Ad bõn-kãsemsã maanda!
Ad bõn-kãsemsã maanda!
“Zoob, bɩ f kelge, la f yaas n tags Wẽnnaam tʋʋm kãsemsa yelle.”—ZOOB 37:14.
1, 2. Yʋʋmd 1922, bõn-lingdem bʋg la b yã-yã, la nebã manesem yɩɩ wãn to?
RABOOD yɛl mit ne Ãngeletɛɛr nin-kãseng n tʋm ne taab yʋʋm wʋsg n na n bao laogã. Sẽn na n baase, yʋʋmd 1922, sɩpaolg kiuug rasem 26, Ezipt Faraõ wã yaoogẽ sẽn be Rĩm dãmbã Long yʋʋr sẽn yi wã pʋgẽ, rabood mit a Howard Carter la a Lord Carnarvon yãa b sẽn baoodã. Yaa Faraõ Tutãnkamo yaoogã. B yãa yaoog noor sẽn page, n tu. A Carter waa ne fɩtl n ges yaoogã sõma.
2 Kaoosg poore, a Carter yeelame: “A Lord Carnarvon sẽn da pa tõe n ket n gũudẽ wã sʋka woto ne yɩɩre: ‘Fo nee bũmb bɩ?’ Goama ra yaa toog ne-ma, tɩ m leoke, ‘N-ye, bõn-kãsemse.’” Laog tusa wã sẽn da be yaoogẽ wã sʋka, kũum koglg sẽn maan ne sãnem halaal n da be be. Tõe tɩ y yãa ‘bõn-kãsems’ kãens kẽer fot rãmb pʋsẽ bɩ te-kʋd gesg zĩigẽ. La baa te-kʋd bĩngr zĩig a woto sẽn sõs n yaa bõn-kãseng to-to ning fãa, pa wõnd b paka yãmb ye. Bɩ d bas rẽ la d gom bõn-kãsems nins sẽn pak yãmb la b tar yõod ne-yã yelle.
3. Yɛ la d paamd zãmsg sẽn tɩ loe ne bõn-kãsems tɩ tõe n tall yõod ne-do?
3 Wala makre, tags-y rao sẽn vɩɩmd yʋʋm kob-gĩn wʋsg sẽn loog yelle. Yaa rao b sẽn mi n yɩɩd tõnd wakatã sĩnima nin-kãsenga, ɛspoorã gãndaoogo, politisiẽ bɩ nin-kãseng buud fãa. B ra boond-a lame tɩ yaang nebã fãa nin-kãsenga. Y na n bãnga sẽn ya a soaba. A yʋʋrã ya a Zoobe. Biiblã sebr a yembr tõr n gomd a yelle. La a zãmaana ned a yembre, bi-bɩɩg yʋʋr sẽn boond t’a Eliyu yãame t’a Zoob segda ne remsgo. Sɩda, a Eliyu yeelame t’a Zoob ra tagsa a mengã la neb nins sẽn gũbg yẽ wã yell tɩ loog noore. Zoob sak 37 pʋgẽ, d yãta sagls sẽn yaa takɩ la sẽn kõt yam sẽn sɩd tõe n tall yõod ne tõnd ned kam fãa.—Zoob 1:1-3; 32:1–33:12.
4. Bõe n tus a Eliyu t’a kõ saglg ning sẽn be Zoob 37:14 pʋgẽ wã?
4 A Zoob zo-rãmb a tãab ne yʋʋrã goma wʋsg n bao n na n wilg t’a Zoob ra beega ne a tagsg bɩ a tʋʋma. (Zoob 15:1-6, 16; 22:5-10) A Eliyu maaga a meng n gũ tɩ b gom n sa. Rẽ poore, a goma yɛl wʋsg sẽn tar yõod yelle, la ges-y tags-kãseng kãngã: “Zoob, bɩ f kelge, la f yaas n tags Wẽnnaam tʋʋm kãsemsa yelle.”—Zoob 37:14.
Tʋʋm kãsemsã maanda
5. ‘Wẽnnaam tʋʋm kãsems’ nins yell a Eliyu sẽn goma tɩ loee ne bõe?
5 Bãng-y t’a Eliyu pa yeel t’a Zoob tags a meng yelle, a Eliyu mengã yell bɩ ninsaalb a taab yell ye. Ne yam, a Eliyu sagla a Zoob ne tõnd fãa, tɩ d tags Wẽnnaam a Zeova tʋʋm-kãsemsã yelle. Yãmb tagsdame tɩ ‘Wẽnnaam tʋʋm-kãsemsã’ yaa bõe ne bõe? Sẽn paase, tõe tɩ y maanda yɩɩr y yĩns laafɩ wã wɛɛngẽ, y ligdã raab la y beoog-daarã, n paas y zakã gesgo, y tʋmd-n-taasã la y yagsã yĩnga. Rẽ n so, tɩ y sʋkdẽ, bõe yĩng tɩ d segd n tags Wẽnnaam tʋʋma yell neere? Sãmbg sẽn ka be, Wẽnnaam a Zeova tʋʋm-kãsemsã wilgdame t’a tara yam la zu-sobend ãndũniyã fãa sẽn gũbg tõndã zugu. (Nehemi 9:6; Yɩɩl Sõamyã 24:1; 104:24; 136:5, 6) Sẽn na yɩl n wilg rẽ vẽenega, bɩ y ges bũmb a Zozue sebrẽ wã.
6, 7. a) A Zeova maana tʋʋm-kãsems bʋs a Moiiz la a Zozue wakatã? b) Yãmb sã n da maan kaset ne tʋʋm-kãsems kãensã a yembr a Moiiz la a Zozue wakatã, y manesem da na n yɩɩ wãn to?
6 A Zeova waa ne tood piig tẽn-kʋdem wẽndẽ Eziptã zugu, tɩ rẽ poor t’a welg Mog-miuugã t’a Moiiz tõog n tall Israɛll nebã tɩ b loog n põse. (Yikri 7:1–14:31; Yɩɩl Sõamyã 106:7, 21, 22) Bũmb sẽn wõnd woto yell la b gom Zozue sak a 3 pʋgẽ. A Moiiz lɛdgd a Zozue ra segd n lʋɩɩ Wẽnnaam nin-buiidã taoor n tall-b n pasg kʋɩlg a to n kẽ Kãabg Tẽngẽ wã. A Zozue yeelame: “Maneg-y y mens tɩ Zusoaba na n maana bõn-bãn yãmb sʋk beoogo.” (Zozue 3:5) Yaa bõn-bãn bʋse?
7 Be neere, kɩbarã wilgdame t’a Zeova paka sor Zʋrdẽ kʋɩlgã koom pʋgẽ, tɩ rapa, pagb la kamb tus kobs tõog n tag tẽn-koɛɛng n pɩʋʋge. (Zozue 3:7-17) Tõnd sã n da be be n get kʋɩlgã sẽn welgd tɩ nin-buiidã fãa pasgdẽ tɩ bũmb pa maand-bã, d na yeelẽ tɩ yaa bõn-kãseng menga! Woto wilgame tɩ Wẽnnaam tara tõog naanegã zugu. La masã menga, tõnd vɩɩmã pʋgẽ, yɛl n be sẽn yaa yel-soalem woto. Sẽn na yɩl n bãng bãmb kẽer sẽn yaa b rãmba, la bũmb ning sẽn kɩt tɩ d segd n tags b yellã, bɩ y ges Zoob 37:5-7.
8, 9. Tʋʋm-kãsems bʋs yell la Zoob 37:5-7 gomda, la bõe yĩng tɩ d segd n tags b yelle?
8 A Eliyu yeelame: “Wẽnnaam koɛɛga kɛleng yaa bõn-kãsenga. Bãmb maanda tʋʋm kãsems tõnd sẽn ka tõe n bãng ye.” Bõe n da be a Eliyu yamẽ, a sẽn da wa n yet tɩ Wẽnnaam maanda yɛl sẽn yaa “bõn-kãsenga”? Be neere, a gomda sa-lamd la sa-koom yelle. Woto ra tõe n yalsa koaad sẽn be a pʋʋgẽ tʋʋmde, n kõ-a sẽk la bʋʋm t’a tags Wẽnnaam tʋʋmã yelle. Tõe tɩ d pa koaadb ye. Sa-lamd bɩ saag tõe n yalsa tõnd tʋʋma me, fãa bee ne tõnd sẽn be tẽng ninga. Tõnd rɩkda sẽk n tags bũmb ning sẽn be yel-kãsems a woto wã poorẽ, la woto sẽn dat n yɛɛlgã zug bɩ? Yãmb zoe n maana woto bɩ?
9 Bãng-y tɩ wa d sẽn karemd Zoob sak 38 wã pʋgẽ wã, Wẽnnaam a Zeova mengã kɩtdame t’a Zoob tags woto, n maand-a sʋgsg sẽn tar pãnga. Baa ne sẽn ya a Zoob la tõnd Naandã maan sʋgs-kãensa pipi wã, b tɩ loee ne tõnd manesmã, d belmã la d beoog-daarã zutu. Bɩ d ges Wẽnnaam sẽn maan sʋgsg ninsã, la d tags b võorã zutu. N-yẽe, d maan wala Zoob 37:14 sẽn sagendã.
10. Zoob sak 38 segd n tusa tõnd tɩ d maan bõe, la rẽ wata ne sʋgs-bʋse?
10 Sak 38 wã sɩngda woto: “Zusoaba koɛɛg yii sobg pʋgẽ n yeel a Zoob yaa: ‘Yaa yɛ ned n gom yalem goam n dat n sãam mam sẽn datã? Sẽbg f sɛɛg wa gãndaoog tɩ m sok tɩ f leoke.’” (Zoob 38:1-3) Rẽ sõnga a Zoob t’a rems a tagsgã n bãng t’a yasa ãndũniyã Naand taoore, a soab ning taoor a sẽn segd n kolg n togsã. Tõnd me ne d zãmaanã neb segd n maana woto. Rẽ poore, Wẽnnaam goma yɛl nins a Eliyu sẽn goma yelle. “Mam sẽn waa n na n naan dũniyã tɩ fo bee yɛ? Fo sã n tar yam bɩ f togse. Fo mii sẽn ya a soab n yãk yam ne a yalma la a woglma sẽn na n yɩ to-to n mak-a ne wĩir wɛ? Yaa bõe n tebend a yẽbgrã? Yaa ãnd n ning a sokra zĩig kugr a zĩigẽ.”—Zoob 38:4-6.
11. Tʋʋm bʋs la Zoob 38:4-6 segd n tẽeg tõndo?
11 A Zoob ra bee yɛ? La tõnd fãa ra bee yɛ, b sẽn wa n naand tẽngã? Rẽ yĩnga, ra yaa tõnd la me-mitã, sẽn mams tẽngã n mag a yaadmã bɩ? Yaa vẽeneg tɩ yaa ayo! Rẽ wẽnd tɩ ninsaalbã pʋd n da ka be ye. Wẽnnaam dɩka tõnd tẽngã n mak ne ro-kẽeng n sʋke: “Yaa ãnd n ning a sokra zĩig kugr a zĩigẽ?” Tõnd miime tɩ tẽngã sẽn zãr ne tõnd wĩntoogã zemsa kɛpɩ sẽn na yɩl tɩ tõnd vɩɩmd a zug tɩ yɩ-d noogo. La a bedrmã me zemsame. Tõnd tẽngã bedrem sã n da yɩɩdẽ woto, walem buud ning b sẽn boond tɩ idrozɛnã sẽn be pemsmã pʋgẽ wã ra pa na n tõog n yi ye. La rẽ ra na n kɩtame tɩ vɩɩmã pa tõog n zĩnd tẽng zug ye. Ned n “ning a sokra zĩig kugr” zĩig ning sẽn zemsẽ wã. Ra ya a Zoob n maan dẽ bɩ? Yaa tõnd n maan dẽ bɩ? Bɩ yaa Wẽnnaam a Zeova n maan dẽ?—Yelbũna 3:19; Zeremi 10:12.
Ninsaalbã sʋka, ãnd n tõe n leoke?
12. Sʋkr ning sẽn be Zoob 38:6 pʋgẽ wã kɩtdame tɩ d tags bõe yelle?
12 Wẽnnaam leb n sʋka woto: “Yaa bõe n tebend a yẽbgrã?” Ad wã la sʋkre. Tõe tɩ tõnd mii gomd a yembr a Zoob sẽn da pa mi: yaa pãn-takdgã. Tõnd wʋsg miime tɩ wĩntoogã sẽn yaa kãseng wʋsgã pãn-takdg sõngd n kɩtdame tɩ tõnd tẽngã vigl sõma wala bũmb b sẽn tebend a yẽbgrã zugu. La ãnd n wʋmd pãn-takdgã võor zãnga?
13, 14. a) Bõe la d segd n sak n deeg pãn-takdgã wɛɛngẽ? b) D manesem segd n yɩɩ wãn to yell ning Zoob 38:6 sẽn wilg vẽenegã taoore?
13 Sebr sẽn yi sẽn pa kaoose, gom-zug sẽn yaa Ãndũniyã võor b sẽn wilgi (L’univers expliqué) sak n deegame tɩ ‘pãn-takdgã yaa ãndũniyã pãens nins b sẽn mi n yɩɩd a soabã, la a yaool n leb n ya a soab ning võor b sẽn pa wʋmd n yɩɩdã.’ Seb-kãng paasa woto: “Wõnda yilingã pãn-takdg pɩʋʋgda vɩʋʋgã zĩig pʋgẽ, n yaool n pa tar bũmb vẽeneg sẽn kɩtd t’a maan woto ye. La yʋʋm sẽn pa kaoos pʋgẽ, bãngdba yetame tɩ tõe tɩ pãn-takdgã sẽn tʋmd to-to wã yaa wa ko-wiisi . . . La ned ba a yembr pa kɩs sɩd zãng tɩ b beeme ye.” Tags-y rẽ sẽn dat n yɛɛlgã zugu.
14 A Zeova sẽn maan a Zoob sʋgs-kãensa wã tɛka, siãnsã kẽnga taoor sẽn na maan yʋʋm 3 000. Ne rẽ fãa, tõnd bɩ bãngd kae sẽn tõe n wilg pãn-takdgã võor zãng ye. Pãn-takdg kãng kɩtdame tɩ tõnd tẽngã yas a gilgrã sor ning sẽn zemsã zugu. Tẽngã segd n zĩnda so-kãng zug sẽn na yɩl tɩ tõnd tõog n vɩɩmd ka. (Zoob 26:7; Ezai 45:18) Tõnd pa yet tɩ d fãa segdame n bao n wʋm pãn-takdgã võor ye. Sẽn yaa lebende, d sã n tags Wẽnnaam tʋʋm-kãsemsã neng a yembr zug neere, segd n talla pãn-tusdg tõnd sẽn tagsd to-to ne Wẽnnaamã zugu. Rẽ kɩtdame tɩ y tall naneb ne a yamã la a bãngrã n paase, la tɩ y bãng bũmb ning sẽn kɩt tɩ d segd n zãms n paas yẽ raabã wɛɛngẽ wã bɩ?
15-17. a) Zoob 38:8-11 gomda bõe yelle, tɩ rẽ wat ne sʋgs-bʋse? b) Bõe la d segd n sak n deeg bãngr ning sẽn tɩ loe ne ko-kãsemsã la b sẽn be zĩig ning tẽngã zugã wɛɛngẽ?
15 Naandã kẽngda taoor ne a sʋgsgã: “Yaa ãnd n pag kʋɩlens n gɩdg ko-kãsenga koom sẽn pusg n yi tẽnga pʋgẽ wã? Mam lud-a-la ne sawato la m pil-a ne lika. Mam kõ-a-la todse n gɩdg-a n pag-a ne kʋɩlense. Mam yeelame t’a kolg n ta be, la a ra loog-b ye. Bɩ a ko-wiis kãsemsa yaas be.”—Zoob 38:8-11.
16 Ko-kãsemsã pagb paka tẽngã babs nins koomã sẽn pa limã, mogrã, la mogr koom zẽkrã. Hal wakat a wãn la ninsaal maag a yĩng n ges la a vaees bõn-kãensã? Yaa sẽn na maan yʋʋm tusa, la b maana woto wʋsg yʋʋm koabgã sẽn loogã pʋgẽ. Tõe tɩ y tags tɩ yaa masã la b segd n bãng-ba. La yʋʋmd 2001 kãngã, y sã n vaees dũniyã sɛb ro-bɛd bɩ n tũnug ne ninsaalb masĩn bɛd sẽn tar pãngã n na n tigim kɩba-paalsã, bõe la y na n miki?
17 Sebr a yembr b sẽn mi sõma pʋgẽ, y na n yãa b sẽn sak n deeg woto: “Hal sẽn kaoose, tẽn-gãongã gãnegr zĩis la ko-kãsemsã zĩis sẽn be tẽngã zugã, la zĩ-kãsems nins halhaal sẽn yaa toor-toorã bee yel-gĩtim nins võor-wʋmb sẽn yaa toog n yɩɩdã sʋk n kõ bãngdbã, b vaeesgã pʋgẽ la b yɛlã võor-wilgr pʋgẽ.” Bãngr sebrã sẽn yeel woto poore, a kõo võor wilgr a naas sẽn tõe n yɩ sɩda, la a wilg tɩ b bee “mams n togs wʋsgã sʋk” bala. Wa y sẽn mi wã, mams n togs “rat n yeelame tɩ pa bũmb sẽn yaa vẽeneg tɩ sek b na maan n yɩɩg mak n wilg a võor ye.”
18. Zoob 38:8-11 kɩtdame tɩ y wa baas n yeel tɩ bõe?
18 Rẽ pa wilgd tɩ sʋgsg nins d sẽn karemd Zoob 38:8-11 pʋgẽ wã zemsame sɩda? Kɩɩsg sẽn ka be, d pa tõe n yeel tɩ yaa tõnd n lugl tẽngã bõn-kãensã ye. Pa tõnd n ning kiuugã a sẽn beẽ wã t’a pãn-takdgã kɩtdẽ tɩ mogrã koom zẽkdẽ, tɩ sã n yaa ne sẽn zems bɩ a pa limd tõnd sẽn vɩ zĩig ningã bɩ tõnd mengã ye. Y mii a soab ning sẽn maan dẽ wã, yaa bõn-kãsemsã Maanda.—Yɩɩl Sõamyã 33:7; 89:10; Yelbũna 8:29; Tʋʋma 4:24; Wilgri 14:7.
Ya a Zeova la y segd n waooge
19. Goam sẽn be rasãnd nins sẽn be Zoob 38:12-14 takda tõnd yamã n sik ãndũniyã yel-bʋs zutu?
19 Tẽngã yileng yell b sẽn gom Zoob 38:12-14 pʋgẽ wã, b pa tõe n yeel tɩ yaa ninsaalbã n kɩt tɩ rẽ maandẽ ye. Tẽngã sẽn yilemdã kɩtdame tɩ yʋng kẽedẽ tɩ beoog vẽegdẽ, tɩ naoor wʋsgo, rẽ be rasãnde. Wĩndgã sã n pukdẽ, tõnd tẽngã yalẽ lebgda vẽeneg n paasdẽ, wala bũmb sẽn basd a vũgs yagd sẽn ket n yaa maasr zugã. Tõnd sã n tags tẽngã sẽn yilimdã yell baa yaa bilfu, segd n yɩɩ bõn-kãseng ne-do, a sẽn pa yilimd tʋʋll-tʋʋllã yĩnga. A leb n pa yilimd maasg-maasg hal n kɩt tɩ rayã la yʋndã yaa wogd wʋsg n yɩɩda, n wat ne tʋʋlg la waood wʋsgo, sẽn da na n kɩt tɩ ninsaal pa tõog n vɩɩmdã ye. Sɩda, d sũur segd n yɩɩ noogo, sẽn yaa Wẽnnaam n yãk tẽngã yiling tʋʋlem sẽn yaa to-to wã, la pa ninsaalbã yĩngã.—Yɩɩl Sõamyã 148:1-5.
20. Wãn to la y leokd sʋgsg nins b sẽn maan Zoob 38:16, 18 pʋgẽ wã?
20 Masã, mams-y n ges Wẽnnaam sẽn na n sʋkd yãmb sʋgs-kãensã: “Fo tõog n taa hal ko-kãsenga ko-nin pʋsẽ bɩ? Fo tõog n kẽe ko-zulemsa bok pʋgẽ bɩ?” Baa ko-kãseng mit pa tõe n leok zãng ye! “Fo mii dũniyã yalem? Fo sã n mi yõ wã fãa bɩ f togs-ma.” (Zoob 38:16, 18) Yãmb gesame la y vaeesa tẽngã zĩis fãa, bɩ bãmb wʋsg menga? Tõnd sã n na n bao n bãng tõnd tẽngã zĩ-neeb la a bõn-yɛɛsdse, zãmaan a wãn la rẽ ra na n kaoose? La ad vɩ-kãng buudã sɩd ra na n talla yamleoog wʋsg menga!
21. a) Sʋgsg nins sẽn be Zoob 38:19 pʋgẽ wã tõe n tẽega bãngrã tags-bʋse? b) Bũmb nins sẽn tɩ loe ne vẽenemã segd n tusa tõnd tɩ d maan bõe?
21 Ges-y sʋgs-kãsems nins me sẽn be Zoob 38:19 pʋgẽ wã: “So-bʋg n dabd vẽenem yiri? Lik yir bee yɛ?” Tõe tɩ y miime tɩ hal sẽn kaoose, b nong n tagsdame tɩ vẽenemã kẽnda wa ko-pemd buudu, wa ko-pɛm nins d sẽn tõe n ges koom zugã. Rẽ poore, yʋʋmd 1905, a Albert Einstein waa ne zãmsg ning sẽn yet tɩ vẽenemã tʋmda wa pãng buudã. A võor wilgrã saa goamã bɩ? Be neere, bãngr sebr sẽn yi sẽn pa kaoos sʋkame: “Vẽenem yaa ko-pemd buud bɩ pãn-bɛrga?” A leokame: “Yaa wa [vẽenemã] pa tõe n yɩ bõn-kãensã b yiibã ye, bala yel-kãensa b yiibã [ko-pɛm buudã la pãn-bersã] yaa toor wʋsg ne taaba. Sẽn são yaa d sẽn na n leok tɩ vẽenemã pa bãmba b yiibã ba a yembr takɩ ye.” Ne rẽ fãa, wĩntoogã vẽenem ket n wɩngda tõnd (ne manesem buud bɩ a to), baa ninsaal ba a yembr sã n pa tõe n wilg Wẽnnaam tʋʋmã võor zãng zĩ-kãnga wɛɛngẽ. Wĩntoogã tʋʋlem sabab yĩngã d paamda rɩɩbo, la pemsmã pʋgẽ ogsizɛnã tɩɩsã sẽn kõtã. D tõe n karmame, d tõe n yãa d sẽn nong b rãmbã nense, n ges wĩndgã lʋɩɩs ne yamleoogo, n paas yɛl a taaba. D sã n wa maand woto, d pa segd n sak n deeg tɩ yaa Wẽnnaam tʋʋm-kãsems la woto sɩda?—Yɩɩl Sõamyã 104:1, 2; 145:5; Ezai 45:7; Zeremi 31:35.
22. Pĩnd wẽndẽ wã, manesem bʋg la a Davɩɩd tall Wẽnnaam tʋʋm-kãsemsã taoore?
22 Tõnd sẽn tagsd a Zeova tʋʋm-kãsemsã yellã yaa sẽn na yɩl tɩ b yɛɛs-d wʋsg bal bɩ? Ayo. Pĩnd wẽndẽ yɩɩl gʋlsdã sak n deegame tɩ d pa tõe n wʋm Wẽnnaam tʋʋmã fãa võor n wilg ye. A Davɩɩd gʋlsame: “Zusoaba, mam Wẽnnaam, yãmb bõn-bãna yãmb sẽn maanã . . . mam nong n wilga bãmba n gom b yelle, la bãmb sõor yaa wʋsgo n yɩɩd tɩ ned ka tõe n togs n sɛ ye.” (Yɩɩl Sõamyã 40:6) La a ra pa rat n yeel t’a ra na n sĩnda tʋʋm-kãsems kãens taoor ye. A Davɩɩd wilga rẽ ne a goam nins sẽn tar pãng sẽn be Yɩɩl Sõamyã 9:2 pʋgẽ wã: “Mam na n pʋʋsa Zusoaba bark ne m sũur fãa. Mam na n togsa yãmb tʋʋm kãsemsa fãa.”
23. Yãmb manesem yaa wãn to ne Wẽnnaam tʋʋm-kãsemsã, la wãn to la y tõe n sõng neb a taabã?
23 Tʋʋm-kãsems kãens pa segd n kɩt tɩ tõnd me maan woto sɩda? Wẽnnaam tʋʋm-kãsemsã sẽn yaa bõn-yɛɛsdsã pa segd n tus tõnd tɩ d gom a yelle, a sẽn maana yelle, la a sẽn na n ye maana yell sɩda? Leokrã yaa vẽenega: d segdame n “togs bãmb ziir bu-zẽmsa sʋka la [d] togs bãmb bõn-bãna neb buud fãa sʋka.” (Yɩɩl Sõamyã 96:3-5) N-ye, d tõe n talla naneb ne sik-m-meng ne Wẽnnaam tʋʋm-kãsemsã, d sẽn na n wilg neb a taabã bũmb nins d sẽn bãng yẽ wɛɛngẽ wã. Baa b sã n bɩɩ zĩig ning nebã sẽn pa tẽed Naandã, tõnd goamã sẽn yaa sõma n kõt vẽnegrã tõe n kɩtame tɩ b sak n deeg tɩ Wẽnnaam beeme. Sẽn yɩɩd fãa, rẽ tõe n tus-b lame tɩ b rat n bãng la b sõgen a soab ning sẽn “naan bũmb fãa” sẽn yaa bõn-kãsems Maand a Zeova wã.—Wilgri 4:11.
Wãn to la y na n leoke?
• Saglg ning sẽn be Zoob 37:14 tusda yãmb tɩ y tags Wẽnnaam tʋʋm-kãsems bʋs yelle?
• Yel-bʋs yell la b gom Zoob sak 37 la 38 pʋsẽ, tɩ bãngdbã pa tõe n wilg b võor zãnga?
• Yãmb tagsg yaa wãn to ne Wẽnnaam tʋʋm-kãsemsã, tɩ rẽ tusd-y tɩ y maan bõe?
[Zãmsgã sogsgã]
[Foto, seb-neng 11]
Yaa ãnd n pag mogrã koom t’a bee a zĩigẽ?
[Foto, seb-neng 11]
Ãnd n tõog n tɩ ges tẽngã Wẽnnaam sẽn naana zĩ-neeb fãa?