Tags-y Wẽnnaam bõn-bãna yelle
Tags-y Wẽnnaam bõn-bãna yelle
“Zusoaba, mam Wẽnnaam, yãmb bõn-bãna yãmb sẽn maanã ne y tagsga tõnd yĩnga yaa wʋsgo. A to ka sẽn zem yãmb ye.”—YƖƖL SÕAMYÃ 40:6.
1, 2. Kaset bʋg n wilgd tɩ Wẽnnaam tʋʋmã yaa kãsemse, la bõe la rẽ segd n tus tõnd tɩ d maane?
Y SÃ N karemd Biiblã, y tõe n yãa vẽeneg tɩ Wẽnnaam maana tʋʋm sẽn yaa bõn-bãn n sõng a pĩnd nin-buiidã sẽn yaa Israɛllã. (Zozue 3:5; Yɩɩl Sõamyã 106:7, 21, 22) Ba a Zeova sã n nan pa kẽes a toog masã ninsaalbã yɛlẽ, d tara kaset wʋsg sẽn gũbg-d sẽn wilgd t’a tʋʋmã yaa bõn-bãna. Rẽnd d bee bʋʋm n na n yeel woto wa yɩɩl-gʋlsdã: “Zusoaba, yãmb tʋʋma yaa wʋsgo. Yãmb maana bãmb fãa ne yam, dũniyã pida ne yãmb paoongo.”—Yɩɩl Sõamyã 104:24; 148:1-5.
2 Rũndã-rũndã, neb wʋsg mumda b nin bɩ b zãgsda kaset sẽn wilgd Naandã tʋʋmã vẽenegã. (Rom dãmba 1:20) La yaa sõma tɩ tõnd tags b zut n sak n deeg tɩ d tara Naanda, la tɩ d tara zɩɩb a taoore. Zoob sak 38 n tɩ ta 41 tõe n sõng-d-la ne rẽ maanego, bala beenẽ, a Zeova yeta a Zoob t’a tags A tʋʋm-kãsemsã nens kẽer zutu. Ges-y yel-kãsems kẽer yell Wẽnnaam sẽn gome.
Tʋʋm sẽn tar pãng la sẽn yaa bõn-bãna
3. Wa b sẽn gʋls Zoob 38:22, 23, 25-29 pʋgẽ wã, Wẽnnaam sʋka bõe yelle?
3 Wẽnnaam sʋka a Zoob woto: “Fo kẽnga neez [sa-lamd] bĩngri zĩigẽ bɩ? Fo yãa sapɩlem zĩig sẽn be zĩig ninga bɩ? Mam bĩng-a-la toog ne sɩbgr la zabr wakat yĩnga.” Tẽngã babs wʋsg pʋsẽ, sa-lamd la sa-pɩlem beeme. Wẽnnaam paasame: “Yaa ãnd n maan soɛy n kõ saag ne sa-yãgbo tɩ saag ni weoog neb sẽn ka be pʋgẽ n kõ rasem-pʋɩɩsa koom tɩ mood yi be? Sa-koom tara ba bɩ? Yaa ãnd n dog meenem? Galaas ne givre sẽn yit yĩngra ma yaa ãnda?”—Zoob 38:22, 23, 25-29.
4-6. Bõe wɛɛngẽ la ninsaal bãngrã ne sa-lamd pa pidi?
4 Neb kẽer sẽn vɩ zĩis nins nebã sẽn yãgd wʋsgã pʋgẽ, n dat n kẽn tɩ gɩdgr kaẽ wã tõe n getame tɩ sa-lamd yaa tiisg ne-b bala. La neb a taab ka tɛk geta sa-lamd wa bũmb sẽn be yamleoog tɩ waood wakat bɩ zĩigã be rasãnde, tɩ b tõe n maan reem buud toor-toor sasa kãng bala. Ning-y Wẽnnaam sʋkrã y yamẽ, la y sʋk y meng woto: D mii sa-lamd sõma bɩ? bɩ a sẽn wõnd a soabã menga? Sɩda, d tõe n mii sa-lamd wʋsg sẽn wõnd bũmb ningã, d meng sẽn yã-a a fot bɩ d sẽn sɩd yã-a wʋsg yĩnga. La yaa wãn to ne sa-lamd gilsã yembr-yembre? Yãmb mii b sẽn wõnd a soab bɩ? Bɩ y tɩ vaees-b-la neer b yẽgrẽ wã?
5 Neb kẽer dɩka yʋʋm pi-gĩn n vaees sa-lamd la b yõg-b foto. Sa-lamd gilg a yembr tõe n tara bab-kɩds 100, tɩ b halhaalã sẽn yaa toɛ-toɛ wʋsgã be rasãnde. Sebr gom-zug sẽn yaa Pemsmã (L’atmosphère) yetame: “B miimi tɩ sa-lamdã tara bers toor-toor ka tɛka. La baa bãngdbã sẽn pẽdgd n yetẽ tɩ noor ka be sẽn gɩdgd tɩ bãmb b yiib wõneg taabã, b zɩ n yã sa-lamd gils a yiib sẽn wõnd taab ye. A Wilson Bentley maana vaeesg a ye sẽn yaa kãseng wʋsgo, . . . n dɩk sẽn yɩɩd yʋʋm 40 n vaees sa-lamd gilsã la a yõg-b foto, n tũnug ne masĩn sẽn paasd bũmb bedrem nif gesg pʋgẽ, n pa tol n yã bãmb b yiib tɩ b wõnd taab kɛpɩ ye.” La baa b sã n wa yã a yiib sẽn wõnd taaba, rẽ yĩnga woto wilgdame tɩ sa-lamdã buud toor-toorã ket n pa bõn-bãn bɩ?
6 Tẽeg-y tɩ Wẽnnaam sʋkame: “Fo kẽnga neez [sa-lamd] bĩngri zĩigẽ bɩ?” Neb wʋsg tagsdame tɩ sawatã yaa sa-lamd bĩngr zĩiga. Yãmb mamsa y sẽn na n kẽng sa-lamd bĩngr zĩig a woto pʋgẽ n na n sõd sa-lamdã sõor ka tɛkã la y bãng b sẽn yɩt to-to n wa yaa woto sɩda? Bãngr sebr yeta woto: “D ket n pa mi yɛl nins sẽn kɩtd tɩ koom gũsdẽ wã, tɩ rẽ yaa tɩlae sẽn na yɩl tɩ sawatã koom sẽn tosdã gũs n sig zero tẽngr ne degre 40 C halhaalã võor vẽeneg ye.”—Yɩɩl Sõamyã 147:16, 17; Ezai 55:9, 10.
7. Ninsaal bãngrã taa hal zĩ-bʋg saag wɛɛngẽ?
7 La sã n yaa ne saag wɛɛngẽ? Wẽnnaam sʋka a Zoob woto: “Sa-koom tara ba bɩ? Yaa ãnd n dog meenem?” Bãngr-sebrã yetame: “Pemsmã kẽnd võor wʋmb sẽn yaa toogã yĩnga, la ko-walmã ne pemsmã halhaal sẽn toeemd wʋsgã yĩnga, wõnda b pa tõe n kõ zãmsg takɩ bɩ zãmsg sẽn kʋmsd sawatã la saagã sẽn wat to-to wã wɛɛngẽ ye.” Koɛɛg-koɛɛg bala, bãngdbã kõo zãmsg wʋsg yellã zugu, la b sɩd pa wʋmd saag võor zãng ye. Baasg zãnga, yãmb miime tɩ saag tara yõodo, a niidame, n madgd tẽngã, n zãgsd tɩɩsã, la a kɩtdẽ tɩ vɩɩmã tõe n yɩ la a tall yamleoogo.
8. Bõe yĩng t’a Poll goam nins sẽn be Tʋʋma 14:17 pʋgẽ wã zemse?
8 Yãmb pa sak n deeg tʋm-tʋmd a Poll sẽn wa n kʋmb n togs bũmb ningã sɩda? A sagla neb a taabã tɩ b bãng tɩ tʋʋm-kãsems kãensã kõta kaset vẽeneg ne a Soab ning sẽn maand-bã. A Poll yeela Wẽnnaam wɛɛngẽ tɩ: “Bãmb ka kong kaset dãmb ye. B maana neer n kõ yãmb saaga la sẽoogo la bõn-bɩʋʋng tɩ rɩɩb sek yãmb tɩ y pid ne sũ-noogo.”—Tʋʋma 14:17; Yɩɩl Sõamyã 147:8.
9. Wãn-wãn la Wẽnnaam tʋʋm-kãsemsã wilgd t’a pãngã labsame?
9 Sãmbg ka be tɩ tʋʋm-kãsems kãensã sẽn be nafrã Maand tara yam sẽn ka to la pãng wʋsg ye. Sã n yaa ne a pãngã wɛɛngẽ bɩ y tags woto: B yeelame tɩ yaa sẽn zems saas sẽn naag ne seb-bɛd 45 000 n maand daar fãa, tɩ yʋʋmd pʋgẽ bɩ b yɩɩd bãmb milyõ 16. Woto rat n yeelame tɩ dũniyã gill zugu, yaa sẽn zems bãmb 2 000 n maand sasa kãngã menga. Sawatã fãa sẽn be saag ne sebg a yembr pʋgẽ wã tara pãng wʋsgo. B pãngã zema bõmb nikleɛɛr dãmbã b sẽn lob Dũni gill Zabr a Yiib n soabã sasa wã bãmb piig bɩ sẽn yɩɩd woto. Pãn-kãng pedg yãmb sẽn ne wã yaa sa-yãgbã. B sẽn yɛɛsd wʋsgã toor sẽn ka be, sa-yãgbã sẽn tar pãngã sɩd sõngdame n maand bũmb ning b sẽn boond tɩ azote sẽn tat tẽn-gãongã, tɩ tɩɩsã fõogd-a tɩ rɩlgdb-bã. Woto, sa-yãgb yaa Wẽnnaam pãng pukri, la a sɩd nafdame me.—Yɩɩl Sõamyã 104:14, 15.
Bõe la y segd n baas n sak n deege?
10. Wãn to la y na n leok sʋgsg nins sẽn be Zoob 38:33-38 pʋgẽ wã?
10 Mams-y wala yãmb sẽn na n be a Zoob zĩigẽ, tɩ Wẽnnaam Sẽn-tõeyã fãa wã maand-y sʋgsgo. Y na n sak n deegame tɩ neb wʋsg sẽn yɩɩd pa nong n tagsd Wẽnnaam tʋʋm-kãsemsã zut wʋsg ye. A Zeova maanda tõnd sʋgsg nins sẽn be Zoob 38:33-38 pʋgẽ wã. “Fo mii yĩngr tods bɩ? Fo tõe n dɩk-b lame n kɩt tɩ dũniyã rãmb sak-b bɩ? Fo tõe n zẽka f koɛɛg tɩ ta sawat pʋsẽ n kɩt tɩ saag ni bɩ? Fo tõe n tʋma sa-yãgb t’a kẽng la f bool-a t’a sake? Yaa ãnd n kõ sawat yam la a kõ wulg bãngre? Ãnd n tar yam n tõe n sõd sawato? Ãnd n tõe n pʋdg saag t’a ni tɩ tẽnga tom tabende?”
11, 12. Yɛl kẽer bʋs n wilgd tɩ Wẽnnaam yaa bõn-kãsems Maanda?
11 Tõnd yãa yɛl a wãn bal a Eliyu sẽn sõs ne a Zoobe, la sʋgsg a wãn a Zeova sẽn yeel a Zoob t’a ‘sã n yaa gãndaoog’ bɩ a leoke. (Zoob 38:3) D yetame tɩ b ‘wãna,’ bala sak 38 n tɩ ta 39, Wẽnnaam goma naanegã nens a taab sẽn yaa kãsems yelle. Wala makre, a goma saasẽ ãds sul-bɛdã yelle. Ãnd n mi b tõodã bɩ b noyã? (Zoob 38:31-33) A Zeova kɩtame t’a Zoob tags rũms kẽer zutu: gɩgemde, gãabgo, tãng bʋʋga, we-bõanga, we-naaf la nameoongo, n paas wed-moaag sẽn tar pãngã, la pa-nand-tugri. Sɩda, Wẽnnaam sʋka a Zoob n gese, sã n yaa yẽ a Zoob n kɩt tɩ rũm-kãensã yalẽ wã la b sẽn vɩ sõma wã yaa woto wã. Wakat ninga, tõe tɩ sag-kãensã zãmsg bee yamleoog ne-yã, sẽn yɩɩd fãa y sã n nong wed-moos bɩ rũms a taaba.—Yɩɩl Sõamyã 50:10, 11.
12 Y tõeeme me n vaees Zoob sak 40 la 41. Beenẽ, a Zeova yeela a Zoob yɛs t’a leok a sʋgsgã sẽn tɩ loe ne bõn-naands a yiib takɩ. D tagsdame tɩ yaa yemde, sẽn yaa parwẽnd la a tar pãngã, la Nill kʋɩlgã yẽbg [piryãong] sẽn kõt rabeemã. Rũm-kãensã a yembr fãa yaa naanegã bõn-kãseng sẽn zems tɩ d tags a zugu. Masã bɩ d ges d sẽn segd n baas n yɛɛlga.
13. Wẽnnaam sʋgsgã talla pãng bʋg a Zoob zugu, la wãn to la rẽ segd n tall pãng tõnd zugu?
13 Zoob sak 42 wilgda tõnd sʋgsg nins Wẽnnaam sẽn maana sẽn tall pãng ning a Zoob zugã. Sɩngrẽ wã, sẽn da pak a Zoob n yɩɩd yaa yẽ mengã ne neb a taabã. La a sẽn sak remsgã sẽn yit a Zeova sʋgsgẽ wã yĩnga, a toeema a tagsgã. A sak n deega woto: “Mam miimi tɩ yãmb [a Zeova] tõee bũmb fãa. Yãmb sã n dat n maan bũmbu, ned ka tõe n gɩdg-a ye. Yãmb sokame tɩ yaa yalem bʋg n sãamd yãmb sẽn dat n maan bũmb ningã. Tɩ bõe, mam goma m sẽn ka mi. Yaa bõn-kãsems sẽn yɩɩd mam bãngre.” (Zoob 42:2, 3) N-ye, a Zoob sẽn tags Wẽnnaam tʋʋm-kãsemsã yell poore, a yeelame tɩ bõn-kãensã ra yaa kãsems tɩ loog ne yẽ. Naanegã bõn-kãensã tõnd sẽn lebg n ges koɛɛg-koɛɛg woto wã me segdame n kɩt tɩ d bãng tɩ Wẽnnaam yamã ne a pãngã yaa kãsenga. Bõn-datl bʋg yĩnga? Yaa sẽn na yɩl bal t’a pãn-kãsengã la a tõog kãsengã yɛɛs-d bɩ? Bɩ segd n yɩɩga woto?
14. A Davɩɩd manesem yɩɩ wãn to Wẽnnaam bõn-bãna taoore?
14 Be neere Yɩɩl Sõamyã 86 pʋgẽ, d yãta goam sẽn wõnd woto a Davɩɩd sẽn gʋlse. A ra yeela woto yɩɩll pʋgẽ: “Saas wilgda Wẽnnaam ziiri, la sa-gãong togsda bãmb nus tʋʋma. Daar a yembr kɩta bãmb kaset ne daar a to, la yʋng a yembr kõta yʋng a to bãngre.” (Yɩɩl Sõamyã 19:2, 3) La a Davɩɩd kẽnga taoor ne a goamã. Yɩɩl Sõamyã 86:10, 11 pʋgẽ, d karemda woto: “Yãmb yaa kãsenga la yãmb maanda bõn-bãna. Yãmb yaa Wẽnnaam y ye bala. Zusoaba, bɩ y zãms maam y sora tɩ m kẽn yãmb sɩda pʋgẽ, la y kõ maam yam a yembr bal y yʋʋra zoees yĩnga.” A Davɩɩd ra zoeta a Naandã, ne zoees sẽn naag ne waoogre, a bõn-bãnã fãa yĩngã. Y mii a võore. A Davɩɩd ra pa rat n maan bũmb tɩ pa ta Ned ning sẽn maan tʋʋm-kãsems kãensã wã yam ye. Yaa woto ne tõnd me.
15. Bõe yĩng t’a Davɩɩd wẽn-zoeer sẽn naag ne waoogrã ra zemse?
15 A Davɩɩd bãngame tɩ Wẽnnaam tara pãng wʋsg la a tar tõog pãn-kãseng kãng zugu, la a tõe n tũnuga ne-a n zab ne a bɛɛbã. Rẽ wilgdame tɩ yell n gũud nin-kãense. Wẽnnaam sʋka a Zoob woto: “Fo kẽnga neez [sa-lamd] bĩngri zĩigẽ bɩ? Fo yãa sapɩlem zĩig sẽn be zĩig ninga bɩ? Mam bĩng-a-la toog ne sɩbgr la zabr wakat yĩnga.” Sa-lamdo, sapɩlem, saag sẽn naag ne seb-kãsenga, sebg la sa-yãgb fãa bee Wẽnnaam zab-teedã pʋgẽ. La yaa d bãng tɩ tẽngã pãn-kãensã sɩd yaa pãn-yɛɛsds menga!—Zoob 38:22, 23.
16, 17. Bõe n wilgd pãng sẽn pa tõe n bãng n bilg ning Wẽnnaam sẽn tarã, la wãn to la a tʋm ne pãn-kãng pĩnd wẽndẽ wã?
16 Tõe tɩ y tẽra pãn-kãensã a yembr sẽn wa ne sabaab zĩig ninga, yaa saag seb-kẽengã, saag sebg ne sapɩlem bɩ koom sẽn tiig n lim zĩigã. D rɩk makre: yʋʋmd 1999 saabã sẽnese, saag seb-bɛd n wẽ Erop goabg la a nen-taoor sʋkã, hal tɩ ling zĩigã halhaal mitb menga. Sebgã zoees tʋʋlem taa kɩlometr 200 lɛɛr a yembr pʋgẽ, n loog ne rot tusa suga, n lub kuura bãn-daado, n leeb kamyõ rãmba. Mams-y n ges woto: Saagã sebd vigsame bɩ a kaoa sẽn zems tɩɩs milyõ 270. Versay parkã sẽn be Paari noorẽ wã bala, yaa tɩɩs 10 000 n vigsi. Zags milyõ rãmb n wa n ye pa tar bugum ye. Sẽn pẽneg neb 100 n maan yõore. Woto fãa yaa saag seb-kãseng sẽn kaoos bilf bal yĩnga. Pãng tek woto!
17 Ned tõe n yeelame tɩ saag sebdã yaa bũmb sẽn wat yaar tɩ ned pa tar b tɩɩm ye. La ra na n yɩɩ wãn to, pãng sẽn tõe fãa Soabã sẽn maand tʋʋm-kãsemsã sã n da rɩkẽ pãn-kãensã n tʋm takɩ, tɩ ra wẽ yaare? A maana woto a Abrahaam wẽndẽ wã. A Abrahaam bãngame tɩ tẽngã fãa Bʋkaood ra maga wẽnem ning sẽn da tʋmd galʋ-tẽns a yiib pʋsẽ wã, Sodom la Gomoore. B ra kẽe wẽng pʋgẽ hal tɩ kɩt tɩ kaasgã bãmb wɛɛngẽ rʋ n ta Wẽnnaam nengẽ. Wẽnnaam kɩtame tɩ nin-tɩrsã yi n zãag ne galʋ-tẽnsã b sẽn na n sãama n põse. Biiblã yetame: “Dẽ, Zusoaba kɩtame tɩ kidbri ne bugum sig Sodom ne Gomoor zut wa saag sẽn niida. A yii Zusoaba nengẽ saasẽ” n sig galʋ-tẽn-kãensã zutu. Woto yɩɩ tʋʋm-kãsenga. A kogla nin-tɩrsã la a sãam sẽn ya-b nin-wẽns piig la a yiibã.—Sɩngre 19:24.
18. Ezai sak 25 gomda bõn-kãsems bʋs yelle?
18 Kaoosg zugẽ, wa n zĩndame tɩ Wẽnnaam kao pĩnd wẽndẽ Babilon galʋ-tẽngã bʋʋdo, tɩ tõe tɩ yaa yẽ yell la b sẽn gom Ezai sak 25 pʋgẽ wã. Wẽnnaam reng n togsame tɩ Babilon da na n lebga raboog woto: “Yãmb luba tẽnga t’a lebg wa kug dʋre. Tẽng ninga sẽn da tar pãnga sãamame. Tɩtaam dãmba na-tẽnga sãamame. La b ka na n tol n me-a yɛs ye.” (Ezai 25:2) Rũndã-rũndã sãamb nins sẽn tʋgd n get Babilon zĩ-kʋdrã tõe n sɩd kõo kaset tɩ rẽ yɩɩ sɩda. Woto yɩɩ bũmb sẽn wa yaar woto bal bɩ? Ayo. Sẽn yaa lebende, d tõe n saka a Ezai gom-kãensã: “Zusoaba, yãmb yaa mam Wẽnnaam. Mam waoogda yãmba, la m pẽgd yãmb yʋʋre. Tɩ bõe, tʋʋm kãsems nins yãmb sẽn da yeel tɩ y na n maaname wã yaa sɩda, la yãmb maan-b lame n ka bas tɩ vaal ye.”—Ezai 25:1.
Bõn-bãn sẽn wate
19, 20. D tõe n gũu Ezai 25:6-8 pids-bʋgo?
19 Wẽnnaam pidsa bãngr-gomd kãngã pĩndã, la a na n maana woto me ne manesem kãseng beoog-daare. Zĩ-kãngã a Ezai sẽn gomd “tʋʋm kãsems” Wẽnnaam sẽn maandã yellã, d nee bãngr-gomd sẽn be bas-m-yam sẽn pa pids nand ye. La a na n pidsame, wala bʋ-kaoorã b sẽn deng n togs Babilon zugã sẽn pidsã. Yaa ‘bõn-kãseng bʋg’ la b kãab-yã? Ezai 25:6 yetame: “Saasẽ-pãng-soabã na n maana kibs buuda fãa yĩng tãng kãnga zugu. Na n yɩɩ ne nemd sẽn tar kaam la rãam sẽn yaa noogo. Yaa ne nemd sẽn tar kaam t’a bɩɩm yaa noogo la rãam sẽn yoog sõama n yaa neere.”
20 Bãngr-gom-kãngã sɩd na n pidsa Wẽnnaam dũni paalgã sẽn ta n sa la balã pʋgẽ. Wakat kãnga, ãdem-biisã na n paama yolsg ne zu-loees nins sẽn namsd neb wʋsg masã wã. Sɩda Ezai 25:7, 8 kõta bas-m-yam tɩ Wẽnnaam na n tũnuga ne a naanegã pãng n maan wakatã fãa tʋʋm-kãsems sẽn yɩɩd-bã a yembr woto: “Bãmb na n sãama kũum wakat sẽn ka sɛta. Zusoaba sẽn yaa soaala na n yẽesa nintãm nins fãa sẽn be neba ninẽ wã. La bãmb na n yiisa neb nins fãa sẽn be dũniyã zuga yãnde. Tɩ bõe, yaa Zusoabã n gom.” Kaoosg poore, tʋm-tʋmd a Poll tika gom-kãensã zug n wilg tɩ Wẽnnaam na n vʋʋga kũum. Ad woto sɩd na yɩ tʋʋm-kãseng tɛkẽ!—1 Korẽnt dãmba 15:51-54.
21. Tʋʋm-kãsems bʋs la Wẽnnaam na n maan n kõ sẽn ki-bã?
21 Bʋʋm a to sẽn kɩt tɩ sũ-sãang nintãmã na n sa wã yaa ninsaalbã sẽn na n paam tɩ b yiis b yĩnsã bãasã. A Zezi sẽn da wa n be tẽng zugã, a sãooga neb wʋsgo, n puk zoens nini, n kɩt tɩ wʋms tʋb yoke, n sãoog koms rãmba. Zã 5:5-9 wilgdame t’a sãooga rao sẽn da yaa koams sẽn na maan yʋʋm 38. Neb nins sẽn yã rẽ wã gesame tɩ ra yaa tʋʋm-kãseng bɩ yel-solemde. Sɩd me yaa woto! La a Zezi wilgame t’a sã n na n wa vʋʋg kũumã ra na n yɩɩ bõn-kãseng n yɩɩg woto menga: “Bɩ yãmb da yɛɛs ne yõ wã ye. Tɩ bõe, wakat watame tɩ fãa sẽn be yaad pʋsẽ na n wʋm bãmb koɛɛg n yi. Neb nins sẽn da maan neera na n vʋʋg n paama vɩɩm, la neb nins sẽn da maan wẽnga na n vʋʋg n paama bʋʋdo.”—Zã 5:28, 29.
22. Bõe yĩng tɩ naong rãmbã la sẽn namsd-bã tõe n tall saagre?
22 Rẽ waoong yaa waaziba, bala ned ning sẽn kãabã ya a Zeova. Kɩs-y sɩd t’a sã n wa na n tũnug ne a pãn-kãsengã n dems yɛlã, a na n maana bũmb sẽn sɩd yaa kãsenga. Yɩɩl Sõamyã 72 wã wilgda a sẽn na n tũnug ne a Biriblã sẽn yaa Rĩma n maan bũmb ningã. Rẽ wẽnde, nin-tɩrsã na n tobame. Laafɩ wã na n yɩɩ wʋsgo. Wẽnnaam na n fãaga naong rãmbã la sẽn namsd-bã. A kãaba woto: “Ki wʋsg na n zĩnda soolem pʋgẽ. A na n miima tãens zutu, a biisa na n yɩɩ wa Libã dẽnda. La tẽnga neba na n fɩɩga wa mood sẽn be pʋt pʋsẽ.”—Yɩɩl Sõamyã 72:16.
23. Wẽnnaam tʋʋm-kãsemsã segd n tusa tõnd tɩ d maan bõe?
23 Vẽenega, d tara bʋʋm wʋsg n na n tags a Zeova bõn-bãnã fãa zut neere, a sẽn maan bũmb ning tɩ loogã, a sẽn maand bũmb ning rũndã-rũndã la a sẽn na n maan bũmb ning ka la bilfã. “Bark Zusoab a Wẽnnaam sẽn yaa Israɛll Wẽnnaam sẽn maand bõn-bãna. Bãmb yʋʋr ziir bee bark wakat sẽn ka sɛta. Bɩ dũniyã fãa pid ne bãmb ziiri. Amina. Amina!” (Yɩɩl Sõamyã 72:18, 19) D segd n goma bõn-kãensã yell wakat fãa ne yamleoog ne d roagdbã la ne neb a taabã. N-ye, bɩ y “togs bãmb ziir bu-zẽmsa sʋka la y togs bãmb bõn-bãna neb buud fãa sʋka.”—Yɩɩl Sõamyã 78:3, 4; 96:3, 4.
Wãn to la y na n leokẽ?
• Wãn to la sʋgsg nins b sẽn sʋk a Zoobã wilgd tɩ ninsaal bãngrã pa zãag zĩiga?
• Wẽnnaam tʋʋm-kãsems bʋs yell b sẽn gom Zoob sak 37 n ta 41 pʋgẽ n yɩ bõn-yɛɛsds ne yãmba?
• D manesem segd n yɩɩ wãn to, d sẽn vaees Wẽnnaam tʋʋm-kãsems a wãna poore?
[Zãmsgã sogsgã]
[Foto rãmba, seb-neng 16]
Bõe la yãmb baasd n yeel sa-lamdã buud toor-toorã la sa-yãgb pãn-kẽengã wɛɛngẽ?
[Fotã sẽn yitẽ]
snowcrystals.net
[Foto rãmba, seb-neng 18]
Gom-y Wẽnnaam tʋʋm-kãsemsã yell wakat fãa