Kɩt-y tɩ nebã fãa yã tɩ y bɩtame
Kɩt-y tɩ nebã fãa yã tɩ y bɩtame
“Wɩng ne bõn-kãense la f maan ne f sũur fãa, tɩ neba fãa yã tɩ fo bɩtame.”—1 TƖMOTE 4:15.
1. Wakat bʋg la y tõe n yeel tɩ tɩɩg biig bɩɩme n dat rɩɩbo?
MAMS-Y n ges tɩɩg biig ning yãmb sẽn nong n yɩɩdã. Tõe n yaa gʋyaaka, banaan bɩ mangi, wall bũmb a to. Y tõe n bilga a sẽn na n wa bɩ tɩ kell rɩɩb masã bal bɩ? Rẽ yaa vẽenega. Tɩɩgã biig bɩʋʋngo, a kõbgã la a yũugã fãa wilgdame t’a rɩɩb noomame. Y sã n wa lɛmb-a yɩt-y la noog wʋsgo. Nooseng tura! Sɩd yaa bũmb sẽn be yamleoog wʋsgo.
2. Wãn to la bɩʋʋngã pukda, la a kɩtdame tɩ d manesmã ne neb a taabã yaa wãn-wãna?
2 Vɩɩmã tara yɛl a taab sẽn wõnd tɩɩg biig rɩɩb sẽn be yamleoogã. Wala makre, wa tɩɩg biig bɩʋʋngã, tẽebã wɛɛngẽ bɩʋʋngã me yaa vẽeneg manesem toɛ-toɛy pʋsẽ. D bãngdame tɩ ned bɩɩme, d sã n wa ne t’a tara yam-vẽenem n paas bõn-sõma a taaba. (Zoob 32:7-9) Sɩd bee yamleoog tɩ d lagem n tʋm ne neb sẽn tar manesem kãensã b vɩɩmã pʋgẽ.—Yelbũna 13:20.
3. A Zezi sẽn bilg a zãmaanã neb to-to wã wilgda bõe bɩʋʋngã wɛɛngẽ?
3 La ned tõeeme n bɩ yĩngã wɛɛngẽ, la a sẽn gomd la a maand yɛlã to-to wã tõe n wilgame t’a pa bɩ sũur tagsgã la tẽebã wɛɛngẽ ye. Wala makre, a Zezi Kirist goma yẽ zãmaanã neb sẽn yaa kɩɩsdbã yell woto: “A Zã sẽn wa, a ka rɩta la a ka yũud me ye, la neba yeelame tɩ zĩni n tar-a. Ninsaal Biiga sẽn wa, a rɩtame la a yũuda, la neba yeelame t’a yaa yão-beed soaba la rã-yũuda.” Baa nin-kãensã sẽn da bɩ yĩngã wɛɛngẽ wã, a Zezi yeelame tɩ b ra maanda wa “kamba,” sẽn pa bɩ wã. Woto yĩng n kɩt t’a paase: “La yam soab tʋʋma n wilgd t’a tara yam.”—Matɩe 11:16-19.
4. Zĩ-bʋs la b yãt tɩ ned kẽnga taoor la a bɩɩme?
4 D sã n ges a Zezi goamã, d neeme tɩ ned sã n tar yam hakɩkã, sẽn wilgd tɩ ned bɩɩme wã, yaa tʋʋm nins a sẽn maandã, la biis nins a sẽn paamdã n yaa kaset ne rẽ. Rẽ wɛɛngẽ wã, ges-y saglg ning tʋm-tʋmd a Poll sẽn kõ a Tɩmote wã. A Poll sẽn sõdg yɛl nins a Tɩmote sẽn segd n baoã poore, a yeelame: “Wɩng ne bõn-kãense la f maan ne f sũur fãa, tɩ neba fãa yã tɩ fo bɩtame.” (1 Tɩmote 4:15) N-ye, kiris-ned sã n kẽngd taoor n debd bɩʋʋng zĩigẽ ‘neba fãa yãtame,’ bɩ yaa bũmb b sẽn tõe n bãng vẽenega. Wa vẽenem sẽn yãgde, kiris-ned sẽn bɩ pa bũmb sẽn solg ye. (Matɩe 5:14-16) Woto yĩnga, d na n yãa manesem kãsems a yiib pʋsẽ d sẽn tõe n kẽng taoor la d bɩ tɩ nebã fãa yã: 1) yaa bɩʋʋngã bãngrã, yɛlã võor wʋmb la yamã wɛɛngẽ, 2) yaa vʋʋsem sõngã biis pukri.
Tẽeb la yam vẽnegr a yembre
5. Wãn to la b tõe n wilg bɩʋʋng võore?
5 Gom-biis võor sɛb wʋsg sẽn yɩɩd bilgda bɩʋʋngã wa bũmb sẽn pidi, bũmb sẽn bɩ n ta zãng wa b sẽn datã. Wa d sẽn yã tɩ loogã, tɩɩg biig bɩɩme, a sã n wa bɩ n ta t’a halhaalã, a kõbgã, a yũugã, la a nooma yaa wa b sẽn dat t’a yɩ to-to wã. Woto yĩnga, bɩʋʋng tɩ loee ne sẽn yaa sõma wʋsgo, pidb zãnga, la zemsg zãng menga.—Ezai 18:5; Matɩe 5:45-48; Zak 1:4.
6, 7. a) Bõe n wilgd t’a Zeova sɩd rata ne a sũur fãa t’a balemdbã gill kẽng taoor n ta tẽebã bɩʋʋng zĩigẽ? b) Tẽebã bɩʋʋng bee wʋsg ne bõe?
6 Wẽnnaam a Zeova sɩd rata ne a sũur fãa t’a balemdbã kẽng taoor n ta tẽebã bɩʋʋng zĩigẽ. Sẽn na yɩl tɩ yɩ woto, a maana segl-kãsems kiris-neb tigingã pʋgẽ. Tʋm-tʋmd a Poll gʋlsa kiris-nebã sẽn be Efɛɛzã woto: “Bãmb kõo kẽer tɩ yɩ tʋm-tʋmdba, la kẽer bãmb no-rɛɛsdba, la kẽer koe-moondba, la kẽer pe-kɩɩmba, la kẽer karen-saam dãmba, Wẽnnaam neba bɩɩb yĩnga, la Wẽnnaam tʋʋmda yĩnga, la Kirist yĩnga sõngr yĩnga, hal tɩ tõnd fãa paam tẽeb a yembre, la yam vẽnegre n bãng Wẽnnaam Biigã, tɩ tõnd bɩ zãnga n zems wa Kirist sẽn zems zãngã. Dẽ, tõnd kõn leb n yɩ wa kamb sẽn ka yam sẽn sakd kareng buud toor-toor wa sobg sẽn dɩkd bũmbu, la neba belgre la b sɩlem wẽnga b sẽn baood weer tɩ belg neba ye.”—Efɛɛz rãmba 4:11-14.
7 Verse kãensã pʋsẽ, a Poll wilgame tɩ yɛl nins sẽn kɩt tɩ Wẽnnaam maan tẽeb segls a woto tigingã pʋgẽ wã yaa sẽn na yɩl me tɩ nebã fãa ‘paam tẽeb la yam vẽnegr a yembre,’ n “bɩ zãnga,” la b “zems wa Kirist sẽn zems zãngã.” Yaa woto maaneg bal la ziri tagsa la ziri zãmsgã pa na n belg tõnd wa kamb tẽebã wɛɛngẽ. Woto, d neeme tɩ kẽng taoor n yɩ kiris-ned sẽn bɩ wã bee wʋsg ne f sẽn na n “paam tẽeb a yembre, la yam vẽnegre n bãng Wẽnnaam Biigã.” Yɛl wʋsg n be a Poll saglsã pʋsẽ d sẽn segd n tũ.
8. Paam n yɩ ‘yembr’ tẽebã la yam vẽnegrã pʋgẽ baooda bõe maanego?
8 Pipi, sẽn mik tɩ d segd n ket n yaa ‘yembrã,’ kiris-ned sẽn bɩ segd n talla zems-n-taare, la a zems fasɩ ne a tẽed-n-taasã tẽebã ne yam vẽnegrã wɛɛngẽ. A pa pẽdgd tɩ b sak yẽ mengã tagsa n gãd-b kãn-kãe, sã n wa yaa Biiblã võor wʋmb wɛɛngẽ ye. Sẽn yaa lebende, a tara bas-yard zãng ne sɩd ning Wẽnnaam a Zeova sẽn tũnug ne a Biribl a Zezi Kirist la ‘tʋm-tʋmd sẽn tũud sɩd la sẽn tar yama’ n vẽnegã. D sã n dɩt tẽebã rɩɩb b sẽn kõ ‘wakat sẽn zems sasa’ wã n tũnug ne kiris-neb sɛbã, tigissã la tigis-kãsemsã, d tõe n kɩsa sɩd tɩ d ket n yaa ‘yembr’ ne d kiris-nin-taasã tẽebã la yam vẽnegrã pʋgẽ.—Matɩe 24:45.
9. Wilg-y ‘tẽebã’ yell a Poll sẽn gom a lɛtr ning a sẽn taas Efɛɛz rãmbã pʋgẽ wã võore.
9 Yiib-n-soaba, gom-biig ning sẽn yaa ‘tẽebã’ tɩ loee ne bũmb nins fãa tõnd sẽn tẽedã, “a yalem la a woglem la a zulum la a zãntlem sẽn yaa bũmb ninga.” (Efɛɛz rãmba 3:18; 4:5; Kolos rãmba 1:23; 2:7) Sɩda, wãn to la kiris-ned tõe n yɩ yembr ne a tẽed-n-taasã, a sã n tẽed bɩ a sakd ‘tẽebã’ babs sãnda bala? Woto rat n yeelame tɩ d pa segd n tags tɩ pipi yɛl nins tõnd sẽn zãms Biiblã pʋgẽ wã, bɩ tõnd sẽn paam sɩdã bãngr zugẽ-zugẽ bɩ bɛkã sekame ye. Sẽn yaa lebende, d segd n bao n bãnga segls nins fãa a Zeova sẽn tũnugd ne a siglgã n maana, n vaees a Gomdã sõma-sõma. D segd n modgame n paam n bãng Wẽnnaam daabã tɩ zems takɩ, la a sẽn na n maana võor wa d sẽn tõe tɛka. Rẽ baoodame me tɩ d rɩk sẽk n karem la d zãms Biiblã la sɛb nins sẽn tik Biiblã zugã, la d pʋʋs Wẽnnaam n kos a sõngr la a sor-wilgri, n kẽng kiris-neb tigissã wakat fãa, la d moon Rĩungã koe-noogã ne d sũur fãa n maan karen-biisi.—Yelbũna 2:1-5.
10. Gomd ning sẽn yaa “hal tɩ tõnd fãa paam” sẽn be Efɛɛz rãmba 4:13 pʋgẽ wã võor yaa bõe?
10 Tãab-n-soaba, a Poll sɩnga bõn-datlã sẽn tar nens a tãabã bilgr ne gomd sẽn yaa “hal tɩ tõnd fãa paam.” Gomd ning sẽn yaa “tõnd fãa” wã wɛɛngẽ, sebr sẽn wilgd Biiblã võor n yeel tɩ “pa nebã toor-toor ye, la yaa b fãa sẽn naag taaba.” Rat n yeelame tɩ tõnd ned kam fãa segd n modga wa a sẽn tõe tɛk n yɩ kiris-ned sẽn bɩ ne a saam-biis a taabã fãa. Sebr a yembr (The Interpreter’s Bible) yeta woto: “Paam n pid zãng tẽebã wɛɛngẽ wã pa bũmb f sẽn maand f yembr tɩ neb a taabã pa naag ye. Yaa wa yĩngã wil-yɛng sẽn pa tõe n bɩ tɩ sã n pa yĩngã gill ket n tara laafɩ a bɩʋʋngã pʋgẽ wã.” A Poll tẽega Efɛɛz kiris-nebã tɩ ra yaa “ne Wẽnnaam neba fãa” la b segd n mao n bãng tẽebã yɛl võor zãnga.—Efɛɛz rãmba 3:18a.
11. a) Bõe la kẽng taoor tẽebã wɛɛngẽ pa rat n yeele? b) Bõe la d segd n maan sẽn na yɩl n kẽng taoore?
11 D sã n ges a Poll goama, yaa vẽeneg tɩ kẽng taoor tẽebã wɛɛngẽ pa rat n yeel bal tɩ d pids d zugã ne bãngr wʋsg ye. Kiris-ned sẽn bɩ pa ned sẽn baood n na n wilg neb a taabã a bãngr ye. Sẽn yaa lebende Biiblã yeta woto: “Nin-sõng sor yaa wa sõ-pukri n paasd vẽenem hal tɩ ta sõ-bɩɩmde.” (Yelbũna 4:18) N-ye, yaa “sor[ã]” ‘vẽenem n paasde,’ pa nedã ye. D sã n ket n modgd n na n paam Wẽnnaam Gomdã bãngr vẽenem sẽn tar paasgã a Zeova sẽn kõt a nin-buiidã, d na n kẽnga taoor tẽebã wɛɛngẽ. Zĩ-kãng wɛɛngẽ wã, ket n pẽdgdẽ yaa kẽng taoore, la woto yaa bũmb tõnd fãa sẽn tõe n maane.—Yɩɩl Sõamyã 97:11; 119:105.
Puk-y “vʋʋsem sõng biisã”
12. Bõe yĩng tɩ vʋʋsem sõngã biis pukr tar yõodo, d tẽebã wɛɛngẽ taoor kẽngr pʋgẽ?
12 Yaa sɩd tɩ paam ‘tẽeb la yam vẽnegr a yembrã’ tara yõodo, la Wẽnnaam vʋʋsem sõngã biis pukr d vɩɩmã neng fãa pʋgẽ me yõod zema woto. Bõe yĩnga? Wa tõnd sẽn yã wã, yaa bɩʋʋngã sẽn pa tõe n solgã, la a tar yɛl sẽn pukd-a sẽn tõe n naf la a keng neb a taabã tẽebã yĩnga. Yaa sɩd tɩ tõnd sẽn dat n kẽng taoor tẽebã wɛɛngẽ wã d pa maood n na n wõneg neb sẽn bɩ bal bɩ sẽn wõnd b tara zʋg-sõma bal ye. Sẽn yaa lebende, d sã n bɩt tẽebã wɛɛngẽ, n tũud Wẽnnaam vʋʋsem sõngã sor-wilgri, toeeng kãseng n na n zĩnd tõnd manesmã la d tʋʋmã pʋsẽ. “Bɩ y kẽn ne Sɩɩg Sõngo, la yãmb kõn sak yĩnga ratem ye.” Woto la tʋm-tʋmd a Poll yeel-yã.—Galat dãmba 5:16.
13. Toeeng bʋg n wilgd vẽeneg tɩ ned kẽngda taoore?
13 A Poll kẽnga taoor n sõdg “yĩnga ratem biis [“yĩngã ratem tʋʋmã,” NW ]” sẽn yaa wʋsg la ‘vẽenesã.’ Nand tɩ ned wa bãng Wẽnnaam noyã yõodo, a vɩɩmã yaa wa dũniyã neb vɩɩm, tɩ tõe tɩ bũmb nins a Poll sẽn sõdgã kẽer bee a vɩɩmã pʋgẽ wʋsgo: “Yoobo la nin-yoolem la raglem la bõn-naands pʋʋsgo la bagre la beem la mo-beedo la sũ-kiiri la kisgri la no-koɛɛma la welgre la tẽeb toɛ-toɛya la zoe-bõne la dã-tɩgre la yão-beedo la bũmb sẽn wẽnd woto.” (Galat dãmba 5:19-21) La nedã sẽn bɩt tẽebã wɛɛngẽ wã, bilf-bilfã a tõogda “yĩngã ratem tʋʋmã” n ledg-b ne ‘vʋʋsem sõngã biisi.’ Toeeng kãng sẽn pukd tɩ b neẽ wã wilgda vẽeneg tɩ nedã kẽngda taoor n debd kiris-ned bɩʋʋngã zĩigẽ.—Galat dãmba 5:22.
14. Wilg-y “yĩngã ratem tʋʋmã,” la “vʋʋsem sõng biisã” võore.
14 D ges goam a yiibã neere, “yĩngã ratem tʋʋmã,” la “vʋʋsem sõng biisã,” (NW ). “Tʋʋmã” yaa ned sẽn maandã biisi. Rat n yeelame tɩ bũmb nins a Poll sẽn sõdg n yet tɩ yaa yĩngã ratem tʋʋmã yaa ned sẽn yãk yam n maan bũmb sẽn wat ne yɛl ninsã, bɩ ninsaal yĩngã sẽn pa zems zãngã sẽn tar pãng ning nedã zugã. (Rom dãmba 1:24, 28; 7:21-25) Sẽn yaa lebende, “vʋʋsem sõng biisã” wilgdame tɩ zʋg-sõma nins b sẽn sõdgã pa zʋg f sẽn tõog n bɩɩs bɩ nedemd manegr ye, la yaa Wẽnnaam vʋʋsem sõngã sẽn tʋm nedã zugã n wom bi-kãense. Wala tɩɩg sẽn na n wom biisi, b sã n ges a yell sõma wã, woto me, ned na n puka vʋʋsem sõngã biisi, vʋʋsem sõngã sã n tʋm a soabã vɩɩm pʋgẽ tɩ gɩdgr kaẽ ye.—Yɩɩl Sõamyã 1:1-3.
15. Bõe yĩng tɩ tar yõod tɩ d bɩɩs “vʋʋsem sõng biisã” fãa?
15 Bũmb a to d sẽn segd n ges ya a Poll sẽn tũnug ne gom-biig ning sẽn yaa “biis[ã]” n gom zʋg sõma nins a sẽn sõdgã yellã. Vʋʋsem sõngã pa womd biis toor-toor tɩ tõnd yãk d sẽn dat a soab ye. Zʋg sõma nins a Poll sẽn sõdg sẽn yaa nonglem, sũ-noogo, laafɩ, sũ-mare, nin-sõmblem, maan neere, tẽebo, sũ-bʋgsem la yõk-m-mengã fãa yõod zema taaba, la yaa bãmb sẽn lagem taab n sõngd kiris-ned t’a yeelg nin-paalgã. (Efɛɛz rãmba 4:24; Kolos rãmba 3:10) Woto, d tõe n wa mikame tɩ zʋg-kãensã kẽer pukda vẽeneg n yɩɩd tõnd vɩɩmã pʋgẽ, tõnd mengã zʋg bɩ d tʋlsmã sẽn yaa to-to wã yĩnga. La ne rẽ fãa, tara yõod tɩ d bɩɩs zʋg-sõma a taabã a Poll sẽn sõdgã. D sã n maan woto fãa, d na n puka Kirist nedemdã n yɩɩd d vɩɩmã pʋgẽ.—1 Pɩɛɛr 2:12, 21.
16. Yaa bõe la tõnd rata, d sẽn baood n na n yɩ kiris-neb sẽn bɩ wã pʋgẽ, la wãn to la d tõe n maan woto?
16 Bũmb sẽn tar yõod wʋsg la tõnd tõe n zãms a Poll goamã pʋgẽ, d sẽn baood n dat n yɩ kiris-neb sẽn bɩ wã. Tõnd sẽn baoodã pa bãngr wʋsg bɩ zʋg buud manegr ye, la yaa d tõog n paam Wẽnnaam vʋʋsem sõngã d vɩɩmã pʋgẽ tɩ gɩdgr ka be ye. Tõnd yamã la d tʋʋmã sẽn tũud Wẽnnaam vʋʋsem sõngã sor-wilgr tɩ ta zĩig ningã, yaa sẽn ta woto me la d bɩt tẽebã wɛɛngẽ. Wãn to la d tõe n wa maan woto? D segd n paka d sũurã la d yamã tɩ Wẽnnaam vʋʋsem sõngã tall pãng b zutu. Woto rat n yeelame tɩ d segd n kẽnga kiris-neb tigissẽ wã wakat fãa la d kẽes d mens b pʋsẽ. D leb n segdame n zãms Wẽnnaam Gomdã wakat fãa la d bʋgs a zugu, n bas t’a noyã wilg-d sor d manesmã ne neb a taabã pʋgẽ, la yam yãkr nins d sẽn maandã pʋgẽ. Rẽ, sɩd yaa woto la d na n kẽng taoor vẽeneg tɩ nebã fãa yã.
D kẽng taoor Wẽnnaam waoogr yĩnga
17. Tõnd sã n kẽng taoore, wãn to la rẽ ningd tõnd saasẽ Ba wã ziiri?
17 Sẽn na n baase, tõnd sã n kẽng taoor tɩ nebã fãa yã, wata ne ziir n kõ tõnd yĩngr Ba a Zeova, la pa tõnd mengã ye. Sɩd me, yaa yẽ n kɩt tɩ d tõe n ta tẽebã bɩʋʋng zĩigẽ. Yʋng ning sẽn deng a Zezi kũumã, a yeela a karen-biisã woto: “Yãmb sã n wom biis wʋsgo, m Ba na n paama waogre, la woto yãmb na n yɩɩ mam karem-biisi.” (Zã 15:8) Ne vʋʋsem sõngã biis b sẽn pukã, n paas b sẽn wom biis Rĩungã mooneg pʋgẽ wã, a Zezi karen-biisã ninga a Zeova ziiri.—Tʋʋma 11:4, 18; 13:48.
18. a) Tigis-bʋg b sẽn maand ne sũ-noog n be rũndã-rũndã? b) Yel-tood bʋs n be tigis-kãng pʋgẽ?
18 Rũndã-rũndã, a Zeova bark bee a nin-buiidã zugu, b sẽn kẽesd b mens tẽebã tigisg sẽn maand dũniyã gill zugã sasa. Sẽn na maan yʋʋm masã, yʋʋmd fãa, sẽn zems nin-paals 300 000 n dɩkd b mens n kõ a Zeova n wilg b sẽn dɩk b mens n kõ wã ne koom lisgu. Rẽ kõta tõnd sũ-noogo, la sãmbg sẽn ka be, woto noogda a Zeova sũur me. (Yelbũna 27:11) Baasg zãnga, sẽn na yɩl t’a kell n yɩ sũ-noog bũmb wakat fãa la pẽg a Zeova, nin-paals kãensã segd n ‘kẽna ne Kirista, n kɩ yẽga n yẽbg ne bãmba, la b kell n tall tẽeb kãn-kãe.’ (Kolos rãmba 2:6, 7) Rẽ wata ne yel-tood a yiib n kõ Wẽnnaam nin-buiidã. Pipi, y sã n deega lisg paalem, y na n sak n modgame tɩ ‘nebã fãa yã tɩ yãmb bɩtame’ bɩ? Yiib-n-soaba, yãmb sã n bee sɩdã pʋgẽ sẽn zems wakat a wãna, y na n modga y mengã n sõng nin-paalsã tẽebã wɛɛngẽ bɩ? Yɛl a yiibã fãa pʋsẽ, yaa vẽeneg tɩ d segd n yɩɩ tao-tao n ta bɩʋʋng zĩigẽ.—Filip rãmba 3:16; Hebre dãmba 6:1.
19. Zu-noog la bark bʋs la y tõe n paame, y sã n kẽng taoor tɩ nebã fãa yã?
19 Bark kãsems n gũud neb nins fãa sẽn tʋmd wʋsg n na n kẽng taoorã. Tẽeg-y t’a Poll togsa goam sẽn kengd raoodo, a sẽn sagl a Tɩmote t’a kẽng taoorã poore. A yeelame: “Gũus f meng ne koɛɛg ninga fo sẽn zãmsd nebã, la ges bõn-kãens n da bas ye, tɩ bõe, yaa woto la fo na n fãag f menga la neb nins sẽn kelgd foomã.” (1 Tɩmote 4:16) Y sã n mao neer n kẽng taoor vẽenega, yãmb me tõe n naagame n ning Wẽnnaam yʋʋrã ziir la y paam a barkã.
Y tẽrame bɩ?
• Wãn to la nebã fãa tõe n yã tɩ ned bɩɩ tẽebã wɛɛngẽ?
• Bãngr la võor wʋmb bʋg buud n wilgd tɩ ned bɩɩme?
• Wãn to la “vʋʋsem sõng biisã” pukr wilgd tɩ ned kẽngda taoor tẽebã pʋgẽ?
• Yel-toog bʋg la d segd n sake, d sẽn yɩt tao-tao n ta bɩʋʋng zĩigẽ wã sasa?
[Zãmsgã sogsgã]
[Foto, seb-neng 24]
Bɩʋʋng yaa bũmb sẽn pa solg nebã nifẽ
[Foto, seb-neng 27]
D kẽngda taoor tẽebã pʋgẽ, d sã n ket n tũud sɩdã b sẽn pukã
[Foto, seb-neng 28]
Pʋʋsgã sõngda tõnd tɩ d puk “vʋʋsem sõng biisã”