Yãmb nonglmã taa hal zĩ-bʋgo?

“Nong f yak [“f to,” NW] wa f menga.”—MATƖE 22:39.

1. Bõe yĩng tɩ d sã n nong a Zeova bɩ d segd n nong d taab me?

B SẼN wa n sʋk a Zezi tɩ no-bʋg la kãseng n yɩɩdã a leokame: “Nong Zusoaba fo Wẽnnaam ne f sũur fãa, la ne f sɩɩga fãa, la ne f yam fãa.” Rẽ poore, a sõdga noor a yiib-n-soab sẽn wõnd pipi soabã woto: “Nong f yak [“f to,” NW] wa f menga.” (Matɩe 22:37, 39) N-yẽe, to nonglem yaa bãnd sẽn wilgd tɩ ned yaa kiris-neda. Sɩda, d sã n nong a Zeova, d segd n nonga d to. Bõe yĩnga? Bala d wilgda d nonglem ne Wẽnnaam, d sã n sakd a Gomdã, la a Gomdã kõta tõnd noor tɩ d nong d taaba. Woto yĩnga, tõnd sã n pa nong d saam-biisã la d saam-bi-pogsã, tõnd nonglmã ne Wẽnnaamã pa tõe n yɩ nonglem halaal ye.—Rom dãmba 13:8; 1 Zã 2:5; 4:20, 21.

2. Nonglem bʋg buud la d segd n tall ne d taabã?

² A Zezi sẽn da wa n yeel tɩ d segd n nonga d taabã, a ra gomda sẽn yɩɩd zood yelle. La a ra gomda nonglem sẽn yaa toor ne a soab ning sẽn nong n be zak neb ne taab sʋkã, bɩ rao ne pag sʋkã yelle. A ra gomda nonglem buud ning a Zeova sẽn tar ne a sõgen dãmb nins sẽn dɩk b mens n kõ-a wã, tɩ bãmb me tar ne yẽ wã yelle. (Zã 17:26; 1 Zã 4:11, 19) Gʋlsd sẽn yaa Zʋɩf a Zezi sẽn yã t’a ra gomda ne yama, sak n deegame tɩ tall nonglem ne Wẽnnaamã segd n yɩɩ “ne f sũur fãa, la ne f ratem fãa, la ne f yam fãa, la ne fo pãnga fãa.” (Mark 12:28-34) A ra bee bʋʋm. Nonglem ning kiris-ned sẽn bɩɩsd Wẽnnaam la a taabã yĩngã kẽesda tõnd yĩn-sidgã la d tagsgã sʋka. D tar-a-la d sũurẽ wã tɩ d yamã wilgd-a sore.

3. a) Wãn to la a Zezi zãms ‘Tõog karen-saamb’ t’a segd n yalga a tagsgã, sã n yaa ne a to sẽn ya a soabã? b) Wãn to la a Zezi makrã pak kiris-nebã rũndã-rũndã?

 ³ Wala a Luk sẽn wilgã, a Zezi sẽn wa n yeel tɩ d segd n nonga d taabã, ‘tõog karen-saamb a yembr’ n sʋk woto: “Ãnda la mam [to, NW]?” A Zezi tũnuga ne makr n leoke. Rao la b ra pãb n fã, n bas-a t’a sobg n dɩg sorã kɩrenga. Pipi yɩɩ maan-kʋʋd n pɩʋʋge, rẽ poore, yɩɩ Levi neda. B yiiba fãa pa ges a yell ye. Sẽn na n baase, Samari rao n wa, n yã raoã sẽn poglã, n ges a yell sõma. Bãmba b tãaba sʋka, ãnda n wilg t’a yaa rao ning sẽn poglã to? Leokrã ra yaa vẽenega. (Luk 10:25-37) Tõe tɩ rao ning sẽn da yaa Tõogã karen-saambã sũur pa yɩ noogo, a sẽn wʋm a Zezi sẽn yeel tɩ Samari ned ra tõe n yɩɩ ned to sẽn são maan-kʋʋd la Levi nedã. Vẽenega, a Zezi ra sõngda ra-kãngã t’a tall nonglem ne a to ne manesem sẽn yaa kãseng n yɩɩda. Kiris-nebã me nonglem yaa woto. Ges-y neb nins fãa b sẽn segd nongẽ wã.

Nonglem zakã pʋgẽ

4. Pipi, yɛ la kiris-ned wilgd nonglem?

⁴ Kiris-nebã nonga b zakã neba. Pagbã nonga b sɩdba, sɩdba nonga b pagba, roagdbã nonga b kamba. (Koɛɛg Soaba 9:9; Efɛɛz rãmba 5:33; Tɩt 2:4) Sɩda, rogem pʋgẽ nonglem bee zags wʋsg sẽn yɩɩd pʋsẽ. La kɩbay sẽn wilgd kãadem kaoobo, kẽed-n-taas b sẽn maan pãnga, la kamb b sẽn pa get b yell bɩ b sẽn namsdã wilgdame tɩ zagsã bee zu-loees pʋgẽ rũndã-rũndã, la tɩ rogem pʋgẽ nonglem tõeeme n pa sek sẽn na yɩl tɩ zems-n-taar zĩnd zak pʋgẽ ye. (2 Tɩmote 3:1-3) Sẽn na yɩl tɩ b zak pʋgẽ vɩɩmã sɩd yɩ noogo, kiris-nebã segd n talla nonglem buud ning a Zeova la a Zezi sẽn tarã.—Efɛɛz rãmba 5:21-27.

5. Ãnd sõngr la roagdbã baood b kambã wubr pʋgẽ, la a biisã yɩɩ wãn to ne neb wʋsgo?

⁵ Roagdb nins sẽn yaa kiris-nebã geta b kambã wa bobell sẽn yit a Zeova nengẽ, la b baooda a sõngr b kambã wubr pʋgẽ. (Yɩɩl Sõamyã 127:3-5; Yelbũna 22:6) Yaa woto la b bɩɩsd kiris-ned nonglem, sẽn sõngd-b tɩ b kogl kambã ne pãn-tusd-wẽns nins sẽn tõe n sãam-bã. Rẽ kɩtame tɩ roagdb wʋsg sẽn yaa kiris-neb paam sũ-noog buud ning ma a yembr sẽn be Peyiba sẽn paamã. A sẽn ges a biriblã sẽn zĩnd neb 575 sẽn deeg lisg Peyiba rɩẽ wã sʋkã poore, a gʋlsa woto: “Sasa kãngã, tʋʋmd ning mam sẽn tʋm yʋʋm 20 sẽn loogã paama keoobo. M yĩma sẽk la pãnga, n paas yɩɩre, modgre la sũ-sãamsã fãa masã.” Ad a sɩd tar sũ-noogo, a biriblã sẽn dɩk a toorẽ sard n yãk n na n sõgen a Zeova wã. Koe-moondb sõor sẽn sãd 31 089 sẽn kõ rapoor Peyiba rɩẽ wã sʋka, bãmb wʋsg yaa b roagdbã n zãms-b a Zeova nonglem.

6. Wãn to la kiris-ned nonglmã sõngd n paas kãadem pãnga?

⁶ A Poll boola nonglmã tɩ “bũmb fãa loɛtg sɩd-sɩdã,” la a tõe n kogla kãadem baa zu-loees wakate. (Kolos rãmba 3:14, 18, 19; 1 Pɩɛɛr 3:1-7) Rao sẽn be Rurutu sẽn yaa koom sʋk tẽn-bil t’a zãrem zems kɩlometr 700 ne Tahiti wã, sẽn sɩng Biiblã zãmsg ne a Zeova Kaset rãmbã, a pagã kɩɩs-a-la sõma-sõma. Pagã baas n dɩka kambã n loog n bas-a, n kẽng n tɩ vɩ Tahiti. La a kell n wilga nonglem n da toond a pagã ligd wakat fãa, la a boond telefonẽ n na n bãng a pagã bɩ kambã sã n data bũmbu. Woto, a maana a sẽn tõe tɛk n na n pids kiris-ned zɩɩbã. (1 Tɩmote 5:8) A pʋʋsa wakat fãa sẽn na yɩl t’a zakã neb ye lagem taaba, la a pagã wa n lebg n waame. Pagã sẽn lebg n wa wã, a sɩdã talla “nonglem la sũmar ne sũ-bʋgsem” ne-a. (1 Tɩmote 6:11) Yʋʋmd 1998, raoa reega lisgu, la a sũur yɩɩ noog rẽ poore, a pagã sẽn sak Biiblã zãmsgã. Zãms-kãng ra bee Biibl zãmsg 1 351 b sẽn maan rɩẽ, Tahiti filiallã sẽn get mooneg zĩig ning yellã pʋgẽ wã sʋka.

7. Sã n yaa ne rao a yembr sẽn be Alemayn, yaa bõe n kõ a kãadmã pãnga?

⁷ Alemayn tẽngã, rao n kɩɩs a pag ratem ne Biiblã sɩdã, la a ra tẽeda sɩd-sɩd t’a Zeova Kaset rãmbã ra rat n tudga a pagã. La kaoosg poore, a gʋlsa Kaset soab ning sẽn sõs pipi ne a pagã woto: “M pʋʋsd-f-la bark ne f sẽn kɩt tɩ mam pagã kẽ a Zeova Kaset rãmbã sʋkã. Pipi wã, m  da maanda yɩɩre, bala m da wʋma bõn-wẽns wʋsg b sẽn dõt-ba. La masã, m sẽn kẽng tigissẽ wã ne m pagã m bãngame tɩ m da tudga wʋsgo. M miime tɩ yaa sɩdã la m sẽn wʋmdã, la sɩdã kɩtame tɩ tõnd kãadmã pãng paas wʋsgo.” A Zeova Kaset rãmb 162 932 sẽn be Alemayn la bãmb 1 773 sẽn be koom sʋk tẽns Tahiti filiallã sẽn getã pʋgẽ wã, tara zags wʋsg sẽn tar zems-n-taar Wẽnnaam nonglem pʋgẽ.

Nonglem d saam-biisã sẽn yaa kiris-nebã yĩnga

8, 9. a) Ãnda n zãmsd tõnd tɩ d nong d saam-biisã, la bõe la nonglmã tusd tõnd tɩ d maane? b) Kõ-y makr sẽn wilgd nonglmã sẽn tõe n sõng saam-biisã tɩ b teel taab to-to.

⁸ A Poll yeela Tesalonik kiris-nebã tɩ: “Yãmb mens paama zãmsg Wẽnnaam nengẽ tɩ [y] nong taaba.” (1 Tesalonik rãmba 4:9) N-yẽe, neb nins ‘a Zeova sẽn zãmsã’ nonga taaba. (Ezai 54:13, NW) B nonglmã yaa vẽeneg b manesmã pʋgẽ, wa a Poll sẽn wilg a sẽn wa n yeel tɩ: “Bɩ y sõng taab ne nonglem.” (Galat dãmba 5:13; 1 Zã 3:18) Wala makre, b maanda woto, b sã n tʋgd n get saam-biis la saam-bi-pogs sẽn pa keem, n kengd yam-ka-m-meng rãmbã raoodo, la b teend pãn-komslem dãmbã. (1 Tesalonik rãmba 5:14) Tõnd nonglem halaalã sõngd n kɩtdame tɩ tõnd tẽeb arzãnã yalgdẽ.

⁹ Ankõn tigingã sẽn yaa Ekoatɛɛr tigims 544 a yembrã pʋsẽ, saam-biisã wilga b nonglem vẽenega. B tẽngã laog zu-loees n kɩt tɩ b wa ye pa tar tʋʋm la ligd ye. Rẽ n so tɩ sẽn na yɩl n paam ligdi, koe-moondbã rɩk sard n na n koos rɩɩb ne zĩm-yẽedbã sẽn be be wã, b sã n yi yʋng yẽeb n wa yir sasa. Ned fãa lagem n tʋmame, ne kambã fãa. B ra segd n sɩnga yibeoog inɛɛr sẽn na yɩl tɩ rɩɩbã segl n sa yibeoog lɛɛr a naase, zĩm-yẽedbã sã n wa lebg n wa. Ligd ning saam-biisã sẽn paama b ra pʋɩt-a-la taab tɩ zems ne b raabo. Sõng taab a woto sõng n wilga kiris-ned nonglem halaalã.

10, 11. Wãn to la d tõe n wilg nonglem ne saam-biis tõnd mengã sẽn pa mi?

¹⁰ La tõnd nonglmã pa tek kiris-neb nins tõnd mensã sẽn mi wã bal ye. Tʋm-tʋmd a Pɩɛɛr yeelame: “Tall-y nonglem ne saam-biisã lagem-taab fãa.” (1 Pɩɛɛr 2:17, NW) Tõnd nonga d saam-biisã la d saam-bi-pogsa fãa, bala b fãa yaa Wẽnnaam a Zeova balemdb wa  tõndo. Gudgr wakat tõe n kõo sor tɩ d wilg nonglem kãngã. Wala makre, yʋʋmd 2000 tʋʋmd yʋʋmdã sasa, sa-bɛd n wa ne vargr Mozãmbiki, tɩ tẽng pʋgẽ zabr sẽn ket n kẽngd taoor Ãngola kɩt tɩ neb wʋsg kẽ naong pʋgẽ. Saam-biis 31 725 sẽn be Mozãmbik tɩ 41 222 be Ãngola wã sʋka, bãmb wʋsg la yel-kãensã nams-yã. Woto yĩnga, Kaset rãmbã sẽn be tẽn-yakẽ sẽn yaa Afirik di Siidã toola kũun wʋsg sẽn na yɩl n yols saam-biisã sẽn be tẽn-kãensa wã ne b toogã. B sẽn tʋlg n dɩk “bũmb wʋsg” bãmb sẽn tarã n sõng b saam-biisã sẽn be ratem pʋgẽ wã wilgame tɩ b tara nonglem.—2 Korẽnt dãmba 8:8, 13-15, 24.

¹¹ D nee nonglmã me, saam-biisã sẽn be tẽns wʋsg pʋsẽ sẽn maand kũun Rĩungã rot la Tigis-kãsemsã Rot meeb yĩng tẽns nins nus sẽn pa zãad wʋsg pʋsẽ wã. Makr ne rẽ yaa Ill Salomo. Baa ne gudgrã sẽn yaa wʋsgã, Ill Salomo paama fɩɩgr ne koe-moondb a 6 koabg zugu, b sã n mak ne rɩẽ sõorã, ne koe-moondb sõor sẽn sãd 1 697. B geela tigis-kãseng roog meebo. Baa ne ko-sʋk tẽngã neb wʋsg sẽn da zoet n yit tẽngã, yamleoog tʋm-tʋmdb n yi Ostrali n wa sõng ne meebã. Wa n baas n yɩɩ tɩlae tɩ metbã looge, la rẽ tɩ b ra kõo tẽn-kãng saam-biisã zãmsg sẽn na yɩl tɩ b baas roogã yẽbgre. B zĩnda Ostrali n tool roogã babg ning sẽn maan ne kutã b sẽn da zoe n seglã. La b sẽn baas ro-neer kãngã balengã yĩngã sẽn yɩ sasa ning b sẽn daag meeb a taab n basã, na n yɩɩ kaset sẽn be rasãnd ne a Zeova yʋʋrã, la ne saam-biisã nonglem.

Wala Wẽnnaam, tõnd nonga dũniyã

12. Wãn to la d rɩkd a Zeova togs-n-taare, tõnd manesmã ne neb nins sẽn pa tar tõnd tẽebã wɛɛngẽ?

¹² Tõnd nonglmã teka d zakã rãmb la d saam-biisã bɩ? Ayo, pa woto, tõnd sã n yaa “Wẽnnaam togs-n-taas” ye. A Zezi yeelame: “Wẽnnaam nonga dũniyã hal tɩ b kõ b Biiga sẽn-ka-to, tɩ ned ninga fãa sẽn tẽed bãmb kõn sãam ye, la a na paam vɩɩm sẽn ka sɛta.” (Efɛɛz rãmba 5:1; Zã 3:16) Wala Wẽnnaam a Zeova, d tara nonglem manesem ne neba fãa, tɩ neb nins sẽn pa be tõnd tẽebã pʋgẽ be sʋka. (Luk 6:35, 36; Galat dãmba 6:10) Sẽn yɩɩd fãa, zĩ-kãng wɛɛngẽ, d moonda Rĩungã koe-noog la d togsd neb a taabã nonglem tʋʋm-kãseng ning Wẽnnaam sẽn maan b yĩngã. Rẽ tõe n waa ne fãagr n kõ ned ning fãa sẽn kelgdã.—Mark 13:10; 1 Tɩmote 4:16.

13, 14. Kɩba-bʋs n wilgd saam-biis sẽn wilg neb sẽn pa Kaset rãmb nonglem, baa ne sẽn yɩ toog wʋsg ne-bã?

 ¹³ Ges-y zall so-pakdb a naas sẽn be Nepall makrã. B tʋm-b-la galʋ-tẽngẽ sẽn be tẽn-kãng goabg la a nen-taoor sʋkã babgo. Yʋʋm a nu wã sẽn loogã sasa, b wilga b nonglem n kõ kasetã galʋ-tẽngã pʋgẽ ne tẽn-biy nins sẽn gubgã ne maag-m-menga. Sẽn na yɩl n tʋm b moonegã zĩig fãa, naoor wʋsgo b toga sor lɛɛr dãmb wʋsg ne kut-wiid tʋʋlg sẽn yɩɩd degre celsius 40 pʋgẽ. B nonglmã la b ‘sẽn maan neer ne sũ-marã’ woma bi-sõma, sebr zãmsg sull sẽn maan tẽn-bil a yembrẽ wã. (Rom dãmba 2:7) Yʋʋmd 2000, tʋʋlg kiuugã, neb 32 n wa n kelg zãma sõsgã bab-sak sull yel-gɛtã sẽn kõ a kaagrã wakatã. Nepall paama koe-moondb sõor sẽn sãd 430 rɩẽ, tɩ fɩɩgrã yaa 9 koabg zugu. Vẽenega, a Zeova ningda tõnd saam-biisã sẽn be tẽn-kãng pʋgẽ wã yẽesmã la b nonglmã barka.

¹⁴ Kolõmbi, wakat bilf pʋgẽ zall so-pakdb n kẽng n na n tɩ moon Wayuu Ẽndiẽ rãmbã sʋka. Sẽn na yɩl n maan woto, b ra segd n zãmsa buud-gom-paalga, la ratem ning sẽn be nonglem b sẽn tallã paama keoobo, neb 27 sẽn wa n kelg zãma sõsgã, baa ne sa-kẽeng sẽn da niidã. Yẽesem sẽn naag ne nonglem wa so-pakdb kãensã sẽn talla buud sõng n waa ne fɩɩgr 5 koabg zug Kolõmbi la koe-moondb sõor sẽn sãd 107 613. Danemarke, saam-bi-poak sẽn kʋʋl n da rat n moon neb a taabã koe-noogã, la a ra yaa koamsa. A pa koms raood ye, a sɩngame n gʋlsd neb nins sẽn wilg ratma lɛta. Masã wã, a gʋlsda neb 42 la a maand Biibl zãmsg 11 ne neba. A bee koe-moondb sõor sẽn sãd 14 885 sẽn kõ rapoor Danemark rɩẽ wã sʋka.

Nong-y y bɛɛbã

15, 16. a) A Zezi yeelame tɩ tõnd nonglmã segd n taa hal zĩ-bʋgo? b) Wãn to la saam-biis sẽn yaa taoor lʋɩtbã tall nonglem manesem ne ned sẽn dõd a Zeova Kaset rãmbã?

¹⁵ A Zezi yeela Tõog karen-saambã t’a ra tõe n gesa Samari ned wa a to. A tãng zug Zãmsgẽ wã, a Zezi zãaga zĩig meng a sẽn yeel tɩ: “Yãmb wʋmame tɩ b rag n yeelame: Nong f yaka la kisg f bɛ. La mam yeta yãmb tɩ y nong yãmb bɛɛba, la y pʋʋs neb nins sẽn maand yãmb wẽnga la sẽn namsd yãmba yĩnga, tɩ yãmb tõe n yɩ yãmb Ba sẽn be arzãna kamba.” (Matɩe 5:43-45) Baa ned sã n kɩɩsd tõndo, d makdame n na n “maan sõama n tõog wẽnga.” (Rom dãmba 12:19-21) Sã n tõeyã, d kõt-b-la bũmb ning d sẽn tar tɩ be yõod n yɩɩdã: sɩdã.

¹⁶ Ukrɛn tẽngã, Kremenchuk Herald zʋrnallã yeelame t’a Zeova Kaset rãmbã yaa tũudum will sẽn yaa wẽnga. Woto ra yaa yell menga, bala Erope, kẽer gomda a Zeova Kaset rãmbã yell woto, sẽn na yɩl tɩ nebã tẽ tɩ Kaset rãmbã tʋʋm segda ne boogr bɩ ne gɩdgre. Woto yĩnga, b tɩ yãa sõs-kãng yiisdã n kos-a t’a yiis sõsg zʋrnallẽ wã n dems sõsgã goama. A sakame, la ne sõsg ning sẽn yi zʋrnallẽ wã a gʋls n yeelame tɩ pipi sõsgã ra tika yell sẽn zĩnd zugu. Woto, saam-biis sẽn yaa taoor-lʋɩtb tʋg n yã-a lame yɛs n kõ-a kɩbay n paase. Sẽn na n baase, sõsgã yiisd bãngame tɩ pipi sõsgã ra pa sɩd ye, la a yiisa sõsg sẽn yeel tɩ pipi soabã pa sɩd ye. B sẽn tall pʋ-peelem la sõmblem ne-a wã, n kɩt tɩ yel-kãngã paam welgr ne nonglem, la rẽ woma bi-sõma.

Wãn to la d tõe n bɩɩs nonglem?

17. Bõe n wilgd tɩ tõeeme n pa yɩ nana wakat fãa tɩ d tall nonglem manesem ne neb a taabã?

¹⁷ Bi-pɛɛlg sã n doge, a roagdbã yɩta tao-tao n nong-a. Tall nonglem manesem ne kãsemb pa bũmb sẽn wat nana-nana woto wakat fãa ye. Tõe tɩ yaa woto yĩng la Biiblã sẽn togsd tõnd n yɩlemdẽ tɩ d nong taabã. Yaa bũmb d sẽn segd n bɩɩse. (1 Pɩɛɛr 1:22; 4:8; 1 Zã 3:11) A Zezi bãngame tɩ tõnd nonglmã ra na n paama makre, a sẽn yeel tɩ d segd n kõo d saam-biig sugr “hal tɩ ta naoor pis-yopoe la a yopoe” wã. (Matɩe 18:21, 22, NW) A Poll sagla tõnd tɩ d “maan sũmar ne taaba.” (Kolos rãmba 3:12, 13) Pa lingr la b sẽn yeel tõnd tɩ d ‘bao nonglmã’ ye! (1 Korẽnt dãmba 14:1) Wãn to la d tõe n maan woto?

18. Bõe n na n sõng tõnd tɩ d bɩɩs nonglem ne neb a taabã?

 ¹⁸ Pipi, wakat fãa d tõe n ninga nonglem ning d sẽn tar ne Wẽnnaam a Zeova wã d yamẽ. Nonglem kãng tusda tõnd wʋsg tɩ d nong d taaba. Bõe yĩnga? Bala d sã n maan woto, rẽ waoogda tõnd yĩngr Ba wã, la a wata ne ziir la pẽgr n kõt-a. (Zã 15:8-10; Filip rãmba 1:9-11) Yiib-n-soaba, d tõe n mak n gesa yɛlã wa a Zeova sẽn get-b to-to wã. Wakat ning fãa tõnd sẽn maan yel-wẽnde, d beegda a Zeova. La naoor wʋsgo, a kõta tõnd sugr n ket n nong-do. (Yɩɩl Sõamyã 86:5; 103:2, 3; 1 Zã 1:9; 4:18) Tõnd sã n bɩɩs a Zeova tagsgã, d na n dat n nonga neb a taabã la d kõ beegr nins b sẽn maan n beeg tõndã sugri. (Matɩe 6:12) Tãab-n-soaba, d tõe n talla manesem ne neb a taabã wa tõnd sẽn dat tɩ b tall manesem ning ne tõndã. (Matɩe 7:12) Tõnd sẽn pa zems zãngã, d nong n datame tɩ b kõ-d sugri. Wala makre, tõnd sã n togs goam sẽn sãam neb a taabã sũyã, d saagdame tɩ b na n tẽegame tɩ ned kam fãa maanda yel-wẽn ne a zɩlemd wakat-wakate. (Zak 3:2) Tõnd sã n dat tɩ neb a taabã tall nonglem ne-do, yaa d tall nonglem ne-ba.

19. Wãn to la d tõe n bao vʋʋsem sõngã sõngr nonglmã bɩɩsg pʋgẽ?

¹⁹ Naas-n-soaba, d tõe n baoa vʋʋsem sõngã sõngre, bala nonglmã yaa vʋʋsmã bil a yembre. (Galat dãmba 5:22, 23) Zoodo, zak pʋgẽ nonglem la pag ne rao nonglmã nong n pukda nana-nana. La d rata a Zeova vʋʋsem sõngã sõngr sẽn na yɩl n bɩɩs nonglem ning a Zeova sẽn tarã, nonglem ning sẽn yaa zems-n-taar loɛtg sẽn zems zãngã. D tõe n baoa vʋʋsem sõngã sõngre, d sẽn na n karemd Biiblã vʋʋsem sõng sẽn vẽneg tɩ b gʋlsã. Wala makre, d sã n zãmsd a Zezi vɩɩmã, d na n yãa a sẽn maan to-to ne nebã, la d tõe n zãms n dɩka a togs-n-taare. (Zã 13:34, 35; 15:12) Sẽn paase, d tõe n kosa a Zeova t’a kõ-d vʋʋsem sõngã, sẽn yɩɩd fãa, yɛl nins sẽn kɩt tɩ yaa toog ne-d tɩ d tʋm ne nonglmã pʋsẽ. (Luk 11:13) Sẽn na n baase, d tõe n baoa nonglem, d sã n pa n pẽneg kiris-neb tigingã. D sã n be ne saam-biisã la saam-bi-pogsã sẽn tar nonglmã, sõngda tõnd tɩ d bɩɩs nonglmã.—Yelbũna 13:20.

20, 21. Nonglem wilg-kãseng bʋg la a Zeova Kaset rãmbã maan yʋʋmd 2000 tʋʋmd yʋʋmdã sasa?

²⁰ Rɩẽ, ra yaa koe-noogã moondb sõor sẽn sãd 6 035 564 n da be dũniyã gill zugu. A Zeova Kaset rãmbã rɩka lɛɛr sõor zãng sẽn yaa 1 171 270 425 n bao nebã sẽn na yɩl n togs-b koe-noog kãngã. Yaa nonglem la sẽn kɩt tɩ b tõog toog tʋʋlgã, saag la waoodã pʋgẽ, b sẽn da wa n debd n na n tɩ tʋm tʋʋm-kãngã wã. Ra yaa nonglem n tus-b tɩ b sõs ne b karen-bi-taas la b tʋmd-n-taase, la b sõs ne neb b sẽn da pa mi lae-lae soayã zut la zĩis a taabã. Neb wʋsg Kaset rãmbã sẽn tɩ ges ra yaa toog-kae rãmba, tɩ kẽer da yaa kɩɩsdba. Baasg zãnga, kẽer wilga ratem, sẽn kɩt tɩ b maan lebg-n-tɩ-ges rãmb 433 454 049 n maan Biibl zãmsg 4 766 631 ne neba. *

²¹ Ad woto fãa sɩd wilga nonglem ning a Zeova Kaset rãmbã sẽn tar ne b Wẽnnaamã la ne b taabã! Nonglem kãng pa na n tol n maag ye. Tõnd kɩsa sɩd tɩ yʋʋmd 2001 tʋʋmd yʋʋmdã sasa b na n kõo ãdem-biisã kaset sẽn yaa kãseng n yɩɩd menga. Bɩ a Zeova barkã kell n zĩnd ne a balemdbã sẽn tar kɩs-sɩd la yẽesma, b sẽn ‘maand bũmba fãa ne nonglmã’ sasa!—1 Korẽnt dãmba 16:14.

[Tẽngr note]

Y tõe n wilga a võor bɩ?

• D sã n nong d taabã ãnda togs-n-taar la d rɩkda?

• Tõnd nonglmã segd n taa hal zĩ-bʋgo?

• Yel-bʋs b sẽn vɩɩmd n wilgd kiris-nebã nonglem?

• Wãn to la d tõe n bɩɩs kiris-ned nonglmã?

[Zãmsgã sogsgã]

 [Taablo, seb-neng 28-31]

A ZEOVA KASET RÃMBÃ TƲƲMD RAPOOR DŨNIYÃ GILL ZUGU, YƲƲMD 2000

 (Ges-y volim relie wã)

[Foto rãmba, seb-neng 25]

Kiris-nedemd nonglmã tõe n naaga zak neb taaba

[Foto rãmba, seb-neng 26]

Nonglmã tusda tõnd tɩ d togs d saagrã neb a taabã