Sẽn kẽnd-b vẽenemã pʋgẽ wã tara sũ-noogo
Sẽn kẽnd-b vẽenemã pʋgẽ wã tara sũ-noogo
“Wa-y tɩ d kẽn [a Zeova, NW ] vẽenem pʋgẽ.”—EZAI 2:5.
1, 2. a) Vẽenemã yõod yaa bõe? b) Bõe yĩng tɩ b sẽn da yeel tɩ lik n da na n lud tẽngã pa reem yell baa bilfu?
VẼENEMÃ yita a Zeova nengẽ. Biiblã yetame tɩ yẽ n “kɩt tɩ wĩndga kõ vẽenem wĩntoogo, tɩ kiuuga ne ãdsa vẽenem yãg yʋngo.” (Zeremi 31:35; Yɩɩl Sõamyã 8:4) Yaa Yẽ n naan wĩntoogã. Sɩda wĩntoogã tara pãng wʋsgo. Pãn-kãng kõta vẽenem la tʋʋlgo. Yaa pãn-kãng fĩ-fĩi sẽn tat tõnd wa vẽenemã n zãad vɩɩmã tẽngã zugu. Wĩntoogã vẽenem sã n da kaẽ, vɩɩm da pa tõe n zĩnd tẽng zug ka ye.
2 D sã n ning rẽ d yamẽ, d tõe n bãngame tɩ yɛl nins no-rɛɛs a Ezai sẽn bilgã pa reem yell ye. A yeelame: “Gese, lik na n luda dũniyã, la lik sẽn yaa bida na n luda nebã.” (Ezai 60:2) Yaa sɩd tɩ pa lik sɩd-sɩd yell la b sẽn gomd ka wã ye. A Ezai ra pa rat n yeel tɩ daar n wat tɩ wĩntoogã, kiuugã la ãdsã pa na n ye kõ vẽenem ye. (Yɩɩl Sõamyã 89:37, 38; 136:7-9) La a ra gomda tẽebã lik yelle. La tẽebã lik yaa bũmb sẽn kʋʋde. Sã n kaoos tɩ vẽenem sɩd-sɩdã kaẽ d pa tõe n vɩɩmd ye. Woto me, d sã n pa tar tẽebã vẽenem me d pa tõe n vɩɩmd ye.—Luk 1:79.
3. Sã n yaa ne a Ezai sẽn yeelã, bõe la kiris-nebã segd n maane?
3 Rẽnd yaa d bãng t’a Ezai goama pa reem yell ye. Baa gom-kãens sã n paama pidsg pĩnd wẽndẽ Zida wã pʋgẽ, b paamda pidsg sẽn yaa kãseng n yɩɩd rũndã-rũndã. N-ye, tõnd wakatã, tẽeb lik n lud dũniyã. Yel-kãng n kɩt tɩ tẽebã vẽenem tar yõod sẽn pa tõe n bãng n bilgã. Yaa rẽ n so tɩ kiris-nebã segd n kelg a Zezi sagl-kãngã neere: “Bɩ yãmb vẽenem yãg . . . neba sʋka.” (Matɩe 5:16) Kiris-neb hakɩkã tõe n vẽnega sik-m-mens rãmbã. B sã n maan woto, b kõta nebã sor tɩ b paam vɩɩm.—Zã 8:12.
Tẽeb lik wakat Israɛlle
4. Wakat bʋg la a Ezai bãngr-gomdã pids pipi, la yel-bʋg n da zoe n be yẽ wakatã?
4 A Ezai goma lik sẽn lud tẽngã yelle. Rẽ paama pidsg pipi, b sẽn wa n sãam Zida t’a lebg raboogo, la b tall a nebã n kẽng yembd Babilonã. La rẽ sẽn da wa n nan pa wa menga, a Ezai wakatã tɩ buudã neb wʋsg ra zoe n bee tẽeb lik pʋgẽ. Rẽ tus-a lame t’a sagl a buudã neb woto: “A Zakoob yagense, wa-y tɩ d kẽn [a Zeova, NW] vẽenem pʋgẽ.”—Ezai 2:5; 5:20.
5, 6. Yel-bʋs n kɩt t’a Ezai wakatã yaa lika?
5 A Ezai togsa bãngr-goam Zide, “Zide rĩm a Ozias ne a Zotam la a Akaaz ne a Ezekɩas wakate.” (Ezai 1:1) Ra yaa gudgr wakate. Neb wʋsg ra baooda naam, zãmb ra bee tũudmã wɛɛngẽ, b ra kaooda bʋʋdã kɛga, la b ra wẽgd naong rãmbã. Baa rĩm dãmb sẽn tar kɩs-sɩd wala a Zotam naamã wakate, ziri wẽnnaam dãmbã tẽn-kug ra ket n bee tãens wʋsg zutu. Rĩm dãmb nins sẽn pa tall kɩs-sɩdã naam wakate, yɛlã zẽname n paase. Wala makre, rĩm wẽng a Akaab zãaga zĩig wẽngã wɛɛngẽ, hal n dɩk a biig n maan maoong n kõ wẽnd a Molɛk. Ad sɩd da yaa tẽeb lik menga!—2 Rĩm dãmba 15:32-34; 16:2-4.
6 Tẽns nins sẽn gũbg-a wã me ra pa bas-a laafɩ ye. Moaab, Edom la Filisti ra rat n yika zabr ne Zida. Baa Israɛll rɩtg babg rĩungã sẽn da kĩ ne Zida wã ra ya a bɛ meng-menga. Sẽn paase, Siiri sẽn da be rɩtg babgẽ wã ra rat n zaba ne Zida. Asiri sẽn da yaa tẽn-toaagã ra yaa yell n yɩɩd menga. A ra baooda wakat fãa n na n soog tẽns n paase. A Ezai sẽn da togsd a bãngr-goamã wakate, Asiri ra reega Israɛll buudã n soog zãnga, n sãam Zida la bala. Wakat n zĩnd tɩ Asiri reeg Zida galʋ-tẽns nins fãa b sẽn gũbg ne lalsã, sã n dok Zerizalɛm.—Ezai 1:7, 8; 36:1.
7. Bõe la Israɛll la Zida maan-yã, la a Zeova manesem yɩɩ wãn to ne-ba?
7 Yel-be-kãensã namsa Israɛll la Zida nin-buiidã Wẽnnaam sẽn maan kaool ne wã, b sẽn pa sak-a wã yĩnga. B yaa wa neb nins yell b sẽn gom Yelbũna sebrẽ wã. B ra yaa neb “sẽn basd sẽn yaa sõama n maand lik tʋʋma.” (Yelbũna 2:13) La baa ne a Zeova sũurã sẽn da yik ne a nin-buiidã, a ra pa bas-b zãng ye. Ayo, a tʋma a Ezai la no-rɛɛsdb a taab tɩ b tɩ vẽneg nebã tẽebã wɛɛngẽ. Buudã ned ning fãa sẽn da rat n na n sõgen a Zeova ne kɩs-sɩd ra na n paama vẽnegr kãngã. B sẽn da tũnug ne no-rɛɛsdb kãensã n kõ vẽenem ningã yõod sɩd ra yaa wʋsgo. A ra kõta vɩɩm.
Tẽeb lik sasa tõnd wakatã
8, 9. Yel-bʋs n kɩt tɩ dũniyã be lik pʋgẽ rũndã-rũndã?
8 A Ezai wakatẽ yɛlã wõnda tõnd wakatã yɛlã wʋsgo. Tõnd wakatã, ninsaalbã nanambs zãgsa a Zeova la Rĩm a Zezi Kirist a sẽn zĩnig naam geer zugã. (Yɩɩl Sõamyã 2:2, 3) Dũni kiris-nedemdã taoor dãmb tudga b nebã. Taoor dãmb kãens yetame tɩ b sõgenda Wẽnnaam, la sɩd-sɩda, bãmb wʋsg tũuda dũni kãngã wẽnnaam dãmb sẽn yaa: tẽn-nonglem sẽn loog nugu, zabr seglgã, arzɛkã la nin-bɛdã. Sẽn paase, b zãmsda nebã kɩfen dãmb zãmsg bala.
9 Zĩig fãa, (tũudum nins sẽn yaa kiris-neb ne yʋʋr balã) dũni kiris-nedemdã kẽesa a toog zabã pʋsẽ. A leb n kẽesa a toog zab sẽn da baood n na n menes buud tõre, la a maan bõn-wẽns a taaba. Sẽn paase, egiliiz rãmb wʋsg pa tũ noy nins Biiblã sẽn yãk vɩɩm manesma wɛɛngẽ wã ye. B muma b nin tʋʋm wẽns wala yoobã la rap sẽn gãe ne taabã taoore, bɩ b tʋma tʋʋm kãens yĩnga. B sẽn zãgs Biiblã noyã yĩnga, dũni kiris-nedemdã neb yaa wa neb nins yell pĩnd yɩɩl gʋlsdã sẽn gom woto wã: “Bãmb ka wʋm walla [b] bãng ye. Bãmb kẽnda lik pʋgẽ. Dũniyã yẽbgr fãa rigimdame.” (Yɩɩl Sõamyã 82:5) Sɩd-sɩda, dũni kiris-nedemdã bee lik bida pʋgẽ wala pĩnd Zida wã.—Wilgri 8:12.
10. Wãn to la vẽenemã yãgd likã pʋgẽ rũndã-rũndã, la wãn to la a nafd sik-m-mens rãmbã?
10 A Zeova vẽnegda sik-m-mens rãmbã lig-kãng pʋgẽ. A tũnugda ne “kɩs-sɩd la gũusd yambã” sẽn ya a sõgen dãmb a sẽn zaeyã, tɩ b ‘yãgd wa fɩtl dãmb dũniyã pʋgẽ.’ (Matɩe 24:45; Filip rãmba 2:15) “Piis a taab[ã]” neb milyõ rãmb sẽn yaa yambã sull tũud-n-taasã sõngd-b lame n kɩtdẽ tɩ tẽebã vẽenem sẽn tik Wẽnnaam Gomdã sẽn yaa Biiblã zugã pɩnda. (Zã 10:16) Vẽenem kãngã kõta sik-m-mens rãmbã saagr dũni kãngã sẽn yaa likã pʋgẽ. A sõngd-b lame tɩ b tall zems-n-taar ne Wẽnnaam, la a sõngd-b tɩ b ra lʋɩ bẽds pʋsẽ tẽebã wɛɛngẽ ye. Vẽenem kãng tara yõod a sẽn kõt vɩɩmã.
‘M pẽgda yãmb yʋʋre’
11. Zãms-bʋg la a Zeova kõ a Ezai wakatã?
11 A Ezai vɩɩmda toog wakate. Rẽ poore, Babilon nebã sẽn da wa n tall a Zeova nin-buiidã n kẽng yembdã, toogã paasame menga. Rẽ fãa pʋgẽ, yaa bõe zãmsg la a Zeova kõ-yã? A pa zãms a nin-buiidã vɩɩmã manesem wɛɛngẽ bal ye. A leb n wilga a sẽn da na n pids a raabã a nin-buiidã wɛɛngẽ to-to. Wala makre, ges-y bãngr-gom-kãsems nins sẽn be Ezai sak 25 n tɩ ta 27 wã. Goam nins sẽn be sag-kãens pʋsẽ wã wilgda a Zeova sẽn da maan to-to yɛlã taoore, la a sẽn maand to-to yɛlã taoor tõnd wakatã.
12. Bõe la a Ezai yeel ne a sũur fãa?
12 Pipi, a Ezai togsa woto: “[Zeova, NW], yãmb yaa mam Wẽnnaam. Mam waoogda yãmba, la m pẽgd yãmb yʋʋre.” Ad a sɩd pẽga Wẽnnaam ne a sũur fãa! Yaa bõe n tus no-rɛɛsã t’a pʋʋs woto? Bʋʋm kãseng a yembr la b wilg verse wã yaoolem goam pʋgẽ. D karemda be woto: “Tɩ bõe, tʋʋm kãsems nins yãmb [a Zeova] sẽn da yeel tɩ y na n maaname wã yaa sɩda, la yãmb maan-b lame n ka bas tɩ vaal ye.”—Ezai 25:1.
13. a) Bõe bãngr n kɩt t’a Ezai tall tẽeb ne a Zeova n paase? b) Wãn to la a Ezai makrã tõe n yɩ zãmsg ne tõndo?
13 A Zeova maana bõn-kãsems wʋsg n kõ Israɛll a Ezai wakatã, tɩ b gʋls rẽ n bĩngi. Yaa vẽeneg t’a Ezai ra mii bõn-kãens b sẽn gʋlsã. Wala makre, a ra miime t’a Zeova yiisa a nin-buiidã Ezipt yembdẽ, la t’a fãag-b-la a Faraõ tãb-biisã nugẽ Mog-miuugẽ wã. A ra leb n miime t’a Zeova wilga a nin-buiidã sor rasempʋɩɩgẽ wã, la t’a tall-b lame n kẽes Kãabg Tẽngẽ wã. (Yɩɩl Sõamyã 136:1, 10-26) Pĩnd kɩbay kãensã buud wilgdame tɩ d tõe n talla kɩs-sɩd ne Wẽnnaam a Zeova. ‘A sẽn yeel t’a na n maana’ bũmb ninsa fãa a maan-b lame. Wẽnnaam sẽn kõ a Ezai bãngr sɩd-sɩdã kõ-a-la pãng t’a kell n kẽn vẽenemã pʋgẽ. Rẽ kɩtame t’a yaa mak-sõng n kõ tõndo. Tõnd me tõe n paa vẽenemã pʋgẽ, d sã n maag d yĩns n zãms Wẽnnaam Gomdã la d tũ-a.—Yɩɩl Sõamyã 119:105; 2 Korẽnt dãmba 4:6.
Galʋ-tẽng la b sãam-yã
14. Bãngr-gom-bʋg la b togs galʋ-tẽng zugu, la ra yaa galʋ-tẽn-bʋgo?
14 Wala makre, Wẽnnaam yãka raabo, tɩ b gʋls-a Ezai 25:2 pʋgẽ. D karemda be woto: “Yãmb luba tẽnga t’a lebg wa kug dʋre. Tẽng ninga sẽn da tar pãnga sãamame. Tɩtaam dãmba na-tẽnga sãamame. La b ka na n tol n me-a yɛs ye.” Galʋ-tẽn-kãng yaa bʋgo? Wõnda a Ezai ra togsda bãngr-goam Babilon zugu. Sɩda, wakat n wa n zĩnd tɩ Babilon lebg kug-dʋr bala.
15. ‘Galʋ-tẽng-kãseng’ bʋg n be rũndã-rũndã, la bõe n na n paam-a?
15 A Ezai sẽn gom galʋ-tẽng ning yellã tara a wõneg rũndã-rũndã bɩ? N-ye. Wilgr sebrã gomda “[galʋ] tẽng kãsenga sẽn so dũniyã rĩm dãmba” yelle. (Wilgri 17:18) Galʋ-tẽn-kãseng kãng yaa “Babilon kãsenga,” sẽn yaa dũniyã gill ziri tũudmã. (Wilgri 17:5) Dũni kiris-nedemdã n yaa Babilon Kãsengã bab-kãseng rũndã-rũndã. A taoor dãmbã n gɩdgd Rĩungã mooneg tʋʋmd a Zeova nin-buiidã sẽn maandã, n yɩɩda. (Matɩe 24:14) La b na n sãama Babilon Kãsengã wala pĩnd wẽndẽ Babilonã t’a pa leb n zĩnd ye.
16, 17. Wãn to la a Zeova bɛɛbã waoog-a pĩnd wẽndẽ wã la tõnd wakatã?
16 Bãngr-gom-bʋg me la a Ezai togs ‘galʋ-tẽng ning sẽn gũbg ne lalsã’ wɛɛngẽ? A Ezai goma ne a Zeova n yeel woto: “Pãens rãmba waoogd[a] yãmba, tɩ tẽns nins sẽn kẽesd neb a taab rabeema me zoet yãmba.” (Ezai 25:3) Wãn to la galʋ-tẽn-kãngã sẽn tar beemã, sẽn yaa “tẽns nins sẽn kẽesd neb a taab rabeema” waoog a Zeova? Be neere, tẽeg-y bũmb ning sẽn paam Babilon rĩm a Nebukadnezaar sẽn yɩ kãseng n yɩɩgã. Yel-kãseng sẽn wa n paam-a a vɩɩmã pʋgẽ wilg-a lame t’a pa baa fʋɩ ye. Yɩɩ tɩlae ne-a t’a sak n deeg t’a Zeova yaa kãseng la pãng sẽn ka to soaba. (Daniɛll 4:31, 32) A Zeova sã n wa wilgd a pãngã, na n yɩɩ tɩlae ne a bɛɛbã meng tɩ b sak n deeg tɩ tʋʋm sẽn tar pãng woto wã yita yẽ nengẽ.
17 Yɩɩ tɩlae ne Babilon Kãsengã t’a sak n deeg t’a Zeova tʋʋmã tara pãng bɩ? N-ye. A Zeova zaea a sõgen dãmbã tɩ b moon toog pʋgẽ dũni gill pipi zabrã sasa. B kẽe tẽeb yembd pʋgẽ yʋʋmd 1918, b sẽn wa n kẽes Sosiete Wats Tawa taoor dãmbã roogã. Moonegã tʋʋmd sẽn da siglã ra yalsame la bala. Rẽ poore, yʋʋmd 1919, a Zeova tũnuga ne a vʋʋsem sõngã n ye ning-b-la bark n kõ-b pãnga. Rẽ poore, b moona koe-noogã dũniyã gill zugu. (Mark 13:10) Wilgr sebrã deng n togsa rẽ fãa. A ra leb n togsa bɛɛbã manesem sẽn da na n yɩ to-to. ‘Rabeem yõka bɛɛba tɩ b waoog arzãn Wẽnnaam.’ (Wilgri 11:3, 7, 11-13) Rẽ pa rat n yeel tɩ b tuubame ye. La yɩɩ tɩlae ne-b tɩ b sak n deeg tɩ tʋʋmd sẽn tar pãng ning a Ezai sẽn da reng n togs sẽn tʋm wakat kãnga wã yita a Zeova nengẽ.
‘A yaa pãn-komsem dãmbã zĩ-soalgdga’
18, 19. a) Bõe yĩng tɩ bɛɛbã pa tõog n sãam a Zeova nin-buiidã burkĩndi? b) Wãn to la b na n kɩt tɩ ‘nin-toosa bas yɩɩla’?
18 Masã, a Ezai gomda a Zeova sẽn tall sõmblem ning ne neb nins sẽn kẽnd vẽenemã pʋgẽ wã yelle. Ad a sẽn yeel a Zeova: “Yãmb yaa pãn-komsem dãmba zĩ-soalgdga, la naong rãmba sã n paam toogo, b wata yãmb nengẽ n wa soonde. Yãmb yaa zĩig neb sẽn soondeda tɩ saag ra paam-b ye. La yãmb yaa wa maasem tʋʋlg wakate. Tɩ bõe, neb nins sẽn maand wẽnga vʋʋsem wẽnda wa sa-kẽeng sẽn wẽed lalga la a wa tʋʋlg sẽn be zĩ-koɛɛng pʋgẽ. Yãmb kɩtame tɩ tɩtaam dãmba sĩndi la y kɩt tɩ nin-toosa bas yɩɩl wa sawadg maasem sẽn maagd zĩiga.”—Ezai 25:4, 5.
19 Yʋʋmd 1919 tɛkã, nin-toosa maana b sẽn na maaneg fãa sẽn na yɩl n sãam balemdb hakɩkã burkĩndi, la b pa tõog ye. Bõe yĩnga? Ya a Zeova sẽn yaa pãng zĩig la zĩ-lilldg n kõ a nin-buiidã yĩnga. A kõta yolsg nams-toaag pʋgẽ. Sẽn paase, a yaa wa lalg sẽn tar pãng kɩɩsg sẽn yaa wʋsgã taoore. Tõnd kẽnda Wẽnnaam vẽenemã pʋgẽ, n gũud ne bas-m-yam tɩ wakat ta tɩ ‘nin-toosã bas yɩɩla.’ N-ye, d gũuda daar ning a Zeova bɛɛbã sẽn na n menema ne d sũy fãa.
20, 21. A Zeova kõta kibs bʋgo, la bõe n na n zĩnd kibs kãng pʋgẽ dũni paalgã pʋgẽ?
20 A Zeova pa kogend a sõgen dãmbã bal ye. A sẽn yaa b Ba sẽn tar nonglmã yĩnga, a geta b yell me. A sẽn yiis a nin-buiidã Babilon Kãsengã yembd pʋgẽ yʋʋmd 1919 wã, rẽ poore a maana kibs n kõ-b tẽeb rɩɩb wʋsgo, b sẽn tõogã yĩnga. Rẽ ra yaa bũmb b sẽn da reng n togs Ezai 25:6 pʋgẽ d sẽn karemdẽ tɩ: “Saasẽ-pãng-soabã na n maana kibs buuda fãa yĩng tãng kãnga zugu. Na n yɩɩ ne nemd sẽn tar kaam la rãam sẽn yaa noogo. Yaa ne nemd sẽn tar kaam t’a bɩɩm yaa noogo la rãam sẽn yoog sõama n yaa neere.” Ad d sɩd paam bark d sẽn be kibs-kãng pʋgẽ wã! (Matɩe 4:4) “A Zeova rɩɩbã” sɩd yaa rɩ-nood wʋsgo. (1 Korẽnt dãmba 10:21, NW ) A tũnugda ne “kɩs-sɩd la gũusd yambã” n kõt tõnd bũmb nins fãa d sẽn dat tẽebã wɛɛngẽ wã.
21 La pa kibsã bal la Wẽnnaam kõ tõnd ye. Tẽeb kibsã d sẽn tar masã wã tẽegda tõnd rɩɩbã sẽn na n yɩ wʋsg Wẽnnaam dũni paalgã a sẽn kãabã pʋgẽ wã yelle. Rẽ, “nemd sẽn tar kaam[a]” sʋka, rɩɩb meng-mengã na n zĩnda wʋsgo. Rũndã-rũndã, “kom” ning yell b sẽn gom a Zezi belmã “bãnd” pʋgẽ wã namsda kɩs-sɩd dãmb wʋsgo. Ad b sɩd na paam yolsg zãng-zãnga, kom sɩd-sɩdã la tẽebã kom sẽn pa na n le nams ned ba a ye wã! (Matɩe 24:3, NW, 7) Yɩɩl-gʋlsdã goam sɩd kengda nin-kãens raoodo. A yeelame: “Ki wʋsg na n zĩnda soolem pʋgẽ. A na n miima tãens zutu, a biisa na n yɩɩ wa Libã dẽnda. La tẽnga neba na n fɩɩga wa mood sẽn be pʋt pʋsẽ.”—Yɩɩl Sõamyã 72:16.
22, 23. a) ‘Fu-bʋg sẽn lut’ la b na n yiisi, la yaa wãn to la rẽ na n maane? b) Wãn to la b na n yiis ‘a Zeova nebã yãnde’?
22 Kelg-y kãabg sẽn yaa kãseng n yɩɩd woto menga. A Ezai rɩka yel-wẽnã la kũumã n mak ne ‘fuug sẽn luti,’ n yeele: “Bũmb ning sẽn lud b yama wa fuugã bũmb ning sẽn mum bu-zẽmba nina, Wẽnd [a Zeova] na n pil-a-la Siõ tãnga zugu.” (Ezai 25:7, Sebr Sõngo) Yel-wẽnã la kũumã luda ãdem-biisã wa fu-goabg tɩ b pa tõe n vʋʋs ye. Bãng-y tɩ rẽ me na n saame! Ãdem-biis nins sẽn sakd Wẽnnaamã n na n dɩ a Zezi maoongã nafa zãnga. Ad d sɩd gũuda raar-n-kãnga ne d sũy fãa!—Wilgri 21:3, 4.
23 No-rɛɛsã sẽn paam vʋʋsem sõng vẽnegrã gomda wakat kãng sẽn tar ziirã yelle. A yeta woto tɩ kõt tõnd bas-m-yam: “[Wẽnnaam] na n sãama kũum wakat sẽn ka sɛta. Zusoaba sẽn yaa soaala na n yẽesa nintãm nins fãa sẽn be neba ninẽ wã. La bãmb na n yiisa neb nins fãa sẽn be dũniyã zuga yãnde. Tɩ bõe, yaa Zusoabã n gom.” (Ezai 25:8) Ned ba a ye pa na n ki kũ-zaalg yĩnga, bɩ n yãb tɩ ned a sẽn nong n ki ye. Ad toeeng kãnga sɩd yaa bark tɛkẽ! Sẽn paase, tõnd neeme tɩ zĩig fãa, b sãbgda Wẽnnaam ne a nin-buiidã n yelgd zɩlem-beed b zutu, tɩ b sĩnd b noor hal sẽn kaoose. Rẽ fãa me na n saame. Bõe yĩng tɩ na n sa? Ya a Zeova sẽn na n menems neb nins sẽn maand rẽ wã. Nin-kãens yaa ziri wã ba a Sʋɩtãan Munaafɩɩkã, ne a poorẽ dãmba fãa.—Zã 8:44.
24. Neb nins sẽn kẽnd vẽenemã pʋgẽ wã manesem na n yɩɩ wãn-wãna, a Zeova sã n wa tʋm tʋʋm sẽn tar pãng n sõng-ba?
24 Neb nins sẽn kẽnd vẽenemã pʋgẽ wã sã n wa yã a Zeova pãngã wilgrã, na n kɩtame tɩ b yeel woto ne sũ-noogo: “Gese yaa tõnd Wẽnnaam, yaa bãmb la tõnd sẽn da tẽed n baood fãagrã, bãmb yaa Zusoaba. Tõnd teega bãmba, bɩ y wa tɩ d kɩdem n maan sũ-noog bãmb fãagra yĩnga.” (Ezai 25:9) Ka la bilfu, ãdem-biis nins fãa sẽn tũud tɩrlmã na n talla bʋʋm n kɩdem. Likã na n menema zãnga, t’a Zeova vẽenemã bui kɩs-sɩd dãmbã wakat sẽn pa sat yĩnga. Saagr ye beeme n tar ziir n yɩɩd woto sɩda? Sɩd-sɩda, ka be ye!
Y tõe n wilga a võor bɩ?
• Bõe yĩng tɩ vẽenemã pʋgẽ kẽnd tar yõod wʋsg rũndã-rũndã?
• Bõe yĩng t’a Ezai pẽg a Zeova yʋʋrã?
• Bõe yĩng tɩ bɛɛbã pa na n tõog n sãam Wẽnnaam nin-buiidã burkĩndã abada?
• Bark kãsems bʋs n gũud neb nins sẽn kẽnd vẽenemã pʋgẽ wã?
[Zãmsgã sogsgã]
[Foto, seb-neng 21]
Zida nebã rɩka b kamb n maan maand n kõ a Molɛke
[Foto rãmba, seb-neng 23]
A Ezai sẽn da mi a Zeova tʋʋmã sẽn tar pãngã kɩtame t’a pẽg a Zeova yʋʋrã
[Foto, seb-neng 24]
A Zeova vẽenemã na n buiya nin-tɩrsã wakat sẽn pa sat yĩnga