A kẽngd n na n tɩ tõoga zãng-zãngã
A kẽngd n na n tɩ tõoga zãng-zãngã
“Mam gesame, la haya! mam yãa wed-pɛɛlga. La sẽn zaoa weefa tara tãpo, la b kõo yẽ maanfo, la a kẽngame [n tõog la a na n tɩ baas a tõogrã, NW ].”—WILGRI 6:2.
1. Beoog-daar yel-bʋs la a Zã reng n yã yãab pʋgẽ?
NE WẼNNAAM vẽnegre, tʋm-tʋmd a Zã ra tõe n deng n yãa Kirist naama reegr sẽn wat beoog-daare, yʋʋm 1 800 poorã, n bilgi. Tẽeb ra yaa tɩlae ne a Zã sẽn na yɩl n sak t’a sẽn yã wã ra na n pidsame. Rũndã-rũndã, tõnd tara kaset vẽeneg tɩ naama reegr kãngã b sẽn deng n togsã zĩnda yʋʋmd 1914. Ne tẽeb nini, d nee a Zezi Kirist t’a rebd ‘n na n tõog la a na n tɩ baas a tõogrã.’
2. A Sʋɩtãan manesem yɩɩ wãna, Rĩungã sẽn luglã, la rẽ yaa kaset ne bõe?
2 Rĩungã luglg poore, b riga a Sʋɩtãan n yiis saasẽ, tɩ kɩt t’a maan zab-toaag ne sũ-yikr sẽn yaa kãseng n yɩɩda, la a pa tõoge, a kõn tõoge. (Wilgri 12:7-12) A sũ-yikrã kɩtame tɩ dũniyã yɛl keng n paase. Ãdem-biisã ne taab vɩɩm tara sãoong n debda. Sã n yaa ne a Zeova Kaset rãmbã, woto yaa kaset sẽn wilgd vẽeneg tɩ b Rĩmã rebdame ‘n na n tɩ baas a tõogrã.’
B lugenda dũni paalga lagem-taaba
3, 4. a) Toeen-bʋs siglgã wɛɛngẽ la b maan kiris-neb tigingã pʋgẽ Rĩungã luglg tɛka, la bõe yĩng tɩ toeen-kãens ra yaa tɩlae? b) Wa a Ezai sẽn da reng n togsã, toeen-kãens yõod yɩɩ bõe?
3 Rĩungã sẽn luglã bala, wakat da taame tɩ b ra na n kɩt tɩ kiris-neb tigingã sẽn lebs n luglã, sẽn paam zɩɩb n paas Rĩungã tʋʋm pʋgẽ wã, tʋm tɩ zems ne yʋʋm kob-yendẽ kiris-neb tigingã makr sõma n paase. Woto, Gũusg Gasg ning sẽn yi yʋʋmd 1938 (ne ãngilindi), sigr kiuug pipi daar la a rasem 15 wã, wilga kiris-neb siglgã sẽn segd n tʋm to-to. Rẽ loogr poore, yʋʋmd 1971 yʋʋm-sar kiuug rasem 15 rẽndã wilga rũndã-rũndã Siglgã Taoor-lʋɩtb Sull sẽn ya a soab sõma n paas sõsg ning gom-zug sẽn yaa: “Siglgã Taoor-lʋɩtb Sull yaa toor ne Asosiasiõ sẽn zems ne laloa wã” pʋgẽ. Yʋʋmd 1972, kẽem dãmb sul la b ra yãk tɩ b kõ tigimsã sõngr la sor-wilgri.
4 B sẽn lebg n get piisã yell tɩ zemsã paasa kiris-neb tigingã pãnga. Bũmb ning sẽn sõng ne rẽ wã me yaa segls nins Siglgã Taoor-lʋɩtb Sull sẽn maan sẽn na yɩl n kõ kãsem dãmbã zãmsg b tʋʋmã pʋsẽ wã, tɩ b zãmsgã bʋ-kaoorã yɛlẽ wã be sʋkã. Wẽnnaam tẽng zug siglgã yɛl sẽn maneg n kẽng taoor bilf-bilfã, la bi-sõma nins rẽ sẽn wa ne wã ra yaa bũmb b sẽn deng n togs Ezai 60:17 pʋgẽ woto: “Mam na n waa ne sãnem t’a reeg zũud zĩiga la m wa ne wanzũri n kɩt t’a reeg kut zĩiga tɩ zũud reeg raad zĩiga tɩ kut me reeg kug zĩiga. Mam na n kɩtame tɩ laafɩ soog foom tɩ tɩrlem lebg fo tʋʋm soaadba.” Toeen-kãensã sẽn yaa sõma wã wilgdame tɩ Wẽnnaam ning-b-la bark la a saka neb nins sẽn da teel a Rĩungã ne yẽesmã.
5. a) A Zeova sẽn ning A nin-buiidã barkã, a Sʋɩtãan manesem yɩɩ wãn to? b) Wa sẽn zems ne Filip rãmba 1:7 (NW ), wãn to la a Zeova nin-buiidã maan a Sʋɩtãan sũ-yikrã taoore?
5 Wẽnnaam sẽn get a nin-buiidã yell la a wilgd-b sor ne nonglem Rĩungã luglg poorã pa ling a Sʋɩtãan ye. Wala makre, yʋʋmd 1931, kiris-neb sul-bil kãngã togsa zãma wã tɩ b ra pa Biiblã Zãmsdb bal ye, la tɩ wa sẽn zems ne Ezai 43:10, (NW ) b ra ya a Zeova Kaset rãmba! Yɩɩ rẽ yĩng tɩ pa rẽ yĩng me, a Sʋɩtãan Munaafɩɩk waa ne namsg wʋsg to sẽn zɩ n zĩnd dũniyã gill zugu. Baa tẽns nins b sẽn da mi tɩ b pa gɩdgd ned t’a tũ a tũudmã wala Etazĩni, Kanada la Alemayn pʋsẽ wã, naoor wʋsgo, yɩɩ tɩlae ne Kaset rãmbã tɩ b kẽng bʋʋd zĩisẽ n tɩ bʋ naoor wʋsg sẽn na yɩl n kell n paam sor n tũ b tũudmã. Yʋʋmd 1988 sẽn ta, Etazĩni bʋ-kaoodb sull sẽn yaa kãseng n yɩɩdã lebg n gesa bʋ-kao 71 sẽn tɩ loe ne a Zeova Kaset rãmba. La rẽ pʋgẽ, bʋ-kao a tãab fãa zugu, b kõ-b-la bʋʋm a yiib pʋgẽ. Rũndã-rũndã, dũniyã gill zugu, bʋ-kao la b maanda, sẽn na yɩl tɩ wala yʋʋm kob-yendẽ wã, bɩ b tõog n “wilg tɩ koe-noogã yaa bũmb sẽn zemse la b kɩt tɩ b sak-a laloa wã taoore.”—Filip rãmba 1:7, NW.
6. Noor b sẽn yiis n gɩdg bɩ n na n boog a Zeova nin-buiidã tʋʋmã kɩtame tɩ b pa kẽng taoor bɩ? Rɩk-y makre.
6 Yʋʋmd 1930 tɛk n tɩ ta Dũni gill Zabr a Yiib-n-soabã sɩngre, na-toos n yiis noy n gɩdg bɩ n boog a Zeova Kaset rãmbã tʋʋmd Alemayn, Ɛspayn la Zapõ, n paas tẽns a taaba. La yʋʋmd 2000 wã, tẽn-kãensã b tãabã bal ra tara Wẽnnaam Rĩungã moondb 500 000 la bala. Woto ra yaa dũniyã gill Kaset rãmb sõor naoor piig la bal yʋʋmd 1936! Vẽenega, b sẽn yiis noor tɩ b na n gɩdga tʋʋmdã bɩ b boog-a wã pa gɩdg a Zeova nin-buiidã tɩ b pa kẽng taoor n sak b Taoor-lʋɩt la b zabr tõogd a Zezi Kirist ye.
7. Yel-kãseng bʋg n zĩnd yʋʋmd 1958, la toeen-kãseng bʋg n zĩnd rẽ tɛka?
7 Ad taoor kẽngr kãng sɩd yɩɩ vẽeneg yʋʋmd 1958 Niu York galʋ-tẽngẽ wã. Yɩɩ yʋʋm kãng la b sigl a Zeova Kaset rãmbã tigis-kãseng to sẽn da zɩ n zĩndã. Yɩɩ tẽn-tẽns tigis-kãseng ning gom-zug sẽn yaa: Wẽnnaam daabã. A tigma neb sẽn ta 253 922. Yʋʋmd 1970 wã tɩ b kõo sor ne b tʋʋmdã tẽns a tãab yell d sẽn gom tɩ loogã pʋsẽ, sã n pa babg ning sẽn da boond tɩ Alemayn delɛstã pʋgẽ. La Kaset rãmbã tʋʋmd ra ket n bee gɩdgr pʋgẽ Iniyõ Sovietik sẽn yaa tẽn-yalengã n paas tẽns nins sẽn teend-a n be tẽns lagem taab ning b sẽn boond tɩ Pakt de Varsovi wã pʋgẽ wã. Rũndã-rũndã, tẽn-kãens sẽn da yaa kominist rãmbã pʋsẽ, sẽn yɩɩd Kaset rãmb milyõ pʋɩ-sʋk n yaa koe-moondb be.
8. A Zeova sẽn ning a nin-buiidã barkã waa ne bi-bʋse, la bõe la Gũusg Gasgã yeel yʋʋmd 1950 rẽ wɛɛngẽ?
8 A Zeova Kaset rãmbã paama bark ne fɩɩgre, bala b kellame n “reng n bao Wẽnnaam soolem ne bãmb tɩrlem.” (Matɩe 6:33) A Ezai bãngr-gomdã zoe n paama pidsg sɩd-sɩda: “Ned ninga sẽn yaa bilf n yɩɩd a taaba na n lebga tusri. La ned ninga sẽn paooda na n lebga bu-kãsenga. Mam yaa Zusoaba. A wakata sã n ta, mam na n maan-a-la tao-tao.” (Ezai 60:22) Tɩ ket n pa sa ye. Yʋʋm kob-gĩnd ning sẽn loogã bala, Rĩungã moondb sõor paasa sẽn yɩɩd ne neb 1 750 000. B saka ne yamleoog n na n yɩ sull ning neb yʋʋmd 1950 Gũusg Gasgã sẽn gom a yell woto wã: “Masã Wẽnnaam segenda dũni paalg lagem-taaba . . . Neb sul-kãngã na n põsa Armagedõn, . . . bãmb n na n yɩ pipi rãmb ‘tẽn-paalgã’ pʋgẽ . . . , b sẽn sigl tɩ zems ne Wẽnnaam sor-wilgri, n mi siglgã na-kẽndɩ wã.” Sõs-kãng kẽnga taoor woto: “Bɩ d fãa lagem taab n ket n kẽngd taoore, n yaa dũni paalgã lagem-taaba.”
9. Wãn to la yɛl nins a Zeova Kaset rãmbã sẽn zãms yʋʋmã sẽn tong taabã pʋsẽ wã tall nafre?
9 La wakat kãng pʋgẽ, dũni paalgã lagem-taab kãng nebã sõor sẽn paasdã wa n bãnga b sẽn na n maan to-to yɛlã taoor sõma tɩ rẽ tar yõod wʋsg rũndã-rũndã, la tõe tɩ yɩ woto me Armagedõn poor lebs-n-lugl tʋʋmdã sasa. Wala makre, Kaset rãmbã zãmsa tigis-kãsems sẽn yaa bɛd siglgu. B zãmsa b sẽn na n kõ sõngr sabaab wakat tao-tao, la b zãms rot meeb tʋʋll-tʋʋlle. Rẽ fãa kɩtame tɩ neb wʋsg ges a Zeova Kaset rãmbã ne naneb wʋsg la waoogre.
Tagsa sẽn pa sɩdã remsgo
10, 11. Rɩk-y makr n wilg tagsa sẽn pa sɩd a Zeova Kaset rãmbã wɛɛngẽ sẽn paam remsg to-to.
10 Baasg zãnga, neb n dõt a Zeova Kaset rãmbã tɩ b paa poorẽ. Sẽn yaa woto wã yaa Kaset rãmbã sẽn tũud Biiblã yɛl kẽer pʋsẽ wã. Wala makre b sẽn pa reegd zɩɩm b yĩng pʋgẽ wã, b sẽn pa kẽesd b toog dũniyã yɛlẽ wã, b sẽn pa yũud sɩgaarã, la b sẽn tũud noy nins sẽn loe ne sõma ne wẽngã yĩnga. La zãma wã sɩngame n sakd n paasdẽ tɩ Kaset rãmbã tagsg zemsame. Wala makre, Poloyn logto-poak telefõna a Zeova Kaset rãmbã biru zĩigẽ n yeel tɩ yẽ ne a tʋmd-n-taasã rɩka lɛɛr dãmb wʋsg n wẽ no-koeemd zɩɩmã ningr zugu. Yaa Poloyn zʋrnall (Dziennik Zachodni) sõsg a yembr n wa ne no-koeemdã. Logto-poakã sak n deega woto: “Mam mengã sũur pa noom yɛsa, b sẽn tũnugd ne zɩɩmã wʋsg tɩbsgã pʋgẽ wã ye. Rɩlla yel-kãngã toeeme, la m sũur yaa noogo, ned sẽn wa ne gom-kãngã wã. M nongẽ lame n paam kɩbay n paas a zugu.”
11 Sõsg b sẽn kõ rɩẽ sasa, logtoeem-bɛd sẽn yit Erope, Etazĩni, Israɛll la Kanada sõsa bũmb nins sẽn tõe n sõng logtoɛɛmbã tɩ b tɩbs bãad dãmbã n pa tũnug ne zɩɩmã yelle. B goma tigis-kãng sasa sẽn zĩnd Sʋɩɩsã tɩ sẽn yaa lebend ne nebã sẽn nong n tagsd to-to wã, bãad dãmb nins sẽn deeg zɩɩmã sẽn kiid sõor yɩɩda sẽn pa reeg-b zɩɩmã. Kaset rãmb nins b sẽn tɩbs n pa tũnug ne zɩɩmã ra nong n yita logtor yir tao-tao n yɩɩd bãad dãmb nins sẽn deeg zɩɩmã. Sẽn paase, sẽn pa reeg-b zɩɩmã tɩbsg ligd yaa nana n yɩɩda.
12. Kõ-y makr sẽn wilgd nin-kãsems sẽn pẽg sard kãn-kãe ning a Zeova Kaset rãmbã sẽn dɩk n pa kẽes b toog politikã pʋgẽ wã.
12 Neb wʋsg me n gom n pẽg a Zeova Kaset rãmbã, b sẽn dɩk sard n pa kẽes b toog dũniyã yɛlẽ sẽn deng Dũni gill Zabr a Yiib-n-soabã la a poore, Nazi rãmbã sẽn da wa n maan zab-toaag ne-bã wẽndã. A Zeova Kaset rãmbã yiisa kasɛt video ning sẽn yaa La fermeté des Témoins de Jéhovah face à la persécution nazie (A Zeova Kaset rãmbã yalsa kãn-kãe Nazi rãmbã sẽn nams-bã taoore) n wilg-a Ravensbrück nams-toaagã zak Alemayn tẽngã pipi. Yɩɩ yʋʋmd 1996, sɩpaolg kiuug rasem a 6 la b wilg-a, tɩ kɩt tɩ nebã gom n pẽg-ba. Video a woto wilgr a to sɩngrẽ b sẽn maan Bergen-Belsen nams-toaagã zak pʋgẽ yʋʋmd 1998 tʋʋl-nif kiuug rasem 18, politik zãmsg zĩig sẽn be Lower Saxony wã taoor soab a Wolfgang Scheel sak n deega woto. “Pĩnd yell a ye sẽn tiisd neba ya a Zeova Kaset rãmbã sẽn zãgs Nasional Sosialismã ne pa-vigsd kãsengã, n yɩɩg kiris-neb egiliiz rãmbã zĩig sẽn zãrã . . . . Baa tõnd tagsg sẽn yaa to-to ne a Zeova Kaset rãmbã zãmsg la b yẽesmã b tũudmã pʋgẽ, b sẽn yals kãn-kãe Nazi rãmbã naam wakatã kɩtdame tɩ d tall waoogr ne-ba.”
13, 14. a) Gom-bʋs la ned b sẽn da pa tẽed t’a tõe n goma woto togs n sõng pipi kiris-nebã? b) Kõ-y makr ne goam b sẽn togs n pẽg Wẽnnaam nin-buiidã rũndã-rũndã.
13 Nin-bɛd bɩ bʋ-kaoodbã sull sã n togs goam nebã fãa taoor sẽn kõt a Zeova Kaset rãmbã bʋʋm yɛl sẽn wat ne no-koɛɛm zutu, tõe n kɩtame tɩ yãg-n-sãbs booge, la kɩtdame tɩ nebã tall tagsg sẽn yaa sõma n yɩɩd ne Kaset rãmbã. Naoor wʋsgo, rẽ kõt-b-la sor tɩ b gom ne neb nins sẽn da pa tol n dat n kelg pĩndã. Woto yĩngã nin-bɛd bɩ bʋ-kaoodb sul teelg a woto yaa sõma, la a Zeova Kaset rãmbã sɩd nanda rẽnda. Rẽ tẽegda tõnd bũmb ning sẽn zĩnd yʋʋm kob-yendẽ wã Zerizalɛmã. Sãnedrẽ wã sẽn yaa Zʋɩf rãmbã bʋ-kaoodb sull sẽn yaa kãseng n yɩɩdã sẽn da wa n dat n kʋ kiris-nebã, b sẽn da moond ne yẽesmã yĩnga, a Gamalyɛll sẽn yaa ‘karenga bʋ-kaood neba sẽn waoogda’ keooga bʋ-kaoodbã n yeel woto: “Bɩ y gũus ne bũmb ninga yãmb sẽn dat n maan ne dao kãensã. . . . Bɩ y bas daop kãense n da maan bãmb bũmb ye. La yɛɛsg kãngã walla tʋʋm kãng sã n yaa neb rẽnda a na n yɩɩ zaalem. La a sã n yaa Wẽnnaam dẽnda, yãmb ka tõe t’a yɩ zaalem ye; bɩ y gũus yãmb mense n da wa zab ne Wẽnnaam ye.”—Tʋʋma 5:33-39.
14 Wala a Gamalyɛlle, sẽn pa kaoos pʋgẽ, nin-kãsems n gom n dat tɩ b bas a Zeova Kaset rãmbã laafɩ tɩ b tũ b tũudmã. Wala makre, Lekoll (International Academy for Freedom of Religion and Belief) sẽn da yaa taoor-lʋɩt togsa woto: “B pa segd n kɩɩs tũudum dʋrwa rãmba, nebã sẽn pa rat n sak a tẽebã, bɩ a tẽebã sẽn pa wɛ wã yĩng ye.” La Leipzig inivɛrsite wã porfesɛɛr sẽn vaeesd tũudmã yɛl maana sʋkr sẽn tar pãnga. Alemayn goosneemã sẽn yãk neb sull tɩ b vaees b sẽn boond tɩ tũudum wilã wɛɛngẽ porfesɛɛrã sʋka woto: “Bõe yĩng tɩ b vaeesd tũudum kɩdsã bal n basd tũudum bɛd wala [Katolik egiliizã la portɛstã egiliizã]?” D sã n dat leokrã, bɩ d kelg Alemayn pĩnd nin-kãseng sẽn gʋls woto wã: “Sãmbg sẽn ka be, yaa egiliiz neb sẽn tar yẽesem sẽn loog nug n da gãe tẽng n tusd sull ning goosneemã sẽn yãkã.”
Ãnd sõngr la tõnd baood sẽn na yɩl n paam yolsgo?
15, 16. a) Bõe yĩng t’a Gamalyɛll sẽn maan bũmb ningã ra tar koaka? b) Wãn-wãn la neb a tãab a taab sẽn yaa nin-kãsems pãng tall koaka, sã n yaa ne maan bũmb n sõng a Zezi wã?
15 A Gamalyɛll sẽn togsã wilgdame bal tɩ tʋʋmd Wẽnnaam sẽn teend pa tõe n pa tõog ye. Sãmbg sẽn ka be, goam nins nin-kãngã sẽn togs karengã bʋ-kaoodbã sõnga pipi kiris-nebã, la b pa yĩm t’a Zezi sẽn yeel tɩ b na n namsa a karen-biisã me yaa sɩd ye. A Gamalyɛll sẽn maan bũmb ningã yalsa tũudmã taoor dãmb magb sẽn da rat n kʋ kiris-nebã, la rẽ pa kɩt tɩ namsgã sa ye, bala d karemda woto: “Bãmb saka a Gamalyɛll goama. La b boola tʋm-tʋmdbã n kɩt tɩ b pãb bãmb ne kalwaase n togs bãmb tɩ b ra le gom ne a Zezi yʋʋr ye. La b basa bãmba.”—Tʋʋma 5:40.
16 A Zezi sẽn da wa n be bʋʋd taoorã, a Põns Pɩlat sẽn pa yã taal a zugã makame n na n kɩt tɩ b bas a Zezi laafɩ. La a pa tõog ye. (Zã 18:38, 39; 19:4, 6, 12-16) Karengã bʋ-kaoodb neb a yiib menga, a Nikodɛm ne a Zozɛf sẽn yit Arimate sẽn da be a Zezi poorẽ wã ra pa tõe tɩ bʋ-kaoodbã sull pa maan a Zezi wẽng ye. (Luk 23:50-52; Zã 7:45-52; 19:38-40) Yolsg ning fãa ninsaalbã sẽn tõe n wa ne n sõng a Zeova nin-buiidã a tara koaka. Dũniyã na n ket n kisa kiris-neb hakɩkã, wa a sẽn kisg Kirist mengã. Ya a Zeova nengẽ bal la yolsg zãng-zãngã tõe n yi.—Tʋʋma 2:24.
17. Tags-bʋg sẽn zems la a Zeova Kaset rãmbã tara, la bõe yĩng tɩ woto pa kɩt tɩ b pa ket n moond koe-noogã?
17 A Zeova Kaset rãmbã pa belgd b mens ye, b miime tɩ neba na n ket n namsd-b-la b tẽebã yĩnga. Kɩɩsgã sẽn na n yaas sasa ning bal yaa b sẽn na n wa tõog a Sʋɩtãan siglgã zãng-zãnga. La baa ne nams-kãng sẽn pa be yamleoogã, a pa kɩtd tɩ Kaset rãmbã pa tʋm b tʋʋmdã sẽn yaa Rĩungã moonegã ye. Wẽnnaam sẽn be ne-bã, bõe yĩng masã tɩ b na n bas b tʋʋmdã tʋmbo? B geta b Taoor-lʋɩt a Zezi Kirist sẽn tar daoodã wa mak-sõngo.—Tʋʋma 5:17-21, 27-32.
18. Zu-loe-bʋg n ket n gũud a Zeova nin-buiidã, la b kɩsa sɩd ne bõe?
18 Hal a sɩngrẽ wã menga, tũudum hakɩkã sega kɩɩsg sẽn tar pãnga. B riga a Goog sẽn ya a Sʋɩtãanã saasẽ t’a sig tẽng zugu. Ka la bilfu a na n yika zabr zĩig fãa ne tũudum hakɩkã. La tũudum hakɩkã na n põsame. (Ezekiɛll 38:14-16) A Sʋɩtãan sor-wilgr pʋgẽ, “dũniyã tɛk fãa nanams” “na n zaba ne Pebilã, la Pebila na n tõogame; tɩ bõe, bãmb yaa zu-soben dãmb Zusoaba la rĩm dãmb Dĩma.” (Wilgri 16:14; 17:14) N-ye, tõnd Rĩma rebda tõogr zãng-zãng zĩigẽ, la ka la bilfu, a na n ‘baasa a tõogrã.’ Ad sɩd yaa zu-noogo, d sẽn kẽngd taoor ne-a, n miẽ tɩ ka la bilfu, ned ba a yembr pa na n leb n kɩɩs a Zeova balemdbã b sã n yetẽ tɩ: ‘Wẽnnaam bee ne tõndo’!—Rom dãmba 8:31; Filip rãmba 1:27, 28.
Y tõe n wilga a võor bɩ?
• Bõe la a Zeova maan n keng kiris-neb tigingã pãng Rĩungã luglg tɛka?
• Bõe la a Sʋɩtãan maan sẽn na yɩl n mak n kɩt tɩ Kirist ra baas a tõogrã, la baasa wãn to?
• Tags-bʋg sẽn kɩls tɩ zems la d segd n tall ne modgr nins neb nins sẽn pa Kaset rãmbã sẽn maand n dat n sõng-bã?
• Bõe la a Sʋɩtãan na n maan ka la bilfu, la a baasg na n yɩɩ bõe?
[Zãmsgã sogsgã]
[Foto, seb-neng 30]
Kaset rãmbã sẽn pa kẽes b toog Dũni gill Zabr a Yiib-n-soabã wakatã ket n wata ne pẽgr n kõt a Zeova