Ket-y n kẽnd na-yakemd a yembr ne a Zeova siglgã
Ket-y n kẽnd na-yakemd a yembr ne a Zeova siglgã
“[bɩ] laafɩ wẽnnaamã . . . kõ yãmb bõn-sõng buud fãa tɩ y maan a raabã.”—HEBRE DÃMBA 13:20, 21, NW.
1. Dũniyã neb sõor yaa wãna, la b wilgame tɩ bãmb b wãn n tar tũudum?
YƲƲMD 1999, dũniyã gill neb sõor taa milyaar a yoobe! Sõor kãngã zugu, The World Almanac yeelame tɩ neb 1 165 000 000 n yaa Moeemba; tɩ neb 1 030 000 000 yaa Katolik rãmba; tɩ neb 762 000 000 yaa Ẽndu rãmba; tɩ neb 354 000 000 yaa Budist rãmba; tɩ neb 316 000 000 yaa Portɛstã rãmba, tɩ neb 214 000 000 yaa Ortodogs rãmba.
2. Bõe la b tõe n yeel tũudmã wɛɛngẽ rũndã-rũndã?
2 Welgrã la kalem-kalma tũudmã wɛɛngẽ wã sẽn be rũndã-rũndã wã yĩnga, neb milyõ kãensã fãa sẽn maand to-to wã zemsa ne Wẽnnaam daabã bɩ? Ayo, “Wẽnd yaa laafɩ Wẽnnaam, b ka zũnd-zãnd Wẽnd ye.” (1 Korẽnt dãmba 14:33, Sebr Sõngo) La yaa wãn to ne a Zeova sõgen dãmbã sẽn tar saam-biis tẽnsã fãa pʋsẽ wã? (1 Pɩɛɛr 2:17) Vaeesg neer wilgdame tɩ ‘laafɩ Wẽnnaamã kõta tõnd bõn-sõng buud fãa sẽn na yɩl tɩ d maan a raabã.’—Hebre dãmba 13:20, 21.
3. Bõe n zĩnd Zerizalɛm yʋʋmd 33 T.W. Pãntekotã, la bõe yĩnga?
3 Yaa sɩda, pa neb nins sẽn tigimd ne a Zeova Kaset rãmbã sõorã n wilgd tɩ b tata Wẽnnaam yam ye. Pa nebã sõorã la Wẽnnaam gɛt ye. A sẽn da wa n yãk Israɛllã, pa tɩ b ra ‘yaa wʋsg n yɩɩd’ buud a taabã ye. B pʋd n da yaa ‘bilf n yɩɩd’ menga. (Tõodo 7:7) La Israɛll sẽn pa tall kɩs-sɩdã yĩnga, yʋʋmd 33 T.W. Pãntekotã, a Zeova yãka a lohormã n kõ tiging paalgã sẽn ya a Zezi Kirist karen-biisã. A Zeova zae-b-la ne a vʋʋsem sõngã tɩ b ket n togsd b taabã sɩdã Wẽnnaam la Kirist wɛɛngẽ ne yẽesem.—Tʋʋma 2:41, 42.
B kẽngda taoor wakat fãa
4. Bõe yĩng tɩ y tõe n yeel tɩ pipi kiris-neb tigingã ra kẽngda taoor wakat fãa?
4 Yʋʋm kob-yendẽ wã, kiris-neb tigingã ra kẽngda taoor wakat fãa, n da kẽngd zĩis a taab n maand karen-biisi, la b ra wʋmd Wẽnnaam daabã võor n paasdẽ. Pipi kiris-nebã ra ket n sakda tẽeb vẽenemã b sẽn pukã, ne lɛta Wẽnnaam sẽn vẽneg tɩ b gʋlsã tũnugri. Tʋm-tʋmdbã la neb a taab sẽn wat n gɛt-bã tus-b lame tɩ b tʋm b kiris-nedemd tʋʋmdã. Bõn-kãens fãa gʋlsa kiris-neb Gerɛk Gʋlsgã pʋgẽ.—Tʋʋma 10:21, 22; 13:46, 47; 2 Tɩmote 1:13; 4:5; Hebre dãmba 6:1-3; 2 Pɩɛɛr 3:17, 18.
5. Bõe yĩng tɩ Wẽnnaam siglgã kẽngd taoor rũndã-rũndã, la bõe yĩng tɩ d segd n kẽn ne na-yakemd a yembr ne-a?
5 Wala pipi kiris-nebã, a Zeova Kaset rãmbã sẽn be rũndã-rũndã wã sɩngame tɩ b sõorã yaa bilf n yaool n fɩɩge. (Zakari 4:8-10) Yʋʋm kob-gĩnd 19 soabã saab sẽnes tɛka, kaset vẽeneg wilgame t’a Zeova vʋʋsem sõngã bee a siglgã zugu. D sẽn teeg vʋʋsem sõngã sor-wilgr la pa ninsaal pãngã yĩngã, d kell n kẽnga taoor n wʋm Gʋlsg Sõamyã võore, la d ket n maand Wẽnnaam daabã. (Zakari 4:6) Tõnd sẽn vɩ ‘yaoolem wakatã,’ tara yõod tɩ d ket n kẽnd ne a Zeova siglgã ne na-yakemd a yembre. (2 Tɩmote 3:1-5) Rẽ maaneg kɩtdame tɩ d ket n tar saagr sẽn tar pãng la d ket n kõt kasetã Wẽnnaam Rĩungã sẽn luglã wɛɛngẽ, tɩ masã yɛl siglgã saab nan pa wa ye.—Matɩe 24:3-14.
6, 7. Zĩis a tãab bʋs pʋsẽ a Zeova siglgã sẽn kẽng taoor la d na n gese?
6 Neb n be tõnd sʋkã n da sɩng n be a Zeova siglgã pʋgẽ hal yʋʋmd 1920, yʋʋmd 1930 la yʋʋmd 1940 tɛka. Yʋʋm kãens sɩngrẽ wã, tõnd sʋkã, ãnd n da tõe n mams tɩ siglgã fɩɩgr da na n yɩɩ kãseng la a kẽng taoor bilf-bilf woto hal tɩ ta rũnd kãngã? Tags-y n ges yɛl nins d sẽn yã sẽn pa kaoos pʋgẽ wã! Ad sɩd yaa bũmb sẽn be bark tẽebã wɛɛngẽ, d sã n tags n ges a Zeova sẽn tũnug ne a nin-buiidã sẽn sigl teokarasi wã pʋgẽ n pids bũmb ninsã.
7 A Davɩɩd sẽn vɩɩmd pĩnd wẽndẽ wã sã n da ges a Zeova tʋʋm-kãsemsã neere, ra kẽeda a sũurã sõma. A yeelame: “Mam nong n wilga bãmba n gom b yelle, la bãmb sõor yaa wʋsgo n yɩɩd tɩ ned ka tõe n togs n sɛ ye.” (Yɩɩl Sõamyã 40:6) Tõnd me mikdame tɩ d pa tõe n sõdg a Zeova sẽn maan tʋʋm-kãsems sẽn zems pẽgrã tõnd wakatã n sa ye. Baasg zãnga bɩ d ges zĩis a tãab pʋsẽ a Zeova siglgã sẽn kẽng taoore. 1) sɩdã vẽenem sẽn wat bilf-bilfã, 2) ministɛɛr sẽn tar manegr la paasgo, la 3) remsg nins sẽn wa yɛlã siglg wɛɛngẽ wã.
D tara mi-beoogo, d sẽn paam tẽebã vẽenemã
8. Wala sẽn zems ne Yelbũna 4:18, bõe la tẽebã vẽenem kɩt tɩ d bãng Rĩungã wɛɛngẽ?
8 Sã n yaa ne tẽebã vẽnegr ning sẽn wat bilf-bilfã wɛɛngẽ yaa vẽeneg tɩ Yelbũna 4:18 wã pidsdame. A yetame: “Nin-sõng sor yaa wa sõ-pukri n paasd vẽenem hal tɩ ta sõ-bɩɩmde.” Ad d sɩd tar mi-beoog wʋsgo, d sẽn paam tẽeb vẽnegr bilf-bilfã yĩnga! Tigis-kãseng ning sẽn zĩnd Sedaar Põent Ohio yʋʋmd 1919 wã, b gom n tadga Wẽnnaam Rĩungã zugu. A Zeova tũnugda ne Rĩung kãng n sõmsd a yʋʋrã la a wilgdẽ t’a naam sẽn-ka-to wã zemsame. Sɩda, tẽebã vẽenem sõnga tõnd tɩ d bãng tɩ hal sẽn sɩng ne Sɩngr sebrã n tɩ ta yaoolem sebrã sẽn yaa Wilgrã, Biiblã wilgdame t’a Zeova rat n sõmsa a yʋʋrã. A na n tũnuga ne Rĩung ning a Biriblã sẽn dɩt naam a pʋgẽ wã n maan woto. Sẽn nong-b tɩrlmã fãa saagr sẽn yaa kãsengã tika rẽ zugu.—Matɩe 12:18, 21.
9, 10. Yʋʋmd 1920 n tɩ yʋʋmd 1930 wã, bõe la b wilg Rĩungã wɛɛngẽ, la sigls a yiib sẽn kɩɩsd taabã wɛɛngẽ, la wãn-wãn la rẽ sõng tõndo?
9 Tigis-kãseng a to sẽn zĩnd Sedaar Põent yʋʋmd 1922, a Joseph Rutherford sẽn yɩ sõs-yẽgã wɛgsdã yeela Wẽnnaam nin-buiidã tɩ: “Moon-y-yã, moon-y-yã, moon-y Rĩmã la a rĩungã.” Sõsg ning sẽn yaa “Tẽng rogmã,” b sẽn yiis yʋʋmd 1925, tʋʋlg kiuug pipi daar Gũusg Gasgã pʋgẽ wã taka nebã yam n sik tẽeb vẽnegr nins sẽn tɩ loe ne bãngr-goam nins sẽn da gomd Wẽnnaam Rĩungã luglg yell yʋʋmd 1914 zugu. Yʋʋmd 1920 n tɩ ta yʋʋmd 1930 wã, b wa n bãngame me tɩ sigls a yiib sẽn kɩɩsd taab n be: Ya a Zeova siglgã la a Sʋɩtãan siglgã. Zabr n be b sʋkã, la d na n zĩnda sẽn na n tõoga wã poorẽ, d sẽn na n ket n kẽnd na-yakemd a yembr ne a Zeova siglgã bala.
10 Wãn to la tẽeb vẽnegr kãngã sõng tõndo? Wẽnnaam Rĩungã la Rĩm a Zezi Kirist sẽn pa dũniyã rẽndã yĩnga, tõnd me pa segd n yɩ dũniyã rẽnd ye. D sã n kell n welg d mens ne dũniyã, d wilgdame tɩ d bee sɩdã poorẽ. (Zã 17:16; 18:37) D sã n ges yel-gĩtim nins sẽn namsd dũni-wẽng kãngã wã, ad d sɩd tara mi-beoogo, d sẽn pa be a Sʋɩtãan siglgã pʋgẽ wã! Sẽn paase, ad a Zeova sɩd maan-d lohorem, d sẽn tar tẽeb bãan a siglgã pʋgẽ wã!
11. Yʋ-bʋg sẽn tik Gʋlsg Sõamyã zug la Wẽnnaam nin-buiidã yãk yʋʋmd 1931?
11 Tigis-kãseng ning sẽn zĩnd yʋʋmd 1931 Kolumbus Ohio sẽn be Etazĩni wã, b wilga Ezai 43:10-12, NW pidsgã tɩ zemse. Biiblã Zãmsdb yãka yʋʋr sẽn kɩtd tɩ b bãng-b n welge. Yʋ-kãng ya a Zeova Kaset rãmbã. Ad sɩd yaa zu-no-kãseng ne-d tɩ d kɩt tɩ neba bãng Wẽnnaam yʋʋrã, sẽn na yɩl tɩ neb a taab me kos ne yʋ-kãng n paam fãagre!—Yɩɩl Sõamyã 83:18, NW; Rom dãmba 10:13, NW.
12. Tẽeb vẽenem bʋg sẽn tɩ loe ne kʋʋn-kãseng la b kõ yʋʋmd 1935?
12 Sẽn deng yʋʋmd 1930 wã, a Zeova nin-buiidã neb wʋsg ra bee sãmb-sãmb pʋgẽ b saagrã ne beoog-daar vɩɩmã wɛɛngẽ. Kẽer da tagsda yĩngr vɩɩmã yelle, la b ra leb n nonga Biiblã zãmsg sẽn tɩ loe ne tẽng zug arzãnã me. Washington, D.C. tigis-kãsengẽ wã yʋʋmd 1935 wã, nebã sũy yɩɩ noog b sẽn bãng tɩ Wilgr sak a 7 kʋʋn-kãsengã yaa tẽng zug sull sẽn tar saagr n na n vɩɩmd tẽng zugã. Rẽ tɛka, kʋʋn-kãsengã tigisg kẽnga taoor n tall paasg woo paasgo. Tõnd pa tar mi-beoogo, kʋʋn-kãsengã sẽn ye pa yel-solemd ne tõndã sɩda? Nin-buiid sẽn tigim n yaa kʋʋng sẽn yaa kãseng sẽn yit tẽn-tẽns fãa, la buud fãa la buud-goam fãa pʋsẽ wã tusda tõnd tɩ d rɩk sard kãn-kãe n tʋm wʋsgo, la d ket n kẽnd na-yakemd a yembr ne a Zeova siglgã.
13. Yel-kãseng bʋg võor la b wilg sõma Saint Louis tigis-kãsengẽ wã yʋʋmd 1941?
13 Yel-kãseng ning sẽn segd n pak ãdem-biisã b wilg-a-la Saint Louis, Misuri tigis-kãsengẽ wã sõma yʋʋmd 1941. Yaa ãndũniyã naam bɩ naam sẽn-ka-to wã. Yaa yell ning b sẽn segd n welg ka la bilfã, la ra-kãseng ning sẽn kõt rabeem wʋsg sẽn na n wa tɩ yel-kãng welgã na n waa tao-tao! Bũmb ning yell b sẽn gom yʋʋmd 1941 wã yaa burkĩnd Wẽnnaam taoorã yelle, sẽn kõt tõnd sor tɩ d wilg tõnd mengã sẽn be ned ning poorẽ Wẽnnaam naam sẽn-ka-to wã wɛɛngẽ wã.
14. Tigis-kãseng ning sẽn tigim tẽns wʋsg neb sẽn zĩnd yʋʋmd 1950 wã sasa, bõe la b wilg Ezai 32:1, 2 pʋgẽ na-biisã wɛɛngẽ?
14 Yʋʋmd 1950 tẽn-tẽns tigis-kãsengã sẽn zĩnd Niw York galʋ-tẽngã pʋgẽ wã, b wilga Ezai 32:1, 2 kom-bɛɛmbã bɩ na-biisã sẽn yaa b rãmb takɩ. Yɩɩ wakat sẽn tall yamleoog wʋsgo, saam-biig a Frederick Franz sẽn wa n wɛgs gom-zugã n yeel tɩ tẽn-paalgã beoog-daar na-biisã ra bee tõnd sʋkã. Tigis-kãseng kãngã la a taaba sẽn pʋglã pʋsẽ, tẽeb vẽenem wʋsg la d paam-yã. (Yɩɩl Sõamyã 97:11) Ad d sɩd tara mi-beoogo, d sorã ‘vẽenem sẽn tar paasgã yĩnga.’
D kẽng taoor ne d ministɛɛrã
15, 16. a) Wãn-wãn la d kẽng taoor d ministɛɛrã pʋgẽ yʋʋmd 1920 n tɩ ta yʋʋmd 1940? b) Seb-bʋs n kõ kiris-neb koe-moonegã tʋʋmd pãng yʋʋm nins sẽn loogã?
15 Zĩig a yiib-n-soab pʋgẽ a Zeova siglgã sẽn kẽng taoor tɩ loee ne tõnd tʋʋm-kãseng sẽn yɩɩdã sẽn yaa Rĩungã mooneg la karen-biisã maanegã. (Matɩe 28:19, 20; Mark 13:10) Sẽn na yɩl n tʋm tʋʋm-kãngã, siglgã kell n wilga tõnd ministɛɛrã yalgr yõodo. Yʋʋmd 1922, b yeela kiris-neba fãa tɩ b kẽes b mens moonegã tʋʋmdẽ. Yaa ned fãa n da segd n bas t’a vẽenemã yãge. Yaa woto la ned fãa ra naagd n kõ kaset sɩdã zugu. (Matɩe 5:14-16) Yʋʋmd 1927, b yãka hatã tɩ yaa koɛɛgã mooneg daare. Sẽn sɩng ne yʋʋmd 1940, wao-fugdg kiuugã, Kaset rãmbã ra nong n yita soayã zut tolengã sagsẽ n kãabd Gũusg Gasgã la Consolation (sẽn yaa Réveillez-vous! masã wã).
16 Yʋʋmd 1937, b sɩnga Model Study seb-bilã, n gom n tadg n wilg tɩ d segd n maana lebg-n-tɩ ges rãmb sẽn na yɩl n zãms neb a taabã Biiblã sɩda. Yʋʋm nins sẽn pʋglã, b gom n tadga Biibl zãmsgã tʋʋmd zug wʋsgo. B paasa koe-moonegã tʋʋmd nen-kãngã pãng ne sebr b sẽn yiis t’a gom-zugã yaa: “ Que Dieu soit reconnu pour vrai yʋʋmd 1946, la sebr ning sẽn yaa La vérité qui conduit à la vie éternelle yʋʋmd 1968. Masã d tʋmda ne sebr ning sẽn yaa Bãngr sẽn tar n debd vɩɩm sẽn-kõn-saẽ wã. B tõe n tũnuga ne seb-kãensã sẽn tik Gʋlsg Sõamyã zugã n maan karen-biis sõma-sõma.
Yɛlã siglg wɛɛngẽ d kẽnga taoore
17. Sẽn zems ne Ezai 60:17, wãn-wãn la a Zeova siglgã kẽng taoore?
17 Zĩig a tãab-n-soab pʋgẽ a Zeova siglgã sẽn kẽng taoor tɩ loee ne remsgã siglgã wɛɛngẽ wã. Sã n yaa ne Ezai 60:17, a Zeova kãaba woto: “Mam na n waa ne sãnem t’a reeg zũud zĩiga la m wa ne wanzũri n kɩt t’a reeg kut zĩiga tɩ zũud reeg raad zĩiga tɩ kut me reeg kug zĩiga. Mam na n kɩtame tɩ laafɩ soog foom tɩ tɩrlem lebg fo tʋʋm soaadba.” Wa sẽn zems ne bãngr-gom-kãngã, yɛl toor-toor la b maan sẽn na yɩl n ges Rĩungã mooneg tʋʋmd yelle, la b kɩɩm bãgrã sõma n paase.
18, 19. Rems-bʋg siglgã wɛɛngẽ la b maan yʋʋmã sẽn pʋgl taabã pʋgẽ?
18 Yʋʋmd 1919, b yãka tʋʋmd taoor soab tiging fãa sẽn da baood siglg a koe-moonegã wɛɛngẽ wã. Rẽ kõo tõnd koɛɛga mooneg pãng n paase. Yʋʋmd 1932 tɛka b pa le tũnug ne votgã n yãk kẽem dãmbã la diakr dãmbã ye. Yel-kãseng a to sẽn zĩnd yʋʋmd 1938 wã, yaa b sẽn da wa n sɩng sõma-sõma n yãkd tigingã pʋgẽ sõgendba fãa wa pipi kiris-neb tigingã sẽn da maandã. Yãk kãng zemsa ne Wẽnnaam sor-wilgrã. (Tʋʋma 14:23; 1 Tɩmote 4:14) Yʋʋmd 1972, b yãka kẽem dãmbã la ministɛɛrã sõgen dãmb tɩ b sõgne, wala b sẽn maan to-to pipi kiris-nebã sʋkã. B ye pa yãkd rao a yembr t’a yɩ tiging yel-gɛt ye. Filip rãmb 1:1 la verse rãmb a taab wilgdame tɩ neb nins sẽn pidsd yɛl nins Gʋlsg Sõamyã sẽn baood yel-gɛtba wɛɛngẽ wã n be kẽem dãmbã sull pʋgẽ.—Tʋʋma 20:28, NW; Efɛɛz rãmba 4:11, 12.
19 Woto, yʋʋmd 1975, b rɩka segls t’a Zeova Kaset rãmbã Siglg zug Sull sul ges Wẽnnaam siglgã dũni gill tʋʋm yelle. Sosiete wã biru rãmb la b lugl tẽns wʋsg pʋsẽ tɩ b get b moonegã zĩis yelle. Rẽ tɛka, b gesame n maan tɩ tʋʋmã lebg nana dũni gill tʋʋmdã yẽgrẽ, la Sosiete Wats Tawa biru rãmb sẽn be tẽns wʋsg pʋsẽ sẽn na yɩl n “bãng bũmb nins sẽn yaa sõama n yɩɩda.” (Filip rãmba 1:9, 10) Zɩɩb nins sẽn zao Kirist pe-kɩɩm-pʋgdsã zutã yaa taoor-lʋɩɩsã koe-noogã mooneg tʋʋmd pʋgẽ, n paas zãmsgã kũun sõma tigingã pʋgẽ, la Wẽnnaam bãgrã kɩɩngo.—1 Tɩmote 4:16; Hebre dãmba 13:7, 17; 1 Pɩɛɛr 5:2, 3.
A Zezi taoor sobendã
20. Kẽn na-yakemd a yembr ne a Zeova siglgã baoodame tɩ d sak n deeg bõe a Zezi wɛɛngẽ?
20 Kẽn na-yakemd a yembr ne a Zeova siglgã sẽn kẽngd taoor bilf-bilfã baoodame tɩ d sak n deeg tʋʋmd ning Wẽnnaam sẽn kõ a Zezi Kirist, a sẽn kɩt t’a yɩ “tigingã zu-soabã.” (Efɛɛz rãmba 5:22, 23, Sebr Sõngo) Ezai 55:4 pʋgẽ goama me bee yamleoogo. B yeta tõnd be woto: “Gese, mam [a Zeova] kõo yẽ t’a yɩ kaset soaba la buuda fãa naaba la b soaala.” A Zezi sɩd mii taoor lʋɩɩse. A leb n mii a piisã ne b tʋʋmã. Sɩda, a sẽn da wa n ges tigims a yopoe sẽn da be Azi Mineerã, a togsa naoor a nu tɩ: “Mam bãnga yãmb tʋʋma.” (Wilgri 2:2, 19; 3:1, 8, 15) A Zezi leb n mii tõnd sẽn datã, wa a Ba a Zeova. Nand t’a wilg Pʋʋsg Modɛllã, a Zezi yeelame: “Yãmb Ba mii yãmb sẽn datã, tɩ yãmb nan ka kos bãmb ye.”—Matɩe 6:8-13.
21. Wãn to la a Zezi taoor sobendã pukd kiris-neb tigingã pʋgẽ?
21 Wãn-wãn la a Zezi taoor-sobendã pukda? Manesem a ye yaa ne kiris-neb yel-gɛtbã, sẽn yaa “kũun sẽn yaa rapa” tũnugri. (Efɛɛz rãmba 4:8, NW ) Wilgri 1:16 bilgda yel-gɛtb nins sẽn zae ne vʋʋsem sõngã tɩ b be Kirist nug rɩtgã pʋgẽ t’a so-ba. Rũndã-rũndã, a Zezi wilgda kẽem dãmbã sore, b tara saagr n na n vɩɩmd saasẽ tɩ yaa tẽng zugu. Wa d sẽn wilg sõsg ning sẽn loogã pʋgẽ wã, yaa vʋʋsem sõngã n yãkd-b tɩ zems ne Gʋlsg Sõamyã sẽn baood tɩ b pids bũmb ninsã. (1 Tɩmote 3:1-7; Tɩt 1:5-9) Yʋʋm kob-yendẽ wã, rap sull sẽn be Zerizalɛm n da yaa siglgã zug sull sẽn da get tigimsã yell la Rĩungã mooneg tʋʋmd yellã. Yaa woto me la b maand a Zeova siglgã pʋgẽ rũndã-rũndã.
Ket-y n kẽnd ne na-yakemd a yembre!
22. Sõng-bʋg la Siglgã zug Sull kõta?
22 B rɩka Rĩungã yɛl sẽn be tẽng zugã n bobl “kɩs-sɩd la gũusd yambã,” a Zeova Kaset rãmbã Siglgã zug Sull sẽn tʋmd a yʋʋr yĩngã. (Matɩe 24:45-47, NW ) Sẽn pak Siglgã zug Sull pipi yaa kõ kiris-neb tigingã tẽeb zãmsg la sor-wilgri. (Tʋʋma 6:1-6) La sabaab rãmb sã n paam b tẽed-n-taasã, Siglgã zug Sull kota asosiasiõ bɩ asosiasiõ rãmb tɩ b wa ne sõngre, la a maneg neba rot la Rĩung Rot nins sẽn sãama. B sã n namsd kiris-neb kẽer wʋsg bɩ b namsd-b b tẽebã yĩnga, yɛl toɛ-toɛy la b maand sẽn na yɩl n keng b tẽebã. La baa “toog pʋgẽ,” b maanda b sẽn tõe fãa sẽn na yɩl n ket n kẽngd taoor ne moonegã tʋʋmde—2 Tɩmote 4:1, 2.
23, 24. Baa yɛl nins fãa sẽn wat a Zeova nin-buiidã zugu, bõe la a kõt wakat fãa, la sard bʋg la tõnd segd n dɩk kãn-kãe?
23 Baa yɛl nins fãa sẽn wat a Zeova nin-buiidã zugu, wakat fãa a kõta tẽeb rɩɩb la sor-wilgr ning sẽn yaa tɩlae ne-bã. Wẽnnaam leb n kõta saam-biis nins sẽn tar taoor-sobendã yam-welgr la yam sẽn na yɩl tɩ b segl b mens taoor-kẽngrã sẽn watã la remsgã Wẽnnaam siglgã pʋgẽ yɛlã siglg wɛɛngẽ. (Tõodo 34:9; Efɛɛz rãmba 1:16, 17) Sãmbg sẽn ka be, a Zeova kõta tõnd bũmb ning fãa d sẽn datã tɩ d tõog n pids d karen-biis maanegã tʋʋmde, la d pids d ministɛɛrã dũniyã gill zugu.—2 Tɩmote 4:5.
24 Tõnd kɩsa sɩd fasɩ t’a Zeova pa na n tol n bas a nin-buiidã sẽn tar kɩs-sɩdã ye. A na n fãag-b-la “to-kãsenga” sẽn watã pʋgẽ. (Wilgri 7:9-14; Yɩɩl Sõamyã 94:14; 2 Pɩɛɛr 2:9) D tara bʋʋm wʋsg n na n kell n tall bas-yard ning d sẽn da tall pipi wã kãn-kãe hal tɩ ta saabã. (Hebre dãmba 3:14) Woto yĩnga, bɩ d rɩk sard kãn-kãe n ket n kẽnd na-yakemd a yembr ne a Zeova siglgã.
Wãn to la y na n leokẽ?
• Bõe yĩng tɩ d tõe n yeel t’a Zeova siglgã ket n kẽngda taoore?
• Kaset bʋs n wilgd tɩ Wẽnnaam nin-buiidã paamda tẽeb vẽenem sẽn kẽngd taoor bilf-bilfu?
• Wãn to la manegr zĩnd kiris-neb ministɛɛrã pʋgẽ?
• Rems-bʋs sẽn zems b wakat la b maan siglgã wɛɛngẽ a Zeova sõgen dãmbã sʋka?
[Zãmsgã sogsgã]
[Foto, seb-neng 11]
Wala a Davɩɩd, d pa tõe n togs a Zeova tʋʋm-kãsemsã fãa n sa ye
[Foto, seb-neng 12]
Wẽnnaam nin-buiidã rɩɩ remsgã b sẽn maand sẽn zems a wakatã siglgã wɛɛngẽ wã nafa