n wa wilg Gʋlsg Sõamyã võore, bɩ b wilg b võorã sõma n paase, tɩ d ne pipi t’a sakrã yaa toog ne-do, kõn yɩẽ sõma tɩ d tall manesem ning a Pɩɛɛr sẽn tallã sɩda? Ad sɩd ra na n yɩẽ-la yalemd tɩ d bas a Zeova sõgenego, bɩ d gom n kɩɩs ‘gom-sõma wã mamsgo,’ yɛl kẽer võor-wʋmb sẽn sɩng n yaa toogã yĩng bala!—2 Tɩmote 1:13.

16. Manesem bʋg sẽn sãamd sũur la Zʋɩf rãmbã tũudum nanambs sẽn zĩnd a Zezi wakatã tall-yã?

¹⁶ Yʋʋm kob-yendẽ Zʋɩf rãmbã tũudum nanambs pa tall tagsg manesem ning a Zezi sẽn da tallã ye. B sẽn da rɩk sard sẽn pa vigsd n pa na n kelg a Zezi wã yɩɩ vẽenega, a sẽn wa n vʋʋg a Lazaar kũ-rãmbã sʋka. Ne ned ning fãa sẽn tar manesem sẽn zemse, yel-solem-kãngã ra segd n yɩɩ kaset sẽn yɩɩd fãa sẽn wilgd tɩ yaa Wẽnnaam n tʋm a Zezi. Baasg zãnga d karemda woto: “Dẽ, maan-kʋʋdba kãsem dãmba ne Fariziẽ dãmba tigsa karenga bʋ-kaoodbã n yeele: ‘Tõnd na n maana bõe? Tɩ bõe, dao kãng maanda bõn-bãn wʋsgo. Tõnd sã n bas bãmba, neba fãa na n tẽe bãmba. La Rom dãmba na n wa sãama tõnd Wẽn-dooga ne tõnd buudã.’ ” Wãn-wãn la b bao yellã tɩɩm? “Sẽn sɩng baraare bãmb baoome n dat n kʋ a Zezi.” B sẽn da maan sɩlem n na n kʋ a Zezi wã toor sẽn ka be, b ra baoodame n na n kʋ ned ning sẽn vɩ n yaa kaset t’a Zezi yaa yel-soalem maandã. “Maan-kʋʋdba kãsem dãmba yẽsa ne taab n dat n kʋ a Lazaar me.” (Zã 11:47, 48, 53; 12:9-11) Ad sɩd yɩtẽ-la wẽng wʋsgo, d sã n teel manesem kãngã buud n yik d sũur bɩ d sãam d sũuri, yɛl sẽn segdẽ n sɩd kɩt tɩ d kɩdem wɛɛngẽ! N-yẽe, ad woto sɩd yaa yelle!

D rɩk togs-n-taar ne Kirist manesem sõngã

17. a) Yel-bʋs pʋsẽ la a Daniɛll tall raood manesem? b) Wãn-wãn la a Zezi wilg raoodo?

¹⁷ A Zeova sõgen dãmbã talla manesem sõngo. A Daniɛll bɛɛbã sẽn wa n maan zãmb n kɩt tɩ b yiis noor n gɩdg kosg maaneg wẽnd bɩ ned a to tɩ sã n pa rĩmã rasem 30 yĩngã, a Daniɛll da miime tɩ rẽ tũub ra na n sãama a zoodã ne Wẽnnaam a Zeova. A ra na n basa Wẽnnaam pʋʋsg rasem 30 pʋgẽ bɩ? Ayo, a kell n pʋʋsa a Zeova naoor a tãab daar fãa wa a sẽn minim n maandẽ wã n pa zoe rabeem ye. (Daniɛll 6:7-18) Woto me, a Zezi pa sak t’a bɛɛbã kẽes-a rabeem ye. Vʋʋsg daar a ye, a sega rao nug sẽn ki. A Zezi ra miime tɩ Zʋɩf rãmb wʋsg sẽn da be be wã sũy ra pa na n yɩ noogo, a sã n da sãoog ned Vʋʋsg daar ye. A sʋk-b-la vẽeneg tɩ b wilg b sẽn tagsd yellã zugu. B sẽn zãgs tɩ b kõn goma, a Zezi kẽnga taoor n maag rao wã. (Mark 3:1-6) A Zezi zɩ n zãgs n pa tʋm tʋʋmd ning b sẽn bobl-a wã wa a sẽn tags tɩ zemsame wã ye.

18. Bõe yĩng tɩ neb kẽer kɩɩsd tõndo, la wãn-wãn la d segd n maan b manesem wẽngã taoore?

¹⁸ Rũndã-rũndã a Zeova Kaset rãmbã sak n deegame tɩ bãmb me pa segd n bas abada tɩ kɩɩsdbã manesem sẽn tõe n yɩ wẽngã kẽes-b rabeem ye. Sã n pa rẽ, b pa na n tall Kirist tagsgã manesem buud ye. Neb wʋsg kɩɩsda a Zeova Kaset rãmbã. Sãnda yaa b sẽn pa mi yɛlã takɩ wã yĩnga, la a taab yaa b sẽn kis Kaset rãmbã la b koɛɛgã yĩnga. La bɩ d ra tol n bas b beemã sãam tõnd manesem sõngã ye. D pa segd abada n bas tɩ neb a taabã wilg tõnd d sẽn segd n balem to-to wã ye.

19. Wãn-wãn la d tõe n puk tagsg manesem sẽn wõnd a Zezi Kirist rẽndã?

¹⁹ Wakat fãa a Zezi wilga tagsg manesem sẽn yaa sõma ne a karen-biisã la ne Wẽnnaam seglsã, baa rẽ maaneg sã n da yaa toogo.  (Matɩe 23:2, 3) D segd n dɩka a togs-n-taare. Sɩda, d saam-biisã pa zems zãng ye, la tõnd me pa zems zãng ye. La yɛ la d tõe n paam tũud-n-taas sẽn são la zo-rãmb hakɩk sẽn yaa kɩs-sɩd dãmb tɩ sã n pa d saam-biisã sẽn be dũniyã gill zugã sʋka? A Zeova nan pa kõ tõnd a Gomdã sẽn gʋlsã võor-wʋmb zãng-zãng ye, la tũudum bʋg n wʋmd a võorã n yɩɩda? Wakat fãa, bɩ d tall tagsg manesem sẽn zemsã, tagsg manesem buud ning a Zezi Kirist sẽn da tallã. Zãms n bãng a Zeova gũubã bee rẽ sʋk me, wa d sẽn na n yã sõsg ning sẽn pʋgdã pʋgẽ wã.

[Tẽngr note]

Y tõe n wilga a võor bɩ?

• Wãn-wãn la tõnd manesmã toeemd d vɩɩmã?

• Bilg-y a Zezi Kirist tagsg manesmã buudu.

• Bõe la a Zoob manesmã tõe n zãms tõndo?

• Manesem bʋg n zems kɩɩsg taoore?

[Zãmsgã sogsgã]

[Foto rãmba, seb-neng 18]

Kiris-ned sẽn tar manesem sẽn zems baood n na n sõnga neb a taabã

[Foto, seb-neng 20]

Wẽnnaam Gomdã zãmsg ne pʋʋsg sõngda tõnd tɩ d tall Kirist tagsg manesmã buudu