Ra lebg-y kɛlgdb sẽn yaa yĩmdb ye
Ra lebg-y kɛlgdb sẽn yaa yĩmdb ye
“Bɩ yãmb yɩ koe-sakdba, la y ra yɩ koe-kɛlgdb bala, sẽn belgd yãmb mens ne tagsg sẽn ka sɩd ye.”—ZAK 1:22.
1. Yel-solem bʋs la tẽn-kʋdem wẽndẽ Israɛll nebã ra paam zu-noog n maan kaset ne?
“YEL-PA-YĨMDGA.” Kada n yaa gomd ning sẽn zemse, sẽn na yɩl n bilg yel-soalem nins a Zeova sẽn maan tẽn-kʋdem wẽndẽ Eziptã. Tood Piigã a ye fãa yaa kãseng wʋsg tɩ kɩɩsg ka be ye. Tood kãensã poore, fãagr sẽn yaa kãseng la b wa ne n kõ Israɛll nebã tɩ b pasg Mog-Miuugã koom. (Tõodo 34:10-12) D tẽedame tɩ y sã n da maanẽ-la kaset ne yel-kãensã, y kõn tol n yĩm a Soab ning sẽn maan-bã ye. Ne rẽ fãa yɩɩl-gʋlsdã yɩɩll pʋgẽ a yeelame tɩ Israɛll nebã “yĩma Wẽnnaam sẽn yaa bãmb fãagda, sẽn maan bõn-kãsems nins Ezipt pʋgẽ wã, la bõn-bãn nins b sẽn maan a Kam yagensa soolem pʋgẽ wã la bõn-yɛɛsds nins bãmb sẽn maan Mogr Miuuga zĩigẽ wã.”—Yɩɩl Sõamyã 106:21, 22.
2. Bõe n wilgd tɩ Israɛll nanebã ne Wẽnnaam tʋʋmã sẽn tar pãngã pa kaoose?
2 B sẽn pasg Mog-Miuugã poore, Israɛll nebã “zoee Zusoaba la bãmb tẽe Zusoabã.” (Yikri 14:31) Israɛll dapã naaga a Moiiz n yɩɩl tõogr yɩɩll n pẽg a Zeova, t’a Miriam ne pagb a taabã wẽ sɩlsags la b sao. (Yikri 15:1, 20) N-ye, a Zeova tʋʋmã sẽn tar pãngã yɩɩ kãsems wʋsg a nin-buiidã nifẽ. La naneb ning b sẽn tall ne a Soab ning sẽn tʋm tʋʋm-kãensa wã pa kaoos ye. Rẽ poor bilf bala, bãmb wʋsg maana wa b bẽeda yam-yĩmsem bãaga. B yẽgma ne a Zeova. Kẽer kẽe bõn-naands pʋʋsg la yoob pʋgẽ.—Sõdbo 14:27; 25:1-9.
Bõe n tõe n kɩt tɩ tõnd yĩm?
3. D sẽn pa zems zãngã yĩnga, bõe la d tõe n yĩm?
3 Israɛll nanebã kaalem sɩd ka neer ye. La woto yaoog n tõe n paama tõndo. Yaa sɩd tɩ d pa yã Wẽnnaam yel-solem-kãensã ne d nin ye. La d sẽn bãng Wẽnnaam sõma wã tɛka, sɩd-sɩda yɛl n zĩnd sasa kẽer tɩ d pa tõe n yĩm-b ye. Tõnd neb kẽer tõe n tẽra d sẽn wa n sak sɩd ning sẽn yit Biiblã pʋgẽ wã yelle. Tõnd sẽn pʋʋs n dɩk d meng n kõ a Zeova la d sẽn deeg koom lisg n lebg kiris-neb hakɩkã tõe n bee tõnd sũ-nood sasa wã sʋka. Tõnd wʋsg paama a Zeova sõngr sasa a taab d vɩɩmã pʋgẽ. (Yɩɩl Sõamyã 118:15) Sẽn yɩɩd fãa, Wẽnnaam Biribl a Zezi Kirist kũumã sẽn yaa maoongã maasem, tõnd paama fãagr saagre. (Zã 3:16) La tõnd sẽn pa zems zãngã yĩnga, d sã n wa segd tʋlsem wẽns la yɩɩr vɩɩmã pʋgẽ, tõnd me tõe n wa yĩma bõn-sõma nins a Zeova sẽn maan d yĩngã nana-nana.
4, 5. a) Wãn to la a Zak yeel tɩ d gũus n da wa lebg kɛlgdb sẽn yaa yĩmdba? b) Wãn to la d tõe n tũ makr ning a Zak sẽn kõ nedã ne nin-gɛtgã wɛɛngẽ wã zãmsgo?
4 A lɛtr ning a sẽn taas a kiris-nin-taasã pʋgẽ, a Zezi ma-biig a Zak yeelame tɩ d gũus n da wa lebg kɛlgdb sẽn yaa yĩmdb ye. A gʋlsame: “Bɩ yãmb yɩ koe-sakdba, la y ra yɩ koe-kɛlgdb bala, sẽn belgd yãmb mens ne tagsg sẽn ka sɩd ye. Tɩ bõe, ned sã n yɩ koe-kɛlgda la a ka koe-sakda, yẽ wẽnda ned sẽn ges a neng nin-gɛtg pʋgẽ, la a sẽn ges a neng n sɛ, a loogdame. La tao-tao bala, a yĩmda a sẽn wẽnd bũmb ninga.” (Zak 1:22-24) Bõe la a Zak ra rat n yeel ne gom-kãensã?
5 Tõnd sã n yik yibeoogo, d nong n geta nin-gɛtgẽ n bãng d sẽn segd n maneg d mengã zĩis ninsi. D sã n wa maand tʋʋm toɛy-toɛy tɩ d yamã tik yɛl a taab zutu, d tõeeme n ye pa tagsd tõnd sẽn yã bũmb ning nin-gɛtgẽ wã yell ye. Tõe n yɩɩ woto tẽebã wɛɛngẽ me. D sã n ges Wẽnnaam Gomdã pʋgẽ, d tõe n maka tõnd sẽn ya a soabã ne a Zeova sẽn gũud tɩ tõnd yɩ a soabã. Yaa rẽ sasa la d sɩd wat n yã d pãn-komslmã. D sẽn mi rẽ wã segd n tus-d lame tɩ d rems d zʋgã. La d sã n wa tʋmd d raasenkam tʋʋmã la d maood ne d zu-loeesã, d tõee nana-nana n bas n ye pa tagsd tẽebã yɛl yell ye. (Matɩe 5:3, NW; Luk 21:34) Yaa wa tõnd yĩma Wẽnnaam nonglem tʋʋmã a sẽn maan tõnd yĩngã. Rẽ sã n wa zĩndi, d pãngã ye pa wʋsg yel-wẽnã tʋlsem taoor ye.
6. Gʋlsg Sõamyã zĩ-bʋg vaeesg n na n sõng tõnd tɩ d ra yĩm a Zeova goamã?
6 A pipi lɛtr ning vʋʋsem sõngã sẽn vẽneg t’a gʋls n taas Korẽnt dãmbã pʋgẽ, tʋm-tʋmd a Poll goma Israɛll nebã sẽn da be rasempʋɩɩgẽ wã sẽn yaa yĩmdbã yelle. Wa a Poll goamã sẽn naf yʋʋm kob-yendẽ kiris-nebã, d sã n lebg n ges bũmb ning a sẽn gʋlsa tõe n sõnga tõnd tɩ d ra yĩm a Zeova goamã ye. Bɩ d ges 1 Korẽnt dãmba 10:1-12.
Zãgs-y dũniyã tʋlsem
7. Kaset vẽeneg bʋg la Israɛll nebã paam sẽn wilgd t’a Zeova nong-b lame?
7 A Poll sẽn yet bũmb ning Israɛll nebã wɛɛngẽ wã yaa keoogr n kõ kiris-nebã. A Poll gʋlsame: “Mam ka rat tɩ yãmb zɩ tɩ tõnd yaab rãmba fãa ra zĩnda sawadg tẽngre, la fãa pɩʋʋga mogr Miuugã, la bãmb fãa paama a Moiiz lisg sawadg pʋgẽ la mogr pʋgẽ.” (1 Korẽnt dãmba 10:1-4) A Moiiz wakatã Israɛll nebã yãa Wẽnnaam sẽn wilg a pãngã ne manesem kãsengã. B yãa sawad-taok sẽn yaa yel-solemd sẽn yãag-b wĩndga, n sõng-b tɩ b põs n pɩʋʋg Mog-Miuugã. (Yikri 13:21; 14:21, 22) N-ye, Israɛll nin-kãensã paama kaset vẽeneg t’a Zeova nong-b lame.
8. Israɛll sẽn da yaa yĩmd tẽebã wɛɛngẽ wã biis yɩɩ bõe?
8 A Poll kẽngda taoor woto: “La Wẽnnaam sũur ka yɩ noog ne bãmb neb wʋsg ye; tɩ bõe, bãmb kii weooga pʋgẽ.” (1 Korẽnt dãmba 10:5) Ad sɩd yaa kaeto! Israɛll neb nins sẽn yi Eziptã wʋsg sẽn yɩɩd pa wilg tɩ b zemsa ne Kãabg Tẽngẽ wã kõom ye. Wẽnnaam zãgs-b-la b tẽeb kaalmã yĩnga, tɩ b ki weoogã pʋgẽ. (Hebre dãmba 3:16-19) Bõe zãmsg la rẽ tõe n kõ tõndo? A Poll yeelame: “Bõn-kãens yɩɩ mamsg tõnd yĩnga tɩ bõn-wẽns ratem kõn pid tõnd wa sẽn da pid bãmba ye.”—1 Korẽnt dãmba 10:6.
9. Bõe la a Zeova kõ a nin-buiidã, la Israɛll manesem yɩɩ wãn to?
9 Yɛl wʋsg la Israɛll nebã ra tar n na n maan tẽebã wɛɛngẽ b sẽn da wa n be weoogã pʋgẽ. B ra kẽe kaool pʋgẽ ne a Zeova n lebg buud sẽn dɩk a meng n kõ-a. Sẽn paase, b ra kõ-b-la maan-kʋʋre, sɛk-roog sẽn da yaa balengã nifu, la b ra maan segls tɩ b tõe n maan maand n kõ a Zeova. La bãmb pa kɩdem tẽeb kũun kãensã yĩng ye, sẽn yaa lebende, b pa tall naneb ne bũmb nins Wẽnnaam sẽn kõ-bã ye.—Sõdbo 11:4-6.
10. Bõe yĩng tɩ d segd n tags Wẽnnaam yell wakat fãa?
10 Sẽn yaa lebend ne Israɛll nebã sẽn da be weoogã pʋgẽ wã, rũndã-rũndã, a Zeova nin-buiidã tata a yam. La tara yõod tɩ ned fãa ket n tagsd Wẽnnaam yelle. D sã n maan woto, na n sõng-d lame tɩ d zãgs rat-m-yembr tagsa sẽn tõe n libs tõnd tẽebã nenemã. D segdame n dɩk sard ne d meng n “bas Wẽnnaam kɩɩsgo la dũniyã ratem sẽn yaa wẽnsã, la d gũus d mens dũniyã ka masã n maan tɩrga la d sak Wẽnnaam.” (Tɩt 2:12) Tõnd sʋkã neb nins sẽn maand tũud-n-taar ne kiris-neb tigingã hal b yãadem wakatã pa tol n segd n tags tɩ b konga bõn-sõng ye. Tagsa a woto sã n wa kẽ tõnd yamẽ wã fãa, d segd n tẽega a Zeova yelle, la bark kãsems nins a sẽn bĩng d yĩngã.—Hebre dãmba 12:2, 3.
D sak a Zeova zãng-zãnga
11, 12. Wãn to la Wẽnd tõe n ges ned wa bõn-naands pʋʋsd t’a soabã yaool n pa pʋʋs bõn-naands meng-menga?
11 A Poll kõta tõnd keoogr a to, a sẽn wa n gʋls tɩ: “Bɩ y ra yɩ bõn-naands pʋʋsdb wa bãmb neb kẽer sẽn da maana ye, a wa sẽn gʋlsã: ‘Neba zĩndame n dɩ la b yũ, la b yikame n maan deem.’” (1 Korẽnt dãmba 10:7) A Poll gomda sasa ning Israɛll nebã sẽn da tõog n kɩt t’a Aarõ maan sãnem nag-bilã yelle. (Yikri 32:1-4) Baa ne d sẽn pa na n pʋʋs bõn-naands vẽeneg d balengã pʋgẽ wã, d tõe n lebga bõn-naands pʋʋsdba, d sã n basdẽ tɩ d rat-m-yembr tʋlsmã kɩt tɩ d ye pa sõgend a Zeova ne d sɩɩgã fãa ye.—Kolos rãmba 3:5.
12 Sasa a to, a Poll gʋlsa neb nins yĩngã yɛl sẽn pak n yɩɩd tẽebã yɛlã wɛɛngẽ. Sã n yaa ne neb nins sẽn “be tɩ b kẽnd wilgdẽ tɩ bãmb yaa Kirist kũum dapɩka bɛɛba” wɛɛngẽ a gʋlsa woto: “Bãmb baoosg na n yɩɩ sãoongo, bãmb pʋsã n yaa b wẽnnaam.” (Filip rãmba 3:18, 19) Bãmb nengẽ wã ra pa bõn-naandg b sẽn pees la b ra pʋʋsd ye. Ra yaa bãmb mengã yĩng tʋlsem. Yaa sɩd tɩ pa tʋlsem fãa n yaa wẽng ye. A Zeova naana ninsaal ne ratem, la a kõ-a tõog t’a tõe n noog a yõor ne manesem buud toor-toore. La neb nins sẽn dɩk yõ-noogrã n lʋɩɩs taoor tɩ b zoodã ne Wẽnnaam leb poorẽ wã sɩd lebgda bõn-naands pʋʋsdba.—2 Tɩmote 3:1-5.
13. Bõe zãmsg la d tõe n paam sãnem nag-bilã kɩbar pʋgẽ?
13 Israɛll nebã sẽn yi Eziptã poore, b maana sãnem nag-bil n balem. B sẽn yeel tɩ b gũus ne bõn-naands pʋʋsgã toor sẽn ka be, zãmsg a to sẽn tar yõod n be kɩba-kãngã pʋgẽ. Israɛll nebã kɩɩsa a Zeova noor vẽenega. (Yikri 20:4-6) La b yaool n da pa baood n na n zãgs t’a Zeova pa b Wẽnnaam ye. B maana maand n kõ nag-bil b sẽn kudi, n yeel tɩ yaa “kibs Zusoaba waoogr yĩnga.” B belga b mens n tags tɩ Wẽnnaam da pa na n ges tɩ yaa kɩɩsg ye. Woto wã b tʋʋsa a Zeova, tɩ kɩt t’a sũurã yik wʋsgo.—Yikri 32:5, 7-10; Yɩɩl Sõamyã 106:19, 20.
14, 15. a) Bõe yĩng tɩ Israɛll nebã ra pa tar bʋʋm n na n yɩ kɛlgdb sẽn yaa yĩmdba? b) Tõnd sã n sɩd pa rat n yɩ kɛlgdb sẽn yaa yĩmdba, d manesem na n yɩɩ bõe ne a Zeova noyã?
14 A Zeova Kaset soab pa na n yɩ tao-tao n lagem a meng ne ziri tũudmã ye. La neb kẽer tõeeme n ket n be tigingã pʋgẽ n zãgsd a Zeova sor-wilgrã yɛl kẽer pʋsẽ. Israɛll nin-buiidã ra ka bʋʋm n na n yɩ kɛlgdb sẽn yaa yĩmdb ye. B wʋma Noy Piigã, la yɩɩ b taoor la a Moiiz kõ-b Wẽnnaam no-kãngã: “Bɩ y ra maan wẽnnaam dãmb ne wanzuri walla sãnem yãmb mens yĩnga n paas maam ye.” (Yikri 20:18, 19, 22, 23) Ne rẽ fãa, Israɛll nebã balma sãnem nag-bilã.
15 Tõnd me pa tar bʋʋm n na n yɩ kɛlgdb sẽn yaa yĩmdb ye. Gʋlsg Sõamyã pʋgẽ, d tara sagls sẽn yit Wẽnnaam nengẽ sẽn tik vɩɩmã nens wʋsg zutu. Wala makre, a Zeova Gomdã yeela vẽeneg tɩ pa sõma tɩ d minim n pengd ligd n pa lebsdẽ ye. (Yɩɩl Sõamyã 37:21) B sagenda kambã tɩ b sak b roagdbã, la b gũudame tɩ ba rãmbã wub b kambã ne “Zusoaba saglgo la zãmsgo.” (Efɛɛz rãmba 6:1-4) B kõo kiris-neb nins sẽn yaa rakõpã noor tɩ b kẽ kãadem ne “ned sẽn tũud Zusoaba bala,” la b yeel Wẽnnaam sõgen dãmb nins sẽn kẽ kãadmã tɩ: “Bɩ kãadem zĩnd waoogre ne neba fãa, la y ra sak tɩ gãag sãam ne wẽng ye. Tɩ bõe, Wẽnnaam na n kaoo raglem dãmba ne nin-yoaadba bʋʋdo.” (1 Korẽnt dãmba 7:39; Hebre dãmba 13:4) Tõnd sã n sɩd pa rat n yɩ kɛlgdb sẽn yaa yĩmdba, d pa na n deem ne sagl-kãensã la a taab sẽn yit Wẽnnaam nengẽ wã ye, d na n tũ-b lame.
16. Sãnem nag-bilã baleng biis yɩɩ bõe?
16 Israɛll nebã sẽn mak n na n balem a Zeova wa bãmb mens sẽn dat to-to wã a pa sak ye. Ayo, la bãmb 3000 la b kʋ-yã, tõe tɩ yaa b sẽn yɩ sabab tɩ nebã kɩɩs n balem sãnem nag-bilã yĩnga. Toog sẽn yit a Zeova nengẽ n wa wẽng maandb a taabã zutu. (Yikri 32:28, 35) Ad woto sɩd yaa zãmsg n kõ neb nins fãa sẽn zãmsd Wẽnnaam Gomdã, la sẽn yãkd bãmb sẽn dat n tũ noy ninsã!
“Bɩ y zoe yoobo”
17. Bõe yell la 1 Korẽnt dãmba 10:8 ra gomda?
17 A Poll goma zĩig a yembr yĩngã tʋlsem sẽn tõe n kɩt tɩ ned yɩ yĩmd tẽebã wɛɛngẽ yell a sẽn wa n yeel tɩ: “Bɩ tõnd da maan yoob wa bãmb neb kẽer sẽn maan tɩ tus pisi la a tã ki daar a yembra ye.” (1 Korẽnt dãmba 10:8) Ka wã a Poll gomda bũmb sẽn zĩnd Moaab Rasempʋɩɩgẽ wã, Israɛll nebã sẽn wa n ta b yʋʋm 40 kẽn-toogã saab weoogã pʋgẽ wã. Sẽn da pa kaoos pʋgẽ Israɛll nebã paama a Zeova sõngr n deeg Zʋrdẽ yaang babg tẽngã, la neb wʋsg yɩɩ yĩmdba, n pa tall mi-beoog ye. Kãabg Tẽngã noore, b belg-b lame n kẽes yoob pʋgẽ la Peoor Baallã baleng sẽn yaa rẽgdã pʋgẽ. Neb 24 000 la b kʋ-yã. Bãmb sʋkã, neb 1000 n yɩ taoor lʋɩtb n kʋɩɩb neb a taaba.—Sõdbo 25:9.
18. Manesem bʋg buud n tõe n wa baas ne yoobo?
18 Rũndã-rũndã b mii a Zeova nin-buiidã wa neb sẽn tũud noy sẽn yaa sõma wʋsg nins sẽn tɩ loe ne yoobã yɛlã. La yoob tʋlsem sẽn wa n mak kiris-neb kẽere, b yĩma Wẽnnaam la a noyã yell tagsgo. B lebga kɛlgdb sẽn yaa yĩmdba. Pipi wã, makrã tõeeme n pa tɩ loe ne yoob meng ye. Tõe n sɩnga ne yoob yɛl wilgr tʋlg n gese, yoob kʋʋsem goam bɩ rolsem manesem, bɩ tũud-n-taar maaneg ne neb sẽn tõe n maan yoob nana-nana. Bõn-kãensã fãa tusa kiris-neb n kẽes yel-wẽn pʋgẽ.—1 Korẽnt dãmba 15:33; Zak 4:4.
19. Gʋlsg Sõamyã sagl-bʋg n sõngd tõnd tɩ d “zoe yoobo”?
19 Makr sã n wa rat tɩ tõnd maan yoobo, d pa segd n bas a Zeova yell tagsg ye. Sẽn yaa lebend ne rẽ, d segd n tũu noy sẽn be a Gomdã pʋgẽ tɩ b tẽegd tõndã. (Yɩɩl Sõamyã 119:1, 2) D sẽn yaa kiris-nebã, tõnd wʋsg sẽn yɩɩd maanda d sẽn tõe fãa sẽn na yɩl n da rẽgem d mens yoobã wɛɛngẽ, la d sã n dat n maan sẽn yaa tɩrga rẽnda d modg wakat fãa. (1 Korẽnt dãmba 9:27) A Poll gʋlsa kiris-neb nins sẽn be Romã woto: “Yãmb sakr kɩbar saaga zĩiga fãa. Dẽ yĩnga, mam tara sũ-noog yãmb yĩnga. La mam datame tɩ yãmb yɩ yẽesem dãmb ne bũmb nins sẽn yaa sõama, la pʋ-peelem dãmb ne bũmb nins sẽn yaa wẽnsã.” (Rom dãmba 16:19) Wa b sẽn kʋ Israɛll neb 24 000 b yel-wẽnã yĩngã, yoaadbã la wẽng maandb a taabã na n paama a Zeova taal bʋ-kaoorã ka la bilfu. (Efɛɛz rãmba 5:3-6) Tõnd pa segd n lebg kɛlgdb sẽn yaa yĩmdb ye, la d segd n ket n ‘zoeta yoobo.’—1 Korẽnt dãmba 6:18.
Wakat fãa, bɩ d tall naneb ne bũmb nins a Zeova sẽn kõt-dã
20. Wãn to la Israɛll nebã mak a Zeova sũ-marã sẽn tõe n ta zĩig ninga, la a biisã yɩɩ bõe?
20 Kiris-neb hakɩkã wʋsg sẽn yɩɩd zɩ n yo ye. La d segd n gũusame n da tall manesem sẽn wat ne yẽgengo, sẽn tõe n wa kɩt tɩ Wẽnnaam zãgs tõnd ye. A Poll sagenda tõnd woto: “Bɩ tõnd da mak Zusoaba wa [Israɛll] neb kẽer sẽn mak bãmb tɩ wiis sãam bãmba ye. Bɩ yãmb da yẽgem wa bãmb neb kẽer sẽn da yẽgem tɩ sãamda sãam bãmba ye.” (1 Korẽnt dãmba 10:9, 10) Israɛll nebã yẽgma ne a Moiiz la a Aarõ, n-ye, b yẽgma ne Wẽnnaam mengã, n yẽgem manna a sẽn kõ ne yel-solemdã wɛɛngẽ. (Sõdbo 17:6; 21:5) B yẽgengã beega a Zeova n ta b yoobã bɩ? Biiblã wilgdame tɩ wiisã kʋʋ neb wʋsg sẽn yẽgem. (Sõdbo 21:6) Sẽn deng yel-kãngã, sẽn yɩɩd yẽgemdb sẽn yaa tõtb 14 700 la b kʋ-yã. (Sõdbo 17:14) Woto, bɩ d ra mak n ges a Zeova sũ-marã sẽn tõe n ta zĩig ninga, n tall paoogr ne bũmb nins a sẽn kõ wã ye.
21. a) Sagl-bʋg la vʋʋsem sõngã vẽneg a Poll t’a gʋlse? b) Sã n yaa ne Zak 1:25, wãn to la d sɩd tõe n tall sũ-noogo?
21 A sẽn da wa n gʋlsd a kiris-nin-taasã, a Poll baasa a keoogrã ne sagl-kãngã: “La bõn-kãens maana bãmb tɩ yɩ mamsgo, la bãmb gʋlsa tõnd saglg yĩnga, tõnd sẽn be dũniyã sɛɛb wakata yĩnga. Dẽ yĩnga, ned ninga sẽn tẽed t’a yasame, bɩ a gũus n da wa lʋɩ ye.” (1 Korẽnt dãmba 10:11, 12) Tõnd me paama bark wʋsg sẽn yit a Zeova nengẽ wa Israɛll nebã sẽn paama. La sẽn yaa lebend ne bãmb sẽn maanã, bɩ d ra tol n yĩm n pa tall naneb ne bõn-sõma nins Wẽnnaam sẽn maand n kõt tõndã ye. Vɩɩmã yɩɩr sã n wa zɩsg tõndo, bɩ d tags kãab-kãsems nins sẽn be a Gomdã pʋgẽ wã yelle. Bɩ d tẽeg d zems-n-taarã sẽn tar yõod wʋsg ne a Zeova wã yelle, la d ket n maand Rĩungã mooneg tʋʋmd b sẽn bobl tõndã. (Matɩe 24:14; 28:19, 20) Manesem a woto na n sɩd kõ-d-la sũ-noog hakɩka, bala Gʋlsg Sõamyã kãabdame: “La ned ninga sẽn get tõog sẽn zems zãnga sẽn yaa lohorem tõogã, la sẽn ket n get daar fãa, la sẽn kelgda n ka yĩmdẽ, la sẽn sakda, bark na n zĩnda yẽ zugu a sẽn maand woto wã yĩnga.”—Zak 1:25.
Wãn to la y na n leokẽ?
• Bõe n tõe n kɩt tɩ d yɩ kɛlgdb sẽn yaa yĩmdba?
• Bõe yĩng tɩ sakr zãng-zãng ne Wẽnnaam tar yõod wʋsgo?
• Wãn to la d tõe n “zoe yoobo”?
• Tõnd manesem segd n yɩɩ wãn to ne bũmb nins a Zeova sẽn kõt tõndã?
[Zãmsgã sogsgã]
[Foto, seb-neng 11]
Israɛll nebã yĩma tʋʋm-kãsems nins a Zeova sẽn maan b yĩngã
[Foto, seb-neng 12]
A Zeova nin-buiidã rɩka sard tɩ b na n ket n tũuda noy nins sẽn yaa sõma wʋsg sẽn tɩ loe ne yoobã yɛlã