Naong na n tol n saame bɩ?

SÃAMB sẽn kẽng ONU wã zĩigẽ Niu York galʋ-tẽngẽ wã yãa Laogã yɛl la nebã vɩɩm yɛl yell gesg tʋʋmd sull Roogo. Roogã tara wĩy la tuyo rãmb sẽn tond yɩng roogã zug nebã sẽn kẽndẽ wã. Sẽn talld-a nebã n yuugdẽ n wilgd zĩigã togsa woto: “B nong n geta sugrã ‘b sẽn ka baasã’ wala makr sẽn tẽegd tõnd tɩ ONU wã tʋʋmd laogã la neba vɩɩm yɛl wɛɛngẽ zɩ n sa ye. Zĩig sẽn dat manegr pa na n tol n kong dũniyã neb vɩɩm pʋgẽ ye.”

B kõo sullã neb tʋʋmd sẽn be nafre. Tʋʋm-kãng yaa kɩt tɩ neba fãa paam vɩɩm sẽn yaa sõma n yɩɩdã. La wõnda b tʋʋmdã yaa tʋʋmd sẽn ka tol n tõe n sa ye. Bãng-y t’a Zezi Kirist tẽng zug ministɛɛrã wakat yʋʋm kob-yendẽ wã a yeela woto: “Zusoaba Sɩɩg bee mam zugu. Tɩ bõe, bãmb kõo maam pãng tɩ m moon Koe-noog naong rãmb sʋka.” (Luk 4:18) ‘Koe-noogã’ a sẽn moonã ra yaa bõe? Ra yaa koɛɛg ning sẽn tɩ loe ne Rĩung ning Wẽnnaam a Zeova sẽn na n lugl t’a Zezi yɩ a Rĩmã. A Zeova n yaa ‘zĩ-soalgdg ne naong rãmba sẽn paam toogã.’ Bõe la Rĩung kãng na n maane? A Ezai togsa bãngr-gom-kãngã: “Saasẽ-pãng-soabã na n maana kibs buuda fãa yĩng . . . Na n yɩɩ ne nemd sẽn tar kaam la rãam sẽn yaa noogo. Yaa ne nemd sẽn tar kaam t’a bɩɩm yaa noogo la rãam sẽn yoog sõama n yaa neere. Bãmb na n sãama kũum wakat sẽn ka sɛta. Zusoaba sẽn yaa soaala na n yẽesa nintãm nins fãa sẽn be neba ninẽ wã.”—Ezai 25:4-6, 8.

Yãmb dat n bãnga Wẽnnaam Rĩungã sẽn na n “maneg dũniyã neb vɩɩm” to-to sẽn na yɩl tɩ bũmb da le paoogã wɛɛngẽ n paas bɩ? Ges-y tẽngrã n bãng y sẽn tõe n maan to-to n paam karen-saamb sẽn tar tõog t’a wa wilg-y bũmb nins Biiblã sẽn yet yel-kãensã zutã n paase.