Wẽnnaam sã n be ne tõndo ãnda n tõe n tõog-do?”
Wẽnnaam sã n be ne tõndo ãnda n tõe n tõog-do?”
“Dẽ, tõnd na n yeelame tɩ bõe ne yell kãnga? Wẽnnaam sã n be ne tõndo ãnda n tõe n tõog-do?”—ROM DÃMBA 8:31.
1. Ãnd dãmb n yi Ezipt ne Israɛll nebã, la yaa bõe n tus-b tɩ b maan woto?
ISRAƐLL nebã ra rebda paam-m-meng zĩigẽ, b sẽn maan yʋʋm 215 Ezipt poore. Yʋʋm kãens wʋsg yɩɩ yembd pʋgẽ. “Buud wʋsg me tũu bãmb n yi” Ezipti. (Yikri 12:38) Nin-kãensã sẽn pa Israɛll nebã yãa tood piigã sẽn yɛɛsdã sẽn varg Ezipt nebã tɩ yɩ yãnd wʋsg n kõ a ziri wẽnnaam dãmbã. Wakat kãng me, b yãame t’a Zeova tara tõog sẽn na kogl a nin-buiidã, sẽn yɩɩd fãa toog a naas-n-soabã tɛka. (Yikri 8:19, 20) Baa ne b sẽn da pa mi a Zeova raabã wʋsgã, b ra kɩsa sɩd ne bũmb a yembre: Ezipt wẽnnaam dãmbã ra pa tõog n kogl Ezipt nebã ye. La a Zeova yẽ ra wilga a pãngã n sõng Israɛll nebã.
2. Bõe yĩng t’a Rahaab sõng Israɛll neb nins sẽn wa n na n soos n ges tẽngã, la bõe yĩng t’a sẽn da tar bas-yard ning ne b Wẽnnaamã ra pa tik vɩʋʋgo?
2 Yʋʋm pis-naas loogr poore, sẽn deng bal tɩ Israɛll nebã kẽ Kãabg Tẽngã, a Moiiz lɛdgd a Zozue tʋma rap a yiib tɩ b tɩ soos n ges tẽngã. B sega a Rahaab sẽn yaa Zeriko nedã be. A Rahaab ra wʋma a Zeova pãng tʋʋma a sẽn maan n kogl Israɛll nebã yʋʋm pis-naasã b sẽn yi Eziptã kɩbare. Rẽ kɩtame t’a bãng t’a sã n da rat n paam Wẽnnaam barka, a segd n teela Wẽnnaam nin-buiidã. A sẽn dɩk sard ning ne yama yĩnga, yẽ ne a zakã rãmb paama koglgo, Israɛll nebã sẽn wa n sãam galʋ-tẽngã sasa. Fãagr ning b sẽn da paam ne yel-solemdã meng yaa kaset sẽn pa be kɩɩsg sẽn wilgd tɩ Wẽnnaam da bee ne-ba. Woto yĩnga, Rahaab sẽn da tar kɩs-sɩd ning ne Israɛll nebã Wẽnnaamã pa tik vɩʋʋg ye.—Zozue 2:1, 9-13; 6:15-17, 25.
3. a) Yel-solem bʋg la a Zezi maan Zeriko b sẽn lebs n me wã noore, la Zʋɩf rãmbã tũudum taoor dãmb manesem yɩɩ wãn to? b) Bõe la Zʋɩf rãmb kẽere, la kaoosg poore neb sẽn pa Zʋɩf rãmb wa n bãnge?
3 Yʋʋm tusr la kobs-nu poore, a Zezi Kirist sãooga bõos sẽn yaa zoang sẽn pẽ Zeriko tẽngã b sẽn lebs n me wã. (Mark 10:46-52; Luk 18:35-43) Ra-kãngã bõosa a Zezi t’a zoe a nimbãanega. A sẽn maan woto wã a wilgame t’a sak n deegame tɩ Wẽnnaam bee ne a Zezi. La sã n yaa ne Zʋɩf rãmbã tũudum nanambs la b poorẽ dãmbã, naoor wʋsgo b zãgsame tɩ b kõn sak yel-soalem nins a Zezi sẽn maan tɩ wilgdẽ t’a ra maanda Wẽnnaam tʋʋmdã ye. Sẽn yaa lebende, b baoome n na n yã yell n dõd-a. (Mark 2:15, 16; 3:1-6; Luk 7:31-35) Ba a Zezi kũumã poor a sẽn vʋʋg tɩ yaa vẽenegã, b ra pa rat n sak n deeg tɩ rẽ ra yita Wẽnnaam nengẽ ye. Sẽn yaa lebende, bãmb mens n lʋɩ taoor n nams a Zezi karen-biisã, n mak n na n gɩdg b tʋʋmdã sẽn yaa ‘moon Zusoab a Zezi koe-noogã.’ La Zʋɩf rãmb kẽere, la rẽ poore neb wʋsg sẽn pa Zʋɩf rãmb talla tagsg sẽn zems yel-kãens zutu. Sã n yaa ne bãmba, ra lebga vẽeneg tɩ Wẽnnaam zãgsa Zʋɩf taoor dãmbã sẽn da yaa tɩrs tɩ loog b mens ninẽ wã, la t’a ra bee ne a Zezi Kirist karen-biisã sẽn da yaa nin-talsã.—Tʋʋma 11:19-21.
Wẽnnaam bee ne ãnd dãmb rũndã-rũndã?
4, 5. a) Neb wʋsg tagsda wãn to ne b tũudum yãkre? b) D sã n wa baood n na n bãng tũudum hakɩkã sẽn ya a soaba, sʋk-kãseng bʋg la d segd n maane?
4 Tũudum taoor soab a yembr yeela woto sɩd tũudmã wɛɛngẽ, televiziõ wã pʋgẽ bool-n-sʋk b sẽn maan sẽn pa kaoos pʋgẽ: “M na togs vẽeneg tɩ tũudum yaa sɩda, a sã n kɩtdẽ tɩ ned lebg sõma n paase, nedã sã n tũud-a a vɩɩmã pʋgẽ.” Yaa sɩda, tũudum hakɩkã sɩd kɩtdame tɩ nebã lebg sõma n paase. La tũudum sẽn kɩtd tɩ nebã lebg sõma n paas bal wilgdame tɩ Wẽnnaam bee ne-a bɩ? Yaa rẽ zug bal la d segd n tik n bãng tũudum sã n yaa sɩd bɩ?
5 Ned fãa nongame n yãk a sẽn dat a toore. Yaa woto me ne tũudum yãkre. La ned sẽn so a meng n tõe n yãkã pa wilgd sɩd-sɩd t’a soabã na n yãkame tɩ zems ye. Wala makre, neb kẽer geta tũudum nebã sõore, a arzɛka, a yɛlã b sẽn minim n maand to-to ne ziirã, bɩ b roagdbã tagsg n yaool n yãke. B pa tõe n tik bõn-kãensã ba a yembr zug n yeel tɩ tũudum yaa sɩd bɩ a pa sɩd ye. Yel-kãngã pʋgẽ wã sʋk-kãsengã la woto: Yaa tũudum bʋg n tusd a nebã tɩ b maan Wẽnnaam daabã la a kõt kaset sẽn yaa vẽeneg tɩ Wẽnnaam bee ne-ba, t’a nebã tõe n yeel ne bas-yard tɩ “Wẽnnaam bee ne tõndo”?
6. A Zezi gom-bʋs n wat ne vẽenem tũudum hakɩkã la sẽn yaa ziri wã wɛɛngẽ?
6 A Zezi lugla noor sẽn kɩtd tɩ b bãng tũudum hakɩkã ne ziri wã soab n welge, a sẽn wa n yeel tɩ: “Gũus-y yãmb mens ne zãmb bãngdbã. Bãmb wata yãmb sʋk wa piisi, la bãmb sũyã pʋsẽ, bãmb yaa wa rigdinyĩidsi kom sẽn tara. Yãmb na bãng bãmb ne b biisi.” (Yaa tõnd n ning italikã.) (Matɩe 7:15, 16; Malaki 3:18) Ne pʋ-peelem, bɩ d lebg n ges “biis” kẽere, bɩ yɛl kẽer sẽn kɩtd tɩ b bãng tũudum sẽn tik sɩdã n welgã sẽn na yɩl tɩ d bãng Wẽnnaam sẽn be ne neb nins rũndã-rũndã wã.
Yɛl nins sẽn kɩtd tɩ d bãng Wẽnnaam sẽn be ne neb ninsã
7. Zãms nebã bũmb nins sẽn tik Biiblã zug balã rat n yeelame tɩ bõe?
7 B zãmsgã tika Biiblã zugu. A Zezi yeelame: “Mam karenga ka mam dẽnd ye, yaa sẽn tʋma maama rẽnda. Ned sã n dat n maan bãmb daabo, yẽ na bãng mam kareng sã n yaa Wẽnnaam dẽnda, bɩ m sã n gomda m meng yelle.” La a paase: “Ned ninga sẽn yaa Wẽnnaam dẽnda, a reegda Wẽnnaam goama.” (Zã 7:16, 17; 8:47) Ned sã n dat tɩ Wẽnnaam zĩnd ne-a, a segd n zãmsa nebã Wẽnnaam sẽn wilg bũmb ning a Gomdã pʋgẽ wã, la a leb n zãgs zãmsg nins sẽn tik ninsaal yamã bɩ rog-n-mikã zugã.—Ezai 29:13; Matɩe 15:3-9; Kolos rãmba 2:8.
8. Bõe yĩng tɩ tar yõod tɩ d tũnug ne Wẽnnaam yʋʋrã balengã pʋgẽ?
8 B tũnugda ne Wẽnnaam yʋʋr sẽn ya a Zeova wã la b moond-a. A Ezai reng n togsa woto: “Baraare, yãmb na n yeelame: ‘Pʋʋs-y Zusoaba [a Zeova, NW ] barka, pʋʋs-y ne bãmb yʋʋre. Wilg-y neba bãmb tʋʋma n tẽeg tɩ bãmb yʋʋr yaa kãsenga. Yɩɩl n pẽg-y Zusoabã; tɩ bõe, bãmb maana bõn-kãsemse. Kɩt-y tɩ dũniyã fãa bãng bãmba.’ ” (Ezai 12:4, 5) A Zezi zãmsa a karen-biisã tɩ b pʋʋs woto: “Tõnd Ba sẽn be arzãna, tɩ yãmb yʋʋr yɩ ne waoogre.” (Matɩe 6:9) Woto yĩnga, kiris-neb nins fãa sẽn da yaa Zʋɩf rãmb la sẽn da pa-b Zʋɩf rãmbã ra segd n yɩɩ ‘neb Wẽnnaam sẽn yãk a yʋʋra yĩnga.’ (Tʋʋma 15:14) Vẽenega, nooma Wẽnnaam t’a teel neb nins sẽn sɩd tar sũ-noog n yaa ‘neb a yʋʋra yĩnga.’
9. a) Bõe yĩng tɩ tũudum hakɩkã neb tar sũ-noogo? b) Wãn to la a Ezai wilg tɩ tũudum hakɩkã yaa toor ne ziri tũudmã?
9 Bãmb me tara sũ-noog wa b sũ-noog Wẽnnaamã. A Zeova sẽn yaa ‘koe-noogã’ soabã yaa “sũ-noog Wẽnnaam.” (1 Tɩmote 1:11, NW ) Woto yĩnga, na n yɩɩ wãn t’a balemdbã pa tall sũ-noog la saagr wakat fãa? Baa ne yel-beed nins sẽn be dũniyã pʋgẽ wã, la zu-loees nins ned kam fãa sẽn tarã, kiris-neb hakɩkã ket n tara sũ-noogo, bala b paamda tẽeb rɩɩb wʋsg wakat fãa. A Ezai reng n togsame tɩ b ra na n yɩɩ toor ne ziri tũudmã neb woto: “Dẽ yĩnga, Zusoab a Wẽnnaam yeelame: ‘Gese, mam tʋm-tʋmdba na n dɩɩme, la yãmb na n gãanda kom. Mam tʋm-tʋmdba na n yũumi, la ko-yũud na n yõka yãmba. Mam tʋm-tʋmdba na n paama sũ-noogo, la yãmb na n paama yãnde. Mam tʋm-tʋmdba na n yɩɩla ne sũ-noogo, la yãmb na n kelma ne sũ-toogo. Yãmb na n wiisa ne sũ-sãoongo.’ ”—Ezai 65:13, 14.
10. Wãn to la neb nins sẽn be tũudum hakɩkã pʋgẽ wã lakd b mens ne maan-n-ges n yaool n bãng yam?
10 B tʋʋm manesmã la yɛl nins b sẽn yãkd yam n na n maana tika Biiblã noy zutu. Yelbũna gʋlsd sagenda tõnd woto: “Teeg Zusoaba ne f sũur fãa la f ra teeg f meng bãngr ye. Fo sẽn maand bũmb ninga fãa, bɩ f tẽeg Zusoaba yelle, la b na n demsa fo sorã.” (Yelbũna 3:5, 6) Wẽnnaam teenda neb nins sẽn baood a sor-wilgri, la b basda ninsaalbã zãmsg sẽn kɩɩsd taab tɩ b toor kae ne yam ning sẽn yit Wẽnnaam nengẽ wã. Ned sẽn dat n vɩɩmd tɩ zems ne Wẽnnaam Gomdã sẽn ta zĩig ningã, yaa woto me la a na n lak a meng ne maan-n-ges n yaool n bãng yamã.—Yɩɩl Sõamyã 119:33; 1 Korẽnt dãmba 1:19-21.
11. a) Bõe yĩng tɩ sɩd tũudmã neb pa tõe n welg tũudum taoor dãmb sull la nin-zaals sulli? b) Mak-bʋg la neb nins sẽn lʋɩt Wẽnnaam nin-buiidã taoorã segd n kõ bãgrã?
11 B sigla wa yʋʋm kob-yendẽ kiris-neb tigingã. A Zezi togsa no-kãngã: “La bɩ yãmb da bao tɩ neb bool yãmb tɩ Karensaamb ye, tɩ bõe, yãmb karen-saamb ya a ye bala, la yãmb fãa yaa ba-biisi. Bɩ y ra bool ned dũniyã zug tɩ yãmb ba ye, tɩ bõe, yãmb Ba ya a ye bala n be arzãna. Bɩ yãmb da bao tɩ neb bool yãmb tɩ kãsem dãmb ye, tɩ bõe, yãmb Kãsem ya a ye bala, yaa Kirist. Ned ninga sẽn yaa yãmb nin-kãsenga, yẽ na n yɩɩ yãmb sõangda.” (Matɩe 23:8-11) Tiging saam-biis gũusdame n da tall tũudum taoor dãmb sull sẽn waoogd b mens ne naam yʋy sẽn zẽkd-b tɩ yaa wa b yɩɩda b tũudmã neb a taabã ye. (Zoob 32:21, 22, NW ) B yeela neb nins sẽn kɩɩmd Wẽnnaam bãgrã tɩ b tʋm b tʋʋmdã, “ka modgr yĩng ye, la yaa ne yamleoogo sẽn zems Wẽnnaam yam, ka ligd yĩng ye, la yaa nonglem yĩnga, ka tɩ soog bãmb ne pãng ye, yaa tɩ yɩ mamsg bãmb yĩnga.” (1 Pɩɛɛr 5:2, 3) Pe-kɩɩmb nins sẽn yaa kiris-neb hakɩkã gũusdame n da bao n soog neb a taabã tẽeb ye. B sẽn yaa tʋmd-n-taas Wẽnnaam tʋʋmdã pʋgẽ wã, b maoodame bal n na n kõ mak-sõngo.—2 Korẽnt dãmba 1:24.
12. Wẽnnaam baoodame tɩ neb nins sẽn dat n paam a teelgã tall tagsg sẽn kɩls tɩ zems bʋg ne ninsaalbã goosneema rãmba?
12 B sakda ninsaalbã goosneema rãmb n yaool n pa kẽed dũniyã yɛlẽ ye. Ned ning sẽn pa sakd “nanambsa noyã” pa segd n tẽ tɩ Wẽnnaam bee ne-a ye. Bõe yĩnga? Bala “noe nins sẽn be wã yaa Wẽnnaam n kɩt tɩ b beẽ. Woto yĩnga, ned ninga sẽn zãgsd naab noore, a kɩɩsda Wẽnnaam tõogo.” (Rom dãmba 13:1, 2) Baasg zãnga, a Zezi sak n deegame tɩ nanambsa noy tõe n wa kɩɩsda Wẽnnaam dẽndã, a sẽn wa n yeel tɩ: “Bɩ y kõ Sezaar bũmb nins sẽn yaa Sezaar dẽnda, la y kõ Wẽnnaam bũmb nins sẽn yaa Wẽnnaam dẽnda.” (Mark 12:17) Neb nins sẽn dat n paam Wẽnnaam teelgã segdame n “reng n bao Wẽnnaam soolem ne bãmb tɩrlem,” la b ket n sakd tẽngã noy nins sẽn pa kɩɩsd Wẽnnaam noyã sẽn tar yõod n yɩɩdã. (Matɩe 6:33; Tʋʋma 5:29) A Zezi wilga sõma-sõma tɩ d ra kẽ dũniyã yɛlẽ a sẽn yeel a karen-biisã tɩ: “Bãmb ka dũniyã rẽnd wa mam sẽn ka dũniyã rẽndã.” Rẽ poore a paasame: “Mam soolem ka dũniyã rẽnd ye.”—Zã 17:16; 18:36.
13. Nonglmã tʋʋmd yaa bʋg Wẽnnaam nin-buiidã bãng-n-welg wɛɛngẽ?
13 B ‘maanda neba fãa yel-sõmde,’ n pa welgdẽ ye. (Galat dãmba 6:10) Kiris-nebã sẽn tar nonglmã sakda nebã fãa, baa b yĩng-kõbgã, b ligdã bɩ b sẽn karem n ta zĩig ningã sẽn yaa to-to, b sẽn yit tẽng ning bɩ b buud-gomdã sẽn ya a soaba. B sẽn maand nebã fãa neerã, sẽn yɩɩd fãa, neb nins sẽn kĩ ne bãmb tẽebã pʋgẽ wã sõngd n kɩtame tɩ nebã bãng tɩ Wẽnnaam bee ne-ba. A Zezi yeelame: “Yãmb sã n nong taaba, neba fãa na n bãngame tɩ yãmb yaa mam karen-biisi.”—Zã 13:35; Tʋʋma 10:34, 35.
14. Neb nins sẽn tat Wẽnnaam yamã na n paama zãma wã pẽgr bɩ? Wilg-y y leokrã võore.
14 B sakda namsg Wẽnnaam daabã maaneg yĩnga. A Zezi keooga a karen-biisã woto: “Tẽeg-y goam nins mam sẽn da togs yãmbã. Tʋm-tʋmd ka yɩɩd a zu-soab ye. Bãmb sã n nams maam, b na n namsa yãmb me. Bãmb sã n da sak mam goama, b na n saka yãmb me rẽnda.” (Zã 15:20; Matɩe 5:11, 12; 2 Tɩmote 3:12) Wakat buud fãa, zãma wã nong n kisgda Wẽnnaam nebã. Yɩɩ woto ne a Nowe sẽn ning dũniyã taal ne a tẽebã. (Hebre dãmba 11:7) Rũndã-rũndã, neb nins sẽn dat tɩ Wẽnnaam zĩnd ne-bã pa na n saag n pul Wẽnnaam Gomdã koom bɩ n kɩɩs Wẽnnaam noyã n põs namsg b tẽebã yĩng ye. B sã n ket n sõgend Wẽnnaam ne kɩs-sɩd fãa, b miime tɩ nebã na n ‘gomda bãmb wẽnga.’—1 Pɩɛɛr 2:12; 3:16; 4:4.
Yaa masã la y segd n mag yɛlã n gese
15, 16. a) Sʋgs-bʋs n na n sõng tõnd tɩ d bãng Wẽnnaam sẽn be ne tũudum ningã? b) Neb milyõ rãmb wa n baas n yeelame tɩ bõe, la bõe yĩnga?
15 Sʋk-y y menga: ‘Tũudum bʋg la y yã t’a gãda Wẽnnaam Gomdã sõma, ba a zãmsgã sã n yaa toor ne neb wʋsg sẽn yɩɩd sẽn tẽedã? Ãnd dãmb n wilgd Wẽnnaam yʋ-peellã yõod n pa reemdẽ, hali n tũnugd ne-a tɩ b bãngd-b n bak rẽ yĩnga? Ne tẽebo, ãnd dãmb n wilgd tɩ yaa Wẽnnaam Rĩungã bal la ãdem-biisã zu-loees fãa tɩɩm? Ãnd dãmb n tũud Biiblã noyã, tɩ nebã tõe n wa yeel tɩ yaa no-kʋd sẽn ye pa tar yõodo? Yaa tũudum bʋg la b mi t’a pa yaood a tũudum taoor dãmba, t’a nebã fãa yaa koe-moondba? Ãnd dãmb la b pẽgda, b sẽn sakd b tẽngã noyã, baa b sã n lakd b mens ne politikã yɛla? Ãnd dãmb n dɩkd sẽk ne nonglem la b yiisd b ligd n sõngd neb a taabã tɩ b bãng Wẽnnaam la a raabã? La baa ne bõn-sõma kãensã, ãnd dãmb la b ket n yaandẽ la b namsdẽ?
16 Neb milyõ rãmb sẽn be dũniyã gill zug maga yɛlã n ges n wa baas n kɩs sɩd t’a Zeova Kaset rãmbã bal n tũud sɩd tũudmã? B wa n baas n yeela woto, b sẽn tik a Zeova Kaset rãmbã zãmsg zugu, la b manesmã sẽn yaa to-to wã, n paas nafa nins b tũudmã sẽn wa ne wã zugu. (Ezai 48:17) Neb milyõ rãmb sɩd yeta woto wa b sẽn deng n togs Zakari 8:23 pʋgẽ wã: “Bas-y tɩ d tũ yãmb n kẽnge; bala, tõnd wʋmame tɩ Wẽnnaam bee ne yãmba.”
17. Bõe yĩng t’a Zeova Kaset rãmbã pa tɩta rãmba, b sã n yetẽ tɩ yaa bãmb n tũud sɩd tũudmã?
17 A Zeova Kaset rãmbã yaa tɩta rãmba, b sã n yetẽ tɩ yaa bãmb bal la Wẽnnaam be ne bɩ? Sɩda, bãmb sẽn yetã yaa yembr ne Israɛll nebã, b sẽn da wa n be Ezipt n yetẽ tɩ Wẽnnaam bee ne bãmba, baa ne Ezipt nebã tẽebã, bɩ wakat ning yʋʋm kob-yendẽ kiris-nebã sẽn da yet tɩ yaa bãmb la Wẽnnaam be ne, la pa Zʋɩf rãmbã tũudmã. Yɛlã meng n kõt kaseto. Tẽns 235 pʋsẽ, a Zeova Kaset rãmbã tʋmda tʋʋmd ning a Zezi sẽn da reng n togs t’a karen-biis hakɩkã ra na n maanda saabã wakatã: “Wẽnnaam soolem koe-noog kãngã na n moona dũniyã tɛk fãa tɩ yɩ kaset buud fãa yĩnga. Dẽ, dũniyã sɛɛb na yaool n ta.”—Matɩe 24:14.
18, 19. a) Bõe yĩng t’a Zeova Kaset rãmbã pa tar bʋʋm n na n bas b moonegã, baa neba sã n kɩɩsd-ba? b) Wãn to la Yɩɩl Sõamyã 41:12 wilgd tɩ Wẽnnaam bee ne Kaset rãmbã?
18 A Zeova Kaset rãmbã na n ket n tʋmda tʋʋm kãngã. B pa na n tol n bas tɩ b bɛɛbã namsg la b kɩɩsg gɩdg b tʋʋmdã ye. A Zeova tʋʋmdã segd n maaname, la a na n maaname. Makr buud fãa neb a taabã sẽn mak yʋʋm kob-gĩnd ning sẽn loogã n na n gɩdg Kaset rãmbã tɩ b ra tʋm Wẽnnaam tʋʋmdã pa tõog baa bilf ye, bala a Zeova kãaba woto: “Zab-teed nins fãa neb sẽn maand n na n zab ne fooma ka na n tõog ye. Fo na n sãama zɛlma nins fãa sẽn dõt fooma. Yaa Zusoaba tʋm-tʋmdba pʋɩɩr la woto. Bãmb tɩrlem yita mam nengẽ. Yaa Zusoabã n yeele.”—Ezai 54:17.
19 A Zeova Kaset rãmbã tʋʋmd pãng sẽn paasd n yɩɩd pĩndã, baa ne kɩɩsgã b sẽn segd dũniyã gill zugã, yaa kaset t’a Zeova sũur nooma ne b sẽn maandã. Rĩm a Davɩɩd yeelame: “Yaa ne yõ wã la mam na n bãng sã n yaa yãmb yam. Tɩ bõe? Mam bɛyã kõn kell n kɩdem ne sũ-noogo a sẽn tõog maama yĩng ye.” (Yɩɩl Sõamyã 41:12; 56:10, 12) Wẽnnaam bɛɛbã pa na n tol n paam sor n kɩdem tɩ b tõoga a Zeova nin-buiidã ye, bala b taoor soab a Zezi Kirist kẽngda taoor n na n tõog a bɛɛba zãng-zãnga!
Y tõe n leokame bɩ?
• Tẽn-kʋdem wẽndẽ neb kẽer bʋs n paam Wẽnnaam teelgo?
• Bãn sãnda sẽn kɩtd tɩ b bãng tũudum hakɩkã n welg la bʋse?
• Bõe yĩng tɩ yãmb mengã kɩs sɩd tɩ Wẽnnaam bee ne a Zeova Kaset rãmbã?
[Zãmsgã sogsgã]
[Foto, seb-neng 24]
Neb nins sẽn dat tɩ Wẽnnaam zĩnd ne-bã zãmsgã segd n tika a Gomdã zug bala
[Foto, seb-neng 26]
Kiris-neb kãsem dãmbã yaa mak-sõma n kõ bãgrã