Y tõe n paama Rĩungã barka

TƲM-TƲMD a Poll sẽn yaa kiris-nedã ra gomda yẽ wakatẽ wã buud-goam kẽer sõma. Zãmsg ning a sẽn da paama zema rũndã-rũndã inivɛrsite zãmsgo. A ra tara Rom tẽng-n-biig zu-nood la a dʋrwa rãmba fãa. (Tʋʋma 21:37-40; 22:3, 28, NW ) A Poll da tõe n tũnuga ne rẽ n yɩ arzɛk soab la a paam yʋʋre. La a yeelame: “La bõn-kãensa sẽn da yaa mam yõodã, mam geelga bãmb wa bõn-zaalse Kirist yĩnga . . . n geelgd bãmb wa sagdo tɩ mam tõe n paam Kirist.” (Filip rãmba 3:7, 8) Bõe yĩng t’a Poll togs woto?

B ra boond-a lame t’a Soll sẽn yit Tarse, la b ra mi-a wala ned ning sẽn namsd “So-paalga tũudba.” Vẽnegr pʋgẽ, a Poll sẽn yã a Zezi sẽn vʋʋg n paam ziirã poore, a lebga tẽeda. (Tʋʋma 9:1, 2 Sebr Sõngo, 3-19) Sã n yaa ne a Polle, a sẽn yã bũmb ning Damas sorã zugã wilgame tɩ sãmbg ka be t’a Zezi ra yaa Mesi bɩ Kirist ning b sẽn kãabã, Rĩungã b sẽn kãabã beoog-daar Rĩma. Rẽ leb n waa ne toeeng kãseng a Poll vɩɩmã pʋgẽ, wa yẽ meng togsg sẽn tar pãngã sẽn be yĩngrã sẽn wilgã. Rat n yeelame bal t’a Poll teka yam n kos sugr ne a sũur fãa.—Galat dãmba 1:13-16.

 Biiblã pʋgẽ, ‘tek yam n kos sugr’ nong n yaa Gerɛk gom-biig lebgre, sẽn dat n yeel sɩd-sɩd tɩ “f sẽn wa n bãng poore,” tɩ yaa lebend ne “f sẽn da reng n miẽ.” Woto yĩnga, tek yam n kos sugr yaa f sẽn na n toeem f tagsgã, f vɩɩmã bɩ f sẽn dat n maana, f sẽn na n zãgs f pĩnd manesmã sẽn ye pa tat f yama. (Tʋʋma 3:19; Wilgri 2:5) Sã n yaa ne a Polle, a pa bas yel-kãseng ning a sẽn yã Damas sorã zugã tɩ yɩ yĩn-sidgd bũmb bala bɩ a ges-a wa neb kẽer sẽn yet tɩ sɩɩg sõng n sig-bã ye. Ra yaa bũmb sẽn kɩt t’a bãng t’a sẽn da pa mi Kiristã sasa, a vɩɩmã ra yaa faoore. A leb n bãngame t’a sã n da rat n dɩ bãngr ning a sẽn da paam Kirist wɛɛngẽ wã nafa, a ra segd n maana bũmb n dems a vɩɩmã.—Rom dãmba 2:4; Efɛɛz rãmba 4:24.

Toeeng sẽn wa ne barka

Pĩndã, a Poll da mii Wẽnnaam wa sẽn zems ne Fariziẽ rãmbã tũudum, yẽ mengã sẽn da be a pʋgẽ wã. B tẽebã ra naaga ne ninsaalb tags-bɛd la b rog-n-miki. Tũudum zẽms sãbsgã kɩtame t’a Poll tall yẽesem la a maan modgr tɩ pa zems ye. Baa ne a sẽn da tagsd t’a ra sõgenda Wẽnnaamã, sɩd-sɩda, a Poll da zabda ne-a.—Filip rãmba 3:5, 6.

A Poll sẽn bãng Kirist sõma la a bãng a tʋʋmdã sẽn ya a soab Wẽnnaam daabã pʋgẽ wã poore, a ra yãame tɩ rɩlla a yãke. A ra na n paa Fariziẽ n ket n tar naam la waoogr bɩ, bɩ a ra na n toeema a vɩɩmã n sɩng n maan sẽn segda fãa n paam n ta Wẽnnaam yam? Zu-noogo, a Poll maana yãkr sẽn zemse, bala a yeelame: “Mam ka zoet yãnd ne Koe-nooga ye. Yaa Wẽnnaam pãngã n kõt ned ninga fãa sẽn tẽeda fãagre, pipi yaa Zʋɩf, la yaoolem yaa Gerɛk.” (Rom dãmba 1:16) A Poll lebga ned sẽn moond Kirist la Rĩungã koe-noog ne yẽesem.

Yʋʋm wʋsg poore, a Poll togsa a kiris-nin-taasã woto: “M ba-biisi, mam ka tagsd tɩ mam paam-a-la nand ye; la mam maanda bũmb a yembre; mam yĩmda bũmb nins sẽn be poorẽ n maoodẽ n dat n paam bũmb nins sẽn be taoorã. Mam dabda taoore n dat n paam Wẽnnaam arzãn boolg kũuni Kirist Zezi maasem yĩnga.” (Filip rãmba 3:13, 14) A Poll rɩɩ koe-noogã nafa, bala a saka ne yamleoog n bas bũmb ning sẽn da zãagd-a ne Wẽnnaamã, la a maan yɛl sẽn zems ne Wẽnnaam daabã ne a sũur fãa.

Bõe la y ra na n maane?

Tõe tɩ y sẽn wʋm Rĩungã koe-noog nan pa kaoos ye. Yãmb nongame n vɩɩmd wakat sẽn pa sat arzãn sẽn zems zãng pʋgẽ bɩ? Segdẽ lame n yɩ woto, bala tõnd fãa roga ne tʋlsem sẽn yaa vɩɩmd laafɩ la bãan pʋgẽ. Biiblã yetame tɩ Wẽnnaam ninga “wakat sẽn-ka-sɛt tagsg” tõnd sũyã pʋsẽ. (Koɛɛg Soaba 3:11) Woto, zemsame tɩ d tẽ tɩ wakat n wat tɩ nebã na n tõog n vɩɩmd wakat sẽn pa sat laafɩ la sũ-noog pʋgẽ. La yaa woto la Rĩungã koe-noog kãabd nebã.

La sẽn na yɩl n yã saag-kãng pidsgu, rɩlla y bao n bãng koe-noogã. Tʋm-tʋmd a Poll saglame tɩ y “bãng Wẽnnaam daab sẽn yaa sõama, la sẽn tat bãmb yam, la sẽn zems zãnga.” (Rom dãmba 12:2) Woto, wala a Polle, yaa y sẽn na n wa paam bãngrã sõma la y tõe n yãke.

Sẽn yaa lebende, tõe tɩ y zoe n tara tẽeb kẽer y beoog-daarã wɛɛngẽ. Tẽeg-y t’a Soll da tara a meng tagsg Wẽnnaam daabã wɛɛngẽ t’a nan pa lebg tʋm-tʋmd a Poll ye. Ra bao-y n gũ tɩ vẽnegr sẽn yaa yel-solemd yi Wẽnd nengẽ n wa ye. Bõe yĩng tɩ y pa na n vaees yellã ne sɩda? Sʋk-y y menga: ‘Mam sɩd mii Wẽnnaam daabã sẽn ya a soab ãdem-biisã la tẽngã wɛɛngẽ bɩ? Bõe kaset la m tõe n kõ n wilg tɩ m sẽn tẽedã yaa sɩda? Mam kasetã zemsa ne Wẽnnaam Gomdã sẽn yaa Biiblã bɩ?’ Y sã n vaees y tũudmã zãmsg woto tõe n  naf-y lame. Sɩda, y segd n maana woto, bala Biiblã sagenda tõnd woto: “Bɩ y mak bũmb fãa; la sẽn yaa neere, bɩ y gãd kãn-kãe.” (1 Tesalonik rãmba 5:21) Sẽn yɩɩd fãa, pa Wẽnnaam lohormã n sɩd tar yõod n yɩɩd sɩda?—Zã 17:3; 1 Tɩmote 2:3, 4.

Tõe tɩ tũudmã nanambs kãabda tõnd vɩɩm sẽn pa sate. La kãab kãng sã n pa tik Biiblã zug fãa, a pa na n sõng tõnd tɩ d paam Wẽnnaam Rĩungã bark ye. A Zezi Tãng zug Zãmsgã yʋʋr sẽn yi wã pʋgẽ a keooga woto ne pãnga: “Ka neb nins fãa sẽn boond maam tɩ Zusoaba, Zusoaba! n na n kẽ arzãn soolem ye. Yaa ned ning sẽn maand mam Ba sẽn be arzãna raaba bala.”—Matɩe 7:21.

Bãng-y t’a Zezi goama wilgda vẽeneg tɩ ya a Ba wã raab maaneg bal n kɩtd tɩ d paam Wẽnnaam Rĩungã barka. Rat n yeelame bal tɩ manesem sẽn wõnd wẽn-zoeer manesem tõeeme n pa tat Wẽnnaam yam ye. Sɩda, a Zezi kẽnga taoor n yeel woto: “Baraare neb wʋsg na n yeela maam yaa: Zusoaba, Zusoaba, tõnd da ka togs bãngr-goam ne yãmb yʋʋre, la d rig zĩn dãmb ne yãmb yʋʋre, la d maan bõn-bãn wʋsg ne yãmb yʋʋr sɩda? La mam na n yeela bãmb vẽeneg yaa: Mam ka mi yãmb baa bilf ye. Bɩ y bas maam, yãmb tʋʋm wẽns maandba.” (Matɩe 7:22, 23) Vẽenega, bũmb ning sẽn tar yõod n yɩɩdã yaa d sɩd bãng d sã n wʋmda Rĩungã koe-noog võor sõma, tɩ rẽ poor bɩ d sak-a d vɩɩmã pʋgẽ.—Matɩe 7:24, 25.

Sõngr beeme

Sẽn yɩɩd yʋʋm 100 masã, a Zeova Kaset rãmbã moonda Wẽnnaam Rĩungã koe-noogo. B tũnugda ne sɛb la ne koe-moonego, n sõngd nebã dũniyã gill zug tɩ b bãngd Rĩungã sõma, tɩ b bãngd bark nins a sẽn na n wa ne, la ned sẽn tog n maan bũmb ning n paam bark kãense.

Sak-y koɛɛg ning a Zeova Kaset rãmbã sẽn moondã. Y sã n sak koe-noogã, y tõe n paama bark sẽn yaa kãsemse, pa masã bal ye, la yaa beoog-daar me, Wẽnnaam Rĩungã sã n wa rɩt naam tẽngã gill zugu.—1 Tɩmote 4:8.

Bɩ y sak masã menga, bala Wẽnnaam Rĩungã bark waa n saame!

[Foto rãmba, seb-neng a 7]

A Zeova Kaset rãmbã tũnugda ne sɛbã la koe-mooneg n taasd Wẽnnaam Rĩungã koe-noogo