D bao Wẽnnaam sor-wilgr sẽn na yɩl n yãk kẽed-n-taaga
D bao Wẽnnaam sor-wilgr sẽn na yɩl n yãk kẽed-n-taaga
“Mam na n zãmsa foom n wilg foom sor ninga fo sẽn tog n tũ. Mam nif geta foom, la mam yaa fo sagenda.”—YƖƖL SÕAMYÃ 32:8.
1. Bõe n yaa tɩlae sẽn na yɩl tɩ kãadem yɩ sõma?
RAO n sõng a pag t’a tʋk a zɩɩbo, tɩ raoã pilg-a ne a montɛɛr tɩ b pasgd galʋ-tẽngã. Pagã ket n tʋka a zɩɩbã kawɩla a zugẽ wã n dũng a biiga. Yaa woto la b kẽnd sorã sẽn pid ne nebã sʋk tɩ zɩɩbã pa rokd pagã zug n lʋɩ, bɩ tɩ b pa lʋɩtẽ ye. Kom-bɩɩs a yiib n zao kut-weefo. A yembr n zao gaarã n tabda, t’a to wã zao kaadrã zug t’a nao wã teeg fursã n gãd weefã gɩdõ t’a pa lʋɩtẽ ye. B tũuda so-bãaneg sẽn pid ne lond n pa lʋɩtẽ ye. Pagã ne a sɩdã la kom-bɩɩs a yiibã fãa maanda woto nana-nana. La ãnd n tõe n maan woto t’a pa reng n segle, t’a pa paam tuud-n-taag sẽn tar tõogo, la sẽn yɩɩd fãa sor-wilgr la zãmsg sẽn zemse? Yaa woto me ne kãadem sẽn yaa sõma. Baasg zãnga, rẽ leb n bee ne f sẽn na n paam tũud-n-ta-sõngo, ne y sẽn na n naag taab n modge, sẽn yɩɩd fãa ne sagls sẽn yaa sõma. Sɩda, sor-wilgr sẽn zems yaa tɩlae.
2. a) Ãnd n lugl kãadem, la yaa raab bʋg yĩnga? b) Wãn to la b segl kãadem kẽere?
2 Yaa bũmb sẽn zems tɩ bi-bɩɩg bɩ bi-pugl sẽn pa kẽ kãadem tags kẽed-n-taaga, ned a sẽn na n vɩɩmd ne yelle. Wẽnnaam a Zeova sẽn lugl kãadmã tɛka, yaa bũmb sẽn zems vɩɩmã pʋgẽ ne pag la rao tɩ b kẽ kãadem. La pipi rao a Ãdem pa yãk a pagã ye. Ya a Zeova n kõ-a pagã ne nonglem. (Sɩngre 2:18-24) Pipi kẽed-n-taasã ra segd n fɩɩgame, tɩ tẽngã wa baas n pid ne ninsaalba. Pipi kãadem kãng poore, ra yaa bipuglã ne biriblã roagdb n baood pag bɩ sɩd n kõ-a. Wakat ninga, b baood n bãngame tɩ biriblã ne bipuglã rata taab n yaool n maan woto. (Sɩngre 21:21; 24:2-4, 58; 38:6; Zozue 15:16, 17) Tẽns kẽer la buud kẽer pʋsẽ, ket n yaa bipuglã ne biriblã roagdb n nong n baood pag bɩ sɩd n kõ-a, la rũndã-rũndã, neb wʋsg yãkda b kẽed-n-taas b toore.
3. Wãn to la ned tõe n yãk kẽed-n-taaga?
3 Wãn to la ned segd n yãk kẽed-n-taaga? Kẽer geta yĩngã neerem, bũmb ning sẽn be yamleoog ne b nif gesgã. A taab geta laogã, b baooda ned sẽn na n ges-b yell sõma, la sẽn na n pids b ratmã ne b tʋlsmã. La yel-kãensã b yen-yen tikr na n waa ne sũ-noog la zems-n-taar sẽn kõt sũ-noog bɩ? Yelbũna 31:30 yeta woto: “Pag tõe n nagame n belg neda. Neer loogdame. La yaa pag ninga sẽn zoet Zusoaba la b na n pẽge.” La bõn-kãseng la d pa segd n yĩm yel-kãngã pʋgẽ: Tẽeg-y a Zeova yelle, y sã n wa yãkd kẽed-n-taaga.
Sor-wilgr ne nonglem sẽn yit Wẽnnaam nengẽ
4. Sõng-bʋg la Wẽnnaam kõt kẽed-n-taag yãkr wɛɛngẽ?
4 Tõnd yĩngr Ba sẽn tar nonglem a Zeova kõo a Gomdã sẽn gʋlsã sẽn na yɩl n wilg tõnd sor yɛlã fãa pʋsẽ. A yeelame: “Mam yaa Zusoaba, yãmb Wẽnnaam. Mam zãmsda yãmb y meng sõngr yĩnga. Mam yãagda yãmb sor ninga yãmb sẽn tog n tu wã zugu.” (Ezai 48:17) Rẽnd pa lingr tɩ b yã tɩ Biiblã tara noy sẽn tar yõod wakat buud fãa, sẽn na yɩl n yãk kẽed-n-taag ye. A Zeova ratame tɩ kãadem kaoos la a tall sũ-noogo. Woto yĩnga, a kõo tõnd sõngr sẽn na yɩl tɩ d wʋm no-kãens la d tũ-ba. Pa woto la d gũud d Naandã sẽn tar nonglmã nengẽ sɩda?—Yɩɩl Sõamyã 19:9.
5. Bõe n yaa tɩlae sẽn na yɩl tɩ sũ-noog kell n zĩnd kãadem pʋgẽ?
5 A Zeova sẽn wa n lugl kãadmã, a ra ratame t’a kaoose. (Mark 10:6-12; 1 Korẽnt dãmba 7:10, 11) Yaa rẽ n so t’a ‘kis ned sẽn digd a paga,’ sã n pa “yoob yĩnga.” (Malaki 2:13-16; Matɩe 19:9) Woto yĩnga, kẽed-n-taag yãkrã bee bõn-kãsems nins sẽn yɩɩd d sẽn tõe n yãk yam n maana sʋka, tɩ d pa segd n ges-a faag-faag ye. Yɛl nins tõnd sẽn tõe n yãk yam n maana sʋka, pa wʋsg n tõe n wa ne sũ-noog bɩ sũ-sãoong wa kada ye. Baa ne yãkr sẽn yaa sõma sẽn tõe n wa ne bark n kõ ned a vɩɩm pʋgẽ la a kõ-a sũ-noogã, yãkr sẽn pa sõma tõe n waa ne sũ-sãams woo sũ-sãamse. (Yelbũna 21:19; 26:21) Sẽn na yɩl tɩ d kell n tall d sũ-noogã, tara yõod wʋsg tɩ d yãk ne yam, la d tʋlg n maan kãabg sẽn kaoosde, bala Wẽnnaam lugla kãadem sẽn na yɩl tɩ kẽed-n-taas sẽn zems taab lagem taab n tʋm n paam sũ-noogo.—Matɩe 19:6.
6. Bõe yĩng tɩ sẽn yɩɩd fãa, rasãmbã ne kompugli wã segd n gũusi, b sã n wa yãkd kẽed-n-taaga, la wãn to la b tõe n dɩk sard ne yam n yɩɩda?
6 Sẽn yɩɩd fãa, rasãmbã la kompugli wã sã n wa rat n yãk kẽed-n-taaga b segd n gũusame tɩ yĩngã neerem la pag ne rao lagengã tʋlsem sẽn tar pãngã ra wa golem b tagsgã ye. Sɩda, lagem-n-taar sẽn yẽbg bõn-kãensã zut bal tõe n looga tao-tao n wa lebg pa-nandem la kisgr menga. (2 Sãmwɛll 13:15) Sẽn yaa lebende, d tõe n bɩɩsa nonglem sẽn kaoosde, d sã n bao n bãng d kẽed-n-taagã, la d sã n wʋm d mengã võor sõma. D leb n segd n bãngame tɩ bũmb ning sẽn yaa sõma n yɩɩd ne tõndã pa bũmb ning tõnd sũurã sẽn da rat pipi wã ye. (Zeremi 17:9) Yaa rẽ yĩng la sẽn kɩt tɩ Wẽnnaam sor-wilgrã sẽn be Biiblã pʋgẽ wã tar yõod wʋsgã. Rẽ sõngda tõnd tɩ d bãng d sẽn tõe n maan to-to n dɩk sard sẽn yaa sõma n yɩɩd d vɩɩmã pʋgẽ. Yɩɩl gʋlsdã bilgda a Zeova t’a yet woto: “Mam na n zãmsa foom n wilg foom sor ninga fo sẽn tog n tũ. Mam nif geta foom, la mam yaa fo sagenda.” (Yɩɩl Sõamyã 32:8; Hebre dãmba 4:12) Yaa sɩd tɩ kãadmã tõe n pidsa ratem ning tõnd sẽn dog ne n dat tũud-n-taag sẽn nong-dã, la a tara zu-loees me, sẽn baood tɩ d yɩ ned sẽn bɩ la sẽn tar yam-welgre.
7. Bõe yĩng tɩ neb kẽer pa sakd sagls nins sẽn tik Biiblã zug kẽed-n-taag yãkr wɛɛngẽ wã, la manesem kãngã tõe n wa baasa ne bõe?
7 Yaa yam tʋʋmd tɩ d kelg kãadmã Lugend tagsg kẽed-n-taag yãkr pʋgẽ. La d tõeeme n tõdge, roagdb bɩ kiris-neb kãsem dãmbã sã n kõ saglg sẽn tik Biiblã zugu. D tõe n tagsame tɩ b pa wʋmd tõnd yɛlã võor sõma, la tʋlsem sẽn tar pãng wʋsg tõe n tusa tõnd tɩ d tũ d sũurã tʋlsem. La rẽ poore, d sã n sɩd wa yã ne d nifu, d tõeeme n maan m-bãngẽ, d sẽn pa tũ sagl-sõng b sẽn kõ-d d neerã yĩngã yĩnga. (Yelbũna 23:19; 28:26) D tõe n wa bee kãadem sẽn pa tar sũ-noog pʋgẽ, ne kamb yell gesg sẽn yaa toogo, bɩ d wa kẽ kãadem ne ned sẽn pa tẽed menga. Ad sɩd yaa kaeto, kãadmã sẽn da segd n kõ sũ-noog wʋsgã sã n wa wat ne sũ-sãams wʋsg woto!
Wẽn-zoeerã yaa bũmb sẽn tar yõod wʋsgo
8. Wãn to la wẽn-zoeer sõngd kãadem t’a kaoos la a wa ne sũ-noogo?
8 Yaa sɩd tɩ neb a yiibã sã n nong taaba sõngd n paasa kãadem pãnga. La noy kẽed-n-taasã fãa sẽn lagem n tũudẽ tara yõod meng n yɩɩda, sẽn na yɩl tɩ kãadem kaoos la a kõ sũ-noogo. Neb a yiibã fãa sã n lagem n nong Wẽnnaam a Zeova, wata ne loets sẽn tar pãng la sẽn wat ne zems-n-taar n yɩɩd sẽn keta fãa. (Koɛɛg Soaba 4:12) Kẽed-n-taas sã n dɩk b vɩɩmã n tik a Zeova baleng hakɩkã zugu, b paamda zems-n-taar tẽebã wɛɛngẽ, b tagsgã la sõma ne wẽngã noy wɛɛngẽ. B zãmsda Wẽnnaam Gomdã ne taaba, b pʋʋsda ne taaba, tɩ woto kɩtdẽ tɩ b tar yam a yembre. B yãagda taab n debd kiris-neb tigissẽ wã la b tʋmd ne taab koe-moonegẽ wã. Rẽ fãa sõngd n paasda tẽebã loets sẽn pẽnegd-b ne taabã pãnga. Sẽn yɩɩd fãa, rẽ kɩtdame tɩ b paam a Zeova barka.
9. Bõe la a Abrahaam maan-yã, sã n yaa ne yã pag n kõ a Izaakã wɛɛngẽ, la baasa wãn-to?
9 A wẽn-zoeerã yĩnga, zag-kãseng soab a Abrahaam baoome n na n ta Wẽnnaam yam, wakat sẽn wa n ta t’a segd n bao pag n kõ a biribl a Izaakã. A Abrahaam yeela a zakã sõgen woto: “Wẽen ne Zusoab a Wẽnnaam sẽn so yĩngri la dũniyã yʋʋre tɩ f ka na n bao pag Kana soolem kompugli wã sʋka tẽng ninga mam sẽn be wã n kõ mam biiga ye. La fo na n kẽnga mam meng tẽngẽ la mam buuda sʋka n tɩ bao pag n wa kõ mam biig a Izaak. . . . [a Zeova] na n tʋma malɛk t’a reng fo taoore tɩ f paam pag beenẽ n wa kõ m biigã.” A Rebeka sɩd wilgame t’a yaa pʋg-sõng tɛkẽ, hal t’a Izaak ra nong-a wʋsgo.—Sɩngre 24:3, 4, 7, 14-21, 67.
10. Zɩɩb bʋs sẽn tik Gʋlsg Sõamyã zut la b ning sɩdbã la pagbã taoore?
10 Tõnd sã n yaa kiris-neb sẽn pa kẽ kãadem, wẽn-zoeer tõe n sõnga tõnd tɩ d bao zʋg-sõma sẽn na n kɩt tɩ d pids yɛl nins Gʋlsg Sõamyã sẽn baood kãadem yĩngã. Bõn-kãensã tʋm-tʋmd a Poll sẽn sõdgã bee zɩɩb nins sɩdbã la pagbã sẽn segd n tʋkã sʋka: “Pagba, bɩ y sak y sɩdba wa yãmb sẽn sakd Zusoabã . . . Raopa, bɩ y nong y pagba wa Kirist sẽn nong bãmb tẽedbã n kõ bãmb meng bãmb yĩngã . . . Yaa woto raopa tog n nonga b pagb wa bãmb mens yĩnsi . . . Baasgo, bɩ yãmb ned kam fãa nong a pag wa a menga, la bɩ pag waoog a sɩda.” (Efɛɛz rãmba 5:22-33) Wa d sẽn tõe n yã wã, goam nins vʋʋsem sõng sẽn vẽneg a Poll t’a gʋlsã wilgda sõma-sõma tɩ nonglem la waoogr yaa tɩlae. Sagl-kãngã tũub baoodame tɩ d zoe a Zeova ne waoogre. A baoodame tɩ f sak ne f sũur fãa n pids f pʋlengã f sẽn maan ne f to wã, noog la toog wakate. Kiris-neb nins sẽn dat n kẽ kãadmã segd n tõogame n pids zɩɩb kãngã.
D bãng wakat ning d sẽn tõe n kẽ kãadem
11. a) Gʋlsg Sõamyã kõo sagl-bʋg wakat ning d sẽn tõe n kẽ kãadmã wɛɛngẽ? b) Mak bʋg n wilgd tɩ yaa yam bũmb tɩ d tũ Biiblã saglg ning sẽn be 1 Korẽnt dãmba 7:36 pʋgẽ wã?
11 Bãng wakat ning d sẽn tõe n kẽ kãadem tara yõod wʋsgo. Sẽn mik tɩ rẽ bee ne ned fãa wã, Gʋlsg Sõamyã pa yãk yʋʋm takɩ ye. La a sɩd wilgdame tɩ sẽn são yaa d sẽn na n gũ n wa loog “bi-bɩɩlmã nifu,” sasa ning pag ne rao lageng tʋlsmã sẽn tar pãngã sẽn tõe n kɩt tɩ d pa tags tɩrgã. (1 Korẽnt dãmba 7:36, NW ) “M sẽn da ne m zo-rãmbã sẽn maand rolsem tũud-n-taar la b kẽed kãadmã, tɩ bãmb wʋsg ra tar yʋʋm piig la zak-zakã, ra yaa sasa kãng la sagl-kãngã tũub ra yaa toog ne maam.” Woto la a Michelle yeel-yã. “La m bãngame tɩ saglgã ra yita a Zeova nengẽ, la a yeta tõnd bũmb ning sẽn na n naf-dã bala. M sẽn gũ n yaool n wa kẽ kãadmã, m da tõogame n get m zems-n-taarã ne a Zeova wã yell sõma-sõma, la m paamd minim vɩɩmã pʋgẽ. Woto yaool n yaa bũmb f sẽn pa tõe n maane, f sã n wa tar yʋʋm piig la zak ye. Yʋʋm a wãn poore, m da segla sõma n yɩɩd n na n tʋk zɩɩb la m mao ne zu-loees nins sẽn wat kãadem pʋgẽ wã.”
12. Bõe yĩng tɩ yaa yam tʋʋmd tɩ d ra yãg n kẽ kãadem tɩ d ket n yaa bi-bɩɩg wʋsgo?
12 Neb nins sẽn yɩt yãg-yãg n kẽ kãadem tɩ b ket n yaa kom-bɩɩs wʋsgã nong n yãame tɩ b ratmã la b tʋlsmã toeemdame, b sã n bɩtẽ. Rẽ poore, b mikdame tɩ yɛl nins b sẽn da reng n yã tɩ bee yamleoogã ye pa tar yõod wʋsg ye. Kiris-ned a ye sẽn yaa bi-bɩɩg ra rata ne a sũur fãa n kẽ kãadem, a sẽn da wa n tar yʋʋm 16. A yaab poakã ne a ma wã fãa ra kẽe kãadem b sẽn da wa n tar yʋʋm 16. Bi-bɩɩg a sẽn da rat sẽn zãgs t’a kõn kẽ kãadem ne-a sasa kãngã wã, a yãka ned a to sẽn da rat n maan woto. La kaoosg zugẽ a vɩɩmã pʋgẽ, a maana sũ-sãoong wʋsg a sẽn yãg n kẽ kãadmã.
13. Bõe n nong n paamd neb nins sẽn yãgd n kẽ kãadmã?
13 D sã n wa rat n kẽ kãadem, tara yõod tɩ d tall tagsg sẽn bɩ ne rẽ sẽn baood bũmb ninsã. F sã n yãg n kẽ kãadem, tõe n waa ne zu-loees wʋsg kom-bɩɩs sẽn pa segl sõma n na n mao ne ye. B tõeeme n pa tar minim la bɩʋʋng ning sẽn yaa tɩlae sẽn na yɩl n mao ne yɩɩr nins kãadmã la kambã wubr sẽn wat ne wã ye. D tõe n kẽe kãadem, d sã n wa bɩ n ta, la d bɩ tagsgã la tẽebã wɛɛngẽ n na n kẽ kãadem sẽn kaoosd pʋgẽ.
14. Bõe la d segd n maan sẽn na yɩl n welg yɛl nins sẽn wat ne yɩɩrã kãadem pʋgẽ?
14 A Poll gʋls n wilgame tɩ neb nins sẽn kẽ kãadmã “na n paama toog ne yĩnga yelle.” (1 Korẽnt dãmba 7:28) Yɛl n na n wa, bala yaa neb a yiib manesem sẽn yaa toor ne taaba, b tagsa wã pa na n yɩ yembr ye. Ninsaal sẽn pa zems zãngã yĩnga, tõe n yɩɩ toog tɩ d maan tʋʋmd ning Gʋlsg Sõamyã sẽn yeel tɩ d segd n maana kãadem pʋgẽ wã. (1 Korẽnt dãmba 11:3; Kolos rãmba 3:18, 19; Tɩt 2:4, 5; 1 Pɩɛɛr 3:1, 2, 7) Rẽnda f yɩ ned sẽn bɩ la sẽn kɩls tɩ zems tẽebã wɛɛngẽ, sẽn na yɩl n bao Wẽnnaam sor-wilgr la d tũ-a, n welg yɛl nins sẽn wat ne yɩɩrã nonglem pʋgẽ.
15. Sõng bʋg la roagdbã tõe n kõ b kambã tɩ b segl b mens kãadem yĩnga? Rɩk-y makre.
15 Roagdbã tõe n segla b kambã kãadem yĩnga, b sẽn na n sõng-b tɩ b wʋm Wẽnnaam sor-wilgrã tũub yõodo. Roagdbã sã n dɩk Gʋlsg Sõamyã la kiris-neb sɛbã n tʋm ne yam, b tõe n sõnga b kambã tɩ b bãnge, bãmb mensa la neb nins b sẽn dat n kẽ kãadem ne wã sã n seglame n na n pids kãadem pʋlengã. * Yʋʋm piig la a nii bipugl a Blossom tagsame t’a ra nonga bi-bɩɩg a tigingã pʋgẽ. Bi-bɩɩgã ra yaa so-pakda, t’a ra rat n kẽ kãadem ne-a. La bipuglã roagdb yeel-a lame t’a gũ yʋʋmde, bala b ra tagsdame tɩ b bipuglã ra yaa bi-bɩɩg wʋsgo. Kaoosg poore, a Blossom gʋlsa woto: “M tara mi-beoog wʋsg ne m sẽn kelg sagl-kãngã sẽn pukd yamã. Yʋʋmdã pʋgẽ, m bɩɩme n sɩng n getẽ tɩ bi-bɩɩg kãngã ra pa tar zʋgd nins sẽn tõe n kɩt t’a yɩ kẽed-n-ta sõngã ye. A wa n baas n basa siglgã. M põsa bũmb sẽn da na n wa ne yel-beed m vɩɩmã pʋgẽ. Ad sɩd yaa bõn-sõngo, d sã n tar roagdb sẽn tar yam tɩ f tõe n dell b tagsgo!”
Kẽ-y kãadem ne ‘ned sẽn tũud Zusoaba bala’
16. a) Wãn to la kiris-nebã tõe n paam makre, sã n yaa ne kẽ kãadem ‘ne ned sẽn tũud Zusoaba’ wɛɛngẽ? b) Kiris-ned sã n wa paam makr n dat n kẽ kãadem ne ned sẽn pa tẽeda, bõe yell la a segd n tagse?
16 A Zeova sẽn kõ kiris-nebã sor-wilgr ningã yaa vẽeneg wʋsgo: ‘A tog n yɩɩ ned sẽn tũud Zusoaba bala.’ (1 Korẽnt dãmba 7:39) Roagdb sẽn yaa kiris-nebã ne b kambã tõe n paama makr zĩ-kãngã wɛɛngẽ. Wãn to? Kom-bɩɩsã tõe n dat n kẽe kãadem, tɩ yaa wa b pa tõe yã kẽed-n-taag tigingã pʋgẽ ye. Bɩ tõe n wõnda woto. Tõeeme tɩ rapa sõor yaa bilf n yɩɩd pagbã babg ning pʋgẽ, bɩ tõeeme tɩ ned pa be sẽn zems ne-d babgẽ wã ye. Bi-bɩɩg sẽn pa tigingã ned sẽn dɩk a meng n kõ tõeeme n wilgd ratem ne kiris-nin-poak sẽn yaa bipugla (bɩ tõe tɩ yaa bipugl n maand woto), tɩ rẽ tõe n kɩt tɩ f wa rat n kɩɩs noy nins a Zeova sẽn yãkã. Yɛl a woto pʋsẽ, yɩtẽ-la sõma tɩ d tags a Abrahaam makrã zugu. Manesem a yembr pʋgẽ a sẽn kell n tall zems-n-taar sõma ne Wẽnnaam ya a sẽn kɩt t’a biribl a Izaak kẽ kãadem ne a Zeova balemd hakɩkã. A Izaak me maana woto ne a biribl a Zakoobe. Rẽ waa ne modgr n kõ neb nins fãa yellã sẽn da pakã, la yɩɩ bũmb sẽn ta Wẽnnaam yam, la waa ne a barka.—Sɩngre 28:1-4.
17. Bõe yĩng tɩ kãadem kõom ne ned sẽn pa tẽed tõe n wa baas ne yel-beedo, la bʋʋm kãseng sẽn yɩɩd bʋg yĩng la d segd n kẽ kãadem ‘ne ned sẽn tũud Zusoaba bala’?
17 Kẽed-n-taag sẽn pa tẽed sẽn wat n lebg kiris-ned pa bũmb sẽn wɛ ye. Baasg zãnga, kãadem b sẽn maan ne neb sẽn pa tẽedb baasa ne yel-beed naoor wʋsgo. Neb nins sẽn kẽ kãadem ne neb nins sẽn pa zems ne-bã pa tar tẽeb a yembre, noy bɩ bõn-datɩ a yembr ye. (2 Korẽnt dãmba 6:14) Rẽ tõe n sãama yẽsgã la kãadmã sũ-noogo. Wala makre, kiris-nin-poak sũur da sãamda wʋsgo, a sã n wa yi tigisgã sẽn kengd tẽebã n kuli, n pa tõe n sõs tẽebã yɛl zut ne a kẽed-n-taagã sẽn pa tẽedã. Yaa sɩd tɩ sẽn tar yõod n yɩɩda, ‘kẽ kãadem ne ned sẽn tũud Zusoaba’ wilgdame tɩ f tara kɩs-sɩd ne a Zeova. D sã n tũ Wẽnnaamã Gomde, d sũyã pa ning-d taal ye, bala d maanda sẽn “noom bãmba.”—1 Zã 3:21, 22.
18. D sã n wa tagsd kãadem yelle, yel-kãsems bʋs la d segd n gese, la bõe yĩnga?
18 D sã n wa rat n kẽ kãadem, bũmb nins sẽn segd n pak tõnd pipi yaa ned ning d sẽn dat n kẽ kãadem ne wã zʋg sõma la a tẽebã. A sã n tar kiris-ned zʋgdo, n nong Wẽnnaam la a sakd-a zãnga, tara yõod wʋsg n yɩɩd yĩngã neerem. Yaa neb nins sẽn dat n yɩ kẽed-n-taas sẽn nand la sẽn pidsd b zɩɩb ning sẽn yaa paam tẽeb sẽn tar pãngã n tat Wẽnnaam yam. La pãn-kãseng sẽn yɩɩdã kãadem sẽn tõe n wa paam yaa kẽed-n-taas a yiibã sẽn na n nong b Naandã, la b sakd a sor-wilgrã zãnga. Sã n yaa woto, waoogda a Zeova, la kãadmã yẽbgda tẽebã yɛl zut kãn-kãe, tɩ rẽ na n sõng n kɩt tɩ kãadem kaoose.
[Tẽngr note]
^ sull 15 Ges yʋʋmd 1999 Gũusg Gasgã (farende), wao-fugdg kiuug rasem 15, seb-neng a 4-8.
Wãn to la y na n leokẽ?
• Bõe yĩng tɩ Wẽnnaam sor-wilgr yaa tɩlae, d sã n wa rat n yãk kẽed-n-taag sẽn yaa sõma?
• Wãn to la wẽn-zoeer sõngd n keng kãadem loetse?
• Wãn to la roagdbã tõe n segl kambã kãadem yĩnga?
• Bõe yĩng tɩ tar yõod tɩ d kẽ kãadem ‘ne ned sẽn tũud Zusoaba bala’?
[Zãmsgã sogsgã]
[Foto rãmba, seb-neng 13]
D sã n tũ Wẽnnaam saglsã kẽed-n-taag yãkr pʋgẽ, tõe n waa ne sũ-noog wʋsgo
[Foto rãmba, seb-neng 16]
Kẽ kãadem ‘ne ned sẽn tũud Zusoaba bal’ kõta bark wʋsgo