Yãmb “baooda sẽk sẽn zemsã” bɩ?

A POLL sagla yʋʋm kob-yendẽ kiris-neb nins sẽn da be Efɛɛzã woto: “Dẽ, bɩ y gũus ne yãmb kẽnd neere tɩ zems ne bũmb fãa zãng wa yam dãmba la ka wa yalemb ye. Bɩ y bao sẽk sẽn zemsã, bala rayã yaa wẽnse.” (Efɛɛz rãmba 5:15, 16, NW) Bõe yĩng tɩ sagl-kãngã ra yaa tɩlae? Sẽn na yɩl n leok sʋk-kãngã rẽnda d bãng yɛl nins tẽn-kʋdem wẽndẽ galʋ-tẽn-kãngã kiris-nebã sẽn da segdã.

Efɛɛz yʋʋr da yii a arzɛgsã, a yoobã wʋsgã, a tʋʋm-beedã sẽn yaa wʋsg la a tɩɩm saoogã buud toor-toorã yĩnga. Sẽn paase, kiris-nebã ra segdame n mao ne ninsaalbã tags-bɛd sẽn tɩ loe ne sẽkã. Gerɛk rãmb nins sẽn da pa kiris-neb n be Efɛɛzã ra pa tẽed tɩ sẽkã rebda neng a yembr ye. Gerɛs nebã tags-bɛd zãmsa nebã tɩ vɩɩmã ra yɩlemdame n pa satẽ ye. Ned sã n sãam a sẽkã vɩɩm a yembr pʋgẽ, a ra tõe n ye paam-a-la vɩɩm a to pʋgẽ. Tags-kãngã buud ra tõe n tudga Efɛɛz kiris-nebã tɩ b tall tagsg sẽn loms ne a Zeova sẽn yãk wakat ning n na n pids yɛlã, tɩ Wẽnnaam bʋ-kaoorã wakat be sʋkã. Woto wã yĩnga a Poll sẽn sagl tɩ d ‘bao sẽk sẽn zemsã’ ra zemsame.

A Poll sẽn da gomd sẽk ning yellã ra yaa takɩ. Gerɛk gom-biig ning b sẽn tũnug ne wã rat n yeelame tɩ wakat sẽn yãk takɩ, yaa wakat sẽn zems b sẽn maand bũmb takɩ. A Poll da sagenda yʋʋm kob-yendẽ kiris-nebã tɩ b rɩk lohormã sasa n tʋm ne yam. Yaa sasa ning b sẽn da ket n tar tɩ nan pa sa, tɩ Wẽnnaam nimbãan-zoeerã la a fãagrã kãabg nan pa sa wã.—Rom dãmba 13:11-13; 1 Tesalonik rãmba 5:6-11.

Tõnd vɩɩ sasa sẽn zems woto pʋgẽ. Kiris-nebã pa sãamd lohorem sasa kãngã sẽn pa na n leb n wa wã, n bao wakat bilf pʋgẽ yõ-noogrã dũni kãngã sẽn dat n kõ wã ye. Ayo, kiris-nebã tʋmda ne yam, b sã n dɩk sẽk ning b sẽn tarã n maan “wẽn-zoeer tʋʋma.” Yaa woto la b paasd b zems-n-taarã ne b Naandã sẽn yaa Wẽnnaam a Zeova wã.—2 Pɩɛɛr 3:11, NW; Yɩɩl Sõamyã 73:28; Filip rãmba 1:10.