Maan-y sũ-noog ne sũ-noog Wẽnnaamã
Maan-y sũ-noog ne sũ-noog Wẽnnaamã
“La sẽn keta, m ba-biisi, bɩ y maan sũ-noogo, . . . la Wẽnnaam sẽn yaa nonglem la laafɩ soaba na pa ne yãmba.”—2 KORẼNT DÃMBA 13:11.
1, 2. a) Bõe yĩng tɩ neb wʋsg pa tar sũ-noog b vɩɩmã pʋgẽ? b) Sũ-noog yaa bõe, la wãn to la d tõe n paam-a?
WAKAT tood kãensã, neb wʋsg pa ne yɛl wʋsg sẽn tõe n kõ-b sũ-noog ye. Yel-beed sã n wa b zut bɩ ned b sẽn nong zugu, b tõe n tagsa wa a Zoob sẽn yeel woto pĩnd wẽndẽ wã: “Ninsaal pag sẽn doga vɩɩm yaa koɛɛga la toogo.” (Zoob 14:1) Kiris-nebã pa põsd ‘yaoolem wakat tood’ kãensã sẽn wat ne yɩɩr ninsã ye, la pa lingr la a Zeova sõgen dãmb sẽn tar kɩs-sɩdã mi n koms raood ye.—2 Tɩmote 3:1.
2 Ne rẽ fãa, kiris-nebã tõe n talla sũ-noogo, baa b sã n be makr pʋgẽ. (Tʋʋma 5:40, 41) Sẽn na yɩl n bãng tɩ rẽ tõeeme bɩ d reng n ges sũ-noog sẽn ya a soaba. B wilgame tɩ sũ-noog yaa “bõn-sõng paoong bɩ a tẽeb sẽn wat ne yĩn-sidg ningã.” * Woto yĩnga, tõnd sã n dɩk sẽk n tall mi-beoog bark nins d sẽn tar masã wã yĩnga, n tagsd sũ-noog ning sẽn gũud-d Wẽnnaam dũni paalgã pʋgẽ wã yelle, d tõe n talla sũ-noogo.
3. Bõe yĩng tɩ d tõe n yeel tɩ ned kam fãa tara bʋʋm n na n kɩdem?
3 Ned fãa tara bark a sẽn paame, n segd n tall mi-beoog rẽ yĩnga. Zak soab tʋʋm tõe n sãamame. Wa sẽn zemse, a tagsda a zakã rãmb yelle. A rat n gesa a sẽn nong-b rãmbã yelle. La a sã n tar pãng la laafɩ, a tõe n talla mi-beoog rẽ yĩnga. A sã n paam nug tʋʋmde, a na n tõog n tʋma wʋsgo. D rɩk makr a to. Wala bãag sẽn komsd sã n namsd kiris-nin-poaka. Ne rẽ fãa a tõe n pʋʋsa bark ne a zo-nongdsã la a zakã rãmb sõngr sẽn kɩtd t’a tõe n mao ne bãagã ne burkĩndlem la raoodã yĩnga. La kiris-neb hakɩkã fãa, baa b vɩɩmã yɛl sẽn yaa to-to fãa, tõe n kɩdma b sẽn mi a Zeova sẽn yaa “sũ-noog Wẽnnaamã,” la a Zezi Kirist sẽn yaa “sũ-noog soab la Naabã” yĩnga. (1 Tɩmote 1:11, NW; 6:15, NW ) N-ye, Wẽnnaam a Zeova la a Zezi Kirist n tar sũ-noog n yɩɩda. B ket n tara sũ-noogo, baa ne yɛlã sẽn yaa to-to tẽng zugã sẽn zãr ne b yɩ wa a Zeova sẽn da rat sɩngrẽ wã. B makrã tõe n zãmsa tõnd yɛl wʋsg ne d sẽn na n ket n talld d sũ-noogã to-to.
B zɩ n bas sũ-noog maaneg ye
4, 5. a) A Zeova manesem yɩɩ wãn to, pipi ninsaalbã sẽn kɩɩs-a wã? b) Wãn to la a Zeova tall tagsg sẽn yaa sõma ne ãdem-biisã?
4 Edɛn zẽedẽ wã, a Ãdem ne Hawa ra tara yĩns laafɩ sõma la tagsg sẽn zems zãnga. B ra tʋmda tʋʋmd sẽn be bark la b ra be zĩig sẽn zems zãng pʋgẽ rẽ maaneg yĩnga. Sẽn yɩɩd fãa, b ra tara zu-noog n na n gom ne a Zeova wakat fãa. Wẽnnaam da ratame tɩ b paam beoog-daar sẽn be sũ-noogo. La tõnd pipi roagdbã ra pa ges tɩ kũun kãensã fãa sẽn yaa sõma wã sek-b lame ye. B rɩka b sẽn pa so, n dɩ “sõama ne wẽng bãngr tɩɩga” bil b sẽn da gɩdg tɩ b ra rɩ wã. Yaa kɩɩsg tʋʋm kãng n wa ne sũ-sãamsã fãa sẽn paamd tõnd rũndã-rũndã wã.—Sɩngre 2:15-17; 3:6; Rom dãmba 5:12.
5 Baasg zãnga, a Zeova pa bas t’a Adem ne a Hawa sẽn pa tall mi-beoogã sãam a sũ-noogã ye. A kɩsa sɩd tɩ b kambã la b yagensã sʋka, neb kẽer sũy ra na n tus-b lame tɩ b sõgen-a. Sẽn deng t’a Ãdem la a Hawa rog biig menga, a Zeova ra kɩsa sɩd ne rẽ, hali t’a moon t’a na n fãaga b kamb la b yagens nins sẽn da na n yɩ sakdbã! (Sɩngre 1:31; 3:15) Yʋʋm kobs nins sẽn pʋglã, nebã wʋsg sẽn yɩɩd tũu a Ãdem ne a Hawa naoã, la a Zeova pa bas ãdem-biisã, kɩɩsg kãng sẽn da be zĩig fãa wã yĩng ye. Sẽn yaa lebende, sẽn da pak-a n yɩɩd yaa rap la pagb nins sẽn ‘kõ-a sũ-noogã,’ neb nins sẽn modg ne b sũy fãa n ta a yam b sẽn da nong-a wã yĩnga.—Yelbũna 27:11; Hebre dãmba 6:10.
6, 7. Yel-bʋs n sõng a Zezi t’a kell n tall sũ-noogo?
6 Yaa wãn to ne a Zezi? Yaa wãn to la a kell n tall a sũ-noogã? A Zezi sẽn da yaa malɛk saasẽ n tar pãng wʋsgã, a ra tõe n gesa rapã la pagbã tʋʋm tẽngã zugu. Ne sẽn da yaa vẽeneg tɩ b pa zems zãngã, a Zezi ra nong-b lame. (Yelbũna 8:31) Kaoosg poore, a sẽn wa n wa tẽng zug n sɩd ‘zĩnd ninsaalbã sʋkã,’ a sẽn tagsd to-to ne ãdem-biisã pa toeem ye. (Zã 1:14) Yaa bõe n sõng Wẽnnaam Biribl sẽn zems zãngã t’a kell n tall yam-sõng woto ne ãdem-biisã sẽn yaa yel-wẽn-maandbã?
7 Pipi, a Zezi ra yaa maan tɩ zems soaba, sã n yaa ne yɛl nins a sẽn gũud tɩ yẽ mengã la neb a taabã tõog n maanã. A ra miimi t’a ra pa na n tuub dũniyã gill neb ye. (Matɩe 10:32-39) Woto a kɩdmame, baa yaa nin-yend n da sak Rĩungã koɛɛga. Baa wakat ninga a karen-biisã manesem la b tagsg sã n da pa lebd be, a Zezi ra miimi tɩ b sũyã pʋsẽ, b sɩd ra rat n maana Wẽnnaam daabã, la a ra nong-b-la rẽ yĩnga. (Luk 9:46; 22:24, 28-32, 60-62) Bãng-y t’a Zezi sẽn wa n pʋʋsd a yĩngr Ba wã, a kʋmsa a karen-biisã manesem sẽn yɩ sõma wã woto: “Bãmb saka yãmb goama.”—Zã 17:6.
8. Wilg-y yɛl kẽer nins pʋsẽ d sẽn tõe n dɩk togs-n-taar ne a Zeova la a Zezi, sã n yaa ne kell n tall d sũ-noogã.
8 Sãmbg sẽn ka be, na n nafa tõnd fãa, d sã n tags mak-sõng ning Wẽnnaam a Zeova la Kirist Zezi sẽn kõ tõnd rẽ wɛɛngẽ wã zugu. Rẽ yĩnga, d pa tõe n dɩk togs-n-taar sõma ne a Zeova n paase, n da bas tɩ yɛlã pak-d tɩ looge, b sã n pa yɩ wa tõnd sẽn da tẽedã sɩda? Rẽ yĩnga, d pa tõe n tũ a Zezi naoã neer n paase, n kell n tall yam-sõng ne d masã yɛlã, la d tall kɩls tɩ zems ne yɛl nins d sẽn gẽegd tõnd mengã la neb a taabã nengẽ wã sɩda? Bɩ d ges d sẽn tõe n tũ no-kãensã kẽer to-to tɩ zems ne bũmb ning kiris-neb nins sẽn tar yẽesmã sẽn nong wʋsg zĩig fãa: yaa koe-moonegã.
Kell-y n tall yam-sõng ne koe-moonegã
9. Wãn to la a Zeremi sũ-noogã ye lebg n wa, la wãn to la rẽ tõe n sõng tõndo?
9 A Zeova ratame tɩ d tall sũ-noog d sõgenegã pʋgẽ. D sũ-noogã pa segd n tik d tʋʋma biis zug ye. (Luk 10:17, 20) No-rɛɛs a Zeremi rɩka yʋʋm n moon zĩig sẽn pa womd biis pʋgẽ. A sẽn wa n tags nebã sẽn pa sak koɛɛgã zug wʋsgã a wa n ye pa tar sũ-noog ye. (Zeremi 20:8) La a sẽn wa n tags koɛɛgã sõmblem zugã, a sũ-noogã lebg n waame. A Zeremi yeela a Zeova woto: “Mam sẽn wʋm y goama, mam deegame. Saasẽ-pãng-soab a Wẽnnaam, yaa yãmb n so maam, la y goama kõo maam sũ-noog n kɩt tɩ m kɩdem.” (Zeremi 15:16) N-ye, a Zeremi kɩdmame, a sẽn da tar zu-noog n na n moon Wẽnnaam goama yĩnga. Tõnd me tõe n maana woto.
10. Wãn to la d tõe n kell n tall d sũ-noogã koe-moonegẽ wã, baa tõnd moonegã zĩig sã n nan pa womd biisi?
10 Baa neb wʋsg sẽn yɩɩd sã n zãgsd koe-noogã, d tara bʋʋm n na n tall sũ-noogo, d sẽn kẽesd d toog koe-moonegã pʋgẽ wã. Tẽeg-y t’a Zeova ra kɩsa sɩd vẽeneg tɩ ninsaalb kẽer n da na n dat n sõgen-a. Wa a Zeova, bɩ d ra tol n bas tẽeb tɩ neb kẽer na n wa baas n bãnga ãndũni naam sẽn ka to wã yell n sak Rĩungã koɛɛg ye. D pa segd n yĩm tɩ nebã vɩɩm yɛl toeemdame ye. Bõn bɩ zu-loees sã n wa ling-ba, baa neb nins sũy sẽn da noom n yɩɩd ne vɩɩmã tõe n sɩngame n tagsd vɩɩmã võor zug sõma-sõma. Yãmb na n zĩnda be n kõ y sõngre, ned a woto sã n wa bãng t’a ‘tara tẽeb ratem’ sɩda? (Matɩe 5:3, NW ) Bãng-y tɩ kẽer sẽn be yãmb moonegã zĩigẽ wã tõe n dat n kelga koe-noogã y nindaar waoongã!
11, 12. Bõe n zĩnd galʋ-tẽng a yembrẽ, la bõe la rẽ tõe n zãms tõndo?
11 Tõnd moonegã zĩig halhaal tõe n toeemame me. D rɩk makre. Yi-kãad poal sẽn nong taab sull n da be galʋ-tẽn-bil a yembre. B ra tara kamb me. A Zeova Kaset rãmbã sẽn ta zak ning fãa n wẽ sallem, nebã manesem da yaa yembre. B ra yetame tɩ b pa rat n kelg ye. Ned sã n sɩd ra rat n kelg Rĩungã koɛɛga, yagsa yɩta tao-tao n koms a raood tɩ Kaset rãmbã ye pa tõog n sõs ne a soabã nindaar ye. Yaa vẽeneg tɩ zĩ-kãng mooneg ra yaa toogo. Baasg zãnga, Kaset rãmbã pa koms raood ye. B kell n kẽnga taoor ne moonegã. Tɩ baas ne bõe?
12 Galʋ-tẽn-kãng kambã wʋsg wa n bɩɩme, n kẽ kãadem, n paam kamb be. B sẽn yã tɩ b vɩɩmã ra pa kõ-b sũ-noog hakɩk yĩnga, kom-bɩ-kãens kẽer sɩngame n baood sɩdã. B yãa sɩdã, b sẽn sak koe-noogã Kaset rãmbã sẽn moona. Woto, yaa yʋʋm wʋsg poor la tiging kɩdgã sɩng fɩɩgre. Mams-y Rĩungã koe-moondb nins sẽn pa koms raoodã sũ-noog sẽn yɩ a soaba! Bɩ Rĩungã koe-noog sẽn tar ziir moonegã kõ tõnd me sũ-noogo, d sẽn nangd pãng a pʋgẽ wã!
Tẽed-n-taasã na n sõnga yãmba
13. D tõe n baoa ãnd sõngre, d sã n wa koms raoodo?
13 Zu-loees bɩ sabaab sã n wa yãmb vɩɩmã pʋgẽ, ãnd sẽnes la y tõe n tees n bao belsgo? A Zeova sõgen dãmb milyõ rãmb sẽn dɩk b mens n kõ-a rengd n pʋʋsa a Zeova n bao a sõngre, rẽ poore, yaa b saam-biisã la b saam-bi-pogsã sẽn yaa kiris-nebã sõngr la b baooda. A Zezi sẽn da wa n be tẽng zugu, yẽ mengã talla naneb ne a karen-biisã sõngre. Yʋng ning sẽn deng a kũumã, a goma b yell n yeel tɩ b “yaa neb sẽn pa ne maam m makra pʋgẽ n ka bas ye.” (Luk 22:28) Yaa sɩd tɩ karen-bi-kãens ra pa zems zãng ye, la b kɩs-sɩdã ra kõo Wẽnnaam Biriblã belsgo. Tõnd me tõe n paama pãng d tẽed-n-taasã nengẽ.
14, 15. Bõe n sõng rao ne a pag tɩ b mao ne sũ-sãang b biribl kũum sẽn wa ne, la bõe zãmsg la yell ning sẽn paam-bã kõt yãmba?
14 Kiris-ned yʋʋr sẽn boond t’a Michel ne a pag a Diane bãnga b saam-biisã la b saam-bi-pogsã sõngr yõod sẽn tõe n ta zĩig ninga. B kẽnga logtor yir tɩ b vaees n mik tɩ b yʋʋm 20 biribl a Jonathan sẽn da tar keelem n da tõe n wa yɩ rao tɛkẽ wã tara modsem a kalkõtã pʋgẽ. Logtoɛɛmbã ka b sẽn pa maaneg n na n fãag-a ye, la a Jonathan bãagã kengame hal t’a maan kaalem daar a yembr zaabre. A Michel ne a Diane ra bee sũ-sãoong kãseng pʋgẽ. B yãame tɩ yʋʋn-kãng tʋʋmdã tigisg ra zoe n saame la bala. La b sẽn da ket n dat belsg sõma-sõma wã yĩnga, b kosa kãsem soab sẽn da be ne-b t’a yãag-b Rĩungã Roogẽ. B ra taa sasa ning bal b sẽn da togs tigingã a Jonathan kaalmã. Tigisgã poore, saam-biisã la saam-bi-pogsã ra gũbga roagdbã sẽn da raagd nintãmã, n mobg-b la b bels-b ne b goama. A Diane tẽra woto: “Tõnd sẽn da wa n wa Rĩungã Roogẽ wã tɩ d ra bee sũ-sãoong wʋsg pʋgẽ, la ad d sɩd paam belsg saam-biisã nengẽ, ad b sɩd keng-d pelse! Baa ne b sẽn da pa tõe n kɩt tɩ tõnd toogã sa wã, b kenga tõnd raood d yɩɩrã pʋgẽ!”—Rom dãmba 1:11, 12; 1 Korẽnt dãmba 12:21-26.
15 Yel-beedã kɩtame t’a Michel ne a Diane pẽneg b saam-biisã n paase. A leb n kɩtame tɩ b pẽneg taab n paase. Ad a Michel sẽn yeele: “M zãmsame n nong m pʋg-nongrã n yɩɩd pĩndã menga. D sã n wa koms raoodo, d gomda ne taab Biiblã sɩd zugu, la a Zeova sẽn teend tõnd to-to.” A Diane paasdame: “Rĩungã saagr talla võor meng n yɩɩg ne tõnd masã.”
16. Bõe yĩng tɩ tar yõod tɩ d yãk yam n wilg d zu-loeesã d saam-biisã?
16 N-ye, saam-biisã la saam-bi-pogsã sẽn yaa kiris-nebã tõe n ‘waa ne belsg’ n kõ tõnd yel-tood sasa, tɩ sõng tõnd tɩ d kell n tall d sũ-noogã. (Kolos rãmba 4:11) Yaa sɩd tɩ b pa tõe n bãng sẽn be tõnd yamẽ wã ye. La tõnd sã n wa rat sõngre, yaa sõma tɩ d togs-ba. Rẽ poore, d tõe n talla naneb hakɩk ne belsg buud fãa d saam-biisã sẽn tõe n kõ, n get rẽ wa belsg sẽn yit a Zeova nengẽ.—Yelbũna 12:25; 17:17.
Tags-y y tigingã neb yelle
17. Yel-tood bʋs la ma sẽn wubd a kamb a yembr segda, la tõnd tagsg yaa wãn to ne neb nins sẽn yaa wala pʋg-kãngã buudã?
17 Y sã n tagsd y tẽed-n-taasã yell n paasdẽ, y na n talla naneb ne-b n paase, la y paam sũ-noog ne b tũud-n-taare. Tags-y y tigingã neb yelle. Bõe la y ne-yã? Roagd n ya a yembr n maood n na n wub a kamb sɩdã sor zug bɩ? Yãmb tagsa mak-sõng ning ma wã sẽn kõtã zug sõma bɩ? Mams-y n ges zu-loees nins a sẽn segdã kẽere. Ma sẽn wubd a kamb a yembre, t’a yʋʋr boondẽ t’a Jeanine gomda bãmb b wãn yelle: yembr sidgri, rap sẽn dat n yo ne-fo, ligd sẽn pa sekd hal tɩ pa nana ye. La a yeelame tɩ sẽn yaa toog n yɩɩdã ya a ges tɩ kambã paam sũ-noogo, bala biig fãa pa a to ye. A Jeanine wata ne yell a to: “Yaa toog tɩ f pa rɩk f biriblã n lʋɩɩs zakã taoore, n ledg f sɩdã sẽn ka be wã. M tara bipugla, la yaa toog tɩ m tẽeg n da wa zɩlg-a, n dɩk m sũurẽ yɛlã n togs-a ye.” Wala roagdb tusa sẽn yaa b yen-yen n wubd b kambã, a Jeanine tʋmdame n get a kambã yelle. A leb n zãmsda Biiblã ne a kambã, n zãmsd-b koe-moonegẽ wã, la a talld-b n kẽngd tigingã tigissẽ. (Efɛɛz rãmba 6:4) Ad a Zeova sũur sɩd segd n yɩɩ noog wʋsgo, a sẽn ne zag-kãngã neb sẽn maood daar fãa n na n tall b burkĩndã! Nin-kãensã sẽn be d sʋkã pa noogd tõnd sũy sɩda? N-ye, sɩd noogda d sũyã.
18, 19. Wilg-y d sẽn tõe n tall naneb to-to n paas ne tigingã neba.
18 Tags-y y tigingã neb yell yɛsa. Tõe tɩ y mii pʋg-kõap sẽn yaa kɩs-sɩd dãmb bɩ rap sẽn yaa kɩs-sɩd dãmb tɩ b pagb ki n bas-ba, tɩ b “pa viigd” tigissã kẽnd ye. (Luk 2:37, Sebr Sõngo) B mi n sidgda b sẽn yaa b yembrã yĩng bɩ? N-ye. B sẽn ye pa tar b kẽed-n-taasã namsd-b-la wʋsgo! La b ket n tʋmda wʋsg a Zeova sõgenegã pʋgẽ, la b get neb a taabã yelle. B sẽn tar tagsg sẽn kɩls n zems sõma wakat fãa wã paasda tigingã sũ-noogo! Kiris-ned sẽn sõgen so-pakrã tʋʋmd pʋgẽ n maan yʋʋm 30 yeela woto: “Yɛl nins sẽn kõt maam sũ-noog n yɩɩdã a yembr yaa m sẽn ne saam-biis la saam-bi-pogs sẽn kʋʋl sẽn paam makr wʋsg sẽn ket n sõgend a Zeova ne kɩs-sɩdã!” N-ye, kiris-neb nins sẽn kʋʋl n be tõnd sʋkã kengda neb nins yʋʋm sẽn pa ta bãmbã raood hal wʋsgo.
19 Yaa wãn to ne nin-paalsã sẽn nan sɩng bal n lagemd ne tigingã? Pa kengd tõnd tẽebo, b sã n wilgd b tẽebã tigissẽ wã sɩda? Tags-y n ges b sẽn bɩ to-to ningã, b sẽn sɩng Biiblã zãmsgã tɛka. A Zeova sũur segd n nooma wʋsg ne-ba. La tõnd sẽ? Tõnd me wilgda d naneb ne-ba, n pẽgd-b b modgrã yĩng bɩ?
20. Bõe yĩng tɩ d tõe n yeel tɩ tigingã ned fãa tʋʋmd yaa kãseng tigingã pʋgẽ?
20 Yãmb kẽe kãadem bɩ y pa kẽ kãadem, bɩ y yaa roagd sẽn ya a yembr n wubd a kamba? Yãmb yaa kɩɩba, bɩ yaa y pag n ki n bas-yã, bɩ y yaa pʋg-kõore? Yãmb lagemda ne tigingã sẽn na maan yʋʋm wʋsg bɩ, bɩ yaa y sẽn nan sɩngd bala? Bãng-y tɩ y sẽn kõt mak-sõng ne kɩs-sɩdã kengda d fãa raoodo. La yãmb sã n naag n yɩɩl Rĩungã yɩɩlle, y sã n kõ leoor bɩ y kõ sõsg Wẽnnaam tʋʋmdã lekollẽ, yãmb sõngrã paasda tõnd sũ-noogã. Sẽn yɩɩd fãa, rẽ noogda a Zeova sũuri.
21. D tara bʋʋm wʋsg n na n maan bõe, la sʋgs-bʋs la rẽ wat ne?
21 N-ye, wakat kãensã sẽn gudgã sasa menga, d tõe n talla sũ-noog d sẽn balemd d sũ-noog Wẽnnaamã. D tara bʋʋm wʋsg n na n sak a Poll gom-kãensã: “Bɩ y maan sũ-noogo . . . La Wẽnnaam sẽn yaa nonglem la laafɩ soaba na pa ne yãmba.” (2 Korẽnt dãmba 13:11) Yaa wãn to yẽ, sabaabo, namsg d tẽebã yĩnga bɩ laog zu-loees sẽn pa nana sã n wa paam tõndo? D tõe n kell n talla d sũ-noogã yel-kãensã meng pʋgẽ bɩ? Karm-y sõsg ning sẽn pʋgdã n paam dẽ leoore.
[Tẽngr note]
^ sull 2 Ges-y Perspicacité grâce aux Écritures, vol. 2 seb-neng 45, a Zeova Kaset rãmbã sẽn yiisã.
Y tõe n leokame bɩ?
• Sũ-noog yaa bõe?
• Wãn to la yam-sõng tallg sõngd tõnd tɩ d kell n tall d sũ-noogã?
• Bõe n tõe n sõng tõnd tɩ d tall yam-sõng ne d tigingã mooneg zĩiga?
• Zĩ-bʋs la y nand y saam-biisã la saam-bi-pogsã sẽn be tigingã pʋgẽ wã?
[Zãmsgã sogsgã]
[Foto rãmba, seb-neng 21]
Tõnd moonegã zĩig neb tõe n toeemame
[Foto, seb-neng 23]
Sẽn be-b yãmb tigingẽ wã maooda ne yel-tood bʋse?