Rĩungã koe-noog yaa bõe?

Rɩẽ, dũniyã gill zugu, tẽns 235 pʋsẽ, neb 6 035 564, kom-bɩɩs la nin-kẽemba, n dɩk lɛɛr dãmb 1 171 270 425 n gom ne b taabã a yelle. A togsgã ne noor toor sẽn ka be, sẽn na yɩl n moon-a la b wilg a võore, b kõo zãma wã sẽn yɩɩd sɛb milyõ 700. B leb n pʋɩɩ kasɛt dãmb la kasɛt video rãmb tusa. Yaa bõe la b ra moonda?

YAA Wẽnnaam Rĩungã koe-noogo. Sɩd-sɩda, ninsaal sẽn be dũni zug tɛka, b zɩ n moon “soolem koe-noog kãngã” wa rũndã-rũndã ye.—Matɩe 24:14.

Neb nins fãa sẽn moond koe-noogã woto la b zãmsd-a neb a taab dũniyã gill zugã kõo b mens ne yamleoog n maand-a. Sã n yaa ne dũniyã neb tagsgo, wõnda b pa tar tõog n na n tʋm tʋʋmdã ye. La sã n yaa woto b raoodã la b tõogrã yita yɛ? Sẽn yɩɩd fãa yaa koe-noogã sẽn tar pãngã yĩnga, bala a tara koees sẽn gomd bark nins ãdem-biisã sẽn na n paama yelle. Yaa bark nebã fãa sẽn dat n paam ne b sũy fãa. Bark kãens yaa sũ-noogã, yolsg ne laogã zu-loeese, goosneema sõngo, laafɩ la bãane, la bũmb a to neb wʋsg sẽn pa tẽed tɩ tõe n yɩɩme ye: vɩɩm sẽn pa satã! Woto sɩd yaa koe-noog n kõ neb nins sẽn dat n bãng vɩɩmã võorã. N-ye, y tõe n paama bark kãensã fãa la a taaba, y sã n sak Rĩungã koɛɛg b sẽn moondã.

Rĩungã yaa bõe?

La Rĩung ning b sẽn moond n yet tɩ yaa koe-noogã yaa bõe? Yaa Rĩung ning yĩng neb milyõ rãmb sẽn pʋʋse, pʋʋsg ning neb wʋsg sẽn mi wã: “Tõnd Ba sẽn be arzãna, tɩ yãmb yʋʋr yɩ ne waoogre. tɩ yãmb soolem wa, tɩ yãmb daab maan duniyã zug wa sẽn maand arzãna.”—Matɩe 6:9, 10.

Yaa Rĩung ning yell Hebre buudã no-rɛɛs a Daniɛll sẽn gom sẽn yɩɩd yʋʋm kob-gĩn 25 sẽn loog woto wã: “Wẽnnaam sẽn be yĩngra na n kɩtame tɩ soolem sẽn ka tõe n sãam la buud a taab sẽn ka tõe n deeg zĩndi. A na n wãa soolem kãens fãa tɩ b menem n bas-a t’a yaas wakat fãa.”—Daniɛll 2:44.

Woto, koe-noogã gomda Rĩungã bɩ goosneema Wẽnnaam sẽn dɩt naam a pʋgẽ yelle. A na n yiisa wẽngã fãa tɩ rẽ poor bɩ a rɩ naam tẽngã gill zug n wa ne laafɩ. Rĩungã na n pidsa Naandã pipi raabã a sẽn da yãk ãdem-biisã la tẽngã yĩngã.—Sɩngre 1:28.

 ‘Saasẽ soolem kolgame’

Sẽn zems yʋʋm 2 000 sẽn looge, rao sẽn yaa wẽn-zoɛt n yɩ pipi n moon Rĩungã koe-noogo. A yalẽ wã la a manesmã kɩtame tɩ neb wʋsg ra rat n kelg-a. Ra-kãng ra yaa Lisd a Zã. A ra yaa Zʋɩf buudã maan-kʋʋd a Zakari la a pag a Elizabɛt biribla. A Zã ra ninga yʋgemd kõbd fuugu, t’a sẽbdgã ra yaa gãongo, wala no-rɛɛs a Eli, sẽn da makd-a wã. La a koɛɛgã ra yaa koɛɛg neb wʋsg sẽn da rat n kelge. A moona woto: “Tek-y yam n kos sugri, tɩ [saasẽ, NW ] soolem kolgame.”—Matɩe 3:1-6.

A Zã kɛlgdbã ra yaa Zʋɩf rãmb sẽn da yet tɩ b yaa sɩd Wẽnnaam a Zeova balemdba. B ra yaa buud sẽn da paam Tõogã Kaool ne a Moiiz maasem sẽn zems yʋʋm 1 500 sẽn da renge. Wẽn-doogã sẽn da be rasãndã ra ket n bee Zerizalɛm. Ra yaa be la b ra maand maandã wa Tõogã sẽn baoodã. Zʋɩf rãmbã sɩd ra tagsdame tɩ b balengã ra tata Wẽnnaam yam.

La neb kẽer sẽn kelg a Zã wã bãngame tɩ b tũudmã ra pa zems ye. Gerɛk buudã vɩɩm minung la ninsaal tags-bɛdã kẽe Zʋɩf rãmbã tũudum pʋgẽ bilf-bilfu. B paama tõogã Wẽnnaam nengẽ ne a Moiiz tũnugri, la ninsaalb tẽeb la b rog-n-mik wa n booga tõogã pãng bɩ sãam-a. (Matɩe 15:6) Tũudum taoor dãmbã sũy sẽn diglem la sẽn pa tar ninbãan-zoeerã tudga bãmb wʋsgo, tɩ b ye pa balemd Wẽnnaam wa sẽn segd ye. (Zak 1:27) B ra segd n teka yam n kos sugr b yel-wẽnã b sẽn maan n beeg Wẽnnaam la ne Tõogã kaoolã yĩnga.

Wakat kãnga, Zʋɩf rãmb wʋsg ra gẽegda Mesi wã bɩ Kiristã waoongo. La kẽer da maanda sʋgsg a Zã wɛɛngẽ n dat n bãng “yẽ sã n yaa Kirist bɩ a ka Kirist.” La a Zã yeelame tɩ pa yẽ ye. Sẽn yaa lebende, a teesa nebã ned a to, n yeel woto yẽ soabã wɛɛngẽ: “Mam sõmblma ka sek tɩ lok bãmb neooda ye.” (Luk 3:15, 16) A Zã wilga a Zezi a karen-biisã n togse: “Ad Wẽnnaam Pebila sẽn yiisd duniyã yel-wẽna.”—Zã 1:29.

Woto sɩd ra yaa koe-noogo, bala sɩda, a Zã ra wilgda nebã fãa vɩɩmã la sũ-noogã sore: a Zezi sẽn yaa ned ning “sẽn yiisd dũniyã yel-wẽna.” Ninsaalbã fãa sen ya a Ãdem ne a Hawa yagensã yĩnga, b rogda yel-wẽnã la kũumã yembd pʋgẽ. Rom dãmba 5:19 wilgdame: “A wa rao a yembr [a Adem] kɩɩsg yĩng sẽn kɩt tɩ wʋsg lebg yel-wẽna rãmbã, dao a yembr [a Zezi] sakr yĩng me, wʋsg na n lebga nin-tɩrse.” A Zezi sẽn da yaa wa pe-bil b sẽn maan maoongã ra segd n ‘yiisa yel-wẽna’ n wa ne toeeng ninsaalbã yɛl pʋgẽ. Biiblã wilgdame: “Yel-wẽna yaood yaa kũum, la Wẽnnaam kũuna yaa vɩɩm sẽn ka sɛta tõnd Zusoaba Kirist Zezi maasem yĩnga.”—Rom dãmba 6:23.

 Sɩda, a Zezi sẽn da yaa ninsaal sẽn zems zãng n yaa zãmaan fãa ninsaan-kãsengã, a moona koe-noogã. Biiblã yeta Mark 1:14, 15 pʋgẽ tɩ: “B sẽn kẽes a Zã bi-bees rooga zugẽ, a Zezi kẽnga Galile n moond Wẽnnaam koe-noogo n yetẽ: ‘Wakat taame, la Wẽnnaam soolem kolgame. Bɩ y tek yam n bas y yel-wẽna n tẽ koe-noogo.’”

Neb nins sẽn sak a Zezi koɛɛgã n wilg tẽeb ne koe-noogã paama bark wʋsgo. Zã 1:12 yetame: “La neb nins fãa sẽn deeg [a Zezi wã], la sẽn tẽ bãmb yʋʋrã, b kõo bãmb noor tɩ b lebg Wẽnnaam kamba.” B sẽn da yaa Wẽnnaam kamb bɩ a komdibli wã, b ra bee keoorã paoong zugu, sẽn yaa vɩɩm sẽn pa satã.—1 Zã 2:25.

La Rĩungã bark paoong pa tek yʋʋm kob-yendẽ nebã bal ye. Wa d sẽn wilg tɩ loogã, b moonda Wẽnnaam Rĩungã koe-noog la b zãmsd-a nebã tẽngã gill zug rũndã-rũndã. Woto, Rĩungã nafa ket n beeme. Bõe la y segd n maan sẽn na yɩl n paam bark a woto? Sõsg ning sẽn pʋgdã na n wilga rẽ.