Sũur pʋgẽ neermã yõod kaoosdame
Sũur pʋgẽ neermã yõod kaoosdame
“BI-BƖƖG RƖKDA NEERMÃ N ZENG NE ZƲG-SÕNGO,” WOTO LA KIRIS-NED SẼN KƲƲL SẼN TAR KƖS-SƖD YEEL-YÃ.
N-yẽe, hal sẽn kaoose, ninsaalb nong n lʋɩɩsdã yĩngã neerem taoore, tɩ rẽ kɩtdẽ tɩ b nong n tar tags-kɛg ne sũur pʋgẽ zʋg-sõma wã. La tõnd Naandã geta tõnd sẽn yaa to-to d sũyã pʋsẽ wã, baa tõnd yɩng yalẽ wã sẽn yaa to-to fãa. Rẽ wɛɛngẽ wã, a kõo makr sẽn be rasãnd n yɩɩd ne tagsg sẽn bɩ tallgo. Sã n yaa ne Biiblã, Wẽnnaam mengã yeta a meng wɛɛngẽ woto: “Tɩ bõe, Wẽnnaam ka get wa ninsaal sẽn geta ye. Ninsaal geta nin sẽn ne, la Wẽnnaam geta sũuri.”—1 Sãmwɛll 16:7.
Yaa Wẽnnaam n yaa ninsaal neerem hakɩkã yẽgre, la a Gomdã wilgdame tɩ d sã n wa baood n na n mag n bãng ned yõod meng-mengã, yaa tẽebã zʋg-sõma n tar yõod n yɩɩda. Biiblã yetame: “Pag tõe n nagame n belg neda. Neer loogdame. La yaa pag ninga sẽn zoet Zusoaba la b na n pẽge.” (Yelbũna 31:30) Sɩda, tõe tɩ yĩngã neermã solg sũur pʋgẽ dawẽndlem. (Ɛstɛɛr 1:10-12; Yelbũna 11:22) Baa ne yĩngã neerem sẽn tõe n wa sa wã, sũur pʋgẽ neermã, sẽn yaa sũur pʋgẽ zʋg-sõama wã tõe n bɩɩme la a kaoose.
Woto yĩnga, ad sɩd yaa yam bũmb tɩ d bɩɩs zʋg-sõma wala nonglem, laafɩ, sũmare, sõmblem, maan-neere, tẽebo, sũ-bʋgsem la yõk-m-menga! (Galat dãmba 5:22, 23) Woto, d tõe n paama sũur pʋgẽ neermã yõod sẽn kaoosdã.—1 Pɩɛɛr 3:3, 4.