Sakr zãmsg tara yõod yãadem wakat bɩ?

“Roagdbã rata neb sẽn zoe n mi b nenga, pa kamb sẽn sakd bal ye.” Woto la zʋrnall gom-zug wilg-yã. Koe-koɛɛg kãngã tika vaeesg b sẽn maan Nuvɛll Zelãnd zugu. Vaees-kãng wilgame tɩ yaa “neb 22 koabg zug b sẽn sʋk-b rãmbã sʋk bal n tags tɩ b segd n zãmsa kambã sakr yiri.” Vaees-kãng leb n wilgame tɩ rũndã-rũndã roagdbã tagsdame tɩ tara yõod wʋsg tɩ b zãms kambã yɛl wala manesem sõma, soog-m-meng la zɩɩb tʋkre.

Zãmaan kãngã sẽn yaa bao m meng ratem bal zãmaanã pʋgẽ, pa lingri, neb wʋsg sã n pa nong sakrã la b pa nong n zãmsd-a b kambã ye. La d segd n gesa kambã sakr wa bũmb sẽn ye pa tar yõod bɩ? Bɩ a bee zãms-kãsems nins kambã sẽn tõe n zãms tɩ naf-bã sʋka? Sẽn yɩɩd fãa, wãn to la Wẽnnaam a Zeova sẽn yaa zak Lugendã get f roagdb sakrã, la bõe nafa la sak-kãng kõta?—Tʋʋma 17:28; Efɛɛz rãmba 3:14, 15.

“Bõn-kãnga yaa tɩrga”

Tʋm-tʋmd a Poll gʋlsa yʋʋm kob-yendẽ tiging ning sẽn da be Efɛɛzã tɩ: “Kamba, yãmb sẽn tũud Zusoabã bɩ y sak y ba rãmba ne y ma rãmba, tɩ bõe, bõn-kãnga yaa tɩrga.” (Efɛɛz rãmba 6:1) Woto, pipi bʋʋm ning sẽn kɩt tɩ b segd n sakã yaa tɩ rẽ zemsa ne Wẽnnaam noor ning sẽn tɩ loe ne sẽn yaa tɩrgã. Wa a Poll sẽn yeelã, “bõn-kãnga yaa tɩrga.”

Wa sẽn zems ne rẽ, d neeme tɩ Wẽnnaam Gomdã bilgda kiblg ning roagdbã sẽn segd n kõ ne nonglmã, wa bũmb sẽn be rasãnde, “tɩ f zʋg yɩ sõama wa maanf ne kĩndi sẽn paasd ned neerã,” la wala bũmb sẽn ‘tat Zusoaba yam.’ (Yelbũna 1:8, 9; Kolos rãmba 3:20) Sẽn yaa lebend zãng ne rẽ, roagdbã kɩɩsg kɩtdame tɩ f paam Wẽnnaam taale.—Rom dãmba 1:30, 32.

“Tɩ fo tõe n zĩnd ne laafɩ”

A Poll goma sakrã nafr a to yelle, a sẽn wa n gʋls tɩ: “Yõ wã yaa pipi tõogo ne kãabg sẽn yaa: ‘Waoog f ba la f ma, tɩ fo tõe n zĩnd ne laafɩ, la tɩ fo tõe n kaoos dũniyã zugu.’” (Efɛɛz rãmba 6:2, 3; Yikri 20:12) Wãn to la roagdbã sakr tõe n wa ne sũ-noogo?

Pipi, roagdbã yʋʋm la b minim pa yɩɩd yãmb sɩda? Baa sã n wõnd b pa mi yɛl wʋsg ordinatɛɛr dãmbã bɩ bõn-yood a taab b sẽn zãmsd nebã lekollẽ wã, b mii yɛl wʋsg vɩɩmã la vɩɩmã zu-loees tɩɩm wɛɛngẽ. Sẽn yaa lebende, kom-bɩɩsã pa tar tagsg sẽn kɩls n zems ned sẽn bɩ sẽn tarã ye. Woto, b nong n yɩta yãg-yãg n dɩk sardo. Naoor wʋsgo, b nong n sakda b reem-n-taasã sagls tɩ wa yɩ yell n kõ-ba. Rẽnd Biiblã sẽn yet tɩ: “biig bul n yaa yalma,” yaa sɩda. A tɩɩmã yaa bõe? “La f sã n zãms-a ne sãbsga, a na n basa a yalemdã.”—Yelbũna 22:15.

Sakrã nafr pa a sẽn kɩtd tɩ zems-n-taar zĩnd roagd ne a biig sʋkã bal ye. Sẽn na yɩl tɩ zĩnd-n-taarã yɩ noog ãdem-biisã ne taab sʋka, rɩllame tɩ lagem n tʋm zĩndi, tɩ rẽ  me baood sakre. Wala makre, kãadem pʋgẽ, bũmb ning sẽn wat ne laafɩ, zems-n-taar la sũ-noogã yaa f sẽn na n sak n bas f sẽn datã, la pa f sẽn na n kotẽ tɩ loog noore, tɩ f toog kae ne neb a taabã sẽn datã la b tagsg ye. Tʋʋmã zĩigẽ, yaa tɩlae tɩ b sak tʋʋmdã taoor soab tɩ tʋʋmdã kẽng taoor n yɩ sõma. Sã n yaa ne goosneema wã noy wɛɛngẽ, sakrã pa kɩtd bal tɩ f põs sɩbgr ye, a leb n wata ne bãane, la a kogend-fo.—Rom dãmba 13:1-7; Efɛɛz rãmba 5:21-25; 6:5-8.

Kom-bɩɩs nins sẽn nong n kɩɩsd zu-sobendã nong n yaa neb sẽn pa tõe n tall zems-n-taar ne b taabã ye. Sẽn yaa lebend ne rẽ, sakrã zãmsg f yãadem wakatã tõe n kell n kẽnga taoor f vɩɩmã fãa pʋgẽ n tall nafr ne-fo. Ad sɩd bee nafr tɩ d zãms rẽ d yãadem wakate!

Sakrã keoor sẽn yaa kãsengã

Sakrã pa wat ne zak pʋgẽ zems-n-taar bal sẽn kõt sũ-noogo, la nafa sẽn kaoosd bal ye. A leb n yaa yẽbgr sẽn kɩtd tɩ d tall zems-n-taar ning sẽn tara yõod n yɩɩd a taabã fãa wã. Yaa zems-n-taar ned sẽn tar ne a Naandã. A sẽn yaa “Naanda,” “vɩɩm ko-bundim zĩig” sẽn yitẽ wã yĩnga, Wẽnnaam a Zeova zemsa ne tõnd sakrã zãnga.—Koɛɛg Soaba 12:1; Yɩɩl Sõamyã 36:10.

‘Sakrã’ yaa gom-bil sẽn pukd sẽn yɩɩd naoor 160 Biiblã pʋgẽ, la b tũnugda ne-a ne manesem buud toor-toore. Sẽn paase, naoor kobs la b gom Wẽnnaam tõodã, a noyã, la a bʋ-kaoor sardã yelle, tɩ rẽ fãa baood sakre. Sãmbg sẽn ka be, Wẽnnaam getame tɩ sakr yaa bũmb a sẽn baood tõnd nengẽ, d sã n dat n ta a yam. N-ye, sakr yaa bũmb sẽn yaa tɩlae sẽn na yɩl n tall zems-n-taar ne a Zeova. (1 Sãmwɛll 15:22) Zu-bʋko, ninsaal sẽn nong n maandẽ yaa kɩɩsg lakae pa sakr ye. “Ninsaalba sũya tagsg yaa wẽnse hal b yãadem wakate,” woto la Biiblã yeta. (Sɩngre 8:21) Woto yĩnga, pa yãadem wakat bal la ned zãmsd sakr ye, la ya a vɩɩmã fãa pʋgẽ. Rẽ maaneg kõta nafa kãsemse.

Tẽeg-y tɩ wala tʋm-tʋmd a Poll sẽn yeelã, noor ning b sẽn kõ tɩ b sak roagdbã tara kãabs a yiib sẽn yaa, “tɩ fo tõe n zĩnd ne laafɩ, la tɩ fo tõe n kaoos dũniyã zugu.’” (Yaa tõnd n ning italikã.) Yelbũna 3:1, 2 wilgdame tɩ kãab kãngã yaa sɩda: “M biiga, ra yĩm mam zãmsga ye. Sak bũmb nins mam sẽn wilg fooma ne f sũur fãa. Tɩ bõe, b na n kɩtame tɩ f paam yõ-woko la b kõ-f laafɩ wʋsgo.” Neb nins sẽn sakdã keoor kãsengã yaa b sẽn na n paam zems-n-taar ne a Zeova masã, la vɩɩm sẽn pa sat dũni paalg sẽn tar laafɩ pʋgẽ wã.—Wilgri 21:3, 4.

[Foto rãmba, seb-neng 30, 31]

Sakr wata ne zems-n-taar sẽn kõt sũ-noog zak pʋgẽ, tʋʋmã zĩigẽ la ne a Zeova