D lugl zak sẽn tar pãng tẽebã wɛɛngẽ
D lugl zak sẽn tar pãng tẽebã wɛɛngẽ
“Bɩ y wub bãmb ne [a Zeova, NW ] saglgo la zãmsgo.”—EFƐƐZ RÃMBA 6:4.
1. Wẽnnaam daab ne zak ra yaa bõe, la sẽn yaa lebende, bõe n maane?
“ROG-Y la y wek n pid dũniyã.” (Sɩngre 1:28, Sebr Sõngo) Wẽnnaam a Zeova lugla zaka, a sẽn yeel a Ãdem ne a Hawa woto wã. (Efɛɛz rãmba 3:14, 15, NW ) Pipi raoã ne a pagã tagsg pʋgẽ b ra tõe n deng n yãa tẽngã sẽn pid ne b kamb la b yagense, neb sẽn zems zãng sẽn vɩ ne sũ-noog tẽng zug arzãnẽ, la sẽn balemd b Naand Kãsengã zems-n-taar pʋgẽ. La a Ãdem ne a Hawa lʋɩɩ yel-wẽnd pʋgẽ, tɩ tẽngã pa pid ne nin-tɩrs bɩ wẽn-zoɛtb ye. (Rom dãmba 5:12) Sẽn yaa lebende, zak pʋgẽ vɩɩmã sãama tao-tao, n pid ne kisgri, nen-kɛglem la ‘nonglem kaalmã’, sẽn yɩɩd fãa ‘yaoolem wakat’ kãensã.—2 Tɩmote 3:1-5; Sɩngre 4:8, 23; 6:5, 11, 12.
2. Bõe la a Ãdem kambã la a yagensã ra tõe n maane, la bõe n da yaa tɩlae sẽn na yɩl n lugl zak sẽn tar pãng tẽebã wɛɛngẽ?
2 B naana a Ãdem ne a Hawa Wẽnnaam wõnego. Baa ne a Ãdem sẽn lebg yel-wẽn-maandã, a Zeova basame t’a paam kamba. (Sɩngre 1:27; 5:1-4) Wala b ba wã, a Ãdem kambã la a yagensã ra tõe n bãnga sẽn yaa neer n tũ la b bãng sẽn yaa wẽng n lak b mens ne. B ra tõe n paama zãmsg ne b sẽn da tõe n balem b Naandã to-to, la b bãng tɩ tara yõod wʋsg tɩ b nong-a ne b sũyã fãa, ne b sɩɩgã fãa, ne b yamã fãa la ne b pãngã fãa. (Mark 12:30; Zã 4:24; Zak 1:27) Sẽn paase, b ra tõe n paama zãmsg n ‘maan sẽn yaa tɩrga, n wilg nonglem la b sik b mens n sak Wẽnnaam bala.’ (Miise 6:8) La b sẽn da yaa yel-wẽn-maandbã, b ra segd n modga neer n lugl zak sẽn tar pãng tẽebã wɛɛngẽ.
Bao-y sẽkã
3. Wãn to la roagdbã tõe n ‘bao sẽk’ n wub kamb tɩ b lebg kiris-neba?
3 Wakat kãensã sẽn yaa toodã sasa, modgr wʋsg la d segd n maan sẽn na yɩl tɩ kambã ‘nong a Zeova’ la b sɩd ‘kisg wẽnga.’ (Yɩɩl Sõamyã 97:10) Roagdb sẽn tar yam na n ‘baoo sẽk’ n mao ne yel-tood kãensã. (Efɛɛz rãmba 5:15, 16, NW, 17) Yãmb sã n yaa roagda, wãn to la y tõe n maan woto? Reng-y n yãk yɛl nins sẽn tar yõod n yɩɩdã, “bũmb nins sẽn yaa sõama n yɩɩda,” tɩ y kambã zãmsg la b wilgr be sʋkã. (Filip rãmba 1:10, 11) Yiib-n-soaba, ra gĩd-y y vɩɩmã ye. Tõe tɩ y segdame n ning tʋʋm nins sẽn sɩd pa tɩlaeyã kɛɛnga. Bɩ tõe tɩ y segd n basa paoong nins sẽn pa tɩlae tɩ y rɩkd sẽk n get b yellã. Y sẽn yaa roagd sẽn yaa kiris-nedã, y pa na n tol n maan m-bãngẽ, y sẽn maan modgr nins sẽn yaa tɩlae sẽn na yɩl n wub kamb sẽn yaa wẽn-zoɛtbã ye.—Yelbũna 29:15, 17.
4. Wãn to la zak tõe n paam zems-n-taare?
4 Y sã n dɩk sẽk n zĩnd ne y kambã, sẽn yɩɩd fãa sã n mikame tɩ rẽ tika tẽebã yɛl zutu, yaa modgr sẽn pa zaalem yĩng ye. Rẽ leb n bee manesem nins sẽn yaa sõma n yɩɩd sẽn kɩtd tɩ zak kell n tall zems-n-taarã sʋka. La ra bas-y yɛlã yaar ye. Yãk-y wakat y sẽn n na n zĩnd ne taaba. Woto pa rat n yeel tɩ y bee ro-yend pʋgẽ bal tɩ ned fãa tʋmd a tʋʋmd toor ye. Yaa yãmb mengã sẽn na n ges kambã yell la b yidgd sõma. Y segdame n tall nonglem ne-b la y ges b yell wʋsgo. Nand meng tɩ b rɩk sard n dog kamba, kẽed-n-taasã segd n tagsa zɩɩb kãngã sẽn tar yõodã zug n pa reem ye. (Luk 14:28) Rẽ, b pa na n ges kambã wubr wala tʋʋm toog ye. Wall tɩ yɩ woto, b na n ges-a-la wala zu-noog sẽn be barka.—Sɩngre 33:5; Yɩɩl Sõamyã 127:3.
Kõ-y zãmsg ne no-goam la mak-sõngo
5. a) D sã n dat n zãms kambã tɩ b nong a Zeova, bõe la d segd n deng n maane? b) Sagl-bʋg la b kõ roagdbã Tõodo 6:5-7 pʋgẽ?
5 Y sã n dat n zãms y kambã tɩ b nong a Zeova, rẽnda yãmb mengã reng n nong-a. Nonglem sẽn tar pãng ne Wẽnnaam na n tus-y lame tɩ y tũ a noyã fãa ne kɩs-sɩda. Kambã ‘wubr ne a Zeova saglg la zãmsg’ bee rẽ pʋgẽ. (Efɛɛz rãmba 6:4) Wẽnnaam sagenda roagdbã tɩ b kõ b kambã mak-sõngo, tɩ b sõs ne-b la b zãms-ba. Tõodo 6:5-7 yetame: “Bɩ y nong Zusoab a [Zeova, NW ] Wẽnnaam ne y sũur fãa la ne yam fãa la ne y pãnga fãa. Bɩ y sak tɩ b sẽn togs yãmb goam nins rũnda wã pa y sũyã pʋsẽ. Rɩk-a n zãms f kamba neere. Fo sã n zĩ f zak pʋgẽ, bɩ f gomd a yelle, la f sã n kẽnd sor zug me, bɩ f gomd a yelle. Gom a yell f gãandgo la f yikr wakate.” Y sã n sagend-b wakat fãa la y togsd-b n yɩlemdẽ, y tõeeme n zãms y kambã Wẽnnaam noyã tɩ kẽ b sũyã. Woto, yãmb kambã nee nonglem ning y sẽn tar ne a Zeova wã, tɩ rẽ na n tus bãmb me tɩ b tall zood sõma-sõma ne-a.—Yelbũna 20:7.
6. Wãn to la roagdbã tõe n tũnug ne mak-sõng b sẽn kõtã n sõng b kambã?
6 Kambã nongame n deeg zãmsgo. B yaa neb sẽn kelgd sõma la b get sõma, la b yɩta tao-tao n dɩk yãmb togs-n-taare. B sã n neẽ tɩ y pa laog nonga, rẽ sõngd-b lame tɩ b zãms a Zezi saglgã tũubu. Y zãmsd-b lame tɩ b ra maan yɩɩr ne laogã, la sẽn yaa lebende, b “reng n bao Wẽnnaam soolem.” (Matɩe 6:25-33) Sõs-y sõsg sẽn yaa sõma, sẽn kengd tẽeb sẽn tik Biiblã sɩda, Wẽnnaam tigingã, la kãsem dãmbã b sẽn yãkã zutu. Y sã n maan woto y zãmsda y kambã tɩ b tall waoogr ne a Zeova, la tɩ b tall naneb ne segls nins a sẽn maand tẽebã wɛɛngẽ wã. Sẽn mik tɩ kambã yɩta tao-tao n yã yɛl sẽn pa zemsã, zãmsg ne noor goamã segd n naaga ne manesem la tagsg sẽn wilgd tɩ yãmb mengã nanda tẽebã yɛl wʋsgo. Ad sɩd yaa bark menga, roagdbã sã n neẽ tɩ b mak-sõngã kɩtdame tɩ b kamba nong a Zeova ne b sũyã fãa!—Yelbũna 23:24, 25.
7, 8. Mak-bʋg n wilgd zãms kambã pĩnd-pĩndã yõodo, la zãmsgã sã n tõoge, yaa ãnd maasem yĩnga?
7 Makr sẽn yit Venezuela n wilgd tɩ kambã zãmsg b yãadem wakat tara yõodo. (2 Tɩmote 3:15) Yaa kẽed-n-taas sẽn yaa kom-bɩɩse, a Félix ne a Mayerlin. B yaa so-pakdba. B biribl a Felito sẽn dogã, b ra rata ne b sũy fãa n maan b sẽn tõe fãa n wub-a t’a yɩ a Zeova balemda. A Mayerlin sɩngame n karemd Mam Biibl kɩbay sebre a Zeova Kaset rãmbã sẽn yiisã. Pĩnd-pĩnda, yaa wa a Felito ra tõe n bãnga a Moiizi, n paas neb a taab yell b sẽn gom seb-kãng pʋgẽ.
8 A sẽn da ket n yaa bi-kɩdga, a Felito sɩngame n kõt kasetã a toore. A lebga Rĩungã koe-moond wa a sẽn da tʋllã, n wa reeg lisgu. Tarẽ-n-tarẽ, a Felito lebga wakat fãa so-pakda. A roagdbã yeta woto: “D sẽn da ne d biriblã sẽn da bɩt tẽebã wɛɛngẽ wã, d ra yetame tɩ ra ya a Zeova maasem yĩnga, la a zãmsgã yĩnga.”
Sõng-y kambã tɩ b bɩ tẽebã wɛɛngẽ
9. Bõe yĩng tɩ d segd n tall mi-beoog ne tẽebã zãmsg d sẽn paamd tɩ yit tʋmd-tʋmd sẽn tũud sɩd la sẽn tar yamã sull nengẽ wã?
9 Zʋrno rãmb ka tɛka, sɛb kobse, la Ẽntɛrnetã zĩis tusa n kõt sagls ne b sẽn na n wub kamb to-to. Naoor wʋsgo, “zãmsgã kɩɩsda taaba. Sẽn yuusd yam n yɩɩdã yaa zãmsg f sẽn tagsd tɩ f tõe n talla bas-yard ne sẽn na n wa baas n yaa wẽng fasɩ.” Woto la zʋrnall (Newsweek) sẽn gomd kambã yell togs-yã. Ad d sɩd tara mi-beoog ne a Zeova, a sẽn kõ zagsã zãmsg wʋsg la tẽeb barkã! Yãmb rɩta segls nins b sẽn tũnugd ne tʋm-tʋmd sẽn tũud sɩd la sẽn tar yamã n maandẽ wã nafa tɩ pid bɩ?—Matɩe 24:45-47.
10. Wãn to la zak pʋgẽ Biibl zãmsg sẽn yaa sõma nafd roagdbã ne kambã fãa?
10 Bũmb a yembr sẽn yaa tɩlae n tar yõod wʋsg yaa Biiblã zãmsg wakat fãa zakã pʋgẽ, b sẽn maand tɩ be yamleoogo. Sẽn na yɩl t’a kõ zãmsgo, n tall yamleoog la a keng raoodo, rẽndame tɩ seglg sõma zĩndi. Roagdbã sã n kɩt tɩ b kambã gome, b tõe n bãnga sẽn be b sũyẽ wã la b yamẽ wã. Manesem a yembr b sẽn na n tũnug ne n bãng zak pʋgẽ zãmsgã sã n yaa sõma yaa b sẽn na n gese, zakã neb fãa sã n gũuda zãmsgã ne yãgbo.
11. a) Bõn-datɩ bʋs la roagdbã tõe n sõng b kambã tɩ b yãke? b) Zapõ bipugl sẽn bao n na n ta a bõn-datlã baasa ne bõe?
11 Bõn-datɩ sẽn tik Gʋlsg Sõamyã zut me sõngdame n kɩt tɩ zak tall pãng tẽebã wɛɛngẽ, la roagdbã segd n sõnga b kambã tɩ b yãk bõn-datɩ kãensa. Biiblã kareng daar fãa, lebg koe-moond sẽn moond kiuug fãa, la bɩ n wa rɩk f meng n kõ Wẽnnaam, la lisgã bee bõn-datɩ sẽn zemsã sʋka. Yɩ wakat fãa sõgen wala so-pakda, Betɛll ned bɩ misioneer tõe n yɩɩ bõn-datɩ a taaba. A sẽn da wa n be lekoll pirmeere, Zapõ bipugl yʋʋr sẽn boond t’a Ayumi yãka bõn-datl n na n kõ a karen-doogã ned fãa kaseto. Sẽn na yɩl n nek a karen-saambã la a karen-bi-taasã ratem, a kosa sor n paam n na n bas Biiblã sɛb a wãn karen-doogã sɛb bĩngr zĩigẽ. Rẽ kɩtame t’a maan Biibl zãms rãmb a 13, yʋʋm a yoobã a sẽn maan lekoll pirmeerã sasa. Biibl zãms rãmb kãens ned a yembr la neb a taab sẽn be nin-kãng zakẽ wã lebga kiris-neb sẽn deeg lisgu.
12. Wãn to la kambã tõe n dɩ kiris-neb tigissã nafa n yɩɩda?
12 Tigissã kẽngr wakat fãa me yaa tɩlae sẽn na yɩl n tall tẽeb sẽn tar pãnga. Tʋm-tʋmd a Poll sagla a tẽed-n-taasã tɩ b “ra bas taab tiging wa neb kẽer sẽn maanda ye.” Bɩ rẽ ra yɩ d minung ye, bala kom-bɩɩs la nin-kẽemb fãa rɩta kiris-neb tigissẽ wã kẽngr wakat fãa wã nafa. (Hebre dãmba 10:24, 25; Tõodo 31:12) B segd n zãmsa kambã tɩ b kelg neere. Segl-m-meng tigissã yĩng me tara yõod wʋsgo, bala yaa d sẽn na n kẽesd d meng n kõt leoor tigisgẽ wã la d rɩt a nafr n yɩɩda. Yaa sɩda, biig tõe n sɩngame n togsd goam a wãna, bɩ n karem sull bab-kɩdga. La sẽn be nafr n yɩɩd yaa kambã sẽn na n paam zãmsg n bao leoor n togs-b ne b mens gom-biisi. Roagdba, yãmb kõta mak-sõng n kõt leoor sẽn tar võor sõma wakat fãa bɩ? Leb n tara yõod ne zakã ned fãa t’a paam Biibli, yɩɩl sebre, la sebr ning b sẽn tũnugd ne n sõsd Biiblã zugã.
13, 14. a) Bõe yĩng tɩ roagdbã segd n tʋm ne b kambã koe-moonegã pʋgẽ? b) Bõe n na n sõng n kɩt tɩ koe-moonegã tall nafr la sũ-noog ne kambã?
13 Roagdbã na n sõnga b kambã tɩ b tʋm sõma ne b bi-bɩɩlmã pãnga n sõgen a Zeova, n sõng-b tɩ b ges koe-moonegã wa bũmb sẽn tar yõod b vɩɩmã pʋgẽ. (Hebre dãmba 13:15) Yaa roagdbã sẽn na n moon ne b kambã la b na n sɩd sõng-b tɩ b paam zãmsg ning b sẽn datã, sẽn na yɩl n lebg koe-moondb “sẽn kõn zoe yãnd ye, la sẽn togsd sɩd koɛɛga tɩrg bala.” (2 Tɩmote 2:15) Rẽ, yaa wãn to ne yãmba? Yãmb sã n yaa roagda, y sõngda y kambã tɩ b segl koe-moonegã yĩng bɩ? Y sã n maan woto, koe-moonegã na n talla yamleoogo, n tall võor ne-ba, la a wom biisi.
14 Bõe yĩng tɩ yaa bũmb sẽn be nafr ne roagdbã la b kambã tɩ b tʋm ne taab koe-moonegã pʋgẽ? Woto, kambã tõeeme n yã b roagdbã mak-sõng n dɩk b togs-n-taare. Wakat kãng pʋgẽ me, roagdbã tõe n bãnga b kambã sẽn tagsd to-to, b manesmã la b tõogã sẽn ta zĩig ninga. Modg-y n peeg y kambã tɩ b yãag-y koe-moonegã nens toɛ-toɛ pʋsẽ. Sã n tõe bɩ y kɩt tɩ biig fãa paam a koe-mooneg korgo, la y zãms-a t’a zã a korgã t’a sak gesgo. B sã n kõt kambã zãmsg la b kengd b raood wakat fãa, tõe n kɩtame tɩ b tall naneb ne koe-moonegã, n ges-a wa bũmb b sẽn tũnugd ne n wilg b nonglem ne Wẽnnaam la ne b to.—Matɩe 22:37-39; 28:19, 20.
Kell-y n tall zakã tẽebo
15. Sẽn mik tɩ zakã tẽeb tallg tara yõod wʋsg woto wã, ne manesem kẽer bʋs la d tõe n maan woto?
15 Kell n tall zakã tẽeb tara yõod wʋsgo. (Yɩɩl Sõamyã 119:93) Bũmb a ye y sẽn tõe n tũnug ne n maan woto yaa y sẽn na n sõs tẽebã yɛl zut ne y zakã, sor sẽn kõ fãa. Yãmb sõsda Biiblã daar verse wã zug ne-b bɩ? Yãmb minim n togsda yɛl y sẽn vɩɩmd koe-moonegã pʋgẽ bɩ yɛl y sẽn karem yaoolem Gũusg Gasgã la Réveillez-vous! wã pʋgẽ, y sã n wa “kẽnd sor zug” bɩ? Yãmb pʋʋsgã pʋgẽ y tẽegdame n pʋʋsd a Zeova bark daar fãa, ne a sẽn maand tõnd kũun wʋsgã, ‘y gãandg la y yikr wakat’ bɩ? (Tõodo 6:6-9) Yãmb kambã sã n yã tɩ yãmb sẽn maand bũmb ning fãa wilgdame tɩ y nonga Wẽnnaam, rẽ na n sõng-b lame tɩ b nong sɩdã ne b sũyã fãa.
16. B sã n sagl kambã tɩ b bãng n maan b meng vaeesgo, a yõodã yaa bõe?
16 Wakat-wakate, kambã na n data sor-wilgr sẽn na yɩl n tõog n mao ne zu-loees bɩ yɛl nins sẽn pukdã. Ra togs-y b sẽn segd n maan bũmb ning wakat fãa ye. Bõe yĩng tɩ y pa na n wilg b sẽn tõe n maan to-to n bãng Wẽnnaam tagsg yɛlã zutu, n yeel-b tɩ b maan vaeesg b toore. Y sã n zãms kambã tɩ b rɩk tʋʋm teedã fãa la sɛb nins ‘tʋm-tʋmd sẽn tũud sɩdã’ sẽn kõtã n tʋm sõma, na n sõng-b lame tɩ b paam zems-n-taar sẽn tar pãng ne a Zeova. (1 Sãmwɛll 2:21b) La b sã n togs neb a taabã zãmsg ning b sẽn yã vaeesg ning b sẽn maana pʋgẽ, zakã tẽeb pãng paasdame.
Teeg-y a Zeova zãng-zãnga
17. Bõe yĩng tɩ roagdb nins sẽn yaa b yembr n wubd b kambã sẽn na yɩl tɩ b yɩ kiris-nebã pa segd n koms raoodo?
17 Yaa wãn to yẽ ne zags nins sẽn tar roagd a yembrã? Nin-kãensã segda zu-loees a taab kambã wubr wɛɛngẽ. La yãmb sã n yaa roagdb sẽn wubd y kamb y yembr bɩ y ra koms raood ye. Y tõe n tõoga tʋʋmdã, wa roagdb wʋsg sẽn yaa b yen-yen sẽn teeg Wẽnnaamã sẽn tõoge, n sak n tũ a saglsã, la b wub kamb tɩ b yɩ kom-sõma sẽn tar pãng tẽebã wɛɛngẽ wã. (Yelbũna 22:6) Yaa sɩda, kiris-neb nins sẽn yaa roagdb sẽn yaa b yembrã segd n teega a Zeova zãng-zãnga, la b tall tẽeb t’a na n sõng-b lame.—Yɩɩl Sõamyã 121:1-3.
18. Roagdbã segd n gesa kambã ratem bʋs yamã la yĩngã wɛɛngẽ, la bõe zug la b segd n modg n yɩɩda?
18 Roagdb sẽn tar yamã miime tɩ “yãbr wakat beeme, la laad wakat me beeme.” (Koɛɛg Soaba 3:1, 4) Tara yõod wʋsg tɩ bi-bɩɩg yamã la a yĩngã paam kɩls tɩ zems n deem la a kok pemsem wakat sẽn yaa sõma la sẽn zems pʋgẽ. Mizik sẽn yaa sõma, sẽn yɩɩd fãa yɩɩl yɩɩlg sẽn pẽgd Wẽnnaam na n sõnga biig t’a tall tagsg sẽn yaa sõma sẽn tar yõod n tõe n paas a zems-n-taarã ne a Zeova pãnga. (Kolos rãmba 3:16) Yaa bi-bɩɩlmã wakat me la b segend ned t’a wa yɩ kãsem sẽn yaa wẽn-zoɛta, sẽn na yɩl t’a kell n paam vɩɩmã wakat sẽn pa sat yĩng tẽng zug arzãnã pʋgẽ.—Galat dãmba 6:8.
19. Bõe yĩng tɩ roagdbã tõe n kɩs sɩd t’a Zeova na n ninga b modgrã bark b kambã wubr pʋgẽ?
19 A Zeova ratame tɩ kiris-neb zagsã fãa tõog n tall pãng tẽebã wɛɛngẽ. Tõnd sã n sɩd nong Wẽnnaam la d maand d sẽn tõe tɛk n sak a Gomdã, a na n ninga tõnd modgrã barka, la a na n kõ-d-la pãng ning d sẽn datã sẽn na yɩl n tũ a vʋʋsem sõngã sor-wilgri. (Ezai 48:17; Filip rãmba 4:13) Tẽeg-y tɩ y kambã zãmsg tara wakate, la a sã n looge loogame. Maan-y y sẽn tõe fãa n tũ Wẽnnaam Gomdã saglse, la a Zeova na n ninga y modgrã bark tɩ y lugl zak sẽn tar pãng tẽebã pʋgẽ.
Bõe la y zãms-yã?
• Bõe yĩng tɩ sẽk baoob tar yõod wʋsg kambã wubr wɛɛngẽ?
• Bõe yĩng tɩ mak-sõng ning roagdbã sẽn kõtã yaa tɩlae?
• Manesem sẽn tar yõod a wãn bʋs la d tõe n tũnug ne n sõng kambã tɩ b bɩ tẽebã pʋgẽ?
• Wãn to la zakã tõe n kell n tall tẽebo?
[Zãmsgã sogsgã]
[Foto rãmba, seb-neng 20, 21]
Zags nins sẽn tar pãng tẽebã pʋgẽ wã zãmsda Wẽnnaam Gomdã wakat fãa, n kẽngd kiris-neb tigissã, la b moond koe-noogã ne taaba