Pʋg-kõt sẽn nams pagb a yiib to-to
Pʋg-kõt sẽn nams pagb a yiib to-to
A SANDRA yaa pʋg-kõor n be Ostrali. A sɩdã sẽn ki yʋʋm a wãn sẽn loogã, zĩig pʋgẽ wã a Sandra sũurã sãama zãng fasɩ. “Bãng tɩ mam sɩdã, sẽn yaa m zoa m sẽn nong n yɩɩdã sẽn ki zĩig pʋgẽ n bas maamã looga maam wʋsgo. Mam sɩd pa tõe n tẽeg m sẽn maan to-to n yi logtor yirã n kuli, bɩ m sẽn maan bũmb ning n baas raarã ye. Semen dãmb a wãnã sẽn pʋglã, mam yɩɩrã waa ne yĩn-zabr wakat fãa.”
A Sandra ra tara zoa yʋʋr sẽn boond t’a Elaine, sẽn da be pʋg-kõt pʋgẽ na maan yʋʋm a yoobe. A Elaine zãa a sɩd a David sẽn da gãe ne bãag b sẽn boond tɩ kãnsɛɛrã kiis a yoob t’a sɩdã yaool n na n kong pãnga. A sũ-sãangã ra yaa wʋsg hal tɩ kɩt t’a sɩdã kũum poore, zond yõk-a wakat bilf pʋgẽ. Yʋʋm a yiib poore, a vik n lʋɩɩ zãma sʋka. A logtorã pa yã bũmb sẽn wilgd t’a bẽedame ye. Baasg zãnga, a yãame t’a Elaine da rĩi a sũ-sãangã n pa wilg ye. Rẽ n so t’a sagl-a t’a kul n tɩ modg n yãbe. “Kaoosame tɩ m yaool n tõog n mao ne m sũ-sãangã,” woto la a Elaine sak n deege. La a leb n wilga a sẽn maande, a sã n ya a yembr ne a sũ-sãangã: “M da nongame meng n kẽngd ro-gãagẽ wã n dɩkd m zugã n surgd a David futã pʋgẽ.”
N-ye, kẽed-n-taag kũum tõe n waa ne manesem buud toor-toore, bala pʋg-kõt pa f sẽn na n pa tar sɩd bal ye, yɩɩda woto. Wala makre, a Sandra ra pa tẽed t’a ra ket n yaa wa pĩndã ye. Wala pʋg-kõap wʋsg sɩdb sẽn maan kaalem sẽn pa kaoosã, a ra getame t’a ka pãnga, t’a pa tar bãan ye. A Sandra tẽra woto: “Sẽn da yaa mam sɩdã sẽn da minim n dɩkd yaoolem sardã yĩnga, mam sẽn lebg pʋg-kõor zĩig pʋgẽ wã kɩtame tɩ m da yaa m yembr n na n dɩk sard kãense. Ra sãama m gõeema. M da yaa fasɩ. M pʋd n da pa mi m sẽn na n maaneg ye.”
Yɛl wala a Sandra la a Elaine dẽndã maanda daar fãa dũniyã gill zugu. Bãase, sãmpoga, zaba, buud kʋʋb la nen-kɛglmã yaa yɛl sẽn kɩtd tɩ pʋg-kõapã sõor paasdẽ. * Pʋg-kãens wʋsg namsdame tɩ ned pa miẽ ye, n pa mi b sẽn na n maaneg ye. Bõe la zo-rãmbã la roagdbã tõe n maan n sõng nin-kãensã tɩ b tõog pʋg-kõtã zu-loeese? Sõsg ning sẽn pʋgdã tara sagls kẽer sẽn tõe n sõnge.
[Tẽngr note]
^ sull 5 Pagb a taab sẽn be zĩig ningã wõnda pʋg-kõto, bala b sɩdbã bas-b lame. Baa ne welg-taab la kãadem kaoob sẽn tar b zu-loeesã, noy nins yell b sẽn gom sõsg ning sẽn pʋgdã pʋgẽ wã tõe n sõnga pagb nins sẽn be yel-kãensã pʋsẽ wã.