Kɩdm-y y sẽn mi a Zeova wã yĩnga
Kɩdm-y y sẽn mi a Zeova wã yĩnga
“Sũ-noog rãmb n yɩɩda la sẽn kelgd-b Wẽnnaam gomde la b reegd-a.”—LUK 11:28, Sebr Sõngo.
1. Wakat bʋg la a Zeova sɩng ne ninsaalbã goama?
A ZEOVA nonga ãdem-biisã, la b neerã yell pak-a-la wʋsgo. Woto yĩnga, pa lingr t’a taas-b goam ye. Goam taasg kãng sɩnga Edɛn zẽedẽ wã. Sã n yaa ne Sɩngre 3:8, vugri, “zĩ-maagr wakate,” a Ãdem ne a Hawa “wʋma Zusoab a Wẽnnaam [koɛɛga].” Kẽer yeelame tɩ rat n yeelame t’a Zeova ra minim n gomda ne a Ãdem sasa kãng daar fãa. Sẽn yaa to-to fãa, Biiblã wilgda vẽeneg tɩ Wẽnnaam da rɩka sẽk n kõ pipi raoã noy yembo, la a leb n zãms-a-la bũmb ning a sẽn da segd n bãng sẽn na yɩl n tʋm tʋʋm nins a sẽn bobl-a wã.—Sɩngre 1:28-30.
2. Wãn to la pipi raoã ne a pagã bas a Zeova sor-wilgrã, la rẽ waa ne bõe?
2 A Zeova kõo a Ãdem ne a Hawa vɩɩm, la zu-sobend rũmsã la tẽngã gill zugu. Gɩdgr sẽn da be ya a yembr bala. B ra pa segd n dɩ sõma ne wẽng bãngr tɩɩgã biig ye. A Sʋɩtãan tusa a Ãdem ne a Hawa tɩ b kɩɩs Wẽnnaam noorã. (Sɩngre 2:16, 17; 3:1-6) B yãka soog-m-menga, n dɩk sard n na n yãk sẽn da yaa tɩrg la wẽng b toore. B sẽn maan woto wã, b maana yalemd n bas sor-wilgr ning sẽn yit Naandã sẽn tar nonglmã nengẽ. A baasa ne wẽng wʋsg n kõ bãmb ne b kambã la b yagensã sẽn da na n wa wã. A Ãdem ne a Hawa kʋʋlame n wa baas n ki tɩ vʋʋgr saagr ka be b yĩng ye. B kambã ne b yagensã roga ne bãmb yel-wẽndã sẽn baasd ne kũumã.—Rom dãmba 5:12.
3. Bõe yĩng t’a Zeova gom ne a Kayẽ, la a Kayẽ manesem yɩɩ wãn to?
3 Baa ne kɩɩsgã sẽn zĩnd Edɛnã, a Zeova kell n taasa ãdem-biisã goama. Yel-wẽndã ra rat n tõoga a Kayẽ sẽn ya a Ãdem ne a Hawa pipi biriblã. Rẽ n so t’a Zeova yeel-a t’a gũus t’a sẽn da tar n debdẽ wã yaa yell zĩigẽ, la a sagl-a t’a “maan neere.” A Kayẽ zãgsa sagl-kãngã b sẽn kõ ne nonglmã n kʋ a ba-biigã. (Sɩngre 4:3-8) Woto, pipi ninsaalb a tãabã fãa sẽn zĩnd tẽngã zugã zãgsa sor-wilgr sẽn yaa vẽenegã Wẽnnaam sẽn kõ wã. Yaoog n yaa yẽ n kõ-b vɩɩmã, la a zãmsda a nin-buiidã b nafr yĩnga. (Ezai 48:17) Ad woto sɩd ra segd n sãama a Zeova sũur wʋsgo!
A Zeova vẽnega a meng pĩnd wẽndẽ neba
4. A Zeova ra kɩsa sɩd ne bõe a Ãdem kambã la a yagensã wɛɛngẽ, la rẽ kɩtame t’a kõ saagr koe-bʋgo?
4 Baa ne a Zeova sẽn da tõe n ye pa gom ne ãdem-biisã, a pa maan woto ye. A ra kɩsa sɩd t’a Ãdem yagensã kẽer da na n talla yam n tũ A sor-wilgrã. Wala makre, a Zeova sẽn da wa n togsd a Ãdem ne a Hawa sɩbgrã, a reng n togsame tɩ “yageng” n da na n wa zab ne waafã, sẽn ya a Sʋɩtãan Munaafɩɩkã. B ra na n wa baas n bedsa a Sʋɩtãan zugã. (Sɩngre 3:15) Bãngr-gom-kãngã ra yaa saagr koɛɛg sẽn kõt sũ-noog ne “neb nins sẽn wʋmd Wẽnnaam goama n sakdẽ wã.”—Luk 11:28.
5, 6. Wãn to la a Zeova taas a nin-buiidã goam sẽn deng pipi yʋʋm kob-gĩndẽ T.W., la wãn to la rẽ naf-ba?
5 A Zeova taasa a raabã pĩnd wẽndẽ zak soben dãmb wala a Nowe, a Abrahaam, a Izaak, a Zakoob la a Zoobe. (Sɩngre 6:13; Yikri 33:1; Zoob 38:1-3) Kaoosg poore, a tũnuga ne a Moiiz n gʋls noy wʋsg n kõ Israɛll buudã. A Moiiz Tõogã naf-b-la wʋsgo. Israɛll sẽn sak-a wã, kɩtame t’a welg toor n yaa Wẽnnaam nin-buiidu. Wẽnnaam kõo Israɛll nebã bas-m-yam tɩ b sã n sak a Tõogã, a na n ning-b-la bark laogã la tẽebã wɛɛngẽ, n kɩt tɩ b yɩ maan-kʋʋdb rĩungu, bu-sõngo. Tõogã ra kõo noy sẽn tɩ loe ne gɩdgr rɩɩbã la yɩlemdã wɛɛngẽ, tɩ rẽ sõng n kõ-b yĩns laafɩ. La a Zeova leb n yeel-b lame tɩ b sã n kɩɩs a noyã, na n wʋm-b-la sõma.—Yikri 19:5, 6; Tõodo 28:1-68.
6 Tar-n-tarẽ, Biiblã sɛb a taab vʋʋsem sõngã sẽn vẽneg tɩ b gʋls n wa n paase. Sɛb n wilg a Zeova manesem sẽn yɩ to-to pĩnd ne tẽn-tẽnsã la buud toor-toor nebã. Sɛb sẽn tar goam sẽn be yamleoog n bilg a zʋg-sõma wã ne rasãnde. Sɛb sẽn tar bãngr-goam n deng n togs a Zeova raabã pidsg beoog-daare. Rap sẽn zĩnd pĩnd wẽndẽ wã n yɩ kɩs-sɩd rãmb n maag b yĩng n zãms seb-kãensã vʋʋsem sõng sẽn vẽneg tɩ b gʋlsã, la b tũ-b saglsã. Ad bãmb ned a ye sẽn gʋlse: “Yãmb goama yaa mam nao wã fɩtla la m sor vẽenem.” (Yɩɩl Sõamyã 119:105) A Zeova kõo neb nins sẽn da rat n kelgã zãmsg la vẽnegre.
Vẽenemã tara paasgo
7. Baa ne a Zezi sẽn maan yel-soalmã, sẽn yɩɩd fãa, b ra mi-a-la wala bõe, la bõe yĩnga?
7 Pipi yʋʋm kob-gĩndẽ wã, Zʋɩf rãmbã tũudum sul rɩka ninsaalb rog-n-mik n paas Tõogã. B tũu Tõogã kɛgre. Tõogã sẽn da segd n wa ne vẽnegrã lebga zɩɩb wʋsgo, rog-n-mik kãens yĩnga. (Matɩe 23:2-4) Baasg zãnga, yʋʋmd 29 T.W., a Zezi waame n yɩ Mesi wã. A tʋʋmdã ra pa a kõ a vɩɩmã n fãag ãdem-biisã bal ye, la ra leb n yaa “kɩs sɩd kaseto.” Baa ne a sẽn maan yel-soalmã, b ra mi-a lame n yɩɩd wala “karensaamba.” A zãmsgã ra yaa wala vẽenem sẽn vẽnegd nin-buiidã yam, tẽeb likã sẽn da ludã. A Zezi mengã yeela woto ne bʋʋm: “Mam yaa dũniyã vẽenem.”—Zã 8:12; 11:28; 18:37.
8. Pipi yʋʋm kob-gĩndẽ T.W., seb-bʋs la vʋʋsem sõngã vẽneg tɩ b gʋlse, la wãn to la rẽ naf pipi kiris-nebã?
8 Kaoosg poore, b wa n paasa Evãnzill dãmbã, sẽn yaa sɛb a naas sẽn tar a Zezi vɩɩmã kɩbarã, la Tʋʋma sebre, sẽn wilgd kiris-nedemdã sẽn yelg to-to a Zezi kũumã poore. Sẽn paase, lɛta me la vʋʋsem sõng vẽneg a Zezi karen-biis tɩ b gʋlse, n paas Wilgr sebrã sẽn yaa bãngr-goam sebrã. Seb-kãensã sẽn naag ne Hebre Gʋlsg Sõamyã kɩtame tɩ Biiblã pidi. Ne seb-kãensã vʋʋsem sõng sẽn vẽneg tɩ b gʋlsã sõngr maasem, kiris-nebã ra tõeeme n “bãng [sɩdã] yalem la a woglem la a zulum la a zãntlem sẽn yaa bũmb ninga.” (Efɛɛz rãmba 3:14-18) B ra tõe n paama ‘Kirist tagsgo.’ (1 Korẽnt dãmba 2:16) Baasg zãnga, pipi kiris-nin-kãensã ra pa wʋm a Zeova raabã nens fãa võor ye. Tʋm-tʋmd a Poll gʋlsa a tẽed-n-taasã woto: “Dũnda tõnd getame t’a yaa wa ned sẽn get bũmb nin-getg pʋgẽ t’a yaa sãmbgo.” (1 Korẽnt dãmba 13:12) Nin-gɛtg a woto ra na n puka zãmsgã sẽn kʋmse, la a pa wilgd bũmba fãa n welg ye. B ra na n wa wʋma Wẽnnaam Gomdã võor n paas beoog daare.
9. Bõe vẽnegr n zĩnd ‘yaoolem wakatã’?
9 Rũndã-rũndã, b boonda sasa ning tõnd sẽn vɩyã tɩ “yaoolem wakate.” Yaa sasa sẽn tar “toodo.” (2 Tɩmote 3:1) No-rɛɛs a Daniɛll reng n togsame tɩ wakat kãng sasa, “bãngr [hakɩkã, NW ] na n paasa wʋsgo.” (Daniɛll 12:4) Woto yĩnga, a Zeova sẽn yaa Koetaasd Kãsengã sõnga pʋ-peelem dãmbã tɩ b wʋm a Gomdã võore. Rũndã-rũndã neb wʋsg n bãng tɩ b zĩniga Kirist Zezi naam geer zug saasẽ yʋʋmd 1914. B leb n miimi tɩ ka la bilfu, a na n yiisa wẽnemã fãa la a toeem tẽngã t’a fãa lebg arzãnã. B moonda Rĩungã koe-noog kãng sẽn yaa kãsengã tẽngã gill zugu.—Matɩe 24:14.
10. Yʋʋm kobsã sẽn loogã pʋgẽ, nebã manesem yɩɩ wãn to ne a Zeova saglsã?
10 N-ye, ãdem-biisã zãmaan fãa pʋgẽ, a Zeova taasa a raabã nebã tẽngã zugu. Biiblã wilgdame tɩ neb wʋsg n kelge, n tũ Wẽnnaam yamã n paam bark rẽ yĩnga. A wilgdame tɩ neb a taab n zãgs Wẽnnaam saglsã a sẽn kõ ne nonglmã, n tũ a Ãdem ne a Hawa manesem wẽngã. A Zezi goma yel-kãngã yelle, a sẽn gom wẽn-tũudum soay a yiib yellã. A yembrã tar n debda sãoong zĩigẽ. A yaa yaleng paee, tɩ neb wʋsg sẽn zãgsd Wẽnnaam Gomdã tũud-a. Sor a to wã tar n debda vɩɩm sẽn kõn sa zĩigẽ. A yaa bãanega, n yaa sor ning neb bilfã sẽn sakd Biiblã wa Wẽnnaam Gomdã sẽn tũudã. B sakame t’a yaa Wẽnnaam Gomde, n tũud-a b vɩɩmã pʋgẽ.—Matɩe 7:13, 14.
D maan mi-beoog ne d sẽn tarã
11. Tõnd sẽn mi Biiblã la a zãmsgã yaa kaset ne bõe?
11 Yãmb bee neb nins sẽn yãk vɩɩmã sorã sʋk bɩ? Sã n yaa woto, sãmbg sẽn ka be, y na n datame n pa a zugu. Wãn to la y tõe n maan woto? Tags-y wakat fãa la ne mi-beoogo, bark nins y sẽn tare, y sẽn mi Biiblã sɩdã sẽn wa ne y vɩɩmã zugã yelle. Yãmb sẽn sak koe-noogã meng yaa kaset sẽn wilgd tɩ Wẽnnaam bark-y lame. A Zezi wilga woto, a sẽn wa n pʋʋs a Ba wã woto wã: “M Ba sẽn yaa arzãna ne dũniyã Zusoaba, mam pẽgda yãmba, yãmb sẽn solg bõn-kãens ne yẽesem dãmba la ne yam dãmba, n yaool n vẽneg kom-bõoneg ne bõn-kãensa yĩnga.” (Matɩe 11:25) Zĩm-yẽedb la yõor yaood deegdb wʋma a Zezi zãmsgã võore, tɩ tũudmã nanambs sẽn paam zãmsg wʋsgã yaool n pa wʋm a võor ye. A Zezi togsa woto n paase: “Ned ba a ye ka tõe n wa mam nengẽ m Ba sẽn tʋma maama sã n ka tak-a n kõ-m ye.” (Zã 6:44, Sebr Sõngo) Yãmb sã n paamame n bãng Biiblã la y tẽed a zãmsgã la y tũud-a, woto yaa kaset sẽn wilgd t’a Zeova taka yãmba. Rẽ segd n kɩtame tɩ y kɩdem.
12. Yel-bʋs zut la Biiblã kõt vẽenem?
12 Wẽnnaam Gomdã tara sɩd sẽn kõt paam-m-meng la vẽnegre. Neb nins sẽn tũud Biiblã bãngr b vɩɩmã pʋgẽ wã paamda b mens ne tẽeb ziri, ziri zãmsg la zɩɩlmã sẽn so neb milyõ rãmb vɩɩmã. Wala makre, d sẽn mi sɩdã sɩɩgã wɛɛngẽ wã kɩtdame tɩ d ye pa zoet kũ-rãmbã, n tẽed tɩ b tõe n maan-d-la wẽng ye. D ye pa tẽed me tɩ tõnd sẽn nong-b rãmb sẽn ki wã namsdame ye. (Ezekɩɛll 18:4) D sẽn mi sɩdã malɛg-wẽnsã wɛɛngẽ wã sõngda tõnd tɩ d põs yɛl nins tɩɩm saoogã sẽn tõe n wa ne wã. Vʋʋgrã sẽn watã yaa belsg n kõ neb nins nin-nongds sẽn maan kaalma. (Zã 11:25) Biiblã bãngr-goam wilgda tõnd wakat ning pʋgẽ d sẽn be wã võore, la kõt-d bas-m-yam tɩ Wẽnnaam kãabsã na n pidsa beoog-daare. B leb n paasda tõnd vɩɩm sẽn kõn sa saagrã pãnga.
13. Wãn to la tõnd sẽn tũud Wẽnnaam Gomdã kõt tõnd yĩns laafɩ?
13 Wẽnnaam noyã sẽn be Biiblã pʋgẽ wã zãmsda tõnd tɩ d tall vɩɩm buud sẽn na n kõ-d nafa yĩngã wɛɛngẽ. Wala makre, d zãmsdame n na n lak d mens ne minung sẽn dẽgemd d yĩnsã, wala sɩgaar bɩ dorog yũubu. D lakda d mens ne rã-yũuri. (2 Korẽnt dãmba 7:1) Wẽnnaam noy yoobã wɛɛngẽ wã tũub yaa koglg ne taoor-bãasã. (1 Korẽnt dãmba 6:18) D sẽn sakd Wẽnnaam saglg ning sẽn yet tɩ d ra nong ligdã, d yamã gãee bãane, tɩ neb wʋsg sẽn baood arzɛkã yam pa gãe bãan ye. (1 Tɩmote 6:10) Wãn to la y sẽn tũ Wẽnnaam Gomdã y vɩɩmã pʋgẽ wã naf-yã?
14. Pãn-bʋg la vʋʋsem sõngã tar tõnd vɩɩmã pʋgẽ?
14 Tõnd sã n tũud Wẽnnaam Gomdã d vɩɩmã pʋgẽ, d paamda a Zeova vʋʋsem sõngã. D bɩɩsda zʋgd sẽn wõnd Kirist rẽndã. A ra tara zʋgd sẽn be yamleoog wala nimbãan-zoeerã. (Efɛɛz rãmba 4:24, 32, Sebr Sõngo) Wẽnnaam vʋʋsem sõngã leb n womda a biisã tõnd vɩɩmã pʋgẽ. Bi-kãens yaa nonglem, sũ-noogo, laafɩ, sũ-mare, sõmblem, maan-neere, tẽebo, sũ-bʋgsem la yõk-m-menga. (Galat dãmba 5:22, 23) Zʋgd a woto wata ne sũ-noog la zems-n-taar sẽn yaa sõma wʋsg ne neb a taabã, la ne zakã neba. D paamda pãng d sũurã pʋgẽ tɩ sõngd-d tɩ d mao ne zu-loeesã ne raoodo. Yãmb nee vʋʋsem sõngã sẽn tar pãng ning yãmb vɩɩmã pʋgẽ y manegr yĩng bɩ?
15. Tõnd sã n tũud Wẽnnaam daabã d vɩɩmã pʋgẽ, wãn to la rẽ nafd tõndo?
15 Tõnd sã n tũ Wẽnnaam Gomdã d vɩɩmã pʋgẽ, d paasda d zems-n-taarã pãng ne a Zeova. D kɩta sɩd n paas t’a wʋmda tõnd võor la a nong-do. Ne tõnd meng sẽn vɩɩmd n yã, d bãngdame t’a teenda tõnd toog wakate. (Yɩɩl Sõamyã 18:19) D bãngdame t’a sɩd kelgda d pʋʋsgã. (Yɩɩl Sõamyã 65:3) D wat n tara bas-yard ne a sor-wilgrã, n kɩs sɩd tɩ sor-wilgr kãng na n naf-d lame. La d tara saagr kãseng tɩ wakat sẽn zems sasa, Wẽnnaam na n kɩtame t’a kɩs-sɩd dãmbã wa zems zãnga, t’a kõ-b vɩɩm sẽn pa satã. (Rom dãmba 6:23) “Bɩ y kolg Wẽnnaam, la bãmb na kolg yãmba,” yaa woto la karen-biig a Zak gʋls-yã. (Zak 4:8) Yãmb yãame tɩ y zems-n-taarã ne a Zeova wã pãng paasame, y sẽn kolg-a wã bɩ?
Biiblã sɩdã ka mak-n-taag ye
16. Toeeng bʋs la yʋʋm kob-yendẽ kiris-nebã maan-yã?
16 A Poll tẽega yʋʋm kob-yendẽ kiris-neb nins sẽn zae ne vʋʋsem sõngã tɩ bãmb kẽer da yaa yoaadba, rap sẽn wẽneg n gãe taaba, wagda, rat-tɩ-loog rãmba, rã-tɩgdba, nin-tʋʋdb la belg-n-dɩ rãmba. (1 Korẽnt dãmba 6:9-11) Biiblã sɩd kɩtame tɩ b toeem wʋsgo. B “paama pekre.” Mams-y n ges yãmb vɩɩmã sẽn da na n yɩ to-to, sɩdã sẽn kõt fãagrã yãmb sẽn zãms Biiblã pʋgẽ wã sã n da kaẽ. Sɩd-sɩda, sɩdã yaa bũmb yõod sẽn ka mak-n-taaga. Ad d sɩd tar sũ-noogo, a Zeova sẽn taasd tõnd a goama!
17. Wãn to la a Zeova Kaset rãmbã paam rɩlgr tẽebã wɛɛngẽ kiris-neb tigissẽ wã?
17 Sẽn paase, tags-y bark nins d sẽn tare, d saam-biisã sẽn yaa buud toor-toorã sʋka! ‘Tʋm-tʋmd sẽn tũud sɩd la sẽn tar yamã’ kõta tẽebã rɩɩb wakat sẽn zemse, tɩ Biibl dãmba, zʋrno rãmb la sɛb a taab buud-goam wʋsg pʋgẽ be sʋka. (Matɩe 24:45-47) Yʋʋmd 2000 wã pʋgẽ, tigingã tigissẽ a Zeova Kaset rãmbã sẽn be tẽns wʋsg pʋsẽ wã lebg n gesa Hebre Gʋlsg Sõamyã seb-bɛd a nii zãms yẽga. B tagsa neb 40 vɩɩm zugu, Biiblã sẽn gom b yelle, tɩ b gom b yell Étude perspicace des Écritures pʋgẽ wã. B zãmsa Le plus grand homme de tous les temps sebrã yembr naas zugu, la Prêtez attention a la prophetie de Daniel sebrã zãng la bala. B zãmsa Gũusg Gasgã sõss 52, la b wɛgs a sõss a taab 36 tigiss a taabẽ. Sẽn paase, a Zeova nin-buiidã paama zãmsg ne D Rĩungã Ministɛɛr dãmb 12 la semen fãa zãma sõss sẽn tik Biiblã gom-zut toɛ-toɛ zutu. Ad sɩd yaa tẽeb rɩɩb wʋsg la b kõ-do!
18. Wãn to la d paamd sõngr kiris-neb tigingã pʋgẽ?
18 Dũniyã gill zugu, sẽn yɩɩd tigims 91 000 n sõngd la b kengd nebã raoodo, tigissã la lagem-n-taarã maasem yĩnga. D leb n paamda kiris-nin-taas sẽn bɩ teelg sẽn dat n sõng-d tẽebã wɛɛngẽ. (Efɛɛz rãmba 4:11-13) N-ye, d paama nafa wʋsg d sẽn bãng sɩdã. D sẽn mi a Zeova la d sõgend-a wã kõt-d-la sũ-noogo. Ad yɩɩl gʋlsdã sẽn gʋls woto wã goam sɩd yaa sɩda: “Bark bee neb nins Zusoaba sẽn yaa bãmb Wẽnnaama zutu.”—Yɩɩl Sõamyã 144:15.
Y tẽrame bɩ?
• Sẽn deng kiris-nebã wakatã, ne ãnd dãmb la a Zeova gom ne?
• Wãn to la tẽebã vẽenem yãg n paas yʋʋm kob-yendẽ wã, la tõnd wakatã?
• Bark bʋs la d paamda, d sẽn vɩ tɩ zems ne a Zeova bãngrã?
• Bõe yĩng tɩ d kɩdemd d sẽn mi Wẽnnaamã?
[Zãmsgã sogsgã]
[Foto rãmba, seb-neng 22]
A Zeova taasa a raabã a Moiiz, a Nowe la a Abrahaam
[Foto, seb-neng 23]
Tõnd wakatã, a Zeova kõo vẽnegr a Gomdã zugu
[Foto rãmba, seb-neng 24]
Tags-y n ges bark ning d sẽn tare, d sẽn be saam-biis sẽn yaa buud toor-toor sʋkã!