Biiblã: Vɩɩm manesem sebre

“Wẽnnaam goama vɩɩme la a tara pãnga, la a rɩtame n yɩɩd sʋʋg sẽn tar noy a yiibu, . . . la a yaa sũur tagsgo la ratem bʋ-kaooda.” (Hebre dãmba 4:12) Bilg-kãngã sẽn wilgd Wẽnnaam Gomdã sẽn tõe n maan bũmb ningã sɩd wilgdame tɩ Biiblã pa seb-sõng bal ye.

“A koɛɛgã tara yõod wʋsg ne tõnd vɩɩmã wa pemsmã d sẽn vʋʋsdã,” woto la tũudum yɛl gʋlsd a yembr wilg vẽenega. Rẽ poore, a paasame: “Yãmb sã n ges tʋlsem la ratem ning d sẽn tar maagrã wɛɛngẽ rũndã-rũndã wã, la y karem Biiblã ne tagsg a woto, a womda biis sẽn lingd wʋsgo.” Wala fɩtl sẽn yãgde, Biiblã wata ne vẽnegr yɛl võor wʋmb sẽn yaa toog zutu, la masã vɩɩmã zu-loees zutu.—Yɩɩl Sõamyã 119:105.

Sɩda, yam ning b sẽn wilg Biiblã pʋgẽ wã tara pãng n na n toeem tõnd tagsgã, n na n sõng tõnd tɩ d welg zu-loeese, n maneg d vɩɩmã n paase, la a raool-d ne tõod tɩ d mao ne yɛl nins d sẽn pa tõe n toeema. Sẽn tar yõod n yɩɩda, Biiblã sõngda tõnd tɩ d bao n bãng Wẽnnaam la d nong-a.

Sebr sẽn kɩtd tɩ vɩɩmã tall võore

Wẽnnaam a Zeova sẽn yaa Biiblã soabã ‘mii tõnd manesma fãa.’ A mii tõnd yĩngã, d yĩn-sidgã la d tẽebã ratem n yɩɩd tõnd mengã. (Yɩɩl Sõamyã 139:1-3) Yaa ne bʋʋm la a sẽn yãk kogs sẽn yaa vẽenes ne ninsaalbã yel-manesmã. (Miise 6:8) Zemsame tɩ d bao n bãng kogs la sor-wilgr kãense, la d zãms b tũub d vɩɩmã pʋgẽ. Sũ-noog soab la ned ning sẽn “maand sũ-noog ne a Zeova tõogã,” woto la yɩɩl-gʋlsdã yeel-yã. “Bũmb ning fãa a sẽn maand na n tõogame.” (Yɩɩl Sõamyã 1:1-3, NW) Bũmb a woto d sẽn tõe n paama sɩd zemsa ne d vaeesgo.

A Maurice sẽn yaa karen-saamb sẽn dɩk a retrɛtã tẽe wakat fãa tɩ Biiblã ra tara yõod kʋdemdã yɛl wilgr la sɛb-minimã wɛɛngẽ. La a ra sãmbda sã n yaa Wẽnnaam vʋʋsem sõngã n vẽneg tɩ b gʋls-a. A sẽn kelg b sẽn wilg bũmb ning sẽn kɩt tɩ Wẽnnaam kõ a Gomdã b sẽn gʋlsã ãdem-biisã, a Maurice vaeesa Biiblã bãngr-goam toɛ-toɛya. A sẽn da yaa bi-bɩɩga, a ra zãmsa tẽn-kʋdem wẽndẽ yɛla, sɛb-minimã, siãnsã la zeogarafɩ wã. A sak n deegame t’a ra tara yam tɩ loog a meng nifẽ hal tɩ kɩt t’a pa tõog n sak n deeg makr wʋsg nins sẽn  wilgd tɩ Biiblã yaa sɩda ye. “Mam da fõr n kẽe vɩ-nana, arzɛk baoob la yõ-noogr vɩɩm pʋgẽ hal tɩ pa nana ye. Zu-beedã, mam da ket n pa mi sebr ning sẽn yaa kãseng n yɩɩd to buud b sẽn zɩ n gʋlsã sõmblmã la a sɩdã ye.”

Masã a Maurice sẽn yɩɩd yʋʋm 70 wã gomda kɩbar ning sẽn gomd a Zezi sẽn puk tʋm-tʋmd a Toma wã yelle, n yet ne mi-beoog woto: “B talla mam nugã n kẽng ‘sãmpogrã sẽn sĩind zɩɩmã zĩigẽ,’ tɩ rẽ yiis sãmbg buud fãa wakat fãa yĩng tɩ m bãng tɩ Biiblã yaa sɩd bala.” (Zã 20:24-29) Wa tʋm-tʋmd a Poll sẽn yeel ne bʋʋmã, Biiblã wilgda sũur tagsg sẽn yaa to-to la a kɩtdẽ tɩ vɩɩmã tall võore. A sɩd yaa vɩɩm manesem sebre.

A kɩtdame tɩ vɩɩm sẽn gudg lebs n sigl sõma

Biiblã leb n kõta sagls sẽn sõngd nebã tɩ b bas minim wẽnse. A Daniɛll tõog n basa sɩgaar yũub sẽn yaa minung sẽn dẽgemdã, la a bas reem yaar la rã-yũurã. (Rom dãmba 13:13; 2 Korẽnt dãmba 7:1; Galat dãmba 5:19-21) Sɩda, sẽn na yɩl n bas minung a woto la f yeelg “nedemd paalgã” rẽnda f maan modgr sõma-sõma. (Efɛɛz rãmba 4:22-24, NW) A Daniel yeelame: “Woto ra yaa toogo, bala tõnd pa-zems-zãngã yaa kãsenga.” Baasg zãnga, a tõogame. Masã, a Daniel karemda Wẽnnaam Gomdã daar fãa, la a kɩtdame t’a ket n pẽ a Zeova.

A Daniel sẽn da bɩtã, a ra tara waoogr wʋsg ne Biiblã, baa ne a sẽn da zɩ n karem-a wã, la a ra pʋʋsda Wẽnnaam yʋng fãa. La bũmb n da paooge. A ra pa tar sũ-noog ye. Yɛlã toeemame, a sẽn wa n yã Wẽnnaam yʋʋrã Biiblã pʋgẽ a pipi wã. (Yikri 6:3, NW; Yɩɩl Sõamyã 83:18, NW) Rẽ poore, a tũnuga ne a Zeova yʋʋrã a pʋʋsgã pʋgẽ, t’a pʋʋsgã pẽneg-a ne-a wʋsg paase. “A Zeova lebga ned ning sẽn pẽ maam n yɩɩdã, la a ket n yaa m zo-nongr sẽn yɩɩdã.”

A Daniel sẽn wa n nan pa zãms Biiblã t’a ra getame tɩ beoog-daarã yaa libsgu. A yeela woto: “F pa baood n na n tags wʋsg n yaool n yã bũmb ning sẽn maand dũniyã pʋgẽ wã ye. M da zoeta rabeem, la m mak n na n tʋma wʋsg n da ning rẽ m yamẽ ye.” Rẽ poore, a zãms n bãngame tɩ Wẽnnaam na n lugla tɩrlem n kõ neba fãa tẽng sẽn yɩlg zugu, zĩig ning ãdem-bi-sakdbã sẽn na n paam laafɩ la sũ-noog sẽn pa sata. (Yɩɩl Sõamyã 37:10, 11; Daniɛll 2:44; Wilgri 21:3, 4) Masã a Daniel tara saagr sẽn yaa sɩda. Biiblã pãn-tusd-kãngã sẽn kɩtd tɩ ned vigl sõma wã kɩtame t’a tall tagsg sẽn yaa sõma vɩɩmã zugu.

Sõngr sẽn na yɩl n tõog yĩn-sidg zu-loeesã

A George ma wã sẽn da wa n ki wã t’a ra tara yʋʋm a yopoe. A sã n da kẽed gãag yʋngo a ra maanda yɩɩre, n pa mi a sã n da na n yika vẽk-n-beoog vɩɩg ye. Rẽ, a karma bũmb ning a Zezi sẽn yeel kũumã la vʋʋgrã wɛɛngẽ woto wã: “Wakat watame tɩ fãa sẽn be [tẽegr, NW] yaad pʋsẽ na n wʋm [a Zezi] koɛɛg n yi.” A Zezi gom-kãensã leb n kẽe a sũurã: “Mam yaa vʋʋgre la vɩɩm. Ned ninga sẽn tẽed maam, baa yẽ sã n ki, a na paam vɩɩm.” (Zã 5:28, 29;11:25) Tagsa a woto ra wõnda bũmb sẽn yaa tɩrga, sẽn zems la sẽn belsde. A George yeelame: “Sɩd kãng pa be yamleoog ne yam-tagsgã bal ye, a leb n kẽeda sũurã me.”

A Daniel me yell d sẽn deng n gomã ra zoeta rabeem. A ma wã pa tõog n wub-a a toor ye, rẽ n so tɩ b kẽng ne-a kɩɩbs rot wʋsg zĩisẽ. Wakat fãa, a tagsame tɩ b bak-a-la toore, t’a ra tʋll bãan ning zak sẽn tar nonglem pʋgẽ zĩndg sẽn kõtã ne a sũur fãa. A wa n baas n yãa a sẽn da baood bũmb ningã a Biibl zãmsgã pʋgẽ. A Daniel wa n maana lagem-n-taar ne a Zeova Kaset rãmbã  kiris-neb tigingã, n lebg tẽebã zak neda. Beenẽ, a yãame tɩ neb a taabã sak-a lame la b nong-a. Sɩda, Biiblã bee nafr vẽenega, la a yaa sõma ne yĩn-sidgã.

Tẽeg-y t’a Zeova nee bũmb ning sẽn be tõnd sũyã pʋsẽ wã, la t’a mii tõnd sẽn baood bũmb ningã. Wẽnnaam ‘feesda sũuri,’ la a kõta “ned fãa wa sẽn zems a manesem.”—Yelbũna 21:2; Zeremi 17:10.

Sagls sẽn zems zak pʋgẽ vɩɩmã wɛɛngẽ

Biiblã kõta sagls sẽn zemse, sã n wa yaa ninsaalbã zems-n-taar ne taab wɛɛngẽ. A George yeelame: “Nedemd sẽn kɩɩsd taab bɩ mo-yõsã bee yɛl nins sẽn wat ne sũ-sãams n yɩɩdã sʋka.” Wãn to la a maood ne-ba? “Mam sã n tagsdẽ tɩ ned tara yell ne maam, m tũuda sagl-vẽeneg ning sẽn be Matɩe 5:23, 24 pʋgẽ wã: ‘Maneg f yella ne f ba-biigã.’ M sẽn tõe n gom mo-yõsrã yell balã womda biisi. M nee Wẽnnaam laafɩ wã Biiblã sẽn gomd a yellã. Biiblã sagls tara pãnga. B sɩd zemsame.”—Filip rãmba 4:6, 7.

Pag ne a sɩd sã n pa zems taaba, b yiibã fãa segdame n “wɩng ne kelgre la [b] maag ne goama la [b] maag ne sũ-yikri.” (Zak 1:19) Saglg a woto manegda yẽsgã. A George paasame: “Mam sã n tũ saglg ning sẽn yet tɩ m nongẽ la m zã m pagã wala m mengã, m nee a biisã zĩig pʋgẽ. Yaa nana ne-a n yɩɩd t’a waoog-ma.” (Efɛɛz rãmba 5:28-33) N-yẽe, Biiblã zãmsda tõnd d sẽn na n maan to-to n sak n deeg d mengã pa-zems-zãng la d mao ne-ba, la d sẽn na n tõog to-to n mao ne neb a taabã rẽnda.

Sagls sẽn tar yõod wakat fãa

Rĩm sẽn tar yam a Salomo yeelame: “Teeg Zusoaba ne f sũur fãa la f ra teeg f meng bãngr ye. Fo sẽn maand bũmb ninga fãa, bɩ f tẽeg Zusoaba yelle, la b na n demsa fo sorã.” (Yelbũna 3:5, 6) Ad gom-kãensã võor wʋmb yaa nana, la b yaool n sɩd zulmẽ me!

Biiblã kõta pãng neer maaneg yĩnga. A kɩtdame tɩ sẽn nong-b Wẽnnaamã vɩɩm zems ne a raabã la a kɩtdẽ tɩ b paamd sũ-noogo, b “sẽn tũud Zusoaba tõodã.” (Yɩɩl Sõamyã 119:1) Tõnd vɩɩmã yɛl sẽn yaa to-to ning fãa, Biiblã tara sor-wilgr la sagls sẽn yaa tɩlae ne-do. (Ezai 48:17, 18) Karm-y-yã daar fãa, bʋgs-y y sẽn karemd bũmb ningã zug la y tũ. A na n kɩtame tɩ y yamã yɩ yɩlemd la a tik yɛl nins sẽn yaa yɩlem la sõma wã zutu. (Filip rãmba 4:8, 9) Y na n zãmsa y sẽn na n vɩɩmd to-to n paam sũ-noog vɩɩmã pʋgẽ, la sẽn paase y na n bãnga y sẽn na n nong vɩɩmã Naand to-to.

Y sã n maan woto, wa sẽn yɩ to-to ne neb milyõ rãmb a taabã, Biiblã ka na n yɩ seb-sõng bal ne yãmb ye, a na n sɩd yɩɩ vɩɩm manesem sebre!

[Foto, seb-neng a 6]

Biiblã tõe n paasa yãmb sẽn dɩk sard kãn-kãe n na n tõog minim wẽnsã pãnga

[Foto, seb-neng a 7]

Biiblã zãmsda yãmb y sẽn na n pẽneg Wẽnnaam to-to