A Zeova Kaset rãmbã kẽngda taoor ne kɩs-sɩd sẽn pa vigsdi!

Yʋʋmd-yʋʋmd tigisgã rapoore

YAOOLEM day kãensã sẽn tar sãmb-sãmbã pʋsẽ, a Zeova Kaset rãmbã welg n yaa toor n yaa kiris-neb sẽn tar kɩs-sɩd sẽn pa vigsdi. Rẽ yɩɩ vẽenega, Watch Tower Bible and Tract Society of Pennsylvania yʋʋmd-yʋʋmd tigisgẽ wã. Tigis-kãng zĩnda a Zeova Kaset rãmbã Tigis-kãseng roogẽ sẽn be Jersey City sẽn be New Jersey wã, yʋʋmd 2000, zĩ-likr kiuug rasem a 7. *

A sɩngr-goamẽ wã, tigisgã perzidã, a John Barr, sẽn ya a Zeova Kaset rãmbã Siglgã zug Sull nedã yeelame: “Tẽngã neb milyaar dãmbã fãa sʋka, yaa tõnd bal n mi la d tẽed t’a Zeova Biribl nongr sẽn yaa Kirist Zezi wã paama zĩnigr naam geerã zug saasẽ, n dɩt naam a bɛɛbã sʋka.” Kɩbay a yoob sẽn sidgd yĩng sẽn yit dũniyã gill zug kõo kaset ne kɩs-sɩd sẽn pa vigsd woto.

Tɩɩm saoogã tõogr ne Biiblã sɩd maasem Haiti

Tɩɩm saoogã bee wʋsg Haiti. A John Norman sẽn yaa Tʋʋmd-willã Sull taoor lʋɩtã yeelame: “Naoor wʋsgo, nebã kẽeda rʋbsã baleng pʋgẽ sẽn na yɩl n kogl b mense.” Tɩɩm soab a yembr talla sãmbse, a karg sẽn fiuug sãmpogr pʋgẽ wã sasa. ‘Wãn to la yel-kãngã tõe n paam maam, zĩn dãmb sã n kogenda maam?’ woto la a sʋk-yã. Wala neb wʋsg a taaba, a Zeova Kaset rãmbã zãmsa ra-kãngã sɩdã, la b sõng-a t’a bas tɩɩm saoogã. Sẽn wilgd tɩ fɩɩgr wʋsg tõe n zĩnda Haiti wã yaa tɩ yʋʋmd 2000, tʋʋl-nif kiuug rasem 19, neb sõor sẽn yɩɩd Rĩungã koe-moondb naoor a naas n kẽng Kirist kũumã Tẽegrẽ tẽn-kãng pʋgẽ.

B moona Koore sẽn yaa tẽn-yalengã pʋgẽ ne yẽesem

Koore, a Zeova Kaset rãmbã 40 koabg zug yaa wakat fãa so-pakdba. Filiall Sull taoor lʋɩt a Milton Hamilton yeelame: “Ne koe-moondb sõor kãseng kãngã, tõnd moonegã zĩig sẽn tar neb milyõ 47 wã, d tʋmd-a lame n sa vugr kiuug fãa.” Sẽn yɩɩd fãa fɩɩgrã yaa kãseng wʋsg mugsã tigims pʋsẽ. Mugsã bab-sak sull a yembrẽ, yirẽ Biibl zãmsg 800 la b maanda. B sã n pʋɩ tɩ zemse, woto yaa Biibl zãmsg a yembr koe-moond fãa yĩnga. Zu-bʋko, b ket n kẽesda saam-biis nins sẽn  yaa kom-bɩɩsã roog b pa-kẽesd-m-toogã yĩnga. La bãens rot taoor dãmba tara lohorem manesem ne kiris-nin-kãensã sẽn yaa kɩs-sɩd dãmbã, la b nong n kõt-b-la tʋʋm b sẽn baood tɩ ned sẽn be bas-yard maane.

Fɩɩgrã yell gesg Megsiki

Rĩungã koe-moondb sõor sẽn sãd 533 665 n kõ b pʋʋgã tʋʋmd rapoor Megsik yʋʋmd 2000, sa-sik kiuugã. Neb sõor sẽn yɩɩd sõor kãngã naoor a tãab n wa Tẽegrẽ wã. Tʋʋmdã will Sull taoor lʋɩt a Robert Tracy yeelame: “Tõnd bõn-datl rõandã yaa d me Rĩung Rot 240 n paase.” La a paasa woto: “La d ket n data Rĩung Rot wʋsg n paase.”

Kom-bɩɩsã sẽn be a Zeova Kaset rãmbã sẽn be Megsikã sʋkã kõta mak-sõma. Prɛtr katolik yeela woto bi-bɩɩg a yembr wɛɛngẽ: “M nongẽ lame n tall ned sẽn yaa wa yẽ bal m tũudmã neb sʋka. Mam pẽgda nin-kãensã b raabã sẽn tar pãngã la b sẽn dɩkd Biiblã n tʋmd ne yamã yĩnga. B zĩnda Wẽnnaam poorẽ, hali n gẽneg b yõy rẽ yĩnga.”

Burkĩnd tallg gudgr wakat Siera Leon

Yʋʋmd 1991, tʋʋl-nif kiuugã tɛka, tẽng pʋgẽ zabrã sẽn pusg Siera Leonã, neb tusa la b kʋ-yã, n pogle, bɩ n komse. Filiall Sull taoor lʋɩt a Bill Cowan yeelame: “Zabrã ne namsgã talla pãn-tusdg sẽn yaa kãseng nebã zutu. Neb wʋsg toor sẽn da kae ne tõnd koɛɛgã kelgda ne ratem masã. Nebã nong n wata tõnd Rĩung Rotẽ wã b pipi sẽn na yɩl n kelg tigisgã tɩ b pa bool-b ye. Naoor wʋsgo, b yalsda saam-biisã sorã zug n kot-b Biibl zãmsgo.” Baa ne tẽngã gudgr sẽn ket n be wã, Rĩungã mooneg tʋʋmd womda biis Siera Leon.

Meeb geelg-n-tʋm kãseng Afirikdisiid

Masã, Afirikdisiid filiallã sẽn get moonegã yell babs ninsã rata Rĩung Rot tusa. B zoe n mee Rĩung Rot kobse. Filiall Sull taoor lʋɩt a John Kikot yeelame: “Tõnd saam-biisã pa le tigimd zãnd bɩ tɩɩg tẽngr wa b sẽn da maand pĩndã ye. Masã b tigimda taab zĩig sẽn zems sẽn tar zombds sõma pʋgẽ. Baa ne Rĩung Ro-kãens wʋsg sẽn yɩɩd sẽn zems balã, b nong n yaa rot nins sẽn sakd gesg n yɩɩdã sags nins pʋsẽ b sẽn be wã. Zĩis kẽere, b yãame tɩ b sã n me Rĩung Roog n sa, tigingã neb sõor paasda sẽn yɩɩd naoor a yiib yʋʋmd ning sẽn pʋgdã.”

Kaset rãmb zãmaan paalg Ukrɛn

Yʋʋmd 2000 tʋʋmd yʋʋmdã sasa, tẽn-kãngã paama koe-moondb sõor sẽn sãd 112 720. Sẽn yɩɩd bãmb 50 000 n zãms Biiblã sɩd yʋʋm a nu wã sẽn loogã pʋgẽ. “Sɩda, a Zeova yika Kaset rãmb zãmaan paalg sẽn yaa kom-bɩɩs sẽn na yɩl n moon a yʋʋrã!” Woto la a John Didur sẽn yaa Filiall Sull taoor lʋɩtã yeel-yã. A paasa woto: “D basa sẽn yɩɩd periodik rãmb milyõ 50 ne nebã, tɩ rẽ zem tẽngã neb sõore. Kiuug fãa, d paamda sẽn na ta lɛta tusr neb sẽn nong sɩdã sẽn gʋlsde, n dat n bãng n paase.”

Sõsgã yɛl a taab sẽn kengd raoodo

A Daniel Sydlik sẽn yaa Siglgã zug Sull nedã kõo sõsg sẽn nekd ratem wʋsgo. Sõsg ning sẽn yaa: “Siglgã zug Sull sẽn yaa toor to-to ne Sosiete wã” sẽn be seb-kãngã pʋgẽ wã tika sõs-kãng sẽn kõ zãmsg sõma wã zugu.

A Theodore Jaracz sẽn yaa Siglgã zug Sull nedã kõo sõsg sẽn wat ne tagsg gom-zug sẽn yaa: “B yãkda yel-gɛtbã la ministɛɛrã sõgen dãmb tɩ zemsd ne Wẽnnaam sor-wilgrã.” Sõss nins sẽn be seb-kãngã pʋgẽ wã a yembr tika gom-zu-kãng zugu.

Yʋʋmdã tigisg talla sõsg me sẽn kengd tẽebo, a David Splane sẽn yaa Siglgã zug Sull ned sẽn kõ yʋʋmd 2001 yʋʋmd verse wã zugã. A tika tʋm-tʋmd a Poll goamã zugu, n yaa: “Pid[-y] zãng la y tall kɩs-sɩd sẽn pa vigsd ne Wẽnnaam daabã fãa.” (Kolos rãmba 4:12, NW ) A Zeova Kaset rãmbã sẽn be dũniyã gill zugã rɩka sard kãn-kãe n na n maan woto, la b moond Wẽnnaam Rĩungã koe-noog tẽngã gill zugu.—Matɩe 24:14.

[Tẽngr note]