Karemdbã sʋgsgo

Kiris-neb hakɩkã tagsg segd n yɩɩ wãn-wãn ne neba sẽn minim n kõt neb a taab ordinatɛɛr program dãmb nins b sẽn segd n da wã?

Neb kẽer tõe n makd n na n baoa bʋʋm n maan woto, n tik a Zezi gom-kãensã zugu: “Yãmb deega zaalem, bɩ kõ zaalem.” Yaa vẽeneg t’a Zezi ra ka gomd sɛb yelle, bɩ ordinatɛɛr program dãmb sɛb kũun zaalem b maandb bal laloa sẽn kõ sor tɩ b yelg kũun zaalem yell ye. Laloa wã gãnega noy te-kãens rɩk-n-tʋm wɛɛngẽ. A Zezi ra gomda kũun maaneg ministɛɛrã wɛɛngẽ yelle. A yeela tʋm-tʋmdbã sẽn da rebd galʋ-tẽns la tẽn-bõoneg toɛ-toɛyẽ wã tɩ b ra segdame n tɩ moon Rĩungã, n sãoog bãad dãmba, la b rig zĩn dãmba. Tʋm-tʋmdbã ra ka segd n kɩt tɩ neba yao rẽ ye, b ra segd n ‘kõo zaalem.’—Matɩe 10:7, 8.

Ordinatɛɛr dãmbã neba sẽn daad b mens yĩng la leebg yĩngã sõor sẽn paas wʋsgã kɩtame tɩ lebg tɩlae ne neb wʋsg tɩ b paam program dãmba. Rẽ nong n yaa bũmb b sẽn segd n da. Sɩda, neb kẽer maanda program dãmb n kõt zaalem la b yetẽ tɩ b tõe n maana a taab wʋsg n kõ neb a taaba. La ordinatɛɛr program dãmb wʋsg sẽn yɩɩda b koosdame. Yaa b mens rɩk-n-tʋm yir tɩ yaa ligd baoob yĩng me, b gũudame tɩ sẽn tʋmd-b ne program yao ligd rẽ yĩnga. Ned sã n dɩk bɩ a yãka program dãmb n ka yao, rẽ yɩtẽ-la bũmb sẽn kɩɩsd laloa wã, wa sẽn yaa to-to ne f sẽn na n dɩk sebr ned sẽn maane, n togs n maan a buud wʋsgo, baa yaa zaalem la f na n dɩk-b n kõ.

Ordinatɛɛr program dãmb wʋsg sẽn yɩɩd (tɩ reema rẽnd be sʋkã) tara dʋrwa b sẽn kõte, tɩ f tõog n dɩk-a n tʋme. B gũudame tɩ sẽn so-a bɩ sẽn tʋmd-a ne dʋrwa kãng tũ soay takɩ la a ra maan yɛl kẽer ye. Tall-n-tʋm dʋrwa rãmb a woto wʋsg yetame tɩ yaa ned a yembr bal n tõe n ning programã masĩn pʋgẽ la a tʋm ne-a. Naoor wʋsgo a na n ning-a-la ordinatɛɛr a yembr pʋgẽ bala, yaa yirẽ dẽnd tɩ yaa tʋʋm zĩigẽ bɩ lekollẽ dẽnd me. Tall-n-tʋm dʋrwa rãmb kẽer yetame tɩ sẽn tar-a dʋrwa wã tõe maana programã togsend a meng yĩng n bĩngi, la t’a ka segd n maan woto neb a taab yĩng ye. La a soabã sã n dat n dɩk programã tõr (tɩ tall-n-tʋm dʋrwa wã la sɛbã be sʋk) n kõ neda, a tõe n maana rẽ. La woto wã yẽ mengã ka le tar sor n na n tʋm ne-a ye. Tall-n-tʋm dʋrwa rãmbã ka taab ye. Rẽ n so tɩ ned sã n daad program, bɩ tɩ b sã n kõt-a program, a segd n bao n bãnga dʋrwa ning a sẽn tar n na n dɩk-a n tʋma sẽn yet bũmb ninga.

Tẽns wʋsg lagem n zemsa taaba n na n kogl b “bãngrã” dʋrwa rãmba, wala makre, ordinatɛɛr program dãmbã. B makdame me n na n kɩt tɩ b tũ sebr yiisg dʋrwa rãmbã noyã. Wala makre, yʋʋmd 2000, yʋʋm-vẽkr kiuug rasem 14 The New York Times togsame tɩ “Alemayn ne Danmark yõga bi-be-bɛd sẽn zu ordinatɛɛr program dãmba.” Sull kãngã neb ra togsd n maanda ordinatɛɛr program dãmb la b reem, n pʋɩta, n tol n koosd kẽer ẽntɛrnɛtã pʋgẽ menga.

Kiris-neb tigingã tagsg yaa bõe ne yel-kãngã? Be neere, a Zezi yeelame: “Bɩ y kõ Sezaar bũmb nins sẽn yaa Sezaar dẽnda.” (Mark 12:17) Rẽ baoodame tɩ kiris-nebã sak tẽngã noy nins sẽn pa kɩɩsd Wẽnnaam noyã. Goosneem dãmbã wɛɛngẽ tʋm-tʋmd a Poll gʋlsa woto: “Bɩ ned kam fãa sak nanambsa noyã . . . Ned ninga sẽn zãgsd naab noore, a kɩɩsda Wẽnnaam tõogo. La neb nins sẽn zãgsda ningda bʋʋd b mens zutu’’.—Rom dãmba 13:1, 2.

Pa tigingã kẽem dãmb n segd n tɩ vaees neb a taab ordinatɛɛr dãmb n gese, tɩ yaa wala b kõ-b-la sor tɩ b wilg sɛb yiisg dʋrwa rãmb noy võor la b kɩt tɩ b tũ-b ye. La b tẽedame la b zãmsd nebã tɩ kiris-nebã pa segd n dɩk bũmb b sẽn ka so, la b segd n yɩɩ neb sẽn sakd noya. Rẽ kɩtdame tɩ b ra wa sɩbg kiris-nebã tɩ b kɩɩsa laloa wã ye, la kɩtdẽ tɩ b tõe n tall sũur kaset sẽn yaa sõma Wẽnnaam taoore. A Poll gʋlsame: “Dẽ, a bee fo zug tɩ f sake, ka sɩbgra yĩng bal ye, la yaa sũur kaset yĩng me.” (Rom dãmba 13:5) Woto me, a Poll wilga kiris-neb hakɩk sẽn tʋll bũmb ninsã ne gom-kãensã: “Tõnd tara sũur-kaset sõama, tõnd sẽn dat n maan bũmb fãa tɩ zemsa [“ne pʋ-peelmã,” NW ] yĩnga.”—Hebre dãmba 13:18.

[Zĩ-gũbri, seb-​neng 31]

Tʋʋm zĩis la lekoll dãmb kẽer daada rɩk-n-tʋm dʋrwa rãmb sẽn wilgd neb sõor b sẽn kõn zʋʋg b sẽn kõ sor tɩ b tʋm ne programã. Yʋʋmd 1995, a Zeova Kaset rãmbã tigims talla sõsg a yembr sẽn tall sagl-kãngã:

‘Ãnterpiriiz rãmbã wʋsg sẽn yɩɩd sẽn yiisd ordinatɛɛr program dãmb n koosdẽ wã tara program yelgr dʋrwa rãmba, la b kõt tall-n-tʋm dʋrwa sẽn wilgd sor ning b sẽn kõ tɩ b tõe n tʋm ne programã tɩ ta zĩig ningã. Tall-n-tʋm dʋrwa rãmbã nong n wilgdame tɩ sor pa kõ tɩ b lebg programã n kõ ned a to ye. Sɩda, f sã n maan-a f kɩɩsda tẽnsã noy sẽn tɩ loe ne bũmb f sẽn maan yelgr dʋrwa rãmbã. . . . Ãnterpiriiz-bɛdã yiisda ordinatɛɛr dãmb sẽn zoe n tar program la b tara tall-n-tʋm dʋrwa rãmb sẽn zemse. Baasg zãnga, ãnterpiriiz kẽer pa kõt tall-n-tʋm dʋrwa rãmb ye, bala program ning b sẽn ning ordinatɛɛrã pʋgẽ wã yaa sẽn ning tɩ pa zems ne laloa wã ye. Rẽnd neb nins sẽn daad te-kãens buudã kɩɩsda laloa. Rẽ wɛɛngẽ kiris-neba pa segd n kẽ reezo bɩ n tũnug ne sɛrvɛɛr telematik n sãrs fisie rãmb sẽn tar yelgr dʋrwa rãmb (wala Sosiete wã sɛbã) ye. D sã n lɛbg-b tɩ b rãmbã pa kõ sore yaa laloa wã kɩɩsgo.’