Karemdbã sʋgsgo

A Zeova sẽn dat n tũnug ne maoong ning sẽn yaa rondã n kõ sugrã, bõe yĩng masã tɩ yaa tɩlae ne kiris-nebã tɩ b togs tigingã kãsem dãmb b yel-wẽnã?

Wala a Davɩɩd la a Batseba kɩbarã sẽn wilgd vẽenegã, a Zeova kõo a Davɩɩd sugri, baa ne a yel-wẽndã sẽn da yaa kãsengã, a Davɩɩd sẽn sɩd tek yam n kos sugrã yĩnga. No-rɛɛs a Natã sẽn da wa n gom ne-a wã, a Davɩɩd sak n togsa woto: “Mam beega Zusoabã.”—2 Sãmwɛll 12:13.

Baasg zãnga, a Zeova pa kõt yel-wẽn-maand sẽn togsd a yel-wẽn ne pʋ-peelem sugr bal ye, la a maana segls ne nonglem me sẽn na yɩl n sõng sẽn beeg-a wã t’a paam sãoogr tẽebã wɛɛngẽ. A Davɩɩd nengẽ wã sõngrã tũu ne a Natã n wa. Rũndã-rũndã, kiris-neb tigingã pʋgẽ, kẽem dãmb bɩ kãsem dãmb sẽn bɩ tẽebã wɛɛngẽ n be. Karen-biig a Zak wilgdame: “Ned bee yãmb sʋk n ka laafɩ bɩ? Bɩ a bool Wẽnnaam tẽedba kãsem dãmba, la bɩ bãmb tik a soab ne kaam ne Zusoaba yʋʋre n pʋʋsd Wẽnnaam a yĩnga. Tẽeb pʋʋsg na maag bãadã, la Zusoaba na yik-a t’a paam laafɩ, la yẽ sã n da maan yel-wẽna, a na paam sugri.”—Zak 5:14, 15.

Kãsem dãmb sẽn tar minimã maanda yɛl wʋsg n yols sũ-sãangã sẽn be ne yel-wẽn-maandã a beegrã yĩngã. B maoodame n na n dɩk a Zeova togs-n-taare, b manesmã ne yel-wẽn-maandã pʋgẽ. B pa tol n dat n yɩ nin-toose, baa kiblg sẽn tar pãng sã n zemsame ye. Sẽn yaa lebende, b geta nedã zĩig pʋgẽ ratem ne nimbãan-zoeere. B maagda b yĩng n dems beegdã tagsg n tũnug ne Wẽnnaam Gomdã. (Galat dãmba 6:1) Baa ned sã n pa wa a toor n togs a yel-wẽndã, b ket n tõe n sõng-a lame t’a tek yam n kos sugri, kãsem dãmbã sã n tɩ gom ne-a, wala a Natã sẽn tɩ gom ne a Davɩɩdã. Woto, sõngr ning kãsem dãmbã sẽn kõtã sõngda yel-wẽn-maandã t’a ra yɩlem yel-wẽndã, la a põs sũur sẽn diglem sẽn kɩtd tɩ ned minim yel-wẽn maanegã biis sẽn yaa wẽnsã.—Hebre dãmba 10:26-31.

Sɩd-sɩda pa nana tɩ f togs neb a taab yɛl f sẽn get tɩ yaa yãnde, n bao n paam Wẽnnaam sugr ye. Rẽnda f sɩd tall raood n tõog n maan woto. La tags-y bilf n gese. Rao a yembr sẽn pa togs yel-wẽn-kãseng a sẽn maan tigingã kãsem dãmb yeela woto: “Toog n da be mam sũurẽ wã n pa satẽ ye. Mam modgame n paas koe-moonegã pʋgẽ, la mam sũur kasetã ra ket n zabda maam.” A tagsame t’a sẽn togs Wẽnnaam a yel-wẽndã pʋʋsg pʋgẽ wã ra sekame, la ra pa sek ye, bala a sẽn tall yĩn-sids ninsã wõnda a Davɩɩd sẽn tall b rãmbã. (Yɩɩl Sõamyã 51:10, 13) Ad sẽn sɩd são n yɩɩd yaa d sẽn na n sak sõngr ne nonglem ning a Zeova sẽn tũnugd ne kãsem dãmbã n kõtẽ wã!