D sak vʋʋsem sõngã ratem n vɩɩmde!
D sak vʋʋsem sõngã ratem n vɩɩmde!
“[Vʋʋsem sõng, NW ] ratem sakr wata ne vɩɩm.”—ROM DÃMBA 8:6.
1, 2. Welg bʋg la Biiblã maand “yĩnga” la “vʋʋsem sõngã” sʋka?
TALL vɩɩm manesem sẽn yaa yɩlemd Wẽnnaam taoor zãmaan dẽgd sẽn lʋɩɩsd yĩngã ratem pidsg taoor pʋgẽ pa nana ye. Baasg zãnga, Gʋlsg Sõamyã wilgdame tɩ “yĩnga” yaa lebend ne “vʋʋsem sõngã.” A wilgda baas-beed nins sẽn wate, f sã n bas f meng tɩ yĩngã sẽn maand yel-wẽnã tõog-fo, tɩ yaa lebend vẽeneg ne bark nins f sẽn paamde, f sã n sak tɩ Wẽnnaam vʋʋsem sõngã tʋm f vɩɩmã pʋgẽ.
2 Wala makre, a Zezi Kirist yeelame: “Yaa [vʋʋsem, NW ] n kõt vɩɩm. Yĩnga ka yõod ye. Goam nins mam sẽn togs yãmba yaa [vʋʋsem, NW ] la vɩɩm.” (Zã 6:63) Tʋm-tʋmd a Poll gʋlsa kiris-neb sẽn be Galasi wã woto: “Yĩnga ratem zabda ne Sɩɩg Sõngo [“vʋʋsem sõngo,” NW ] la Sɩɩg Sõng zabda ne yĩnga ratem; la bãmb kɩɩsda taab[a].” (Galat dãmba 5:17) A Poll yeelame me: “Ned ning sẽn bʋt yĩnga ratem yĩnga, a na n wʋka yĩnga ratem yaoodo sẽn yaa sãoongo. La ned ninga sẽn bʋt Sɩɩg Sõng yĩnga, a na n wʋka Sɩɩg Sõng yaoodo sẽn yaa vɩɩm sẽn ka sɛta.”—Galat dãmba 6:8.
3. Bõe n yaa tɩlae sẽn na yɩl n bas tʋlsem la manesem wẽnse?
3 A Zeova vʋʋsem sõngã, a pãng sẽn tʋmdã, sɩd tõe n yiisa “yĩnga ratem wẽnga” sẽn yaa rẽgdã la a kɩt tɩ tõnd yĩnsã sẽn maand yel-wẽnã ra soog-d tɩ yɩ wẽng ne-d ye. (1 Pɩɛɛr 2:11) Sẽn na yɩl tɩ tʋlsem wẽnsã ra soog-do, tara yõod wʋsg tɩ d paam Wẽnnaam vʋʋsem sõngã sõngre, bala a Poll gʋlsame: “Yĩnga ratem sakr wata ne kũum, la [vʋʋsem, NW ] Sõng ratem sakr wata ne vɩɩm la laafɩ.” (Rom dãmba 8:6) Vʋʋsem sõngã ratem sakr dat n yeelame tɩ bõe?
‘Vʋʋsem sõngã ratem sakre’
4. “Vʋʋsem sõngã ratem sakr” dat n yeelame tɩ bõe?
4 A Poll sẽn da wa n gʋls ‘vʋʋsem sõngã ratem sakr’ wɛɛngẽ wã, a tũnuga ne Gerɛk gom-biig sẽn dat n yeel tɩ “d sẽn tags to-to, tagsgo, . . . bõn-datla, tʋlsem, modgre.” Gom-biig sẽn tɩ loe ne rẽ rat n yeelame tɩ “tagse, sake.” Woto yĩnga, vʋʋsem sõngã ratem sakr dat n yeelame tɩ bas t’a Zeova pãng sẽn tʋmdã wilg-f sore, t’a soog-fo la a tus-fu. A rat n yeelame tɩ d sakda ne yamleoog tɩ Wẽnnaam vʋʋsem sõngã tall pãng zãng d tagsgã, d manesmã la d tʋlsmã zutu.
5. Hal sẽn ta zĩ-bʋg la d segd n sak tɩ vʋʋsem sõngã tall pãng tõnd vɩɩmã zugu?
5 A Poll wilga tõnd sẽn segd n sak tɩ vʋʋsem sõngã tall pãng tõnd zug tɩ ta zĩig ningã sõma-sõma a sẽn wa n yeel tɩ d yɩ ‘yembs ne vʋʋsem sõngã maasmã.’ (Rom dãmba 7:6, NW ) B sẽn tẽed a Zezi maoong sẽn yao yel-wẽn samdã yĩnga, kiris-nebã paama b mens ne yel-wẽnã yembdo, la woto b “yaa kũum” sã n yaa ne b sẽn da yaa to-to pĩnd n yaa yel-wẽna yembsã. (Rom dãmba 6:2, 11) Neb nins sẽn ki woto makr wɛɛngẽ wã ket n vɩɩ yĩngã wɛɛngẽ, la masã b soo b mens n na n tũ Kirist n yaa “tɩrlem yembse.”—Rom dãmba 6:18-20.
Toeen-kãsenga
6. Toeeng bʋg la neb nins sẽn lebgd ‘tɩrlmã yembsã’ maan-yã?
6 D sẽn da yaa ‘yel-wẽna yembs’ n wa toeem n sõgend Wẽnnaam n yaa ‘tɩrlem yembsã’ sɩd yaa toeeng kãsenga. A Poll gʋlsa neb kẽer sẽn toeem woto wã wɛɛngẽ: “Yãmb paama pekre, yãmb welgame tɩ yɩ sõama, la yãmb lebga tɩrs Zusoab a Zezi Kirist yʋʋra yĩnga, la ne tõnd Wẽnnaam Sɩɩga pãnga.”—Rom dãmba 6:17, 18; 1 Korẽnt dãmba 6:11.
7. Bõe yĩng tɩ tar yõod tɩ d ges yɛlã wa a Zeova sẽn get-b to-to wã?
7 Sẽn na yɩl n maan toeeng kãseng a woto, pipi, d segd n bãnga a Zeova tagsg ne yɛlã. Yʋʋm kobs sẽn looge, yɩɩl gʋlsd a Davɩɩd bõosa Wẽnnaam woto ne a sũur fãa: “Zusoaba, kɩt-y tɩ mam bãng yãmb soɛya . . . Tall-y maam yãmb sɩda pʋgẽ, la y zãms maam.” (Yɩɩl Sõamyã 25:4, 5) A Zeova kelga a Davɩɩde, la A tõe n deega pʋʋsg a woto a rũndã-rũndã sõgen dãmbã sẽn maandã me. Wẽnnaam soayã la a sɩdã sẽn yaa yɩlem la sõmsã yĩnga, d sã n tags b zut sõma na n sõng-d lame, d sã n wa paam makr sẽn dat tɩ d pids yĩngã ratem sẽn yaa wẽnsã.
Wẽnnaam Gomdã sõngr tara yõod wʋsgo
8. Bõe yĩng tɩ d segd n zãms Biiblã?
8 Tũu ne vʋʋsem sõngã tɩ b gʋls Wẽnnaam Gomdã sẽn yaa Biiblã. Woto, manesem sẽn tar yõod wʋsg d sẽn tõe n tũnug ne n kɩt tɩ vʋʋsem sõng kãng tall pãng tõnd vɩɩmã zug yaa d sẽn na n karemdẽ la d zãmsd Biiblã daar fãa, sã n tõeyã. (1 Korẽnt dãmba 2:10, 11; Efɛɛz rãmba 5:18) D sã n pids d yamã la d sũurã ne Biiblã sɩd la a noyã, na n sõng-d lame tɩ d yals kãn-kãe, d tẽebã sã n wa paam makre. N-yẽe, yoob makr sã n wa wa, Wẽnnaam vʋʋsem sõngã tõe n tẽega tõnd Gʋlsg Sõamyã zãmsg la a sor-wilgr noya. No-kãens tõe n kɩtame tɩ d sẽn yãk yam n na n maan Wẽnnaam daabã pãng paase. (Yɩɩl Sõamyã 119:1, 2, 99, NW; Zã 14:26) Woto, b pa na n belg-d tɩ d kẽ manesem wẽng pʋgẽ ye.—2 Korẽnt dãmba 11:3.
9. Wãn-wãn la Biiblã zãmsg kɩtd tɩ d sẽn yãk yam n na n kogl d zems-n-taarã ne a Zeova wã pãng paase?
9 Bɩ d ket n kẽngd taoor n zãmsd Gʋlsg Sõamyã ne sɛb nins sẽn tik Biiblã zugã sõma ne d sũy fãa. D sã n maan woto, Wẽnnaam vʋʋsem sõngã na n talla pãng tõnd yamã la d sũurã zutu, n kɩt tɩ d tall naneb ne a Zeova noyã n paase. Tõnd zems-n-taarã ne Wẽnnaam lebgda bũmb ning sẽn tar yõod n yɩɩd d vɩɩmã pʋgẽ wã. D sã n paam makre, d pa baood n na n tags sũ-noog ning d sẽn na n paam wẽngã maaneg pʋgẽ wã yell ye. Sẽn yaa lebende, sẽn pak tõnd n yɩɩd zĩig pʋgẽ yaa tõnd burkĩndã a Zeova taoorã. Tõnd sã n tar naneb sẽn yaa kãseng ne zems-n-taar ning d sẽn tar ne-a wã, na n tus-d lame tɩ d zab ne tʋlsem buud fãa sẽn tõe n sãam-a wã.
“Mam nonga yãmb tõoga wʋsgo”
10. Bõe yĩng t’a Zeova tõogã sakr yaa tɩlae sẽn na yɩl n sak vʋʋsem sõngã ratem?
10 Wẽnnaam Gomdã bãngr bal pa sek tɩ d sak vʋʋsem sõngã ratem ye. Rĩm a Salomo ra mii a Zeova noyã sõma, la a pa tũ-b a kʋʋlem wakat ye. (1 Rĩm dãmba 5:9, 10; 1 Rĩm dãmba 11:1-6) Tõnd yamã sã n nong n tik tẽebã yɛl zutu, d pa na n yã bal tɩ d segd n bãnga Biiblã sẽn yet bũmb ningã ye. D na n yãame me tɩ d segdame n sak Wẽnnaam tõogã ne d sũur fãa. Woto rat n yeelame tɩ d bao n bãng a Zeova noyã neer la d modg n tũ-b sõma-sõma. Yɩɩl gʋlsdã ra tara manesem a woto. A yɩɩla woto: “Mam nonga yãmb tõoga wʋsgo. Mam tagsda a yell daar[ã] fãa.” (Yɩɩl Sõamyã 119:97) Tõnd sã n sɩd rat n tũ Wẽnnaam tõogã, tusda tõnd tɩ d wilg a zʋg-sõma wã d vɩɩmã pʋgẽ. (Efɛɛz rãmba 5:1, 2) D pa na n bas tɩ wẽngã maaneg yamleoog kẽ-d tɩ tɩɩm kaẽ ye. D na n kɩtame tɩ vʋʋsem sõngã biis puk d vɩɩmã pʋgẽ, la d sẽn tʋll n ta a Zeova yamã na n kɩtame tɩ d bas “yĩnga ratem biis” sẽn yaa rẽgdã.—Galat dãmba 5:16, 19-23; Yɩɩl Sõamyã 15:1, 2.
11. Wãn to la y na n wilgẽ t’a Zeova noor ning sẽn gɩdg yoobã yaa tõnd koglg yĩnga?
11 Wãn to la d tõe n bao n tall naneb wʋsg la nonglem ne a Zeova tõogã? Manesem a yembr yaa d sẽn na n bao n bãng a yõodã neere. Ges-y Wẽnnaam tõog ning sẽn wilg tɩ pag ne rao lageng segd n maana kãadem pʋgẽ balã, la a gɩdgd yoobã. (Hebre dãmba 13:4) Tõ-kãngã sakr kɩtdame tɩ d kong bõn-sõng bɩ? D yĩngr Ba sẽn tar nonglmã na yiis noor sẽn mongd tõnd bũmb sẽn be nafr sɩda? Yaa vẽeneg tɩ ayo! Ges-y bũmb ning sẽn paam neb wʋsg sẽn pa tũud a Zeova noyã vɩɩm manesmã wɛɛngẽ wã. Pʋs rɩkr sẽn pa tũ ne b rãmb raabã nong n baasda ne pʋs yiisgu, bɩ yãg n kẽ kãadem la kãadem sẽn pa tar sũ-noogo. Bãmb wʋsg segd n wuba biig tɩ sɩd bɩ pag kaẽ ye. Sẽn paase, neb nins sẽn yoodã tõe n wa paama taoor bãase. (1 Korẽnt dãmba 6:18) La Wẽnnaam sõgen sã n maan yoobo, a tõe n waa ne sũ-sãams wʋsgo. F sã n maood ne sũur kaset sẽn ningd-f taale, a tõe n waa ne gãe n pa gõe yʋngo, la yɩɩre. (Yɩɩl Sõamyã 32:3, 4; 51:5) Rẽ yĩnga pa vẽeneg t’a Zeova tõogã sẽn gɩdg yoobã yaa sẽn na yɩl n kogl tõnd sɩda? N-yẽe, d sã n kell n tall vɩɩm manesem yɩlemde, a bee yõod wʋsgo!
Pʋʋs-y n kos a Zeova sõngre
12, 13. Bõe yĩng tɩ zems tɩ d pʋʋse, yel-wẽnã tʋlsem sã n wa kẽ-do?
12 Vʋʋsem sõngã ratem sakr sɩd baoodame tɩ d pʋʋs ne pʋ-peelem. Zemsame tɩ d kos Wẽnnaam vʋʋsem sõngã sõngre, bala a Zezi yeelame: “A sã n yaa woto tɩ yãmb . . . bãng tɩ kõ yãmb kamba kũun sẽn yaa sõama; dẽ, sẽn yɩɩda yãmb arzãn Ba kõn kõ neb nins sẽn kot bãmba Sɩɩg Sõng bɩ?” (Luk 11:13) D tõe n pʋʋsame n wilg tɩ d teega vʋʋsem sõngã sõngr d pãn-komslmã wɛɛngẽ. (Rom dãmba 8:26, 27) Tõnd sã n wa mik tɩ yel-wẽn tʋlsem bɩ manesem kẽer tara pãng d zugu, bɩ tẽed a to sẽn tar nonglem sã n wa togs tõnd rẽ, yaa yam bũmbu, d sã n togs sẽn pak-dã d pʋʋsgã pʋgẽ, n kos Wẽnnaam sõngre n tõog manesem kãense.
13 A Zeova tõe n sõnga tõnd tɩ d tik d yamã yɛl sẽn yaa tɩrse, sẽn yaa sõma la sẽn zems pẽgr zutu. La ad sɩd zemsa sõma tɩ d pʋʋs-a ne d sũy fãa t’a sõng-d tɩ “Wẽnnaam laafɩ” wã gũ d sũyã la d tagsgã! (Filip rãmba 4:6-8) Woto yĩnga, bɩ d pʋʋs n kos a Zeova sõngr n “bao tɩrlem ne Wẽnnaam sakre la tẽeb ne nonglem la sũ-mar ne sũ-bʋgsem.” (1 Tɩmote 6:11-14) Ne d yĩngr Ba wã sõngre, yɩɩrã la makrã pa na n bɩ n wa soog-d tɩ tɩɩm kaẽ ye. Sẽn yaa lebende, Wẽnnaam bãanã na n yɩɩ vẽeneg d vɩɩmã pʋgẽ.
Ra beeg-y vʋʋsem sõngã ye
14. Bõe yĩng tɩ Wẽnnaam vʋʋsem sõngã yaa pãng sẽn kɩtd tɩ d yɩ yɩlemde?
14 A Zeova sõgen dãmb sẽn bɩ wã tũuda a Poll sagl-kãngã: “Bɩ y ra kiis Sɩɩg Sõng [vʋʋsem sõng, NW ] ye.” (1 Tesalonik rãmba 5:19) Wẽnnaam vʋʋsem sõngã sẽn yaa “vʋʋsem sẽn yaa sõngã” yĩnga, a yaa yɩlemde, n welg toore. (Rom dãmba 1:4, NW ) Vʋʋsem sõngã sã n tʋmd tõnd zutu, a yaa pãng sẽn kɩtd tɩ d yɩ sõng la yɩlemde. A sõngd n kɩtame tɩ d tall vɩɩm manesem sẽn yaa yɩlemd la sẽn wilgd tɩ d sakda Wẽnnaam. (1 Pɩɛɛr 1:2) Manesem dẽgd buud fãa yaa vʋʋsem sõng kãng paoogre, la a tõe n talla bi-wẽns wʋsgo. Wãn to?
15, 16. a) Wãn to la d tõe n beeg Wẽnnaam vʋʋsem sõngã? b) Wãn to la d tõe n gũus n da wa beeg a Zeova vʋʋsem sõngã?
15 Be neere, a Poll gʋlsame: “Bɩ y ra beeg Wẽnnaam Sɩɩg Sõng [vʋʋsem sõng, NW ] sẽn ning yãmb bãnd fãagr daar yĩnga ye.” (Efɛɛz rãmba 4:30) Gʋlsg Sõamyã wilgdame t’a Zeova vʋʋsem sõngã yaa bãnde, bɩ “deng-n-lɛmbg” n kõ kiris-neb nins sẽn zae sẽn tar kɩs-sɩdã. La rẽ yaa pa-kiid vɩɩm saasẽ. (2 Korẽnt dãmba 1:22; 1 Korẽnt dãmba 15:50-57; Wilgri 2:10) Wẽnnaam vʋʋsem sõngã tõe n wilga sẽn zae-bã ne b tũud-n-taasã sẽn tar tẽng zug saagrã sor tɩ b tall kɩs-sɩd b vɩɩmã pʋgẽ, la a tõe n sõng-b lame tɩ b lak b mens ne yel-wẽnã.
16 Tʋm-tʋmdã yeelame tɩ d gũus ne ziri, wagdem, yãnd tʋʋm la yɛl a taaba. D sã n basa d mens tɩ bõn-kãensã yamleoog kẽ-do, yaa Wẽnnaam Gomdã saglg vʋʋsem sõngã sẽn vẽneg tɩ b gʋlsã la d kɩɩsda. (Efɛɛz rãmba 4:17-29; 5:1-5) Ne manesem buudu d tõe n beegda Wẽnnaam vʋʋsem sõngã, la sɩd-sɩda woto yaa bũmb d sẽn segd n lak d mens ne. Rẽ wɛɛngẽ, ned ning fãa sẽn sɩng n pa tũud a Zeova Gomdã saglga, a tõe n wa sɩngame n tar manesem bɩ zʋg sẽn tõe n wa baas ne yel-wẽnã maaneg ne yamleoogo. Rẽ na n kɩtame t’a kong Wẽnnaam lohormã zãnga. (Hebre dãmba 6:4-6) Baa tõnd sã n pa maand yel-wẽnã tɩ yaa minung masã, tõe tɩ d tar n debda zĩ-kãnga. D sã n tall manesem sẽn yaa lebend ne vʋʋsem sõngã sor-wilgri, d tõe n beegd-a lame. D tõee woto me n kɩɩsd a Zeova sẽn yaa vʋʋsem sõngã yẽgrã la d sãamd a sũuri. Tõnd sẽn nong Wẽnnaamã, d pa tol n dat n maan woto ye. Sẽn yaa lebende, bɩ d pʋʋs sõma n kos a Zeova sõngr sẽn na yɩl n da beeg a vʋʋsem sõngã ye, la d tõog n waoog a yʋ-sõngã n ket n sakd vʋʋsem sõngã ratem.
Ket-y n sakd vʋʋsem sõngã ratem
17. Tẽeb bõn-datɩ bʋs la d tõe n yãke, la bõe yĩng tɩ rẽ pidsg yaa yam bũmbu?
17 Manesem kãseng tõnd sẽn na n tũnug ne n ket n sakd vʋʋsem sõngã ratem yaa d sẽn na n yãk tẽeb bõn-datɩ la d modg n pids-ba. Wa sẽn zems ne tõnd ratmã la yɛlã sẽn yaa to-to wã, bõn-datɩ toor-toor la d tõe n yãke. D tõe n yãka bõn-datl sẽn yaa d modg tɩ d sẽn minim n maand zãmsgã to-to wã yɩ sõma n paase, la d kẽes d meng moonegã tʋʋmdẽ n paase, la d bao n paam zu-noog tʋʋmd takɩ, wala wakat fãa so-pakrã tʋʋmde, Betɛllẽ bɩ misioneer tʋʋmdã. Rẽ na n kɩtame tɩ d yamã pid ne tẽebã yɛla. A na n leb n sõng-d lame tɩ ninsaal pãn-komslmã ra tõog-d ye. A na n leb n kɩtame tɩ laogã raabo, n paas tʋlsem sẽn yaa lebend ne Gʋlsg Sõamyã sẽn wɛ dũni kãngã pʋgẽ wã ra kɩt tɩ d bʋdg ye. Woto sɩd yaa yam bũmbu, bala a Zezi kõo sagl-kãngã: “Bɩ y ra bĩng y paoong dũniyã ka, zĩig ninga mogdo la tẽng-n-piisim sẽn sãamda, la wagda sẽn kẽed n wʋkdẽ wã ye. Bĩng-y yãmb paoonga arzãna, zĩig ninga mogdo la tẽng-n-piisim sẽn ka sãamda, la wagda sẽn ka kẽeda la sẽn ka wʋkda ye. Tɩ bõe, fo paoong sẽn be zĩig ninga, fo sũur me na n zĩnda be.”—Matɩe 6:19-21.
18. Bõe yĩng tɩ tar yõod wʋsg tɩ d ket n sakd vʋʋsem sõngã ratem yaoolem day kãensã pʋsẽ?
18 Vʋʋsem sõngã ratem sakr la dũniyã tʋlsem zãgsg sɩd yaa yam bũmb ‘yaoolem wakat’ kãensã. (2 Tɩmote 3:1-5) Sẽn yɩɩd fãa, “dũniyã ne a ratem wẽnga me loogdame, la ned ninga sẽn maand Wẽnnaam daab paada wakat sẽn ka sɛta.” (1 Zã 2:15-17) Wala makre, bi-bɩɩg sã n yãk bõn-datl n na n sõgen wakat fãa koe-moonegã pʋgẽ, woto tõe n sõng-a-la a bɩ-bɩɩlmã sasa sẽn yaa toogã wakate. A sã n wa paamd makr sẽn dat n tus-a t’a kɩɩse, a na n paama tagsg sẽn yaa vẽeneg ne a sẽn dat n pids a Zeova tʋʋmdã pʋgẽ wã. Tẽeb ned a woto na n gesame tɩ yaa yalemdo, bɩ gãeems menga, t’a bas tẽebã bõn-datɩ pʋgb n bao laog bɩ yõ-noogr buud fãa yel-wẽnã sẽn kãabdã. Tẽeg-y t’a Moiiz yamã sẽn da tik tẽebã yɛl zutã yĩnga a “tagsame t’a sã n lagem ne Wẽnnaam nebã n sak namsgo yaa neer n yɩɩd sũ-noog ninga yel-wẽna sẽn kõt wakat bilf pʋgẽ wã.” (Hebre dãmba 11:24, 25) D yaa bi-bɩɩg tɩ d yaa nin-kẽem me, d yãkda yam n maan woto, d sã n ket n sakd vʋʋsem sõngã ratem n bas yĩngã sẽn maand yel-wẽnã ratem sakre.
19. Nafa bʋs la d na n paame, d sã n ket n sakd vʋʋsem sõngã ratem?
19 “Yĩnga ratem sakr wata ne kũum,” la “Sɩɩg Sõng [vʋʋsem sõng, NW ] ratem sakr wata ne vɩɩm la laafɩ.” (Rom dãmba 8:6, 7) Tõnd sã n ket n sakd vʋʋsem sõngã ratem, d na n paama laafɩ sẽn tar yõod wʋsgo. Tõnd sũyã la d tagsgã na n paama koglg sõma n paase, yel-wẽnã tʋlsem taoore. D na n tõogame n yals kãn-kãe n paas makr sẽn baood tɩ d kẽes d mens wẽng maaneg pʋgẽ wã taoore. La d na n paama Wẽnnaam sõngr n tõog maoor ning sẽn maand wakat fãa yĩngã la vʋʋsem sõngã sʋkã.
20. Bõe yĩng tɩ d tõe n kɩs sɩd tɩ d tõe n tõoga zabr ning sẽn maand yĩngã la vʋʋsem sõngã sʋkã?
20 D sã n ket n sakd vʋʋsem sõngã ratem, d na n kell n talla zems-n-taar sẽn tar yõod wʋsg ne a Zeova sẽn yaa vɩɩmã ne vʋʋsem sõngã fãa Yẽgrã. (Yɩɩl Sõamyã 36:10; 51:9) A Sʋɩtãan Munaafɩɩk la a poorẽ dãmbã maanda b sẽn tõe fãa sẽn na yɩl n sãam tõnd zems-n-taarã ne Wẽnnaam a Zeova. B makdame n na n soog tõnd yamã, n miẽ tɩ d sã n bas tɩ rẽ tõog-do, na n wa kɩtame tɩ d lebg Wẽnnaam bɛ, tɩ wa baas ne kũum. La d tõe n tõoga zabrã sẽn maand yĩngã ne vʋʋsem sõngã sʋkã. Yɩɩ woto ne a Poll mengã, bala a sẽn gʋls a meng maoorã wɛɛngẽ, a sʋka woto pipi: “Ãnda n na n fãag maam ne kũum sẽn be yĩng kãngã pʋgẽ wã?” Rẽ poore, a wilgame tɩ fãagrã yaa bũmb sẽn tõe, n yeel woto: “Bark Wẽnnaam tõnd Zusoab a Zezi Kirist maasem yĩnga.” (Rom dãmba 7:21-25) Tõnd me tõe n pʋʋsa Wẽnnaam bark ne Kirist maasem, a sẽn kõ-d sõngr tɩ d tõe n mao ne ninsaal pãn-komslmã la d ket n sakd vʋʋsem sõngã raabã, n tar vɩɩm sẽn pa satã saagr sẽn yaa kãsengã.—Rom dãmba 6:23.
Y tẽrame bɩ?
• Vʋʋsem sõngã ratem sakr dat n yeelame tɩ bõe?
• Wãn to la d tõe n bas t’a Zeova vʋʋsem sõngã tall pãng tõnd vɩɩmã zutu?
• Tõnd maoorã ne yel-wẽnã pʋgẽ, wilg-y bũmb ning sẽn kɩt tɩ tar yõod wʋsg tɩ d zãms Biiblã, tɩ d sak a Zeova tõodã, la d pʋʋs-a wã.
• Wãn to la tẽeb bõn-datɩ yãkr kɩtd tɩ tõnd pa vɩɩmã sor zugu?
[Zãmsgã sogsgã]
[Foto, seb-neng 14]
Biiblã zãmsg sõngda tõnd tɩ d yals kãn-kãe bũmb nins sẽn zabd ne tõnd tẽebã taoore
[Foto, seb-neng 15]
D segdame n pʋʋs n kos a Zeova sõngr sẽn na yɩl n tõog yel-wẽnã tʋlsem
[Foto rãmba, seb-neng 16]
Tẽeb bõn-datɩ tõe n sõnga tõnd tɩ d kell n sak vʋʋsem sõngã ratem