Bɩ nonglmã keng-yã
Bɩ nonglmã keng-yã
“Nong Zusoaba [“a Zeova,” NW] fo Wẽnnaam ne f sũur fãa, la ne f sɩɩga fãa, la ne f yam fãa.”—MATƖE 22:37.
1. a) Zʋg-bʋs la kiris-ned bɩɩsda? b) Kiris-ned zʋg-sõng ning sẽn yaa kãseng n yɩɩdã yaa bʋgo, la bõe yĩnga?
KIRIS-NED bɩɩsda zʋg sõma wʋsg sẽn na yɩl n yɩ ministr sẽn tʋmd sõma. Yelbũn sebrã wilgda bãngrã, yɛl võor wʋmbã, la yamã yõod sõma-sõma. (Yelbũna 2:1-10) Tʋm-tʋmd a Poll wilgame tɩ yaa tɩlae tɩ d tall tẽeb sẽn yaa kãn-kãe la saagr sẽn tar pãnga. (Rom dãmba 1:16, 17; Kolos rãmba 1:5, NW; Hebre dãmba 10:39) Tõog-toogã la yõk-m-mengã me tara yõod wʋsgo. (Tʋʋma 24:25; Hebre dãmba 10:36) La bũmb n be t’a sã n ka be, na n booga zʋg-sõma a taaba fãa pãnga, la tõeeme meng n kɩt tɩ b pa tall yõod ye. Bõn-kãng yaa nonglmã.—1 Korẽnt dãmba 13:1-3, 13.
2. Wãn-wãn la a Zezi wilg nonglmã yõodo, la sʋgs-bʋs la rẽ wat ne?
2 A Zezi wilga nonglmã yõod a sẽn yeel tɩ: “Yãmb sã n nong taaba, neba fãa na n bãngame tɩ yãmb yaa mam karen-biisi.” (Zã 13:35) Nonglmã sẽn yaa bãnd ning sẽn kɩtd tɩ b bãng kiris-neb hakɩkã n welgã yĩnga, d segd n maana sʋgsg wala woto: Nonglem yaa bõe? Bõe yĩng tɩ tar yõod wʋsg woto t’a Zezi yeel tɩ sẽn yɩɩd bũmb a to fãa, yaa rẽ n zẽngd a karen-biisã? Wãn to la d tõe n bɩɩs nonglem? Ãnd la d segd n nongẽ? Bɩ d vaees sʋgs-kãensã?
Nonglem yaa bõe?
3. Wãn to la b tõe n bilg nonglmã võore, la bõe yĩng tɩ yamã la sũurã fãa kẽed sʋka?
3 Nonglem võor bilgr a yembr yaa ‘zood sẽn be yamleoog f sẽn tar ne ned a to, bɩ f sẽn na n nong-a wʋsgo.’ Yaa zʋg-sõng sẽn tusd nebã tɩ b tʋm neb a taabã neer yĩnga, tɩ wakat ning bɩ b modg walla b mong b mens wʋsg n maan dẽ. Wa b sẽn bilg-a to-to Biiblẽ wã, nonglmã tɩ loee ne yamã la sũurã. Yamã bɩ bãngrã tara tʋʋmd rẽ pʋgẽ, bala ned ning sẽn nonga, a nonga la a miẽ tɩ yẽ la ninsaalb a taabã a sẽn nonga fãa tara b pãn-komsem la b zʋg-sõma. Sẽn paase, bãngrã tɩ loee ne nonglem, bala neb n be tɩ kiris-ned nong-ba, tõe tɩ wakat ninga a kɩɩsda a mengã tʋlsem, bala a mii a sẽn karemd Biiblã yĩng tɩ Wẽnnaam datame t’a maan woto. (Matɩe 5:44; 1 Korẽnt dãmba 16:14) La baasgo nonglem yita sũur pʋgẽ. Nonglem hakɩkã wa b sẽn vẽneg-a Biiblã pʋgẽ wã zɩ n yɩ zug bãngr bũmb bal ye. A baooda pʋ-peelem wʋsg tallg la kẽes-m-meng zãng ne f sũur fãa.—1 Pɩɛɛr 1:22.
4. Wãn-wãn la nonglmã yaa loɛtg sẽn tar pãnga?
4 Neb nins sũy sẽn tar dat-m-yembrã pa tõe tao-tao n tall zems-n-taar sɩd-sɩd sẽn naag ne nonglem ye, bala ned sẽn nong seglame n na n dɩk ned a to wã ratem n lʋɩɩs a rẽndã taoore. (Filip rãmba 2:2-4) A Zezi goam nins sẽn yet tɩ ‘kũun bee barka [“sũ-noog,” NW] n yɩɩd reegrã’ sɩd yaa sɩda, sẽn yɩɩd fãa kũunã sã n yaa nonglem yĩnga. (Tʋʋma 20:35) Nonglem yaa loɛtg sẽn tar pãng wʋsgo. (Kolos rãmba 3:14) Naoor wʋsgo, a tɩ loee ne zoodo, la nonglmã loets tara pãng n yɩɩd zood rẽndã. Wakat ninga b bilgda zems-n-taar buud ning sẽn be ned ne a pag sʋkã wala nonglem. La nonglem ning Biiblã sẽn sagend tõnd tɩ d bɩɩsã kaoosd n yɩɩda yĩngã neerem. Pag ne a sɩd sã n sɩd nong taaba, b paada ne taaba, baa lagem-n-taar yĩngã wɛɛngẽ sã n ye pa tõe, kʋʋlmã yĩng bɩ b ned a yembr sẽn lebg koams yĩnga.
Nonglmã yaa zʋg sẽn tar yõod wʋsgo
5. Bõe yĩng tɩ nonglem yaa kiris-ned zʋg-sõng sẽn yaa kãsenga?
5 Bõe yĩng tɩ nonglmã tar yõod wʋsg ne kiris-neda? Pipi, ya a Zezi sẽn kõ a karen-biisã fãa noor tɩ b nong taabã yĩnga. A yeelame: “Yãmb sã n maan bũmb nins fãa mam sẽn yeel yãmbã, yãmb yaa mam zo-rãmba. Mam sẽn yet yãmbã, yaa tɩ y nong taaba.” (Zã 15:14, 17) Yiib-n-soaba, a Zeova mengã sẽn yaa nonglmã yĩngã, la tõnd sẽn ya a balemdbã d segd n dɩka a togs-n-taare. (Efɛɛz rãmba 5:1; 1 Zã 4:16) Biiblã yetame t’a Zeova la a Zezi bãngr kõta vɩɩm sẽn pa sate. Wãn to la d tõe n yeel tɩ d mii Wẽnnaam, d sã n pa makd n na n yɩ wa yẽ? Tʋm-tʋmd a Zã yeela woto: “Ned ninga sẽn ka tar nonglem ka mi Wẽnnaam ye, tɩ bõe Wẽnnaam yaa nonglem.”—1 Zã 4:8.
6. Wãn-wãn la nonglmã tõe n kɩls tõnd vɩɩmã nens toɛ-toɛ tɩ zemse?
6 Nonglmã tara yõod bʋʋm a tãab-n-soab yĩnga: A sõngda tõnd tɩ d kɩls d vɩɩmã nens toɛ-toɛ tɩ zemse, la a kɩtdẽ tɩ d tʋmd ne yam-tusdi sẽn yaa sõma n paasdẽ. Wala makre, tara yõod wʋsg tɩ d ket n paamd Wẽnnaam Gomdã bãngr wakat fãa. Ne kiris-neda, bãngr a woto yaa wa rɩɩbo. Rẽ sõngd-a lame t’a bɩ la a tʋm tɩ zems ne Wẽnnaam daabã. (Yɩɩl Sõamyã 119:105; Matɩe 4:4; 2 Tɩmote 3:15, 16) La a Poll keooga woto: “Yam vẽnegr wukda neda, la nonglem sõngdame.” (1 Korẽnt dãmba 8:1) Ayo, bõn-wẽng pa be ne bãngr sẽn yaa takɩ ye. Yellã bee ne tõndo: d tara yel-wẽn tʋlsem. (Sɩngre 8:21) Nonglmã pãn-tusdg sẽn kɩlsd yɛlã tɩ zemsã sã n ka be, bãngrã tõe n kɩtame tɩ ned wuk a meng n tags t’a sãoo a taaba. Rẽ pa na n zĩndi, sã n mik tɩ sẽn yɩɩd fãa yaa nonglmã n tusd-a ye. “Nonglem ka pẽgd a meng ye, la a ka wukd a meng ye.” (1 Korẽnt dãmba 13:4) Sã n yaa nonglem n tusd kiris-neda, ba a sã n paam bãngr wʋsgo, a pa lebgd wuk-m-meng soab ye. Nonglmã kɩtdame t’a kell n tall sik-m-menga, la a kɩtdẽ t’a pa rat n bao yʋʋr a meng yĩng ye.—Yɩɩl Sõamyã 138:6; Zak 4:6.
7, 8. Wãn to la nonglmã sõngd tõnd tɩ d nang pãng n paas bũmb nins sẽn tar yõod n yɩɩdã pʋsẽ?
7 A Poll gʋlsa Filip rãmbã: “Mam sẽn kot bũmb ninga m pʋʋsg pʋgẽ yaa tɩ yãmb nonglem na paam paasg daar fãa ne bãngre la yam-vẽnegre, tɩ yãmb bãng bũmb nins sẽn yaa sõama n yɩɩda.” (Filip rãmba 1:9, 10) Kiris-ned nonglmã na n sõnga tõnd tɩ d tũ sagl-kãngã n sɩd bãng bũmb nins sẽn yaa sõma n yɩɩdã. Wala makre, ges-y goam nins a Poll sẽn taas a Tɩmote wã: “Ned sã n dat n yɩ karen-saamba [“yel-gɛta,” NW], a soab baooda tʋʋmd sẽn yaa neere.” (1 Tɩmote 3:1) Yʋʋmd 2000 tʋʋmd yʋʋmdã sasa, dũniyã gill zugu, tigimsã sõor sẽn paasã yaa 1 502 tɩ kɩt b fãa sõor lebg 91 487. Woto yĩnga, b rata kẽem dãmb n paas hal sõma, la neb nins sẽn baood n na n paam zu-no-kãnga wã zemsa pẽgre.
8 Baasg zãnga, neb nins sẽn paamd yel-gɛt tʋʋmdã na n talla kɩls tɩ zemse, b sã n ning zu-no-kãngã bõn-datlã b yamẽ. Pa zu-sobend paoongo, bɩ yʋʋr sẽn yi n yɩɩd balã n yaa bũmb ning sẽn tar yõod n yɩɩdã ye. Kẽem dãmb nins sẽn tat a Zeova yamã yaa nonglem yẽ yĩng la b saam-biisã yĩng n tusd-ba. B pa baood naam bɩ pãng ye. Tʋm-tʋmd a Pɩɛɛr sẽn sagl tigingã kẽem dãmb tɩ b tall manesem sõng poore, a gom n tadga b sẽn segd n tall “sik-m-menga” zugu. A sagla neba fãa sẽn be tigingã pʋgẽ wã woto: “Bɩ y sik yãmb mens Wẽnnaam sẽn yaa pãng soaba taoore.” (1 Pɩɛɛr 5:1-6) Ned ning fãa sẽn baood n na n paam zu-no-kãngã segd n gesa kẽem dãmb ka tɛkã sẽn be dũniyã gill zugã mak-sõngo. B yaa tʋmdba, sik-m-mens rãmba, tɩ rẽ kɩt tɩ b yaa bark n kõ b tigimsã.—Hebre dãmba 13:7.
Yam-sõng sõngda tõnd tɩ d tõog toogo
9. Bõe yĩng tɩ kiris-nebã talld kãabs nins a Zeova sẽn maana b yamẽ?
9 Zĩig a to la d ne tɩ tara yõod tɩ nonglmã tus-du. Biiblã kãabda neb nins sẽn baood wẽn-sakr nonglem yĩngã bark wʋsg masã, la bark kãsems sẽn pa tõe n bãng n bilg beoog-daare. (1 Tɩmote 4:8) Kiris-ned sẽn tẽed kãab-kãensã sõma-sõma, la sẽn kɩs sɩd t’a Zeova ‘yaa neb nins sẽn baood bãmba roandã,’ paamda sõngr n na n yals kãn-kãe tẽebã pʋgẽ. (Hebre dãmba 11:6) Tõnd wʋsg sẽn yɩɩd gẽegda Wẽnnaam kãabsã pidsg ne yãgbo, la d tagsd wa tʋm-tʋmd a Zã woto: “Amina! Bɩ y wa, Zusoab a Zezi.” (Wilgri 22:20) N-yẽe, d sã n tagsd bark nins sẽn gũud tõnd d sã n tall kɩs-sɩdã zut neere, a kengda tõnd tɩ d tõog toogo, wala a Zezi sẽn ning “sũ-noog sẽn be [yẽ, NW] taoora” a yamẽ tɩ sõng-a t’a tõog toogã.—Hebre dãmba 12:1, 2.
10, 11. Wãn-wãn la nonglmã sẽn tusd tõndã sõngd tõnd tɩ d tõog toogo?
10 La yaa wãn to yẽ, sã n mik tɩ yaa tõnd sẽn tʋll n vɩɩmd dũni paalgã pʋgẽ wã bal n tusd tõnd tɩ d sõgend a Zeova? Rẽ, nana-nana, d tõe n lebga yãg-yãg rãmb bɩ d sãam d sũyã, yɛlã sã n wa lebg toogo, bɩ yɛlã sã n pa maan wala tõnd sẽn tẽedã bɩ wakat ning tõnd sẽn gũudã ye. D tõeeme n wa be yell ning pʋgẽ sẽn yaa zãagr ne Wẽnnaamã. (Hebre dãmba 2:1; 3:12) A Poll goma pĩnd tũud-n-taag yʋʋr sẽn boond t’a Demas sẽn bas-a yelle. Bõe yĩnga? “A sẽn nong dũniyã” yĩnga. (2 Tɩmote 4:10) Neb nins fãa sẽn sõgend rat-m-yembr yĩng bal tõe n wa maana woto. Dũniyã sẽn kõt bũmb ninsã tõe n talla yamleoog ne-ba, tɩ b ye pa rat n modg b mens wʋsg masã sẽn na yɩl n wa paam bark nins sẽn watã ye.
11 Baa ne sẽn zems tɩ d tʋlg n paam bark beoog-daare, la saagr ne yolsg makrã taoorã, nonglmã kengda tõnd nanebã ne bũmb nins sẽn segd n tall yõod n yɩɩd d vɩɩmã pʋgẽ wã. Ya a Zeova raabã n tar yõodo, pa tõnd raabã ye. (Luk 22:41, 42) N-yẽe, nonglmã kengda tõndo. A kɩtdame tɩ d sak n gũ d Wẽnnaamã ne maag-m-menga, tɩ d sũy yaa noog ne bark buud fãa a sẽn kõtã, la d tar bas-m-yam t’a wakatã sã n ta, d na n paama bũmb nins fãa a sẽn kãabã, la sẽn yɩɩd rẽ. (Yɩɩl Sõamyã 145:16; 2 Korẽnt dãmba 12:8, 9) Nananda, nonglmã sõngda tõnd tɩ d ket n sõgendẽ tɩ pa tũ ne rat-m-yembr ye, bala “Nonglem . . . ka baood a meng sõngr bal ye.”—1 Korẽnt dãmba 13:4, 5.
Ãnd la kiris-nebã segd n nongẽ?
12. Sã n yaa ne a Zezi, ãnda la d segd n nongẽ?
12 A Zezi kõo no-kãseng n wilg tõnd sẽn segd n nong a soaba, a sẽn togs goam a yiib sẽn yit a Moiiz Tõogẽ wã. A yeelame: “Nong Zusoaba fo Wẽnnaam ne f sũur fãa, la ne f sɩɩga fãa, la ne f yam fãa,” la “Nong f [to, NW] wa f menga.”—Matɩe 22:37-39.
13. Wãn-wãn la d tõe n zãms n nong a Zeova, baa ne d sẽn pa tõe n yã-a wã?
13 Sã n yaa ne a Zezi goama, yaa vẽeneg tɩ sẽn yɩɩd fãa, pipi, d segd n nonga a Zeova. La d pa rog ne nonglem sẽn bɩ n pid zãng ne a Zeova ye. Yaa bũmb d sẽn segd n bɩɩse. Yaa tõnd sẽn wʋm a yell pipi wã n pẽneg-d ne-a. Bilf-bilfu, d zãms n bãnga a sẽn segl tẽngã to-to ãdem-biisã yĩnga. (Sɩngre 2:5-23) D bãnga a sẽn tall manesem ning ne ãdem-biisã, n pa bas-do, yel-wẽndã sẽn sɩng n kẽ ãdem-biisã, la a rɩka segls n na n fãag tõndo. (Sɩngre 3:1-5, 15) A talla sõmblem manesem ne neb nins sẽn da tar kɩs-sɩdã, la a baas n kõ a Biribl yendã a sẽn naana, tõnd yel-wẽnã sugr yĩnga. (Zã 3:16, 36) Bãngr kãngã sẽn tall paasgã kɩtame tɩ tõnd tall naneb ne a Zeova n paase. (Ezai 25:1) Rĩm a Davɩɩd yeelame t’a ra nonga a Zeova, A sẽn da get a yell ne nonglmã yĩnga. (Yɩɩl Sõamyã 116:1-9) Rũndã-rũndã, a Zeova geta tõnd yelle, n wilgd tõnd sore, n kõt-d pãng la a kengd d raoodo. D sã n zãmsd n paasd a zugu, d nonglmã ne-a paasdame.—Yɩɩl Sõamyã 31:24; Sofoni 3:17; Rom dãmba 8:28.
Wãn to la d tõe n wilg d nonglem?
14. Wãn to la d tõe n wilg tɩ d nonglmã ne Wẽnnaam yaa hakɩka?
14 Yaa sɩda, dũniyã gill zugu, neb wʋsg yetame tɩ b nonga Wẽnnaam, la b sẽn maand bũmb ningã kɩɩsda b yelsmã. Wãn to la d tõe n bãng tɩ d sɩd nonga a Zeova? D tõe n goma ne-a pʋʋsg pʋgẽ n yeel-a tõnd sẽn tagsd to-to. La d tõe n talla manesem sẽn wilgd d nonglmã. Tʋm-tʋmd a Zã yeelame: “Ned ninga sẽn sakd [Wẽnnaam] goama, Wẽnnaam nonglem sɩd bɩɩ yẽ pʋgẽ, ne bõn-kãnga tõnd miime tɩ tõnd tũuda bãmba.” (1 Zã 2:5; 5:3) Sẽn paas yɛl a taabã, Wẽnnaam Gomdã yeta tõnd tɩ d tigim taaba la d tall vɩɩm manesem sẽn yaa yɩlemde. D lakda d mens ne pʋ-lika, n togsd sɩda, la d tar tagsg sẽn yaa yɩlemde. (2 Korẽnt dãmba 7:1; Efɛɛz rãmba 4:15; 1 Tɩmote 1:5; Hebre dãmba 10:23-25) D wilgda nonglem n kõt neb nins sẽn be ratem pʋgẽ wã sõngr laogã wɛɛngẽ. (1 Zã 3:17, 18) La tõnd pa basd n pa zãms neb a taabã tɩ b bãng a Zeova ye. Rĩungã koe-noogã mooneg dũniyã gill zug bee rẽ sʋka. (Matɩe 24:14; Rom dãmba 10:10) Wẽnnaam Gomdã sakr yel-kãensã pʋsẽ yaa kaset sẽn wilgd tɩ tõnd nonglmã ne a Zeova wã yaa nonglem hakɩka.
15, 16. Wãn-wãn la nonglem ne a Zeova tall pãn-tusdg neb wʋsg vɩɩm zug rɩẽ?
15 Nebã sã n nong a Zeova, sõngd-b lame tɩ b rɩk sard sẽn yaa sõma. Rɩẽ, nonglem a woto tusa neb 288 907 tɩ b rɩk b vɩɩmã n kõ-a, la b mak sard kãngã b sẽn dɩkã, n deeg koom lisgu. (Matɩe 28:19, 20) B rɩk-m-meng-n-kõ wã võor da tagmame. Rẽ yɩɩ toeeng b vɩɩmã pʋgẽ. Wala makre, a Gazmend da yaa basketɛɛr kãsems yʋʋr sẽn yi Albani wã a yembre. Sẽn na maan yʋʋma, yẽ ne a pagã zãmsa Biiblã, la baa ne bõn-gɩdgdsã b baas n wa pidsa yɛl nins b sẽn baoodã n yɩ Rĩungã koe-moondba. A Gazmend deega lisg rɩẽ, n zĩnd neb 366 sẽn deeg lisg Albani yʋʋmd 2000 tʋʋmd yʋʋmdã sʋka. Zʋrnall n yiis sõsg a zug n yeele: “A vɩɩmã tara bõn-datla, la rẽ yĩnga, yẽ ne a zakã rãmb tara sũ-noog masã n yɩɩd pĩndã. Sã n yaa ne yẽ, pa yẽ mengã sẽn na n paam nafa wã n pak-a wʋsg ye, la ya a sẽn tõe n kõ wʋsg to-to n sõng neb a taabã.”
16 Woto me, saam-bi-poak sẽn deeg lisg paalem sẽn tʋmd petroll sosiete sẽn be Guam yĩng n paam tɩ b kãab-a tʋʋm sẽn yaood sõma. A sẽn tall taoor kẽngr woo taoor kẽngr n paam naam yʋʋm wʋsg pʋgẽ poore, b baas n kãab-a lame t’a yɩ perzidã. La pag zɩ n paam zĩ-kãngã Sosiete wã pʋgẽ pĩndã ye. La masã a ra rɩka a vɩɩmã n kõ a Zeova. Woto, a sẽn sõs yellã zug ne a sɩdã poore, saam-bi-poakã sẽn deeg lisg paalmã zãgsa zĩigã b sẽn kãab-a wã. Sẽn yaa lebende, a rɩka segls wakat pʋɩ-sʋk tʋʋmd yĩnga, sẽn na yɩl n kẽng taoor n yɩ ministr sẽn tʋmd wakat fãa, bɩ so-pakda. A nonglem a Zeova yĩngã tus-a lame t’a tʋlg n na n sõgen-a wa so-pakda, n bas ligd pʋgb dũni kãngã pʋgẽ. Sɩda, dũniyã gill zugu, nonglem a woto tusa neb 805 205 tɩ b maan so-pakrã tʋʋmd nens toɛ-toɛ yʋʋmd 2000 tʋʋmd yʋʋmdã sasa. Ad sɩd yɩɩ nonglem la tẽeb meng la so-pakdb kãensã sẽn wilgã!
B sũyã tus-b lame tɩ b nong a Zezi
17. Nonglem mak-sõng bʋg la d yãt a Zezi nengẽ?
17 A Zezi yaa mak-kãsenga, sã n yaa ne bas tɩ nonglmã tus-a t’a tʋma wɛɛngẽ. Sẽn deng t’a yɩ ninsaalã sasa, a talla nonglem ne a Ba wã la ne ãdem-biisã. A sẽn yaa yamã makr meng-menga, a yeelame: “Mam wa n lebga wa tʋʋm-mit [a Zeova] sɛɛgẽ, la m wa n lebga ned ning a sẽn da nong zall daar ne a to fãa, tɩ m sũur noom a taoor wakat fãa, n kɩdemd tẽngã tẽn-gãong sẽn kõt koodã wɛɛngẽ, la mam sẽn da nong bũmb ninsã ra bee ne ninsaalbã kamba.” (Yelbũna 8:30, 31, NW) A Zezi nonglmã tus-a lame t’a bas a yĩngr zĩigã tɩ b rog-a wala biig sẽn ka pãnga. A talla maag-m-meng la sõmblem ne sik-m-mens rãmbã la naong rãmbã, la a nams a Zeova bɛɛbã nusẽ. Sẽn na n baase, a kii ãdem-biisã fãa yĩng namsg ra-luk zugu. (Zã 3:35; 14:30, 31; 15:12, 13; Filip rãmba 2:5-11) Ad sɩd yaa mak-sõng ne yam-tusdi sẽn yaa sõma tallgo!
18. a) Wãn to la d bɩɩsd nonglem ne a Zezi? b) Wãn to la d wilgd tɩ d nonga a Zezi?
18 Neb nins sũy sẽn yaa tɩrsã sã n karemd a Zezi vɩɩmã kɩbay sẽn be Evãnzill dãmbã pʋsẽ wã la b tagsd bark wʋsg nins a kɩs-sɩd vɩɩmã sẽn wa ne b zutã zut neere, rẽ kɩtdame tɩ b nong-a wʋsgo, tɩ b na n bɩ b pʋsẽ. Rũndã-rũndã tõnd yaa wa neb nins a Pɩɛɛr sẽn togs woto wã: “Baa yãmb sẽn nan ka yã [a Zezi] nandã yãmb nonga bãmba.” (1 Pɩɛɛr 1:8) Tõnd nonglmã pukdame, d sã n wilgd tẽeb ne a Zezi la d rɩkd togs-n-taar ne a maan-m-meng maoong vɩɩmã. (1 Korẽnt dãmba 11:1; 1 Tesalonik rãmba 1:6; 1 Pɩɛɛr 2:21-25) Yʋʋmd 2000, tʋʋl-nif kiuug rasem 19, b tẽega neb sõor zãng sẽn yaa 14 872 086 bʋʋm nins d sẽn tar n segd n nong a Zezi, b sẽn wa a kũumã Tẽegrã b sẽn maand yʋʋmd-yʋʋmdã. Ad sɩd ra yaa sõor kãsenga! La a sɩd kengda raood tɩ d bãng tɩ neb wʋsg woto n dat fãagrã sẽn tũud ne a Zezi maoongã! Sɩd-sɩda, a Zeova la a Zezi nonglmã ne tõndã la tõnd nonglmã ne-bã kengda tõndo.
19. Sʋgs-bʋs sẽn tɩ loe ne nonglmã zut la d na n sõs zãmsg ning sẽn pʋgdã pʋgẽ?
19 A Zezi yeelame tɩ d segd n nonga a Zeova ne d sũyã fãa, ne d sɩɩgã fãa, ne d yamã fãa la d pãngã fãa. La a leb n yeelame tɩ d segd n nonga d taab wa d mense. (Mark 12:29-31) Yaa ãnd dãmba? La wãn to la nonglem d taab yĩngã sõngd tõnd tɩ d tall kɩls tɩ zems la yam-tusdi sẽn zemse? B na n wɛgsa sʋgs-kãensã zãmsg ning sẽn pʋgdã pʋgẽ.
Y tẽrame bɩ?
• Bõe yĩng tɩ nonglmã yaa zʋg-sõng sẽn tar yõod wʋsgo?
• Wãn to la d tõe n zãms n nong a Zeova?
• Wãn to la tõnd manesmã wilgd tɩ d nonga a Zeova?
• Wãn to la d wilgd d nonglem ne a Zezi?
[Zãmsgã sogsgã]
[Foto rãmba, seb-neng 20, 21]
Nonglmã sõngda tõnd tɩ d gũ yolsg ne maag-m-menga
[Foto, seb-neng 22]
A Zezi maoong kãsengã tusda tõnd tɩ d nong-a