“Zoa poglgo”

TƲƲM-TƲMD a Poll yãame t’a segd n demsa pipi yʋʋm kob-gĩndẽ kiris-neb nins sẽn da be Galatã. Sẽn na yɩl tɩ ned ba a yembr da wa sãam a sũur ne saglgã a sʋkame: “Mam lebga yãmb bɛ mam sẽn togs yãmb sɩda yĩng bɩ?”—Galat dãmba 4:16.

A Poll sẽn ‘togs-b sɩdã’ a pa lebg b bɛ ye. Sɩda, a sẽn da maandã zemsa ne Biiblã no-kãngã: “Poglg ninga f zoa sẽn maan fooma yaa sɩd yĩnga.” (Yelbũna 27:6) A ra miime tɩ rẽ ra tõe n pogla sẽn tudg-bã yĩn-sidga. La a ra miime tɩ f sã n bas n pa kibl yel-wẽn-maanda f mongd-a-la nonglem ning a Zeova sẽn dat n wilg-a wã. (Hebre dãmba 12:5-7) Woto yĩnga, a Poll sẽn da yaa zoa sẽn yaa kɩs-sɩd soab sẽn sɩd rat tigingã neerã pa bas n pa kõ saglg sẽn kõt remsg ye.

Rũndã-rũndã, a Zeova Kaset rãmbã pidsda b tʋʋmdã sẽn yaa “maan neba buud fãa tɩ b yɩ . . . karem-biisi . . . La zãms bãmb tɩ b sak bũmb nins fãa [a Zezi Kirist] sẽn da togs[ã].” Kiris-nin-kãensã sẽn tar pʋ-peelmã sã n maand woto, b pa kɩɩsd Biiblã sẽn pukd ziri zãmsgã la manesem ning sẽn kɩɩsd kiris-nedemdã rẽndã ye. (Matɩe 15:9; 23:9; 28:19, 20; 1 Korẽnt dãmba 6:9, 10) D pa segd n ges-b wa bɛɛb n zãgs-b ye. Sẽn yaa lebende, b wilgdame tɩ b yaa zo-rãmb sɩd-sɩda.

Yɩɩl gʋlsdã paama yam sẽn yit Wẽnnaam vʋʋsem sõngã vẽnegr pʋgẽ n gʋls woto: “Nin-tɩrg sã n wẽed maam, yaa ne nonglem la yẽ sɩbgd maam. [“La m kõn tõdg rẽ ye,” NW ].”—Yɩɩl Sõamyã 141:5.