Biiblã vɩɩm manesem noy n yaa sõma n yɩɩd bɩ?

“NIN-BUIIDÃ rata no-kãsems siglg sẽn kõt a nebã bãan la sor-wilgri.” Yaa woto la Alemayn gʋlsd sẽn tar minim n yaa televiziõ kɩba-kõt yeel-yã. Sɩd-sɩda, woto zemsame. Sẽn na yɩl tɩ ãdem-biisã lagem-taab vigl kãn-kãe la a yidgi, nebã segd n talla yẽbgr sẽn tar pãng sẽn tɩ loe ne noy b sẽn lagem n sake, sẽn wilgd sẽn yaa tɩrg bɩ sẽn pa tɩrga, sẽn yaa sõma bɩ sẽn yaa wẽnga. Sʋkrã la woto: No-bʋs n yaa sõma n yɩɩd n kõ nin-buiidã?

Sã n yaa Biiblã vɩɩm manesem noy la noy nins b sẽn dɩk sard n na n sakã, b segd n sõnga nebã tɩ b tall vɩɩm sẽn vigl sõma la sẽn kõt sũ-noogo. Rẽ na n kɩtame meng tɩ nin-buiid nins sẽn tũud no-kãensa wã paas b sũ-noogã la b vigl kãn-kãe n paase. Yaa woto bɩ? Bɩ d vaees n ges Biiblã sẽn tar bũmb ning n na n yeel yel-kãsems a yiib zutu: kɩs-sɩdã kãadem pʋgẽ wã la pʋ-peelmã daar fãa vɩɩmã pʋgẽ wã.

Gãd-y y kẽed-n-taagã sõma

Tõnd Naandã naana a Ãdem n yaool n naan a Hawa t’a yɩ a kẽed-n-taaga. Kʋdemdã pʋgẽ, yaa bãmb lagem-n-taarã n yɩ pipi kãadmã, la a ra segd n yɩɩ zems-n-taar sẽn kaoosde. Wẽnnaam yeelame: “Rao na n bas[a] a ba ne a ma n zĩnd ne a paga.” Yʋʋm 4 000 loogr poore, a Zezi Kirist togsa kãadem no-kãngã n yɩlem a karen-biisã fãa yĩnga. Sẽn paase, a gɩdga yoobo.—Sɩngre 1:27, 28; 2:24; Matɩe 5:27-30; 19:5.

Sã n yaa ne Biiblã, bõn-kãsems a yiib sẽn tõe n wa ne sũ-noog kãadem pʋgẽ yaa kẽed-n-taas a yiibã fãa sẽn na n wilgd nonglem la waoogr ne taaba. Sɩdã sẽn yaa zakã soaba, segd n talla nonglem sẽn pa tar dat-m-yembre, n bao n maan yɛl nins sẽn nafd a pagã n yɩɩdã. A segd n vɩɩmda ne-a “tɩ zems ne bãngrã,” la a pa segd n maan “gãgs ne” yẽ ye. Pag segd n talla “waoogr sẽn zulum” ne a sɩdã. Kẽed-n-taas sã n tũ no-kãensã,  b na n gila zu-loees wʋsg sẽn yɩɩd sẽn wat kãadmã pʋgẽ wã, bɩ n tõog zu-loeesã menga. Sɩdã na n datame n gãd a pagã sõma tɩ pagã me na n dat n gãd a sɩdã sõma.—1 Pɩɛɛr 3:1-7, NW; Kolos rãmba 3:18, 19; Efɛɛz rãmba 5:22-33, NW.

Biiblã noor ning sẽn yet tɩ kẽed-n-taag gãd a to sõma wã sõngd n paasda kãadmã sũ-noog bɩ? Be neere, ges-y vaeesg b sẽn maan Alemayn biis sẽn yɩ to-to. B sʋka nebã n gese yaa yel-bʋs n tar yõod ne kãadem sẽn yaa sõma. B sẽn deng n togs yel-kãens pʋgẽ wã yaa tall kɩs-sɩd ne taabã. Y pa na n sak n deeg tɩ sẽn kẽ-b kãadmã tara sũ-noog n yɩɩda, b sã n miẽ tɩ b kẽed-n-taasã tara kɩs-sɩd sɩda?

Yaa wãn to yẽ, zu-loees sã n puki?

Yaa wãn to masã, mo-yõsr sẽn pa reem yell sã n zĩnd sɩd ne a pag sʋka? Yaa wãn to, b nonglmã sã n maage? Yel-kãngã pʋsẽ, b sẽn na n kao kãadmã pa são sɩda? Bɩ Biiblã noor ning sẽn yet tɩ kẽed-n-taag fãa gãd a to sõma wã tũub ket n tõe n manega yellã?

Biiblã gʋlsdb sak n deegame tɩ kẽed-n-taasa fãa na n sega zu-loeese, ninsaal sẽn pa zems zãngã yĩnga. (1 Korẽnt dãmba 7:28) Ne rẽ fãa, kẽed-n-taas nins sẽn tũud Biiblã burkĩndlem noyã modgdame n na n kõ sugr la b lagem taab n welg b zu-loeesã. Sɩda, yɛl n be, wala makre yoob bɩ pãbre, sẽn tõe n kɩt tɩ kiris-ned ges welg-taab bɩ kãadem kaoob wa bũmb sẽn zemse. (Matɩe 5:32; 19:9) La yɩ yãg-yãg n kao kãadem tɩ pa tũ ne bʋʋm sẽn tar pãnga, bɩ sẽn na yɩl n dɩk kẽed-n-taag a to wilgdame tɩ f yaa rat-m-yembr soab toog sẽn kae ne neb a taabã ye. Sɩd-sɩda woto pa wat ne viglg kãn-kãe bɩ sũ-noog f vɩɩm pʋgẽ ye. D dɩk makre.

A Pɩɛɛr yãame t’a kãadmã ye pa noom wa pĩndã ye. * Rẽ kɩtame t’a bas a pagã n dɩk a Monik sẽn da bas a sɩdã. Baasa wãn-wãna? Kiis a wãn pʋgẽ bala, a Pɩɛɛr sak n deegame: vɩɩmd ne a Monik “pa yɩ nana wa mam sẽn da mamsdã ye.” Bõe yĩnga? Ninsaal pãn-komslmã ra yaa vẽenes ne a kẽed-n-ta-paalgã wa b sẽn da yaa vẽenes ne pĩnd soabã. Yẽ kell n zẽna yɛlã, a sẽn dɩk sard yãg-yãg ne rat-m-yembr tɩ kẽes-a ligd zu-loees pʋgẽ wã yĩnga. Sẽn paase, a Monik kambã sũy ra sãama wʋsgo, b zak pʋgẽ vɩɩmã sẽn toeem zãng-zãngã yĩnga.

Wala yel-kãngã sẽn wilgdã, kãadem sã n wa segd zu-loeese, naoor wʋsgo, pa bas-taabã la a tɩɩmã ye. Sẽn yaa lebende, zu-loeesã taoore, d sã n tũ Wẽnnaam Gomdã sẽn yaa Biiblã vɩɩm manesem noyã, naoor wʋsgo, a tõe n kɩtame tɩ kãadmã yalse, la sõngda kẽed-n-taasã tɩ b welg b zu-loeesã. Yɩɩ woto ne a Thomas la a Doris.

A Thomas ne a Doris kẽe kãadem sẽn yɩɩd yʋʋm 30, t’a Thomas wa sɩng rãamã yũub hal tɩ pa nana ye. Yam-ka-m-meng kãseng n da wa n tar a Doris, tɩ b yiibã ra yetẽ tɩ b rat n kaoa b kãadmã. A Doris rɩka a sũurã yell n togs pag a yembr sẽn ya a Zeova Kaset soaba. Kaset soabã wilga a Doris Biiblã sẽn yet bũmb ning kãadem wɛɛngẽ, la a raool-a t’a ra yɩ yãg-yãg n welg ye, la a reng n mao ne a sɩdã n modg n bao yellã tɩɩm. Yaa woto la a Doris maan-yã. Kiis a wãn pʋgẽ, b ra pa leb n tagsd kãadem kaoob yell ye. A Thomas ne a Doris ra lagma taab n maood ne b zu-loeesã. B sẽn tũ Biiblã saglsã paasa b kãadmã pãng la a kõ-b weer tɩ b welg b zu-loeesã.

Pʋ-peelem bũmb fãa pʋgẽ

Gãd f kẽed-n-taag sõma ne kɩs-sɩd baoodame tɩ f tall burkĩnd wʋsg la nonglem ne tɩrlem. Yaa woto me la b baood sẽn na yɩl n pa n yɩ pʋ-peelem soab dũni sẽn yaa pʋ-lik pʋgẽ. Biiblã tara yɛl wʋsg n na n togs pʋ-peelmã wɛɛngẽ. Tʋm-tʋmd a Poll gʋlsa Zide yʋʋm kob-yendẽ kiris-nebã woto: “Tõnd ratame n tall pʋ-peelem bũmb fãa pʋgẽ.” (Hebre dãmba 13:18, NW ) Woto rat n yeelame tɩ bõe?

Pʋ-peelem soab yaa sɩd soaba, la a pa tar zãmb ye. A pʋga peela a manesmã ne neb a taabã pʋgẽ: a yaa tɩrga, n be waoogre, n pa zãmbdẽ bɩ n belgdẽ ye. Sẽn paase, pʋ-peelem soab yaa ned sẽn tar burkĩnd n pa zãmbd a to ye. Pʋ-peelem dãmbã tara manesem sẽn sõngd n wat ne bas-yard la bas-m-yam. Rẽ wata ne manesem sõma la a paasd zems-n-taar sẽn tar pãng ninsaalbã ne taab sʋka.

Pʋ-peelem dãmbã tara sũ-noog bɩ? Be neere, b tara bʋʋm n na n tall sũ-noogo. Baa ne zãmbã la neb a taabã tudgr sẽn yelg zĩig fãa wã, bɩ tõe tɩ yaa rẽ yĩnga, naoor wʋsgo neb a taabã pẽgda  pʋ-peelem dãmbã. Sã n yaa ne vaees-n-gɛsg b sẽn maan kom-bɩɩs sʋka, pʋ-peelmã yaa zʋg-sõng neb 70 koabg zug b sẽn sʋk-b rãmbã sʋk sẽn nand wʋsgo. Sẽn paase, baa tõnd yʋʋm sẽn ya a soaba, pʋ-peelmã yaa pipi bõn-kãsenga, neb nins d sẽn get tɩ b yaa d zo-rãmbã nengẽ.

B zãmsa a Christine wagdem a sẽn da tar yʋʋm 12 tɛka. Yʋʋmã sẽn tong taabã pʋgẽ, a lebga wagd-mit sẽn yaa kor foaada. “Ray n zĩnd tɩ m da tõe n wa ne sẽn ta DM 5 000 [Amerik dolaar 2 200] yiri,” woto la a wilgda. La b yõka a Christine naoor a wãna, la a sẽn da vɩ to-to wã ra kɩtame tɩ b ra tõe n kẽes-a bãens-roog wakat buud fãa. A Zeova Kaset rãmbã sẽn wilg-a Biiblã sẽn yet bũmb ning pʋ-peelmã zugã, a Christine wa n datame n tũ Biiblã noy nins sẽn tɩ loe ne pʋ-peelmã. A zãmsa sagl-kãngã sakre: “Ned ninga sẽn da zuuda, bɩ a ra le zu ye.”—Efɛɛz rãmba 4:28.

A Christine sẽn wa n deeg lisg n lebg a Zeova Kaset soabã t’a ra pa leb n yaa wagdr ye. A ra modgdame n na n yɩ pʋ-peelem soab bũmb fãa pʋgẽ, bala Kaset rãmbã gom n tadga pʋ-peelmã la kiris-neb zʋg-sõma a taabã zut wʋsgo. Kɩbay sebr a ye (Lausitzer Rundschau) yetame: “Burkĩnd goam wala pʋ-peelmã, rɩ la yũ tɩ zems la f to nonglmã yaa yɛl b sẽn nong wʋsg Kaset rãmbã tẽeb pʋgẽ.” A Christine tagsg yɩɩ bõe ne toeeng ning sẽn zĩnd a vɩɩmã pʋgẽ wã? “M sẽn bas wagdmã m sũ-noogã paasa wʋsgo. M neeme tɩ m yaa ned sẽn zems waoogr nebã sʋka.”

Nafda neba fãa

Neb nins sẽn tar kɩs-sɩd ne b kẽed-n-taase, la sẽn yaa pʋ-peelem dãmbã tara sũ-noogo, la b nafda nin-buiidã me. Tʋʋm taoor dãmbã sẽn nong n yɩɩd yaa tʋm-tʋmdb sẽn pa zãmbde. Tõnd fãa rata yags sẽn be bas-yardo, la d nong n kẽnga te-koosg zĩisẽ pʋ-peelem dãmb sẽn tʋmdẽ wã. Rẽ yĩnga d pa waoogd politik neba, polɩɩs rãmb la bʋ-kaoodb nins sẽn lakd b mens ne zãmbã sɩda? Nin-buiidã nafda wʋsgo, a nebã sã n yaa pʋ-peelem dãmba, b sẽn nong sẽn yaa tɩrgã, la pa sẽn na n zems ne bãmb maanegã bal yĩng ye.

Sẽn paase, kẽed-n-taas nins sẽn tar kɩs-sɩdã yaa yẽbgr ne zags sẽn vigl kãn-kãe. La neb wʋsg sẽn yɩɩd na n sak n deega ne Erop politik rao sẽn togs woto wã: “Zak sẽn yaa to-to [wa d sẽn dog n yã-a t’a yaa to-to wã] ket n yaa bũmb ning sẽn kõt ninsaal bãan la bõn-datl n yɩɩdã hal tɩ ta rũnd kãngã.” Zak sẽn tar laafɩ yaa zĩig ning kãsembã ne kambã sẽn tõe n paam bãan b sũyã pʋsẽ n yɩɩda. Yaa woto la neb nins sẽn tar kɩs-sɩd kãadem pʋgẽ wã sõngd n met lagem-taab sẽn vigl kãn-kãe.

Tags-y n ges neb wʋsg sẽn da na n naf to-to, b sã n pa basd kẽed-n-taase, kãadem kaoob bʋʋd sã n da kaẽ bɩ kamb gʋʋnd yãkr bʋʋd sã n da kaẽ. La wagda sẽn food neb kordo, wagda sẽn zuud magazẽ rãmbẽ, tʋʋm zĩigẽ ligd zuudba, fõgsneer dãmb sẽn deegd zãmb kũun bɩ siãntifik rãmb sẽn maand zãmb sã n da kaẽ? Rẽ wõnda zãmsd bɩ? Pa zãmsd ne neb nins sẽn nong Biiblã, la a sẽn yet bũmb ning beoog-daar zugã wʋsgã ye. Wẽnnaam Gomdã kãabdame t’a Zeova Mesi Rĩungã na n deega ãdem-biisã naam tẽngã zugã n dɩ ka la bilfu. Rĩung kãng naama wakate, b na n zãmsa a zẽemba fãa tɩ b vɩɩmd tɩ zems ne Biiblã vɩɩm manesem noyã. Wakat kãngã, “nin-tɩrs na n sooga dũniyã la bãmb na n zĩnda a zug wakat sẽn-ka-sɛta.”—Yɩɩl Sõamyã 37:29.

Biiblã vɩɩm manesem noy n yaa sõma n yɩɩda

Neb milyõ rãmb sẽn vaees Gʋlsg Sõamyã neer wa n bãngame tɩ Biiblã sagls yẽbga Wẽnnaam yamã sẽn yɩɩd ninsaal tagsg zĩig sẽn zãrã zugu. Nin-kãens getame tɩ Biiblã zemsa ne bas-yardo, la a yaa sõma ne vɩɩmã tõnd masã zãmaanã pʋgẽ. B miime tɩ b sã n tũ Wẽnnaam Gomdã saglse, na n naf-b lame n yɩɩge.

Woto yĩnga, b kelgda Biiblã sagl-kãngã neere: “Teeg [a Zeova, NW ] ne f sũur fãa la f ra teeg f meng bãngr ye. Fo sẽn maand bũmb ninga fãa, bɩ f tẽeg Zusoaba yelle, la b na n demsa fo sorã.” (Yelbũna 3:5, 6) B sã n maan woto, manegda bãmb mensã vɩɩm n paas wʋsg, la b leb n nafda neb nins sẽn gũbg-bã. La b bɩɩsda bas-yard sẽn yaa kãn-kãe ne “vɩɩm ninga . . . sẽn watã,” ninsaalba fãa sẽn na n wa tũud vɩɩm manesem noy nins sẽn tik Biiblã zugã.—1 Tɩmote 4:8.

[Tẽngr note]