Zãmsgã yaa bũmb sẽn be nafr la yamleoogo

“Fo sã n ket n baood-a. . . . , fo na n yãa Wẽnnaam bãngrã.”—YELBŨNA 2:4, 5, NW.

1. Wãn-wãn la karen-zaalg tõe n tall yamleoog wʋsg ne-do?

NEB wʋsg karemda yamleoog yĩng bala. Bũmb ning b sẽn karemdã sã n pa wẽnga, kareng tõe n yɩɩ bũmb sẽn yaa sõma b sẽn maand n kokd pemsem. Biiblã kareng geelg-n-tʋm b sẽn tũud wakat fãa wã toor sẽn ka be, Yɩɩl Sõamyã, Yelbũnã, Evãnzill dãmbã bɩ Biiblã babs a taab kareng yamleoog yĩng bal kõta kiris-neb kẽer sũ-noog hakɩka. Goamã la tagsa wã sẽn be rasãndã bee yamleoog wʋsg ne-ba. Neb a taab yãkdame n karemd Annuaire des Témoins de Jéhovah la Réveillez-vous! wã, neb vɩɩm kɩbay sẽn be Gũusg Gasgã pʋgẽ, bɩ kʋdemd yɛl sɛbã, zĩis halhaal la tẽngã bõn-vɩɩlɩ zãmsgã yamleoog yĩng bala.

2, 3. a) Wãn-wãn la b tõe n dɩk tẽeb tagsa sẽn zulum n mak ne rɩ-taoko? b) Bõe la zãmsg baooda?

² Kareng tõe n yɩɩ bũmb f sẽn maand n kokd pemsem tɩ zãmsg baoodẽ tɩ f modg n tagse. Ãngeletɛɛr filozof a Francis Bacon gʋlsame: “Rɩlla d mak sɛb kẽer n gese, a taab yaa d vel-ba, la yaa bãmb kẽer bal la d segd n wãb tɩ bɩ la d yaool n vel tɩ kẽ-do.” Biiblã tɩ zemsa ne yaoolem bilgrã n tɩ yɩɩd fãa. Tʋm-tʋmd a Poll gʋlsame: “Tõnd tara bũmb wʋsg sẽn na n gom ne yell kãnga [Kirista, Rĩm la Maan-kʋʋd a Melkisedɛk sẽn makã], la bãmb bilgr yaa toogo, yãmb sẽn ka wʋmd naana wã yĩnga. . . . Rɩɩb sẽn yaa taok yaa neb nins sẽn bɩ la sẽn mi sõama ne wẽng n baka yĩnga.” (Hebre dãmba 5:11, 14) F segdame n tagem dɩɩb sẽn yaa taok tɩ bɩ n yaool n vel-a t’a kẽ-fo. Tẽeb rɩɩb sẽn zulma baooda tagsg sõma, t’a yaool n kẽ-f sõma tɩ f gãd-a f pʋ-tẽerẽ.

³ Gom-biis võor sebr a yembr wilgdame tɩ “zãmsg” yaa “f sẽn na n maan modgr n tags sẽn na yɩl n paam bãngr bɩ n wʋm bũmb võore, n tũnug ne karengo, vaeesg la yɛl a taaba.” Woto yĩnga, b pa tõe n yeel tɩ sebr kareng zugẽ-zugẽ, tõe tɩ yaa ne gom-biis kẽer dẽegr karengã wakat yaa zãmsg ye. Zãmsg baoodame tɩ d tʋme, tɩ d modg n tagse, n dɩk d yam-welgr tõodã n tʋme. La zãmsgã sẽn baood modgrã pa rat n yeel t’a pa tõe n tall yamleoog ye.

D maan tɩ zãmsgã tall yamleoogo

4. Sã n yaa ne yɩɩl-gʋlsdã, wãn-wãn la Wẽnnaam Gomdã zãmsg tõe n keng tẽeb la a tall nafre?

⁴ Wẽnnaam Gomdã kareng la a zãmsg tõe n kenga tẽeb la a kõ pãnga. Yɩɩl-gʋlsdã togsa woto: “Zusoaba tõog zemsa zãnga, a lebgda sũuri. Zusoaba kaset yaa sɩda n ka viigdẽ ye. A kõta zɩɩlem soab yam. Zusoaba noor  yaa tɩrga, a kõta sũ-noogo. Zusoaba tõog bʋʋd yaa sõama zãnga, a yaa wa vẽenem nin yĩnga.” (Yɩɩl Sõamyã 19:8, 9) A Zeova tõodã la a tẽegrã paasda tõnd sɩɩgã vɩɩm, a paasda tõnd tẽeb yɩ-neerã, b kõta tõnd sũ-noogo, la b maandẽ tɩ tõnd ninã yãgda, d sẽn ne a Zeova raab kãsemsã vẽenegã yĩnga. Ad sɩd yaa bũmb sẽn be yamleoogo!

5. Wãn-wãn la zãmsg tõe n tall yamleoog wʋsg ne tõndo?

⁵ D sã n tõe n yã d tʋʋmdã bi-sõma, a maaneg kõta tõnd sũ-noogo. Woto, sẽn na yɩl tɩ zãmsg tall yamleoogo, d segd n yɩɩ tao-tao n tʋm ne bãngr ning d sẽn paam paalma. A Zak gʋlsame: “Ned ninga sẽn get tõog sẽn zems zãnga sẽn yaa lohorem tõogã, la sẽn ket n get daar fãa, la sẽn kelgda n ka yĩmdẽ, la sẽn sakda, bark na n zĩnda yẽ zugu a sẽn maand woto wã yĩnga.” (Zak 1:25) D sã n yɩ tao-tao n dɩk yɛl nins d sẽn zãmsã n tʋm d mengã vɩɩmẽ, wata ne sũ-noog wʋsgo. D sã n maan vaeesg bũmb takɩ zug sẽn na yɩl n leok sʋkr b sẽn maan-d moonegã sasa bɩ d sẽn zãmsd ne ned wakate, na n kõo tõnd sũ-noog kãseng me.

D tall nonglem ne Wẽnnaam Gomdã

6. Wãn-wãn la Yɩɩl Sõamyã 119 gʋlsdã wilg a nonglem ne a Zeova gomdã?

⁶ Yɩɩll 119 gʋlsdã, tõe tɩ ya a Ezekɩas sẽn da yaa na-bi-bɩɩga, wilga a nonglem ne a Zeova gomdã. A yeela woto ne goam sẽn be rasãnde: “Mam maanda sũ-noog ne yãmb daabo, mam ka yĩmd yãmb goama ye. La yãmb kaseta me yaa noog ne maam . . . Mam sũur yaa noog ne yãmb tõodã, la mam nonga bãmba. Yãmb sũ-bʋgsma na n taa maam, la mam na n vɩɩndame; tɩ bõe, mam sũur yaa noog ne yãmb tõogã. Zusoaba, mam data yãmb fãagra ne datem kãsenga, la yãmb tõoga kõta maam sũ-noogo.”—Yɩɩl Sõamyã 119:16, 24, 47, 77, 174.

7, 8. a) Sã n yaa ne sebr a yembre, ‘sũ-noog ne’ Wẽnnaam Gomdã rat n yeelame tɩ bõe? b) Wãn-wãn la d tõe n wilg d nonglem ne a Zeova Gomdã? d) Wãn-wãn la a Ɛsdras segl a meng n yaool n karem a Zeova Tõogã?

⁷ Hebre Gʋlsgã gom-biis võor sebr a yembr wilga “sũur yaa noog ne” wã sẽn be Yɩɩl Sõamyã 119 pʋgẽ wã võor woto: “B sẽn tũnug ne-a verse 16 pʋgẽ to-to wã wõnda kɩdengo . . . la bʋgsgo . . . A rat n yeelame tɩ: kɩdem, bʋgse, tall sũ-noog ne . . . Yel-kãensã sẽn naag taabã tõe n wilgame tɩ bʋgsg ne bõn-datlã yaa bũmb ning sẽn yɩt sabab tɩ ned maan sũ-noog ne a Yahweh gomdã. . . . A võorã tɩ loee ne yĩn-sidga.” *

⁸ N-yẽe, tõnd nonglmã ne a Zeova Gomdã segd n yii d sũurẽ, zĩig ning tõnd yĩn-sidsã sẽn be wã. D segdame meng n tadg verse kẽer zut d sẽn karem paalem ne yamleoogo. D segdame n bʋgs tẽeb tags-zulumsã zutu, tɩ b kẽ-d sõma, la d tags b zut neere. Rẽ baoodame tɩ d maag d yĩng n tags la d pʋʋse. Wala a Ɛsdrase, d segd n segla d sũyã n karem la d zãms Wẽnnaam Gomdã. B gʋlsa yẽ wɛɛngẽ woto: “A Ɛsdras yãka yam [segla a sũur, NW ] n na n zãms Zusoaba tõodã la a sak-ba. La yẽ zãmsa Israɛll neba Wẽnnaam tõodã la b minundã.” (Ɛsdras 7:10) Ges-y a Ɛsdras bõn-datɩ a tãabã a sũurã seglg pʋgẽ wã: yaa sẽn na yɩl n zãmse, n tũ zãmsgã sagls la a zãms neb a taaba. D segd n dɩka a makre.

 D ges zãmsgã wa baleng tʋʋmde

9, 10. a) Wãn-wãn la yɩɩl-gʋlsdã wilg t’a tagsda a Zeova Gomdã yelle? b) Bõe la Hebre gom-biig ning b sẽn lebg tɩ ‘tags a yellã’ rat n yeele? d) Bõe yĩng tɩ tar yõod tɩ d ges Biiblã zãmsg wa ‘baleng tʋʋmde’?

⁹ Yɩɩl gʋlsdã yeelame t’a tagsda a Zeova tõodã, a noyã la a tẽegrã yell daar fãa. A yɩɩla woto: “Mam dat n tagsa yãmb tõoda võyã la m ges yãmb soɛya. Mam teesda m nus yãmb tõod nins mam sẽn nonga sẽne la m tagsda yãmb datma yelle. Mam nonga yãmb tõoga wʋsgo. Mam tagsda a yell daar fãa. Mam tara bãngr n yɩɩd m karen-saam dãmbã; tɩ bõe, mam tagsda yãmb kaseta yell daar fãa.” (Yɩɩl Sõamyã 119:15, 48, 97, 99) ‘Tags’ a Zeova Gomdã ‘yell’ baooda bõe maanego?

¹⁰ Hebre gom-bil ning b sẽn lebg tɩ ‘tags a yellã’ rat n yeelame me tɩ “bʋgse, tags bũmb zug neere,” “vaees yell f yamẽ wã.” “A tɩ loee ne f sẽn na n tags sɩɩ Wẽnnaam tʋʋmã . . . la Wẽnnaam gomdã zutu.” (Theological Wordbook of the Old Testament) Gom-biig sẽn yaa ‘tags a yellã’ tɩ loee ne “yɩɩl-gʋlsdã bʋgsgo,” “a sẽn nong Wẽnnaam tõogã zãmsg” tɩ yaa “baleng tʋʋmdã.” D sã n get Wẽnnaam Gomdã zãmsg wala tõnd balengã babg a yembre, kɩtdame n paas tɩ d pa reem ne-a ye. Woto yĩnga, d segd n zãms-a lame n pa reeme, n tũnug ne pʋʋsgã. Zãmsgã bee tõnd balengã pʋgẽ, la d maand-a lame sẽn na yɩl n paas d balengã sõmblem.

D tu n zulg Wẽnnaam Gomdã pʋgẽ

11. Wãn-wãn la a Zeova pukd tẽeb tags-zulums a nin-buiidã?

¹¹ Yɩɩl-gʋlsdã zẽka a koɛɛg n yeel woto ne waoogr sẽn yaa kãsenga: “Zusoaba, yãmb tʋʋma yaa kãsemse. Yãmb tagsa yaa zulums wʋsgo.” (Yɩɩl Sõamyã 92:6) La tʋm-tʋmd a Poll goma “Wẽnnaam yel-zulumsã” yelle, sẽn yaa tags-zulums a Zeova sẽn pukd a nin-buiidã n “tũnugd ne a vʋʋsem sõngã” sẽn tʋmd kɩs-sɩd la gũusd yambã sull zugã. (1 Korẽnt dãmba 2:10, NW; Matɩe 24:45, NW ) Yambã sull tʋmda wʋsg n kõt neba fãa tẽeb rɩɩb sẽn yaa sõma: b kõta nin-paalsã “bĩisim,” la “neb nins sẽn bɩ” wã b kõta “rɩɩb sẽn yaa taok[o.]”—Hebre dãmba 5:11-14.

12. Kõ-y makr sẽn tɩ loe ne “Wẽnnaam yel-zulumsã” võor yambã sull sẽn wilgi.

¹² Sẽn na yɩl n wʋm “Wẽnnaam yel-zulumsã” võore, tara yõod tɩ d zãms la d pʋʋs la d tags a Gomdã zugu. Wala makre, zãmsg sẽn yaa sõma la b yiis tɩ wilgd a Zeova sẽn tõe n yɩ tɩrg la ninbãan-zoet wakat yɛng pʋgẽ to-to. A ninbãan-zoeerã wilgr pa boogd a tɩrlmã ye. Sẽn yaa lebende, Wẽnnaam ninbãan-zoeerã ya a tɩrlma ne a nonglmã wilgri. A Zeova sã n kaood yel-wẽn-maand bʋʋdo, a baoodame n na n bãng a sã n tõeeme n tall ninbãan-zoeer ne-a a Biriblã yao-n-dɛɛk maoong tikr zugu. Yel-wẽn-maandã sã n pa tek yam n kos sugr bɩ a sã n yaa tõata, Wẽnnaam basdame tɩ tɩrlmã lim ninbãan-zoeerã. Sẽn yaa to-to fãa, a tara kɩs-sɩd ne a noyã sẽn yaa kãsemsã. * (Rom dãmba 3:21-26) ‘Ges Wẽnnaam yamã sẽn ka tɛka’!—Rom dãmba 11:33.

13. Wãn-wãn la d segd n tall naneb ne tẽebã sɩd sẽn ‘waoog wʋsg’ b sẽn wilg tõnd tɩ ta masã wã?

¹³ Wala yɩɩl gʋlsdã, d sũy nooma wʋsg a Zeova sẽn wilg tõnd a tagsa wʋsgã. A Davɩɩd gʋlsame: “Wẽnnaam, yãmb tagsa yaa kãsems  wʋsg mam yĩnga. Bãmb sõor waoogame. Mam sã n sõd bãmba, bãmb yaa wʋsg n yɩɩd bĩisr biisi.” (Yɩɩl Sõamyã 139:17, 18) Tõnd bãngrã rũndã-rũndã ya a Zeova tagsa wã sõor ka tɛkã a sẽn na n wilg wakat sẽn pa sat pʋgẽ wã bab-kɩdg bala. Baa ne rẽ, d tara naneb wʋsg ne tẽebã sɩd sẽn ‘waoog wʋsg’ sẽn tar yõod wʋsgã, b sẽn zoe n wilg tõndã, la wakat fãa d tuuda Wẽnnaam Gomdã tagsa sẽn waoog wʋsgã pʋgẽ n paasdẽ.—Yɩɩl Sõamyã 119:160.

Woto baooda modgr la tʋʋm teed sẽn yaa sõma

14. Wãn-wãn la Yelbũna 2:1-6 wilgd tɩ tara yõod tɩ d modg n zãms Wẽnnaam Gomdã?

¹⁴ Biibl zãmsg sẽn zulum baooda modgre. Rẽ yaa vẽeneg fasɩ, d sã n maag d yĩng n karem Yelbũna 2:1-6. Ges-y gom-biis nins sẽn wilgd tɩ f maanda bũmbu, Rĩm a Salomo sẽn tar yama sẽn tũnug ne n wilg modgr ning d sẽn segd n maan n paam bãngre, yam la yam-welgrã. A gʋlsame: “M biiga, fo sã n deeg mam goama, la f tẽeg bũmb ninga mam sẽn wilg fooma n kelg yam neere la f bao bãngr ne f sũur fãa, n-ye, fo sã n [ket n baood, NW ] bãngr ne yam wa ned sẽn baood wanzũri ne arzɛgse, [fo sã n ket n baood-a, NW ] fo na n bãnga Zusoaba zoees sẽn yaa bũmb ninga, la f na n yã b bãngra sẽn yaa to-to. Tɩ bõe, Zusoaba kõta yam, la bãngr ne yẽesem bee bãmb goama pʋgẽ.” (Yaa tõnd n ningd italikã.) N-yẽe, zãmsg sẽn be nafr baooda vaeesgo, tuubu wala d sã n baooda laog sẽn solge.

15. Biiblã bilgr bʋg n wilgd tɩ d segd n talla zãmsg manesem sẽn yaa sõma?

¹⁵ Zãmsg sẽn be bark tẽebã wɛɛngẽ baooda zãmsg manesem sẽn yaa sõma me. A Salomo gʋlsame: “Lar noor sã n mud n ka le rɩtẽ, a soab togame n nak a pãng n kɛ.” (Koɛɛg Soaba 10:10) Tʋm-tʋmd sã n keed ne lar sẽn pa saase, bɩ a sã n pa rɩk-a n tʋm ne minim, a na n sa a pãng zaalem, la a tʋʋmdã pa na n yɩ sõma ye. Woto me, sẽk ning tõnd sẽn dɩkd n zãmsdẽ wã nafr tõeeme n pa yɩ yembr lɛ-lɛ ye. Fãa bee ne tõnd sẽn zãmsd to-to wã. D tõe n yãa sagls sẽn yaa sõma wʋsg sẽn na yɩl n maneg d zãmsgã sẽn maand to-to Manuel pour l’École du ministère théocratique sebrẽ wã, zãmsg a 7 wã pʋgẽ. *

16. Sagl-bʋs sẽn zems la b kõ sẽn na yɩl n sõng tõnd tɩ d maan zãmsg sẽn zulum?

¹⁶ Tʋm-tʋmd sã n na n sɩng a tʋʋmde, a segenda tʋʋm teed nins a sẽn na n wa ratã. Woto me, tõnd sã n wa na n sɩng zãmsgo, d segd n tũusa zãmsg sɛb nins d sẽn na n wa ratã. D sẽn tẽr tɩ zãmsg yaa tʋʋmd la a baoodame tɩ d modg n tagsã, yaa sõma me tɩ d kibl d mengã sõma. D sã n dat tɩ d yamã nek sõma, zĩnd sɛɛs zug n be taabl bɩ biru taoore, tõe n yɩɩ sõma n yɩɩd d sẽn na n gãe gadg zugu, bɩ zaoog sẽn yaa bʋgsg wʋsg zugu. Y sã n wa sɩng hal tɩ pa reem yell tɩ kaoos bilfu, y tõe n yãame tɩ bee nafr tɩ y rõneg y menga, bɩ y yi yɩng n kok pemsem bilfu.

17, 18. Kõ-y makr sẽn wilgd y sẽn na n tũnug ne zãmsg tʋʋm-teed sẽn yaa sõma y sẽn tarã n tʋm to-to.

¹⁷ Zãmsg tʋʋm teed sẽn ka mak-n-taas me la d tara. Sẽn tɩ yɩɩd-a bãmb fãa sʋkã yaa Biiblã Traduction du monde nouveau wã tõr sẽn be, bɩ a babse, buud-goam 37 pʋsẽ wã. Traduction du monde nouveau wã yagr sẽn zemsã tara zĩis b sẽn yet tɩ b tɩ gese la “Table des livres de la Bible” sẽn kõt gʋlsdã yʋʋre, zĩig ning a sẽn gʋlsã la yɛl nins wɛɛngẽ b sẽn gʋlsã kaoosg wakate. A leb n tara Biiblã gom-biis ẽndɛgse, vẽnegr gom-paasdem la kart dãmba. Buud-goam sãnda pʋsẽ, b yiisa Biibl kãngã sẽn yaa bedr n yɩɩdã, tɩ b boond-a tɩ Bible à référence. Biibl kãng tara tõnd sẽn sõdg yɛl ninsa fãa la yɛl a taab wʋsg sẽn paase, tɩ seb-neng tẽngr goam wʋsg sẽn tar ẽndɛgs rãmb me be sʋka. Yãmb rɩta bũmb ning fãa sẽn be yãmb buud-gomdẽ wã nafr sẽn na yɩl n sõng-y tɩ y tu zulung n paas Wẽnnaam Gomdã pʋgẽ bɩ?

¹⁸ Zãmsg tʋʋm-teoog a to sẽn tar yõod wʋsg yaa Biiblã bãngr sebr sẽn tar sɛb a yiibã: Étude perspicace des Écritures. Yãmb sã n tar seb-kãngã  buud-gomd y sẽn wʋmd pʋgẽ, a segd n bee ne-y wakat fãa, y sã n wa zãmsdẽ. A na n kõ-y-la kɩbay sẽn tɩ loe ne Biiblã gom-zut wʋsg sẽn yɩɩda. Sebr a to sẽn kõt sõngr sẽn wõnd woto yaa “Toute Écriture est inspirée de Dieu et utile.” Y sã n wa sɩng Biiblã seb-paall karengo, yaa sõma tɩ y vaees zãmsg ning sẽn tɩ zems ne rẽ “Toute Écriture” sebrã pʋgẽ, sẽn na yɩl n bãng yɛlã sẽn maand zĩig ning la wakat ninga, n paas Biiblã seb-kãng gom-zut kʋmsg la b yõodã ne tõndo. Bũmb sẽn zẽk n wa paas tʋʋm-teedã wʋsg sẽn gʋlsã yaa Publications de la Société Watchtower b sẽn ning ordinatɛɛr pʋgẽ tɩ be buud-goam a wɛ pʋsẽ masã wã.

19. a) Bõe yĩng t’a Zeova kõ tõnd tʋʋm teed sẽn yaa sõma Biiblã zãmsg yĩnga? b) Bõe n yaa tɩlae sẽn na yɩl n karem la d zãms Biiblã tɩ zemse?

¹⁹ A Zeova tũnuga ne “kɩs-sɩd la gũusd yambã” n kõ tʋʋm te-kãensã fãa, sẽn na yɩl t’a sõgen dãmbã sẽn be tẽng zugã tõog n ‘bao Wẽnnaam bãngrã la b yã-a.’ (Yelbũna 2:4, 5, NW ) Zãmsg minung sẽn yaa sõma kɩtdame tɩ d wa paam a Zeova bãngr sẽn yaa takɩ la d paam zood sẽn tar pãng n yɩɩd ne-a. (Yɩɩl Sõamyã 63:2-9) N-yẽe, zãmsg yaa tʋʋmde, la a yaa tʋʋmd sẽn be yamleoog la nafre. Baasgo, a sɩd rɩkda sẽka, la tõe tɩ y tagsda woto: ‘Yɛ la m na n yã sẽk n ges m Biibl karengã la meng zãmsgã yelle?’ B na n goma nen-kãngã yell sõss sẽn pʋg taabã baasg soab ning sẽn pʋgdã pʋgẽ.

[Tẽngr not rãmbã]

Lebg-n-ges sʋgsgo

• Wãn-wãn la d tõe n maan tɩ d meng zãmsgã keng tẽeb la a tall nafre?

• Wala yɩɩl gʋlsdã, wãn-wãn la d tõe n wilg tɩ d ‘nonga’ a Zeova Gomdã, la tɩ d ‘tagsda a yelle’?

• Wãn-wãn la Yelbũna 2:1-6 wilgd tɩ modgr yaa tɩlae Wẽnnaam Gomdã zãmsg pʋgẽ?

• Zãmsg tʋʋm te-sõma bʋs la a Zeova kõ-do?

[Zãmsgã sogsgã]

[Foto, seb-neng 23]

Tagsg sõma la pʋʋsg kɩtdame tɩ d nong Wẽnnaam Gomdã

[Foto rãmba, seb-neng 26]

Yãmb tũnugda ne zãmsg teedã sẽn na yɩl n tu zulung Wẽnnaam Gomdã pʋgẽ bɩ?